මතෙව්
12 ඒ සමයේ සබත් දවසකදී,+ යේසුස් ධාන්‍ය කෙත් මැදින් ගියේය. ඔහුගේ ගෝලයන්ට බඩගින්නක් දැනුණු නිසා ඔවුහු ධාන්‍ය කරල් කිහිපයක් කඩාගෙන කන්න පටන්ගත්හ.+ 2 පරිසිවරු+ එය දැක, “බලන්න! ඔබේ ගෝලයෝ සබත් දවසේදී කිරීමට තහනම් දෙයක් කරනවා”+ කියා යේසුස්ට කීවෝය. 3 ඔහු ඔවුන්ට මෙසේ කීවේය. “දාවිත් තමාටත් තමා සමඟ සිටි මිනිසුන්ටත් බඩගිනි වූ විට කළ දේ+ ඔබ කියවා නැද්ද? 4 ඔහු දෙවිගේ ගෘහයට ඇතුල් වී පූජකයන්ට මිස+ තමාටවත් තමා සමඟ සිටි අයටවත් කෑමට අවසර නොතිබූ+ පිදීමේ රොටි කෑ බව+ ඔබට මතක නැද්ද? 5 දේවමාලිගාවෙහි පූජකයන් සබත් දවසේදී පවා වැඩ කරනවා. ඒ වුණත් ඔවුන් නිදොස් බවට+ නීතියේ සඳහන්ව ඇති දේ ඔබ කියවා නැද්ද?+ 6 නමුත් මා ඔබට කියන්නේ, දේවමාලිගාවට වඩා උතුම් ලෙස සැලකිය යුතු කෙනෙක්+ මෙහි සිටින බවයි. 7 ‘මට වටින්නේ දයාව+ මිස පූජාව නොවෙයි’+ යන කියමනේ නියම අර්ථය ඔබ තේරුම්ගෙන සිටියා නම් ඔබ නිදොස් අය පිට වරද තබන්නේ නැහැ. 8 ඇත්තෙන්ම සබත් දවස+ පවතින්නේ මනුෂ්‍ය පුත්‍රයාගේ බලය යටතේයි.”+
9 ඔහු එතැනින් පිටත් වී සිනගෝගයකට ඇතුල් විය. 10 එහි අතක් පණ නැති මිනිසෙක් සිටියේය.+ එවිට, “සබත් දවසේ සුව කිරීමෙහි වරදක් නැද්ද” කියා එම පරිසිවරු යේසුස්ගෙන් ඇසූහ. ඔවුන් එසේ ඇසුවේ ඔහුට විරුද්ධව චෝදනා කිරීමට හේතුවක්+ සොයාගැනීම සඳහාය. 11 ඔහු ඔවුන්ට මෙසේ කීවේය. “ඔබ අතරෙන් යමෙකුට බැටළුවෙකු සිටිනවා කියා සිතන්න. ඒ බැටළුවා සබත් දවසේදී වළක වැටුණොත්+ ඔබ ඌව ගොඩගන්නේ නැද්ද?+ 12 එසේනම් බැටළුවෙකුට වඩා මිනිසෙක් කොතරම් වටිනවාද!+ එමනිසා සබත් දවසේදී යහපත් දෙයක් කිරීමෙහි වරදක් නැහැ.” 13 ඉන්පසු ඔහු ඒ මිනිසාට, “ඔබේ අත දිගු කරන්න” කියා කීවේය. ඔහු අත දිගු කළ විට එය අනික් අත මෙන් ප්‍රාණවත් විය.+ 14 නමුත් පරිසිවරු එතැනින් පිටත් වී යේසුස්ව මරා දැමීම සඳහා+ ඔහුට විරුද්ධව කුමන්ත්‍රණය කළෝය. 15 එය දැනගත් යේසුස් එතැනින් අහක්ව ගියේය. බොහෝදෙනෙක්ද ඔහු පසුපස ගියහ. ඔහු ඒ සියල්ලන්ව සුව කළද,+ 16 තමන් ගැන කිසිවක් ප්‍රසිද්ධ නොකරන ලෙස+ ඔහු ඔවුන්ට තදින් අණ කළේය. 17 එසේ වූයේ අනාගතවක්තෘ යෙසායා මාර්ගයෙන් කියන ලද දෙය ඉටු වීම සඳහාය. එනම්,
