以弗所書

6 做仔女嘅，你哋要服從父母，主希望你哋噉做，因為噉做係正義嘅。 2 第一條附帶承諾嘅命令話：「要尊敬*父母， 3 噉你就會事事順利，喺地上活得長久。」 4 做爸爸嘅，唔好令啲仔女激氣，要按照耶和華*嘅意思管教同勸誡*佢哋，將佢哋撫養成人。

5 做奴隸嘅，你哋要畏懼戰兢，衷心服從主人*，好似服從基督一樣。 6 你哋服從主人，唔好只係做俾人睇，想討好人。身為基督嘅奴隸，你哋要盡心竭力*執行上帝嘅旨意。 7 要樂意*為主人服務，就好似為耶和華*服務，而唔係為人服務， 8 因為你哋知道，無論係奴隸定係自由人，每個人都會因為各自嘅善行，而得到耶和華*嘅賞賜。 9 做主人嘅，你哋都要繼續用同樣嘅態度對待奴隸，唔好恐嚇佢哋，因為你哋知道，佢哋同你哋有同一位主人喺天上，佢係唔偏心嘅。

10 最後，你哋要靠住主嘅大能大力，不斷加強自己嘅力量。 11 要著上上帝所賜嘅全副盔甲，噉你哋就可以企穩，抵抗魔鬼嘅奸計。 12 因為我哋有一場搏鬥*，唔係對抗血肉之軀，而係對抗嗰啲執政嘅*、當權嘅、統治呢個黑暗世界嘅，對抗天上嘅邪靈。 13 所以，要著上上帝所賜嘅全副盔甲，噉樣你哋喺邪惡嘅日子就能夠抵擋得住，做好一切準備之後能夠企穩。

14 你哋要企穩。要將真理當做腰帶束喺腰度，將正義當做胸甲著喺身上， 15 亦都要準備好宣揚關於和睦*嘅好消息，就好似將鞋著喺腳度。 16 另外，要將信心當做大盾牌，噉你哋就能夠令撒但*所有燃燒嘅飛箭*熄滅， 17 亦都要將救恩當做頭盔，仲要拎住神聖力量嘅劍，即係上帝嘅話語。 18 要隨時隨地靠住神聖力量禱告，獻上各種形式嘅禱告同懇切祈求。要時刻警醒，為全體聖民堅持不懈噉懇求。 19 請你哋都為我祈求，令我開口嘅時候可以講出合適嘅說話，放膽宣揚好消息嘅神聖秘密。 20 （我為咗呢個好消息成為俾鎖鏈鎖住嘅大使。）噉樣，我就可以放膽講論好消息，而我係應該噉做㗎。

21 推基古會將一切話俾你哋知，等你哋知道我嘅事，仲有我嘅情況。佢係我親愛嘅弟兄，係主嘅忠心僕人。 22 我派佢去你哋嗰度，係想你哋知道我哋嘅事，可以得到安慰。

23 願上帝我哋嘅爸爸，仲有主耶穌基督，賜安寧*、愛心、信心俾各位弟兄*。 24 願所有對我哋主耶穌基督有永恆*嘅愛嘅人，享有分外恩典。