Mareferensiya Ya Xibukwana Xa Mintlhanganu Ya Mahanyelo Ni Ntirho
© 2022 Watch Tower Bible and Tract Society of Pennsylvania
6 KU YA KA 12 KA MARÇO
XUMA XI NGA KA RITO LA XIKWEMBU | 1 TIKRONIKA 23-26
“Ndlela Leyi Mintirho A Yi Yaviwe Hi Yona Tempeleni”
Perspicaz vol. 2 paj. 223 par. 1
Valevhi
Davhida a yave Valevhi swaku va wu yendla kahle ntirho wa vona. Van’wani a va veke swaku va va varhangeli, van’wani va va vayavanyisi, van’wani a va tirha ka tinyanghwa funtshi van’wani a va vonelela timale. A ku tlhela ku li ni vanhu vavanyingi lava a va pfunisa vaprista ka mintirho ya le tempeleni; a va hlayisa mikintar, masala ya ku dlela ka wona, va basisa minchumu hinkwayu ya ku kwetsima va tlhela va va pfunisa ka mintirho leyi fambisanaka ni minyikelo, magandzelo, ku peza swilo ni mintirho yin’wani ya ku vonelela. Ku fana ni vaprista, a ku vekiwe 24 wa mintlawa ya Valevhi lava a va yimbelela; naswona a vo yendla hi ku txintxana. A ku rhanga hi ku hoxiwa wuhlolotwana swaku va ta tiva swaku hi wini ntirho lowu va nga ta wu yendla. A wuhlolotwana lolelo a li tirha ni ka lava a va vonelela tinyanghwa. — 1Tk 23, 25, 26; 2Tk 35:3-5, 10.
Perspicaz vol. 2 paj. 897 par. 1
Muprista
Xikarhi ka vaprista a ku ni varhangeli va ku hambanahambana. Leswaku va nyikiwa mintirho, a ku hoxiwa wuhlolotwana. Leswi a ku ni 24 wa mintlawa, ntlawa hi wun’we a wu tirha mavhiki mambirhi hi lembe. Swi nga yendleka vaprista a va tirha hintamu loko ku li nkama wa mafexta, hikusa vanhu vavanyingi a va tolovela ku nyikela magandzelo yamanyingi hi nkama lowu, ku fana ni leswi swi nga yendleka nkama ku nga nyiketeliwa tempele. (1Tk 24:1-18, 31; 2Tk 5:11; vona ni 2Tk 29:31-35; 30:23-25; 35:10-19.) Swi nga yendleka vaprista a va nyikiwa mintirho yin’wani, kambe mintirho yoleyo a yi nga fanelanga yi kavanyeta mintirho ya vona. Hi ku ya hi swihena swa Vayuda, nkama Yesu a a li lani misaveni a ku li ni vaprista vavanyingi, se a mintirho leyi a yi yendliwa ndzeni ka vhiki a yi yaveliwa mindjangu ya ku hambanahambana leyi a yi kumeka ka ntlawa ha wun’we. Se, ndjangu wun’wani ni wun’wani a wu tirha siku lin’we kumbe ku tlula, hi ku ya hi swaku ndjangu wolowo wu ni vanhu vangani.
