2 Timotheo
3 Lakini jua hili, kwamba katika siku za mwisho nyakati za hatari zilizo ngumu kushughulika nazo zitakuwa hapa. 2 Kwa maana watu watakuwa wenye kujipenda wenyewe, wapenda-fedha, wenye kujitanguliza, wenye kiburi, wakufuru, wasiotii wazazi, wasio na shukrani, wasio waaminifu-washikamanifu, 3 wasio na shauku ya kiasili, wasiotaka upatano wowote, wachongezi, wasio na hali ya kujidhibiti, wakali, wasio na upendo wa wema, 4 wasaliti, wenye vichwa vigumu, wenye kututumuka kwa kiburi, wenye kuzipenda raha badala ya kuwa wapenda-Mungu, 5 wakiwa na namna ya ujitoaji-kimungu lakini wakithibitika kuwa si kweli kwa nguvu ya hiyo; na geukia mbali kutoka kwa hawa. 6 Kwa maana kutoka kwa hawa kwainuka watu wale wajipenyezao kwa ujanja kuziingia nyumba na kuwachukua kuwa mateka wao wanawake walio dhaifu wenye kulemezwa mizigo ya dhambi, wenye kuongozwa na tamaa za namna mbalimbali, 7 sikuzote wakijifunza na bado hawawezi kamwe kufikia ujuzi sahihi juu ya kweli.
8 Basi katika njia ambayo Yanesi na Yambresi walimkinza Musa, ndivyo hawa pia wanavyoendelea kukinza kweli, watu waliofisidika kabisa katika akili, waliokataliwa kwa habari ya imani. 9 Hata hivyo, hawatafanya maendeleo zaidi, kwa maana kichaa chao kitakuwa wazi sana kwa wote, sawa na vile kichaa cha watu hao wawili kilivyopata kuwa wazi sana. 10 Lakini wewe umefuata kwa ukaribu fundisho langu, mwendo wangu wa maisha, kusudi langu, imani yangu, ustahimilivu wangu, upendo wangu, uvumilivu wangu, 11 minyanyaso yangu, mateso yangu, namna ya mambo yaliyotukia kwangu Antiokia, Ikoniamu, Listra, namna ya minyanyaso ambayo nimestahimili; na bado kutoka katika hayo yote Bwana alinikomboa mimi. 12 Kwa kweli, wote wale wanaotamani kuishi kwa ujitoaji-kimungu katika ushirika na Kristo Yesu watanyanyaswa pia. 13 Lakini watu waovu na walaghai wataendelea kutoka ubaya hadi ubaya zaidi, wakiongoza vibaya na kuwa wenye kuongozwa vibaya.
14 Hata hivyo, wewe endelea katika mambo uliyojifunza na uliyoshawishwa kuamini, ukijua ni kutoka kwa watu gani ulijifunza hayo 15 na kwamba tangu utoto sana umeyajua maandishi matakatifu, yawezayo kukufanya uwe mwenye hekima kwa ajili ya wokovu kupitia imani kuhusiana na Kristo Yesu. 16 Andiko lote limepuliziwa na Mungu na ni lenye manufaa kwa kufundisha, kwa kukaripia, kwa kunyoosha mambo, kwa kutia nidhamu katika uadilifu, 17 ili mtu wa Mungu apate kuwa hodari, aliyeandaliwa vifaa kikamili kwa ajili ya kila kazi njema.