Ngeren u Pasen Asember a ken Bibilo

A B D E F G H I J K L M N O P R S T U V W Y Z

A

• Agbaga.

  Ka nomsoor shin kwase u nan yaven a ior mba nan vese ga yô, hemban cii je yô, sha u zuan a inyaregh. (Ka ishember i ken zwa Grika i i yer ér porne la i gem ér “agbaga” ye, man inja i i ér “u teen kwagh.”) Mba hembe yilan kwase sha iti ne, nahan kpa, mbaagbaga mba nomso kpa i ter ve ken Bibilo. Atindi a Mose yange venda gbaga u eren, shi yange agbaga nana̱ va er iyua ken icighanjiir u Yehova sha inyaregh ki nan zough a mi sha gbaga u eren la kpa i venda, kpa utempel mba i ­civir akombo ker la gema lu a mbaagbaga mba i zuan a inyaregh sha a ve yô. (Dut 23:17, 18; 1Ut 14:24) Bibilo shi ter ishember ne sha injakwagh kpaa, sha u ôron kwagh u nongoior shin akuraior shin mbamzough mba civir ieev, mba ve senge ér ve mba mbacivir Aôndo yô. U tesen ikyav yô, i ôr kwagh u mzough u ukwaghaôndo u i yilan ér “Zegebabilon” la ken Mpase ér ka agbagakwase, sha ci u ka a lu vea mbahemenev mba tar ne kangenaa sha u keren tahav man inyaregh.—Mp 17:1-5; 18:3; 1Kr 5:25.

• Agbe.

  Kwagh u yange i wa or ér nana lu ijiir i môm, sha u tsahan nan yô. Agbe agen yange i wa or angahar ker tseegh. Agen di yange a̱ wa or yô, nan gôvur, sha ci u shighe gen i zom nan angahar man ave kua mon cii i wa ker.—Yer 20:2; Aer 16:24.

• Akaa a wuhan iyol i utya.

  Akaa a ushoja ka ve hua sha ci u kuran iyol ve yô, ka idyerutya man rigautya man kwange man akaa a yisan agongo, kua ipyerutya.—1Sa 31:9; Ef 6:13-17.

• Akaya.

  Ken Ruamabera u Mbakristu u ken Zwa Grika la yô, ijiir ne lu tiôntar u tartor u Roma, ken imbusutariyan i tar u Grika, gartamen na lu Korinte. Icile i i yilan ér Peloponese la, kua ajiir a hen atô u tar u Grika la cii lu ken ­haregh u Akaya.—Aer 18:12.

• Akombo.

  Ka jighjigh u ior ve ne ér orumace ka nana̱ kpe yô, jijingi u nan a kpe ga, i lu iyol i nan tseegh, shi ujijingi mba mbakpenev vea fatyô u lamen a mbaumav, shi mba lamen a ve kpaa, hemban je yô sha ikyev i or (orkpehenishor) u nan lu a azôv la. Ishember i ken zwa Grika i i gem ér “akombo a sôron” la mba yer i ér pharmakia, inja i i jighilii ér “u nan or mcimbim ma bom.” I va zua ishember ne sha kwagh u akombo, sha ci u ngise la or yange nan ma mcimbim ma bom zum u nan lu keren tahav mbu azôv sha u nana eren ahir a mi yô.—Ga 5:20; Mp 21:8.

• Akoo.

  Ka apusu a ka a̱ shoghor samuyia ve i peer a kera, i mase shin sam u ka i ya la. I ôr kwagh u akoo sha injakwagh u tesen ikyav i kwagh u a lu a inja ga shin u kwagh a gbe sha mi ga yô.—Ps 1:4; Mt 3:12.

• Akor a atse a nan nagh.

  Akaa a lun er akor a zendenya nahan, a yange i wa sha azongo anyiin a atse a nan iniav agen, a due sha gôôn yô.—Le 8:15; 1Ut 2:28; Mp 9:13.

• Alabasetu.

  Ka iti i ugber mba kiriki mba haan usenti shin akaa a human doon kimi, mba yange i er sha iwen i i zua a mi ikyua a gar u Alabaseteron, ken tar u Igipiti yô. Yange i er ugber mban ve va lu vegher u sha zwa hogholoo sha er a cir gbang, ihyuma i doon tsung la ia due ga yô. Yange i va gema yilan iwen ne sha iti shon ne i môm.—Mr 14:3.

• Alefa man Omega.

  Ka ati a asangaabaacaa a ken zwa Grika; Alefa ka ishangebaacaa i̱ hiihii, Omega ka i̱ masetyô. Asangaabaacaa a ahar shon, a i nger a imôngo ajiir atar ken takeda u Mpase la, ka ititom i Aôndo. Kwagh u asember ne a lu ôron sha ajiir ne yô ér, “u hiihii man u masetyô” kua “mhii man mkur.”—Mp 1:8; 21:6; 22:13.

• Amen.

  Inja na yô ér, “i̱ lu nahan,” shin “kpee je.” Ka ishember i ken zwa Heberu i i yilan ér ʼaman la, inja na yô ér “u lun a jighjigh iyol, u lun a mimi iyol.” Yange a̱ bum shin a̱ er msen shin a̱ ôr kwagh yô, ior ve kaa ér “Amen” sha u tesen ér ve lumun a kwagh shon. I yila Yesu sha iti ne ken takeda u Mpase.—Dut 27:26; 1Kr 16:36; Ro 1:25; Mp 3:14.

• Annongo.

  Mzough u ior mba dondon ityesen i ma kwaghaôndo shin dondon ma orhemen, shi dondon akaa a ve ne jighjigh a mi la. I yila iniongo i ihiar i kwaghaôndo u Mbayuda i zan gwa la sha iti ne, ka Mbafarishi man Mbasadushi je la. Mba yange ve lu Mbakristu ga la kpa yilan kwaghaôndo u Mbakristu ér “annongo” shin “annongo u Mbanasareti,” man a̱ shi nan kpa ve nengen ér a due ken kwaghaôndo u Mbayuda. Ken tiônnongo u Kristu kpa yange iniongo va pav ker; i ter kwagh u “annongo u Nikolau” jighilii ken takeda u Mpase.—Aer 5:17; 15:5; 24:5; 28:22; Mp 2:6; 2Pe 2:1.

• Antikristu.

  Ka ishember i ken zwa Grika, ngi ôron akaa ahar. Ngi ôron kwagh u ma kwagh u a hendan a Kristu yô, shi a fatyô u kaan ér ngi ôron kwagh u Kristu u aiegh, ka or u nan kaan ér nan ngu Kristu je la. Nongoior shin mbamzough shin iniongo i i senge ér i tile sha ityough ki Kristu shi ngi Mesiya shin i i lu hendan a Kristu man mbahenen nav cii, a fatyô u yilan i jighilii ér uantikristu.—1Yh 2:22.

• Apostoli.

  Inja i ishember ne jighilii ér, “or u i tindi nan” yô, i yila Yesu nahan, kua ior mbagen mba yange i tindi ve ér ve za er mbagenev tom yô. Ashighe kpishi ka a̱ yila ishember ne yô, i lu mbahenen mba Yesu iyol na yange tsua ve ve lu iorov 12, tindi ve la.—Mr 3:14; Aer 14:14.

• Areki u ikyuryan.

  Ka akwati u yange i er sha kon u i yer ér acacia, i cir u zanaria iyol yô. Yange i ver un ken Icighan Kpar u Hemban Cii u ken tabernakel, shi ken masejime i va ver un ken Icighan Kpar u Hemban Cii u ken tempel u Solomon maa la. Lu a kuur u taver iyol u sha ­zanaria, ucerubi lu sha mi uhar, hanmô ve na ishigh ken ugen. Akaa a vesen a yange lu ker yô, lu ikpande awen ihiar i i nger Atindi a Pue la sha mi la.—Dut 31:26; 1Ut 6:19; Heb 9:4.

• Areopagu.

  Igyungu igen i taven i ken Atene, igyungu ne lu gar u Akoropoli vegher u ken imbusutarimese. Shi yange i yilan mba ve teman ijir (atejir u) hen ijiir ne la kpa sha iti ne. Yange mbatimen sha mfe u taregh mba ken nongo u Setoika man Epikuria za a Paulu hen Areopagu ér a za pase akaa a a ne jighjigh a mi la.—Aer 17:19.

• Armagedon.

  Ka i yila ishember ne ken zwa Heberu ér, Har Meghiddohn, inja na yô ér, “Uwo u Megido.” Ka a ter ishember ne yô, i ôron kwagh u “ityav mbi iyange i vesen i Aôndo U Hemban Agee Cii,” mbi “utor mba sha tar cii” vea kohol imôngo vea nôngo vea Yehova la. (Mp 16:14, 16; 19:11-21)—Nenge ZEGECAN.

• Aselgeia.

  —Nenge IEREN I NDÔHÔRSHIMA.

• Ashia.

  Ken Ruamabera u Mbakristu u ken Zwa Grika la yô, haregh ne lu kpentar u ken tartor u Roma. Ijiir i i yer nyian ér ityôtar i tar u Turkey la kpa lu ker, kua uicile mba lun ikyua a kpetar, er icile i Samo man Patemo nahan. Gartamen na lu Efese.—Aer 20:16; Mp 1:4.

• Atindi a Mose.

  Atindi a Yehova na Iserael sha ikyev i Mose ken taaikyôngo u Senai shighe u shi anyom 1513 u a mar Yesu la. Ashighe kpishi ka i yila ityakeda i itian i hiihii i ken Bibilo la ér Atindi.—Mt 5:17; Lu 24:44.

• Atindi.

  Ka a nger iti ne a̱ hii sha ishangebaacaa i vesen yô, i ôron kwagh u Atindi a Mose shin ityakeda i itian i hiihii i ken Bibilo la. Ka a̱ nger i sha asangaabaacaa a kiriki tseegh yô, i ôron kwagh u atindi asange asange, ken Atindi a Mose la, shin ma kwaghwan u tindi a har sha mi yô.—Nu 15:16; Dut 4:8; Mt 7:12; Ga 3:24.

• Atse a nan nagh.

  Imaagh ki taven shin tsembe u i maa sha inya, shin sha abamber awen, shin sha atse-awen shin i mande sha ikyon, i cir iyôgh sha mi yô; yange i naan iniav shin i nanden insensi sha mi ken kwaghaôndo. “Atse a sha zanaria” a cuku yange lu ken ruum u hiihii u ken tabernakel man u ken tempel la, sha ci u nanden insensi sha mi. Yange i er a sha kon, i cir kon shon zanaria iyol. “Atse a sha togula” a vesen di gema lu hen tembe ken won, sha ci u nan iniav mbi nanden. Ken mcivir u aiegh kpa yange atse a nan iniav lu kpishi.—Ek 39:38, 39; 1Ut 6:20; Mt 5:23, 24; Lu 1:11; Aer 17:23.

• Ayange a Masejime.

  Ishember ne man asember a a ze kwaghmôm a i̱, er “ayange a masetyô” nahan, ka i ter a ken akaaôron a profeti a ken Bibilo zum u i lu ôron kwagh u shighe u akaa a ngise er la yange a va hingir sendeghee. (Esek 38:16; Da 10:14; Aer 2:17) Ayange a masejime aa fatyô u lun anyom kpuaa shin anyom ­kpishi, kpa har sha er kwaghôron u profeti a tese la. Bibilo hemba eren tom a ishember ne sha kwagh u “ayange a masejime” a tar u hegen ne, shighe u Yesu una lu imôngo vea ­mbahenen nav ken jijingi la.—2Ti 3:1; Yak 5:3; 2Pe 3:3.

• Azôv.

  Ujijingi mba wan afer mba i nengen a ve ga, ve hembe uumace tahav yô. I yila ve ér “ônov mba Aôndo” ken Genese 6:2 shi i yila ve ér “mbatyomov” ken Yuda 6. Yange i gba ve ve lu mbaaferev ga, ve lu mbatyomov, kpa ve va gema ve hingir mbahyomov mba Aôndo zum u ve hemba un ato sha ayange a Noa shi ve kohol Satan sha u hemban Yehova ato la.—Dut 32:17; Lu 8:30; Aer 16:16; Yak 2:19.

B

• Baal.

  Lu aôndo u Mbakanaan; ve nengen ér ka un a lu a kwavaôndo shi a nôôn ura shi a doon iyiav ye. Shi “Baal” lu iti i yange i yilan mbaaôndo mba ior nengen ér ka mbakiriki hen ityô ve yô. Inja i ishember i ken zwa Heberu ne ér “Or u kwagh; Orvesen.”—1Ut 18:21; Ro 11:4.

• Batisema; Er batisema.

  Ishember i “er batisema” la ngi ôron kwagh u “u mirin,” shin u wan kwagh uven shin mnger. Yesu yange kaa ér gba keng u a er mbadondon un batisema. Ruamabera ôr kwagh u batisema u Yohane eren la, man batisema u sha icighan jijingi, man batisema u sha usu, kua ubatisema ­mbagenev.—Mt 3:11, 16; 28:19; Yh 3:23; 1Pe 3:21.

• Belesebul.

  Ka iti i i yer Satan a mi yô, un u a lu ortaregh shin tor u azôv la. A shi nan kpa lu iti i Baal-sebu, Baal u Mbafiliti civir ken Ekeron la, i va goom a mi i yilan nahan ye.—2Ut 1:3; Mt 12:24.

• Ber u usu.

  Ka ijiir i “yeghen usu man sul­fur” i sha injakwagh, shi i yila i ér “ku u sha uhar.” Mbaasorabo mba ve vende u geman ishima la, man Diabolo kua ku man Uwar (shin, Hade) je kpaa, a kende ve cii ken ber u usu. Er i we or u ken jijingi kua ku man Hade kpaa ker, man i lu u akaa ne cii aa fatyô u hian ken usu ga yô, tese ér ber ne ka ijiir i nanden or her gbem sha won ga, kpa ka ikyav i mtim u tsôron.—Mp 19:20; 20:14, 15; 21:8.

• Bouange.

  Nyityô uange i̱ i̱ tsaren fele fele, man i lu angev mbu mbua fatyô u samber wuee shi wuan ior yô.—Lu 21:11.

• Busa.

  Anar u tôngon u yange i er sha iyô, i tôngon sha u ôron ior ma loho shin i tôngon ken kwaghkuhwan yô. Ashighe kpishi ka i ôr sha injakwagh ér busa ua gba imo, maa a yôô ajiraôron a Yehova shin akaa a vesen agen a ­Aôndo una er yô.—1Ko 15:52; Mp 8:7–11:15.

D

• Dekapoli.

  Agar a Mbagrika a yange wa zua yô. Sha hiihii la, lu agar pue (I zua a iti ne ken asember a ken zwa Grika a i yer ér deka man polis la. Inja i deka ér “pue,” inja i polis di ér “gar”). Shi lu iti i yange i yilan haregh u lu Zegemnger u Galilia man Ifi u Yordan vegher u sha ityough­kitaregh, ape agar ne kpishi lu her la yô. Lu ajiir a vesen a i eren akaa a ityôô a Mbagrika kua kpenga her yô. Yesu yange kar hen haregh ne, kpa i nger kwagh môm u tesen ér yange za hen ma gar môm ken agar ne ga.—Mt 4:25; Mr 5:20.

• Denariu.

  Gbenger azurfa u Mbaroma. Yange a yuhwa i kuma ugeram 3.85 shi a lu a ikyav i ityough ki Shisar sha mi vegher u môm. Lu injar i i kimbin or tom u ken iyange jimin yô, shi Mbaroma yange ve kighir Mbayuda ve ta ve “kpandegh” sha gbenger azurfa ne.—Mt 22:17; Lu 20:24.

• Derakema.

  Ken Ruamabera u Mbakristu u ken Zwa Grika la yô, ishember ne ngi ôron kwagh u gbenger azurfa u Mbagrika. Sha ayange la, a yuhwa i kuma ugeram 3.4.—Mt 17:24.

• Diabolo.

