Nòvempör

Akahakūö in tö hī ötkô lēkôre. Ötkô inrē ayī-ö ṙônyö nup ṙô nup tö aṙē-ěvö tī tö yip hol hī. Pi-a in lohten öi öt tölngenre. Tö sā ngih, hòṅ chumkūöṙen ayī-ö tö inlahen minë ṙô re. Yěn aṅ tahëng panam öp hol hī. Ötkô min ayī-ö öi miyëḵ in minë tinrīken ò im ëlô ò inrē öi hayīölngen ò, öi mumṙēḵngen ò inrē, ngaich hēk chökhuṙô. Löktö in minë ṙô re man öm hangönkö yip tahëng. Ötkô in chōichö ṙô tö më holre. Mihôiṅ inrē öi hareuskö alaha cha öi löktö in minë ṙô re. Pōyen inkôlò yin më aṅ Israel misī sön pöri cha-a nö siṙesṙô re. Yěn ōt ṙung öp tarik mö siṙesṙô re töngamuh ngaich öp tahëng inrē nö ngatī inlahen nö asīnken ò. Köpölōn in tö inlahen yip tö söm tak chamöhkö panam nö im kinlēḵngô panam nö pōyen nup ṙô cha tövaich, ngaich yik hamang ṙô cha, yik aṅ Israel nö siṙesṙô re nö in Môsös. (Kin. 13:31–14:4) Yēḵ hī pöri öi ṙônyö minë ṙô inreuslö alaha ngaich kô-en min nö lökngöre yip tahëng. Lökten yěi ṙētakvö ngaich holtö ellōn re ayī-ö öi eūḵ nup la-en yip holre. w22.04 pěch 8 përa 16-17

Löktö kūö misī söl ing töngamuh ang Yāvē nö pōyen hayööken tö më nyīö nö vīten cha nö hol ò. Yē öp kūön meh nö hôṅ hanôlö Yāvē, hayööken ò min anga-aṅ. (1 Kòr. 3:6, 7) Yē öp kūön meh nö lo-ongkuö, sön nö öt ṙangenre ngam hāngenlōn Yāvē tö ò, těltamat inrē nö ngëchken ò. (Sal. 11:4) Yē ò nö meuk öp tö rahëchyen ‘tövai ellōn ò’ nö hôṅ lök lōn ò, ngaich ilööṙen anga-aṅ nö hayööken ò. (Inl. 13:48; 2 Kin. 16:9) Pi-a Yavē nö kēhöt ellōn meh öm lööngö ṙētak hēk lööngöṙô öm vë-ekūö ò. (Inch. 15:23) Hēk kēhöt ellōn yip prötör sistör nö chumkūöṙen tö ò hēk hareuskö alaha ò. Yē öp kūön meh öl nö löklōn Yāvē, um heūlritre. Unôichrit tö samyeūheuv min Yāvē nö kò-òren nö fēlen ngam kūön meh tö nup taṙòkhöre haköp ò ik nyini-i ò. (Yôh. 14:26) Lökten öm örheūheu haköpten yip kūön re öm iṙô i la-enre inrē, hakòlô nup la-en meh min ang Yāvē. w22.04 pěch 21 përa 18

Pön haköpikūö ngaich ngam talöökö ngam Sī-ö nö el halīöngö, lökten ngaich anga-aṅ nö tainy nö ikūi yip tö hachamö elkui, pô ò nö akahalōn inrē tö cha nö hayöng min nö im pūlngö ngam Tēv, hēk akahalōn inrē anga-aṅ tö cha nö kētu la-en tö ngam inhangkö Yēsū, lökten ngam Sī-ö nö mā-anyre nö hakihten cha. (2 Kòr. 5:20; Efi. 6:19, 20) Ik 1918 yik töhëvöre tak prötör ngaich tö chaphötvö nö el chēl. Ik hē e ngam inhangköm tölöök inhānga nöng sā inlahen töng sökngöre röön. (Inm. 11:3, 7-11) Ik 1919 pöri cha-a nö ṙānyuvö. Ik töng ṙinānyö cha nö ṙa-ang el chēl, ilööṙen cha-a nö ahangköm tölöök inhānga. Öt ṙāngenre pöri ngam Sī-ö, lökten ò nö farômnyöm mak “tahël” nö ikui më tarik ngam Tēv ngam tö ngö manah, ngam inlahen ò nö hakihten më tarik. (Inm. 12:15) Lökten in ayī-ö töngamuh öi hòṅ īnu tö ngam manöiyö hēk ngam ṙinātö-ellōn inrē.—Inm. 13:10. w22.05 pěch 5-6 përa 14-16

Nët kangen më tarik maheuṅk Yôhan nö el ngam heūvö ò, yip hamòlṙen ngam inyööngö tö Yāvē min. Kě-ěvkūö min cha-a tö ngam nômö tö-örheūheu-aṅ. Raneh më tö 1,44,000 ṙôken. Tö katöllöng cha-a nö ṙā-ang ing panam hòṅ cha nö hol Yēsū nö el halīöngö nö hayöng. (Inm. 5:9, 10; 14:3, 4) Meuk më tö 1,44,000 ṙôken ang Yôhan nö hol Yēsū nö söktöheich nö ikui ngam rôngö Siyôn nö el halīöngö. (Inm. 14:1) Löktökūö ik raneh senchurī ngam kintöllö më tö 1,44,000, köṅnyu ṙôken ngaich yip in cha chamuh el halīöngö. (Lūk. 12:32; Rōm. 8:17) Vë-eny nang hī ang Yôhan tö yip tö ōt tit chööḵ cha min, nöng rahëichtit ing manā-aṅ sakamö. (Inm. 12:17) Ngaich hē ngam yöng kanihngen min cha-a nö kě-ě nö chuh el halīöngö. Ṙòkhöre min më tö 1,44,000 nö hol Yēsū nö hayöng nö el halīöngö.—Mët. 24:31; Inm. 5:9, 10. w22.05 pěch 16 përa 4-5

