Letsatsi la ho Ikarabella le ka re Sebeletsa Molemo ka Mang?
“Ke ne ke tla etsa joang, hoja Molimo o no o ka tsoha, le hoja o no o ka batlisisa litaba, ke be ke tla re’ng ho oona?”—JOBO 31:14.
1. Ke hobane’ng ha rōna ba hlomohileng ka ho se nang thuso ke maemo re laba-labelang letsatsi la ho ikarabella bophelong ba rōna, hona tekanyong e kae?
LETSATSI la ho ikarabella ke ntho e ntle. Ba bangata har’a rōna ba labalabela hore lintho li lokisoe ka mokhoa o tla tlisetsa bohle molemo. E, letsatsi le joalo re ka le amohela ka thabo. Limpe, khatello, bolotsana, tse ntseng li etsoa lia re ama, ’me ha ho kamoo re ka ithusang eaba rea lopoloha. Re ke ke ra bitsa bafosi hore ba tle ho tla ikarabella. Re tšelisoa feela ke ’nete ea hore tšebetsong ho teng ntho e bitsoang “molao oa matšeliso.” Ka hona qetellong, ho tla etsoa ka toka. Oho, e se eka ho ka etsoa re sa phela! E, le hona e le lefatšeng lohle! Joale bohle ba tlatlapiloeng ba ka fumana molemo.
2. Ho ka boleloa eng ka tikoloho ea rōna ea tulisano le ea tlhaho, ho hopotsoe tšoho efe?
2 Kajeno tikoloho eo re ahileng ho eona e boemong bo bobe. Le sona sebaka se re potolohileng sa tlhaho sea silafatsoa le ho senngoa. Letsatsi la ho ikarabella ka sena le tlameha ho ba teng, haufinyane—re bolelloa joalo ke litsebi tsa sebaka se re potolohileng. Batho ba ke ke ba ’na ba ferekanya botsitso ba litokisetso tsa tlhaho tsa lefatše ntle ho hore ba kotule litholoana. Ho shoa ha tsamaiso eohle ea batho ho kentse letsoalo, lefatšeng le sa lokelang bophelo.
3. Ho ka boleloa eng ka ho ikarabella mabapi le boitšoaro, litokisetso tsa ntoa le ntho e ’ngoe e nkoang e ke ke ea angoa, e halalelang?
3 Re ka ’na ra nahana ka letsatsi la ho ikarabella le atamelang ka baka la ho oa boitšoarong bo botle ho etsahalang linaheng tsohle. Ka mokhoa o tšoanang, ka baka la libetsa tse etsoang ka bongata, tseo mokhatlo oa Machaba a Kopaneng e seng tšusumetso ea ho ho theola, empa ka lichaba tsohle li retelehela ho itšetleheng ka ho lula li lokile sesoleng bakeng sa tšireletseho. Leha ho le joalo, ho sa na le karolo e ’ngoe ea litaba tsa batho e tlang ho ikarabella, karolo eo ho ba bangata har’a rōna e bonahalang e le ntho e ke keng ea angoa, kaha e le ntho e kang e halalelang. Ke efe? Ke bolumeli!
4. Ke hobane’ng ha bolumeli bo lokeloa ke ho tšohanyetsoa ka letsatsi la ho ikarabella, ’me phello e tla ba efe ha hona ho etsahala?
4 Batho ba bangata ba ntse ba leleka bolumeli bophelong ba bona e le ntho e ’ngoe e sa sebetseng, e se nang thuso, le e bileng e leng kotsi. Leha ho le joalo, bolumeli bo lula e le matla a mang a matlahali bophelong ba batho. Ke ba seng bakae, haeba ba le teng, ba tsebang ho balehela tšusumetso ea bona. Bo ipakile bo ikarabella bakeng sa bobe bo bongata boitšoarong ba batho le ba lichaba hoo bo tšoaneloang ke ho tšohanyetsoa ka letsatsi la ho ikarabella. Ha hona ho etsahala, ho tla tšohanyetsa ba makholo a limillione, ’me pheletso e tla ba e sisimosang haholo.
5. (a) Bolumeli bo ipakahalitse e le matla a arohanyang ka ho fetisisa joang lefatšeng? (b) Ke hobane’ng ha bolumeli bo bongata ba Bojakane le bo bong bohle ba lefatše e ke ke ea e-ba ’nete kaofela le ho nepahala kaofela?
