යෙරෙමියා

48 ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෝවබ්+ ගැන පවසන්නේ මෙයයි.+ “නෙබෝ නගරයට සිදු වූ විපත මොන තරම් දරුණුද!+ ඇය සම්පූර්ණයෙන්ම විනාශ වී ගොසින්ය. සතුරාගේ අතට හසු වූ කිර්යතායිම් නගරය+ අද්දුටු ලැජ්ජාව මොන තරම්ද! දැවැන්ත බලකොටුව සුනුවිසුනු වී ගොසින්ය. එහි වැසියෝ බියෙන් වෙළී සිටිති.+ 2 තේජාන්විතව වැජඹුණු මෝවබ් ගැන දැන් කිසිවෙක් කතා නොකරති.+ ‘එන්න අපි මෝවබ් ජාතිය නැත්තටම නැති කර දමමු’+ කියා හෙෂ්බොන්හිදී+ සෙනඟ ඇයට විරුද්ධව කුමන්ත්‍රණය කළෝය.

“මද්මෙන් නගරය, ඔබවද විනාශ කර දැමීමට කඩුව ඔබ පසුපස ලුහුබඳින නිසා උජාරුවෙන් කතා නොකරන්න. 3 විනාශයත් බිඳ වැටීමත් නිසා හෝරනායිම්+ වෙතින් වැලපීමේ හඬක් නික්මෙයි. 4 මෝවබ් නැති නාස්ති වී ගියාය.+ ඇගේ කුඩා දරුවන් හඬා වැලෙපන ශබ්දය දසත පැතිරී ගියේය. 5 ජනයා හඬා වැලපෙමින් ලූහිත් වෙතට නැඟ යන්නෝය.+ සිදු වූ විපත ගැන ආරංචි වූ සෙනඟ හෝරනායිම් වෙතට බැස යන මඟෙහි විලාප නඟති.+

6 “ඔබේ ජීවිතය බේරාගන්න අවශ්‍ය නම් පලා දුවන්න.+ ඔබ පාළුකරයේ තිබෙන ජුනිපර් ගසක් මෙන් වන්න.+ 7 නමුත් ඔබ ධන සම්පත් සහ ඔබේම සාර්ථකත්වය මත විශ්වාසය තැබූ නිසා සතුරෝ ඔබව යටත් කරගන්නෝය.+ තම පූජකයන් හා අධිපතීන් සමඟ+ කෙමොෂ් දෙවියාද+ වහල්භාවයට යන්නේය.+ 8 සතුරා සෑම නගරයකටම කඩාවදින්නේය.+ ඔහුගෙන් බේරීමට කිසි නගරයකට හැකි වන්නේ නැත.+ යෙහෝවා දෙවි පැවසූ ලෙසම නිම්නය විනාශ වී යන්නේය. තැනිතලාවත් නැති නාස්ති වී යන්නේය.

9 “ජනයෙනි, මෝවබ් සඳහා මං සලකුණක් තබන්න. ඇගේ නගර විනාශ වන විට ඇය ඒ දෙසට දිව යනු ඇත.+ ඇගේ නගරවලට සිදු වන විනාශය දකින සියලුදෙනා පුදුමයට පත් වනු ඇත. ඒවා කිසිවෙකුට ජීවත් වීමට නොහැකි වන ලෙස නටබුන් ගොඩක් බවට පත් වනු ඇත.+

10 “යෙහෝවා දෙවි භාර දුන් වැඩය හරි හැටි ඉටු නොකරන්නාට ශාප වේවා!+ තම කඩුවෙන් පහර දී ලේ වැගිරීමට හවුල් නොවන්නාට ශාප වේවා!

11 “මෝවබ්වරු යෞවන කාලයේ සිට සුරක්ෂිත ජීවිතයක් ගත කළෝය.+ ඔවුහු කිසි දිනක වහල්භාවයට ගොස් තිබුණේ නැත. ඔවුන් හරියට භාජනයෙන් භාජනයට මාරු නොකර යටට මණ්ඩි බසින තෙක් එකම භාජනයක නිශ්චලව තිබෙන වයින් මෙනි.+ එහි රසය තව තවත් වැඩි නොවුණෙත් සුවඳෙහි කිසිදු වෙනසක් සිදු නොවුණෙත් ඒ නිසාය.