Perspicaz vol. 2 paj. 430 par. 6
Wuyimbeleli
Ka malunghiselelo lawa Davhida a nga ma yendla ka tempele ya Yehovha, a game a langa 4.000 wa Valevhi swaku va va ka ntlawa wa wuyimbeleli. (1Tk 23:4, 5) Ka 4.000 wa Valevhi volavo a ku ni 288 wa Valevhi lava “a va djondzisiwa ku yimbelelela Yehovha. Hinkwavu a va swi kota ku yimbelela kahle.” (1Tk 25:7) A ku langiwe 3 wa vavanuna lava yimbelelaka kahle swaku va rhangela, ku nga Azafi, Hemani na Yedutani. Vavanuna lava a va li vatukulu va vana vanharhu va Levhi, ku nga Jersoni, Kohata na Merari. Hi ndlela yoleyo, mindjangu yinharhu ya tixefi ta Levhi a yi li kona ka lunghiselelo la vayimbeleli va tempele. (1Tk 6:16, 31-33, 39-44; 25:1-6) A vana va vavanuna lava vanharhu, loko va patsiwa a va fika 24 naswona va kontiwa ka 288 wa vavanuna lava a va yimbelelela Yehovha lava se ku nga vulavuliwa hi vona. Leswaku ku tiviwa swaku vona a va ta rhangela ka ntlawa wini wa kona, a ku tirhisiwa wuhlolotwana. Mun’wani ni mun’wani a a rhangela 11 wa vavanuna lava a va yimbelela kahle, lava a va langiwe xikarhi ka vana va yena ni ka Valevhi van’wani. Ku fana ni vaprista, a 288 wa vavanuna lava va ku yimbelela kahle a va yaviwe hi 24 wa mintlawa ([1 + 11] × 24 = 288). Se loko swi ku a 3,712 wa vanhu lava a va djondzisiwa ku yimbelela na vona va yaviwile ka 24 wa mintlawa leyi, swi vula swaku ka ntlawa hi wun’we a ku ni ku tlula 155 wa vavanuna. Leswi vulaka swaku Mulevhi mun’wani ni mun’wani ka lava a va swi tiva kahle ku yimbelela, a a ta djondzisa 13 wa vona. (1Tk 25:1-31) Leswi vaprista a va chaya timhalamhala, na vona a va kontiwa ka ntlawa wa wuyimbeleli. — 2Tk 5:12; vona ni Tin 10:8.
Perspicaz vol. 2 paj. 683 par. 2
Vavoneleli Va Tinyanghwa
A tempeleni. Nkama Hosi Davhida na a li kusuhi ni ku fa, a nyike mintirho Valevhi ni vatirhi va tempele lava a va patsa 4.000 wa vavoneleli va tinyanghwa. Vona a va ya va ya tirha 7 wa masiku tempeleni. A va vonelela yindlo ya Yehovha, va tiyiseka swaku swipfalu swi pfuliwile swi tlhela swi pfaliwa hi nkama wa kona. (1Tk 9:23-27; 23:1-6) Handle ka ku vonelela tinyanghwa, a va tlhela va hlayisa minyikelo leyi vanhu a va yi tisa tempeleni. (2Th 12:9; 22:4) Ku ve ni nkama lowu muprista Yoyada a nga tota Yehowaxi swaku a va hosi. Se, ku vekiwe vavoneleli va tinyanghwa swaku va vhikela Yehowaxi leswaku a nga dlayiwi hi Ataliya lweyi a a lava ku mu yivela wuhosi. (2Th 11:4-8) Nkama lowu Yosiya a nga helisa wugandzeli la mavunhwa, vavoneleli va tinyanghwa va mu pfunile ku suselela swifaniso swa wugandzeli la Bali leswi a swi li kona tempeleni, va gama va ya swi hisa handle ka doropa. — 2Th 23:4.
Lavetela Xuma Ka Rito La Xikwembu
Murindzi 03/22 paj. 22 par. 10
Wugandzeli La Ntiyiso Li Ta Ku Yentxa U Tsaka
Hi gandzela Yehovha loko hi yimbelela. (Pis. 28:7) Vayisrayele a va swi vona swi li swa lisima hintamu ku yimbelela loko va gandzela Yehovha. Hosi Davhida a lange 288 wa Valevhi swaku va yimbelela tempeleni. (1 Tikro. 25:1, 6-8) Ni namuntlha hi nga kombisa swaku ha mu rhandza Yehovha loko na hina hi yimbelela. Nkama lowu hi yimbelelaka a hi fanelanga hi karhateka hi leswi rito la hina li nga tshamisa xiswona. Pimisa hi mhaka leyi: “Hinkwerhu ha phazama minkama ya yinyingi” loko hi vulavula, kambe a hi tshiki ku vulavula loko hi li bandleni ni loko hi chumayela. (Yak. 3:2) Hi ku fana, a hi fanelanga hi karhateka hi swaku rito la hina li sasekile kumbe a li sasekanga loko hi yimbelela hikusa xa lisima i ku dzunisa Yehovha hi ku yimbelela.