18 “මෙන්න! මාගේ අනුමැතිය ඇති මාගේ ප්‍රේමණීය+ සේවකයා!+ මා තෝරාගත් සේවකයා මොහුය. මම ඔහුට මාගේ බලය ලබා දෙන්නෙමි.+ ඔහු ජාතීන්ට යුක්තිය යනු කුමක්දැයි පැහැදිලි කරන්නේය. 19 ඔහු දබර කරන්නේවත්+ කෑගසන්නේවත් නැත. ඔහුගේ හඬ ප්‍රධාන වීථිවල කිසිවෙකුට ඇසෙන්නෙත් නැත. 20 ඔහු සාර්ථකව යුක්තිය ඉටු කරන තුරු+ තැළුණු බට ගසක් පොඩි කරන්නේවත් නිවී යන පහන් තිරයක් නිවා දමන්නේවත් නැත.+ 21 නිසැකවම ජාතීන් තම බලාපොරොත්තු පදනම් කරගන්නේ+ ඔහුගේ නාමය මතය.”
22 භූතයෙක් ආවේශ වූ, අන්ධ, ගොළු මිනිසෙකුව යේසුස් වෙතට ගෙනෙන ලදි. යේසුස් ඔහුව සුව කළේය. ඉන්පසු ගොළු මිනිසා කතා කරන්න පටන්ගත් අතර ඔහුට පෙනීමද ලැබිණ. 23 එතැන සිටි සියලුදෙනා අතිශයින් පුදුම වී,+ “දාවිත්ගේ පුත්‍රයා මොහු වෙන්න බැරිද”+ කියා එකිනෙකා අතර කතා වෙන්න පටන්ගත්තෝය. 24 පරිසිවරු එය අසා, “මේ මිනිසා භූතයන් දුරු කරන්නේ භූතයන්ගේ පාලකයා වන බෙල්සෙබුබ්ගේ* උපකාරයෙනුයි.+ ඒ හැර වෙන විදිහකින් නම් ඔහුට මේවා කරන්න බැහැ” කියා කීවෝය. 25 ඔවුන් සිතූ දේ තේරුම්ගත්+ යේසුස් ඔවුන්ට මෙසේ කීවේය. “යම් රාජ්‍යයක භේද ඇත්නම් ඒ රාජ්‍යය නැති වී යයි.+ යම් නුවරක් හෝ ගෙයක් ඇතුළත සිටින අය අතරම භේද ඇත්නම් ඒ නුවර හෝ ගෙය වැඩි කල් පවතින්නේ නැහැ. 26 ඒ ආකාරයෙන්ම සාතන්ව දුරු කිරීමට සාතන්ම ක්‍රියා කරනවා නම් ඔහු භේද ඇති කරන්නේ තමන්ටම විරුද්ධවයි. එසේනම් ඔහුගේ රාජ්‍යය පවතින්නේ කොහොමද? 27 එහෙයින් මා භූතයන් දුරු කරන්නේ බෙල්සෙබුබ්ගේ උපකාරයෙන්+ නම් ඔබේ අනුගාමිකයන් භූතයන්ව දුරු කරන්නේ කාගේ උපකාර ඇතුවද? ඔබ කියන දේ වැරදියි කියා ඔබේම අනුගාමිකයන් නිගමනය කරන්නේ ඒ නිසයි. 