Ebangedi ya Mateo

5 Ge Jesu a bona mašaba a batho, o ile a ya thabeng, gomme ge a dutše fase barutiwa ba gagwe ba ile ba tla go yena. 2 Ke moka a thoma go ba ruta, a re:

3 “Go thaba bao ba tsebago gore ba hloka tlhahlo ya Modimo,+ ka gobane Mmušo wa magodimo ke wa bona.

4 “Go thaba bao ba kwelego bohloko, ka gobane ba tla homotšwa.+

5 “Go thaba ba boleta,+ ka gobane Modimo o tla ba nea lefase gore e be la bona.+

6 “Go thaba batho bao ba swerwego ke tlala le bao ba nyoretšwego+ go dira dilo tšeo Modimo a bonago di lokile, ka gobane Modimo o tla kgotsofatša kganyogo yeo ya bona.+

7 “Go thaba bao ba gaugelago+ ba bangwe, ka gobane le bona ba tla gaugelwa.

8 “Go thaba ba dipelo tše di hlwekilego,+ ka gobane ba tla bona Modimo.

9 “Go thaba bao ba dirago khutšo,+ ka gobane ba tla bitšwa bana* ba Modimo.

10 “Go thaba bao ba tlaišwago ka baka la go dira dilo tša go loka,+ ka gobane Mmušo wa magodimo ke wa bona.

11 “Go thaba lena ge ba le roga,+ ba le tlaiša,+ ba bolela maaka le dilo tše mpe ka lena ka baka la ka.+ 12 Thabang kudu+ ka ge moputso wa lena+ e le o mogolo magodimong, ka gobane baporofeta bao ba bilego gona pele ga lena le bona ba ile ba tlaišwa ka tsela yeo.+

13 “Lena le swana le letswai+ la lefase, eupša ge letswai le felelwa ke tatso ya lona, na go na le motho yo a ka tsošološago tatso yeo? Letswai leo ga le sa na mohola, eupša le tla lahlelwa ka ntle+ gore le gatakelwe ke batho.

14 “Lena le swana le seetša sa lefase.+ Motse o ka se utege ge o le godimo ga thaba. 15 Ge batho ba tšhuma lebone, ga ba le khupetše eupša ba le bea godimo ga tafola,* ke moka lebone leo la bonegela batho ka moka bao ba lego ka ntlong.+ 16 Ka mo go swanago, anke seetša sa lena se bonege pele ga batho+ gore ba bone mediro ya lena e mebotse,+ gomme ba tumiše Tatago lena yo a lego magodimong.+

17 “Le se ke la nagana gore ke tletše go fediša Molao wa Moshe goba dilo tšeo Baporofeta ba di ngwadilego. Ke tletše go di phethagatša, e sego go di fediša.+ 18 Ka nnete ke le botša gore, go no swana le ge legodimo le lefase di tla dula di le gona, le tlhaka e nyenyanenyenyane Molaong goba karolwana e nyenyane ya tlhaka yeo, e tla dula e le gona go fihlela dilo tše ka moka di direga.+ 19 Ka gona, motho le ge e le ofe yo a sa latelego e nngwe ya ditaelo tšeo batho ba bonago di se bohlokwa, gomme a ruta batho ba bangwe gore le bona ba se ke ba di tšea di le bohlokwa, a ka se swanelege go tsena* Mmušong wa magodimo. Eupša yo a di latelago ebile a ruta ba bangwe gore ba di latele, o tla tsena* Mmušong wa magodimo. 20 Ka gobane ke le botša gore, ge e ba le sa dire dilo tše di lokilego go feta barutiši ba molao le Bafarasei,+ le ka se tsoge le tsene Mmušong wa magodimo.+

21 “Le kwele gore batho bao ba phetšego mehleng ya kgale ba ile ba botšwa gore: ‘O se ke wa bolaya,+ le gore motho le ge e le ofe yo a bolayago o tla seka kgorong.’+ 22 Go e na le moo ke le botša gore yo mongwe le yo mongwe yo a tšwelago pele a galefetše+ ngwanabo o tla seka kgorong, eupša mang le mang yo a rogago ngwanabo go bontšha gore o a mo nyatša, o tla seka Kgorong e Phagamego, gomme mang le mang yo a rego: ‘Wena lešilo tena,’ o tla lahlelwa Gehenna*+ yeo e tukago mollo.