13 KU YA KA 19 KA MARÇO
XUMA XI NGA KA RITO LA XIKWEMBU | 1 TIKRONIKA 27-29
“Xitsundzuxu Xa Lirhandzu Lexi Papayi A Nga Xi Nyika N’wana”
Murindzi 15/02/05 paj. 19 par. 9
Ku Tiyiseka Swaku Hi Tama Hi Li Vakreste Kun’wani Ni Kun’wani Lomu Hi Nga Kona
Tiyiseka swaku leswi nga ka Bibele i ntiyiso. Swi lava hi djondza kahle Rito la Xikwembu swaku hi tama hi va vatirheli va Yehovha. (Vafilipiya 1:9, 10) Vakreste hinkwavu, ku nga na mhaka swaku i majovhem kumbe se va gugile, va fanele va tiyiseka swaku leswi va swi kholwaka i ntiyiso lowu taka hi ka Bibele. Pawulo a va byele leswi Vakreste: “Kambisisani swilo hinkwaswu, khomelelani swi tiya ka swa swinene.” (1 Vatesalonika 5:21) Vakreste lava nga majovhem, lava nga kulisiwa ka mindjangu leyi tirhelaka Yehovha, va fanele va swi twisisa swaku kuva vapsali va vona va ni lipfumelo a swi vuli swona swaku na vona va na lona. Hambi hi Davhida a mu byele leswi n’wana wa yena Solomoni: “Tiva Xikwembu xa mina papayi wa wena, u xi tirhela hi mbilu hinkwayu.” (1 Tikronika 28:9) A swi nga ta va swi yenelile kuva Solomoni a vona swaku papayi wa yena a ni lipfumelo ka Yehovha. A swi lava yena hi yexe a tiva Yehovha, funtshi hi swona leswi a nga swi yendla. A kombele Yehovha a ku: “Ni kombela u ni nyika wutlharhi ni wutivi swaku ni ta kota ku rhangela vanhu lava.” — 2 Tikronika 1:10.
Murindzi 15/04/12 paj. 16 par. 13
Tama U Tirhela Yehovha Hi Mbilu Leyi Heleleke
Hi nga djondza yini?. Ku ya mintlhanganwini ni ku chumayela i swa lisima naswona swi kahle; kambe leswaku hi tirhela Yehovha hi mbilu leyi heleleke, ku yendla leswo ntsena a swi yenelanga. (2 Tikro. 25:1, 2, 27) Loko Mukreste a ha tama a li ni mahanyelo ya misava, a va a veka wunghanu la yena na Yehovha a nghozini. (Luk. 17:32) Leswaku hi faneleka ku va kona ka Mfumu wa Xikwembu, swi lava ‘hi nyenya minchumu ya ku biha, hi namarhela ya yinene.’ (Rom. 12:9; Luk. 9:62) Hi mhaka leyo, a hi fanelanga hi pfumelela nchumu ka misava leyi ya Sathana xi hi yendla hi nga ha hisekeli ku tirhela Yehovha, hambiloko nchumu xolexo xi tikomba xi sasekile kumbe xi navetisa kandjhani. — 2 Kor. 11:14; lerha Vafilipiya 3:13, 14.
Murindzi 09/17 paj. 32 mapar. 20-21
“Tiya Nhlana U Sungula Ntirho”
Davhida a tiyisekise Solomoni swaku Yehovha a a ta va na yena anze a heta ku yaka tempele. (1 Tikro. 28:20) Marito lawa ya Davhida a ma vekise kahle Solomoni. Hi mhaka leyo, Solomoni a nga pfumelelanga swaku ntanga ya yena ni ku kala a nga na xiperiyensiya swi mu sivela ku yendla ntirho wolowo. A ve ni xivindzi funtshi hi ku pfuniwa hi Yehovha, a swi kotile ku heta ku yaka tempele liyani ya ku hlamalisa hi 7 wa malembe ni hafu.
Ku fana ni leswi Yehovha a nga pfuna Solomoni, na wena a nga ku pfuna swaku u va ni xivindzi u tlhela u yendla leswi u nga swi kotaka. (Esa. 41:10, 13) Loko hi li ni xivindzi ka ntirho lowu hi mu yendlelaka wona Yehovha, hi nga tiyiseka swaku Yena a ta hi katekisa. Hi mhaka leyo, a hi tameni hi va ni xivindzi hi tlhela hi yendla hinkwaswu leswi hi nga swi kotaka ka ntirho wa Yehovha.