12 “යෙහෝවා දෙවි මෙසේ පවසන්නේය. ‘භාජන පෙරළා දමන්නාක් මෙන් ඔවුන්වද පෙරළා දැමීමට ඉදිරියේදී මම ඔවුන් වෙතට සෙනඟක් එවන්නෙමි.+ ඒ සෙනඟ පැමිණ ඔවුන්ගේ භාජන හිස් කර ඔවුන්ගේ විශාල බඳුන් සුනුවිසුනු කර දමනු ඇත. 13 බෙතෙල් ගැන මහත් විශ්වාසයකින් සිටි ඊශ්‍රායෙල්වරුන් එයට සිදු වූ දේ ගැන ලැජ්ජාවට පත් වුණාක් මෙන්+ මෝවබ්වරුද කෙමොෂ් දෙවියාට සිදු වන දේ නිසා ලැජ්ජාවට පත් වනු ඇත.+ 14 “අපි යුද්ධයට දක්ෂ බලවන්තයෝ” කියා ඔබ ආඩම්බරයෙන් කියන්නේ කෙසේද?’+

15 “ස්වර්ගයේ සේනාවල අධිපති වන යෙහෝවා යන නමින් හඳුන්වන රජ+ මෙසේ පවසන්නේය.‘මෝවබ් නැති වී ගොසින්ය. ඇගේ නගර යටත් කරගැනීමට තැනැත්තෙක් පැමිණ ඇත.+ ඇයට සිටි හොඳම තරුණයෝද මරණයට නියම වී ඇත.’+

16 “මෝවබ්වරුන්ගේ විනාශය අත ළඟය. වැඩි කල් නොගොස් ඔවුන් පිටට විපත්ති පැමිණෙනු ඇත.+ 17 එබැවින් ඔවුන් අවට සිටින සියල්ලෙනි, ඔවුන්ගේ නාමය දන්නා වූ සියල්ලෙනි,+ ‘අලංකාර සැරයටිය, ශක්තිමත් යදණ්ඩ කැඩී ගිය අයුරු බලන්න’+ කියමින් ඔවුන් ගැන ශෝක වන්න.

18 “දීබොන්+ දියණිය, ඔබේ තේජවත් තත්වය අත්හැර පහතට බැස පිපාසිතව බලා සිටින්න.+ මන්ද මෝවබ් විනාශ කළ තැනැත්තා ඔබට විරුද්ධවද පැමිණ ඔබේ බලකොටු සියල්ල විනාශ කර දමනු ඇත.+

19 “අරෝයේර් දියණිය,+ මඟ අසලට වී බලා සිටින්න. බේරී පලා දුවන අයගෙන්, ‘කුමක්ද සිදු වුණේ’ කියා අසන්න.+ 20 මෝවබ් භයානක ලෙස පහර කෑ නිසා+ දැන් ලැජ්ජාවට පත්ව සිටින්නීය. එබැවින් හඬා වැලපෙන්න. ජනයෙනි, මෝවබ්ට සිදු වූ විපත ගැන ආනොන්හි+ ප්‍රකාශ කරන්න. 21 තැනිතලා දේශය පිටට තීන්දුව ලැබී තිබේ.+ එනම්, හෝලොන්, යහෂ්,+ මෙෆයත්,+ 22 දීබොන්,+ නෙබෝ,+ බෙත්-දිබ්ලාතායිම්, 23 කිර්යතායිම්,+ බෙත්-ගමුල්, බෙත්-මෙයොන්,+ 24 කෙරියොත්,+ බොෂ්රා+ සහ ළඟපාත මෙන්ම දුර ඈත පිහිටි මෝවබ් දේශයේ සියලු නගරවලට විරුද්ධව තීන්දුව ලැබී තිබේ.

25 “‘මෝවබ්ගේ බලය* බිඳ දමා ඇත.+ ඔහුගේ බලවත් හස්තය කඩා දමා ඇත’+ කියා යෙහෝවා දෙවි පවසන්නේය. 26 ‘ජනයෙනි, මත් වී වමනය දමන තෙක්ම මෝවබ්ට බොන්න දෙන්න.+ මන්ද ඔහු යෙහෝවා දෙවිට විරුද්ධව මහත් ආඩම්බරයෙන් කතා කළේය.+ ඔහු තම වමනය මත පෙරළෙමින්+ සියලුදෙනාගේ නින්දාවට ලක් වුණේය.

