යොහන්
12 පාස්කු උත්සවයට දවස් හයකට කලින් යේසුස් බෙතානියට පැමිණියේය.+ යේසුස් විසින් මරණයෙන් නැඟිටුවනු ලැබූ ලාසරුස්+ පදිංචිව සිටියේ එහිය. 2 එහෙයින් යම් පිරිසක් ඔහු වෙනුවෙන් සන්ධ්‍යා භෝජනයක් පිළියෙල කළෝය. සියලුදෙනාට සංග්‍රහ කරමින්+ සිටියේ මාර්තාය.+ යේසුස් සමඟ කෑමට ඉඳගෙන සිටි අය අතර ලාසරුස්ද සිටියේය.+ 3 එවිට මරියා ඉතා මිල අධික, පිරිසිදු, සුවඳැති ජටාමාංස තෙල්+ රාත්තලක්* ගෙන, එය යේසුස්ගේ පාදවල ආලේප කර ඇගේ හිසකෙස්වලින් ඔහුගේ පාද පිස දැමුවාය.+ ඒ තෙල්වල සුවඳ මුළු නිවසම පුරාම විහිදී ගියේය. 4 නමුත් ඔහුගේ එක් ගෝලයෙක් එනම්, ඔහුව පාවා දීමට සිටි යූදස් ඉස්කාරියොත්+ මෙසේ කීවේය. 5 “මේ සුවඳ තෙල+ ඩිනාරි තුන්සියයකට විකුණා දිලිඳුන්ට දෙන්න තිබුණා+ නේද? ඇයි එහෙම කළේ නැත්තේ?” 6 ඔහු ඒ දේ පැවසුවේ දිලිඳුන් ගැන සැලකිල්ලක් දැක්වූ නිසා නොව ඔහු සොරෙකු වූ නිසාය.+ මුදල් පෙට්ටිය භාරව සිටි ඔහු,+ එහි දැමූ මුදල් තමාගේ ප්‍රයෝජනය සඳහා ගැනීමට පුරුදු වී සිටියේය. 7 එවිට යේසුස් මෙසේ කීවේය. “ඇයට ඉන්න දෙන්න. මාව තැන්පත් කරන දවස ළඟ නිසා මේ දේ කරන්න ඇයට ඉඩහරින්න.+ 8 දිලිඳු අය ඔබ සමඟ හැමදාම සිටිනවා.+ නමුත් මම ඔබ සමඟ හැමදාම ඉන්නේ නැහැ.”
9 යුදෙව්වරුන්ගෙන් විශාල සමූහයක් යේසුස් එහි සිටින බව දැනගෙන එතැනට එක් රොක් වූහ. ඔවුන් එහි පැමිණියේ ඔහුව හමු වීමට පමණක් නොව ඔහු විසින් මරණයෙන් නැඟිටුවා තිබූ ලාසරුස්වත් දැකගැනීමටය.+ 10 ඒ ගැන ආරංචි වූ නායක පූජකයෝ ලාසරුස්වත් මරා දැමීමට කුමන්ත්‍රණ කළෝය.+ 11 ඔවුන් එසේ කළේ ලාසරුස්ව දැකීමට එතැනට ගිය යුදෙව්වරුන් බොහෝදෙනෙකු යේසුස් කෙරෙහි විශ්වාසය තැබූ නිසාය.+
12 පසුවදා උත්සවයට පැමිණ සිටි විශාල සමූහයාට යේසුස් යෙරුසලමට එන බව ආරංචි විය. 13 එහෙයින් ඔවුහු තාල ගස්වල අතු+ කපා ඒවාත් රැගෙන ඔහුව හමු වීමට ගියෝය. එවිට ඔවුහු, “ඔහුට ආරක්ෂාව ලැබේවා!+ යෙහෝවා දෙවිගේ නාමයෙන්+ එන තැනැත්තාට එනම්, ඊශ්‍රායෙලයෙහි රජාණන්ට+ ආශීර්වාද වේවා” කියා කෑගසන්න පටන්ගත්හ.+ 14 යේසුස්ට ගමන් කිරීම සඳහා බූරු නාම්බෙකුව+ සොයාගත් විට ඔහු ඌ පිට හිඳගත්තේය. එය එසේ සිදු වූයේ මෙසේ ලියා තිබෙන දේ ඉටු වීමක් ලෙසය. 15 “සියොන් දියණියෙනි, බිය නොවන්න. බලන්න! ඔබේ රජ බූරු නාම්බෙකු පිට+ නැඟී එන්නේය.”+ 16 ඔහුගේ ගෝලයන් මේ දේවල් මුලින් සැලකිල්ලට නොගත්+ නමුත් යේසුස් තේජසට පත් වූ විට+ මේ දේවල් ලියා තිබුණේ ඔහු ගැන බවත් ජනතාව මේ දේවල් ඔහුට කළ බවත් ඔවුන්ට මතක් විය.+
17 මේ අතර යේසුස් ලාසරුස්ව+ මරණයෙන් නැඟිටුවා සොහොන් ගෙයින් පිටතට කැඳවූ අවස්ථාවේදී ඔහු සමඟ සිටි සමූහයා තමන් දුටු දේ ගැන පවසමින් සිටියහ.+ 18 එහෙයින් මේ ආශ්චර්යය+ යේසුස් කළ බව දැනගත් සෙනඟ, ඔහුව සොයාගෙන ගියෝය. 19 එය දුටු පරිසිවරු,+ “බලන්න, අපේ හැම සැලසුමක්ම අසාර්ථකයි! මුළු ලෝකයම ඔහු පසුපස යනවා”+ කියා ඔවුනොවුන් අතරේ කතා කරගත්තෝය.