  Ka iti i Satan ken Ruamabera u Mbakristu u ken Zwa Grika, i pasen or u a lu yô. Inja i iti ne ér, “Or u Vihin Ior Iti.” Yange i na Satan iti i Diabolo ne sha ci u ka un a hemen sha u vihin Yehova iti shi wan un akaa iyol, shi puun mkaanem Nam ma dedoo kua icighanti Na la ye.—Mt 4:1; Yh 8:44; Mp 12:9.

E

• Eev; Eev mbu civir.

  Eev ka kwagh u a lu ibeen, shin a til sha ityough ki ma kwagh u a lu kpôô kpôô shin u i hen a hen mluashe na, u ior ve ­civir yô. Aluer or ngu civir ma eev shin mbu doo nan ishima shin nan ngu guren mbu inya, shin nan ngu wuese mbu yô, ka eev mbu civir je la.—Ps 115:4; Aer 17:16; 1Ko 10:14.

• Erdoo u sha mhôôn.

  Ka ishember i ken zwa Grika i gem i̱ nahan ye; jighilii yô, ngi ôron kwagh u akaa a i lumun a mi shi a kuma ashe yô. Ashighe kpishi ka i ter ishember ne sha u ôron kwagh u iyua i i ne sha u tesen erdoo, shin gbenda u i ne iyua sha mhôôn yô. Zum u i lu ôron kwagh u erdoo u sha mhôôn u Aôndo yô, ishember ne ka i ôron kwagh u iyua i Aôndo a ne se mgbeghaa gbilin, a ver ishima ér se hide un a mi ga yô. Sha nahan yô, erdoo u sha mhôôn ne ka ieren i Aôndo i tesen ér ka a na kwagh ­mgbeghaa shi tesen uumace dooshima man erdoo wuee. Shi ka i gema ishember i ken zwa Grika ne ér “erdoo” man “iyua i sha mhôôn.” Mba tesen or erdoo ne sha ci u nan er ma kwagh shin nan kuma u a tese nan yum ga, kpa un u a tesen erdoo ne la ngu a er nahan sha ci u a wa nagh kpishi.—2Ko 6:1; Ef 1:7.

F

• Farou.

  Iti i yange i yilan utor mba Igipiti a mi yô. I ter ati a ufarou utaan ken Bibilo (ka Shishaki, man So, man Tirhaka, man Neko, kua Hofera), kpa mbagenev i ter ati a ve ga, kua mba yange ve er kwagh vea Aberaham man Mose man Yosev yem naghelaa la kpaa.—Ek 15:4; Ro 9:17.

• Fatôm.

  Ka ikyaren i iniembe i kwagh, i karen fan er mngerem ma ze i kighir yô; Fatôm môm ka a lihe kuma mita 1.8 (angahar 6).—Aer 27:28.

• Ferankinsensi.

  Mningem ma ma uma yô (iniôndon). Ka i zua a mi sha ikyon man ahu agen a i yer ér Boswellia la. Yange a̱ nande ferankinsensi yô, ihyuma i doon i due ker. Lu môm ken ilyôghonov mbi i eren icighan insensi u i nanden ken tabernakel kua tempel la a mi yô. Shi yange i nungwa un sha nagh ku samuyia, shi i ver un sha hanma tihi u beredi u sha ishi, ken Icighan Kpar.—Ek 30:34-36; Le 2:1; 24:7; Mt 2:11.

G

• Gbenda.

  I ter ishember ne sha injakwagh ken Ruamabera sha u ôron kwagh u gbenda u eren kwagh shin ieren i Yehova a lumun a mi shin a vende yô. Yange i yila mba ve hingir mbadondon Yesu Kristu la ér ka mbadondon “Gbenda u Ter,” inja na yô, uma ve cii har sha kwagh u nan Yesu Kristu jighjigh, shi dondon ikyav na.—Aer 19:9.

• Gbidye.

  Ken Ruamabera u Mbakristu u ken Zwa Grika la yô, ishember ne ka i ôron kwagh u tsulen or akpa u yange i iligh atsur sha mi shin u lun a akaa a kuman sha mi.—Yh 19:1.

• Gbough ku horon zwa.

  Gbough ku lihen ku i we ku iyôgh ki horon zwa mbera mbera, ku yange mbasulev huren ilegh a mi yô. I tôô gbough kun i kar sha akaaôron a orfankwagh a ka a wase or u nan kegh ato la u dondon kwaghwan u injaa yô. Ishember i u “hendan a or u a ker gbough ku horon zwa” la ka injakwagh; i dugh injakwagh ne sha kwagh u bua u i lu huren un kpa a lu taver ityough hendan a or u kôron gbough ku hôron zwa, ve a hingir u vihin iyol yô.—Aer 26:14; Mbaj 3:31.

• Gehena.

  Ka iti i ken zwa Grika i i yilan Pev u Hinom a mi yô. Pev ne lu gar u Yerusalem u tsuaa la vegher u ken imbusutariyan. (Yer 7:31) Yange i ôr kwaghôron u profeti sha ijiir ne ér ka shimi a haa ikyom i ior ye. (Yer 7:32; 19:6) Ikyav i môm kpa tese ér yange i kenden zendenya shin uumace ken Gehena uma sha u ve hia shin ve ya ican ga. Sha nahan yô, ijiir la ia fatyô u lun ikyav i tesen ér ma ijiir igen ngi i i nengen a mi ga, i uuma mba mbakpenev ve hian her ken usu u kpôô kpôô ne gbem sha won ga. Kpa Yesu man mbahenen nav yange ve ôr kwagh u Gehena ne sha injakwagh, u tesen ikyav i mtsaha u tsôron u “ku u sha uhar” la, ka mtim u tsôron shin u wuan ior sha u ve̱ de kera hiden lun uma ga gbem sha won.—Mp 20:14; Mt 5:22; 10:28.

• Gomna.

  Orvesen u yange nan hemen ma tiôntar u Iyouidyu i Vesen i tartor u Roma nengen sha mi yô. Yange nan lu a tahav mbu ôron ajir shi nan lu a ushoja sha ikyev, shi er yange i gba u Iyouidyu i Vesen la ia tôv sha akaa a nan eren la nahan kpa, nan lu a tahav kpishi sha tiôntar la.—Aer 13:7; 18:12.

H

• Hade.

  Ka ishember i ken zwa Grika i i yer ken zwa Heberu ér “Sheol” la. I gema ishember ne ér “Uwar” (ishangebaacaa i hiihii la ka i̱ vesen), sha u tesen ér ka ape i iin uumace mba ve kpen ne cii la.—Nenge UWAR.

• Heberu.

  Ka Aberam (Aberaham) yange i hii yilan un sha iti ne ye, sha u tesen mkposo na a Mbaamor mba ve wa ndor a na la. Iti ne va hingir iti i ônov mba Yakob, wan u wan u Aberaham, kua zwa u ve lamen la. Sha shighe u Yesu la, asember a ken zwa Aram kpishi hingir zwa Heberu, shi lu zwa u Kristu man mbahenen nav lamen yô.—Ge 14:13; Ek 5:3; Aer 26:14.

• Hereme.

  Ka iti i aôndo u Mbagrika, wan u Zuusu. Yange ior mba ken Lisetera yila Paulu sha lan ér, Hereme, sha u tesen ér ngu eren tom u ve nenge ér ka tom u aôndo shon u a ze mbaaôndo ityom shi a fa iliam kpishi ne la.—Aer 14:12.

• Herode.

  Iti i tsombortor u yange tartor u Roma ver u u lu hemen Mbayuda yô. Yange ior kpishi fa er lu Herode u Tamen la hide maa tempel u ken Yerusalem shi na zwa i wua mbayev sha u una nôngo a wua Yesu yô. (Mt 2:16; Lu 1:5) Yange i na ônov mba Herode u Tamen hemen sha avegher a tartor u ter ve. Ve yô lu Herode Arekilau man Herode Antipa. (Mt 2:22) Antipa yange lu tetera, u ior kpishi yilan ér “tor” la; ­yange hemen hen shighe u Kristu er tom u ­pasen kwagh shin tar anyom atar man tiôn la, zan zan sha shighe u i ôr kwagh na ken Aerenakaa ityough 12 la. (Mr 6:14-17; Lu 3:1, 19, 20; 13:31, 32; 23:6-15; Aer 4:27; 13:1) Shighe la karen yô, ortyom u Aôndo wua Herode Agripa u sha I, u lu wan u wan u Herode u Tamen la, zum u tema tor shighe kar kpuaa yô. (Aer 12:1-6, 18-23) Maa wan na, Herode Agripa II hingir tor, hemen zan zan sha shighe u Mbayuda mough u hendan kwagh a tartor u Roma la.—Aer 23:35; 25:13, 22-27; 26:1, 2, 19-32.

• Hisop.

  Ka imendenegh ki lun a agbaa a doon ashe kua ikya, ki yange i mishin awambe gayô mngerem a mi sha u wanger or shin kwagh, er atindi tese nahan. Alaghga lu ahu a i yer ér marjoram (Origanum maru; Origanum syriacum) la. Kwagh u i ôr ken Yohane 19:29 la tese ér alaghga lu ahu a marjoram yange i zom i kange sha gongor u imendenegh ki i yer ér durra, ki lu môm ken imendenev mbi i hembe yilan ér wua (Sorghum vulgare) la ye, sha ci u gongor u imendenegh kin yange una lihe a kuma u ­dughun soso shin wain u angen wan sha mi, zan Yesu a mi sha zwa.—Heb 9:19.

I

• Ibumun.

  Mkaanem ma or ka nana̱ bumun kwagh ve nan ôr ma sha u tesen ér ka kwagh u mimi yô, shin ityendezwa i or nan er a ishima i môm ér nana er ma kwagh shin nana er ma kwagh ga yô. Ashighe kpishi ka i lu ityendezwa i or nan er a or u nan hembe nan yô, hemban je yô a Aôndo. Yehova yange taver ikyuryan na a Aberaham sha ibumun.—Ge 14:22; Heb 6:16, 17.

• Iceghzwa.

  Ka ityendezwa i or er a Aôndo ér nana er ma kwagh, shin nana na ma iyua shin nagh, gayô nana er ma tom shin nana nyagh akaa agen, a nana er kpa a lu tindi u peren ga yô. Ngi a tahav er ka ibumun nahan.—Mt 5:33.

• Icighan; Icighanmlu.

  Ka ieren i Yehova a lu a mi i tesen mlu na kpôô kpôô yô; ka ieren man mlu u wang u mshi a lu sha mi ga yô. (Ek 28:36; 1Sa 2:2; Yh 17:11) Shighe u i lu ôron kwagh u uumace (Mr 6:20; Aer 3:21), man akaa (Ro 7:12; 11:16; 2Ti 3:15) kua ajiir (Mt 4:5; Aer 7:33; Heb 9:1), man ityom i eren (Ek 36:4) cii yô, ishember i ken zwa Heberu man i ken zwa Grika i i gem nahan la, inja na yô ér, ka mlu u kwagh u i pav i ver kposo, shin i tsegha sha ci u icighan Aôndo yô; ka mlu u kwagh u i ver kposo sha ci u tom u Yehova yô. Ken Ruamabera u Mbakristu u ken Zwa Grika la, ishember i i gem ér “icighan” man “icighanmlu” la ka i ôron kwagh u or lun wang sha ieren kpaa.—2Ko 7:1; 1Pe 1:15, 16.

• Icighanjiir.

  Ka ijiir i i tsegha sha ci u mcivir yô. Kpa ashighe kpishi ishember ne ka i ôron kwagh u tabernakel shin tempel u ken Yerusalem. Shi ka i yila ijiir i teman i Aôndo i sha la sha iti ne.—Ek 25:8, 9; 2Ut 10:25; 1Kr 28:10; Mp 11:19.

• Icighan jijingi.

  Tahav mbu Aôndo mbu ageegh mbu i nengen a mbu ga, mbu a eren tom a mi sha u kuren awashima na yô. Mbu icighan sha ci u mbu due ka hen Yehova, un u a lu wang shi a eren perapera sha gbenda u hemban cii la, shi ka sha mbu Aôndo ka a er uicighanmbaakaav ye.—Lu 1:35; Aer 1:8.

• Icighan Kpar.

  Ka kpar u tabernakel shin u tempel u masen sha hunda, u yange hemba kehen la; lu kposo a kpar u shin atô, u i yilan ér Icighan Kpar u Hemban Cii la. Ken tabernakel yô, Icighan Kpar la yange lu a daarimenger man atse a nanden insensi a sha zanaria, kua tebul u veren beredi u sha ishi, man mkam ma sha zanaria; ken tempel yô, Icighan Kpar ne lu a atse a nan nagh a sha zanaria man udaarmbaamenger mba sha zanaria pue, kua utebul pue mba veren beredi u sha ishi.—Ek 26:33; Heb 9:2.

• Icighan Kpar u Hemban Cii.

  Ruum u ken tabernakel man u ken tempel, u shin atô, ape yange i ver areki u ikyuryan la; i yilan un kpaa ér Icighan u Uicighan. Atindi a Mose tese ér, ka pristi u vesen tseegh yange i naan nan ian i nyôron ken Icighan Kpar u Hemban Cii la ye, shi yange nan nyôr ker hanma inyom kwa môm tseegh, sha Iyange i Nan Iwom.—Ek 26:33; Le 16:2, 17; 1Ut 6:16; Heb 9:3.

• Icighan kwaghmyer.

  Vegher u awashima u Aôndo, u a lu kwagh u un iyol na a soo u eren yô. Ka a yer un zan zan saa sha shighe u a ver la, shi a pase un hen mba a tsough u pasen ve la tseegh.—Mr 4:11; Kol 1:26.

• Icighantom.

  Ka tom u u lu icighan kwagh, u or nan lu eren sha u civir Aôndo yô.—Ro 12:1; Mp 7:15.

• Icôngo.

  Ka u huan kwav u sha ityough ki ilyeegh ki nomsoor ki yaven a or. Yange i wa tindi ér Aberaham man ônov nav cii ve̱ er nahan, kpa Mbakristu yô, gba u vea eren nahan keng ga. I er tom a ishember ne sha injakwagh sha igbenda kposo kposo ken Bibilo.—Ge 17:10; 1Ko 7:19; Fil 3:3.

• Idya.

  Ka ishember i ken zwa Grika i i yer ér ­porneia la. Hanma ieren i yaven a or sha tindi ga cii mba yer i sha ishemberti ne. Kwagh ne kua u nom shin kwase karen a ishima i nan yaven a orgen u nan vese nan ga yô, man gbaga u eren, man u yaven a kwase shin nomsoor u nan lu a er ivaa ga yô, man u nomsoor yaven a ugen, shin kwase yaven a ugen, kua u yaven a zendenya. I ter ishember ne ken Mpase sha injakwagh; ngi ôron kwagh u kwaghaôndo u a lu agbagakwase, i yer ér “Zegebabilon” la, sha u pasen er ka a lu vea mbahemenev mba tar ne kangenaa sha u keren tahav man inyaregh yô. (Mp 14:8; 17:2; 18:3; Ek 20:14; Mt 5:27, 32; 19:9; Aer 15:29; Ga 5:19)​—Nenge AGBAGA.

• Ieren i ndôhôrshima.

  Ka ishember i ken zwa Grika i i yer ér aselgeia la i gem i̱ nahan ye. Ngi ôron kwagh u akaa a or ka nan er ve i tese ér nan per atindi a Aôndo sha gbenda u vesen, shi i tese ér nan wa dang shin nan ongo kwagh sha won ga yô; ieren ne ka i tese ér or la nan nengen mbahemenev a ice sha ityou ga, shi nan nengen atindi ityôkyaa ga. Ishember ne ngi ôron kwagh u or nzughul ankwagh u cuku ga.—Ga 5:19; 2Pe 2:7.

• Iferor.

  Ka iti i i yilan Satan Diabolo a mi yô, un u a hendan kwagh a Aôndo kua atindi a na a ­perapera la.—Mt 6:13; 1Yh 5:19.

• Ifyan; Wa ifyan.

