Mikea

1 Lentsoe la Jehova le ileng la hlaha ho Mikea+ oa Moreshethe, matsatsing a Jothame,+ Akaze,+ Ezekiase,+ marena a Juda,+ leo a ileng a ba le pono ea lona malebana le Samaria+ le Jerusalema:+

2 “Utloang, Lōna lichaba, kaofela ha lōna; ela hloko, Uena lefatše le se tletseng ho uena,+ ’me ’Musi Morena Jehova e ke e be paki khahlanong le lōna,+ Jehova a le tempeleng ea hae e halalelang.+ 3 Etsoe, bonang! Jehova o tloha sebakeng sa hae,+ ’me ka sebele o tla theoha le ho hatakela libaka tse phahameng tsa lefatše.+ 4 Lithaba li tla qhibiliha tlas’a hae,+ le likhohlo li tla arohana, joaloka boka ba linotši ka lebaka la mollo,+ joaloka metsi a tšolleloang sebakeng se motheō.

5 “Ke ka lebaka la bofetoheli ba Jakobo sena sohle se leng teng, esita le ka lebaka la libe tsa ntlo ea Iseraele.+ Bofetoheli ba Jakobo ke eng? Na hase Samaria?+ Libaka tse phahameng tsa Juda ke eng?+ Na hase Jerusalema? 6 Ka sebele ke tla etsa Samaria qubu ea lithako tsa naha,+ libaka tsa ho lema tsa serapa sa morara; ke tla tšollela majoe a hae phuleng, ’me ke tla pepesa metheo ea hae.+ 7 Litšoantšo tsa hae tse betliloeng li tla silakanngoa kaofela,+ le limpho tsohle tseo a li filoeng e le tefo ea hae li tla chesoa mollong;+ ’me litšoantšo tsa hae tsohle tse rapeloang ke tla li etsa lesupi. Etsoe o li bokeletse ho tsoa linthong tse fanoeng e le tefo ea letekatse, ’me li tla khutlela nthong e fanoeng e le tefo ea letekatse.”+

8 Ka lebaka lena ke tla bokolla le ho lla;+ ke tla tsamaea ke sa roala letho maotong ’me ke hlobotse.+ Ke tla bokolla joaloka liphokojoe, ’me ke siame joaloka limpshe tse tšehali. 9 Etsoe leqeba le ho eena ke le ke keng la fola;+ kaha le fihlile Juda,+ lefu le fihlile hekeng ea sechaba sa ka, ho ea fihla Jerusalema.+

10 “Le se ke la ho bolela Gathe; ka sebele le se ke la lla.+

“Ka tlung ea Afera le ipitike lerōleng.+ 11 Feta, Uena mosali ea lulang Shafire, ka bofeela bo hlabisang lihlong.+ Mosali ea lulang Zanane ha aa tsamaea. Ho bokolla ha Bethe-ezele ho tla tlosa sebaka seo e emang ho sona har’a lōna. 12 Etsoe mosali ea lulang Marothe o ’nile a letela se molemo,+ empa se sebe se theohetse hekeng ea Jerusalema se tsoa ho Jehova.+ 13 Tlamella koloi lipereng tse qhanehiloeng hammoho, Uena mosali ea lulang Lakishe.+ Tšimoloho ea sebe ke seo a neng a le sona ho morali oa Sione,+ etsoe ho uena ho fumanoe bofetoheli ba Iseraele.+ 14 Ka hona u tla fana ka limpho tsa karohano ho Moreshethe-gathe.+ Matlo a Akzibe+ a ne a le joaloka ho hong ho thetsang ho marena a Iseraele. 15 Ke sa ntse ke tla tlisa moleleki ho uena,+ Uena mosali ea lulang Maresha.+ Khanya ea Iseraele e tla fihla Adulame.+ 16 Ipeole, ’me u ikute moriri ka lebaka la bara ba hao ba thabo e phethehileng.+ Atolosa lefatla la hao joaloka la ntsu, hobane ba tlohile ho uena ho ea kholehong.”+

2 “Ho malimabe ba rerang se kotsi, le ba tloaetseng ho etsa se sebe, libetheng tsa bona!+ Ka leseli la hoseng baa se etsa,+ hobane ho matleng a matsoho a bona.+ 2 Ba lakalitse masimo ebile ba a nkile;+ le matlo, ’me ba a nkile; ba etselitse monna ea shahlileng bolotsana le ba ntlo ea hae,+ monna le lefa la hae.+

