Mokanda ya liboso epai ya Bakorinti

7 Sikoyo, mpo na makambo oyo bokomaki, eleki malamu mobali asimba mwasi te;* 2 kasi, lokola pite* epalangani mingi, mobali mokomoko azala na mwasi na ye moko+ mpe mwasi mokomoko azala na mobali na ye moko.+ 3 Mobali apesa mwasi na ye eloko oyo asengeli na yango, mwasi mpe asala ndenge wana epai ya mobali na ye.+ 4 Mwasi azali na bokonzi likoló ya nzoto na ye moko te, kasi mobali na ye nde azali na yango; ndenge moko mpe, mobali azali na bokonzi likoló ya nzoto na ye moko te, kasi mwasi na ye nde azali na yango. 5 Bópimelanaka yango te, longola kaka soki bino mibale boyokani mpo na ntango oyo botye, mpo bópesa ntango na libondeli mpe bóya lisusu kosangana, mpo Satana akoba te komeka bino mpo na kozanga komipekisa na bino. 6 Nzokande, nalobi bongo kaka mpo na komonisa ete ekoki kosalema, kasi ezali mobeko te. 7 Kasi nakolinga bato nyonso bázala lokola ngai. Atako bongo, moto na moto azali na likabo na ye moko+ oyo euti na Nzambe. Mokomoko na biso asalelaka ye na ndenge ekeseni.

8 Sikoyo nazali koloba na bato oyo babalá naino te mpe na basi oyo mibali bakufá ete: eleki malamu bátikala lokola ngai.+ 9 Kasi soki bazali na komipekisa te, bábala, mpo eleki malamu kobala na esika ya kozika na mposa.+

10 Na bato oyo babalá, nazali kopesa malako oyo: mwasi akabwana na mobali na ye te.+ Malako wana euti epai ya Nkolo. 11 Kasi soki akabwani na ye, afanda bongo abala te to mpe ayokana lisusu na mobali na ye; mpe mobali asengeli te kotika mwasi na ye.+

12 Kasi na bamosusu, nazali koloba boye, ɛɛ, ngai, kasi Nkolo te:+ Soki ndeko mobali moko azali na mwasi oyo azali mondimi te, mpe mwasi yango andimi kofanda na ye, ndeko yango atika ye te. 13 Mwasi oyo azali na mobali oyo azali mondimi te, mpe mobali yango andimi kofanda na ye, mwasi yango atika mobali na ye te. 14 Mpo libala ya mobali oyo azali mondimi te etalelami mosantu mpo na mwasi na ye, mpe libala ya mwasi oyo azali mondimi te etalelami mosantu mpo na ndeko mobali. Soki te, bana na bino bakozala mbindo, kasi sikoyo bazali basantu. 15 Kasi soki oyo azali mondimi te azali koluka kokabwana, akabwana; ndeko mobali to ndeko mwasi azali na ekanganeli te na likambo yango, kasi Nzambe abengi bino na kimya.+ 16 Mpo mwasi, ndenge nini oyebi soki okobikisa mobali na yo te?+ To mobali, ndenge nini oyebi soki okobikisa mwasi na yo te?

17 Atako bongo, kaka ndenge Yehova* apesi moto na moto likabo, moto na moto atambola na ndenge oyo Nzambe abengi ye.+ Yango ezali malako oyo nazali kopesa na masangá nyonso. 18 Soki moto abengamaki akatamá ngenga, akoba kozala bongo.+ Mpe soki moto abengamaki akatamá ngenga te, akatama ngenga te.+ 19 Kokatama ngenga ezali eloko te, kokatama ngenga te ezali mpe eloko te,+ kasi likambo ya ntina nde kotosa mibeko ya Nzambe.+ 20 Moto na moto atikala ndenge azalaki ntango abengamaki.+ 21 Soki ozalaki moombo ntango obengamaki, yango etungisa yo te.+ Kasi soki okoki kokóma na bonsomi, simbá libaku yango. 22 Moto oyo azalaki moombo ntango Nkolo abengaki ye, azali mosaleli ya Nkolo oyo azali na bonsomi;+ ndenge moko mpe moto oyo azalaki na bonsomi ntango Nkolo abengaki ye akómi moombo ya Kristo. 23 Bosombamaki mpenza na ntalo;+ bótika kokóma baombo ya bato. 24 Bandeko, moto na moto atikala ndenge azalaki ntango Nzambe abengaki ye.