23 “Ka gona, ge o tliša mpho ya gago aletareng+ gomme ge o le moo wa gopola gore ngwaneno o na le seo se sa mo fetišego gabotse ka wena, 24 gona tlogela mpho ya gago moo pele ga aletare, o ye go yena. Thoma pele ka go dira khutšo le ngwaneno, gomme ge o boa, e be gona o išago mpho ya gago.+

25 “Lokiša ditaba kapejana le yo a go išitšego kgorong ya tsheko ge le sa le tseleng ya go ya moo, e le gore a se ke a go iša go moahlodi gore a go ahlole, ke moka moahlodi a go iša go mohlokomedi wa kgolego gomme yena a go lahlela kgolegong.+ 26 Ruri ke go botša gore o ka se tšwe moo kgolegong go fihlela o patetše tšhelete yeo ka moka.*

27 “Le kwele gore go ile gwa thwe: ‘O se ke wa hlotlola.’*+ 28 Eupša nna ke re go lena, yo mongwe le yo mongwe yo a tšwelago pele a lebeletše mosadi yo e sego wa gagwe+ e le gore a feleletše a mo kganyoga, o šetše a hlotlotše le yena ka pelong ya gagwe.+ 29 Bjale, ge e ba leihlo la gago la le letona le go diriša sebe,* gona le ntšhe o le lahlele kgole le wena.+ Ka gobane go kaone gore o lahlegelwe ke setho setee go e na le gore mmele wa gago ka moka o lahlelwe Gehenna.+ 30 Le gona, ge e ba seatla sa gago sa le letona se go diriša sebe, gona se kgaole o se lahlele kgole le wena.+ Ka gobane go kaone gore o lahlegelwe ke setho se setee go e na le gore mmele wa gago ka moka o feleletše o le Gehenna.+

31 “Le gona go ile gwa thwe: ‘Mang le mang yo a hlalago mosadi wa gagwe, a mo nee lengwalo la tlhalo.’+ 32 Eupša nna ke le botša gore monna yo mongwe le yo mongwe yo a hlalago mosadi wa gagwe ge e se ka baka la boitshwaro bjo bobe bja tša thobalano,* o mmea kotsing ya gore a dire bohlotlolo. Le gona mang le mang yo a nyalago mosadi yo a hladilwego o a hlotlola.+

33 “Le gona le kwele gore batho ba kgale ba ile ba botšwa gore: ‘O se ke wa ena gomme wa se phethe seo o se ennego,+ eupša o swanetše go phetha dikeno tšeo o di diretšego Jehofa.’+ 34 Bjale nna ke re go lena: Le se ke la ena le gatee,+ le ge e le ka legodimo, ka gobane ke setulo sa bogoši sa Modimo. 35 Le gona le se ke la ena ka lefase, ka gobane ke bogato bja dinao tša Modimo,+ ebile le se ke la ena ka Jerusalema, ka gobane ke motse wa Kgoši e kgolo.+ 36 Le gona o se ke wa ena ka hlogo ya gago, ka gobane o ka se kgone go fetoša le moriri o tee gore e be o mošweu goba o moso. 37 Ge e ba le re le tlo dira selo gona le se dire, gomme ge e ba le re le ka se dire selo, le se ke la se dira,*+ ka gobane se se fetago moo se tšwa go Diabolo.*+

38 “Le kwele gore go ile gwa thwe: ‘Leihlo ka leihlo le leino ka leino.’+ 39 Eupša nna ke re go lena: O se ke wa lwa le motho yo mongwe, go e na le moo, mang le mang yo a go bethago lerameng, o mo nee le le lengwe.+ 40 Le gona ge motho a nyaka go go iša kgorong ya tsheko gomme a tšea seaparo sa gago sa ka gare, o mo nee le sa ka ntle.+ 41 Ge motho yo mongwe yo a nago le maatla a go gapeletša go sepela le yena khilomithara e tee, gona sepela le yena dikhilomithara tše pedi. 42 Ge motho a go kgopela selo, mo nee sona. O se ke wa gana go adima motho selo se itšego ge a go kgopela sona.+

43 “Le kwele gore go ile gwa thwe: ‘O rate moagišane wa gago+ gomme o hloye lenaba la gago.’ 44 Eupša nna ke re go lena: Tšwelang pele le rata manaba a lena+ le go rapelela bao ba le tlaišago,+ 45 e le gore le bontšhe gore le bana ba Tatago lena yo a lego magodimong,+ ka ge a hlabišetša batho bao ba lokilego le bao ba sa lokago letšatši la gagwe, ebile a nešetša bao ba lokilego le bao ba sa lokago pula.+ 46 Ka gobane ge e ba le rata feela bao ba le ratago, le na le moputso ofe?+ Na batho bao ba patedišago ba bangwe motšhelo ga ba rate feela bao ba ba ratago? 47 Le gona ge e ba le dumediša banababo lena feela, na le dira selo se sekaone go feta batho ba bangwe? Na batho ba ditšhaba tše dingwe le bona ga ba dire se se swanago? 48 Le swanetše go phethagala, go etša ge Tatago lena wa legodimong a phethagetše.+