  U tan kume shin kaan ér kwagh a̱ tser or shin ma kwagh. Ishember ne ngi ôron kwagh u ilyahan shin tswam u eren ga. Ashighe kpishi ka a̱ kende a ôr kwagh shin a̱ tsenga ôron ér kwagh a tser or shin ma kwagh yô, i kaa ér ka ifyan. Shi ka a̱ lu Aôndo shin ma or u i ne nan ian nana̱ ôr kwagh nahan yô, i lu kwaghôron u profeti shi a lu a tahav.—Ge 12:3; Nu 22:12; Mr 11:21; Aer 23:12; Ro 12:14; Ga 3:10.

• Igbur.

  Teran u yange i penda or sha avande, i har ikyav sha mi keen man keen yô, gayô tiôn-kon shin bamber-kon u yange i har uzendenya uhar sha mon (hemban je yô ibua), ve urugh ma ikyagh ki tomough ki kahan kwagh shin ve kpelan ikyekye ve yemen a mi yô. Er ikpan yange i hemban tôôn ikyav mbi yuhwan sha agbur yô, i er tom a ishemberti i igbur ne sha injakwagh u ôron kwagh u or u nan lu ken kpan shin nan lu sha ikyev i or yô, man ieren i kighir or, kua ican i yan. Yange a̱ tôô shin a̱ tôndo or igbur kera yô, i tese ér or shon nan due ken kpan kera, kua ken mkighir, shi mba kera yan mtsera sha a nan ga.—Le 26:13; Mt 11:29, 30.

• Ihyungwa i shoghor wain.

  Ashighe kpishi yange i lu ahungwa ahar a i tim sha vande u awen a i eren semetu a mi, a i yer ér limestone la yô. I môm i lu hen ijiir i hemban taver a igen la; i time akpa, a mough ken ihungwa i môm a kar a asegh ken ihyungwa igen. Nahan a̱ nguren shoghor atam a wain shin ihyungwa i sha la yô, zar u duen u kuan u haan shin ihyungwan i shin. I ter ishember ne sha injakwagh sha u ôron kwagh u ijirôron i Aôndo.—Mp 19:15.

• Ihyungwa i Zan Kweng.

  Ishember i ken zwa Grika (abyssos) i i gem ér ihyungwa i zan kweng la, shi a fatyô u geman i kpaa ér ihyungwa i “zan a ikighir shio” shin “i i fe ikighir i i ga, shin i lun a ikighir ga.” I ter ishember ne ken Ruamabera u Mbakristu u ken Zwa Grika la sha injakwagh; ngi ôron kwagh u ijiir shin mlu u ken ­uikyangen. Ngi ôron kwagh u uwar, kpa ka uwar tseegh ga.—Lu 8:31; Ro 10:7; Mp 20:3.

• Ihyurenruamabera.

  Ka ruamabera u lihen u sha akôv a inyam shin sha papiru. Yange i nger kwagh sha mi vegher môm, i hure shin i kamber un sha ankon. Yange i nger mkaanem ma Ruamabera ken uihyurenmbaruamabera, shi i va tôô mkaanem mara i hide i nger ken uihyurenmbaruamabera mba hev. Lu inja takeda ne i hemban eren sha ayange a i ngeren Bibilo la ye.—Lu 4:17-20; 2Ti 4:13.

• Ihyurenruamabera u sha akôv a inyam.

  Ka ikyôvor ki iyôngov shin ki ivoov shin ki gumbua, ki yange i nger kwagh sha mi yô. Yange ki hemba tsan a papiru, nahan lu uihyurenmbaruamabera mbara i ngeren mkaanem ma Bibilo sha mi ye. A̱ shi nan kpa uihyurenmbaruamabera mba sha akôv a inyam, mba Paulu kaa a Timoteu ér a̱ va un a mi la, lu ityakeda igen ken Ruamabera u ken Zwa Heberu la. ­Uihyurenmbaruamabera mbagenev mba yange i zua a mi ikyua a Zegemnger u Kuugh la kpa lu mba sha akôv a inyam.—2Ti 4:13.

• Ijimba.—

  Nenge IDYA

• Ijungwen.

  Kwagh u or ka nan eren shighe u nan lu zungwen ku shin ma kwagh u vihin yô. Sha ayange a i ngeren Bibilo la, i zungwen kwagh shighe naleghaa. Dugh mliam ma vaan genger genger kera yô, mbazungwen shi yange ve hua akondo a lu inja kposo, ve haa mtwem sha ityou, ve ande akondo a ve, shi ve taan ave sha vanger. Ashighe agen yange i lôhô mba ve fe u zungwen kwagh tsembelee yô, ve va vaa ku.—Es 4:3; Mt 11:17; Mr 5:38; Yh 11:33; Mp 21:4.

• Ikpaakôvough.

  Ikpa i haan zar kwagh ker i yange i er sha ikyôvor ki inyamegh jimin, er ki ivo shin ki iyôngo nahan, i haan wain ker yô. ­Yange i haa wain ken akpaakôvough a he, sha ci u yange wain una angen a seer yô, a mor ahumbe ken akpa ne dông. Akpaakôvough a he ka a nalegh; a tse, aa kera fetyô u nalegh ga la, wain ka una moron ahumbe ker yô, a pav.—Yos 9:4; Mt 9:17.

• Ikpenberedi i sha ishi.

  Lu ikpenberedi puekarihiar i yange i penda i atihi ahar yô. Hanma tihi yange a lu ikpenberedi ataratar; i penda sha tabul ken Icighan Kpar, ken tabenakel, man ken tempel. Shi yange i yila ér “beredi u pendan a penda” man “beredi u sha ishi.” Lu nagh ku i naan Aôndo yô. Yange i musan ikpenberedi ne sha hanma Iyange i Memen, i va a i he. Lu upristi tseegh yaan ­ikpenberedi i i tôô kera la ye.—2Kr 2:4; Ek 25:30; Le 24:5-9; Mt 12:4; Heb 9:2.

• Ikyav.

  Ka anar shin ieren shin mlu, shin kwagh u kpilighyol u i er, a lu a inja sha u tesen ma kwagh ugen her ave ave, shin ken hemen yô.—Mt 24:3; Mp 1:1.

• Ikyekyeutya.

  Ikyekye i lun akaver ahar, i anyinya kpelan yô. Yange i zaan zende a mi, kua ityav kpaa.—Ek 14:23; Mbaj 4:13; Aer 8:28; Mp 9:9.

• Ikyomon.

  Mbaahungwa mba ka ve lu kpishi, ve yemen kuukuku yô. Atindi a Mose yange tese ér mba wang, a fatyô u yan ve. Mba ka ve yemen kuukuku ve yaan hanma kwagh cii, ve vihi akaa je hundu u sen la, i yila ve ér kwagh u van a ican.—Ek 10:14; Mt 3:4.

• Ikyondo i huan zungwen.

  Ikyondo i lun cusa cusa i ka i er aba shin akpa a mi, er a i haan ishamakaa ker la nahan. Yange i hemban tumen i̱ sha aive a ivo a il; lu ikyondo i huan zungwen kwagh a mi.—Ge 37:34; Lu 10:13.

• Ikyondo i yisan.

  Ikyondo i yange i tume i doo ashe tsung, i tume ucerubi sha mi yô. Yange i ta i̱ ken tabernakel, shi i va ta i̱ ken tempel, i̱ pav Icighan Kpar a Icighan Kpar u Hemban Cii.—Ek 26:31; 2Kr 3:14; Mt 27:51; Heb 9:3.

• Ikyônough ki ijirigh.

  Yange i nôngo u lun tsembe u taven u i maa ken won, i maa angahar a unden shi hungwan yô. Ka sha her mbahemenev mba gomoti yange ve tema ve lam a ­ikpelaior shi ve yôô kwagh u ve soo ér i er ye. Ishember i “ikyônough ki ijirigh ki Aôndo” man i “ikyônough ki ijirigh ki Kristu” la ka asember a sha injakwagh, nga tesen ijir i Yehova a ver ishima u va ôron uumace la.—Ro 14:10; 2Ko 5:10; Yh 19:13.

• Ikyuryan.

  Ka ityendezwa shin iceghzwa i Aôndo yange a er a or shin ior, shin i ior ve er ayol a ve ér vea er ma kwagh shin vea kera er ma kwagh ga yô. Ashighe agen yange i lu or môm tseegh i gba u nana er kwagh u i kaa la ye (ikyur i ka i lu or môm tseegh nan kure i̱ yô; yange i hemba lun ityendezwa). Ashighe agen di yô, i gba u iorov mba uhar mba ve ye ikyur la cii vea er kwagh u i kaa la (ikyur i ka i lu iorov mba uhar mbara cii ve kure i̱ yô). Dugh uikyur mba Aôndo yange ya a uumace la sha yô, Bibilo shi ôr kwagh u uikyur mba yange ior ya vea ior mbagenev shin uipyaven mbagen ya vea mbagen, shin akuraior agen ya vea agen, shin iniongoior igen ya vea igen yô. Uikyuryan mba ve lu a inja kpishi yô, ka uikyur mba Aôndo yange ya a Aberaham man Davidi man tar u Iserael (Ikyuryan i Atindi) kua Iserael u Aôndo (ikyuryan i he) la.—Ge 9:11; 15:18; 21:27; Ek 24:7; 2Kr 21:7; Lu 22:29; Aer 3:25; 2Ko 3:6; Heb 8:6.

• Ilirikum.

  Ka tiôntar u Mbaroma ugen u lu tar u Grika vegher u ken imbusutarimese yô. Paulu yange er tom na u pasen kwagh la zan zan za ar hen ijiir ne, kpa yange una pase kwagh hen Ilirikum shin una ar di a ar her tseegh kpa, i ôr ga.—Ro 15:19.

• Imande; Orimande.

  Angev mbu sha kwav­yolough mbu vihin tsung. Ka a̱ ôron kwagh u imande ken Ruamabera yô, i lu di kwagh u angev mbu se fe i yilan mbu nyian sha iti ne la tsô ga, sha ci u yange lu uumace tseegh mbu kôron ve ga, akondo man ayou kpa yange mbu lu sha mi. Ka i yila or u nan gbe imande ér, orimande.—Le 14:54; Lu 5:12.

• Iniongo i Beredi u I We Kwa sha Mi Ga.

  Ka iniongo i hiihii ken uiniongo mba vesen mba utar, mba Mbaiserael eren kwa môm hanma inyom yô. Yange i er iniongo ne ken uwer u ­Nisan, i hii sha werayange 15, zum u iyange i Paseka i̱ bee kera yô, i za hemen a mi zan zan ayange ataankarahar. Lu beredi u i we kwa sha mi ga tseegh i yaan ye, sha u umbur shighe u ve due ken Igipiti kera la.—Ek 23:15; Mr 14:1.

• Iniongo i Utabernakel.

  Shi yange i yila i̱ ér Iniongo i Atumbe, shin Iniongo i Kohol Iyiav. Yange i er iniongo ne ken uwer u Mbaheberu u i yilan ér Etanim la, sha werayange 15 zan zan 21. Lu iniongo i Mbaiserael eren sha u ember shighe u ve sunda iyiav ve bee ken inyom yô, shi lu shighe u ember shi sughun Yehova er a ne iyiav vev mbi doo yô. Ken ayange a iniongo la cii, ior ve tsaan ken atumbe, shin ken ayou a mcimbi, sha u umbur ve shighe u ve due ken Igipiti kera la. Lu môm ken uiniongo mba utar mba yange i gba u nomso vea za ken Yerusalem vea za er yô.—Le 23:34; Ese 3:4; Yh 7:2.

• Iniongo i Wanger Tempel.

  Iyange i ngise i umbur i̱ ken inyom kwa môm sha u wanger tempel, zum u Antiochus Epiphanes va hôngor a mi kera yô. Yange i eren iniongo ne ken uwer u Kiselev, i hii sha werayange 25, i er i̱ ayange anigheni.—Yh 10:22.

• Injakwagh.

  Ka kwaghôron u sha mkav shin kwaghôron u tiônôô u lun a ityesen ker gayô u pasen mimi u zan shimi sha asember kpuaa. Ashighe agen injakwagh i ken Bibilo ka i lu a akaaôron a cimin, shin a lun er ka kikya nahan. Injakwagh ka i pase mimi u kwagh gbar gbar, ashighe kpishi i lu sha u tôôn kwagh ugen tesen ikyav a mi. Anzaakaa agen hingir akaaôron a ior kpishi ve ôron sha u lahan mbagenev shin nahan ve tar yô.—Orpa 12:9; 2Pe 2:22.

• Insensi.

  Ka ihuma i dedoo i ka i duen, zum u i nungwa tsur u akaa a human doon sha balsam, i nande ve lu hian kure kure la. Yange i eren insensi ugen sha ci u eren tom a mi ken tabernakel kua ken tempel tseegh; i er insensi ne sha akaa a human doon atô anyiin. Yange i nande un pepe man tugh sha atse a nanden insensi a ken Icighan Kpar u mase sha hunda la; yange a̱ lu sha Iyange i Nan Iwom yô, i nande un ken Icighan Kpar u Hemban Cii la. Lu ikyav i mbamsen mba mbacivir Aôndo mba jighjigh mba i ongo ve la. Yange gba u Mbakristu vea nanden insensi ga.—Ek 30:34, 35; Le 16:13; Mp 5:8.

• Iserael.

  Ka iti i Aôndo yange na Yakob yô. Yange i va gema yilan mba ve due ken tsombor na la jimin cii sha iti ne sha ikyov ikyov. Ashighe kpishi yange i yila ior mba ve due ken ônov mba Yakob mba 12 mbara ér ônov mba Iserael, shin ya u Iserael, shin nongoior u (ior i) Iserael, shin Mbaiserael. Shi i va gema yilan ­uipyaven mba pue mba tartor u Iserael u ken imbusutarimese, u yange u pav u lu kposo a tartor u Iserael u ken imbusutariyan la kpa sha iti ne. Ken masejime yô, Mbakristu mba i tsegha ve, ve lu “Iserael u Aôndo” la kpa i gema yilan ve sha iti ne.—Ga 6:16; Ge 32:28; Aer 4:10; Ro 9:6.

• Ishan i pepe.—

  Nenge ISHAN I SHA USE.

• Ishan i sha use.

  Ishember ne ngi kwaghmôm a “ishan i pepe.” Ka ishan i ka i mase duen ­vegher u sha ityoughkitaregh maa iyange i due la; ishan ne ka i tese ér sev mbugenev mbu sôôn aven.—Mp 22:16; 2Pe 1:19.

• Ishiva.

  Ka ikyaren i iniembe i kwagh, i lihen kuman er hii sha inyuwe va kighir sha zwa u ihyôwe i hen atô la nahan. Ishiva i yange Mbaiserael karen kwagh a mi la lihe kuma er usentimita 44.5 (uinci 17.5) nahan, kpa shi ­yange ve ­karen kwagh a ishiva i i lihe hemba i ngira sha igbanger i ikyevwe i môm yô; i ingin lihe kuma er usentimita 51.8 (uinci 20.4) ­nahan.

• Ishor; Er ishor.

  Ako-awen shin ako a ikyon shin anwenev mba ndahar mba yange ve wase u tsuan kwagh yô. Yange i zom ako ne i kange ken ikyondo shin i haa a shin tasa, maa i tsongor. Nahan ikyo i i due i gbe, shin i̱ i ze uwegh i dugh la cii yô, ka kwagh u i tsough je la. Ashighe kpishi yange i er msen cii i er kwagh ne ye.—Mt 27:35; Aer 1:26.

• Ityôgh; Mtôm.

  Kwagh u i maa un a lu nelôô, shin i maa un gbilititi a tav sha lôngôô, a sue imaagh yô, shin ma kwagh u a lu lôngôô nahan cii. Yange i wa mtôm sha imaagh ki tempel kua ayou a ken ya u tor, a Solomon maa la. Ka a̱ ôron kwagh u ishember ne sha injakwagh ken Ruamabera u Mbakristu u ken Zwa Grika la yô, i ôron i lu kwagh u a sue kwagh ugen (1Ti 3:15), shin ian i or nan lu sha mi gbekeke (Mp 3:12) yô.—Mbaj 16:29; 1Ut 7:21.