Lavetela Xuma Ka Rito La Xikwembu
Murindzi 03/17 paj. 29 mapar. 6-7
Loko Wunghanu La N’wina Li Li Nghozini
Davhida a a ni vanghanu van’wani lava va nga tama va va na yena ka swiyimu swa ku karhata. Mun’wani wa vona i Huxayi, lweyi Bibele li mu vitanaka “munghanu wa Davhida.” (2 Sam. 16:16; 1 Tikro. 27:33) Swi nga yendleka Huxayi a a tirha ka yindlo ya wuhosi, a tlhela a tirha hi timhaka ti xihundla leti a ti lumba hosi.
Nkama lowu Absalomu n’wana wa Davhida a nga zama ku mu wutlela wuhosi, Vayisrayele vanyingi va nyime na yena, kambe Huxayi a nyime na Davhida. Nkama lowu Davhida a a li ku balekeni, Huxayi a mu lavetelile. Davhida a a tshoveke mbilu hileswi n’wana wa yena ni vanhu van’wani lava a a va tshemba va nga mu djikela; kambe Huxayi a tame a tshembeka ka Davhida. A veke wutomi la yena nghozini swaku a sivela Absalomu ku wutla wuhosi la papayi wa yena. Huxayi a nga yendlanga leswo hileswi a a tirha ka yindlo ya wuhosi, kambe hileswi a a li munghanu wa ntiyiso wa Davhida. — 2 Sam. 15:13-17, 32-37; 16:15–17:16.
20 KU YA KA 26 KA MARÇO
XUMA XI NGA KA RITO LA XIKWEMBU | 2 TIKRONIKA 1-4
“Hosi Solomoni A Teke Xiboho Lexi Hoxeke”
Perspicaz vol. 1 paj. 900 par. 2
Masonchwa
Nkama hosi Solomoni a nga sungula ku fuma, ku ve ni ku txintxa ka masonchwa aIsrayele. Hambileswi ka mfumu wa yena a ku ni ku rhula ka kukulu swinene, a tihlengeletelele makavhalu ni tinyolo. (Vona NYOLO.) Makavhalu manyingi a a ma xava Gibita. Swi lave ku yakiwa madoropa yamanyingi swaku ku hlayisiwa tinyolo ni makavhalu wolawo. (1Th 4:26; 9:19; 10:26, 29; 2Tk 1:14-17) Kambe Yehovha a nga swi katekisanga leswi Solomoni a nga swi yendla, naswona nkama lowu a nga fa a mfumu wu yavanile, se masonchwa ya Israyele ma hohloka. Leswo swi fambisana ni leswi muprofeta Esaya a nga gama a swi tsala. A te: “Khombo ka lava yaka Gibita swaku va ya lava mpfunu, lava tshembaka makavhalu, lava tshembaka tinyolo ta nyimpi hileswi ti nga tinyingi, ni makavhalu ya nyimpi hileswi ma nga ni matimba, kambe a va mu tshembi Mukwetsimi wa Yehovha naswona a va kombeli ku pfuniwa hi yena.” — Esa 31:1.
Perspicaz vol. 1 paj. 437 mapar. 2-3
Nyolo
Ka tiko la Israyele a ku zanga ku va ni hosi leyi nga hlengeletela tinyolo ni makavhalu ya nyimpi ku fana na Solomoni. Leswo a swi yendleka hi mhaka nawu lowu Yehovha a a nyike tiko, wa leswaku hosi a yi nga fanelanga yi tihlengeletela makavhalu yamanyingi ingi hiloko ku yendla leswo a ku li swona leswi a swi ta va ponisa. A nawu lowo a wu va sivela ku va ni makavhalu yamanyingi tanihi leswi a ku li wona lawa a ma ta koka tinyolo ta kona. (Dt 17:16) Nkama lowu Samuwele a nga basopisa tiko hi leswi tihosi leti nga vanhu a ti ta va yendla swona, a te: “Yi ta teka vana va n’wina va madjaha swaku va fambisa tinyolo ta nyimpi.” (1Sa 8:11) Hi leswi Absalomu and Adoniya va nga swi yendla nkama va nga zama ku wutla wuhosi. Va rhume swaku va yendleliwa nyolo va tlhela va veka 50 wa vavanuna swaku va tsutsuma phambheni ka yona. (2Sa 15:1; 1Th 1:5) Nkama Davhida a nga hlula hosi ya Zoba, a yo hlayisa 100 wa makavhalu ntsena. — 2Sa 8:3, 4; 10:18.
