Esegiël
27 Jehovah het weer met my gepraat en gesê: 2 “Mensekind, sing ’n treurlied oor Tirus,+ 3 en sê vir Tirus:
“‘Jy wat by die ingange van die see woon,
die handelaar vir die volke van baie eilande,
dít is wat die Soewereine Heer Jehovah sê:
“O Tirus, jy het gesê: ‘My skoonheid is volmaak.’+
4 Jou gebiede is in die hart van die seë,
en jou bouers het jou skoonheid tot volmaaktheid gebring.
5 Hulle het al jou planke van jenewerbome uit Senir gemaak,+
en hulle het ’n sederboom uit die Liʹbanon-berge geneem om ’n mas vir jou te maak.
6 Hulle het jou roeispane van eikebome uit Basan gemaak,
en hulle het jou boeg* van sipreshout gemaak wat ingelê was met ivoor van die eilande van Kittim af.+
7 Jou seil was van kleurvolle linne uit Egipte gemaak,
en jou dekseile was van blou garing en pers wol van die eilande van Eliʹsa.+
8 Die inwoners van Sidon en van Arwad+ was jou roeiers.
Jou eie vaardige manne, o Tirus, was jou matrose.+
9 Die ervare* en vaardige manne van Gebal+ het jou nate waterdig gemaak.+
Al die skepe van die see en hulle seemanne het na jou toe gekom om handel te dryf.
10 Mans uit Persië, Lud en Put+ was in jou leërmag, jou soldate.
Hulle het hulle skilde en helms in jou opgehang, en hulle het jou verheerlik.
11 Die manne van Arwad in jou leërmag het op jou mure wag gehou,
en daar was dapper manne in jou torings.
Hulle het ronde skilde al rondom jou mure opgehang,
en hulle het jou skoonheid tot volmaaktheid gebring.
12 “‘“Tarsis+ het met jou handel gedryf omdat jy so ryk was.+ Hulle het silwer, yster, tin en lood in ruil vir jou goedere gegee.+ 13 Jawan, Tubal+ en Meseg+ het met jou handel gedryf. Hulle het slawe+ en items van koper in ruil vir jou goedere gegee. 14 Die huis van Togarʹma+ het trekperde en ryperde en muile in ruil vir jou goedere gegee. 15 Die mense van Dedan+ het met jou handel gedryf. Op baie eilande het handelaars vir jou gewerk. Hulle het ivoortande+ en ebbehout as skatting* aan jou betaal. 16 Edom het met jou handel gedryf omdat jy so baie goedere gehad het. Hulle het turkoois, pers wol en kleurvolle borduurwerk, goeie materiaal, korale en robyne in ruil vir jou goedere gegee.
17 “‘“Juda en die land van Israel het met jou handel gedryf. Hulle het die koring van Minnit,+ die beste voedsel, heuning,+ olie en balsem+ in ruil vir jou goedere gegee.+
18 “‘“Damaskus+ het met jou handel gedryf omdat jy so baie goedere gehad het en so ryk was. Hulle het die wyn van Helbon en wol van Sahar* as betaling gegee. 19 Wedan en Jawan uit Usal het smeeyster, kassia* en riet* in ruil vir jou goedere gegee. 20 Dedan+ het jou van saalkleedjies* vir jou rydiere voorsien. 21 Die Arabiere en al die hoofmanne van Kedar+ het vir jou gewerk. Hulle het handel gedryf met lammers en skape en bokke.+ 22 Die handelaars van Skeba en Raäma+ het met jou handel gedryf. Hulle het die beste parfuums, edelstene en goud in ruil vir jou goedere gegee.+ 23 Haran,+ Kanne, Eden,+ die handelaars van Skeba,+ Assur+ en Kilmad het met jou handel gedryf. 24 Hulle het op jou markplein handel gedryf met pragtige klere, mantels van blou materiaal en kleurvolle borduurwerk en veelkleurige tapyte, alles stewig vasgebind met toue.
25 Die skepe van Tarsis+ was die karavane vir jou goedere,
en daarom was jy vol en swaar belaai* in die hart van die oop see.
26 Jou roeiers het jou tot in die onstuimige see gebring.
Die oostewind het jou in die hart van die oop see laat skipbreuk ly.
27 Jou rykdom, jou goedere, jou handelsware, jou seemanne en jou matrose,
dié wat jou nate waterdig maak, dié wat handel dryf met jou goedere+ en al die soldate,+
– die hele skare* in jou –
sal almal in die hart van die oop see sink op die dag van jou ondergang.+
28 Wanneer jou matrose uitroep, sal die kuslande bewe.
29 Al die roeiers, die seemanne en die matrose
sal van hulle skepe afklim en op die land gaan staan.
30 Hulle sal met harde stemme bitterlik oor jou uitroep+
terwyl hulle stof op hulle koppe gooi en in as rol.
31 Hulle sal hulle koppe kaal skeer en saklinne aantrek.
Hulle sal bitterlik* oor jou huil en baie oor jou treur.
32 In hulle getreur sal hulle ’n treurlied oor jou sing:
‘Wie is soos Tirus, wat nou in die see stilgemaak is?+
33 Toe jou goedere van die oop see af ingekom het, het jy baie volke bly gemaak.+
Jou oorvloedige rykdom en baie goedere het die konings van die aarde ryker gemaak.+
34 Nou het jy in die oop see skipbreuk gely, in die diep waters,+
en al jou goedere en jou mense het saam met jou gesink.+
35 Almal wat op die eilande woon, sal verbaas na jou staar,+
en hulle konings sal van vrees bewe+ – hulle gesigte sal bekommerd lyk.
36 Die handelaars van die nasies sal fluit as gevolg van wat met jou gebeur het.
Jou einde sal skielik en verskriklik wees,
en jy sal vir altyd ophou bestaan.’”’”+