යොෂුවා
22 ඒ කාලයේදී යොෂුවා, රූබෙන් ගෝත්‍රයත් ගාද් ගෝත්‍රයත් මනස්සේ ගෝත්‍රයත්*+ කැඳවා 2 ඔවුන්ට මෙසේ කීවේය. “යෙහෝවා දෙවිගේ සේවකයෙකු වූ මෝසෙස් ඔබට අණ කළ සෑම දෙයකටම ඔබ කීකරු වුණා.+ ඒ වගේම ඔබ මගේ උපදෙස්වලටත් ඇහුම්කන් දුන්නා.+ 3 මේ වන තෙක්ම ඔබ ඔබේ සහෝදරයන්ට සහයෝගය දෙමින්+ ඔබේ දෙවි වන යෙහෝවා ඔබට අණ කළ සියල්ල හොඳින් ඉටු කළා.+ 4 ඔබේ දෙවි වන යෙහෝවා පොරොන්දු වූ විදිහටම ඔබේ සහෝදරයන් මේ දේශයේ සැනසිල්ලේ ජීවත් වෙනවා. ඔවුන්ට සතුරන්ගෙන් කිසිම හිරිහැරයක් නැහැ.+ ඒ නිසා යෙහෝවා දෙවිගේ සේවකයෙකු වූ මෝසෙස්ගෙන් ඔබට උරුමයක් හැටියට ලැබුණු දේශය වෙතට ඔබට දැන් හැරී යන්න පුළුවන්. යොර්දාන් ගඟෙන් එගොඩ තියෙන ඔබේ වාසස්ථානවලට ගිහින් පදිංචි වෙන්න.+ 5 නමුත් යෙහෝවා දෙවිගේ සේවකයෙකු වූ මෝසෙස් ඔබට දුන් අණපනත් කඩ නොකිරීමට වගබලා ගන්න.+ ඔබේ දෙවි වන යෙහෝවාට ප්‍රේම කරන්න.+ සැමවිටම ඔහු දෙන මඟ පෙන්වීම්වලට අනුව ජීවත් වෙමින්+ ඔහුගේ ආඥාවලට කීකරු වන්න.+ ඔබේ මුළු හදවතින්ද+ ඔබේ මුළු ශක්තියෙන්ද+ ඔහුට සේවය කරන්න.+ දිවි ඇති තුරා ඔහුව අත් නොහරින්න.”+
6 යොෂුවා ඔවුන්ට ආශීර්වාද+ කළ පසු ඔවුහු තම නිවෙස් බලා පිටත්ව ගියෝය. 7 යොෂුවා, මනස්සේ ගෝත්‍රයෙන් එක් කොටසකට යොර්දාන් ගඟට බස්නාහිරෙන් තිබූ දේශයෙන් කොටසක් දුන්නේය.+ එම ගෝත්‍රයේ ඉතුරු අයට මෝසෙස්, බාෂාන් දේශය+ කලින් දී තිබුණේය. යොෂුවා ඔවුන්ට ආශීර්වාද කරමින් තම නිවෙස් බලා යන්න කියා කීවේය. 8 ඔහු ඔවුන්ට මෙසේද කීවේය. “අපි පරාජය කළ සතුරන්ගෙන් ගත් රන්, රිදීද තඹ හා යකඩද සතුන්ද වස්ත්‍රද වෙනත් වටිනා දේවල්ද බොහොමයක් තිබෙනවා.+ යන්න කලින් ඔබේ කොටස ගන්න.+ ඒවා ඔබේ සහෝදරයන් සමඟ බෙදාගන්න.”