28 නමුත් මා භූතයන්ව දුරු කරන්නේ දෙවිගේ බලයෙන් නම් දෙවිගේ රාජ්‍යයෙන් ඔබට උදා කර දෙන ප්‍රස්තාව දැන් ඔබ අහිමි කරගෙන තිබෙන බව+ මතක තබාගන්න. 29 සොරුන් ශක්තිමත් මිනිසෙකුගේ නිවසට කඩා වදිනවා කියා සිතන්න. ඔහුගේ බඩු බාහිරාදිය ගැනීමට නම් ඔවුන් මුලින්ම ඔහුව බැඳ දැමීමට අවශ්‍යයි. සොරුන් ඔහුගේ නිවසෙහි තිබෙන දේවල් කොල්ල කන්නේ ඔහුව බැඳ තැබුවායින් පසුවයි.+ 30 කෙනෙක් මට පක්ෂව නොසිටියොත් ඔහු මට විරුද්ධව ක්‍රියා කරයි. කෙනෙක් මා සමඟ එක්ව මිනිසුන්ව රැස් කරන්නේ නැත්නම් ඔහු කරන්නේ මගෙන් මිනිසුන්ව ඈත් කිරීමයි.+
31 “මා ඔබට කියන මේ දේ හොඳින් මතක තබාගන්න. ඕනෑම පාපයකට සහ අපහාස කිරීමකට මිනිසුන්ට සමාව ලැබෙයි. නමුත් දෙවිගේ බලයේ ක්‍රියාකාරිත්වයට විරුද්ධව කරන අපහාසයට කිසි සමාවක් නැහැ.+ 32 උදාහරණයක් වශයෙන්, යමෙක් මනුෂ්‍ය පුත්‍රයාට විරුද්ධව කතා කළොත් ඒ සඳහා ඔහුට සමාව ලැබෙයි.+ නමුත් යමෙක් දෙවිගේ බලයේ ක්‍රියාකාරිත්වය දැක දැකත් ඊට විරුද්ධව කතා කරනවා නම් මේ කාලයේදීවත්* පැමිණෙන්න තිබෙන කාලයේදීවත් ඒ සඳහා ඔහුට කිසිම සමාවක් ලැබෙන්නේ නැහැ.+
33 “ගස හොඳ නම් එහි පලත් හොඳයි. ගස නරක නම් එහි පලත් නරකයි. ගසක් හොඳද කියා හඳුනාගත හැක්කේ එහි පලවලිනුයි.+ 34 පොළඟුන්ගෙන් පැවතෙන්නෙනි!+ ඔබ දුෂ්ටව සිටියදී+ හොඳ දේ කතා කරන්නේ කෙසේද? කෙනෙකුගේ මුවින් පිට වන්නේ ඔහුගේ සිත තුළ පිරී ඇති දෙයයි.+ 35 යහපත් මිනිසා තමාගේ සිතේ ගබඩා කරගත් යහපත් දේ පිටතට ගෙන එයි.+ නමුත් දුෂ්ට මිනිසෙකු තමාගේ සිතේ දුෂ්ට දේවල් ගබඩා කරගෙන ඇති නිසා ඔහු පිටතට ගෙනෙන්නේ දුෂ්ට දේවලුයි.+ 36 මිනිසුන් කියන පලක් නැති, හානිකර සෑම දෙයක් ගැනම ඔවුන්ට විනිශ්චය දවසේදී ගණන් දෙන්න සිදු වන බව+ මතක තබාගන්න. 37 මන්ද ඔබ ධර්මිෂ්ඨයෙක් ලෙස ප්‍රකාශ කරනු ලබන්නේ ඔබ පවසන දේට අනුවයි. ඔබ වරදකරුවෙක් බවට පත් වන්නෙත් ඔබ පවසන දේට අනුවයි.”+