Kô-en in öi hòṅ aṅhav in tö ngam inyāichngö, ötkô pöri ngaich öi ngö mufē töre öi töng öt pōiṙāi. Ngatī ṙô inrē ang Yēsū: “Kaheūki nun minë keūyö yīö, nö ṙòkhöre.” (Mët. 10:30) In e ṙinatö-ellōn ayī-ö tö Yāvē nö tö chumkūöṙen tö hī ngaich tö pōiṙāi ayī-ö inrē öi imat ò. Lökten yēḵ Yāvē nö kētö ṙētak hī öi kētöre i linöökölōn ò, pön lōnu inrē anga-aṅ tö hī öi teūngen tö ngam nômö tö-örheūheu aṅ. Ngaich ötkô ayī-ö asöklö ngam intöönö i alaha ngam inyööngö tö ò. Urēhěkūö tö 15 samyeūheu ngam Chūökamahati nö vë-eny nang hī tö hī yēḵ hī öi havai mufē re öi in re ngaich höng yanöölen hī min angū-ö. Ngö kinūchngö hē e angū-ö: “Ötkô in höng yahlö mufē töre, töp lökten hī min mihôiṅ öi tailölōn, hēk ötkô inrē öi höng minūö elmat töre töp lökten hī min kaheukö re öi töt pōiṙāi.” w22.05 pěch 24-25 përa 14-16

Yěi hòṅ köpöti tö ngam hinëngö el ngam söngkötön ngaich hòṅ sitih inlahen ayī-ö ṙòkhöre? Mihôiṅ in öi ma-ainyre öi vī ngam lanāmö. (Mët. 5:9; Rōm. 12:18) Yē hī min öi ngatī inlahen ngaich vai min ngam ispirichuěl peretāis. Hòṅ köplōn inrē ayī-ö tö Yāvē nö tūökten më prötör sistör hī nö el ngam ispirichuěl peretāis, hòṅ cha nö löngö inlahen nö ha-öiny ngam Tēv. (Yôh. 6:44) Pön tö pōiṙāi cha-a nö imat ò. Lökten anga-aṅ nö ṙamlōn nö meukö hī yē hī ma-ainyre vī ngam Lanāmö hēk tö ngam hinëngö nö el hôi höö! (Isa. 26:3; Hak. 2:7) Pōyen nun minë inkòlô kahëtö Yāvē nö in më tarik re. Yē hī min chumkūöṙen ngëichken u, ngaich pōyen yanöölen ayī-ö. Yěi haköp mat ngam Paipöl, ngaich hòṅ aṙū-uti mufē ayī-ö öi fēken nup haköp re. Yē hī min öi ngatī inlahen öi haköp hēk fēken u ngaich sīöplöre min ngam tövai tinrīken hī öi Kristīön. Sā ‘hanangenlōnre min ayī-ö tö më holmaneukre’ hēk ‘mööḵlö ellōn inrē tö höö.—Rōm. 12:10. w22.11 pěch 12-13 përa 16-18

Yēḵ hī ṙatö-ellōnre tö Yāvē nö aṙēlen hī, ngaich teūngen ayī-ö tö ‘hanöhlöre.’ (Inl. 3:19) Teūngen min inrē ayī-ö tö ngam lanāmö elkuilōn re hēk hëtö elkuilōn inrē. Yēḵ hī pöri aṙēlöng tö tarik ngaich öt ngatī lanökngöre ayī-ö, sā lanökngöre tī Yāvē nö aṙēlen hī. Yēḵ ò nö ngatī inlahen ngaich havantöre min ngam innôlö hī nö sā inuk urěh, ngaich sā töt hěngö fālen min ayī-ö. Yēn aṙēlen hī ang Yāvē ngaich vaichngö anga-aṅ tö minë fālen hī. Ötrēhěn anga-aṅ nö hēk nö kētö sācha u. (Isa. 43:25) Kūichi angū-ö nö imat ngam Paipöl tö Yāvē nö marôvat tī tö minë fālen hī “sā rôvat ngam chuhöt tö ngam sūng.” (Sal. 103:12) Yē hī öi fēkö inlahen e ngaich ṙamlōn ayī-ö öi in Yāvē. (Sal. 130:4) Öt höng in minë fālen hī mat ang Yāvē yěn hòṅ aṙēlen hī hēk yěn hö-ö. Ngaich inrē ayī-ö öi meukö Yāvē nö anga-aṅ Vamīlen hī, Kamëtö Chööngö hī tö heuveū-en inrē nö Kamhôka. Lökten nöng anga-aṅ tö keuheūtlöre mikahkūö tö nup töng sitih. w22.06 pěch 5 përa 12-14

Kētö maheūṅkkö yip töhāngenlōn ang Yāvē tö ò. Kēngö ngam miṙivlōn, invah tö ngam kinpaha inrē min anga-aṅ. (Inm. 21:3, 4) Ngaich holṙen yip ‘töyāchö ellōn tarik’ min anga-aṅ nö vī ngih panam min hēk nö peretāis. (Sal. 37:9-11) Vai inrē min ngam innôlö hī öi in ò, mötlö vanāyö tö e töngamuh, pöi akahaiṙen min töre öi röhta takô öi in ò. Kūö yòh pöri öi ṙinātu-ellōn tö në kinlēḵngô Yāvē min nö teung? Pön mahateung ṙô re ang Yāvē. Lökten öi mihôiṅ höng in ‘Yāvē maheūṅkkö’ (1 Tim. 4:10) Hòṅ in hī ngam manööyö, hòṅ ṙamlōn inrē öi hökkö ngam sakāmö ngam Tēv, hē minë kinlēḵngô ò min nö ṙòkhöre nö teungtökūö. (Isa. 55:10, 11) Tā-a chěi töi köp im linöklōn Yāvē, ngaich ṙātö-ellōnre inrē tö ò nö reushen yip hamòltö ellōnre nö chöhö ò. w22.06 pěch 20 përa 1; pěch 25 përa 18