• Iwen i sha zongough ku iyoughough.

  Ka iwen i ka i penda hen zongough ku imaagh, ape ukpekpe uhar ve zough yô; ngi hange hange sha ci u ka i ka i kôr ukpekpe mbauhar mbara ve tile ye. Iwen i hange hange i sha ­zongough ku imaagh luun iwen i sha zongough ku imaagh ki i we yô. Yange a̱ maan ayou a ior vea kohol ker shin ukpekpe mba agar yô, i lu iwen i i taver iyol tsung la i penda sha zongough ku imaagh kira ye. I er tom a ishember ne sha injakwagh, u ôron kwagh u shighe u i hii u gban tar la, shi i ôr kwagh u Yesu ér ka “iwen i sha zongough ku imaagh” ki tiônnongo u Kristu, u i tôô i kar sha iyou i ken jijingi la.—Ef 2:20; Yob 38:6.

• Iyange i Ijirigh.

  Ka iyange i Aôndo ka a ver jighilii shin shighe u ka a ver ér una ôr iniongoior shin akuraior shin uumace jimin cii ijir yô. A fatyô u lun shighe u timin mba i ôr ve ijir i nenge ér ve kuma ku yô, shin shighe u ijir shon i bugh gbenda sha u i̱ yima mbagenev ve̱ zua a uma u tsôron yô. Yesu Kristu man mbaapostoli nav yange ve ôr kwagh u “Iyange i Ijirigh” i i lu van la ér a lu mbaumav tseegh a ôr ve ijir ga, kpa a kua mba ve kpe ica i gbe la kpaa.—Mt 12:36.

• Iyange i Kohol Iyol.

  Iti i i yilan sev mbu yange mbua been maa i nyôr ken Iyange i Memen la. Mbayuda yange ve wa iyol sha akaa a hange hange, sha iyange ne. Sev mbun yange mbu bee sha iyange i nyian i yilan ér Tomataan la, shighe u iyange i mire yô, maa Iyange i̱ Memen i̱ hii. Sev mbu Mbayuda yange mbu hii nyian aikighe mbu bee kper aikighe.—Mr 15:42; Lu 23:54.

• Iyange i Memen.

  Inja i ishember i ken zwa Heberu i i gem i nahan ne ér, “u memen; u kera eren kwagh ga.” Ka iyange i sha utaankaruhar ken kasua u Mbayuda (yange i̱ hii sha iyange i Tomataan aikighe i̱ va kure sha iyange i Sati ­aikighe). Ayange agen a yange i ver a sha u eren uiniongo ken inyom la kpa i yilan a ér ayange a memen, shi i yilan inyom i sha 7 man i sha 50 ér anyom a memen. Sha Iyange i Memen cii, yange i gba u a er ma tom ugen ga, saa tom u upristi eren ken icighanjiir la tseegh. Ken anyom a Memen la di, yange i gba u a kera kaha ma kwagh ga, shi Mbaheberu ve kera kighir mbagenev ken a ve mba ve lu ve a anzô la ér ve̱ kimbi ve a ga. Ken Atindi a Mose la, akaa a yange i tswer ior u eren sha Iyange i ­Memen la lu akuma a kuma, kpa mbahemenev mba kwaghaôndo seer akaa agen sha mi kure kure, nahan sha ayange a Yesu la, akaa la taver ior u eren.—Ek 20:8; Le 25:4; Lu 13:14-16; Kol 2:16.

• Iyange i Nan Iwom.

  Icighan iyange i vesen sha ci u Mbaiserael, i yilan kpaa ér Yom Kippur (ishember i ken zwa Heberu i i yer ér yohm hakkippurim, “iyange i cirin akaa” la). Icighan iyange ne yange i gba ken uwer u Etanim, sha werayange 10. Ken Ruamabera u ken Zwa Heberu yô, mba yer ér Iyange i Nan Iwom. Ken inyom jimin cii yange i lu sha iyange ne tseegh pristi u vesen a nyôr ken Icighan Kpar u Hemban Cii ken tabernakel ye, ken masejime va lu u ken tempel la. Yange a nyôr a za na nagh sha awambe a ilev mbi i ne nagh a mi la, sha ci u asorabo a na man asorabo a Mbalevi mbagenev kua asorabo a ior cii. Iniav mbira cii lu tesen kwagh u nagh ku Yesu, ku ku wam Aôndo sha ci u asorabo a uumace cica cii kwa môm, maa hanma kwagh a kure la. Kwagh ne na ior cii mba a ian i himen a Yehova. Yange i er icighan mkohol hen shighe ne, shi i hôr kwaghyan, shi lu iyange i memen, shighe u hôron tom.—Le 23:27, 28; Aer 27:9; Kol 1:20; Heb 9:12.

• Iyelegh.

  Ka iti i i yilan imendenev kpishi mbi mbi hembe menden shin kpe jande yô. Ashighe kpishi ka a̱ ôron kwagh u imendenev kin yô, i hemba veren ishigh sha ayegh a lun er like shin wua nahan (Arundo donax).—Mt 27:29; Mp 11:1.

• Iyiagh ki i hii sundan yô.

  Iyiagh ki ki via tsuaa, i hii sundan ki sha shighe u sunda yô; ka akaa a a hii duen shin a i hii zuan a mi ken ma kwagh yô. Yehova yange wa Mbaiserael tindi ér ve naan un hanma kwagh u ve hii zuan a mi ken tom ve cii, aluer ka orumace shin zendenya shin iyiav mbi ve sunda ken ishule kpaa. Ikyurior i Iserael jimin cii yange i na Aôndo akaa a i hii sundan la sha shighe u Iniongo i Beredi u I We Kwa sha Mi Ga la man sha iyange i Penti­kôsti. Shi yange i yila Kristu sha injakwagh ér “Iyiagh ki i hii sundan” yô, kua mbadondon un mba i shigh ve mkurem la.—1Ko 15:23; Nu 15:21; Anz 3:9; Mp 14:4.

J

• Jijingi.

  Ishember i ken zwa Heberu i i yer ér ruach, ken zwa Grika di i yer ér pneuma, i ashighe kpishi ka i gema i ér “jijingi” la, ka i ôron kwagh u akaa kposo kposo. Man akaa shon cii ka i lu akaa a uumace ve nengen a mi sha ashe ga, shi a tese ér tahav mbu eren kwagh yô. Ka i ter ishemberti i ken zwa Heberu man i ken zwa Grika ne zum u i lu ôron kwagh u (1) ahumbe, (2) tahav mbu uma mbu mbu eren tom ken akaa­uma a shin tar la, (3) tahav mbu ka mbu kende or ken ishima ve nan ôr kwagh shin nan er kwagh sha ma gbenda yô, (4) akaaôron a or u i nengen a nan sha ashe ga, a i mgbe­gha orumace nan ôr yô, (5) ior mba ken jijingi, man (6) tahav mbu Aôndo a eren tom a mi la, shin icighan jijingi.—Ek 35:21; Ps 104:29; Mt 12:43; Lu 11:13.

K

• Kasua u saven.

  Ken Ruamabera u Mbakristu u ken Zwa Grika yô, ishember ne ngi ôron kwagh u kpandegh ku ior asange asange ve te sha ci u ma or yô.—Ps 51:3; Ro 5:14.

• Kon.

  Ka ityôgh ki nelôô ki yange i tim sha, i mande or sha mi yô. Ken ityar igen yô, yange i mande or sha ityôgh kin shin i hambe ikyom i or u nan kpe la sha ityôgh kin sha u i lu icintan hen mbagenev, shin sha u heen nan ken igbar. Yange i fa Mbaashiria ér ka ior mba nôngon ityav sha ipila tsung. Yange vea hemba ior ityav yô, ve mande ve sha ikyon i horon ijô; ve tumba or kon la hen uya i kar i due sha vanger, maa ve gema kon la ve tim sha, a ikyom i nan sha mi. Nahan kpa, sha atindi a Mbayuda yô, yange or a̱ er kwaghbo u vihin tsung, er u lahan Aôndo shin civir ieev nahan yô, i vande tan nan awen i wua gayô i wua nan sha ma gbenda ugen cii, i mase hamben ikyom i nan sha kon ye, sha u i lu icintan hen mbagenev. (Dut 21:22, 23; 2Sa 21:6, 9) Mbaroma yô, ashighe agen yange ve gba kangen imba or la ken kon tsô, nan lu nahan ayange imôngo, gbem nan va mase kpen sha ci u mnyoon man imura man ijen kua oo. Ashighe agen yô, yange i mande or u i nenge ér nan er kwaghbo la ave man angahar sha kon, er yange i mande Yesu nahan. (Lu 24:20; Yh 19:14-16; 20:25; Aer 2:23, 36)​—Nenge KON U MANDEN OR SHA MI.

• Kon u manden or sha mi.

  Ka ishember i ken zwa Grika i i yer ér stauros la i gem i̱ nahan ye, inja i ishember shon ér, ityôgh ki nelôô ki i tim sha yô, imba i yange i mande Yesu sha mi la. Ikyav i môm tsô tese ér inja i ishember i ken zwa ­Grika ne ka terankon (kon u i tôô ugen i peregh sha mi), imba i mbafan Aôndo ga yange ve ­civir akombo a mi anyom uderi imôngo cii man shighe u Kristu la ga. Ishember i “kon u manden or sha mi” la hemba pasen kwagh u ishember i ken zwa Grika ne i lu ôron la jighilii, ­gadia yange i ter ishember i stauros la sha kwagh u mtev u sha ican man ican i yan kua ihyeen i mbadondon Yesu vea ­tagher a mi yô. (Mt 16:24; Heb 12:2)—Nenge KON.

• Kon u uma.

  Ka kon ugen ken sule u Eden. Bibilo tese ér kon ne yange u lu a akaa a wasen or u lun uma ken ityamegh ki u ga; kpa u tile sha ityough ki ibumun i Aôndo a er sha u or a zua a uma u tsôron u una na mba i lumun ve u yan ityamegh ki u la. I ter ishember ne sha injakwagh ken takeda u Mpase u tesen kwagh u Aôndo a er sha ci u ior ve̱ za hemen u lun uma yô.—Ge 2:9; 3:22; Mp 2:7; 22:19.

• Kon u Yuan.

  Ka ikyon i taver iyol atô kposo kposo, i yange i yua tsung kpa i gema i huma i doo kpishi yô. “Kon u yuan” u i er kwagh u u ken Mpase 8:11 la ngu tesen ikyav i megh ku yuan ku i yer ken zwa Buter ér absinthe la.

• Koor.

  Ka ikyaren i ishamakaa man zar kwagh. Ngi kwaghmôm a ulita 220 (ugalon 58.1), er i nenge ér ikyaren i bati ngi la.—1Ut 5:11; Lu 16:7, ngeren u shin kpe.

• Korough.

  Ka akor a annyamev; yange i maan kwagh shimi, shin i haan akaa agen kimi, er mkurem shin inki shin akaa a eren hwe u sha iyol nahan, shi i tôngon shin i yôôn kwagh a mi. (1Sa 16:1, 13; 1Ut 1:39; Esek 9:2) Ashighe kpishi yange i ôr kwagh u “korough” sha injakwagh sha u tesen agee, man mhembe, shin ityav mbi hemban.—Dut 33:17; Mik 4:13; Lu 1:69.

• Kristu.

  Ka ititom i Yesu. I zua a i ken ishember i ken zwa Grika i i yer ér Khristos la. Ngi kwaghmôm a ishember i ken zwa Heberu i i gem ér “Mesiya” shin “Un U i Tsough La.”—Mt 1:16; Yh 1:41.

• Kuur u hen ijiir i nan nagh ku wamen.

  Ka kuur u areki u ikyuryan, ape yange pristi u vesen a za mishi awambe a iniav mbi isholibo sha Iyange i Nan Iwom yô. Ka ishember i ken zwa Heberu i̱ pasen ieren i gem i̱ nahan ye, man inja na yô ér, “u cirin (isholibo),” shin a fatyô u kaan ér, “u esen (isholibo) kera.” Yange i er un sha zanaria u taver, ucerubi uhar lu sha mi, u môm keen ugen keen. Yange i yila ashighe agen zevera ér “kuur.”—Ek 25:17-22; 1Kr 28:11; Heb 9:5.

• Kwaghôron u profeti.

  Ka loho u Aôndo a ­mgbegha or nan ôr yô, a̱ lu u pasen awashima u Aôndo shin u yôôn awashima na kpaa. Kwaghôron u profeti a fatyô u lun ityesen i sha kwagh u aeren a wang, i Aôndo a mgbegha or nan tese yô, shin ma tindi u Aôndo a we shin ijirôron na, gayô u yôôn kwagh u una va er yô.—Mt 13:14; 2Pe 1:20, 21.

• Kwagh u veren ikyav.

  Yange i cagh ikyav a mi (hemban je yô, sha inyatyuu shin sha ma kwagh u tiher er tsugh nahan). Yange a tese or u kwagh, shin a tese ér ma kwagh ka u injaa shin u mimi, shin i er iceghzwa sha kwagh, shi a yange or u nzughul a ngeren shin akaa agen a i cagh ikyav sha mi yô, er ihinda shin iwar i mbakpenev nahan. Yange i eren akav a sha ayange a ngise la sha akaa a taver iyol gbang gbang (er iwen shin anyi a nortar shin kon nahan), i kômbo asangaabaacaa shin ikyav i̱ kwagh sha mi, sha gbenda u a cagh ve a due er i soo la yô. Ka i er tom a ikyav sha injakwagh sha u tesen kwagh u i nenge ér ka u mimi yô, shin sha u tesen ér kwagh ka u or, shin ka kwagh u i cir un shin a lu kwaghmyer yô.—Mt 27:66; Yh 6:27; Ef 1:13; Mp 5:1; 9:4.

• Kwaghyan u hôron.

  U kera yan ma kwaghyan môm ga sha anshighe kpuaa. Mbaiserael yange ve hôr kwaghyan sha Iyange i Nan Iwom, man sha ashighe a ican, kua shighe u ve lu keren kwaghwan u Aôndo yô. Mbayuda yange ve ver ashighe anyiin ken inyom a hôron kwaghyan, sha u umbur akaa a vihin a yange er ve sha ayange a ken ijime yô. Gba u Mbakristu vea hôron kwaghyan keng ga.—Ese 8:21; Yes 58:6; Mt 4:2; 9:14; Lu 18:12; Aer 13:2, 3; 27:9.

• Kwaghyan u Ter u Aikighe.

  Ka kwaghyan kpôô kpôô, beredi u i we kwa sha mi ga yô, kua wain; ka ku-umbur u Yesu. Beredi la tile sha ityough ki iyol i Kristu, wain la di tile sha ityough ki awambe a na. Er Ruamabera a kaa ér Mbakristu ve eren kwagh ne gbem yô, shi mba yer kpaa ér “Ku-umbur.”—1Ko 11:20, 23-26.

• Kwa.

  Ka kwagh u ka i wa sha mwem ma hôron shin sha zar kwagh sha u ve̱ ange yô. Kwa shon ne ka i hemba lun ijen i mwem ma hôron ma i vande angen ma kera yô. Ashighe kpishi ka a̱ ter ishember ne ken Bibilo yô, i lu ikyav i isholibo man mvihi, shi i er tom a ishember ne sha kwagh u mvese u ior ve nenge a mi ga, shin a lu myer yô.—Ek 12:20; Mt 13:33; Ga 5:9.

L

• Lepton.

  Sha ayange a i ngeren Ruamabera u Mbakristu u ken Zwa Grika la, lu gbenger togula shin iyôgh ki i yer ér bronze la. Yange hemba ndahar ken sam­inyar u Mbayuda cii. I gema iti ne ken Ubibilo mbagenev ér “mite.”—Mr 12:42; Lu 21:2; ngeren mba shin kpe.

• Levi; Orlevi.

