දානියෙල්
7 බැබිලෝනියේ රජු වූ බෙල්ෂසර්+ රජකම් කළ පළමුවන අවුරුද්දේදී දානියෙල් දර්ශන ඇතුළත් සිහිනයක් දුටුවේය.+ ඒ සිහිනයේ දුටු සියල්ල ඔහු විස්තර ඇතුව ලියා තැබුවේය.+ 2 දානියෙල් මෙසේ ලීවේය.
“රාත්‍රියේ නිදාගෙන සිටියදී මා දුටු දර්ශන මම දැන් විස්තර කරන්නෙමි. අහසේ සතර දිශාවෙන්ම සැඩ සුළං+ හමා ඇවිත් මහ මුහුද කලඹනවා මම දුටුවෙමි.+ 3 එවිට විශාල මෘගයන් හතරදෙනෙක්+ මුහුදෙන් උඩට මතු වූහ.+ ඒ මෘගයන් සතරදෙනාම එකිනෙකාට වෙනස්ය.+
4 “පළමුවන මෘගයා සිංහයෙකු මෙනි.+ ඌට රාජාලියෙකුගේ පියාපත් තිබුණේය.+ මා බලා සිටියදීම උගේ පියාපත් උගුලා දැමුවේය. ඉන්පසු මෘගයාව පොළොවෙන් ඉහළට ඔසවා,+ මිනිසෙකු මෙන් ඌට කකුල් දෙකකින් හිටගන්න සැලැස්වූවේය. ඌට මිනිසෙකුගේ සිතක්ද දෙනු ලැබුවේය.+
5 “ඉන්පසු මම තවත් මෘගයෙකු දුටුවෙමි. ඌ වලසෙකු මෙනි.+ එක කකුලක් ඔසවාගෙන+ සිටි ඌ ඉළ ඇට තුනක් තදින් හපාගෙන සිටියේය. ඌට මෙසේ කියන ලදි. ‘නැඟිට බොහෝ මස් කන්න!’+
6 “ඉන්පසු තවත් මෘගයෙකු මතු වෙනවා මම දුටුවෙමි. ඌ දිවියෙකු මෙනි.+ උගේ පිටේ පක්ෂියෙකුගේ පියාපත් හතරක් තිබිණ. ඌට හිස් හතරක්ද තිබිණ.+ පාලන බලය උගේ අතට භාර දෙනු ලැබුවේය.
7 “රාත්‍රියේ මම නිදාගෙන සිටියදී භයානක පෙනුමක් ඇති තවත් මෘගයෙකු දර්ශනයෙන් දුටුවෙමි. ඌ අසාමාන්‍ය ශක්තියක් ඇති ඉතා රෞද්‍ර මෘගයෙකි.+ ඌට විශාල යකඩ දත් තිබිණ. මෘගයා සියල්ල පොඩි කර දමා ඒවා කා ගිල දැමුවේය. ඉතුරු වූ දේ පාගා දැමුවේය. මීට කලින් දුටු මෘගයන් තුන්දෙනාටම වඩා ඌ සම්පූර්ණයෙන්ම වෙනස්ය. ඌට අං දහයක්ද තිබිණ.+ 8 මම උගේ අං දෙස බලා සිටියදී තව පොඩි අඟක්+ ඒවා අතරේ හටගන්නවා දුටුවෙමි. කලින් තිබූ අං තුනක් උගුලා දමමින් ඒ අඟ උඩට මතු විය. ඒ අඟට මිනිසෙකුට මෙන් ඇස් තිබුණේය. පුරසාරම් දොඩන කටක්ද තිබිණ.+
9 “මා බලා සිටියදී සිංහාසන ගෙනැවිත් තබන ලදි.+ පුරාතන තැනැත්තා+ එතැන හිඳගත්තේය. ඔහුගේ වස්ත්‍ර හිම මෙන් සුදුය.+ ඔහුගේ හිසකෙස් පවිත්‍ර ලොම් මෙනි.+ ඔහුගේ සිංහාසනය වටා ගිනිදලු විහිදී තිබිණ.+ එහි රෝද ඇවිළෙන ගින්නක් මෙනි.+ 10 ඔහු වෙතින් ගිනි ජාලාවක් ගලා ගියේය.+ දහසක් වර දහසක් දෙනා ඔහුට සේවය කරමින් සිටියෝය.+ ඔහු ඉදිරියේ දසදහස් වර දසදහසක් දෙනා සිටගෙන සිටියෝය.+ විනිශ්චය මණ්ඩලය+ හිඳගත්තෝය. ලියවිලි දිග හරින ලදි.