5 Paleng ea motho bolumeli bo ipakahalitse ho ba matla a arolang ka ho fetisisa lefatšeng. Bo arotse mehlobo, lichaba, merabe, meloko le tsona litho tsa lelapa. Kahoo bo entse hore batho ba arohane. Ho se tšoane ha bolumeli ho tsoetse mahloeo a fetisisang, likhethollano, ka mosoabi qhoebeshano e befileng, litoantšano tse nkileng makholokholo a lilemo ho tla fihlela joale. Le eona karolo ea lefatše ea bolumeli e bitsoang Bojakane e ntse e sa beelloe ka thōko. Ha e le hantle, e bile bona bo totobalang haholo ntlheng ena. Ka lebaka la lintoa tse tšabehang sebaka sa bona se qaphalelitsoe ke maoatle a mali a batho. Ho ikarabellang ntlheng ena ke ho arohana ha bona ka makholo-kholo a lihlopha tsa bolumeli. Ka bohona, ho hloka kopano hona ho pakahatsa hore ha bo seo bo ipolelang hore bo sona, hore ke Bokreste. Babele ea Bojakane ea bolumeli le bolumeli bo sa tšoaneng ba lefatše lena lohle bo ne bo ke ke ba nepahala kaofela. ’Nete e ’ngoe feela, e feletse hobane e-ea lumellana ka boeona.
6. (a) Ke hobane’ng ha lichaba tsohle kajeno li lokela ho talimana le letsatsi la ho ikarabella, hona kaofela hona joale? (b) Ho ikarabella ha lichaba ho tlameha ho etsoa le boleng ba mofuta ofe?
6 Bolumeli bo sa utloaneng, tikoloho ea tlhaho, melao ea boitšoaro, tsamaiso ea litaba tsa batho—lichaba tsohle li amehile ke lintho tsena tse nang le litholoana. Ha ho sechaba se bonahalang se se molato. Tsohle li ipakahalitse e le batlōli ba melao e nepahetseng ea boitšoaro le ea puso. Tumellanong le mohlala oa pale eohle ea nakong e fetileng ea batho, lichaba tsohle li tlameha ho thulana le letsatsi la ho ikarabella. Ke hona joale feela, ka mekhoa eohle e potlakileng ea puisano le ho tsamaea le ho itšetleha ha sechaba se seng ka tse ling, lichaba li tlang ho kena letsatsing la ho ikarabella hammoho. Empa ke eng kapa ke mang ea tla li etsa hore li ikarabelle ho eena? Molimo oa tsona oa bosechaba kapa sehlopha sa melimo ea tsona ea bosechaba? Seo seo ho thoeng ke “khomo e halalelang” ea thuto ea mahlale? Machaba a Kopaneng, kapa boemeli leha e le bofe bo bong ba machaba ba ho laola likamano pakeng tsa lichaba tsa Bokomonisi le lichaba tsa puso ea leruo kapa pakeng tsa sehlopha se sebetsang le se okametseng mosebetsi? Le hanyenyane, hobane ho hlōleha ha lintho tse joalo ke hona ho kentseng batho tsielehong ea bona ea hona joale. Ka ho utloahalang, he, e tlameha hore e be boleng bo bong bo fetang mathata ’ohle a metseng ka metso a batho le bo sa eeng ka leeme melokong le lichaba, Bohlale bo matla ’ohle bo ka fetolang letsatsi lena la ho ikarabella le tla phomotsa barati bohle ba ho loka.
SE HLOKAHALANG HORE HO IKARABELLA HO SE BE LEEME
7. (a) Lichaba li tla be li le boemong ba mofuta ofe ha ho fihla letsatsi la ho ikarabella leo re buang ka Iona mona? (b) Ke Matla a Mofuta ofe a Boahloli ho tlang ho lokela hore a tsamaise ho ikarabella?
7 Mona ha re bue ka “Letsatsi la Kahlolo” le inahaneloang lefatšeng la moea kamor’a ho shoa ha baahi ba lichaba. Re bua ka letsatsi la ho ikarabella la lichaba tsohle ha li sa ntsane li tsoela pele ’me li loanela ho lelefatsa ka ho sa feleng puso ea tsona ka mokhoa oa mebuso eo li ikhethelang eona. Na lichaba li tla pholoha letsatsi le tlang la ho hlahlojoa le la ho lokisa litaba le Moholo oa Boahloli ea phahametseng motho eo lichaba tsohle li ikarabellang ho eena? Eo ke potso e re amang bohle re le motho ka mong, rōna bao re leng litho tsa lichaba tsena tse jereng molato. Kahoo, bakeng sa letsatsi la ho ikarabella, re batla Moholo oa Boahloli ea phahametseng melimo eohle ea lichaba e se nang molemo, Ea ke keng a thetsoa ka limpho tsa ba ruileng, lichaba tse tsoetseng pele haholo, Ea sa emeng a tšohile mebuso e meholo e hlometseng ka matla ea lefatše e kang Linaha tse Kopaneng tsa Amerika le Russia ea Bokomonisi.