Yěn lōnu anga-aṅ tö më kui ngam mikūönö nö hang ngam inlēnö im 1 Timôtī 5:8, ngaich hòṅ ṙatö-ellōnre ayī-ö tö ò min nö öthō nö öt kēkö kaha ngam chööngö. Yēḵ min öi ṙatö-ellōn re tö Yāvē nö hangenlōn tö ngam mikūönö hī, ngaich öthō min ayī-ö pa-ekūö öi ngëichkö anaha nômö ngam mikūönöre. (Mët. 6:31-33) Ik sā Yāvē nö vī ngih panam, hö-ö anga-aṅ nöng atöllö nup vahī re nö chö-önyten hī pön pōyen nup vahī ò. Pò hī öi hōtu öi kuchiken öi in e. (Ran. 2:9) In e mikahkūö ayī-ö tö ò nöng öt kē-ěkūö hī tö minë hanaten hī. Pön hangenlōn inrē tö hī. Pī-a in lohten öt hēngö aṅ in, sön pöri ayī-ö öi mihôiṅ öi chumkūöṙen öi höng öp töng tölngö inlahen hī ha-aṅ nômöre. Ngaich öthō min ang Yāvē nö öt hateungngen minë hanaten hī. (Mët. 6:11) Pòrô in ayī-ö töngamuh öi harööngen re öi ha-aṅ nômö re. Ngaich öthō pöri ang Yāvē nö öt kētö inkôlö hī ing töngamuh hēk in öp yamih ṙētak.—Isa. 65:21, 22. w22.06 pěch 15 përa 7-8

Rö-ö ön ngam Paipöl istuten nöng anga-aṅ tö hòṅ nya-aṅvkūö. Pöi hòṅ ṙôkhöre öi iṙūöhen haköp inlahen Yāvē hēk haköp mat ngam Paipöl inrē. Ngö ṙô inrē ang Pôl nö vë-eny nang hī tö hī yěi nya në nya-aṅkūö min, hēk kēkö kaha minë haköpre inrē, “ngaich akah tölöök, tötlöök inrē” min ayī-ö. Öt löngngöre tinrīken yin vë tarik töngamuh ing panam lökten ayī-ö mihôiṅ öi kihngen öi hang minë inchöngten kahëtö Yāvē. Chumkūöṙen pöri ang Yēsū nö löngö ṙētak tī nö kē-ěkūö hī tö minë nya-aṅkūö, hòṅ hī asīöp ngam ṙinātö-ellōnre. Sā inlahen Yēsū in ayī-ö harōilö minë-eny ngam Tēv. (Yôh. 17:6, 26) Ik samyeūheu 1931 nö kētu ngam minë-eny hī öi ‘Vamënyen Yāvē’ nö löknyö mat ngam Paipöl. In e ayī-ö öi hameuktöre öi milēḵṙen tö ngam minë-eny Yāvē, hēk hòṅ akahka inrē öi vamënyen ngam minë-eny ò. (Isa. 43:10-12) Yěi ṙô tö ngam Paipöl ngam New World Translation of the Holy Scriptures nö ṙātu ngam minë-eny ngam Tēv nö in minë kamngö chūök u. w22.07 pěch 11 përa 11-12

Vënyu inlahen an ngam Pūlngö ngam Tēv nö imat ngam Paipöl. Vë-eny ang Yēsū tö ngam kanô-en nö sā humlum töhayūni nö el panô-òṅ. Ngö ṙô anga-aṅ, “Sā töhayūni an humlum nö el panô-òṅ, ngam pūlngö ngam halīöngö; öp kanôtökūö öp tarik ngaich hayūni nö hēk; ngaich kiröönngöre anga-aṅ nö ṙāmölōn, ngaich inyihngö nup chehenre, ngaich havah ngam panô-òṅ.” (Mët. 13:44) Rö-ö ngam tarik nö chamöh ngam humlum. Ik sā ò pöri nö teūngen tö e, ngaich sitih inlahen anga-aṅ? Akahakūö anga-aṅ tö ngam humlum nö töpōiṙāi. Teūngen in töngamuh tö ṙanamlōnre öi i linökölōn Yāvē, pò hī öi maheūkkuvö öi el ngam Pūlngö ngam Tēv, tö hī öi örheūheu aṅ. Öt insa-av ön ngih kanôlò tö nup chehen aṅkūö ngih panam. Tökiröng ön nö ṙanamlōn hī, pò hī öi röhta in ngam Tēv Yāvē hēk vī ngam innôlöre inrē öi in ò. Mihôiṅ öi ṙāngö nup töng sitih, kūö hī öi hòṅ haköpkö ngam innôlöre öi in ò. Ngam inṙamlōn Yāvē ön tö ṙamlōn tī tö hī, öt mööḵlö nup chehen ing panam.—Kòl. 1:10. w22.08 pěch 15 përa 8-9; pěch 17 përa 12

Sitih löktö mikahkūö ök Yôsěf tö ngam insěha nö “tötlöök nö la-en” nö ikūö Yāvē? Yěn höng unôichrit tö nëtòng samyeūheu nö kētu ngam chööngö Môsös, ngam tö ngö: “Uh man Asěha.” (Man. 20:14) Pòrô ök nö öt aṅhavin tö ngam chööngö. Akahakūö anga-aṅ tö Yāvē nö hapīöh nak raneh tarik. Lökten anga-aṅ nö akahakūö tö minā pamīhöre nö mihôiṅ nö holtöṙah höö. Sön anga-aṅ inrē nö hang inlahen ök kalvī re ang Sëra, nö sitih inlahen ang Yāvē nö laklen ò hē ò nö yīkiyö tö nak tö nët tak tarik. (Ran. 2:24; 12:14-20; 20:2-7) Fēken u lohten ang Yôsěf, lökten nö akahakūö tö ngam insěha nö tökööl nö imat Yāvē. Hangenlōn inrē anga-aṅ tö Yāvē, lökten nö hòṅ kēken nup tölöng la-en nö imat ò. Lökten anga-aṅ nö öt kēken ngih tökiröng fālen. w22.08 pěch 26 përa 1-2