11 “කලින් මා සඳහන් කළ අඟ පුරසාරම් දොඩන ආකාරය+ දෙස මම බලා සිටියෙමි. පසුව එම මෘගයාව මරා උගේ මළ සිරුර ඇවිළෙන ගින්නට විසි කර විනාශ කරන ලදි.+ 12 අනික් මෘගයන්ගෙන්+ පාලන බලය ඉවත් කළ නමුත් උන්ට යම් කාලයකට ජීවත් වීමට ඉඩහැරියේය.+
13 “රාත්‍රියේ නිදාගෙන සිටියදී අහසේ වලාකුළු අතරින්+ මනුෂ්‍ය පුත්‍රයෙකු+ වැනි කෙනෙකු පුරාතන තැනැත්තා+ වෙතට එනවා මම දර්ශනයෙන් දුටුවෙමි. ඔහුව පුරාතන තැනැත්තා ඉදිරියට ගෙනෙන ලදි.+ 14 සියලු ජාතීන්, ගෝත්‍ර හා විවිධ භාෂා කතා කරන මිනිසුන් ඔහුට සේවය කරන පිණිස+ රාජ්‍යයද+ බලයද+ ගෞරවයද+ ඔහුට දෙන ලදි. ඔහුගේ පාලනය කිසිදා නැති නොවන සදහටම පවතින පාලනයකි. ඔහුගේ රාජ්‍යය කිසිදාක විනාශ නොවන්නේය.+
15 “දානියෙල් වන මම මේ දේවල් දැක අතිශයින් කැලඹුණෙමි. මා දුටු මේ දර්ශන නිසා මහත් සේ භය වුණෙමි.+ 16 එබැවින් මම එතැන සිටගෙන සිටි කෙනෙකු ළඟට ගොස් මේ සියල්ලෙහි නිවැරදි අර්ථය තෝරා දෙන ලෙස ඉල්ලා සිටියෙමි.+ එහි අර්ථය කියා දෙමින් ඔහු මට මෙසේ කීවේය.
17 “‘මෘගයන් හතරදෙනාගෙන්+ නියෝජනය කරන්නේ පොළොව පාලනය කිරීමට සිටින රජවරුන් හතරදෙනෙකුවය.+ 18 එහෙත් අතිශ්‍රේෂ්ඨ තැනැත්තාණන්ට+ සේවය කරන ශුද්ධ තැනැත්තන්ට+ රාජ්‍යය භාර දෙනු ලැබේ.+ ඔවුන්ට එම රාජ්‍යය සදහටම හිමි වන්නේය. සදාකාලයෙන් සදාකාලයටම එය ඔවුන්ගේ අතේ පවතිනු ඇත.’
19 “ඉන්පසු අනික් මෘගයන්ට වඩා වෙනස් වූ හතරවන මෘගයා ගැනද තොරතුරු දැනගැනීමට මට උවමනා විය. භයානක පෙනුමක්ද යකඩ දත් හා තඹ නියපොතුද තිබුණාවූ ඒ මෘගයා ඌ ඉදිරියේ තිබූ සියල්ල පොඩි කර ඒවා කා ගිල දැමුවේය. ඉතුරුව තිබූ දේ පවා ඌ පාගා දැමුවේය.+ 20 උගේ හිසේ තිබූ අං දහය ගැනද+ අං තුනක් උගුලා දමමින්+ උඩට මතු වූ අනික් අඟ ගැනද+ දැනගැනීමට මට උවමනා විය. අලුතින් හටගත් ඒ අඟට ඇස්ද පුරසාරම් දොඩන කටක්ද තිබිණ.+ එය අනික් අංවලට වඩා විශාල විය.