Nkama hosi Solomoni a nga yengesela masonchwa aIsrayele, a yengesele 1.400 wa tinyolo. (1Th 10:26, 29; 2Tk 1:14, 17) Handle ka Yerusalema, a ku ni madoropa man’wani lawa a ma vitaniwa madoropa lawa a ku hlayisiwa tinyolo, lawa a ma ni tindhawu tatinene ta ku hlayisa matlharhi lawa ya nyimpi. — 1Th 9:19, 22; 2Tk 8:6, 9; 9:25.
Lavetela Xuma Ka Rito La Xikwembu
Murindzi 01/12/05 paj. 19 par. 6
Tipontu Ta Lisima Ta Buku Ya Tikronika Ta Wumbirhi
1:11, 12. Leswi Solomoni a nga swi kombela swi kombe Yehovha swaku ka yena a wutlharhi ni wutivi a swi li swa lisima. Swikhongelo swa hina swi kombisa swaku i mpsini leswi hi swi nyikaka lisima hintamu. Se, swi nga va swi li kahle hi tinyika nkama wa ku kambisisa leswi hi talisaka ku swi kombela ka swikhongelo swa hina.
27 KA MARÇO KU YA KA 2 KA ABRIL
XUMA XI NGA KA RITO LA XIKWEMBU | 2 TIKRONIKA 5-7
“Ni Ta Yi Vonelela, Ni Tlhela Ni Yi Hlayisa Masiku Hinkwawu”
Murindzi 15/11/02 paj. 5 par. 1
Mi Nga Tshiki Ku Tlhangana
Loko Davhida se a li hosi aYerusalema, a kombise swaku a a swi navela hintamu ku yakela Yehovha yindlo ya ku saseka. Kambe leswi Davhida a a lwe tinyimpi, Yehovha a mu byele leswi: “A hi wena u nga ta yaka yindlo leyi nga ta dzunisa vito la mina.” Kambe a lange Solomoni n’wana wa yena swaku a mu yakela tempele. (1 Tikronika 22:6-10) Solomoni a nyiketele tempele hi 1026 A.E.C., naswona a teke 7 wa malembe ni hafu swaku a yi yaka. Yehovha a kombise swaku a yi yamukelile tempele liyani, hi ku vula leswi: “Ni xi twile xikhongelo xa wena ni leswi u nga kombela swaku ni va ni timpsalu; ni yendle swaku yindlo leyi u nga yi yaka yi va ya ku kwetsima hi ku veka vito la mina ka yona hi nkama wa ku kala wu nga heli. Ni ta yi vonelela, ni tlhela ni yi hlayisa masiku hinkwawu.” (1 Tihosi 9:3) Yehovha a a ta yi katekisa tempele loko Vayisrayele va tshama na va tshembekile ka yena. Kambe, loko a vo tshika ku yendla swaswinene Yehovha a a ta tshika ku katekisa ndhawu liyani, funtshi yindlo leyi Solomoni a nga yi yaka ‘a yi ta hohloka.’ — 1 Tihosi 9:4-9; 2 Tikronika 7:16, 19, 20.
Perspicaz vol. 2 paj. 1093 par. 5
Tempele
Xitoriya. A tempele yi tame yi va kona ku fikela 607 A.E.C., ku nga nkama lowu yi nga helisiwa hi masonchwa ya Babilona na ma rhangeliwa hi Hosi Nebukadinazara. (2Th 25:9; 2Tk 36:19; Yr 52:13) Yehovha a pfumelele swaku matiko ya Yuda ni Yerusalema ma hluphiwa hileswi a ma tinghenisele ka wugandzeli la mavunhwa. Minkama yin’wani hambi hi xuma xa le tempeleni xi yiviwile. Funtshi minkama yin’wani a vanhu a va nga yi va ya gandzela atempeleni. Hi lembe la 993 A.E.C., ka mfumu wa Robuwamu, Xixaki Hosi ya Gibita a yive xuma xa tempeleni, leswo na ku yo hundza 33 wa malembe na Solomoni a nyiketele tempele. (1Th 14:25, 26; 2Tk 12:9) Hosi Asa a a yi hlonipha yindlo ya Yehovha, kambe swaku a vhikela Yerusalema a teke prata ni woru atempeleni a nyika Benadadi Hosi ya Siriya swaku a helisa ntwananu lowu a a li na wona na Baxa Hosi ya Israyele. — 1Th 15:18, 19; 2Tk 15:17, 18; 16:2, 3.