3 “Ka hona sena ke seo Jehova a se boletseng, ‘Bonang! ke nahanela lelapa+ lena tlokotsi+ eo le ke keng la tlosa melala ea lōna ho eona,+ e le hore le se ke la tsamaea ka boikhohomoso;+ hobane ke nako ea tlokotsi.+ 4 Letsatsing leo e mong o tla hlahisa polelo ea maele+ malebana le lōna ’me ka sebele o tla lla sello, sello ka bosona.+ E mong o tla lokela ho re: “Ka sebele re tlatlapuoe!+ O fetola kabelo ea sechaba sa ka.+ O e tlosa ho ’na hakaakang! O arolela ea sa tšepahaleng masimo a rōna.” 5 Ka hona u ke ke ua ba le ea lahlang thapo, ka lotho,+ phuthehong ea Jehova. 6 Le se ke la tlohela mantsoe hore a tsoe.+ Ba tlohela mantsoe hore a tsoe. Ba ke ke ba tlohela mantsoe hore a tsoe malebana le lintho tsena. Ho kokobetsoa ho ke ke ha tloha.+

7 “‘Na ho ntse ho thoe, Uena ntlo ea Jakobo:+ “Na moea oa Jehova ha oa khotsofala, kapa na ee ke mesebetsi ea hae?”+ Na mantsoe a ka ha a etse se molemo+ tabeng ea ea tsamaeang ka kotloloho?+

8 “‘Maobane sechaba sa ka se ile sa ema joaloka sera.+ Karolong e ka pele ea seaparo le nka mokhabiso o motle haholo, ho ba fetang ka kholiseho, joaloka ba khutlang ntoeng. 9 Basali ba sechaba sa ka le ba leleka ntlong eo ho eona mosali a bang le thabo e phethehileng. Le nka khanya ea ka+ baneng ba hae, ho isa nakong e sa lekanyetsoang.+ 10 Emang ’me le tsamaee,+ hobane sena hase sebaka sa ho phomola.+ Ka lebaka la hore o fetohile ea sa hloekang,+ ho na le tšenyo; ’me mosebetsi oo oa ho senya o bohloko.+ 11 Haeba motho, ea tsamaeang ka moea le leshano, a boletse leshano:+ “Ke tla tlohela mantsoe hore a tsoele ho lōna malebana le veine le malebana le joala bo tahang,” ka sebele e tla boela e be eena ea tlohelang mantsoe hore a tsoe sechabeng sena.+

12 “‘Ka sebele ke tla bokella Jakobo, kaofela ha lōna;+ ruri ke tla phutha ba setseng ba Iseraele.+ Ke tla ba beha bonngoeng, joaloka mohlape ka lesakeng, joaloka mohlape o leng har’a lekhulo la oona;+ moo ho tla tlala lerata la batho.’+

13 “Ea phunyeletsang ka sebele o tla hlaha ka pel’a bona:+ ba tla phunyeletsa. Ebile ba tla feta hekeng, ’me ba tsoe ka eona.+ Morena oa bona o tla feta ka pel’a bona, Jehova a ba eteletse pele.”+

3 Ka re: “Ka kōpo, utloang lōna lihlooho tsa Jakobo le lōna balaoli ba ntlo ea Iseraele.+ Na hase mosebetsi oa lōna ho tseba toka?+ 2 Lōna ba hloileng se molemo+ le ba ratang bobe,+ ba qaqapolotsang batho letlalo la bona le nama ea bona masapong a bona;+ 3 lōna bao hape le jeleng nama ea sechaba sa ka,+ ’me la tlosa letlalo la sona ho sona, la ba la robokella masapo a sona, ’me la a silakanya joaloka se leng ka pitseng e molomo o moholo le joaloka nama e leng ka har’a pitsa.+ 4 Nakong eo ba tla hoeletsa ho Jehova ho kōpa thuso, empa a ke ke a ba araba.+ O tla ba patela sefahleho sa hae nakong eo,+ ho ea kamoo ba entseng bobe kateng mesebetsing ea bona.+

5 “Sena ke seo Jehova a se boletseng khahlanong le baprofeta ba etsang hore sechaba sa ka se hlahlathele,+ ba lomang ka meno+ le ba hoeletsang, ‘Khotso!’+ bao, ha mang kapa mang a sa kenye ho hong ka mahanong a bona, ba bileng ba halaletsang ntoa khahlanong le eena,+ 6 ‘Ka hona le tla ba le bosiu,+ e le hore ho se ke ha e-ba le pono;+ ’me le tla ba le lefifi, e le hore le se ke la sebelisa bonohe. Ka sebele letsatsi le tla likella baprofeta, le motšehare o tla ba fifalla.+ 7 Ba bonang lipono+ ba tla lokela ho hlajoa ke lihlong,+ ’me ka sebele linohe+ li tla soetseha. Ba tla lokela ho koahela litelu tse holim ’a molomo,+ kaofela ha bona, etsoe ha ho na karabo e tsoang ho Molimo.’”+