21 “මා බලා සිටියදී ඒ අඟ ශුද්ධ තැනැත්තන්ට විරුද්ධව යුද්ධ කර ඔවුන්ව යටත් කරගත්තේය.+ 22 එහෙත් පුරාතන තැනැත්තා+ එතැනට පැමිණියේය. අතිශ්‍රේෂ්ඨ තැනැත්තාණන්ට+ සේවය කරන ශුද්ධ තැනැත්තන්ට ඔහුගෙන් සාධාරණ විනිශ්චයක් ලැබිණ. ශුද්ධ තැනැත්තන්ගේ අතට රාජ්‍යය භාර දීමට කාලය පැමිණියේය.+
23 “ඔහු තවදුරටත් මෙසේ කීවේය. ‘හතරවන මෘගයාගෙන් නියෝජනය කරන්නේ මෙයයි. පොළොව පාලනය කිරීමට හතරවන රාජ්‍යයක් පැමිණෙන්නේය. එය අන් සියලු රාජ්‍යයන්ට වඩා වෙනස් වන්නේය. එය මුළු පොළොවම පාගා දමා එහි ඇති සියල්ල පොඩි කර විනාශ කරයි.+ 24 අං දහය නම් එම රාජ්‍යයෙන් නැඟී එන රජවරු දහදෙනෙකි.+ ඔවුන්ට පසුව තව රජ කෙනෙක් නැඟී එන්නේය. ඔහු මුලින් පැමිණි රජවරුන්ට වඩා වෙනස් වන්නේය.+ ඔහු රජවරුන් තුන්දෙනෙකුව අන්ත පරාජයට පත් කරන්නේය.+ 25 ඔහු මහෝත්තම දෙවිට විරුද්ධවද කතා කරන්නේය.+ අතිශ්‍රේෂ්ඨ තැනැත්තාණන්ට සේවය කරන ශුද්ධ තැනැත්තන්ට ඔහු දිගටම හිරිහැර කරන්නේය.+ කාලවල්+ සහ නීති පවා වෙනස් කරන්න ඔහු උත්සාහ කරන්නේය.+ කාලයකටද කාලවලටද කාල භාගයකටද ඔවුන්ව ඔහුගේ අතට භාර දෙනු ලැබේ.+ 26 ඉන්පසු විනිශ්චය මණ්ඩලය හිඳගන්නෝය.+ පාලනය ඔහුගේ අතින් පහ කර ඔහුව සම්පූර්ණයෙන්ම විනාශ කිරීමට ඔවුහු තීන්දු කරනු ඇත.+
27 “‘රාජ්‍යයද බලයද පොළොවේ තිබූ සියලු රාජ්‍යයන්ට හිමිව තිබූ ගෞරවයද අතිශ්‍රේෂ්ඨ තැනැත්තාණන්ට සේවය කරන ශුද්ධ තැනැත්තන්ට දෙනු ලබන්නේය.+ ඔවුන්ගේ රාජ්‍යය සදහටම පවතින රාජ්‍යයකි.+ සියලු පාලකයෝ පවා ඔවුන්ට කීකරු වී සේවය කරන්නෝය.’+
28 “සිහිනයේ අර්ථය එයයි. දානියෙල් වන මම ඒ දේවල් ගැන සිතා අතිශයින් බය වුණෙමි. මා මලානික විය. සිහිනයේ අර්ථය මම සිතෙහි තබාගත්තෙමි.”+