20 මේ අතර පාස්කු උත්සවය සැමරීමට පැමිණි අය අතර ග්‍රීකවරුන් කිහිපදෙනෙක්ද+ සිටියෝය. 21 එම පිරිස ගලීලයේ බෙත්සයිදා නුවරේ වැසියෙකු වූ ෆිලිප් ළඟට ඇවිත්,+ “මහත්මයාණෙනි, අපි කැමතියි යේසුස්ව හමු වෙන්න”+ කියා පැවසූහ. 22 ෆිලිප් ඒ ගැන අන්දෘට කීවේය. එහෙයින් අන්දෘ සහ ෆිලිප් ගොස් යේසුස්ට ඒ ගැන පැවසුවෝය.
23 යේසුස් ඔවුන්ට මෙසේ කීවේය. “මනුෂ්‍ය පුත්‍රයාව තේජසට පත් කරන්න නියමිත වේලාව දැන් ඇවිත් තිබෙනවා.+ 24 ඇත්තෙන්ම මම ඔබට කියන මේ දේට සවන් දෙන්න. තිරිඟු බීජයක් පැළ වෙන්න නම් එය පසට දමන්න අවශ්‍යයි. එවිට බීජය මැරී+ එයින් පැළයක් හටගෙන මහත් පලදාවක් ලැබෙයි. ඒ දේ සිදු වන්නේ නැත්නම් තිබෙන්නේ බීජයක් පමණයි. 25 තමාගේ ජීවිතයට තිබෙන ආශාව නිසා එය රැකගන්න උත්සාහ කරන අයට එය නැති වෙයි. නමුත් මේ ලෝකයේ තමන් ගත කරන ජීවිතයට තිබෙන ආශාව අත්හරින්න වුණත් සූදානම් අයට+ තම ජීවිතය රැකගත හැකියි. ඔවුන්ට සදාකාල ජීවනය ලැබෙයි.+ 26 කෙනෙක් මට සේවය කරන්න කැමති නම් ඔහු මාව අනුගමනය කළ යුතුයි. මා සිටින තැන මගේ සේවකයාත් සිටියි.+ කෙනෙක් මට සේවය කරනවා නම් මගේ පියාණන්ගෙන් ඔහුට ගෞරවය ලැබෙයි.+ 27 මගේ සිත දැන් කැලඹිලා.+ ඉතින් මම මොනවා කියන්නද? පියාණෙනි, මට සිදු වෙන්න යන දෙයින්* මාව ගලවන්න+ කියා කියන්නද? ඒත් මා ඒ දෙයට මුහුණ දිය යුතුමයි. 28 පියාණෙනි, ඔබගේ නාමය ගෞරවයට පත් කරන්න!” එවිට ස්වර්ගයෙන් හඬක්+ ඇවිත්, “මම එය ගෞරවයට පත් කළෙමි. නැවතත් එය ගෞරවයට පත් කරන්නෙමි”+ කියා කීවේය.
29 ඒ අවට සිටි සමූහයාට ඒ හඬ ඇසී අහස ගිගුරුම් දුන්නා කියා ඔවුහු පැවසූහ. තවත් සමහරුන් පැවසුවේ, “දේවදූතයෙක් ඔහුට කතා කළා” කියාය. 30 එවිට යේසුස් ඔවුන්ට මෙසේ කීවේය. “මේ හඬ ආවේ මා වෙනුවෙන් නොව ඔබ සියලුදෙනා වෙනුවෙනුයි.+ 31 මේ ලෝකය දැන් විනිශ්චයට ලක් වෙනවා. මේ ලෝකයේ පාලකයාව+ නෙරපා දමනු ලබනවා.+ 32 නමුත් මාව එල්ලා තබන විට+ සියලු ආකාරයේ මිනිසුන්ව මා වෙතට ඇදගන්න මට හැකි වෙයි.”+ 33 යේසුස් ඇත්තටම ඒ දේ පැවසුවේ ඔහු කවර අන්දමේ මරණයක් අද්දකිනවාද කියා පැහැදිලි කිරීමටය.+ 34 එවිට සමූහයා ඔහුගෙන් මෙසේ විමසුවෝය. “ශුද්ධ ලියවිල්ලෙන් අපි අසා තිබෙන්නේ ක්‍රිස්තුස් සදහටම ජීවත් වන බවයි.+ එසේනම් මනුෂ්‍ය පුත්‍රයාව එල්ලා තැබිය යුතුයි+ කියා ඔබ කියන්නේ ඇයි? මේ මනුෂ්‍ය පුත්‍රයා කවුද?”+ 35 යේසුස් ඔවුන්ට පිළිතුරු දුන්නේ මෙසේය. “ඔබ අතරේ ආලෝකය පවතින්නේ තව ටික කාලයකට පමණයි. ඒ නිසා අන්ධකාරයෙන්+ පරාජය නොවෙන්න නම් ඔබට ආලෝකය තිබෙද්දී ඇවිදින්න. අන්ධකාරයේ ඇවිදින තැනැත්තා තමා යන්නේ කොහේද කියා දන්නේ නැහැ.+ 36 ආලෝකය තිබෙන තාක් කල් ඒ ආලෝකය කෙරෙහි විශ්වාසය තබන්න. එතකොට ඔබට පුළුවන් වෙයි ආලෝකයේ දරුවන් වෙන්න.”+