9 ඉන්පසු රූබෙන් ගෝත්‍රයටත් ගාද් ගෝත්‍රයටත් මනස්සේ ගෝත්‍රයටත් අයත් සෙනඟ, ඊශ්‍රායෙල්හි අනික් ගෝත්‍රවලට අයත් සෙනඟගෙන් සමුගත්තෝය. ඔවුහු කානාන් දේශයේ පිහිටි ෂීලෝ නගරයෙන් පිටත්ව තමන්ට උරුම වූ ගිලියද් දේශය+ වෙතට ගියෝය. යෙහෝවා දෙවිගේ අණ පරිදි මෝසෙස් ඔවුන්ට එම දේශය දී තිබුණේය.+ 10 එම ගෝත්‍ර තුනට අයත් සෙනඟ කානාන් දේශයෙන් පිටත් වීමට පෙර යොර්දාන් ගඟ අසල විශාල පූජාසනයක් ගොඩනැඟුවෝය.+ 11 පසුව ඊශ්‍රායෙල්හි ඉතුරු සෙනඟට ඒ ගැන ආරංචි වී+ ඔවුහු මෙසේ කීවෝය. “රූබෙන්, ගාද් හා මනස්සේ ගෝත්‍රවල අය කරලා තියෙන දේ බලන්න! ඔවුන් කානාන් දේශයෙන් පිට වෙලා යන්න කලින් යොර්දාන් ගඟ ළඟ පූජාසනයක් හදාගෙන. ඔවුන් පූජාසනය හදලා තියෙන්නේ අපිට අයිති පැත්තෙයි.” 12 මෙය ඇසූ විට ඊශ්‍රායෙල් සෙනඟ+ ඔවුන්ට විරුද්ධව යුද්ධයට යෑම සඳහා+ ෂීලෝහිදී රැස් වූහ.+
13 ඉන්පසු ඊශ්‍රායෙල්වරු ගිලියද් දේශයේ සිටි ගෝත්‍ර තුන වෙතට+ පූජක එලියාසර්ගේ පුත් පිනෙහාස්ව+ හා 14 සෑම ගෝත්‍රයක්ම නියෝජනය කරන පිණිස අධිපතීන් දසදෙනෙකුවද පිටත් කර යැව්වෝය. ඒ දසදෙනා ඊශ්‍රායෙල් ගෝත්‍රවල* සිටි පවුල් මූලිකයන්ය.+ 15 ඒ අය ගිලියද් දේශයේ සිටි රූබෙන්, ගාද් සහ මනස්සේ ගෝත්‍රවලට අයත් සෙනඟ වෙතට පැමිණ මෙසේ කීවෝය.+
16 “යෙහෝවා දෙවිගේ සෙනඟ+ ඔබෙන් මෙහෙම අහනවා. ‘ඔබ ඊශ්‍රායෙල්වරුන්ගේ දෙවිට විරුද්ධව මේ වගේ මහත් පාපයක් කළේ ඇයි?+ ඔබ යෙහෝවා දෙවිව අත්හැර+ වෙනම පූජාසනයක් ගොඩනඟා ගෙන තිබෙනවා.+ ඇයි ඔබ යෙහෝවා දෙවිට විරුද්ධව මේ විදිහට කැරලිගසන්නේ? 17 පෙයෝර්හිදී අපේ අතින් සිදු වූ බරපතළ පාපය+ ඔබට මතක නැද්ද? අපි කළ ඒ පාපය නිසා යෙහෝවා දෙවි මුළු ඊශ්‍රායෙල් සෙනඟට වසංගතයකින් පහර දුන්නා.+ ඒත් තවමත් ඒ වැරදි පෙලඹීම සෙනඟ අතරේ තිබෙනවා. 18 අද ඔබ යෙහෝවා දෙවිව අත්හැර ඔහුට විරුද්ධව කැරලිගැසුවොත් හෙට දවසේදී යෙහෝවා දෙවි මුළු ඊශ්‍රායෙල් සෙනඟ සමඟ උදහස් වෙයි.