8 Ka lehlakoreng le leng, ke tletse matla, ka moea oa Jehova, le oa toka le bonatla,+ e le ho bolella Jakobo bofetoheli ba hae le Iseraele sebe sa hae.+

9 Ka kōpo, utloang sena, lōna ba ka sehloohong ba ntlo ea Jakobo le lōna balaoli ba ntlo ea Iseraele,+ ba hloileng toka le ba khopamisang esita le ntho e ’ngoe le e ’ngoe e otlolohileng;+ 10 ba hahang Sione ka liketso tsa tšollo ea mali le Jerusalema ka ho se loke.+ 11 Ba ka sehloohong ba hae ba ahlola feela bakeng sa tjotjo,+ le baprista ba hae ba rupela feela bakeng sa tefo,+ ’me baprofeta ba hae ba sebelisa bonohe bakeng sa chelete feela;+ empa leha ho le joalo ba ntse ba itšetleha ka Jehova, ba re: “Na Jehova ha a har’a rōna?+ Re ke ke ra oeloa ke tlokotsi.”+ 12 Ka hona ka lebaka la lōna Sione e tla lengoa joaloka tšimo feela, le Jerusalema e tla fetoha qubu feela ea lithako,+ ’me thaba ea ntlo e tla ba joaloka libaka tse phahameng tsa moru.

4 Karolong e qetellang ea matsatsi+ thaba+ ea ntlo+ ea Jehova e tla tiisoa ka thata ka holim ’a litlhōrō tsa lithaba, ’me ka sebele e tla phahamela maralla;+ ’me lichaba li tla phallela+ ho eona. 2 Ka sebele lichaba tse ngata li tla ea ’me li re: “Tloong,+ ’me re nyoloheleng thabeng ea Jehova le ntlong ea Molimo oa Jakobo;+ o tla re rupela ka litsela tsa hae,+ ’me re tla tsamaea litseleng tsa hae.”+ Etsoe molao o tla tsoa Sione, ’me lentsoe la Jehova le tsoe Jerusalema.+ 3 Ka sebele o tla ahlola har’a lichaba tse ngata,+ ’me a lokise litaba+ lichabeng tse matla tse hōle haholo.+ Ba tla lokela ho tea lisabole tsa bona hore e be mehoma le marumo a bona hore e be likere tse faolang limela.+ Sechaba se ke ke sa phahamisetsa sechaba se seng sabole, ha ba sa tla hlola ba ithuta ntoa.+ 4 Ka sebele e mong le e mong o tla lula tlas’a sefate sa hae sa morara le tlas’a sefate sa hae sa feiga,+ ho ke ke ha e-ba le ea etsang hore ba thothomele;+ kaha molomo oa Jehova oa mabotho o boletse.+

5 Etsoe lichaba tsohle li tla tsamaea se seng le se seng ka lebitso la molimo oa sona;+ empa re tla tsamaea ka lebitso la Jehova Molimo oa rōna+ ho isa nakong e sa lekanyetsoang, esita le ka ho sa feleng.+

6 “Letsatsing leo,” ho bolela Jehova, “ke tla bokella ea neng a hlotsa;+ le ea neng a qhalakantsoe ke tla mo phutha,+ esita le eo ke ileng ka mo tšoara hampe. 7 Ka sebele ke tla etsa ea neng a hlotsa masala,+ le ea neng a suthiselitsoe hōle ke mo etse sechaba se matla;+ ’me Jehova o tla busa e le morena oa bona Thabeng ea Sione, ho tloha joale le ho isa nakong e sa lekanyetsoang.+

8 “Ha e le uena, tora ea mohlape, tutulu ea morali oa Sione,+ e tla fihla ho uena, e, ka sebele puso ea pele e tla tla,+ ’muso oa morali oa Jerusalema.+