  Wan u Yakob u sha utar, u mar a kwase na Lea yô; shi ka ipyaven i i yilan sha iti na yô. Lu sha ônov nav mba nomso mba utar ikwe i vesen i itiar i Mbalevi la hii ye. Ashighe agen ka a ter ishember i “Mbalevi” la yô, i lu kwagh u ipyaven la jimin cii i ôron ye, kpa mba we tsombor u Aron u yange u lu tsombor u pristi la ker ga. Yange i pav Tar u Ityendezwa la ker, kpa i na ipyaven i Levi haregh ve ikyangegh ga, i gema i na mba ken ipyaven shon agar 48 ken uharegh mba uipyaven mbagenev mbara ér ve tema ken a.—Dut 10:8; 1Kr 6:1; Heb 7:11.

• Loho u dedoo.

  Ken Ruamabera u Mbakristu u ken Zwa Grika la, ka loho u dedoo u Tartor u Aôndo man u myom u̱ i zuan a mi sha u nan Yesu Kristu jighjigh yô.—Lu 4:18, 43; Aer 5:42; Mp 14:6.

M

• Mai.

  Ikyaren i mgbeca. I ter ishember ne kwa môm tseegh ken Ruamabera u Mbakristu u ken Zwa Grika u yange i hii ngeren la, ken ­Mateu 5:41, man a̱ shi nan kpa lu mai u Mbaroma u yange a lu umita 1,479.5 (angahar 4,854) la. I nger ishember i “mai” ne ajiir agen atar, ka ken Luka 24:13 man Yohane 6:19 kua Yohane 11:18. Ajiir ne nga ôron ka kwagh u umai mba i kar ilihen ve sha iniembe i usitediom mba ngise, mba i ter ken ruamabera shon u yange i hii ngeren la.

• Mana.

  Kwaghyan u Mbaiserael hemban yan shighe u ve lu ken taaikyôngo anyom 40 la. Ka Yehova yange naan ve un ye. Yange a due hanma iyange pepe sha ivande a haa hen inya, avure a cir sha mi; lu sha Iyange i Memen tseegh haan ga ye. Zum u Mbaiserael hii nengen a mi la, ve pine ér, “Ka nyi ne?” shin ve pine ken zwa Heberu ér, “man huʼ?” (Ek 16:13-15, 35) Yesu kpa yange ôr kwagh ter mana sha injakwagh.—Yh 6:49, 50.

• Masedonia.

  Haregh u a lu tar u Grika vegher u sha ityoughkitaregh la. Haregh ne yange za iti sha shighe u Alekezanda u Tamen lu tor la, shi haregh shon lu sha tseeneke na zan zan Mbaroma va kar ngohol un. Masedonia lu tiôntar u ken tartor u Roma sha shighe u apostoli Paulu za ken Yuropa sha kwa u hiihii la. Paulu yange za hen haregh ne kwa tar.—Aer 16:9.

• Mbafarishi.

  Annongo u kwaghaôndo u Mbayuda u yange za iti sha ayange a mbaapostoli la yô. Mba yange ve lu ker la due ken tsombor u upris­ti ga, kpa ve gema ve kuran Atindi kpete kpete, kua a kiriki kpaa cica cii, shi aeren a uter kpa ve tôô a gede gede er ka atindi nahan. (Mt 23:23) Yange ve hendan a hanma ­ieren i Mbagrika cii, shi er ve lu mba fan Atindi kua aeren a uter yô, ve lu a tahav kpishi sha ior. (Mt 23:2-6) Mbagenev ken a ve shi lu ken Sanhederin. Yange ve zer hendan a Yesu sha kwagh u kuran Iyange i Memen, man aeren a uter, kua sha kwagh u lun vea mbaasorabo man mbangoholkpandegh la. Yange mbagenev ken a ve va hingir Mbakristu, kua Paulu u ken Tarsu kpaa.—Mt 9:11; 12:14; Mr 7:5; Lu 6:2; Aer 26:5.

• Mbahemen gar.

  Ken ityar i yange i lu sha ikyev i tartor u Roma la, mbahemen gar mban lu mbatomov mba gomoti. Tom ve lu u nengen ér ior mba eren kwagh sha tindi, man u nengen sha inyar man u ôron mba ve per atindi la ijir, man u nan wada ér i tsaha or.—Aer 16:20.

• Mbakaldi.

  Ka ior mba ve tem hen ningir­tar u ifi u Tigiri man u Yuferati ve te agbaa her la. Sha ayange a tsuaa la, gar u hemban cii ken tar u Mbakaldi lu Ur, ape ya u Aberaham lu la.—Aer 7:4.

• Mbakuran Shisar.

  Kwe shojaa u Mbaroma u yange i ver u u kuran tor u tartor u Roma yô. Mbakuran tor mban yange ve va hingir mbapatii mba lun a tahav mbu suen ma tor u tartor la shin ngohol nan tahav.—Fil 1:13.

• Mbamede.

  Nongoior u u due ken tsombor u Madai, wan u Yafeti yô; yange ve tema hen tar u iwoo u Iran, u u va hingir tar u Media la. Mbamede mbagenev lu ken Yerusalem hen shighe u Pentikôsti u ken inyom i 33 la.—Aer 2:9.

• Mbapatii mba Herode.

  I yilan ve kpaa ér Mbaherode. Lu kwe u mbapatii mba keren tseeneke u tar ve, mba ve lu suen awashima u Uherode mba ve hemen sha ikyev i Mbaroma la. A̱ shi nan kpa Mbasadushi mbagenev lu ken kwe patii ne. Mbaherode mban yange ve ­kohol Mbafarishi ve lu hendan kwagh a Yesu.—Mr 3:6.

• Mbasadushi.

  Annongo u kwaghaôndo u Mbayuda u yange za iti kpishi yô. Mbanyarev mba duen ati man upristi mba ve lu a tahav kpishi sha akaa a i eren ken tempel la lu ken annongo ne. Yange ve venda aeren a uter kpishi a Mbafarishi dondon la, kua atesen a Mbafarishi agen. Ve na jighjigh ér mnder u shin ku ngu ga, shi mbatyomov mba ga. Yange ve hendan a Yesu.—Mt 16:1; Aer 23:8.

• Mbasamaria.

  Sha hiihii la, i yilan Mbaiserael mba ken uipyaven mba pue mba tartor u Iserael u ken imbusutarimese la sha iti ne, kpa zum u Mbaashiria va hemba Samaria ityav shighe u shi anyom 740 u a mar Yesu la, i gema yilan mba ken ityar igen, mba Mbaashiria za haa ve hen gar ne la kpaa, sha iti ne. Sha ayange a Yesu la, i kera yilan tartor la shin ior mba ve lu hen haregh ne la sha iti ne ga, kpa a teren i yô, ashighe kpishi i ôron i lu kwagh u mba ken annongo u kwaghaôndo u yange i eren hen ikyasen i ngise lu Shekem man Samaria la. Mba ken annongo ne yange ve lu a atesen a a kaha kposo a atesen a kwaghaôndo u Mbayuda yô.—Yh 8:48.

• Mbatimen sha mfe u taregh mba ken nongo u Epikuria.

  Ka ior mba yange ve dondon Orgrika u timen sha mfe u taregh u i yilan un ér Epicurus [u i mar un ken inyom i 341 va kpe ken inyom i 270 Cii man Shighe u Yesu (C.S.Y.) la]. Mfe ve ne yange har sha mhen u ve lu a mi ér kwagh u vesen ken akaa a or nan keren ken uma u nan cii yô ka u i saan nan iyol la.—Aer 17:18.

• Mbatimen sha mfe u taregh mba ken nongo u Setoika.

  Ka makeranta u Mbagrika mba timen sha mfe u taregh, mba yange ve na jighjigh ér, msaanyol har sha u or gbidyen kwar sha kwagh shi eren kwagh sha gbaaôndo yô. Yange ve tôô ér, or u fan kwagh kpôô kpôô ka or u nan lu yan ican shin nan lu ken mkpeyol kpa nan we ikyo ga yô.—Aer 17:18.

• Mbatyomov.

  Ka ishember i ken zwa Heberu i i yer ér malʼakh man i ken zwa Grika i i yer ér aggelos la. Inja i asember ne jighilii yô ér, “or u zan a loho,” kpa ka a lu ior mba ken jijingi mba zan a loho yô, i yila ve ér, “mbatyomov.” (Ge 16:7; 32:3; Yak 2:25; Mp 22:8) Mbatyomov ka ior mba ken jijingi mba lun a tahav kpishi; Aôndo yange gba ve ica i gba cii va mase gban orumace ye. Shi Bibilo yila ve ér, ­‘uicighan udubu pue pue,’ man “ônov mba Aôndo” man “asan a sha use.” (Dut 33:2; Yob 1:6; 38:7; Yu 14) Yange i gba ve ér ve maren ônov ga, kpa hanmô ve yô, i gba a gba nan. Ve ngee hemba miliôn deri môm yem zende zende. (Da 7:10) Bibilo tese ér, mba a ati a ve, shi mbamlu vev mba kposo kposo, nahan kpa ka ve hide a iyol ijime, ve venda ér i de civir ve ga, shi mbakpishiv ken a ve mba ôron ior ati a ve ga. (Ge 32:29; Lu 1:26; Mp 22:8, 9) Mbagenev mba sha aan a vesen hemba mbagen, shi mba eren ityom kposo kposo; mba eren tom hen ishigh ki ikyônough ki Yehova, mba za ôron ior ilyoho na, mba wasen mbacivir Yehova mba ve lu shin tar la, Aôndo ka a tindi ve ve za tsaha ior, shi mba suen tom u pasen loho u dedoo. (2Ut 19:35; Ps 34:7; Mt 4:11; Lu 1:30, 31; Mp 5:11; 14:6) Ken hemen yô, vea wase Yesu u nôngon ityav mbi Armagedon.—Mp 19:14, 15.

• Mesiya.

  Ka ishember i ken zwa Heberu, inja na yô ér “u i tsegha” shin “un u i ­tsegha un” la. Mba yer ishember ne ken zwa Grika ér “Kristu.”—Da 9:25; Yh 1:41.

• Mgemshima.

  Ka a ter ishember ne ken Bibilo yô, i ôron kwagh u or geman mhen u nan shi vaan afanyô sha mimi sha akaa a yange nan eren, shin sha akaa a nan er shami ga, shin sha akaa a yange gba u nana ér kpa nan er ga yô. Or ka nana gema ishima sha mimi yô, nan ume ityamegh, inja na yô, ka nan gema ieren i nan.—Mt 3:8; Aer 3:19; 2Pe 3:9.

• Mina.

  Ken Ruamabera u Mbakristu u ken Zwa Grika la, mina môm lu uderakema 100. Myohom nam lu ugeram 340.—Lu 19:13.

• Mire.

  Mningem ma human doon, ma yange i zua a mi ken ahu a usaa atô kposo kposo shin ken anikyonov mbagenev mba i yer ve ér Commiphora la. Mire kpa lu môm ken akaa a yange i nungwa sha icighan-mkure u tseghan or a mi la yô. Shi yange i haa un sha ambaakaa er akondo kua ugambe nahan ér a huma i doo, shi i nungwa sha mkurem ma tiligh iyol a mi, man sha mkurem ma shighen iyol. Yange i nungwa un sha wain ér a̱ hingir kwaghman u kpilighyol. Shi yange i sôr ikyom i orkpen sha mire cii i mase iin ye.—Ek 30:23; Anz 7:17; Mr 15:23; Yh 19:39.

• Mkam ma nanden insensi.

  Yange i er ma sha zanaria shin azurfa shin togula sha ci u nanden insensi shimi shi dughun aka a usu ken atse a nanden nagh ken tabernakel man ken tempel, shin sha ci u dughun mou u imenger u a hia kera yô, ken daarimenger u sha zanaria. Yange i yilan ma kpaa ér ugbande mba usuv.—Ek 37:23; 2Kr 26:19; Heb 9:4.

• Mnder u shin ku.

  Ka u moughon shin ku. Ka ishember i ken zwa Grika i i yer ér anastasis la, inja i i jighilii yô ér, “u moughon sha; u ­moughon tilen sha.” Bibilo ôr kwagh u mnder u shin ku u iorov utaankarunyiin, môm ken ve yô lu Yesu, u Yehova iyolna nder un shin ku la. Shin er lu Eliya man Elisha man Yesu man Peteru man Paulu yange ve nder ior mbagenev shin ku nahan kpa, ikyav tese wang ér lu sha tahav mbu Aôndo ve er uivande mban ye. Mnder u shin ku u “mbaperapera man mbaperapera ga” mba vea lu shin tar la, ka kwagh u hange hange u una er sha u kuren awashima u Aôndo yô. (Aer 24:15) Bibilo shi ôr kwagh u mba a va nder ve shin ku vea yem sha yô, i yila ér mnder u shin ku u “tsuaa” shin u “hiihii.” Ka mnder u shin ku u anmgbianev mba Yesu mba i ­tsegha ve sha jijingi la.—Fil 3:11; Mp 20:5, 6; Yh 5:28, 29; 11:25.

• Moloko.

  Ka aôndo u Mbaamon; a̱ shi nan kpa ka un shon môm i yer ér Malkam, man Milkom man Moleki ye.—Aer 7:43.

• Môm-ken-pue.

  Vegher môm ken ­avegher pue a ma kwagh, shin avegher 10 ken avegher deri a ma kwagh. Yange i na shin i kimbi er ka kpandegh nahan, hemban je yô sha ci u tom u kwaghaôndo. (Mal 3:10; Dut 26:12; Mt 23:23; Heb 7:5) Ken Atindi a Mose yô, yange or a ­sunda iyiav ken ityev shin ikyumuile i nan shin uzendenya mba nan vea seer yô, hanma inyom nan dugh môm-ken-pue u akaa ne nan za na Mbalevi sha u suen ve. Mbalevi yange ve dugh môm-ken-pue ken môm-ken-pue u i ne ve la, ve na upristi mba ken tsombor u Aron sha u suen ve. Shi i naan môm-ken-pue u akaa agen kpaa. Gba u Mbakristu vea naan môm-ken-pue ga.

N

• Nagh.

  Iyua i or nan ne Aôndo sha u sughun un, shin sha u lumun ibo sha kwagh, shin sha u himen a na yô. Uumace ndera nan iniav a ishima ve sha akaa wue wue, kua sha annyamev, hii sha shighe u Abel la je, zan zan Atindi a Mose a ikyuryan la va kar tesen ér gba u a eren nahan. Yesu yange va ne nagh ku vough sha uma na la kera yô, kwagh kera gba sha iniav mbi sha annyamev ga, kpa Mbakristu za hemen u nan Aôndo iniav mbi ken jijingi.—Ge 4:4; Heb 13:15, 16; 1Yh 4:10.

• Nagh ku ipaan.

  Ishe i yange i kimbi sha u paan or shin kwagh u a lu uikyangen, shin yangen mtsaha shin ican i yan shin tôôn isholibo i or kera, shin bunden ma kwagh u i gbe u nana er yô. Yange i kimbin ishe ne sha inyar tseegh ga. (Yes 43:3) Mbamlu mba kposo kposo mba yange or nyôr ker ve i gba u a paa nan yô. U tesen ikyav yô, ônov mbaiundav mba nomso mba iorov shin mba zendenya mba ken Iserael cii lu kwagh u Yehova, nahan i gba u a paa ve shin a kimbi kwagh sha a ve, sha er a kera er tom a ve ken mcivir u Yehova tseegh ga yô. (Nu 3:45, 46; 18:15, 16) Yange bua una wa tswam man a̱ kura un tsembelee ga yô, a wua or, nahan i gba u or u i lu bua u nan la nana kimbi kwagh u paan iyol i nan, sha er a kera wua nan er tindi tese la ga yô. (Ek 21:29, 30) Nahan kpa, yange or a̱ wua or sha apera yô, i lumun u ngohol ma kwagh u nan ne sha u paan iyol i nan ga. (Nu 35:31) U hemban cii yô, Bibilo pase ipaan i Kristu yange kimbi sha ku na, u yange kpe sha u paan uumace mba ungwan imo i Aôndo sha ikyev i isholibo man ku kera la.—Ps 49:7, 8; Mt 20:28; Ef 1:7.