27 “‘ඔබ ඊශ්‍රායෙල්වරුන්ට කවටකම් කළා නොවේද?+ ඇයි ඔබ ඊශ්‍රායෙල්වරුන් ගැන කතා කරන සෑමවිටකම සමච්චලයට මෙන් හිස වනන්නේ? ඔවුන් සොරුන් අතරේ සිටිනවා ඔබ දුටුවාද?+

28 “‘මෝවබ්හි වැසියෙනි, ඔබේ නගර අත්හැර දමා ගොස් පර්වතවල ජීවත් වෙන්න.+ පර්වත විවරවල කැදලි සාදාගන්නා වූ පරෙවියන් මෙන් ඔබත් එහි ජීවත් වෙන්න.’”+

29 “මෝවබ්ගේ පුරාජේරුව ගැන අපට ආරංචි විය.+ ඔහු ඉතා උඩඟුය. ඔහුගේ තේජස ගැන ඔහු ඉතා ආඩම්බරයෙන් කතා කරන්නේය. ඔහු අහංකාරයෙන් ඉදිමී සිටින්නේය.”+

30 “යෙහෝවා දෙවි මෙසේ පවසන්නේය. ‘මෝවබ් කිසිම ගරුසරුවක් නැතුව කෝපයෙන් හැසිරෙන හැටි මම දැක ඇත. ඔහු ආඩම්බරයෙන් මහත් දේවල් පැවසුවත් ඒ කිසිවක් ඔහුට ඉටු කළ නොහැක.+ ඔහුගේ වචන නිකම්ම නිකම් හිස් වචන පමණි.+ 31 මා මෝවබ් ගැන දුක් වී විලාප නඟන්නේ ඒ නිසාය. මම මුළු මෝවබ් දේශය ගැනම හඬා වැලපෙන්නෙමි.+ කිර්-හෙරෙස්හි වැසියන්+ ගැන විලාප නඟන්න.

32 “‘සිබ්මාහි මිදිවැල,+ යාසෙර්+ ගැන මා දුක් වුණාටත් වඩා වැඩියෙන් මම ඔබ ගැන දුක් වන්නෙමි. ඔබේ අතු සරුව වැඩී මුහුදෙන් එපිටට විහිදී ගියේය. එය යාසෙර් දක්වාද+ විහිදී ගියේය. ඔබේ මිදි පලදාවත් ගිම්හාන කාලයේ ඔබ ලැබූ පලදාවත්+ සතුරා විනාශ කර දැමුවේය.+ 33 මෝවබ් දේශයෙන් හා පලතුරු වතුවලින් ඇසුණු ප්‍රීති ඝෝෂාව දැන් පහව ගොසින්ය.+ මිදි මඩින යන්ත්‍රයෙන් වෑස්සෙන වයින් සිඳී යෑමට මම සැලැස්වූවෙමි.+ මින් මත්තට කිසිවෙක් ප්‍රීති ඝෝෂා නඟමින් මිදි පාගන්නේ නැත. ඔවුන් ඝෝෂා නැඟුවත් එය ප්‍රීතියෙන් නඟන හඬක් නොවේ.’”+

34 “‘හෙෂ්බොන්හි සිට+ හඬන ඔවුන්ගේ ශබ්දය+ එලෙයාලෙ දක්වාද+ යහෂ් දක්වාද+ විහිදී ගියේය. ෂොවර්හිදී+ නැඟුණු ඔවුන්ගේ විලාපයේ හඬ හෝරනායිම්ටත්+ එග්ලත්-ෂෙලීෂියාටත්+ ඇසිණ. නිම්රිම්හි දිය දහරා+ සියල්ල සිඳී යති. 35 පූජනීය ස්ථානවල ඔප්පු කිරීම සඳහා පූජා ගෙනෙන අයවත් තමාගේ දෙවියාට සුවඳ දුම් ඔප්පු කරන අයවත් මම මෝවබ් දේශයෙන් තුරන් කර දමන්නෙමි’+ කියා යෙහෝවා දෙවි පවසන්නේය. 36 ‘මෝවබ් දේශය ගැනත් කිර්-හෙරෙස් නගරයේ වැසියන්+ ගැනත් මාගේ හදවත හඬා වැලපෙන්නේය. මාගේ හදවතෙන් නැඟෙන හඬ බට නළාවකින් නැඟෙන දුක්මුසු හඬකට සමානය.+ ඔවුන් උපයාගත් වස්තු සම්භාරයම නැති නාස්ති වී යන්නේය.+ 37 සියලුදෙනාම තම හිස් බූ ගාගෙන+ රැවුල් කපාගෙන+ සිටිති. ඔවුහු සියලුදෙනා අත්වල කැපීම් සිදු කරගෙන,+ ඉණ වටා ගෝණි රෙදි ඔතාගෙන සිටිති.’”+