+ 19 ඔබට ලැබුණු දේශය අපවිත්‍රයි+ කියා ඔබට හැඟෙනවා නම් යෙහෝවා දෙවිගේ ශුද්ධ කූඩාරම තිබෙන දේශයට+ එන්න. යෙහෝවා දෙවි වාසය කරන ඒ දේශයට+ ඇවිත් අප සමඟ ජීවත් වන්න. අපේ දෙවි වන යෙහෝවාට දැනටමත් ඒ දේශයේ පූජාසනයක් ගොඩනඟා තිබෙනවා. ඉතින් ඇයි ඔබ තවත් පූජාසනයක් ගොඩනැඟුවේ?+ එහෙම කරලා යෙහෝවා දෙවිට විරුද්ධව කැරලිගසන්න එපා. ඔබ එහෙම කළොත් අපත් ඒ වරදට හවුල්කාරයෝ වෙයි. 20 දෙවි විනාශ කරන්න නියම කළ දේවල් සේරාගේ පුත් ආකාන්+ තමා ළඟ තබාගත් නිසා මුළු ඊශ්‍රායෙල් සෙනඟ සමඟ දෙවි උදහස් වුණා.+ ඔහු කළ ඒ වරද නිසා අනික් අයටත් ඔවුන්ගේ ජීවිතවලින් වන්දි ගෙවන්න සිදු වුණු බව අමතක කරන්න එපා.’”+
21 එවිට රූබෙන්, ගාද් සහ මනස්සේ ගෝත්‍රවලට අයිති සෙනඟ ඊශ්‍රායෙල් ගෝත්‍රවල ප්‍රධානීන්ට+ මෙසේ කීවෝය.+ 22 “වෙන කිසි දෙවි කෙනෙක්+ යෙහෝවා+ දෙවි තරම් බලවත් නැහැ.+ අපි කළේ ද්‍රෝහිකමක් නම් යෙහෝවා දෙවි ඒක දන්නවා.+ ඒ විතරක් නෙවෙයි, මුළු ඊශ්‍රායෙල් සෙනඟත් ඒක දැනගනීවි.+ යෙහෝවා දෙවියනි, අපි ඔබට විරුද්ධව කැරලිගසා+ ඔබට ද්‍රෝහි වී ඇත්නම්+ දැන්මම අපිව මරා දමන්න. 23 අපි මේ පූජාසනය හැදුවේ යෙහෝවා දෙවිව අත්හැර, වෙනත් දෙවිවරුන්ට විවිධ පූජා ඔප්පු කරන්න නම්+ යෙහෝවා දෙවිගෙන් එය අපට සඟවන්න පුළුවන් කියා ඔබ සිතනවාද?+ 24 එහෙම දෙයකට නෙවෙයි අපි මේ පූජාසනය ගොඩනැඟුවේ. නමුත් ඔබේ දරුවන් පසු කාලයකදී අපේ දරුවන්ට මෙහෙම කියයි කියා අපිට භය හිතුණා. ‘ඊශ්‍රායෙල්වරුන්ගේ දෙවි වන යෙහෝවාට නමස්කාර කරන්න ඔබට අයිතියක් නැහැ. 25 රූබෙන් ගෝත්‍රය හා ගාද් ගෝත්‍රය අපෙන් වෙන් කර තියන්න ඕනේ නිසයි යෙහෝවා දෙවි යොර්දාන් ගඟෙන් එපිට දේශයක් ඔබට දුන්නේ. ඒ නිසා යෙහෝවා දෙවිට නමස්කාර කරන්න ඔබට කිසිම අයිතියක් නැහැ.’+ ඔබේ දරුවෝ ඒ විදිහට කියද්දී අපේ දරුවන් යෙහෝවා දෙවිට ගරුබියෙන් සේවය කරන එක අත්හරියි කියා අපට භයක් දැනුණා.+
