Roma

5 Kaya, ngunyan na ipinahayag na kitang matanos dahil sa pagtubod, magdanay kita sa pakipagkatuninungan* sa Diyos paagi sa satuyang Kagurangnan na Jesu-Cristo, 2 na huli sa pagtubod niyato sa saiya nabuksan an dalan para mag-ako kita kan daing kapantay na kabuutan na ini na ngunyan naeeksperyensiyahan na niyato; asin mag-ugma* kita huling may paglaom kitang makamtan an kamurawayan nin Diyos. 3 Bako lang iyan, kundi mag-ugma* kita dawa may mga kasakitan, huling aram niyato na an kasakitan nagbubunga nin pakatagal; 4 an pakatagal nagbubunga nin pag-uyon nin Diyos; an pag-uyon nin Diyos nagbubunga nin paglaom, 5 asin an paglaom na iyan dai minaresulta sa pagkadisganar; huli ta an satuyang puso pinapano kan pagkamuot nin Diyos paagi sa banal na espiritu na itinao sa sato.

6 Huling an totoo, mantang kita mga maluya pa, si Cristo nagadan sa itinalaan na panahon para sa mga parakasala. 7 Huli ta haros mayo nin siisay man an magigin andam na magadan para sa sarong matanos na tawo; tibaad pa gayod sa sarong marahay na tawo igwa nin magigin andam na magadan. 8 Alagad dinadagka kita nin Diyos na akuon an saiyang pagkamuot na ipinahiling niya sa arog kaining paagi: si Cristo nagadan para sa sato kan kita mga parakasala pa. 9 Asin huling ipinahayag na kita ngunyan na matanos dahil sa saiyang dugo, mas lalo pa kitang makakasigurado na paagi sa saiya maliligtas kita sa kaanggutan. 10 Huli ta kun kaidtong mga kaiwal pa kita nangyari an pakipag-ulian niyato sa Diyos paagi sa kagadanan kan saiyang Aki, ngunyan na nakipag-ulian na kita mas lalo pa ngani kitang makakasiyerto na maliligtas kita dahil buhay siya. 11 Bako lang iyan, kundi nag-uugma man kita dahil sa relasyon niyato sa Diyos paagi sa satuyang Kagurangnan na Jesu-Cristo, na huli sa saiya nangyari an pakipag-ulian niyato sa Diyos.

12 Kaya, kun paanong paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala—. 13 Huli ta an kasalan nasa kinaban bago pa an Katugunan, alagad pag mayo nin katugunan mayo nin kasalan na ikakaakusar sa kiisay man. 14 Minsan siring, an kagadanan naghadi magpuon ki Adan sagkod ki Moises, asin naghadi iyan maski sa mga dai nagkasala na kapareho kan pagkakasala ni Adan, asin siya igwa nin pagkakaagid sa saro na madatong.

15 Alagad an regalo bakong arog kan pagkakasala. Huli ta kun dahil sa pagkakasala nin sarong tawo dakul an nagadan, urog man na nagsupay sa dakul an daing kapantay na kabuutan nin Diyos asin an saiyang daing bayad na regalo paagi sa daing kapantay na kabuutan kan sarong tawo, si Jesu-Cristo. 16 Siring man, an nagin resulta kan itinaong daing bayad na regalo bakong arog kan nagin resulta kan ginibong kasalan nin sarong tawo. Huli ta an paghukom na nagin kasunod nin sarong pagkakasala iyo an pagpahayag na kondenado an mga tawo, alagad an regalo na nagin kasunod nin dakul na pagkakasala iyo an pagpahayag sa dakul na tawo na sinda matanos. 17 Huling kun dahil sa pagkakasala kan sarong tawo an kagadanan naghadi paagi sa tawong iyan, mas lalo man na sigurado na paagi sa sarong tawo—si Jesu-Cristo—mabubuhay asin maghahadi an mga nag-ako kan daing kapantay na kabuutan asin kan daing bayad na regalo na pagigin matanos.

18 Kun siring, huling paagi sa sarong pagkakasala nagin kondenado an gabos na klase nin tawo, paagi man sa sarong matanos na gibo ipinapahayag na matanos para sa buhay an gabos na klase nin tawo. 19 Huli ta kun paanong paagi sa pagsuway kan sarong tawo dakul an nagin parakasala, paagi man sa pagsunod kan sarong tawo dakul an magigin matanos. 20 Ngunyan an Katugunan naglaog sa eksena tanganing urog na mahiling an dakul na pagkakasala. Alagad sa pag-urog nin kasalan, mas nag-urog man an daing kapantay na kabuutan. 21 Sa anong katuyuhan? Tanganing kun paanong an kasalan naghadi kaiba an kagadanan, maghadi man sa matanos na paagi an daing kapantay na kabuutan, na magiya pasiring sa buhay na daing katapusan paagi ki Jesu-Cristo na satuyang Kagurangnan.