8. (a) Kahoo, ke mang eo lipelo tsa rōna li mo labalabelang e le Moahloli oa ho Qetela le Motsamaisi oa toka? (b) Ntle ho boleng bo joalo, ke lintho life ka leholimo le lefatše tseo ho ka ikarabelloang ho tsona ka ho utloahalang?
8 E, seo lipelo tsa rōna ka tlhaho li se batlang ke hore Boleng bo Phahameng ba bokahohleng bo sebeletse e le Moahloli oa ho Qetela le Molaoli oa toka. Ha re nahana ka hona, ekaba ke’ng se neng se ka etsoa, e seng ke lefatše la rōna le lenyenyane feela empa bokahohleng bohle ntle ho Boleng bo Phahameng joalo, bo kang Morena oa Bokahohle ea joalo? Kutloano, taoleho, ho sebetsa ka nako e nepahetseng ha bokahohle ba rōna ho ne ho tla ba hokae ntle ho Monei-molao ea joalo oa bokahohle? Ho sebelisana ho molemo ha lintho tsohle tse sebelisanang tse etsang tikoloho ea rōna ea tlhaho ho ne ho tla ba hokae ntle ho Mohlophisi ea joalo le ’Mōpi, Mohloli o le mong oa bophelo bakeng sa liphoofolo, limela le libopuoa tsohle tsa batho? Ho ne ho ke ke ha e-ba teng ho hang. Boteng ba tsona bo ne bo ke ke ba nkoa e le letho ntle ho Boleng bo joalo bo Phahameng le bo Matla ’ohle!
9. (a) Boteng bo se nang bokhutlo ba Boleng bo joalo bo bontšoa joang? (b) Moshe o ile a mo bitsa eng ka nepo, ’me o amana joang le lihlopha tsohle tsa lichaba?
9 Bohlokoa bo ke keng ba latoloa ba Boleng bo joalo ha boa ka ba bo qobella hore bo be teng, empa boteng ba pōpo ena eohle pele ho hlaha motho lefatšeng bo pakahatsa le ho bontša boteng ba hae ba ka ho sa feleng le tšebetso. Ke ka nepo a bitsoang “Molimo oa melimo, le Morena oa marena.” Ke ka mokhoa oo a ileng a bitsoa ka oona ke monei molao ea tsebisahalang Moshe oa mehleng ea boholo-holo. Papiso e joalo Moshe o ne a ka e etsa ka bohlale, hobane eena ka boeena o ne a tloaelane le melimo ea Egepeta ea boholoholo ’me hape o ne a rutiloe “bohlale bohle joa ba-Egepeta.” (Deut. 10:17; Lik. 7:22) Makholo a lilemo hamorao Molimo ona o phahameng o ile oa tlisoa tlhokomelong ea lekhotla le phahameng la Greece ea boholo-holo, lekhotla le ileng la lula Leralleng la Mars Athene. Hona e bile ha moapostola oa Mokreste Pauluse a ne a bolella lekhotla leo ho re: “Molimo o entseng lefatše le tsohle tse ho Iona, . . . O entse mefuta eohle ea batho ka mali a le mang ho aha sebakeng sa lefatše.” (Lik. 17:24-26) Ka baka la bophahamo ba hae holim’a lihlopha tsohle tsa lichaba o bitsoa “Morena oa lichaba.”—Jer. 10:7.
10. Ke hobane’ng ha ‘Morena enoa oa lichaba’ a e-na le hona ho nka mebuso eohle e meholo ea sesole ea bopolotiki e le lira tsa hae kajeno?
10 Ho hongata ka Molimo ona o phahametseng lichaba re ka ho bala ka Bukeng e halalelang e ngotsoeng ke Moshe le Pauluse le banna ba bang bao, mabakeng a mangata, e leng lipaki tse boneng ka mahlo liketsahalo tseo ba neng ba li ngola bakeng sa boitsebiso ba rōna kajeno. Ha ho lichaba tse ka emang pel’a Molimo ona. O tsebile ho bontša matla a oona holim’a mebuso ea lefatše e kang Egepeta, Assyria le Babylona ea boholo-holo. Ke bothoto ho nahana hore e ne e mpa e le molimo o mong feela oa pale ea khale le hore o ile oa feta le ho ngoloa ha buka ea ho qetela ea Bibele lilemong tse fetileng tse makholo a 19. Molimo ona ke o sa shoeng, o bileng teng ka booona. Kajeno o na le hona ho nka e le lira tsa oona mebuso eohle e phahameng ea bopolotiki e matla ea lefatše la rōna la kajeno. E le “Morena oa lichaba,” o tla li bitsa tsohle hore li tle li ikarabelle. Barati bohle ba ho loka le molemo ba tla tleloa ke se lokileng ka ho sa feleng.
