彼得前书

3 同样，你哋做太太嘅，要顺服自己嘅丈夫。噉样即使丈夫唔服从上帝嘅话语，或者你哋都可以靠住自己嘅品行，唔使用一言一语就打动到丈夫*， 2 因为丈夫亲眼睇见你哋有贞洁嘅品行，而且深深尊重佢哋。 3 你哋唔好注重外表嘅装饰，例如整夸张嘅发型*、戴金饰、着奢华嘅服装， 4 反而要注重内心深处嘅为人，用平静温和嘅品格*作为唔会朽坏嘅装饰。呢个喺上帝眼中非常宝贵。 5 以前嗰啲信赖*上帝嘅圣洁女子，就系噉样装饰自己，顺服丈夫。 6 例如，撒拉服从亚伯拉罕，称呼佢做“主”。如果你哋不断行善*，冇因为恐惧而放弃，就系撒拉嘅女嘞。

7 同样，做丈夫嘅，你哋同太太一齐生活，要继续理解佢哋*。佢哋系比较脆弱嘅器皿，要俾女性应得嘅尊重佢哋，因为佢哋同你哋一齐得到生命嘅分外之恩。噉样，你哋嘅祷告先会畅通无阻。

8 最后，你哋人人都要思想一致，将心比心，有弟兄之情、怜恤之心，为人谦卑。 9 俾人伤害，唔好伤害返人；俾人辱骂，唔好辱骂返人，反而要祝福对方。因为你哋受呼召就系要祝福其他人，噉样你哋先会得到福分。

10 “有边个热爱生命，渴望过幸福嘅日子，就要约束舌头，唔讲邪恶嘅说话，克制嘴唇，唔讲大话。 11 要弃恶从善，亦都要寻求和睦*，不断追求。 12 因为耶和华*嘅眼眷顾正义嘅人，佢嘅耳听佢哋恳切嘅祈求。但系耶和华*会对作恶嘅人发嬲*。”

13 如果你哋热心行善*，边个能够伤害你哋呢？ 14 就算你哋为正义受苦，都系有福*嘅。世人畏惧嘅，你哋唔好畏惧*，亦都唔好忧虑不安。 15 要喺心里面承认基督系神圣嘅，系你哋嘅主。要随时准备好为自己嘅希望辩护。噉样，如果有任何人要求你哋解释呢个希望有乜嘢根据，你哋就会识得点样回答，只不过要态度温和，深深尊重佢。

16 你哋要持守无愧嘅良心。噉样，无论人哋点样诋毁你哋，由于你哋有基督徒嘅好品行，嗰啲诋毁你哋嘅人都会蒙羞。 17 如果上帝容许*你哋因为行善而受苦，其实点都好过你哋因为作恶而受苦。 18 基督系正义嘅人，佢曾经为好多唔正义嘅人而死，只系一次就将罪永远除去，目的系要带领你哋归向上帝。佢被处死嘅时候系血肉之躯，被复活嘅时候系灵体。 19 然后，佢去被囚禁嘅灵体嗰度，宣告审判嘅信息。 20 呢啲灵体曾经喺挪亚嘅时代反叛上帝，而上帝一直耐心等待。当时，建造方舟嘅工作仍然进行紧。最后，进入方舟而喺洪水当中得救嘅人唔多，只有八个人*。

21 浸礼同呢件事类似*，而家都通过耶稣基督嘅复活拯救你哋。（受浸唔系除去身体上*嘅污秽，而系请求上帝赐予无愧嘅良心。） 22 基督已经去到天上，而家喺上帝嘅右边。天使、有权力嘅、有能力嘅，都顺服佢。