යේසුස් මේ දේවල් පවසා එතැනින් පිටත් වී ඔවුන්ගෙන් සැඟවුණේය. 37 මන්ද ඔහු ඔවුන් ඉදිරියෙහි කොතරම් ලකුණු සිදු කළත් ඔවුහු ඔහු කෙරෙහි විශ්වාසය තැබුවේ නැත. 38 එසේ සිදු වූයේ අනාගතවක්තෘ යෙසායා පැවසූ වචන ඉටු වීම සඳහාය. එනම්, “යෙහෝවා දෙවියනි, අප ඇසූ දේ කෙරෙහි විශ්වාසය තැබුවේ කවුද?+ යෙහෝවා දෙවිගේ මහත් බලය දකින්න සැලැස්වූවේ කාටද?”+ 39 ඔවුන්ගේ අවිශ්වාසයට හේතුව යෙසායා නැවතත් පැහැදිලි කළේ මෙලෙසය. 40 “ඔහු ඔවුන්ගේ ඇස් අන්ධ කර තිබේ. ඔහු ඔවුන්ගේ සිත් දැඩි කර තිබේ.+ එසේ කළේ ඔවුන් තම ඇස්වලින් නොදැක, තම සිත්වලින් තේරුම් නොගන්නා පිණිසය. ඒ නිසා සුවය ලැබීමටවත් ඔවුහු මා වෙතට හැරී එන්නේ නැත.”+ 41 යෙසායා ඒ දේවල් පැවසුවේ ක්‍රිස්තුස් ගැනය. මන්ද ඔහු ක්‍රිස්තුස්ගේ තේජස දුටුවේය.+ 42 ඇත්තෙන්ම යුදෙව්වරුන්ගේ නායකයන් බොහෝදෙනෙක් යේසුස් කෙරෙහි විශ්වාසය තැබූහ.+ නමුත් ඔවුන් ඒ ගැන ප්‍රසිද්ධියේ කිසිවක් නොපැවසුවේ, පරිසිවරුන් ඔවුන්ව සිනගෝගයෙන් නෙරපා දමයි කියා බිය වූ නිසාය.+ 43 ඔවුන් ඇත්තටම ප්‍රිය කළේ දෙවිගේ අනුමැතිය ලබනවාට වඩා මිනිසුන්ගේ ප්‍රශංසාව ලැබීමටය.+
44 යේසුස් හඬ නඟා මෙසේ කීවේය. “මා කෙරෙහි විශ්වාසය තබන තැනැත්තා මා කෙරෙහි පමණක් නොව මාව එවූ තැනැත්තා කෙරෙහිද විශ්වාසය තබයි.+ 45 එමෙන්ම මාව දකින තැනැත්තා මාව එවූ තැනැත්තාවත් දකියි.+ 46 මම ආලෝකයක් හැටියට ලෝකයට ආවේ+ මා කෙරෙහි විශ්වාසය තබන අය තවදුරටත් අන්ධකාරයේ නොසිටීම සඳහායි.+ 47 කෙනෙක් මා පවසන දේවල් අසා ඒවා පිළිපදින්නේ නැත්නම් මම ඔහුව විනිශ්චය කරන්නේ නැහැ. මන්ද මම ආවේ ලෝකය විනිශ්චය කරන්න නොව+ එයට ගැලවීම ලබා දෙන්නයි.+ 48 නමුත් මාව පිළි නොගෙන මා පවසන දේවල් ප්‍රතික්ෂේප කරන තැනැත්තාව විනිශ්චය කිරීමට කෙනෙක් සිටිනවා. එයට පදනම සපයන්නේ මා පැවසූ දේවල්මයි.+ විනිශ්චය සිදු වන කාලයේදී මාව පිළි නොගන්නා තැනැත්තාව එම පදනම මත විනිශ්චයට ලක් කරයි. 49 මන්ද මා කතා කරන විට මම ඉදිරිපත් කරන්නේ මගේ අදහස් නොවෙයි. මන්ද මාව එවූ පියාණන් මා කිව යුතු දේ මට පැහැදිලිවම අණ කර තිබෙනවා.+ 50 ඔහු අණ කළ දේවල් සදාකාල ජීවනයට මඟ පාදන බවත් මම දන්නවා.+ එමනිසා මම පවසන දේවල් පියාණන් මට කියා දුන් ආකාරයටම මම පවසනවා.”+