Sā ṙô ngam miröökö nö vë-eny nang hī tö ‘yip tö pōyen mahaṙòh nö el pitung ngam tumlat, nö hachohlöng min.’ Ngö mufē in sin ik urěh tö ngih miröökö nö vë-eny inlahen ngam ṙētak ing manā-aṅ sakāmö, hē yik tarik ngam Tēv nö sā tö hachohlöng, ik sā cha nö havanlö inlahen re nö ahāngkö ngam tölöök inhānga unôichrit ngam inkihten cha ik 1918. Ngaich pöri nö halööktu ngam mikah elmat hī. Asūp lāinyngen e nö halööktitvö? Chumkūöṙen tö ṙô ngam Tanīěl 12:2. Ṙôtö inlahen yip tarik angū-ö mahavantöre nö el pitung ngam “tumlat.” Ngatī ṙô ök inrē Yōp hē ò nö vënyö ngam kinpahare, ngaich vë-enyre anga-aṅ nö “yôkti [nö] el pitung” hēk el “chūök kupah” inrē. (Yōp 17:16) In e mikah elmat ayī-ö tö ngam līpöre Tanīěl 12:2 nö ṙôtö ngam inchohlö yip tökapah min tarik, unôichrit ngam Armakētòn. Ngö kinūichngö ön nö im Tanīěl 12:2 tö yip rīkre min tarik tö ha-aṅlöng nö im ‘tö-örheūheu-aṅ nômö’. Tö sitih manah angū-ö? Pōyen yip min tarik tö ha-aṅlöng ip töhěng köiny samyeūheu, yip tö iṙūöhen pöri nö haköp inlahen nā Yāvē nā Yēsū hēk hang minë chööngö cha inrē, höng cha-a min tö teūngen tö ngam nômö tö örheūheu-aṅ.—Yôh. 17:3. w22.09 pěch 21 përa 6-7

Öt tö ngö manah ön ngam inlahen hī öi ṙātö-ellōnre i tökeuheūttöre öi meuchngö matre öi ṙātö-ellōnre in yip prötör sistör. Pön lōnu ang Yāvē tö hī öi chumkūöṙen tö nup tahëng la-en cha, öp chūök hī mihôiṅ ṙātö-ellōnre. Yēḵ hī öi kēnyö ṙētakre öi mikahtökūöre tö yip holre, ngaich sīöp min ngam minlēḵṙen hī tö cha. Hòṅ ngatī inlahen inrē ayī-ö öi ṙātö-ellōnre in yip prötör sistör re, öi hòṅ ṙūöhtö mikahkūöre tö cha. Ngaich yēḵ meh chuh el mīting, ngaich vë-ekūö yip prötör sistör më-eṅ hēk holṙen cha inrē nö ahangkö ngam tölöök inhānga. Hòṅ kööpölōn ayī-ö töre öi öt ilööṙen öi ṙātö-ellōnre in cha, lökten öi hòṅ hamöiyöre in cha. Lohten pöri më-eṅ öm kihngen öm vënyö nup ṙôre öm in ò. Ik sā meh pöri ngaich öm akahakūö tö ò, ngaich ṙātö-ellōnre ngaich më-eṅ öm in ò. Töp lökten meh ngaich öt piyū-uṙô öm vënyö nup ṙôre öm in ò. (Lūk. 16:10) Sitih inlahen pöri min më-eṅ yěn filal ngam ṙinātö-ellōn meh yip prötör sistör? Ötkô öm ngatī mufē töre öm öt ṙinatu-ellōn ngaich öm in ò. Lohten pöri më-eṅ öm unôich havantö inlahenre öm ṙātö-ellōnre in ò. Yěn ōt pöri yip prötör sistör pumsu ngam ṙinatö-ellōn meh, ngaich tö ngö manah angū-ö tö meh öm öt ṙātö-ellōnre in yip tahëng. w22.09 pěch 4 përa 7-8

Hěng tak ök minṙöinylen tö Mikeyās minë-eny, ngö mufē anga-aṅ nö in yik minṙöinylen tö cha nö öt vayö inlahen nö in ò. Ṙāp ngam mufē re pöri ngaich ngam prötör, ngaich holtö mikah elmat re nö kēken minë la-en. Örheūheu anga-aṅ nö havëkö kūö Yāvē tö ngam töhet kumlēḵ hēk nganönöre inrē. Haköp minë ātiköl inrē anga-aṅ minë chūök ò nö teūngen tö minë tövai inlēnö. Asūp haköplö hī in prötör Mikeyās? Yěm hēṙu ngatī mufē tö yip prötör sistör nö öt vayö inlahen nö in meh, ngaich hòṅ vī ngam lanāmö më-eṅ hēk um vaichö mufē tö inlahen cha pöm lohten öm öt akahakūö tö nup inlahen cha hēk nup ṙô ellōn cha inrē. Lökten öm havëkö kūö Yāvē hòṅ meh öm sā mat Yāvē öm ngëichken minë tövai tinrīken më prötör sistör hī. Ngaich möl min më-eṅ akahöiṙen tö cha nö öt tölngen re nö mumṙivngö lōn meh. Teungten min më-eṅ inrē aṙēlen cha, yē meh min öt ngëichkö nup vanāichö cha. (Inch. 19:11) Hòṅ köpölōn më-eṅ tö Yāvē nö akahakūö tö inlahen meh, ngaich kētö nganönöre min anga-aṅ öm lā-al nup töt kanò-òṅ re.—Mum. 5:8. w22.11 pěch 21 përa 5

Hanôl yip tö hangenlōn tö Yāvē. Lökngöre ayī-ö tö yip mahanôlö re, lökten yē meh hòṅ teungten ngaich hòṅ löngö atöllö më-eṅ tö hanôl re. (Inch. 13:20) Ngö ṙô ang Chūliön ngam minṙöinylen: “Ik sā chu öich kuṅnö, ngaich ik ṙētak chu ahanga ngaich teūngen chū-ö tö tö-akaha hanôl re prötör sistör. Tö ngöt acha-a nö ahangkö ngam tölöök inhānga lökten chū-ö kuchiken öich hanôlö cha. Höng mahanôl yip tö sā ṙēḵti re sin chū-ö urěh, akahakūö pöri ngaich chū-ö töre öich mihôiṅ inrē hanôl yip tö köinyö ṙēḵti.” Ṙòkhöre in hòṅ lōnu töre öi hòṅ ngatī hanôl yip tö ngönö innôlö nö in Yāvē. Lökten ayī-ö hòṅ holtö mikah elmat re atöllö holre, pön öt ṙòkhöre cha-a nö vayö innôlö nö in Yāvē. Ōtre yik tö ngatī inlahen ik raneh senchurī, lökten ang Pôl nö ngö ṙô nö in Timôtī nö ṙuhöngöre tö cha. (2 Tim. 2:20-22) Tö pōiṙāi ön ngam innôlö meh in Yāvē. Pò meh sin ma-ainyre vī ngam innôlö re in ò. Lökten um hanôl öp tarik öp lökngen ngam innôlö meh min nö pasūḵ nö in Yāvē. w22.08 pěch 5-6 përa 13-15