MOEMELI OA MOLIMO EO HO TLA IKARABELLOA HO EENA
11. Ho ea ka Liketso 17:31, Molimo o ikhethetse eng bakeng sa letsatsi leo la ho ikarabella, ’me o fane ka bopaki bofe?
11 Bakeng sa letsatsi leo le tlang la ho ikarabella, Molimo o khethile moemeli oa motho, ea tlang ho ahlola le eena. Moapostola oa Mokreste Pauluse o ile a supa motlatsi enoa ha a boetse a re ho Lekhotla le Phahameng Leralleng la Mars, Athene, Greece: “[Molimo] o beile letsatsi leo ka Iona a tla ahlola lefatše lohle ka toka, ka monna eo a mo khethileng, ’me o neetse bohle bopaki ka ho mo tsosa bafung.”—Lik. 17:31, phet. e ncha.
12. Ke hobane’ng ha boteng ba bopaki e se ntho e ka itlhohlolloang, joalokaha ho bile joalo ka baahloli ba Bagerike ba ileng ba mamela Pauluse?
12 Ke “bopaki” bofe bo tsotehang haholoanyane boo Molimo o matla ’ohle o neng o ka bo nea baahi ba lefatše ba letsatsi le beiloeng la kahlolo bo fetang hore a tsose eo a tlang ho ahlola le eena lefung la ho shoela tumelo? Feela ka lebaka la hobane re ka ’na ra ba le maikutlo a fapaneng a bolumeli litabeng, ha rea lokela ho talima “bopaki” ba Molimo e le ntho e ’ngoe eo re ka itlhohlollang eona joaloka bongata ba baahloli bao ba Lekhotla le Phahameng Leralleng la Mars. “Bopaki” bona bo fanoe ke “Morena oa lichaba.” Hase ntho e ka songoang ka hore ha e lumellane le thuto ea mahlale kapa ke e tšehisang. Lekholong la pele la lilemo C.E. ho bile teng lipaki tse fetang 500 tse boneng ka mahlo boteng ba “bopaki” bona bo tsoang ho Molimo, ho kopanyelletsa le moapostola Pauluse ka boeena.
13, 14. (a) Tiisong ea bopaki ba Molimo, ke hobane’ng ha Jesu Kreste ea tsositsoeng a se lefatšeng kajeno? (b) Ke hobane’ng ha Molimo o sa lula o le mong sebakeng sa oona sa moea?
13 “Monna” eo tsoho ea hae bafung e leng “bopaki” ba letsatsi le ‘beiloeng’ la kahlolo o tsejoa e le Jesu Kreste. (1 Ba-Kor. 15:3-8, 12-20) Lebaka leo a seng teng lefatšeng ka lona kajeno ke hobane o ile a etsa bophelo ba hae bo phethahetseng ba botho sehlabelo ’me a tsosoa, e le hore batho ba shoeleng le bona ba ka tsoha ho kena monyetleng oa bophelo bo sa feleng lefatšeng le hloekisitsoeng le tlang ho fetoloa le etsoe paradeise ea lefatše lohle. Moputso oa hae e bile hore a phahamisetsoe leholimong ’me o ka letsohong le letona la Moahloli ea Phahameng, Molimo o nang le matla a tsoho. Jesu Kreste o ipoletse e le “mora . . . ea tsoetsoeng a ’notši” oa Molimo hape e le “hloho ea libopuoa tsa Molimo.” (Joh. 3:16; Tšen. 3:14) Ho tlile joang?
14 Ke kahobane ke eena letsibolo la pōpo ea Molimo leholimong eaba joale Molimo o mo sebelisa e le mosebetsi hammoho le Eena ha a etsa lintho tse ling tsohle, ho kopanyelletsa le lefatše la rōna le baahi ba Iona ba pele, Adama le Eva. (Ba-Kol. 1:15-18) Ho boptjoa ha mangeloi a leholimo a sa bonahaleng ho tlile pele ho ho bōptjoa ha batho. Ka baka la ho bopa “Mora ea tsoetsoeng a ’notši” oa hae le mangeloi ’ohle a halalelang, Molimo ha o-oa lula o le mong sebakeng sa oona sa moea. Ho latela tlaleho ea Bibele, mangeloi ana a phahametseng batho a baloa ka makholo a limillione.—Pes. 104:4; Dan. 7:9, 10; Ba-Heb. 1:7; 12:22.