25 Sikoyo, mpo na baoyo babalá te* nazali na mitindo ya kopesa te oyo euti epai ya Nkolo, kasi nakopesa bino likanisi na ngai+ lokola moto oyo azali sembo, oyo Nkolo ayokelá mawa. 26 Na yango, mpo na mikakatano ya ntango oyo, nakanisi ete eleki malamu ete moto atikala ndenge azali. 27 Ozali na mwasi?* Tiká koluka kotika ye.+ Ozali na mwasi te? Tiká koluka mwasi. 28 Kasi ata soki obali, osali lisumu te. Mpe soki moto oyo abalá te azwi ekateli ya kobala, moto yango asali lisumu te. Nzokande, baoyo bazali kobala bakokutana na mikakatano na bomoi na bango.* Kasi nazali koluka kosalisa bino mpo bókima mikakatano yango.

29 Talá oyo nazali koloba, bandeko: ntango oyo etikali ekómi mokuse.+ Yango wana baoyo bazali na basi bázala lokola bazali na basi te, 30 mpe baoyo bazali kolela bázala lokola baoyo bazali kolela te. Baoyo bazali kosepela bázala lokola baoyo bazali kosepela te. Baoyo bazali kosomba bázala lokola baoyo bazali na eloko te, 31 mpe baoyo bazali kosalela makambo oyo mokili ezali kobimisa basengeli kosalela yango na makambo nyonso te; mpo makambo ya mokili oyo ezali kobongwana. 32 Ya solo, nalingi ete bózala na mitungisi te. Mobali oyo abalá te amitungisaka mpo na makambo ya Nkolo, mpe ndenge akoki kondimama na Nkolo. 33 Kasi mobali oyo abalá amitungisaka mpo na makambo ya mokili,+ ndenge oyo akoki kosepelisa mwasi na ye, 34 mpe akabwani. Lisusu, mwasi oyo abalá te, mpe ngɔndɔ, amitungisaka mpo na makambo ya Nkolo,+ mpo azala mosantu na nzoto mpe na makanisi* na ye. Kasi, mwasi oyo abalá amitungisaka mpo na makambo ya mokili, mpe ndenge oyo akoki kosepelisa mobali na ye. 35 Nazali koloba boye mpo na litomba na bino moko, mpo na kopekisa bino te.* Nalingi ete bósala oyo ebongi mpo bósalela Nkolo ntango nyonso kozanga kotya makanisi na makambo mosusu.

36 Kasi soki moto akoli na nzoto mpe na makanisi* mpe akanisi ete kotikala kozanga kobala ezali kosala ete azala na etamboli oyo ebongi te, asengeli kosala oyo alingi; asali lisumu te, abala.+ 37 Kasi soki moto azwi ekateli na motema na ye ete azali na mposa ya kobala te, azali na likoki ya kokanga mposa na ye moko mpe azwi ekateli na motema na ye ete abala te, akosala malamu.+ 38 Na yango, moto oyo abali asali malamu, kasi moto oyo abali te akosala malamu koleka.+

39 Mwasi asengeli kotikala na* libala ntango nyonso oyo mobali na ye azali na bomoi.+ Nzokande, soki mobali na ye alali na kati ya liwa, azali na bonsomi ya kobalana na mobali oyo ye alingi, kasi kaka na moyekoli ya Nkolo.*+ 40 Na makanisi na ngai, akozala na esengo mingi koleka soki atikali ndenge azali. Nakanisi mpenza ete ngai mpe nazali na elimo ya Nzambe.