9 “Joale ke hobane’ng ha u ntse u hooa ka lentsoe le phahameng?+ Na ha ho na morena ho uena, kapa moeletsi oa hao o timetse, hoo u tšoeroeng ke bohloko bo hlabang bo kang ba mosali ea belehang?+ 10 Utloa bohloko bo boholo ’me u qhashohe, Uena morali oa Sione, joaloka mosali ea belehang,+ etsoe joale u tla tsoa motseng, ’me u tla lokela ho lula naheng.+ U tla lokela ho fihla Babylona.+ Moo u tla lopolloa.+ Moo Jehova o tla u rekolla liatleng tsa lira tsa hao.+

11 “Joale ka sebele ho tla bokelloa khahlanong le uena lichaba tse ngata, tse reng, ‘A ke a silafale, ’me e se eka mahlo a rōna a ka talima Sione.’+ 12 Empa ha e le tsona, ha li tsebe menahano ea Jehova, ’me ha li utloisise morero oa hae;+ hobane ka sebele o tla li phutha joaloka lijo-thollo tse sa tsoa khuoa tse entseng mokoloko tse isoang seotlong.+

13 “Tsoha ’me u pole, Uena morali oa Sione;+ etsoe lenaka la hao ke tla le fetola tšepe, likhōla tsa hao ke tla li fetola koporo, ’me ka sebele u tla silakanya lichaba tse ngata;+ ka thohako u tla nehela ho Jehova phaello ea tsona e sa lokang,+ ’me maruo a tsona u a nehele ho Morena oa ’nete oa lefatše lohle.”+

5 “Nakong ena ua itšeha,+ Uena morali oa phutuho; o behile thibello khahlanong le rōna.+ Ba tla otla moahloli oa Iseraele lerameng ka molamu.+

2 “Uena Bethlehema Efratha,+ e monyenyane haholo hore u ka ba har’a likete tsa Juda,+ ho uena+ ho tla tsoa bakeng sa ka eo e tlang ho ba ’musi oa Iseraele,+ eo lesika la hae le tsoang linakong tsa pele, matsatsing a nako e sa lekanyetsoang.+

3 “Ka hona o tla fana ka bona+ ho fihlela nakong eo ka eona ea belehang a belehang.+ Barab’abo ba bang kaofela ba tla khutlela ho bara ba Iseraele.

4 “Ka sebele o tla ema a be a lise ka matla a Jehova,+ ka bophahamo ba lebitso la Jehova Molimo oa hae.+ Ka sebele ba tla ’ne ba lule,+ etsoe joale o tla ba moholo ho ea fihla lipheletsong tsa lefatše.+ 5 Enoa o tla fetoha khotso.+ Ha e le Moassyria, ha a kena naheng ea rōna le ha a hatakela litora tsa rōna tsa bolulo,+ le rōna re tla lokela ho hlahisa khahlanong le eena balisa ba supileng, e, babusisi ba robeli ba moloko oa batho. 6 Ba tla lisa naha ea Assyria ka sabole,+ le naha ea Nimrode+ menyakong ea eona. Ka sebele o tla tlisa topollo ho tsoa ho Moassyria,+ ha a kena naheng ea rōna le ha a hatakela sebaka sa rōna.

7 “Ba setseng ba Jakobo+ ba tla ba joaloka phoka e tsoang ho Jehova+ har’a lichaba tse ngata, joaloka lipula tsa melupe holim ’a limela,+ tse sa lebelleng ho motho kapa ho letela bara ba motho oa lefatše.+ 8 Har’a lichaba, har’a batho ba bangata, ba setseng ba Jakobo ba tla ba joaloka tau har’a liphoofolo tsa moru, joaloka taoana e moetse har’a mehlape ea linku, eo, ha e feta, ka sebele e hatakelang hammoho le ho rusolla;+ ’me ha ho na molopolli. 9 Matsoho a lōna a tla phahamela lira tsa lōna,+ ’me lira tsohle tsa lōna li tla felisoa.”+

10 “Ka letsatsi leo,” ho bolela Jehova, “ke tla felisa lipere tsa lōna har’a lōna ’me ke timetse makoloi a lōna a ntoa.+ 11 Ke tla heletsa metse ea naha ea lōna le ho qhaqha libaka tsohle tsa lōna tse etselitsoeng liqhobosheane.+ 12 Ke tla felisa boloi matsohong a lōna, ’me har’a lōna ha ho sa tla tsoela pele ho e-na le ba sebelisang boselamose.+ 13 Hape ke tla felisa litšoantšo tsa lōna tse betliloeng le lifika tsa lōna har’a lōna, ’me ha le sa tla hlola le inamela mosebetsi oa matsoho a lōna.+ 14 Ke tla fothola lipalo tsa lōna tse halalelang+ har’a lōna le ho felisa metse ea lōna. 15 Ka bohale le ka khalefo ke tla phethisa phetetso holim ’a lichaba tse sa mamelang.”+

