Ki he Kau Loma

8 Ko ia ai, ko e faʻahinga ʻoku fāʻūtaha mo Kalaisi Sīsuú ʻoku ʻikai ha meʻa ke fakahalaiaʻi ai kinautolu. 2 He ko e lao ʻa e laumālie ko ia ʻoku foaki moʻui fakafou ʻia Kalaisi Sīsuú kuó ne fakatauʻatāinaʻi koe+ mei he lao ʻa e angahalá mo e maté. 3 Ko e meʻa naʻe ʻikai malava ke fai ʻe he Laó+ koeʻuhi naʻe vaivai ia+ ko e meʻa ʻi he kakanó, naʻe fai ia ʻe he ʻOtuá ʻaki hono fekau mai ʻa hono ʻAló tonu+ ʻi he tatau ʻo e kakano angahalaʻiá+ ke ne toʻo ʻa e angahalá. Pea naʻá ne fakahalaiaʻi ai ʻa e angahala ʻi he kakanó, 4 koeʻuhi ke fakahoko ai ʻa e fiemaʻu māʻoniʻoni ʻa e Laó ʻiate kitautolu+ ʻoku ʻaʻeva ʻo ʻikai fakatatau ki he kakanó, kae fakatatau ki he laumālié.+ 5 He ko e faʻahinga ʻoku nau moʻui ʻo fakatatau ki he kakanó ʻoku nau fokotuʻu ʻenau fakakaukaú ʻi he ngaahi meʻa ʻo e kakanó,+ ka ko e faʻahinga ʻoku nau moʻui ʻo fakatatau ki he laumālié, ʻoku nau fokotuʻu ʻenau fakakaukaú ʻi he ngaahi meʻa ʻo e laumālié.+ 6 He ko hono fokotuʻu ʻa e fakakaukaú ʻi he kakanó ʻoku iku ia ki he mate,+ ka ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino;+ 7 koeʻuhi ko hono fokotuʻu ʻa e fakakaukaú ʻi he kakanó ʻoku iku ia ki he fili mo e ʻOtuá,+ he ʻoku ʻikai ke moʻulaloa ia ki he lao ʻa e ʻOtuá, pea ko hono moʻoní, heʻikai pē malava ia ke pehē. 8 Ko ia ko e faʻahinga ʻoku nau ngāue ʻo fehoanaki mo e kakanó heʻikai lava ke nau fakahōifuaʻi ʻa e ʻOtuá.

9 Kae kehe, ʻoku mou ngāue ʻo ʻikai fehoanaki mo e kakanó, ka ko e laumālié,+ kapau ʻoku nofo moʻoni ʻa e laumālie ʻo e ʻOtuá ʻiate kimoutolu. Ka ʻo ka ai ha taha ʻoku ʻikai te ne maʻu ʻa e laumālie ʻo Kalaisí, ko e tokotahá ni ʻoku ʻikai ʻo Kalaisi ia. 10 Ka ʻo kapau ʻoku fāʻūtaha ʻa Kalaisi mo kimoutolu,+ ʻoku mate ʻa e sinó koeʻuhi ko e angahalá, ka ko e laumālié ʻoku foaki moʻui koeʻuhi ko e māʻoniʻoní. 11 Kapau leva ʻoku nofo ʻiate kimoutolu ʻa e laumālie ʻo ia naʻá ne fokotuʻu hake ʻa Sīsū mei he pekiá, ko e tokotaha ko ia naʻá ne fokotuʻu hake ʻa Kalaisi Sīsū mei he pekiá+ te ne ʻai foki homou sino matengofuá ke moʻui+ fakafou ʻi hono laumālié ʻa ia ʻoku nofo ʻiate kimoutolú.