Hö-ö in ayī-ö öi hòṅ sā inlahen yip tökulō-ovö yip samò-en ngam mikah Yāvē. Pöi lōnu ayī-ö töre öi hòṅ hang minë inchöngtenre tö Yāvē hēk sā mufē ò inrē. Sitih inlahen ayī-ö hangönlö ngam kuilōnre öi ngatī inlahen? Mihôiṅ in fēkö inlahen yik töt hamang minë mikah ṙô Yāvē nö sitih inlahen cha-a ngaich nöng vītö kanihngenre. Ngaich mihôiṅ öi fēkö minë yanöölenre yěi hang ṙô Yāvē, ngaich ṙamlōn min ayī-ö. Vai inrē ngam tinrīken hī. (Sal. 32:8, 10) Ngaich an töngamuh Yāvē nö kētö ṙētak hī ṙòkhöre öi kēḵ yanöölenre in minë mikah aṅ in ò. Hö-ö pöri anga-aṅ nö pītlö alaha hī, pön höng eltī hī angū-ö yěi hòṅ hang ṙô ò hēk hö-ö. Ngö ṙô ngam Paipöl: ‘Teūngen min cha-a tö ṙòng nup la-enre.’ (Inch. 1:29-32) Sā inlahen minë la-en cha ngatī inlahen minë kanihngen nö fukkui cha, lökten min cha-a nö ahëtiyö. Yip hamang ṙô Yāvē pöri hēk hang minë inchöngtenre tö ò ngaich kilēḵngôre anga-aṅ nö in cha nö ngö ṙô: ‘Yip hamang ṙô chu min köp min cha-a kuchīken min inrē, öt pa-ekūö cha-a min.’—Inch. 1:33. w22.10 pěch 21 përa 11-13

Öt tö ngö manah an ngam pinhë-ekūö tö Yāvē tö hī min ngaich höng vöö tö ò, tö ngö manah pöri angū-ö tö hī ui kēken nup la-en nup töt ööilōn ò. (Inch. 16:6) Kūichngen minë tölöng hēk tövaich anga-aṅ nö i mat ngam Paipöl. Lökten ayī-ö hòṅ ma-anyre öi hang minë inchöngten re tö Yāvē. (2 Kòr. 7:1) Yēḵ hī min öi kēken nup la-en ööilōn Yāvē hēk ṙūöhöngre tö nup töt ööi lōn ò ngaich ṙamlōn min ayī-ö. (Sal. 37:27; 97:10; Rōm. 12:9) Lohten öp tarik nö akahakūö tö Yāvē nöng anga-aṅ tö mihiôṅ nö akahakūö töp tölöng hēk töp tövach. Ötkô pöri nöng angū-ö tölngö e, pöi hòṅ hang minë inchöngtenre inrē tö ò. (Rōm. 12:2) Ngatī ṙēngen minë tinrīken hī, in e öi akahakūö töre yěi kô-en öi hang minë inchöngtenre kahëtö Yāvē nö yanöölen hī. (Inch. 12:28) Akahalōn ang Tāvit yěn hang minë inchöngtenre kahëtö Yāvē, ngaich ṙamlōn min anga-aṅ. Lökten anga-aṅ nö ngö ṙô: “Hameukhömat chu man min tö talöökö nômö; i kūö meh ap sanööḵngö ṙanamölōn: lāhāmö meh ap kumchiklōn nö örheūheu.”—Sal. 16:11. w22.10 pěch 8 përa 9-10

Örheūheu ang Yēsū nö īnu tö ngam inyāichngö. Pōyen nuk la-en ò nö in ngam yöng re ik sā ò nö el halīöngö. Pön löktö in ò “në taṙòkhöre, el halīöngö i kui ngih tumlat inrē” nö vīlöngö. (Kòl. 1:16) Fē-ělre lohten ang Yēsū tö u ik sā ò nö kēḵ ngam vīnôkö. (Mët. 3:16; Yôh. 17:5) Hö-ö pöri anga-aṅ nö tailölōn nö fēken u, öt hěngheuh anga-aṅ nö möḵlö mat töre tö yip tahëng. Lökten anga-aṅ nö ngö ṙô nö in yik haköptöre, “Sā ngòh Kūön Tarik nö yih, rö-ö nö tö meūken, mameukṙen pöri ane inrē kamëtö nômöre, nö ṙāi tömaṙôngö.” (Mët. 20:28) Ngö ṙô inrē anga-aṅ, rö-ö anga-aṅ nöng lök kuilōn re nö la-evṙen pön nup lōn Yāvē nö in ò, ngatī inlahen anga-aṅ. Kô-en nö aṅhav in Yēsū tö ngam inyāichngö! Hòṅ ngatī inlahen inrē ayī-ö hòṅ aṅhav tö ngam inyāichngö. w22.05 pěch 24 përa 13

