雅各書

4 你哋當中有戰爭同爭鬥，禍根係咩呢？唔係就係引起你哋內心*掙扎嘅有罪*慾望咩？ 2 呢個就係點解，你哋渴求，但係得唔到。你哋一直有仇恨*，一直有貪念，不過都係得唔到。你哋成日爭鬥作戰。你哋得唔到，係因為冇祈求。 3 就算你哋祈求，都係唔會得到，因為你哋為咗錯誤嘅目的祈求，想用嚟滿足你哋有罪嘅*慾望。

4 對上帝不忠*嘅人啊，唔通你哋唔知道同世俗友好，就係同上帝敵對咩？所以，邊個想同世俗做朋友，邊個就令自己成為上帝嘅敵人。 5 聖經話：「我哋嘅內心有妒忌嘅傾向，令我哋有各種貪念。」唔通你哋認為聖經噉樣講係無緣無故㗎咩？ 6 不過，上帝所賜嘅分外恩典，力量就更加強。所以聖經話：「上帝同高傲嘅人為敵，但係就賜分外恩典俾謙卑嘅人。」

7 所以你哋要順服上帝，反抗魔鬼，魔鬼就會離開你哋逃跑嘞。 8 你哋要親近上帝，上帝就會親近你哋。有罪嘅人啊，要令你哋嘅手潔淨；三心兩意嘅人啊，要令你哋嘅心純潔。 9 你哋應該覺得痛苦，要哀痛哭泣，歡笑應該變成哀痛，喜樂要化為沮喪。 10 要喺耶和華*面前謙卑，佢就會令你哋得到榮耀*。

11 各位弟兄，唔好再互相批評嘞。批評弟兄或者譴責*弟兄嘅，就係批評法律、譴責法律。如果你譴責法律，就唔係遵守法律，而係做咗審判官嘞。 12 賜下法律、施行審判嘅，只有一位，就係有能力拯救人同埋毀滅人嘅上帝。但係，你係邊個，竟然夠膽譴責其他人？

13 你哋有人話：「今日或者聽日，我哋要去某座城，喺嗰度住一年，做生意賺錢。」 14 其實聽日有咩事發生喺你哋身上*，你哋都唔知道。你哋只係一片霧氣，出現一陣間就消失。 15 相反，你哋應該話：「如果係耶和華*嘅意思，我哋就可以繼續有生命，可以做呢件事或者嗰件事。」 16 但係而家你哋竟然傲慢噉自誇，仲引以為榮。噉樣嘅自誇都係邪惡㗎。 17 所以，人如果知道乜嘢係啱嘅*，但係唔去做，呢個就係佢嘅罪嘞。