12 Ko ia leva, fanga tokoua, ʻoku tau moʻuaʻaki, ʻo ʻikai ki he kakanó ke moʻui ʻo fakatatau ki he kakanó;+ 13 he kapau ʻoku mou moʻui ʻo fakatatau ki he kakanó, ko e moʻoni te mou mate; ka ʻo kapau ʻoku mou ʻai ke mate ʻa e ngaahi tōʻonga ʻa e sinó+ ʻaki ʻa e tokoni ʻa e laumālié, te mou moʻui.+ 14 He ko kinautolu kotoa pē ʻoku tataki ʻe he laumālie ʻo e ʻOtuá ko e ngaahi foha moʻoni kinautolu ʻo e ʻOtuá.+ 15 He naʻe ʻikai te mou maʻu ha laumālie ʻo e pōpula ʻo fakatupunga ai ha toe manavahē, ka naʻa mou maʻu ha laumālie ʻo e ohi ko e ngaahi foha, ʻa ia ko e laumālie ia ʻoku tau kalanga ai ʻo pehē: “ʻApā,* Tamai!”+ 16 Ko e laumālié tonu ʻoku kaungā-fakamoʻoni ia mo hotau laumālié+ ko e fānau kitautolu ʻa e ʻOtuá.+ 17 Kapau leva, ko e fānau kitautolu, tā ko e ngaahi ʻea foki kitautolu—ko e ngaahi ʻea moʻoni ʻoku nau maʻu ʻa e tofiʻa mei he ʻOtuá, ka ko e ngaahi kaungāʻea+ fakataha mo Kalaisi—ʻo pau ai ke tau faingataʻaʻia fakataha mo ia+ koeʻuhi ke tau hoko foki ai ʻo fakalāngilangiʻi fakataha mo ia.+

18 He ʻoku ou lau ko e faingataʻaʻia ko ia ʻo e lolotonga ní ʻoku ʻikai hano vāvātatau ʻi hono fakahoa atu ki he lāngilangi ʻoku ʻamanaki ke fakaeʻa ʻiate kitautolú.+ 19 He ko e ngaahi meʻa fakatupú* ʻokú ne tatali fakataha mo e ʻamanaki vēkeveke atu ki hono fakaeʻa ʻa e ngaahi foha ʻo e ʻOtuá.+ 20 He naʻe fakamoʻulaloaʻi ʻa e ngaahi meʻa fakatupú ki he muna,+ ʻo ʻikai ko hano loto ʻoʻona, kae fakafou ʻi he tokotaha naʻá ne fakamoʻulaloaʻi iá, ʻo makatuʻunga ʻi he ʻamanaki 21 ko e ngaahi meʻa fakatupú ʻe fakatauʻatāinaʻi foki+ mei he pōpula ki he ʻauhá pea nau maʻu ʻa e tauʻatāina lāngilangiʻia ʻa e fānau ʻa e ʻOtuá. 22 He ʻoku tau ʻilo ko e ngaahi meʻa fakatupú kotoa ʻoku nau hanganaki toʻe mo mamahi ʻo aʻu mai ki he taimí ni. 23 ʻIkai ko ia pē, ka ko kitautolu foki ʻoku tau maʻu ʻa e ngaahi ʻuluaki fua ʻo hotau tofiʻa ʻa ia ko e laumālié, ʻoku tau toʻe ʻi loto ʻiate kitautolu+ lolotonga ia ʻetau tatali vēkeveke atu ki he ohi ko e ngaahi foha,+ ʻi hono fakaʻatā mei hotau ngaahi sino fakakakanó fakafou ʻi he huhuʻí. 24 He naʻe fakahaofi kitautolu ʻi he ʻamanaki ko ení; ka ʻo kapau kuo ʻosi mātā ʻa e meʻa naʻe fai ki ai ʻa e ʻamanakí, ʻoku ʻikai kei fai ha ʻamanaki ki ai. He ʻe anga-fēfē ha ʻamanaki ʻa ha taha ki he meʻa kuó ne ʻosi mātaá? 25 Ka ʻo kapau kuo teʻeki ke tau mātā+ ʻa e meʻa naʻa tau ʻamanaki ki aí,+ ʻoku tau hanganaki tatali vēkeveke ki ai ʻi he kātaki.+

26 Pehē foki, ʻoku kau mai ʻa e laumālié ʻo tokoni ki hotau vaivaí;+ he ko e palopalemá ko e ʻikai ke tau ʻilo ʻa e meʻa ko ia ʻoku totonu ke tau lotu fekauʻaki mo iá ʻo hangē ko ia ʻoku fiemaʻú, ka ko e laumālié tonu ʻokú ne tautapa maʻatautolu ʻi he taimi ʻoku tau toʻe ai ʻo ʻikai ʻaki ha leá. 27 Ka ko e ʻOtuá ʻokú ne hakule ʻa e lotó+ ʻokú ne ʻafioʻi ʻa e meʻa ʻoku kole ʻe he laumālié maʻá e kakai tapú koeʻuhi he ʻoku fehoanaki ia mo e finangalo ʻo e ʻOtuá.