Yěn hòṅ aṙē-ěl ang Yāvē hēk yěn hö-ö, ngaich chumkūöṙen anga-aṅ nö ngëichkö ngòh tarik yěn akahakūö tö ngam kahëken re nö tö vaich. Vënyö inlahen e ang Yēsū nö in ngam Lūkös 12:47, 48. Öt löktu ang Yāvē nö aṙēlen hī yěi tölngen re öi kēken minë tövaich minë töt ööi ò, pò e nö tökiröng nö fālen. Lohten min anga-aṅ nö öt aṙēlöng tö Yāvē. (Māk. 3:29; Yôh. 9:41) Teūngen hòng min ayī-ö tö inṙē-ěl re? Ta-a töi ngëichkö nup tö mihôiṅ nö inlahen re, hòṅ Yāvē nö aṙēlen hī. Kô-en hòng ngam tö fāluṙen nö halöktitre hēk hö-ö. Ngam manah ngam inlöktit, “tö hī hòṅ halöktit nup mufē re hēk tö minë töt löng tinrīken re.” Ngòh mahalöktit re tarik haṙivlōn anga-aṅ tö minë kahëken re nö tö vaich hēk ngam inlahen re inrē nö öt teungten nö kēken minë tövai la-en. Rö-ö inrē nöng angū-ö pön haṙivlōn inrē anga-aṅ tö ngam innôlö re nö in Yāvē nö kunngöre kūö ò nö kēken minë tökööl. w22.06 pěch 5-6 përa 15-17

Yip samô-en minë la-en hī, ngaich minyônyaṅ ṙô acha-a nö ṙôtö inlahen më prötör tö halenlöng tö ngam söngkötön Yāvē nö mahachōḵ-kūö hī. (Sal. 31:13) Ōt yip prötör tö kē-ě-ě hēk sūöchka nö tö fāluṙen. Ngatī inlahen ök inrē Pôl ik raneh senchurī nö sūöchka inlahen hēk kē-ě inrē Ik sa Pôl nö haköövö nö i Rōm ōtre yik ṙamuhöngre tö ò. (2 Tim. 1:8, 15; 2:8, 9) Sitih lōn pöri ang Pôl ik hē e. Uroh anga-aṅ nö chö-önyten cha nö hakihtuṙen öt fěkö ngam nômöre inrē anga-aṅ (Inl. 20:18-21; 2 Kòr. 1:8) Ik hē Pôl pöri nö hòṅ hayöökaṙen tö cha ngaich öt holṙen ò acha-a! Hòṅ sitih inlahen öi ayī-ö yěn öt ötlēkaṙen yip prötör mahachōḵ-kūö hī? Yěi meuk inlahen tī ngam Sī-ö nö hakihten më mahachōḵ-kūö hī prötör ngaich ötkô öi pingangkūö. Lökten anga-aṅ nö ngatī inlahen hòṅ më prötör nö öt köp nö löklōn ngam Tēv. Ngaich mihôiṅ min öi vöö yěi meuk minë ötlineken cha. (1 Pīt. 5:8) Iṙūöhen hayööken më prötör sistör um ṙāmgenre hanôlö cha.—2 Tim. 1:16-18. w22.11 pěch 16-17 përa 8-11

Ngam tötūmu ṙamatö-ellōnre nö in Yēsū tö kilöllöng nö i taseū ò, lohten anga-aṅ nö Yahūti. Ṙatö-ellōnre yik Yahūti tö ngam tökô-en Tēv nöng hěngtak, pōyen pöri nup Tēv chūök yip töt yahūti nö ṙatö-ellōnre. (Man. 20:2, 3; 1 Kòr. 8:5, 6) Yěn töt Yahūti öre ök tötūmu, ngaich lohten angā-aṅ nö ngöṙô nö in ök holre tötūmu, “Öt pa-ekūö öm më-eṅ tö më Tēv.” Hö-ö pöri anga-aṅ nö ngatī ṙô. Töi chumkūöṙen hēk tö ngih. Öt yamih ang Yēsū nö ahangkö ngam tölöök inhānga nö in yip töt Yahūti, pön tö tīntu anga-aṅ nö ‘chöh nup töchatngen sīṅp aṅ patī Israel.’ (Mët. 15:24) Höng vë-eny nang më aṅ Israel inrē ang Yāvē tö yip tö kapah min nö ha-aṅlöng. Akahalōn lohten inre ök tötūmu tö ngam ṙô Yāvē. Lökten in ngam ṙô anga-aṅ nö akahkūö tö Yāvē min nö ha-aṅlen Yēsū, vīlen ò inrē nö Rācha ngam Pūlngö. Maheukkū inrē ngam tötūmu töre min nö ha-aṅlöng tö Yāvē. Kô-en an ngam tötūmu nö yahūti, lökten anga-aṅ nö akahakūö tö inlahen Ātöm nā Ēva. Akahakūö inrē anga-aṅ tö Yāvē nö vī ök Peretāis ing panam nö chūök nā Ātöm nā Ēva. Lökten ayī-ö mihôiṅ ngöṙô tö ò ik sā Yēsū nö vë-eny nang ò tö inlahen öp Peretāis, lohten anga-aṅ nö fēkö inlahen öp tövai panam.—Ran. 2:15. w22.12 pěch 8-9 përa 2-3

Ngatī inlahen in ayī-ö töngamuh öi hòṅ hayöökaṙen tö ngam töhet fanöinylö Yāvē yēḵ hī öi ahangkö ngam tölöök inhānga öi in yip tahëng. Kūö yòh? Kūö ngam Sī-ö nö asökngö röön hī öi ahangkö ngam tölöök inhānga. (Inm. 12:17) Yěi ngëicha kò-òren tö ngam Sī-ö nö mötlö kumlēḵ tö hī. Yēḵ hī pöri ahangkö ngam tölöök inhānga, ngaich hameuktöre ayī-ö öt pa-ekūö tö ngam Sī-ö. Ngaich in e ngam Sī-ö nö öt kanô-òv tö hī yē hī ahangkö ngam tölöök inhānga. (Inm. 12:9-11) Kò-òren in öi fēkö inlahen re töngamuh öi ötlēkaṙen, sön pöri ayī-ö iṙūöhen öi im la-en inhangkö ngam tölöök inhānga. In e mikahkūö ayī-ö tö Yāvē nö kē-ěkūö hī tö ngam töhet fanöinylö re hēk ṙamlōn inrē nö in hī. (Mët. 5:10-12; 1 Pīt. 4:14) Ngaich ngatī inlahen min ang Yāvē nö kētö ngam töhet kumlēḵ re nö hangönken hī, hòṅ hī öi lā-al minë kanihngen re yē hī ṙònghöichṙen öi im la-en inhangkö ngam tölöök inhānga. (2 Kòr. 4:7-9) Hòṅ asūp inlahen hī hòṅ hī teūngen tö ngam töhet fanöinylö? Hòṅ örheūheu ayī-ö vë-ekūö Yāvē hēk ṙatö-ellōnre inrē ayī-ö tö ò nö öthō nö öt hang ṙô hī. w22.11 pěch 5 përa 10-11