38 එවිට නීතිය පිටපත් කරන්නන්ගෙන්ද පරිසිවරුන්ගෙන්ද සමහරෙක්, “ගුරුතුමනි, ආශ්චර්යවත් ලෙස යම් ලකුණක් අපට පෙන්නුවොත් ඔබව අපි පිළිගන්නවා”+ කියා කීවෝය. 39 එවිට ඔහු ඔවුන්ට මෙසේ පිළිතුරු දුන්නේය. “දුෂ්ට, ද්‍රෝහි+ පරම්පරාවක් දිගින් දිගටම ලකුණක් සොයයි. නමුත් අනාගතවක්තෘ යෝනාගේ ලකුණ+ මිස වෙන ලකුණක් ඔවුන්ට දෙනු ලබන්නේ නැහැ. 40 යෝනා+ මහා මත්ස්‍යයාගේ බඩෙහි දිවා රෑ දෙකේම දින තුනක් සිටි ලෙසම මනුෂ්‍ය පුත්‍රයාද+ පොළෝගැබෙහි+ දිවා රෑ දෙකේම දින තුනක් පුරා+ සිටියි. 41 විනිශ්චයේදී නිනිවය නුවරේ මිනිසුන් නැඟිට, මේ පරම්පරාව+ කොතරම් දුෂ්ටද කියා පැහැදිලි කරයි.+ මන්ද යෝනා දේශනා කළ නිසා+ ඔවුන් පසුතැවිලි වුණා. නමුත් බලන්න! යෝනාට වඩා උතුම් කෙනෙක් මෙහි සිටියි. 42 විනිශ්චයේදී දකුණු දිශාවේ රැජින+ නැඟිට, මේ පරම්පරාව කොතරම් දුෂ්ටද කියා පැහැදිලි කර දෙයි. මන්ද සලමොන්ගේ ප්‍රඥාව ඇසීමට ඇය පැමිණියේ පොළොවේ ඈත කෙළවරක සිටයි. නමුත් බලන්න! සලමොන්ට වඩා උතුම් කෙනෙක් ඔබ අතරේම සිටියි.+
43 “භූතයෙක් මිනිසෙකුගෙන් පිට වී යද්දී ඔහු නවාතැනක් සොයමින් වියළි බිම්වල සැරිසරයි. නමුත් ඔහුට කිසිවක් හමු වන්නේ නැහැ.+ 44 එවිට ඔහු, ‘මා කලින් සිටි ගෙට ආපසු යනවා’ කියා පවසයි. ඔහු එහි පැමිණි විට එය අතුගා පවිත්‍ර කර සරසා තිබෙන ආකාරය දකියි. නමුත් එය තිබෙන්නේ හිස්වයි. 45 එමනිසා ඔහු ගොස් තමාට වඩා දුෂ්ට, වෙනත් භූතයන් හත්දෙනෙකු කැඳවාගෙන+ ඇවිත් එයට ඇතුල් වී එහි වාසය කරයි. එවිට ඒ මිනිසාගේ අවසන් තත්වය ඔහුගේ පළමු තත්වයට වඩා භයානක වෙයි.+ මේ දුෂ්ට පරම්පරාවට සිදු වන්නෙත් ඒ දේමයි.”+
46 යේසුස් සමූහයන්ට කතා කරමින් සිටියදී ඔහුගේ මවද සහෝදරයෝද+ ඔහු සමඟ කතා කිරීම සඳහා පිටත සිටගෙන සිටියහ. 47 එහෙයින් එක් කෙනෙක් ඇවිත්, “ඔබේ මවද ඔබේ සහෝදරයන්ද මෙහි ඇවිත් සිටිනවා. ඔවුන්ට ඔබ සමඟ කතා කරන්න අවශ්‍ය වෙලා” කියා ඔහුට කීවේය. 48 ඔහු තමන්ට කතා කළ තැනැත්තාගෙන්, “කවුද මගේ මව? කවුද මගේ සහෝදරයන්”+ කියා ඇසුවේය. 49 ඉන් අනතුරුව ඔහු තම ගෝලයන් දෙසට අත දිගු කරමින්, “මෙන්න! මොවුන් තමයි මගේ මව සහ මගේ සහෝදරයෝ!+ 50 මන්ද මගේ සහෝදරයා හෝ සහෝදරිය හෝ මව හෝ වන්නේ ස්වර්ගයේ සිටින මගේ පියාණන්ගේ කැමැත්ත කරන තැනැත්තායි” කියා පැවසුවේය.