15. Ke joang Mora oa Molimo ea tsoetsoeng a le mong a kileng a etsoa ea “tlasana ho mangeloi”?
15 Mangeloi ao a baloang ka bongata a tla be a tšehelitse Molimo le ho emela taelo letsatsing la Molimo la hore lichaba tsohle tsa lefatše li ikarabelle. Hape a tšebeletsong ea eo a tlang ho ahlola le eena eo a tlang ho ahlola ka eena lefatše leo ho ahiloeng ho Iona ka letsatsi leo a le beileng. (Matt. 25:31, 32) Ha Molimo ka mohlolo o rōmela Mora oa oona ea tsoetsoeng a le mong hore a tle ho tla ba motho ea phethahetseng lefatšeng ka ho tsoaloa ke moroetsana oa Mojode, Mora enoa oa Molimo o ile a etsoa ea “tlasana ho mangeloi.”—Ba-Heb. 2:9; Pes. 8:4, 5.
16. Jesu Kreste o tsoselitsoe boemong bofe, hona ka morero ofe o molemo?
16 Leha ho le joalo, boemo ba Mora enoa ea tsoetsoeng a le mong oa Molimo ke bofe kajeno—hona joale? Molimo o mo tsoselitse ho ea setulong sa leholimo se bileng se phahameng le ho feta sa mangeloi, ka baka la ho ipakahatsa a tšepahala ho Molimo ho isa lefung la sehlabelo a se na molato. Hore Mora enoa oa Molimo ea kang konyana a ka fetisetsa melemo ea sehlabelo sa hae ho batho bohle, Molimo o ile oa mo tsosa ka letsatsi la boraro a se a se joale ka motho kaha o ne a entse sebopeho sa hae sa botho sehlabelo sa ka ho sa feleng. Ka hona Molimo oa mo tsosetsa bophelong ba leholimo, ho se shoeng le bophahamong bo boholo ho ba mangeloi ’ohle. (1 Pet. 3:22) Kahoo o ne a ka sebeletsa e le “peō” bakeng sa ho hlohonolofatsa lichaba tsohle tsa lefatše.—Gen. 22:18; Ba-Gal. 3:8-16.
17. Ho Ba-Heberu 1:3-9, Pauluse o ile a ngola eng ka ho tlotlisoa ha Jesu Kreste e le Mora oa Molimo?
17 Kahoo, he, na re ke ke ra thabela ho tlotlisoa hona ha Jesu Kreste maholimong? E, hobane joale re na le pono e khanyang haholoanyane ka bophelo ba kamoso. Moapostola oa Mokreste Pauluse, eo ka mohlolo a ileng a bona Jesu Kreste ea tsositsoeng, o ile a ngola ka tlotliso ea hae. Lengolong le neng le ea ho Ba-Heberu ba neng ba amohetse Jesu e le Messia oa boprofeta ba Bibele, Pauluse o ngolile, a re: “Itse hobane a etse hlatsuo ea libe tsa rōna, o ile ho lula ka letsohong le letona la Boholo bo holimo; a etsoa ea ka holimo ho mangeloi: joale ka ha lebitso leo a le ruileng ka mokhoa oa lefa le fetisa la ’ona ka boholo. . . . Athe ha e le ka mangeloi, o itse: O etsa mangeloi a oona meea e fokang, le bahlanka ba oona malakabe a mollo. Empa ha e le ka Mora, o itse: Molimo, terone ea hao e tiile ka ho sa feleng, ’me lere la ’muso oa hao ke lere la ho loka, u ratile ho loka, ’me u hloile bokhopo; ka baka leo, Molimo, Molimo oa hao o u tlotsitse ka oli ea nyakallo ka holim’a bohle ba nang le kabelo le uena.”—Ba-Heb. 1:3-9.
18. Ka Mora enoa, Molimo o tla etsa joang mabapi le letsatsi le tlang la ho ikarabella?
18 Ka Morena enoa ea phahametseng mangeloi e le Moahloli ea mo tlatsang, Molimo o tla etsa hore letsatsi le tlang la ho ikarabella bakeng sa lichaba tsohle le re sebeletse molemo o sa feleng.
[Setšoantšo se leqepheng la 7]
Ho Ahloloa ha Baahi Bohle ba Lefatše ka ho Loka ho Tiisoa ka Lefu, Kepelo le Tsoho Tsa Kreste