• Nagh ku isholibo.

  Nagh ku yange i naan zum u or nan er isholibo abu sha ci u myen u iyol i inyam man awambe i i lu vough ga ne yô. Yange i naan iniav sha annyamev kposo kposo, er nombua nahan, zan zan kua ikyungugh. Kpa or u i lu wamen Aôndo sha isholibo i nan la yange nan na nagh sha ma kwagh ken akaa ne sha indi i nan man er mlu u nan a lu la.—Le 4:27, 29; Heb 10:8.

• Nagh ku nanden.

  Ka nagh ku sha zendenya ku yange i nande sha atse a nan nagh, i na Aôndo ku jimin cii yô; (yange a̱ lu bua shin iyôngo shin kpev shin atii shin gumkyungu kpa), or u civir Aôndo la nan dugh ci-inyam ker ga.—Ek 29:18; Le 6:9; Mr 12:33; Heb 10:6.

• Nagh ku wain.

  Ka nagh ku yange i na sha wain yô. Yange i haa zar wain sha atse a nan nagh a iniav mbigenev kpishi. Yange Paulu er tom a ishember ne sha injakwagh, u tesen er un kegh iyol u eren tom kpoghuloo sha ci u mba ve lu Mbakristu a na imôngo la yô.—Nu 15:5, 7; Fil 2:17.

• Nardu.

  Mkurem ma human doon ma taver ishe. Ka ma lu nyian fuee. Mba eren ma sha imendenegh ki i yer ér spikenard (Nardostachys jatamansi) la. Er mkurem ma nardu taver ishe yô, ashighe kpishi yange i tôô mkurem ma taver ishe ga i nungwa sha ma, nahan ashighe agen i er jebu u mkurem man. Kwagh ka a er yô, Marku man Yohane cii kaa ér yange i haa Yesu ‘mkurem ma nardu ma i nungwa kwagh môm sha mi ga yô.’—Mr 14:3; Yh 12:3.

• Nase.

  Awen a gbilititi ahar, a lun inja i môm; yange i penda i môm sha igen, nahan i wua sam kwagh u hingir mwem. Yange i wa igbe hen atô atô u iwen i shin la, i wa iwen i sha la sha mi, sha er a fatyô u ningir a i yô. Sha ayange a i ngeren Bibilo la, hen uya kpishi kasev hemban wuan kwagh sha iniase i sha ave. Er yange i gba u hanma iyange tsombor ua wua kwagh sha nase u sha ave keng ve ua ya kwagh yô, Atindi a Mose kaa ér i de kôron or kwar sha u tôôn nan nase shin anshwa ga. Iniase i vesen i yange i er i i lu er i sha ave la, yange i lu zendenya a ningir a iwen i sha la sha u wuan kwagh ye.—Dut 24:6; Mr 9:42.

• Nisan.

  Ka iti i yange i va gema yilan uwer u Abiba a mi, shighe u Mbayuda due ken uikyangen ken Babilon hide la yô. Lu uwer u hiihii sha icighan kalenda u Mbayuda, kpa gema lu uwer u sha utaankaruhar sha kalenda u mba ken tar. Yange u hii ken atô u uwer u Maaci u va bee ken atô u uwer u Aipor. (Ne 2:1) Yange i eren Paseka u Mbayuda sha iyange i Nisan 14, shi Yesu va hii kwagh u Kwaghyan u Ter u Aikighe la kpa sha iyange ne. (Lu 22:15, 19, 20) Lu sha iyange shon i môm i mande un sha kon ye.—Lu 23:44-46.

O

• Orahir.

  Or u nan eren kwagh sha tahav mbu i fe ér mbu due ka hen ujijingi mba aferev yô.—Aer 13:6.

• Orahir u tôvon sha asan a sha kwavaôndo.

  Ka or u nan tôvon sha zende u iyange man uwer kua asan sha u nana fa kwagh u ken hemen yô.—Mt 2:1.

• Oretiopia.

  Or u ken Etiopia, tar u sha ayange a tsuaa la je u lu tar u Igipiti vegher u ken imbusutariyan la. Ajiir a masen ken akighir a imbusutariyan i tar u Igipiti u sha ayange ase ne kpa yange lu ken haregh u Etiopia, kua vegher u imbusutarimese i tar u Sudan u sha ayange ase ne.—Aer 8:27.

• Orhimen.

  Or u ka nan zamber a iorov uhar mba iyongo i lu hen atô ve la sha u ve̱ hime iyôngo yô. Ken Ruamabera yô, Mose ka orhimen u ikyuryan i Atindi, Yesu gema ka orhimen u ikyuryan i he.—Ga 3:19; 1Ti 2:5; Heb 12:24.

• Orkristu.

  Ka iti i Aôndo a ne hanma or u nan lu dondon Yesu Kristu yô.—Aer 11:26; 26:28.

• Orkuran Ijiir.

  Or u yaren kura sha u kwagh a de eren ior shin ijiir ve ga yô. Mba hembe yaren u tugh, shi shighe gen orkuran ka nana̱ nenge ér kwaghbo ngu van yô, nan gbire vaa sha u ior ve̱ fa. Ashighe kpishi mbakuran yange ve tile sha girgar sha ajiir kposo kposo kua sha ayou a taven gôgônan, sha u vea nenge a ior mba ve lu van la ken ica, cii man vea va zurum ye. Orkuran u ken shoja yô, ka i yila nan ér orshoja u kuran.—Mt 27:65; 28:4.

• Orkuran.

  Nomsoor u tom u nan jim jim i lu u nengen sha tiônnongo shi kuran un yô. Ka ishember i ken zwa Grika i i yer ér episkopos la i gem nahan ye, man inja i ishember shon jighilii yô ér, u nengen sha kwagh sha u kuran un. Ishember i “orkuran” man i “ortamen” (presbyteros) la cii ka asember a a lu ôron kwagh u iantom i môm ken tiônnongo u Kristu yô. Ishember i “ortamen” la ngi tesen aeren a organden a or u i ver nan sha iantom la nan lu a mi yô; i “orkuran” la di ngi pasen ityom i nan lu a mi sha iantom ne la.—Aer 20:28; 1Ti 3:2-7; 1Pe 5:2.

• Ormaantyegh.

  Or u maan mtem ma inyaav man agbande a inyaav kua mkam ma inyaav magen. Ishember i ken zwa Heberu i i gem ér ormaantyegh la, inja na jighilii yô ér, “or u maan akaa.” Ashighe kpishi ka i tôô tahav mbu ormaantyegh nan lu a mi sha inyatyuu la, i tese ikyav er Yehova a lu a tahav sha ior asange asange man akuraior yô.—Yes 64:8; Ro 9:21.

• Ornasareti.

  Iti i i yilan Yesu a mi yô, sha ci u lu or u ken gar u Nasareti. A shi nan kpa iti ne zua vea ishember i ken zwa Heberu i i gem ken Yesaia 11:1 ér “gbaa” la. Mbadondon Yesu kpa yange i va gema yilan ve sha iti ne.—Mt 2:23; Aer 24:5.

• Orshiren Tiônnongo.

  Ka ishember i ken zwa Grika i i yer ér diakonos la i gem i̱ nahan ye. Ashighe kpishi ka i gema i̱ ér “orshiren ior” shin “or u eren ior tom.” Ishember i “orshiren tiônnongo” la ngi ôron kwagh u or u nan wasen mzough u mbatamen tom ken tiônnongo yô. Saa nana eren akaa a Bibilo i̱ tese ér mba ve lu sha iantom ne ve̱ eren la ve, nana kuma sha i ye.—1Ti 3:8-10, 12.

• Ortamen; Tamenor.

  Ka organden, kpa ken Ruamabera yô, ka or u nan lu sha ma ian i utaha man iantom hen ityô shin ma tar yô. I yila mbatyomov mba shaav kpa sha iti ne ken takeda u Mpase. Ishember i ken zwa Grika i i yer ér presbyteros la, ka i gema i̱ ér “ortamen,” zum u i lu ôron kwagh u or u nan lu sha iantom i hemen ken tiônnongo la yô.—Ek 4:29; Anz 31:23; 1Ti 5:17; Mp 4:4.

• Ortesenatindi.

  Or u nengen ken kôpi u Ruamabera u ken Zwa Heberu u tse hiden ngeren ken ihyurenruamabera u he. Shighe u Yesu va shin tar la, i yilan annongo u nomso mba fan Atindi sha iti ne. Yange ve hendan a Yesu.—Ese 7:6; Mr 12:38, 39; 14:1.

• Ortyom u Tamen.

  Inja na yô ér “orvesen u mbatyomov.” Kwagh ne tese ér “ortyom u tamen” ngu môm tseegh. Shi ken Bibilo cii ka a nger ishember ne yô, i ôron kwagh u or môm, kwagh ne kpa tese ér ortyom u tamen ngu môm tseegh. Bibilo ôr ér iti i ortyom u tamen la ka Mikael.—Da 12:1; Yu 9; Mp 12:7.

• Or u eren tom ken ya u tor.

  Inja na jighilii yô ér, nomsoor u i dugh nan ake yô. Ashighe kpishi yange i na ambaaior la tom ken uya mba utor, ve wasen shin ve nengen sha torkwase man kasev mba sha uikya. Shi or u i dugh nan ake ga kpa, yange a̱ wa nan ityom i eren ken ya u tor yô, i yila nan nahan. Shi i er tom a ishember ne sha injakwagh u ôron kwagh u or u nan ‘tsua u vôson kwase ga sha ci u Tartor’ yô; ka or u nan ker iyol i nan tsaha sha er nana hemba zuan a ian i eren tom u Aôndo hanma shighe je la.—Mt 19:12; Es 2:15; Aer 8:27.

• Or u nan lu kpan ga; Or u nan due ken kpan kera.

  Sha shighe u tartor u Roma hemen la, yange i lu or u i mar nan je i kôr nan kpan ga la i nenge nan ér nan ngu “or u nan lu kpan ga” ye; yange nan lu marnya u lun a ian i eren akaa cii. Kpa “or u nan due ken kpan” kera yô, ka or u yange i pase nan ken kpan kera yô. Yange a dugh or ken kpan kera sha tindi yô, i na nan ian i lun marnya u Roma, kpa nan gema nan lu a ian i hemen ken gomoti ga. Or u yange a̱ dugh nan ken kpan kera sha tindi ga yô, nan kera lu kpan ga, kpa nan lu a ian i eren ityom i gomoti igen ga.—1Ko 7:22.

• Or u nyôron a nyôr Mbayuda.

  Or u i gem nan yô. Ken Ruamabera yô, ishember ne ngi ôron kwagh u or u nan nyer kwaghaôndo u Mbayuda yô. Yange a̱ lu nomsoor yô, i gba u a tsôngo nan.—Mt 23:15; Aer 13:43.

• Or u tsengan pasen akaa.

  Or u nan senge ér nan ngu a tahav mbu tsengan ôron akaa a aa va er ken hemen yô. Upristi mba eren ahir, man mbakpehenasor, man mbaahiriv mba tôvon sha asan a sha kwavaôndo kua mbagenev cii, i ter ve ken Bibilo ér mba eren nahan.—Le 19:31; Dut 18:11; Aer 16:16.

• Or u undun mcivir.

  Ka ishember i ken zwa Grika i i yer ér apostasia la i gem i̱ nahan ye. I zua a i̱ ken ishember i pasen ieren, inja i ishember shon jighilii yô ér, “u tilen ica a kwagh.” Ashighe agen ishember ne ka i̱ ôron kwagh u “u undun kwagh, shin u gbihin kwagh, shin ihyembeato.” Ka a̱ ter ishember ne ken Ruamabera u Mbakristu u ken Zwa Grika la yô, i hemba veren ishima sha mba ve undu mcivir u mimi la.—Anz 11:9; Aer 21:21; 2Te 2:3.

• Orvesen u Tamen.

  Inja i ishember i ken zwa Grika i i gem nahan ne ér “Orhemen u Tamen.” Ngi ôron kwagh u tom u hange hange u Yesu Kristu a lu a mi u duen a uumace mba jighjigh ken akaa a vihin tsung, a isholibo i ve a mi la kera, zan a ve ken uma u tsôron la.—Aer 3:15; 5:31; Heb 2:10; 12:2.

• Oryuda; Mbayuda.

  Ka iti i yange i yila or u nan dugh ken ipyaven i Yuda a mi, zum u tartor u Iserael u uipyaven mba pue la gba la. (2Ut 16:6) Yange mba yemen a ior ken Babilon kera yô, i gema yilan Mbaiserael mba ken uipyaven kposo kposo mba ve hide ken Iserael la sha iti ne. (Ese 4:12) Ken masejime yô, i va gema yilan Mbaiserael cii sha iti ne sha u paven ve kposo a ior mba ken akuraior agen sha tar cii. (Es 3:6) Apostoli Paulu kpa yange er tom a iti ne sha injakwagh zum u a lu wasen ior u fan ér kwagh gba sha kwagh u tar u or nan dugh ker la ken tiônnongo u Kristu ga la.—Ro 2:28, 29; Ga 3:28.

P

• Paradiso.

  Ijiir i doon ashe i ior ve memen her, shin ijiir i ikyon i lu her er imba ijiir la nahan yô. Imba ijiir ne i̱ hiihii sha tar lu Eden. Lu Yehova er i sha ci u uumace mba hii gban ve sha tar, nom man kwase la ye. Zum u Yesu lu lamen a môm ken mbaaferev mba i mande ve sha kon ikyua a na la, a tese ér tar ua va hingir paradiso. Ken 2 Mbakorinte 12:4 la, ikyav tese ér iti ne ngi ôron kwagh u paradiso u ken hemen, shi ken Mpase 2:7 la, ngi ôron kwagh u paradiso u sha.—Icam 4:13; Lu 23:43.

• Pasalami.

  Ka icam i wuese Aôndo. Yange mbacivir Aôndo ve dugh upasalami ve waan ve kuhwan ityogholough sha mi. I eren kwagh ne shighe u ior ve kohol imôngo ve lu civir Yehova Aôndo ken tempel na ken Yerusalem la kpaa.—Lu 20:42; Aer 13:33; Yak 5:13.

• Paseka.

  Ka iniongo i yange i eren i̱ hanma inyom ken uwer u Abiba (u i va gema yilan ér Nisan la), sha werayange 14, sha u umbur er yange i yima Mbaiserael, i due a ve ken Igipiti kera yô. Yange a̱ eren iniongo ne yô, i sôngo waniyôngo (shin ivo), i mgbagh inyam la i ya sha ikyayue i yuan man beredi u i we kwa sha mi ga yô.—Ek 12:27; Yh 6:4; 1Ko 5:7.

• Pentikôsti.

  Iniongo i sha uhar ken uiniongo mba utar mba vesen mba yange i gba u Mbayuda mba nomso vea za er ken Yerusalem yô. Inja i Pentikôsti yô ér “(Iyange) i sha Akunduahargber,” ka iniongo i i yer ken Ruamabera u ken Zwa Heberu ér Iniongo i Sunda shin Iniongo i Ulahadi la, i yer i ken Ruamabera u Mbakristu u ken Zwa Grika la nahan ye. Yange i eren iniongo ne sha iyange i sha 50. Uwer u Nisan ­yange ua nyôron ayange 16 maa i hii u ôron ayange ne.—Ek 23:16; 34:22; Aer 2:1.

• Perapera.

  Ken Ruamabera yô, ka kwagh u a lu u vough sha gbenda u Aôndo a nengen kwagh u vough man u vough ga la.—Ge 15:6; Dut 6:25; Sef 2:3; Mt 6:33.

• Per tindi; Tindi u peren.

  Ka u eren kwagh u tindi a yange yô; ka ieren i dondon tindi ga. Ken Bibilo yô, ishember ne ngi kwaghmôm a “isholibo.”—Ps 51:3; Ro 5:14.