Lavetela Xuma Ka Rito La Xikwembu
Murindzi 01/12/10 paj. 11 par. 7
A Yi Tiva Kahle “Mbilu Ya Munhu”
Xikhongelo xa Solomoni xi nga hi tiyisa. Swi nga ha yendleka vanghanu va hina va nga swi twisisi hi ku helela leswi hi titwisaka xiswona, va nga ku twisisi ‘ku karhateka ni ku vava loku hi ku twaka.’ (Swivuriso 14:10) Kambe Yehovha wa yi tiva mbilu ya hina naswona wa karhateka hi hina. Loko hi mu chululela swikarhatu leswi hi nga na swona hi xikhongelo swi ta hi vevukela ku swi rhwala. Bibele li li: ‘Rhulani ku vilela ka n’wina hinkwaku ka xona, hikusa xa mi hlayisa.’ — 1 Pedru 5:7.
10 KU YA KA 16 KA ABRIL
XUMA XI NGA KA RITO LA XIKWEMBU | 2 TIKRONIKA 8-9
“A Li Nyike Lisima Wutlharhi”
Murindzi 01/11/99 paj. 20 par. 4
Loko Hi Rhandza Ku Nyika
Hosi ya xisati ya le Xeba yi yendle minzamu swaku yi yendzela Solomoni. Swi tikomba na Xeba a ku li ka ndhawu leyi namuntlha ku nga República do Iémen; leswi nge yena ni lava a va li na yena va fambe ku tlula 1.600 wa makilometru ka makamela swaku va fika Yerusalema. Hi ku ya hi leswi Yesu a nga swi vula, hosi ya xisati ya le Xeba “yi suke hi ka ndhawu ya le kule swinene ya misava.” I mpsini swi nga yendla swaku hosi leyi ya xisati ya le Xeba yi famba mpfhuka lowu hinkwawu? Xikongomelo xa yona a ku li “ku ta yingisela wutlharhi la Solomoni.” — Luka 11:31.
Murindzi 01/07/99 paj. 30 mapar. 4-5
Liyendzo Leli Li Nga Tisa Minkateko
Hosi ya Xisati ya le Xeba yi fike Yerusalema “ni vatirhi va yona ni varhangeli lava yi nga va veka ni makamela lawa a ma rhwale mafurha ya balsamu ni woru la linyingi hintamu ku patsa ni maribye ya lisima.” (1 Tihosi 10:2a) Van’wani va vula swaku ka vatirhi va yona ni varhangeli lava yi nga va veka a ku ni masonchwa lawa a ma ni matlharhi. Leswo swa twala hikusa hosi leyi ya xisati a yi ni matimba naswona a yi hloniphiwa, funtshi ka swilo leswi a yi li na swona a ku ni swilo swaswinyingi swa lisima swinene naswona swa ku dura.
Leswi ndhuma leyi hosi ya xisati ya le Xeba yi nga yi twa hi Solomoni a yi yendla swaku “vito la Yehovha li dzunisiwa,” swa tikomba swaku a a nga mu yendzeli leswaku a yendla manegosiyu kambe hinkwaswu swi komba swaku a a mu yendzela swaku a yingisela wutlharhi la Solomoni ni leswaku a djondza swa ku karhi hi Yehovha Xikwembu xa yena. Swi nga yendleka a a li ntukulu wa Xeme kumbe Hamu, lava a va li vagandzeli va Yehovha. Se, kumbexana a a lava ku tiva leswi yengetelekeke hi wugandzeli la vavhovho va yena.