Hěng inrē ngam inlahen hī öi hameuktö hanangenlōnre tö më prötör sistör re, öi vī ngam lanāmö öi ihôi cha. Hòṅ sā inlahen Yāvē inrē ayī-ö öi ṙòngnyökūö ellōnre öi aṙēlen höö. Kò-òren öi fēkö inlahen Yāvē nö kētö ngam töng hěng maneuk kūönre nö holtö ṙanamlōnre nö aṙēlen minë tökööl hī. Ngaich ötkô hòng ayī-ö aṙēlen yip holre, yēḵ cha nö vaich nö in hī. Hö-ö in öi asīnken öp tötlöng tanöölô in ngam vahënyö Yēsū inchōḵelmat. Aṙēlöng nup hötṙeh ò tö tī öp yöngren ò. Sitih inlahen pöri anga-aṅ? Öt aṙēlen öp holre anga-aṅ öp töng rahëichyen hötṙeh nö in ò. (Mët. 18:23-35) Yēḵ meh öm vāchö mufē öm in yip prötör sistör, öt chuh in ò hòng min më-eṅ urēhěkūö ngam infēkö kinpaha Yēsū öm halāmtöre? (Mët. 5:23, 24) Yěm ngatī inlahen min ngaich hameuktöre min më-eṅ öm hangenlōn tö Yāvē hēk Yēsū inrē. w23.01 pěch 29 përa 8-9

Yěm hòṅ akahakūö tö nup kuilōn yip prötör sistör, ngaich mihôiṅ öm hatöönö cha, uh pöri öm hatön nup tö haṙivlōn tī tö cha. (Inch. 20:5) Mihôiṅ öm hatöönö cha yěn ōt nup nyā-aṅkūö cha, lanë-en hēk nup tahëng inrē tötṙanāngen kuilōn cha, un höng löhlö tī cha-a tö kinmānöre hēk öt aṅhavin tö rupīö re nö kēnyö ṙāi patī. Ngaich yēḵ më mahayöng nö halēnlö nup tahëng inyööken tarik, ngaich mihôiṅ öm hatöntöre in më prötör sistör yěn hòṅ hayöökaṙen cha-a nö löktö in u. Ṙūöhöl alaha hī ang Yāvē öi hareuskö alaha yip tahëng hēk hayööken cha inrē. (Kal. 6:10) Yěn ōt yip prötör hēk sistör tö vahavö, ngaich asūp mihôiṅ tī hī öi hayööken cha? Mihôiṅ yip nyīö nö vī kāt hēk trò-ing. Mihôiṅ yip ṙālö prötör sistör nö inyih hēk mihôiṅ inrē öi chuh patī cha öi kahūlen cha. Töng kūönö anū-ö mihôiṅ tölōn hī nö la-en, reuslöre alaha pöri cha-a nö löktö in u. Hòṅ hareuskö alaha yin më minṙöinylen inrē. Pön yěn faltöre ngam tölëlngökūö invah, ngaich sīöplöre minë la-en cha. Ōt yip prötör sistör lamöktö el mësěch hēk kāt inrē nö eū minë tī cha. Ta-a chěi töi ‘kö hangëken höö hēk kö hareuskö höö inrē’!—1 Tös. 5:11. w22.12 pěch 22 përa 2; pěch 23 përa 5, 6

Akahakūö takô yik Satukī i nuk ṙētak Yēsū misī, tö ṙô minë raneh tö taneui līpöre ngam hötṙeh kinlēḵngô, i ṙô Heprāi. Ōt pöri nup kanô-en ṙô ngam Tēv, nup chūök cha nö öt ṙatö-ellōnre. Tö sā ngih, öt ṙatö-ellōnre cha-a tö ngam Tēv nö mihôiṅ nö hachohlö yip tö kapah. Angū-ö inrē hatön cha nö in Yēsū. Ngaich sitih ṙô ang Yēsū hē e nö sapṙô cha? Ngöṙô anga-aṅ: “Öt ve-ekūö öp līpöre Môsös öi, tö ngam Tēv nö löknyö el ök töyul, nö ngö ṙô, Chu-ö Chin Tēv Aprahām, Tēv Isak, Tēv Yāköp inrē?” (Māk. 12:18, 26) Kô-en yik Satukī lohten nö ṙōlvan ṙô nö vë-ekūö u. Löktö in ngam ṙô Yēsū pöri ayī-ö öi akahalōn tö cha nö öt chumkūöṙen tö ngam kanô-en imat ngam Töhet Līpöre, inlahen yik tökapah min nö hachohlöng tö ngam Tēv. (Lūk. 20:38) Asūp haköplö hī öi in ngih inlahngen? Hòṅ chumkūöṙen ayī-ö tö nup haköplöre öi in minë haköpre miröökö, mötlö öi hòṅ chumkūöṙen öi in minë tö hayūni manah, töp haköp hī lökngörit chööngö öi in e. Sā ṙēngen töpōiṙāi min angū-ö tö hayungöre kanòlô, nö tö hòṅ chöhö tö hī öi imat ngam töhet līpöre. w23.02 pěch 11 përa 9-10