6 Ka kōpo, utloang seo Jehova a se bolelang.+ Tsohang, le tsamaise nyeoe le lithaba, ’me e se eka maralla a ka utloa lentsoe la lōna.+ 2 Lōna lithaba, utloang nyeoe ea Jehova, le lōna lintho tse tšoarellang, lōna metheo ea lefatše;+ etsoe Jehova o na le nyeoe le sechaba sa hae, ’me o tla phehisana le Iseraele:+

3 “Lōna sechaba sa ka,+ ke entse’ng ho lōna? Ke le khathalitse ka tsela efe?+ Pakang khahlanong le ’na.+ 4 Etsoe ke ile ka le ntša naheng ea Egepeta,+ ’me ka le lopolla ntlong ea makhoba;+ ka romela ka pel’a lōna Moshe, Arone le Miriame.+ 5 Lōna sechaba sa ka, ka kōpo, hopolang+ seo Balake morena oa Moabe a ileng a se rera,+ le seo Balame mora oa Beore a ileng a mo araba ka sona.+ Ho tloha Shitime,+ ho ea fihla Gilgale,+ e ne e le ka morero oa hore liketso tse lokileng tsa Jehova li ka tsejoa.”+

6 Ke tla khahlanyetsa+ Jehova ka eng? Ke tla inamela Molimo ea leng phahameng ka eng?+ Na ke tla mo khahlanyetsa ka linyehelo tse feletseng tsa secheso,+ ka manamane a nang le selemo? 7 Na Jehova o tla khahloa ke likete tsa lipheleu, ke mashome a likete a melapo e phoroselang ea oli?+ Na ke tla fana ka mora oa ka oa letsibolo bakeng sa bofetoheli ba ka, litholoana tsa mpa ea ka bakeng sa sebe sa moea oa ka?+ 8 Uena motho oa lefatše, o u boleletse se molemo.+ Jehova o batla eng ho uena haese hore u sebelise toka+ u rate mosa+ ’me u inyenyefatse+ ha u tsamaea le Molimo oa hao?+

9 Lentsoe la Jehova le hoeletsa+ motse, ’me motho ea nang le bohlale bo sebetsang o tla tšaba lebitso la hao.+ Utloang molamu le ea o khethileng.+ 10 Na ka tlung ea ea khopo ho sa ntse ho e-na le matlotlo a bokhopo,+ le tekanyo ea efa e nyenyane e nyatsuoang? 11 Na nka ba ea hloekileng boitšoarong ka sekala se khopo le ka mokotla oa majoe a ho bekha a thetsang?+ 12 Etsoe banna ba oona ba ruileng ba fetohile ba tletseng pefo, le baahi ba oona ba buile leshano,+ ’me maleme a bona ke a qhekellang melomong ea bona.+

13 “Le ’na ka sebele ke tla u kulisa ka ho u otla;+ u tla etsoa lesupi, ka lebaka la libe tsa hao.+ 14 U tla ja ’me u se ke ua khora, le tlala ea hao e tla ba ka hare ho uena.+ U tla tlosa lintho, empa u ke ke ua li nka ka tšireletseho; ’me eng kapa eng eo u neng u tla e nka ka tšireletseho, ke tla e nehela sabole.+ 15 U tla jala peō, empa u ke ke ua kotula. U tla hatakela mehloaare, empa u ke ke ua itlotsa ka oli; le veine e monate, empa u ke ke ua noa veine.+ 16 Litaelo tse hlomamisitsoeng tsa Omri+ le mosebetsi oohle oa ntlo ea Akabe lia phethoa,+ ’me le tsamaea ka merero ea bona;+ e le hore nka le etsa ntho e makalloang ’me baahi ba hae ke ba etse ntho eo ho letsoang mololi ka lebaka la eona;+ le tla jara nyeliso ea lichaba.”+