• Porneia.—

  Nenge IDYA.

• Pristi.

  Ka or u Aôndo yange a ver nan, nan lamen a ior mba nan eren Aôndo tom sha ci ve la sha ityough nagh, shi nan tesen ve kwagh u Aôndo kua atindi a na yô. Upristi yange ve lamen a Aôndo sha ci u ior kpaa; ve naan iniav shi ve himen ior a Aôndo, ve eren mbamsen mba zamber a na sha ci ve. Shighe u i lu a na Atindi a Mose ga la, yange orya nan lu pristi sha ci u tsombor u nan. Sha Atindi a Mose la, lu nomso mba ken tsombor u Aron, ken ­ipyaven i Levi eren tom u pristi ye. Mbalevi mba nomso mbagenev cii wasen ve a wase tom. Mba va ye ikyur i he la yô, Iserael u ken ­jijingi hingir ikyurior i upristi, Yesu Kristu gema ngu Pristi u Vesen.—Ek 28:41; Heb 9:24; Mp 5:10.

• Pristi u tamen.

  Ka gbenda ugen u i yilan “pristi u vesen” ken Ruamabera u ken Zwa Heberu la yô. Ken Ruamabera u Mbakristu u ken Zwa Grika la, ikyav tese ér yange a̱ ter ishember i “upristi mba tamen” la yô, i lu mbatamen mba ken nongo u upristi i ôron ye, shi alaghga kua mba i dugh ve sha ian i upristi mba vesen kera la kpaa, kua mba ve hemen ikwe i upristi i 24 la cii.—2Kr 26:20; Ese 7:5; Mt 2:4; Mr 8:31.

• Pristi u vesen.

  Ken Atindi a Mose la yô, lu zegepristi u yange zaan sha ishigh ki Aôndo sha ityough ki ior, shi nengen sha upristi mbagenev yô. Lu un tseegh i na un ian i nyôron ken Icighan Kpar u Hemban Cii, u lu vegher u shin atô u tabernakel la ye, shi ken tempel kpa va lu nahan. Yange a er kwagh ne ken hanma inyom kwa môm tseegh, sha Iyange i Nan Iwom. Yesu Kristu kpa mba yer un sha iti i “pristi u vesen” ne.—Le 16:2, 17; 21:10; Mt 26:3; Heb 4:14.

R

• Ruamabera (Uruamabera).

  Ngeren mba Mkaanem ma Aôndo ma ma lu icighan kwagh la. Ka ken Ruamabera u Mbakristu u ken Zwa Grika la tseegh i ter ishember ne ye.—Lu 24:27; 2Ti 3:16.

S

• Samaria.

  Lu gartamen u uipyaven mba pue mba tartor u Iserael u ken imbusutarimese la, kuma er anyom 200 nahan. Shi lu iti i haregh u tartor la jimin cii. Yange i maa gar ne sha uwo u i yilan u sha iti shon ne i môm yô. Sha shighe u Yesu la, Samaria lu iti i haregh u lu hen atô u Galilia man Yudia yô; Galilia lu un vegher u ken imbusutarimese, Yudia di lu un vegher u ken imbusutariyan. Yesu yange una zaan zende yô, ashighe kpishi a palegh u pasen kwagh hen haregh ne, kpa ashighe agen a kar gbenda her, a lam a ior mba her. Peteru yange er tom a kii i bughun Tartor i sha uhar, i sha injakwagh la sha Mbasamaria, ve ngohol icighan jijingi.—1Ut 16:24; Yh 4:7; Aer 8:14.

• Sanhederin.

  Lu atejir u tamen u Mbayuda, ken Yerusalem. Sha ayange a Yesu la, atejir ne lu a iorov 71 mba ôron ajir, iyenge ne kua pristi u vesen man mbagenev mba yange ve vande eren tom u pristi u vesen yô, man ior mba ken icombor i upristi mba vesen, man mbatamen, man mbavesen mba sha uipyaven man mbayaav, kua mbatesenatindi.—Mr 15:1; Aer 5:34; 23:1, 6.

• Satan.

  Ka ishemberti i ken zwa Heberu, inja na yô ér “Orhendankwagh.” Ka a̱ yila iti ne sha gbenda u tesen ér mba ôron kwagh u or yô, i lu Satan Diabolo, u a lu Orhyom u Aôndo u vesen la.—Yob 1:6; Mt 4:10; Mp 12:9.

• Shighe u Kristu lun vea mbahenen imôngo.

  Ken Ruamabera u Mbakristu u ken Zwa Grika la, ashighe agen kwagh u i lu ôron van la ka a tese ér ishember ne ngi ôron kwagh u shighe u Yesu Kristu una hingir tor una lu vea mbahenen nav, hii sha shighe u a na un Tor u Tartor u Mesiya ken jijingi la, zan zan ken ayange a masejime a tar ne la. Shighe u Kristu una lu vea mbahenen nav imôngo la ka shighe u una va kpase maa una hide a yem ga, kpa ka gôgô shighe.—Mt 24:3.

• Shighe u mkur u tar.

  Shighe u una kar maa mkurtar a va, shin akaa a a lu zan hemen sha tar, a Satan a ye tor sha mi ne aa kure la. Shighe ne ngu zan kwaghmôm vea shighe u Kristu a lu imôngo vea mbahenen nav yô. Yesu una na zwa, nahan mbatyomov vea “pav aferaior kposo a mbaperapera,” vea tim aferaior kera. (Mt 13:40-42, 49) Yange sar mbahenen mba Yesu u fan “shighe u mkur” shon. (Mt 24:3) Cii man Yesu hide yem sha yô, a tôndo zwa a mbadondon un ér una lu vea ve zan zan shighe la una kar van.—Mt 28:20.

• Shinagoge.

  Inja i ishember ne ér, “u kohol ior imôngo; mkohol,” kpa ken avur a ruamabera kpishi ka i̱ ôron kwagh u iyou shin ijiir i Mbayuda yange ve kohol her sha u ôron Ruamabera shi ngohol kwaghwan shi pasen kwagh shi eren msen yô. Sha ayange a Yesu la, hanma angar u ken Iserael u a war ngeen a ior cii, yange a lu a shinagoge, shi agar a vesen luun a shinagoge môm tseegh ga.—Lu 4:16; Aer 13:14, 15.

• Shion; Uwo u Shion.

  Ka iti i gar u Mbayebushi u yange i yilan ér Yebushi, u i maa girgar na taver la. Gar ne lu sha igyungu i i lu vegher u ken imbusutariyan i Yerusalem la. Davidi yange hemban gar ne ityav yô, a maa ya u tor sha ci na, lu tsan her, nahan i va gema yilan ér “Gar u Davidi.” (2Sa 5:7, 9) Shion yange hingir icighan­wo, hemban je yô sha ishigh ki Yehova, shighe u Davidi za tôô Areki va ver her la. Shighe kar yô, iti i Shion ne wa ijiir i tempel i sha Uwo u Moria la kpa ker, shi ashighe agen i lu gar u Yerusalem jimin cii. I ter iti ne ajiir kpishi ken Ruamabera u Mbakristu u ken Zwa Grika la sha u tesen ikyav i kwagh ugen.—Ps 2:6; 1Pe 2:6; Mp 14:1.

• Shiria; Mbashiria.

  Ken Ruamabera u Mbakristu u ken Zwa Grika la, Shiria lu tiôntar u ken tartor u Roma. Gartamen na lu Antiôki. Ajiir kpishi a hen haregh u Shiria shon môm (u i yilan kpaa ér Aram), u i er kwagh na ken Ruamabera u ken Zwa Heberu la kpa lu ker. Gomna u Shiria shi yange nengen sha ningirtar u Palesetina jimin cii.—Lu 2:2; Aer 18:18; Ga 1:21.

• Shiriti.

  Agbaa a zegemnger a vesen a ahar a zan shimi ga, a hen kpetar u tar u Libia, ken Imbusutarimese i Afrika. Mbatsoov mba sha ashighe a tsuaa la cian ijiir ne sha ci u taver u fan kwagh u waarawa u u lu her la. Yange agôndoamnger a zer yemen a u ken atô shi hiden a mi sha kpe.—Aer 27:17.

• Shisar.

  Iti i tsombor ugen ken Roma, i yange i va hingir ititom i ator a hemen tartor u Roma yô. I yila Ushisar mbagenev ken Bibilo sha ati, er Agusutu man Tiberiu man Kalodio nahan. Shi Nero kpa ka i yila un sha ititom ne, shin er i ter iti na ken Bibilo ga nahan kpaa. Shi i ter iti i “Shisar” ne ken Ruamabera u Mbakristu u ken Zwa Grika la sha u ôron kwagh u hemen shin gomoti.—Mr 12:17; Aer 25:12.

T

• Talenti.

  Ka ikyaren i myoho man i inyar i Mbaheberu i hemban kehen cii. Talenti môm yange a yuhwa i kuma ukilogram 34.2. Talenti u Mbagrika hemba ndahar; yange a yuhwa i kuma er ukilogram 20.4 nahan.—1Kr 22:14; Mt 18:24.

• Tar.

  Ka ishember i ken zwa Grika i i yer ér aion la, ka i gema i nahan zum u i lu ôron kwagh u akaa a a lu eren zan ave shin mbamlu mba ve ne ma anshighe shin gôgôshighe shin ma kov u dugh kposo a ashighe agen yô. Bibilo ôr kwagh u “tar u hegen ne,” u tesen akaa a a lu hemban eren sha tar jimin cii la man gbenda u ior i tar ne i eren kwagh yô. (2Ti 4:10) Shighe u Aôndo na Atindi a ikyuryan la, lu gbenda ugen u eren kwagh je Aôndo hii ye, man adooga mbagenev vea yila ér shighe shin tar u Mbaiserael gayô tar u Mbayuda. Aôndo shi yange va a gbenda ugen kposo u eren kwagh, shin tar ugen, sha ikyev i Yesu Kristu, sha nagh ku ipaan ku yange na la; sha hiihii la lu tar u tiônnongo u Mbakristu mba i ­tsegha ve la. Kwagh ne lu tesen mhii u gôgôshighe shin kov u he; lu shighe u akaa a yange i eren sha ikyev i Atindi a ikyuryan sha u tesen kwagh u una va er ken hemen la lu kuren sha mi kpôô kpôô yô. Ka a̱ nger ishember ne shighe u i lu ôron kwagh môm tseegh ga yô, i lu ikyov kposo kposo, shin akaa a a lu eren sha tar, a a vande lun shin aa va er ken hemen yô.—Mt 24:3; Mr 4:19; Ro 12:2; 1Ko 10:11.

• Tartaru.

  Ken Ruamabera u Mbakristu u ken Zwa Grika la, ishember ne ngi ôron kwagh u mlu u gban ijime, er ken purusu nahan, u yange i kende mbatyomov mba sha ayange a Noa la ker yô. Ishember i pasen ieren i i ter ken 2 Peteru 2:4, i yer ér tartaroo (i i gem ér, u “kenden ken Tartaru”) la, ngi tesen ér yange i kende “mbatyomov mba ve er isholibo la” ken Tartaru u i er kwagh na ken kwaghalôm la ga. (Kwaghalôm shon pase ér ijiir ne ka purusu u shin inya, shi ka ijiir i angôghime i kenden mbaaôndo mba gban ijime shimi). Kpa ngi tesen ér Aôndo yange dugh ve sha ajiir a ve kua ityom i ve lu sha mi la kera, gema kende ve ken mlu u gban ijime, nahan kera mba ken iwanger i mbaawashima mba Aôndo la ga. Ime la tese kwagh u una er ve yô, Ruamabera tese ér mtim u tsôron ngu keghen ve kua orhemen ve Satan Diabolo. Sha nahan yô, Tartaru ngu tesen ijiir i hemban gban ijime cii i i ver sha ci u mbatyomov mba yange ve hemba ato la yô. Ijiir ne ngi kwaghmôm a “ihyungwa i i ze kweng” i i ôr kwagh u i ken Mpase 20:1-3 la ga.

• Tartor u Aôndo.

  Ka a̱ ter ishember ne yô, i lu kwagh u gomoti u Wan u Aôndo, Kristu Yesu jighilii i ôron ye; ka gomoti u a til sha ityough ki hemen u Aôndo la.—Mt 12:28; Lu 4:43; 1Ko 15:50.

• Tembe.

  Lu ikyasen i tabernakel i yange i wa i̱ igyar i ningir i tser yô. Ken masejime yô, lu môm ken ajiir a hen ikyasen i tempel, a kpekpe u yange kase tempel la wa a atô yô. Yange atse a nanden nagh lu hen tembe u tabernakel. Ken tempel yô, atse la lu hen tembe u ken atô la. Bibilo shi ôr kwagh u ityembe i uya mba iorov man i ikwa i utor kpaa.—Ek 8:13; 27:9; 1Ut 7:12; Mt 26:3; Mr 15:16; Mp 11:2.

• Tempel.

  Imaagh ki yange i maa ér ki lu gbekeke ken Yerusalem, ki yange ki kar ki tile sha ityough ki tabernakel u kehe akuma a kuma, u lu ijiir i vesen i Mbaiserael civir Aôndo her yô. Lu Solomon maa tempel u hiihii la ye, kpa Mbababilon va hembe un. Tempel u sha uhar la lu Serubabel maa shighe u i due ken uikyangen ken Babilon i hide la ye. Yange Herode u Tamen va sôr tempel shon maa. Ashighe agen ka i yila un ér, “iyou.”—Mt 21:13; Lu 11:51; 1Kr 29:1; 2Kr 2:4; Mt 24:1.

• Tiônnongo.

  Ka ior mba ve kohol imôngo sha u kuren ma awashima shin eren ma tom yô. Ken Ruamabera u ken Zwa Heberu la, ishember ne ngi ôron kwagh u ikyurior i Iserael jighilii. Ken Ruamabera u Mbakristu u ken Zwa Grika la yô, ngi ôron kwagh u atôônanongo a Kristu asange asange, kpa ashighe kpishi ka i ôron i lu kwagh u nongo u Kristu jimin cii.—1Ut 8:22; Aer 9:31; Ro 16:5.

• Tôgh ku torough.

  Aga shin gbough ku orhemen ka nan kôr ken uwe, ku lu ikyav i tahav mbu tor yô.—Ge 49:10; Heb 1:8.

• Tsegha.

  Inja i ishember i ken zwa Heberu i i gem ér tsegha la ér, “u haan or zar kwagh iyol.” Yange i haa or mkurem iyol shin i haa sha ma kwagh sha u tesen ér i tsegha nan shin i ­tsegha kwagh shon sha ci u icighan tom. Ken Ruamabera u Mbakristu u ken Zwa Grika la, i er tom a ishember ne u ôron kwagh u haan ­icighan jijingi sha mba i tsough ve, ve lu a ishimaverenkeghen i yemen sha la.—Ek 28:41; 1Sa 16:13; Lu 4:18; Aer 10:38; 2Ko 1:21.

U

• Ucerubi.

  Ka mbatyomov mba ve lu sha ian i vesen shi ityom ve i kaha a i mbatyomov mbagenev cii yô. Mba kposo a Userafim.—Ge 3:24; Ek 25:20; Yes 37:16; Heb 9:5.

• U civir Aôndo.

  U nan Yehova Aôndo icivir tsung, man u cian un, man u eren un tom shi suen hemen na u sha won cii la sha mimi.—1Ti 4:8; 2Ti 3:12.

• U gbidyen iyiav; Vande u gbidyen iyiav.

  Ka gbenda u dughun ishamakaa ken akough man apusu kera; ka ijiir i yange i eren tom ne her yô. Yange i gbidye iyiav sha aga; a̱ lu iyiav mbi ngeen kpishi yô, i shoghor mbi sha kwagh ugen, er kpande u shoghor iyiav nahan, gayô agbur, uzendenya ve urugh. Nahan kwagh ne a dorough sha yiagh ki wan isham kimi, ki i samber sha vande u gbidyen iyiav la. Yange i er vande ne u lu vaanaan shi u lu gbilititi, ashighe kpishi i lu sha igyungu, ape ahumbe a karen kpishi yô.—Le 26:5; Yes 41:15; Mt 3:12.