28 ʻOku tau ʻiloʻi ʻoku ʻai ʻe he ʻOtuá ke fengāueʻaki fakataha ʻa ʻene ngaahi ngāué kotoa ki ha lelei maʻá e faʻahinga ʻoku ʻofa ki he ʻOtuá, ʻa kinautolu ko ia kuo ui ʻo fakatatau ki heʻene taumuʻá;+ 29 koeʻuhi ko e faʻahinga naʻe muʻaki tuku ki ai ʻene tokanga makehé naʻá ne tomuʻa fili ke fakaangatatau kinautolu ki he ʻīmisi ʻo hono ʻAló,+ koeʻuhi ke hoko ʻa e ʻAló ko e ʻuluaki foha+ ia ʻi he lotolotonga ʻo e fanga tokoua tokolahi.+ 30 ʻIkai ngata aí, ko kinautolu ko ia naʻá ne tomuʻa filí+ ko e faʻahinga foki ia naʻá ne toe uí;+ pea ko kinautolu ko ia naʻá ne uí ko e faʻahinga foki ia naʻá ne toe lau ʻoku māʻoniʻoní.+ Pea ko kinautolu leva ʻa ia naʻá ne lau ʻoku māʻoniʻoní ko e faʻahinga foki ia naʻá ne toe fakalāngilangiʻí.+

31 Ko e hā leva haʻatau lau ʻo fekauʻaki mo e ngaahi meʻá ni? Kapau ʻoku kau ʻa e ʻOtuá maʻatautolu, ko hai ia ʻe fakafepaki mai kiate kitautolu?+ 32 Koeʻuhi naʻe aʻu ʻo ʻikai te ne mamaeʻi ʻa hono ʻAló tonu ka ne tuku atu ia koeʻuhiā ko kitautolu hono kotoa,+ ʻikai te na toe foaki anga-lelei mai ʻa e ngaahi meʻa kehe kotoa pē? 33 Ko hai te ne fai hano talatalaakiʻi ʻa e faʻahinga kuo fili ʻe he ʻOtuá?+ Ko e ʻOtuá ʻa e Tokotaha ʻokú ne lau kinautolu ʻoku nau māʻoniʻoní.+ 34 Ko hai ia te ne fakahalaiaʻi kinautolu? Ko Kalaisi Sīsū ko e tokotaha ia naʻe pekiá, ʻio, ʻikai ngata aí ko e tokotaha ia naʻe fokotuʻu haké, ʻa ia ʻokú ne ʻi he nima toʻomataʻu ʻo e ʻOtuá+ pea ʻokú ne tautapa foki maʻatautolu.+

35 Ko hai ia te ne fakamavaheʻi kitautolu mei he ʻofa ʻa e Kalaisí?+ Ko e mamahí pe faingataʻaʻiá pe fakatangá pe fiekaiá pe telefuá pe fakatuʻutāmakí pe ko e heletaá?+ 36 Hangē tofu pē ko ia kuo tohí: “Koeʻuhi ko e ʻAfioná kuo tāmateʻi ai kimautolu ʻi he ʻahó kotoa; kuo lau kimautolu ko e fanga sipi ke tāmateʻi.”+ 37 ʻI hono kehé, ʻi he kotoa ʻo e ngaahi meʻá ni ʻoku tau iku ai ʻo mātuʻaki ikuna+ fakafou ʻi he tokotaha naʻá ne ʻofaʻi kitautolú. 38 He ʻoku ou tuipau ʻoku ʻikai malava ʻe he maté pe ko e moʻuí pe ko ha kau ʻāngelo pe ko ha ngaahi puleʻanga pe ko ha ngaahi meʻa ʻoku ʻi aí ni pe ko ha ngaahi meʻa ka hoko mai pe ko ha ngaahi mālohi+ 39 pe ko ha māʻolunga pe loloto pe ko ha toe meʻa fakatupu ʻe taha, ʻo fakamavaheʻi kitautolu mei he ʻofa ʻa e ʻOtuá ʻa ia ʻoku ʻia Kalaisi Sīsū ko hotau ʻEikí.