106 Msifuni Yah!
Mshukuruni Yehova, kwa maana yeye ni mwema;+
Upendo wake mshikamanifu unadumu milele.+
2 Ni nani anayeweza kutangaza kikamili matendo ya Yehova yenye nguvu
Au kutangaza matendo yake yote yanayostahili sifa?+
3 Wenye furaha ni wale wanaotenda haki,
Ambao sikuzote wanatenda yaliyo sawa.+
4 Nikumbuke, Ee Yehova, unapowaonyesha kibali watu wako.+
Nitunze kwa matendo yako ya wokovu,
5 Ili nifurahie wema unaowaonyesha watu wako uliowachagua,+
Ili nishangilie pamoja na taifa lako,
Ili nikusifu kwa fahari pamoja na urithi wako.
6 Tumetenda dhambi kama mababu zetu;+
Tumetenda kosa; tumetenda uovu.+
7 Mababu zetu kule Misri hawakuthamini kazi zako zinazostaajabisha.
Hawakukumbuka upendo wako mwingi mshikamanifu,
Bali waliasi baharini, kando ya Bahari Nyekundu.+
8 Lakini aliwaokoa kwa ajili ya jina lake,+
Ili kufanya nguvu zake zijulikane.+
9 Aliikemea Bahari Nyekundu, ikakauka;
Aliwaongoza katika vilindi vyake kana kwamba wanapitia jangwani;+
10 Aliwaokoa kutoka mikononi mwa adui yao+
Na kutoka mikononi mwa adui aliwakomboa.+
11 Maji yaliwafunika maadui wao;
Hakuna hata mmoja wao aliyeokoka.+
12 Kisha wakawa na imani katika ahadi yake;+
Wakaanza kuimba sifa yake.+
13 Lakini walisahau haraka mambo aliyotenda;+
Hawakungojea ushauri wake.
14 Walifuata tamaa zao za kichoyo nyikani;+
Walimjaribu Mungu jangwani.+
15 Aliwapa walichoomba,
Lakini akawapiga kwa ugonjwa uliowadhoofisha.+
16 Walimwonea wivu Musa kambini
Na Haruni,+ mtakatifu wa Yehova.+
17 Kisha dunia ikafunguka na kummeza Dathani
Na kuwafunika wale waliokusanyika pamoja na Abiramu.+
18 Moto uliwaka katika kundi lao;
Mwali wa moto ukawateketeza kabisa waovu.+
19 Walitengeneza ndama kule Horebu
Na kuiinamia sanamu ya chuma;+
20 Waliubadili utukufu wangu
Kwa mfano wa ng’ombe dume anayekula nyasi.+
21 Walimsahau Mungu+ Mwokozi wao,
Aliyetenda mambo makuu nchini Misri,+
22 Kazi zinazostaajabisha katika nchi ya Hamu,+
Mambo yanayoogopesha kwenye Bahari Nyekundu.+
23 Alikuwa karibu kuamuru waangamizwe,
Lakini Musa, mchaguliwa wake, akaingilia kati
Ili kuzuia hasira yake inayoangamiza.+
24 Kisha wakaidharau ile nchi inayotamanika;+
Hawakuwa na imani katika ahadi yake.+
25 Waliendelea kunung’unika katika mahema yao;+
Hawakuisikiliza sauti ya Yehova.+
26 Kwa hiyo akainua mkono wake na kuapa kuwahusu
Kwamba angewaangusha nyikani;+
27 Angewaangusha wazao wao miongoni mwa mataifa,
Naye angewatawanya katika nchi mbalimbali.+
28 Kisha wakajiunga na ibada ya Baali wa Peori,+
Nao wakala dhabihu zilizotolewa kwa waliokufa.
29 Walimkasirisha kwa matendo yao,+
Na pigo likazuka miongoni mwao.+
30 Lakini Finehasi alipoinuka na kuingilia kati,
Pigo hilo lilikomeshwa.+
31 Na jambo hilo likahesabiwa kwake kuwa uadilifu
Katika vizazi vyote milele.+
32 Walimkasirisha kwenye maji ya Meriba,
Na mambo yakamwendea Musa vibaya kwa sababu yao.+
33 Waliitia uchungu roho yake,
Naye akaongea bila kufikiri kwa midomo yake.+
34 Hawakuyaangamiza mataifa,+
Kama Yehova alivyokuwa amewaamuru.+
35 Lakini walichangamana na mataifa hayo+
Na kuzikubali njia zao.+
36 Waliendelea kuabudu sanamu zao,+
Nazo zikawa mtego kwao.+
37 Waliwatoa dhabihu wana wao
Na mabinti wao kwa roho waovu.+
38 Waliendelea kumwaga damu isiyo na hatia,+
Damu ya wana wao na mabinti wao wenyewe
Ambao waliwatoa dhabihu kwa sanamu za Kanaani;+
Na nchi ikachafuliwa kwa umwagaji wa damu.
39 Wakawa wachafu kwa sababu ya kazi zao;
Walifanya ukahaba wa kiroho kwa matendo yao.+
40 Kwa hiyo hasira ya Yehova ikawaka dhidi ya watu wake,
Naye akauchukia sana urithi wake.
41 Aliwatia tena na tena mikononi mwa mataifa,+
Ili wale waliowachukia waweze kuwatawala.+
42 Maadui wao waliwakandamiza,
Nao wakatiishwa chini ya nguvu zao.
43 Aliwaokoa mara nyingi,+
Lakini walikuwa wakiasi na kukosa kutii,+
Nao walikuwa wakifedheheshwa kwa sababu ya makosa yao.+
44 Lakini alikuwa akiona taabu yao+
Na kusikia kilio chao cha kuomba msaada.+
45 Na kwa ajili yao alikuwa akikumbuka agano lake,
Naye alikuwa akiwahurumia, akichochewa na upendo wake mwingi mshikamanifu.+
46 Alikuwa akisababisha wahurumiwe
Na wote waliowachukua mateka.+
47 Tuokoe, Ee Yehova Mungu wetu,+
Na kutukusanya kutoka katika mataifa+
Ili tulishukuru jina lako takatifu
Na tushangilie kukusifu wewe.+
48 Yehova, Mungu wa Israeli, na asifiwe
Kwa umilele wote.+
Na watu wote waseme, “Amina!”
Msifuni Yah!