• Uivande; Ityom i kpilighyol.

  Aeren shin akaa a ka a er i gande tahav mbu uumace ve lu a mi cii ken inya, shi i nenge ér a due hen orumace ga yô. Asember er “ivande” man “kwagh u kpilighyol” nahan, ashighe agen ka a̱ ter a ken ­Bibilo yô, i ôron i lu kwagh la môm.—Mt 11:20; Aer 4:22; Heb 2:4.

• U i we kwa sha mi ga.

  Mba ôron kwagh u beredi u i er un i we kwa sha mi ga yô.—Dut 16:3; Mr 14:12; 1Ko 5:8.

• Uiyua mba nan.

  Ka uiyua mba yange i naan sha u wasen or u nan lu ken ibanave yô. I ôr kwagh u uiyua mban ken Ruamabera u ken Zwa Heberu la jighilii ga, kpa Atindi pase akaa jighilii a yange gba u Mbaiserael vea eren a mbaatsanev yô.—Mt 6:2.

• Uma.

  Ka ishember i i yer i̱ ken zwa Heberu ér nephesh, ken zwa Grika di i yer ér psykhe la, i gem i̱ nahan ye. I tôv sha kwagh u asember ne yô, i va nenge ér nga ôron kwagh u (1) ior, (2) annyamev, shin (3) uma u or shin u annyam. (Ge 1:20; 2:7; Nu 31:28; 1Pe 3:20; ngeren mba shin kpe kpaa.) Ukwaghaôndo kpishi kav ishember i “uma” la sha igbenda igen kposo, kpa Bibilo tese ér ishember i nephesh man i̱ psykhe la cii, ka a ter sha akaauma a shin tar yô, i lu kwagh u lun a iyol, u i benden a mi shi i nengen a mi, shi a kpen yô. Ken Bibilo ne yô, asember a ken ijô i yange i hii ngeren Bibilo ker ne cii, ka i gema inja i a er kwagh u i lu ôron la a tese la, sha asember er “kwaghuma,” man “or” shin “mlu u or jimin cii,” gayô sha asember a a til sha ityough ki iti i or yô, (u tesen ikyav yô, ka i nger “mo” shin “m,” hen ape ma i nger ér “uma wam” yô). Ashighe kpishi ka a gema ishember ne nahan yô, i gema shin ngeren mba shin kpe ér “uma.” Zum u i ôr kwagh i ter ishember i “uma” la yô, a̱ lu ken ngeren u Bibilo gayô ngeren u shin kpe kpa, gba u a kav inja i i̱ er i pase sha heen nahan. Zum u i lu ôron kwagh u or eren ma kwagh a uma u nan cii yô, mba kaan ér ka u or eren kwagh shon a mlu u nan cii, shin a ishima i nan i môm, shin ken uma u nan cii. (Dut 6:5; Mt 22:37) A fatyô u teren asember a ken ijô i yange i hii ngeren Bibilo ker ne sha ajiir agen, zum u i lu ôron kwagh u isharen i̱ ma kwaghuma yô. Shi a fatyô u teren asember ne sha u ôron kwagh u orkpen shin ikyom i orkpen.—Nu 6:6; Anz 23:2; Yes 56:11; Hag 2:13.

• U pendan or ave iyol.

  Yange i penda or ave iyol shighe u i lu veren nan sha tom u civirigh, shin i ver ishima ér nana̱ zua a iveren, shin angev mbu bee nan, shin nana̱ zua a ma iyua i ­icighan jijingi yô.—Nu 27:18; Aer 19:6; 1Ti 5:22.

• Uwar.

  Ka a nger ishember ne sha asangaabaacaa a kiriki tseegh yô, i lu uwar u mbakpenev asange asange; ishangebaacaa i hiihii sha ishember ne ka ia lu i vesen yô, i lu kwagh u ape i iin uumace mba ve kpen ne cii la i ôron ye; ngi kwaghmôm a ishember i ken zwa Heberu i i yer ér “Sheol” la, kua i ken zwa Grika i i yer ér “Hade” la. I pase inja i ishember shon ken Bibilo ér ka ijiir i sha injakwagh shin mlu u or ka nan lu ker ve nan kera eren ma kwagh ga, shi nan kera fa ma kwagh môm kpaa ga yô.—Ge 47:30; Orpa 9:10; Mt 27:61; Aer 2:31.

• Uwar u umbur mbakpenev.

  Ijiir i iin ior i yange or a kpe ve i za ver ikyom i nan yô. Ka ishember i ken zwa Grika i i yilan ér mnemeion la i gem i nahan ye. I dugh ishember ne ken ishember i tesen ieren, i̱ i̱ lu ôron kwagh u “u umbur or kwagh” la, ngi tesen ér mba umbur or u nan kpe la.—Yh 5:28, 29.

• Uwer u he.

  Iyange i hiihii ken hanma uwer sha kalenda u Mbayuda. Yange i kohol imôngo sha iyange ne, i er iniongo, shi i na iniav mbigen kposo a mbi i naan ayange ayange la. Ken masejime yô, iyange ne va hingir iyange i iniongo i hange hange ken tar u Iserael, nahan ior kera yaren tom sha i ga.—Nu 10:10; 2Kr 8:13; Kol 2:16.

V

• Varenda u Solomon.

  Sha ayange a Yesu la, ijiir ne lu gbenda u ken tempel, ken tembe u tempel u ken won, u ken vegher u sha ityoughkitaregh la. Yange i kuva u i san. Ior kpishi na jighjigh ér lu vegher u imaagh ki tempel u Solomon ngise maa la, ki yange ki gba ga yô. Lu her kpa kwagen la Yesu zende kar “sha shighe u wuhee” ye, shi lu her Mbakristu mba sha ayange a mbaapostoli la kohol imôngo civir Aôndo ye.—Yh 10:22, 23; Aer 5:12.

W

• Wang ga.

  Ashighe agen a fatyô u lun hôngor u sha iyol shin u eren kwagh u peren atindi. Kpa ashighe kpishi Bibilo ka ia ter ishember ne yô, i ôron kwagh u i lumun a mi ga, shin u Atindi a Mose a tese ér ka u wang ga yô. (Le 5:2; 13:45; Mt 10:1; Aer 10:14; Ef 5:5)—Nenge WANG.

• Wang; Wanger.

  Ken Bibilo yô, ishember ne ngi ôron kwagh u or lun tsembelee sha iyol tseegh ga, kpa kua u or zan hemen u lun a acôghor iyol ga, shin kera lun a acôghor iyol ga, kua u lun a mshi iyol shio, shi duen ken nyityôkwagh i ka i hôngor or cii kera, shin ken ma kwagh u vihin nan sha gbaa u aeren a wang la, shin u vihin mlu u nan vea Aôndo cii. Ken Atindi a Mose la yô, ishember ne ngi ôron kwagh u or lun wang er tindi a tese la.—Le 10:10; Ps 51:7; Mt 8:2; 1Ko 6:11.

• Waniunda.

  Jighilii yô, yange i lu wan u nomso u hiihii u ter nan mar yô. Sha ayange a i ngeren Bibilo la, waniunda u nomso yange nan lu a ian i civirigh hen tsombor, shi nan lu ityough sha ya zum u ter u nan a kpe kera yô. Yesu ka waniunda u Yehova, shi lu waniunda ken akaa a i gbe a cii kua waniunda sha mnder u shin ku.—Ge 25:33; Ek 11:5; Kol 1:15; Mp 1:5.

• Wan u Davidi.

  Yange i hemban yilan Yesu sha ishember ne, sha u tesen wang er a lu Oryan­dyako u ikyuryan i Tartor, i̱ lu u ia va iv sha or u ken tsombor u Davidi la.—Mt 12:23; 21:9.

• Wan u or.

  Ishember ne ngi ken Ityakerada i Ivangeli la kuma er ajiir 80 nahan. Ka Yesu Kristu i yer un sha i̱ ye, shi ngi tesen ér yange i mar un ken iyol i inyam man awambe, nahan hingir orumace; lu or u ken jijingi u gba geman ken iyol i or tsô ga. Shi ishember ne ngi tesen ér lu u kwaghôron u profeti u i nger ken Daniel 7:13, 14 la una kure sha Yesu. Ken Ruamabera u ken Zwa Heberu la, i yila Esekiel man Daniel sha ishember ne, sha u tesen mkposo hen atô u uumace mba ôron loho mban a Aôndo, u loho ve la u dugh hen a na la.—Esek 3:17; Da 8:17; Mt 19:28; 20:28.

Y

• Yakob.

  Wan u Isaka vea Rebeka. Aôndo yange va na un iti ér, Iserael, shi va hingir tertamen u ikyurior i Iserael (i̱ i yilan kpaa ér, Mbaiserael, shi i va gema yilan ken masejime ér Mbayuda la). Yange mar ônov mba nomso 12, ônov mban kpa va tser icombor hingir uipyaven 12 mba ikyurior i Iserael. I za hemen u yilan ikyurior shin ior i Iserael sha iti i Yakob la.—Ge 32:28; Mt 22:32.

• Yehova.

  Ken Icighan Bibilo i Tar u He ne, i nger iti i “Yehova” la ker kwa 241, ken Ruamabera u Mbakristu u ken Zwa Grika la. Ka atôakyaa a a ne ve i nger iti i Aôndo ker je ne:

  1. Uruamabera mba ken Zwa u Heberu mba yange i ôron sha ayange a Yesu man mba­apostoli nav la lu a asangaabaacaa a i yilan ér ­Tetragrammaton la ker kpulughuu. (Ka iti i Aôndo, i nger i sha asangaabaacaa anyiin יהוה, a ken zwa Heberu a duen a ikyenge ga.)

  2. Sha ayange a Yesu man mbaapostoli nav la, Tetragrammaton lu ken ruamabera u ken zwa Grika u yange i nenge ken Ruamabera u ken Zwa Heberu i gema la kpaa.

  3. Ruamabera u Mbakristu u ken Zwa Grika la iyol na kaa ér ashighe kpishi Yesu yange a ôr kwagh a ter iti i Aôndo, shi pase ior i.—Yohane 17:6, 11, 12, 26.

  4. Er lu Aôndo na i nger Ruamabera u Mbakristu u ken Zwa Grika la i seer sha icighan Ruamabera u ken Zwa Heberu la yô, aluer iti i Yehova gba ndiir ker tsô yô, a tese ér a ôr kwagh nzughul nzughul.

  5. Ngeren mba Mbayuda mba tsuaa mbara tese ér Mbayuda mba ve lu Mbakristu la yange ve nger iti i Aôndo ken akaa a ve ngeren yô.

  6. Mbatimen sha akaa a ken Bibilo mbagenev kaa ér, ikyav tese ér yange i nger iti i Aôndo ken Ruamabera u Mbakristu u ken Zwa Grika la sha ajiir a i nger mkaanem ma ken Ruamabera u ken Zwa Heberu la.

  7. I gema Bibilo ken ijô kposo kposo hemba deri môm, mba i nger iti i Aôndo ker ken Ruamabera u Mbakristu u ken Zwa Grika la yô.

  Ka kwagh u hunan ga, atôakyaa nga wang, a a ne ve i gbe u a hide a nger iti i Yehova ken Ruamabera u Mbakristu u ken Zwa Grika la yô. Man ka kwagh u mba ve gem Icighan Bibilo I Tar u He ne ve er vough je la. Iti i Aôndo gba ve kwagh tsung shi ve nenge ér cuku tsô kpa doo u vea dugh ma kwagh ken mkaanem ma yange i hii ngeren la kera ga.—Mpase 22:18, 19.

• Yuda.

  Wan u Yakob u sha unyiin, u mar a Lea yô. Yange ka kom u Yakob una kpe yô, a ôr kwaghôron u profeti sha gambe u yav sha mi la je, a tsenga kaan ér or nana due ken tsombor u Yuda nana lu tor u vesen man u tsan gbem sha won. Yesu yange due ken tsombor u Yuda shighe u i va mar un shin tar ken iyol i orumace la. Iti i Yuda la lu iti i ipyaven la kpaa, shi va lu iti i tartor u i yilan u sha iti i Yuda la.—Ge 29:35; 49:10; Heb 7:14.

• Yuferati.

  Ka ifi u ken imbusutariyan i veghertar u Ashia, u a hembe lihen shi a hembe lun a inja cii yô. Ka môm ken uifi mba uhar mba vesen mba ve lu hen haregh u Mesopotamia la. I hii teren kwagh na ken Genese 2:14, ér ngu môm ken uifi mba unyiin mba ken Eden. Ashighe kpishi ka i yila un ér “Ifi.” (Ge 31:21) Lu ikighir i ken imbusutarimese i tar u i na Mbaiserael la.—Ge 15:18; Mp 9:14; 16:12.

Z

• Zegecan.

  Ishember i ken zwa Grika i i gem ér “zegecan” la ngi ôron kwagh u ican shin mbamtaver mba mbamlu mba vihin ka ve va a mi la. Yesu yange ôr kwagh u “zegecan” u una va sha gar u Yerusalem yô; a lu ican i i gbe je i̱ lu a vande eren ga yô, shi ôr kwagh u zegecan u hemban cii, u una va sha uumace sha shighe u una lu ‘van ken iengem’ la. (Mt 24:21, 29-31) Paulu yange pase kwagh u ican la ér ka kwagh u perapera u Aôndo a lu eren sha u tsahan “mbafan Aôndo ga man mba ve we loho u dedoo” u sha kwagh u Yesu Kristu ikyo ga la yô. Mpase ityough 19 tese ér ka Yesu una lu hemen ikyumutya i sha, sha u nôngon ityav a “inyamkyume la kua utor mba sha tar kua ushoja vev” ye. (2Te 1:6-8; Mp 19:11-21) I tese ér “zegeikpelaior” ia war ican la. (Mp 7:9, 14)—Nenge ARMAGEDON.

• Zuusu.

  Lu ihyemban aôndo ken mbaaôndo wue wue mba Mbagrika civir yô. Ior mba ken Lisetera yange ve fa ga ve yila Barnaba ér Zuusu. I zua a ngeren mba tsev mbagenev ikyua a Lisetera, mba ve er kwagh u “pristi u Zuusu” man “Zuusu, aôndo u iyange” yô. Tso u Paulu yange nyôr hen icile i Melita za hemen a zende na la, yange lu a eev mbu “Ônov mba Zuusu” sha ityough nagh, ka ônov mba ahinav mba nomso mba i yilan ve ér Castor man Pollux la je la.—Aer 14:12; 28:11.

• Zwa Aram.

  Zwa u ior mba ken tsombor u Shem; u wa zuan a zwa Heberu. Asangaabaacaa a zwa ne man zwa Heberu nga kwaghmôm. Sha hiihii la, lu ior i Aram lamen zwa ne ye, kpa shighe karen yô, hingir zwa u ior lamen sha tar wuee yô, kua ken kpenga u eren kpaa, sha ayange a tartor u Ashiria man u Babilon la. Shi lu zwa u gomoti u tartor u Per­shia lamen a ior ker yô. (Ese 4:7) I nger avegher a takeda u ­Esera man Yeremia man Daniel ken zwa Aram. I nger asember a ken zwa Aram agen ken Ruamabera u Mbakristu u ken Zwa Grika la.—Ese 4:8–6:18; 7:12-26; Yer 10:11; Mr 14:36; Aer 9:36.

• Zwa Grika; Grika.

  Ka zwa u ior i Grika ve lamen yô; shi ka or u nan lu marnya u tar u Grika, shin or u tsombor u nan u dugh ker yô. Shi ken Ruamabera u Mbakristu u ken Zwa Grika la, ishember ne gbanger; ka i er tom a i̱ zum u i lu ôron kwagh u ior mba yange ve lu Mbayuda ga la cii, kua mba yange ve lamen zwa Grika shi ve dondon aeren a ityôô a ior i Grika yô.—Yoe 3:6; Yh 12:20.