Mokanda ya liboso epai ya Bakorinti

11 Bómekola ngai, ndenge ngai mpe namekolaka Kristo.+

2 Nazali kokumisa bino mpo bokanisaka ngai ntango nyonso mpe bozali kolanda malamumalamu malako* oyo napesaki bino. 3 Kasi nalingi bóyeba ete mokonzi* ya mobali nyonso ezali Kristo,+ mokonzi ya mwasi nyonso ezali mobali,+ mpe mokonzi ya Kristo ezali Nzambe.+ 4 Mobali nyonso oyo azali kobondela to kosakola wana azali na eloko na motó azali koyokisa mokonzi na ye nsɔni; 5 kasi mwasi nyonso oyo azali kobondela to kosakola+ motó na ye ezipami te azali koyokisa mokonzi na ye nsɔni, mpo ezali mpenza lokola nde azalaki mwasi oyo motó na ye ekokolami. 6 Mpo soki mwasi azali komizipa te, bákata ye mpe nsuki; kasi soki ezali nsɔni mpo na mwasi kokatama nsuki to kokolama motó, esengeli amizipa.

7 Mpo mobali asengeli te kozala na motó oyo ezipami, mpo azali elilingi+ mpe nkembo ya Nzambe; kasi mwasi azali nkembo ya mobali. 8 Mobali auti na mwasi te, kasi mwasi auti na mobali.+ 9 Mpe mobali azalisamaki te mpo na mwasi, kasi mwasi mpo na mobali.+ 10 Mpo na ntina wana mpe mpo na baanzelu, mwasi asengeli kozala na elembo ya bokonzi na motó na ye.+

11 Lisusu, na kati ya bayekoli ya Nkolo, mwasi azali na mposa ya mobali mpe mobali azali na mposa ya mwasi. 12 Kaka ndenge mwasi auti na mobali,+ mobali mpe auti na mwasi; kasi biloko nyonso euti na Nzambe.+ 13 Bókata bino moko: Ebongi mwasi abondelaka Nzambe kozanga komizipa motó? 14 Ndenge biloko esalemá, ezali koteya bino ete soki mobali azali na nsuki milai, ezali nsɔni mpo na ye. 15 Kasi soki mwasi azali na nsuki milai, ezali nkembo mpo na ye. Bapesá ye nsuki mpo ezala eloko ya kozipa motó. 16 Nzokande, soki moto moko alingi kokɔtela momeseno mosusu, tozali na mosusu te, mpe masangá ya Nzambe ezali na yango te.

17 Kasi, ntango nazali kopesa malako oyo, nazali te kokumisa bino, mpo, koyangana oyo boyanganaka ezalaka mpo na malamu te, kasi mpo na mabe. 18 Libosoliboso, nayoki ete ntango boyanganaka na lisangá, bokabwani ezalaka na kati na bino; mpe nakanisi ete ekoki kozala bongo. 19 Mwa mangomba mikemike ekozala mpenza na kati na bino,+ kasi yango ekomonisa polele soki banani Nzambe azali kondima bango.

20 Ntango boyei koyangana na esika moko mpo na kolya Bilei ya mpokwa ya Nkolo, yango ezali kosalema te na ndenge oyo ebongi.+ 21 Soki ntango ekoki mpo bólya yango, moto na moto alyaka naino liboso bilei na ye moko ya mpokwa, bongo mosusu azali na nzala kasi mosusu alangwe masanga. 22 Bozali na bandako mpo na kolya mpe komɛla te? Bozali nde kotyola lisangá ya Nzambe mpe koyokisa babola nsɔni? Naloba na bino nini? Nakumisa bino? Na likambo wana nakoki kokumisa bino te.

23 Makambo oyo nazali koteya bino yango nde nayekolaki epai ya Nkolo: na butu+ oyo asengelaki kotɛkama, Nkolo Yesu azwaki limpa, 24 nsima ya kopesa Nzambe matɔndi, abukaki yango mpe alobaki: “Oyo elakisi nzoto na ngai+ oyo ezali mpo na bino. Bókoba kosala boye mpo na kokanisa ngai.”+ 25 Asalaki mpe ndenge moko mpo na kɔpɔ,+ ntango basilisaki kolya bilei ya mpokwa, alobaki: “Kɔpɔ oyo elakisi kondimana ya sika+ na nzela ya makila na ngai.+ Bókoba kosalaka boye, mbala nyonso oyo bokomɛla yango, mpo na kokanisa ngai.”+ 26 Mpo mbala nyonso oyo bozali kolya limpa oyo mpe komɛla kɔpɔ oyo, bozali kokoba kosakola liwa ya Nkolo, tii ntango akoya.

27 Na yango, moto nyonso oyo azali kolya limpa to komɛla kɔpɔ ya Nkolo na ndenge oyo ebongi te akozala na ngambo mpo na nzoto mpe makila ya Nkolo. 28 Libosoliboso, moto amindimisa ete abongi nsima ya komitalela malamumalamu,+ mpe na ndenge yango, alya limpa mpe amɛla kɔpɔ yango. 29 Moto nyonso oyo azali kososola te ete yango elakisi nzoto azali komema lisambisi mpo na ye moko ntango azali kolya mpe komɛla. 30 Yango wana mingi na kati na bino bazali na bolɛmbu, na maladi, mpe bazali kokufa.*+ 31 Kasi soki tososoli ndenge oyo tozali, tokosambisama te. 32 Nzokande, ntango tosambisami, elakisi ete Yehova* azali kopesa biso disiplini,+ mpo tókweisama te elongo na mokili.+ 33 Na yango, bandeko, ntango bozali koyangana mpo na kolya Bilei ya mpokwa ya Nkolo, bózelanaka. 34 Soki moto azali na nzala, alya na ndako na ye, mpo bósambisama te ntango boyangani esika moko.+ Nakosilisa makambo mosusu oyo etikali ntango nakoya kuna.