Mga Awit

37 Huwag kang magalit* dahil sa masasamang tao

O mainggit sa mga gumagawa ng masama.+

 2 Mabilis silang matutuyot na gaya ng damo+

At mangunguluntoy na gaya ng berdeng damo.

 3 Magtiwala ka kay Jehova at gawin mo ang mabuti;+

Tumira ka sa lupa* at maging tapat.+

 4 Magkaroon ka ng masidhing kasiyahan kay Jehova,

At ibibigay niya sa iyo ang mga kahilingan ng puso mo.

 5 Ipagkatiwala* mo kay Jehova ang landasin mo;+

Manalig ka sa kaniya, at siya ang kikilos para sa iyo.+

 6 Pasisinagin niya ang iyong katuwiran na gaya ng bukang-liwayway,

At ang iyong katarungan na gaya ng araw sa tanghaling-tapat.

 7 Manatili kang tahimik sa harap ni Jehova+

At hintayin mo siya nang may pananabik.*

Huwag kang magalit sa taong

Nagtatagumpay sa mga pakana niya.+

 8 Alisin mo ang galit at huwag ka nang magngalit;+

Huwag kang mayamot at gumawa ng masama.*

 9 Dahil ang masasama ay lilipulin,+

Pero ang mga umaasa kay Jehova ang magmamay-ari ng lupa.+

10 Kaunting panahon na lang at ang masasama ay mawawala na;+

Titingnan mo ang dati nilang kinaroroonan,

Pero hindi mo sila makikita roon.+

11 Pero ang maaamo ang magmamay-ari ng lupa,+

At mag-uumapaw ang kanilang kaligayahan dahil sa lubos na kapayapaan.+

12 Ang masama ay nagpapakana laban sa matuwid;+

Nagngangalit ang mga ngipin niya rito.

13 Pero pagtatawanan siya ni Jehova,

Dahil alam Niyang darating ang araw niya.+

14 Hinuhugot ng masasama ang mga espada nila at binabaluktot* ang mga pana nila

Para pabagsakin ang mga naaapi at ang mga dukha,

Para patayin ang mga namumuhay nang matuwid.

15 Pero ang sarili nilang espada ang tatarak sa puso nila;+

Mababali ang mga pana nila.

16 Mas mabuti ang kaunti ng taong matuwid

Kaysa sa kasaganaan ng maraming masasama.+

17 Dahil ang mga bisig ng masasama ay mababali,

Pero aalalayan ni Jehova ang mga matuwid.

18 Alam ni Jehova ang pinagdadaanan* ng mga walang pagkukulang,

At ang mana nila ay mananatili magpakailanman.+

19 Hindi sila mapapahiya sa panahon ng kapahamakan;

Marami silang makakain sa panahon ng taggutom.

20 Pero ang masasama ay malilipol;+

Ang mga kaaway ni Jehova ay maglalahong gaya ng kagandahan ng mga pastulan;

Maglalaho silang gaya ng usok.

21 Ang masama ay nanghihiram at hindi nagbabayad,

Pero ang matuwid ay bukas-palad* at mapagbigay.+

22 Ang mga pinagpapala Niya ang magmamay-ari ng lupa,

Pero ang mga isinusumpa Niya ay lilipulin.+

23 Ginagabayan* ni Jehova ang mga hakbang ng isang tao+

Kapag nalulugod siya sa landasin nito.+

24 Mabuwal man siya, hindi siya susubsob,+

Dahil inaalalayan siya ni Jehova sa kamay.*+

25 Bata ako noon, at ngayon ay matanda na,

Pero wala pa akong nakitang matuwid na pinabayaan,+

At wala akong nakitang anak niya na namamalimos ng tinapay.*+

26 Lagi siyang nagpapahiram nang maluwag sa loob,+

At pagpapalain ang mga anak niya.

27 Talikuran mo ang masama at gawin mo ang mabuti,+

At maninirahan ka sa lupa magpakailanman.

28 Dahil iniibig ni Jehova ang katarungan,

At hindi niya iiwan ang mga tapat sa kaniya.+

Palagi silang babantayan;+

Pero ang mga inapo ng masasama ay lilipulin.+

29 Ang mga matuwid ang magmamay-ari ng lupa,+

At titira sila roon magpakailanman.+

30 Ang bibig ng matuwid ay nagbibigay ng karunungan,*

At ang dila niya ay nagsasalita tungkol sa katarungan.+

31 Ang kautusan ng kaniyang Diyos ay nasa puso niya;+

Hindi siya madudupilas.+

32 Inaabangan ng masama ang matuwid

Dahil gusto niya itong patayin.

33 Pero hindi hahayaan ni Jehova na mahulog ang matuwid sa kamay niya,+

At hindi Niya ito hahatulang nagkasala kapag dinala ito sa hukuman.+

34 Umasa ka kay Jehova at lumakad ka sa kaniyang daan,

At itataas ka niya at mamanahin mo ang lupa.

35 Nakakita ako ng malupit at masamang tao

Na gaya ng isang mayabong na puno sa lupang tinubuan nito.+

36 Pero bigla siyang pumanaw, at wala na siya;+

Hinanap ko siya nang hinanap, pero hindi ko siya nakita.+

37 Masdan mo ang walang kapintasan,*

At tingnan mo ang matuwid,+

Dahil ang kinabukasan ng taong iyon ay magiging payapa.+

38 Pero ang lahat ng masuwayin* ay pupuksain;

Walang kinabukasan ang masasamang tao.+

39 Si Jehova ang nagliligtas sa mga matuwid;+

Siya ang tanggulan nila sa panahon ng pagdurusa.+

Ililigtas niya sila mula sa masasama at sasagipin sila,

Dahil nanganganlong sila sa kaniya.+