7 Ho malimabe ’na,+ etsoe ke fetohile ea joaloka litholoana tsa lehlabula tse bokeletsoeng, joaloka se khoahlapisitsoeng sa merara e bokeletsoeng!+ Ha ho na lesihla la morara le ka jeoang, ha ho na feiga e butsoang pele, eo moea oa ka o neng o ka e lakatsa!+ 2 Ea tšepahalang o timetse lefatšeng, ’me har’a moloko oa batho ha ho na ea lokileng.+ Kaofela ha bona, ba lalla bakeng sa ho tšolla mali.+ E mong le e mong o tsoma mor’abo, ka letlooa le huloang.+ 3 Matsoho a bona a holim ’a se sebe, ho ipabola ho sona;+ khosana e kōpa ho hong, ’me ea ahlolang o etsa joalo bakeng sa moputso,+ ’me e moholo o bua se lakatsoang ke moea oa hae, oa hae ka boeena;+ ’me baa se lohella. 4 E motlehali oa bona o joaloka sehlahla se hlabang, ea lokileng ka ho fetisisa oa bona o mobe ho feta lekhoakhoa la meutloa.+ Letsatsi la balebeli ba hao, la ho eloa ha hao hloko, le tla tla.+ Joale ho tsietsoa ha bona ho tla etsahala.+

5 Le se ke la beha tumelo ea lōna ho bo-mphato ba lōna. Le se ke la tšepa metsoalle e tšepeloang makunutu.+ Lebela ho buleha ha molomo oa hao ho mosali ea robalang sefubeng sa hao.+ 6 Etsoe mora o nyelisa ntate; morali o ema khahlanong le ’m ’ae;+ ngoetsi khahlanong le ’mè matsale oa eona;+ lira tsa motho ke batho ba ntlo ea hae.+

7 Empa ha e le ’na, ke tla ’ne ke lebelle Jehova.+ Ke tla letela Molimo oa poloko ea ka.+ Molimo oa ka o tla nkutloa.+

8 U se ke ua thaba ka lebaka la ka, Uena mosali eo e leng sera sa ka.+ Le hoja ke oele, ka sebele ke tla phahama;+ le hoja ke lula lefifing,+ Jehova e tla ba leseli ho ’na.+ 9 Ke tla jara khalefo ea Jehova—kaha ke mo sitetsoe+—ho fihlela a tsamaisa nyeoe ea ka ’me a phethisa toka bakeng sa ka.+ O tla ntlisa leseling; ke tla talima ho loka ha hae.+ 10 Sera sa ka se tla bona, se tla apareloa ke lihlong,+ se neng se re ho ’na: “Jehova Molimo oa hao o hokae?”+ Mahlo a ka a tla se talima.+ Joale se tla fetoha sebaka sa ho hatakeloa, joaloka seretse sa literateng.+

11 Letsatsi la ho haha marako a hao a majoe, letsatsing leo molao-taelo o tla ba hōle.+ 12 Letsatsing leo esita le ho ea fihla ho uena ba tla tla ba tsoa Assyria le metseng ea Egepeta, le ho tsoa Egepeta esita le ho ea fihla Nōkeng;+ le ho tloha leoatleng le leng ho ea ho le leng, le ho tloha thabeng+ e ’ngoe ho ea ho e ’ngoe. 13 Naha e tla fetoha lesupi ka lebaka la baahi ba eona, ka lebaka la litholoana tsa mesebetsi ea bona.+

14 Lisa batho ba hao ka lere la hao,+ mohlape oa lefa la hao, o neng o lula o le mong morung—har’a serapa sa lifate tsa litholoana.+ Ba ke ba fule Bashane le Gileade+ joaloka matsatsing a nakong ea khale.+

15 “Joaloka matsatsing a ho tsoa ha hao naheng ea Egepeta ke tla mo bontša lintho tse hlollang.+ 16 Lichaba li tla bona ’me li hlajoe ke lihlong ke matla ’ohle a tsona.+ Li tla beha matsoho melomong;+ litsebe tsa tsona li tla thibana. 17 Li tla nyeka lerōle joaloka linoha;+ joaloka lihahabi tsa lefatše li tla tsoa ka ho ferekana marakong a tsona a tšireletso.+ Li tla tla ho Jehova Molimo oa rōna li thothomela, ’me li tla u tšaba.”+

18 Ke mang Molimo ea kang uena,+ ea tšoarelang phoso le ea tlohelang tlōlo+ ea masala a lefa la hae?+ Ka sebele a ke ke a tšoarella bohaleng ba hae ka ho sa feleng, etsoe o thabela mosa o lerato.+ 19 O tla boela a re bontše mohau;+ o tla beha liphoso tsa rōna tlaase.+ U tla lahlela libe tsohle tsa bona bolibeng ba leoatle.+ 20 U tla fana ka ’nete e filoeng Jakobo, mosa o lerato o filoeng Abrahama, oo u ileng ua hlapanya ka oona ho baholo-holo ba rōna ho tloha matsatsing a khale.+