38 “යෙහෝවා දෙවි මෙසේ පවසන්නේය. ‘මෝවබ්හි මංසන්ධිවලින්ද සෑම නිවසකම පියස්සෙන්ද නික්ම එන්නේ වැලපීමේ හඬය.+ මන්ද කිසි ප්‍රයෝජනයක් නැති භාජනයක් සුනුවිසුනු කර දමන්නාක් මෙන් මම මෝවබ් සුනුවිසුනු කර දැමුවෙමි.+ 39 ඇය බියපත් වූ හැටි බලන්න! ජනයෙනි, හඬා වැලපෙන්න. මෝවබ් ලැජ්ජාවෙන් පසුබැස ගිය හැටි බලන්න!+ ඇය වටා සිටින අයගේ නින්දාවට ඇය ලක් වී ඇත. ඇයට සිදු වූ දේ දකින සියලුදෙනා භයෙන් වෙවුලන්නෝය.’”

40 “යෙහෝවා මෙසේ පවසන්නේය. ‘පියාපත් විහිදුවාගෙන රාජාලියෙක් තම ගොදුර ඩැහැගැනීමට වේගයෙන් පැමිණෙන්නාක් මෙන්+ මෝවබ්ව ගොදුරු කරගැනීමට තැනැත්තෙක් පැමිණෙන්නේය.+ 41 ඔහු නගරත් ඇගේ බලකොටු සියල්ලත් යටත් කරගන්නේය. දරුවෙකු බිහි කරන ස්ත්‍රියක අද්දකින වේදනාවට සමාන වේදනාවක් ඒ දවසේදී මෝවබ්හි බලවන්තයෝ අද්දකිනු ඇත.’”+

42 “‘යෙහෝවා දෙවිට විරුද්ධව මහත් ආඩම්බරයෙන් කතා කළ නිසා+ මෝවබ් ජාතිය සම්පූර්ණයෙන්ම නැති කර දමනු ලැබේ.+ 43 මෝවබ්හි වැසියෙනි, භීතිය ඔබ පසුපස ලුහුබැඳ එන්නේය. ඔබ බොරු වළකට වැටෙන්නහුය. මර උගුලකට හසු වන්නහුය’+ කියා යෙහෝවා දෙවි පවසන්නේය. 44 ‘භයෙන් පලා දුවන සියලුදෙනා බොරු වළට වැටෙනු ඇත. එයින් ගොඩ එන අය මර උගුලට හසු වනු ඇත.’+

“‘මා මෝවබ්ට දඬුවම් කරන කාලයේදී+ ඇයට මේ සියල්ලටම මුහුණ දීමට සිදු වන්නේය’ කියා යෙහෝවා දෙවි පවසන්නේය. 45 ‘රැකවරණය සොයා හෙෂ්බොන් නගරය වෙතට පලා ගිය අය කිසිවක් කරකියාගත නොහැකිව අසරණව සිටිති. මන්ද හෙෂ්බොන් වෙතින් ගින්නක් නැඟී ගියේය.+ සීහොන්ගේ නුවර මැදින් ගිනි ජාලාවක් පැමිණියේය.+ ඒ ගින්නෙන් මෝවබ්ගේ හිසද ඝෝෂාකාරයන්ගේ පුත්‍රයන්ගේ හිස් මුදුන්ද දැවී යනු ඇත.’+

46 “‘මෝවබ්, ඔබට සිදු වූ විපත මොන තරම් දරුණුද!+ කෙමොෂ් දෙවියාගේ සෙනඟ+ විනාශ වී ගියෝය. ඔබේ පුත්‍රයන්වත් දූවරුන්වත් වහලුන් ලෙස රැගෙන යන ලදි. 47 නමුත් මම අවසාන කාලයේදී වහල්භාවයේ සිටින මෝවබ්වරුන්ව නැවත එකතු කරගන්නෙමි.+ මෝවබ්ට දුන් තීන්දුව මෙතැනින් අවසන්ය’+ කියා යෙහෝවා දෙවි පවසන්නේය.”