26 “ඒ නිසා අපි පූජාසනයක් ගොඩනඟන්න තීරණය කළා. ඒ පූජාසනය ගොඩනැඟුවේ දවන පූජා ඔප්පු කරන්නවත් වෙනත් පූජා ඔප්පු කරන්නවත් නෙවෙයි. 27 ඔබ වගේම අපිත් අපේ දරුවනුත් නමස්කාර කරන්නේ යෙහෝවා දෙවිට විතරයි. අපි දවන පූජා, හවුල් පූජා හා වෙනත් පූජා+ ඔප්පු කරන්නේ දෙවි ඉදිරියේ පමණයි. අපි දෙගොල්ලෝ අතර කිසිම භේදයක් නැහැ. ඒ බව සිහිගැන්වීමටයි+ අපි මේ පූජාසනය ගොඩනැඟුවේ. එවිට යම් දවසක, ‘යෙහෝවා දෙවිට නමස්කාර කරන්න ඔබට අයිතියක් නැහැ’ කියා ඔබේ දරුවන්ට පැවසීමට හැකි වන්නේ නැහැ. 28 අනාගතයේදී අපට හෝ අපේ දරුවන්ට ඒ වගේ දෙයක් කවුරු හරි කිව්වොත් අපට මේ දේ කියන්න පුළුවන් වෙයි. ‘අපේ මුතුන්මිත්තෝ යෙහෝවා දෙවිගේ පූජාසනයට සමාන පූජාසනයක් මෙතැන ගොඩනැඟුවේ දවන පූජා හෝ වෙනත් පූජා ඔප්පු කරන්න නෙවෙයි. නමුත් අපිත් ඔබත් අතරේ කිසි භේදයක් නැහැ කියා සිහිගන්වන්නයි.’ 29 යෙහෝවා දෙවිගේ ශුද්ධ කූඩාරම ඉදිරියේ තිබෙන පූජාසනයට අමතරව තවත් පූජාසනයක් ගොඩනඟා එහි පූජා ඔප්පු කරන එක ගැන අපිට හිතන්නවත් බැහැ.+ අපේ දෙවි වන යෙහෝවාට විරුද්ධව හිතාමතා කැරලිගසන්නවත් යෙහෝවා දෙවිව අත්හැර යන්නවත් අපි කොහෙත්ම අදහස් කළේ නැහැ.”+
30 රූබෙන්, ගාද් සහ මනස්සේ ගෝත්‍රවල සෙනඟ පැවසූ දේවල් අසා පූජක පිනෙහාස්ද+ ඔහු සමඟ සිටි ඊශ්‍රායෙල්වරුන්ගේ අධිපතීහුද+ ගෝත්‍රවල නායකයෝද සතුටු වුණෝය. 31 එහෙයින් එලියාසර්ගේ පුත්‍රයා වූ පූජක පිනෙහාස් ඔවුන්ට මෙසේ කීවේය. “ඔබ යෙහෝවා දෙවිට ද්‍රෝහි වුණේ නැති නිසා යෙහෝවා දෙවිත් අපිව අත්හරින්නේ නැති බව විශ්වාසයි.+ යෙහෝවා දෙවි දැන් අපට දඬුවම් කරන එකක් නැහැ.”+
32 එසේ කී පසු එලියාසර්ගේ පුත්‍රයා වූ පූජක පිනෙහාස්ද ඊශ්‍රායෙල්වරුන්ගේ අධිපතීහුද ගිලියද් දේශයේ සිටි රූබෙන් සහ ගාද් ගෝත්‍රවලට අයත් සෙනඟගෙන් සමුගෙන කානාන් දේශයේ සිටි අනික් ඊශ්‍රායෙල්වරුන් වෙත ගොස්+ ඒ සියලු විස්තර දැනුම් දුන්නෝය.+ 33 ඊශ්‍රායෙල්වරු ඒ ආරංචිය අසා සතුටු වෙමින් දෙවිට ප්‍රශංසා කළෝය.+ රූබෙන් සහ ගාද් ගෝත්‍රවලට විරුද්ධව යුද්ධ කර ඔවුන්ගේ දේශය විනාශ කරන්න ගත් තීරණය ඔවුහු වෙනස් කළෝය.
34 රූබෙන් සහ ගාද් ගෝත්‍රවලට අයත් සෙනඟ තමන් ගොඩනැඟූ පූජාසනයට නමක්* දී, “යෙහෝවා දෙවි සැබෑ දෙවි+ බවට මෙය අපි දෙගොල්ලන්ටම සාක්ෂියක් වේවා” යයි කීවෝය.