Pōyen nuk tökiröng kanihngen maheuṅk cha misī më tövënyu im tövë-evkūö töngamuh, sön cha-a nö söl kinpahare nö köp nö löklōn Yāvē. (Hep. 11:36-40) Pòrô cha-a nö öl nö meuk taneungtökūö minë kinlēḵngô Yāvē, sön cha-a nö ṙatö-ellōnre tö Yāvē nö ṙamölōn nö in cha. Lökten cha-a nö köptī tö ngam maheūṅkköre tö minë kinlēḵngô Yāvē min nö ṙòkhöre nö teungtökūö. (Hep. 11:4, 5) Ta-a chěi töi asīnken cha ayī-ö öi köptī tö ngam maheūṅkköre öi in Yāvē. Ngaich ön ngih panam nöng iṙūöhöröön nö chuh in ngam öt lanöökö. (2 Tim. 3:13) Höng kö unôichrit höö minë kanihngen më tarik ngam Tēv Yāvē tö tī ngam Sī-ö. Öp töng yòh pöri ṙôken nup kanihngen nö yih nö ikui hī, sön öi ötkô ṙāngenre öi keuheūttö ellōn re öi löklōn Yāvē. “Pò ngam maheūkkö hī nö in ngam tö aṅ Tēv.”—1 Tim. 4:10. w22.06 pěch 25 përa 17-18

Hěng ön ngam lānyngen hī hòṅ chumkūöṙen tö ngam alahare, pöi hòṅ holtö ellōnre öi löklōn Yāvē. (Māk. 12:30) Lökten ayī-ö öi ötkô öi kēken nup la-en nup tö mihôiṅ nö pala-aiṙen tī tö ngam alaha hī. (Rōm. 12:1) Akahakūö in töre öi öt fūra inlahen öi chumkūöṙen tö ngam alahare, lökten ṙung öi höng vahavö. Nup töng kanò-òṅ hī pöri, hòṅ chumkūöṙen ayī-ö tö ngam alahare. In e min ayī-ö hameuktöre öi milēḵṙen tö ngam nômö, ngam inlōntö hī nö kahëtö ngam Yöng hī Yāvē. Yēḵ hī ṙung öi vahavö yih inrē ngam kanöinyö hī, ngaich ötkô öi sā inlahen re inuk tö lā-urěh öi la-evṙen. Lökten ṙung öi hēṙu öi tainy hēk haṙivlōn inrē. Ötkô pöri ayī-ö höng haṙivlōn, pön öp tölngö kanô-òṅ hī hòṅ chumkūöṙen ayī-ö tö ngam alahare. Pòrô öp tö yòh inlahen hī öi īnu tö ngam invah hēk köiny inrē, mihôiṅ öi ha-öinyö Yāvē sā inlahen Rācha Tāvit. Pòrô ngaich nö kūönngöre ngam kumlēḵ alaha hī, sön öi pōiṙāi imat Yāvē. Iṙôken ṙanamlōn öi hang tö ngatī! (Mët. 10:29-31) Pòrô min öi kapah, öthō min anga-aṅ nö öt hachohlen hī. Pò ò nö kapahare nö hòṅ ngatī inlahen. (Yōp 14:14, 15) Lökten in öi hòṅ chumkūöṙen tö ngam alahare yěi ṙömöng aṅ. w23.02 pěch 20-21 përa 3-5

Ōt hòng min minë minë-eny më aṅ ngam tökiröng kiteūm më tötkô-òngvah hē ngam Armakētòn nö i mat ngam līpöre nômö? Heūṅ. (Inm. 7:14) Ngö ṙô ök Yēsū tö yip tö sā inlahen sīṅp tarik nö “teūngen min cha-a tö ngam tö örheūheu aṅ nômö.” (Mët. 25:46; Yôh. 10:16) Hö-ö pöri cha-a nö ilööṙen nö teūngen tö ngam nômö tö örheūheu aṅ unôichrit ngam Armakētòn. Hē Yēsū pöri min nö hayööng im tö köönyu samyeūheu, ngaich sā ṙēngen öp ‘yōm pököre min anga-aṅ nö hachōten cha nö inup töhëmlö mak nômö.’ Yip hamang chööngö Yēsū min hēk yip tö köp inrē ip manā-aṅ kinlaha, acha-a min tö köp nö kūichi minë-eny nö imat ngam līpöre nômö. (Inm. 7:16, 17) Yip tarik pöri tö sa pöököre tö ha-etiyö ip Armakētòn min. Ngö ṙô ang Yēsū, “chuh el ngam tö örheūheu yip cha-a ötinkôlò.” (Mët. 25:46) Cha-a yip inrē ṙô Pôl “yip töt hakôlöngṙô, im tö-örheūheu kinpaha.”—2 Tös. 1:9; 2 Pīt. 2:9. w22.09 pěch 16 përa 7-8

Yēḵ ngam mikūönö nö holṙenre nö chumkūöṙen nö ngëichkö minë vahī kūö kuntī Yāvē. Ngaich ṙòkhöre cha-a nö ṙamlōn, ngönlöre inrē ngam innôlö cha röhta inrē cha-a nö in höö. Pōyen nun minë vahī kūö kuntī Yāvē, löktö ṙanamlōn hī yēḵ hī öi meūkö u. Tö sā minë rôngö, mai hēk tö minë el inchōnngö inrē. Pōyen inrē yip mikūönö chamuh in nup tö ngatī chūökö nö kēnyö ṙētakre. Pōyen ṙanamlōn in min ip tufömngöre tövai panam öi holtö yip mikūönöre öi haköp inlahen minë tövīlöng. Ngaich ip hē e min öi öt vöö tö nup töṙeūla hēk öt vöö min inrē anū-ö tö hī. (Isa. 11:6-9) Pōyen ṙētak inrē min ayī-ö ip hē e öi ngëichkö minë vahī kūö kuntī Yāvē öi ṙamlōn. (Sal. 22:26) Yī-ö inyööngö, ötkô in öi höng hökken ngam ṙētak yamih, pöi hòṅ löktö kūö ing töngamuh öi haköpten më kūönre tö minë tövīlöng pöi mihôiṅ öi ṙamlōn öi löktö in u. Hòṅ cha nö akahakūö tö tinrīken Yāvē hēk mikahtökūöre inrē tö ò. Hòṅ cha nö sā inlahen mufē Tāvit nö ngö ṙô: ‘Ō Mā [Yāvē], Öt hěng la-en tö sā nup la-en meh.’—Sal. 86:8. w23.03 pěch 25 përa 16-17