Murindzi 01/07/99 mapaj. 30-31
Liyendzo Leli Li Nga Tisa Minkateko
Hosi ya xisati ya le Xeba a yi gwentanga hi wutlharhi la Solomoni ni ku ganya ka mfumu wa yena lakakuva “yi hlamale hintamu swinene.” (1 Tihosi 10:4, 5) Vadjondzi van’wani loko va vulavula hi ku hlamala ka hosi leyi ya xisati va vula leswaku yi hele matimba naswona swi nga ha yendleka hambi hi ku dijimayara a dijimayarile. Kambe hambileswi hi kalaka hi nga swi tivi hi ku kongoma leswi nga yendleka, a hosi ya xisati ya le Xeba yi hlamale swinene hi leswi yi nga swi vona ni leswi yi nga swi twa. Phela yi byele vatirhi va Solomoni swaku va tsake swinene hileswi va nga ni lunghelo la ku twa wutlharhi la hosi naswona a dzunise Yehovha hileswi a nga nyika mfumu Solomoni. Ndzhaku ka leswo a nyike hosi tinyiko ta ku dura swinene, funtshi a woru leli yi nga mu nyika lona loko hi kontiwa hi ku ya hi male leyi tirhisiwaka swoswi li fike ka 40.000.000 wa madolari. ‘Na yena Solomoni a nyike hosi ya xisati ya le Xeba hinkwaswu leswi yi nga swi navela ni leswi yi nga swi kombela.’ — 1 Tihosi 10:6-13.
Perspicaz vol. 2 paj. 917 par. 3
Solomoni
Nkama hosi ya xisati ya le Xeba yi nga vona ndlela leyi tempele ni yindlo ya Solomoni swi nga yakisiwa xiswona, ndlela leyi a ku phameliwa hi yona swa ku phuza ni swakudla, ndlela leyi lava a va phamela swakudla a va yambalisa xiswona ni ndlela leyi magandzelo a ma nyikelisiwa xiswona atempeleni, a hlamale hintamu swinene, a za a ku: “Leswi va nga ni byela i switsongo hintamu ka leswi ni nga swi vona. Wena u tlharihile u tlhela u ganya hintamu ku tlula leswi ni nga byeliwa swona.” A tlhele a vula swaku vatirhi va hosi va tsakile hileswi a va yi tirhela ni ku dzunisa Yehovha hileswi a nga kombisa Israyele lirhandzu hi ku va a veka Solomoni tanihi hosi swaku ku li yena a yavanyisaka. — 1Th 10:4-9; 2Tk 9:3-8.
Lavetela Xuma Ka Rito La Xikwembu
Perspicaz vol. 2 mapaj. 1159-1160 par. 3
Xitshamu Xa Wuhosi
Ka switshamu hinkwaswu swi nga tirhisiwa hi tihosi ta Israyele, a xitshamu lexi nga yendliwa hi Solomoni ko va xona ntsena lexi xi nga tlhamuseliwa kahle leswi a xi tshamise xiswona. (1Th 10:18-20; 2Tk 9:17-19) Swi tikomba a xi vekiwe ka “Sala la Xitshamu xa Wuhosi,” leli a li li ka lin’we ka maprediyu lawa a ma yakiwe ka Nhava ya Moriya aYerusalema. (1Th 7:7) ‘Xitshamu lexi xa wuhosi a xi li xikulu, xi yendliwe hi matinyu ya tindlopfu xi tlhela xi namarhetiwa woru la ku tenga naswona henhlanyana ka lani a a khigetela kona a ku ni nchumu xa redondu kasi ka matlhelo hamambirhi a ku ni swa ku khigetela mavoko ka swona.’ Hambileswi swi nga yendlekaka ku tirhisiwe hintamu matinyu ya tindlopfu swaku ku yendliwa xitshamu lexi, loko hi pimisa hi leswi tempele yi nga yakisiwa xiswona, swi tikomba na xi yendliwe hi mapulangu xi gama xi namarhetiwa woru la ku tenga, se xi sasekisiwa hi swilo swi nga yendliwa hi matinyu ya tindlopfu. Loko munhu a xi txuvuka a xi tikomba xi yendliwe hi woru ni matinyu ya tindlopfu. Ndzhaku ka ku ve ku vulavuliwe hi 6 wa swikada leswi yaka ka xitshamu xa wuhosi, Bibele li li: “A ku vekiwe 12 wa swifaniso swa tinghonyama ahenhla ka 6 wa swikada, ka xikada xin’wani ni xin’wani a ku vekiwe xifaniso xa nghonyama hala ni hala a magamu ka xona.” (2Tk 9:17-19) Swa fanela ku va ku tirhisiwe swifaniso swa tinghonyama hikusa tinghonyama ti nyimela matimba ya wuhosi. (Gn 49:9, 10; Nhl 5:5) Swi tikomba na 12 wa tinghonyama toleto a ti nyimela 12 wa tinxaka ta Israyele naswona leswo a swi fanekisela ku tiveka hansi ka mfumu ni ku seketela lweyi a fumaka. A ku vekiwe xibankwani xa ku khigetela minenge kusuhi ni xitshamu xa wuhosi. Hilani xi tlhamuseliwaka hi kona xitshamu lexi xa wuhosi, xi nga yendliwa hi matinyu ya tindlopfu ni woru, lexi a xi tlakukile, xi va ni ndhawu ya redondu ya ku khigetela nhlana ni tinghonyama, a ku nga na xin’wani xa ku fana na xona. Hambi hi vakambisisi a va se tshama va xi kuma xitshamu xa ku fana ni lexiyani, ku nga ha va ka tindhawu tin’wani leti ti nga tshama ti yakiwa kumbe swa ku tsaliwa. Leswo swa twana ni marito lama nge: “A ku nga na mfumu wun’wani lowu a wu yendle nchumu wa ku fana ni lowo.” — 2Tk 9:19.
17 KU YA KA 23 KA ABRIL
XUMA XI NGA KA RITO LA XIKWEMBU | 2 TIKRONIKA 10-12
“Xitsundzuxu Xa Wutlharhi Xa Pfuna”
Murindzi 06/18 paj. 30 par. 4
Rehobuwama — Xana A Tsakeliwe hi Xikwembu?
Rehobuwama a afanele a yendla xiboho. Loko a yendla leswi laviwaka hi vanhu lava, yena, ndjangu wa yena ni hinkwavu lava tshamaka amuntini wa yena vata lahlekeliwa hi wutomi la mafurha leli va hanyaka ka lona. Hi hala tlhelo, loko anga yendli leswi vaswi lavaka, vatamu pfukela. Se a ata yendla yini? Kusungula, a vulavule ni madoda lawa ama pfuna b’ava wakwe. Wona mamu khutaze leswaku a yingisa xitshungu. Kambe matshan’wini ya kuyingisa leswi a byeliweke swona hi madoda, a yingise leswi majaha ya tintanga ya yena ivi a boha kuva a khoma vanhu hi ndlela ya tihanyi. Ava byele leswi: “Nitatikisa nitlhela niyengetela ntirho wa n’wina.Tatana amibe hi minkhavi, kambe mina nitamiba hi minkhavi ya mintwa.” — 2 Tikronika 10:6-14.
Murindzi 01/09/01 paj. 29 mapar. 1-2
U Nga Yendla Yini Swaku U Teka Swiboho Swaswinene?
Yehovha a hi nyika vamakwerhu va ku wupfa bandleni lava hi nga bulaka na vona na hi nge se teka swiboho. (Vaefeza 4:11, 12) Nkama hi kombelaka ku pfuniwa a hi fanelanga hi fana ni vanhu lava va kombelaka ku pfuniwa ka vanhu vavanyingi anze va ya kuma munhu lweyi a nga ta va byela leswi vona va lavaka ku swi twa. Hi fanele hi khumbuka leswi nga yendlekela Robuwamu. Nkama swi nga lava a teka xiboho xa lisima a ye a ya bula ni vanhu lava se a va kulile lava a va tirhele papayi wa yena, kambe handle ka ku yingisa leswi vona va nga mu byela swona a game a ya kombela ku pfuniwa hi majovhem lawa a ma ringana na yena. Ndzhaku ka ku ve a landze leswi wona ma nga mu byela, a teke xiboho xa ku biha swinene hi mhaka leswo, vanhu va ku tala va tshike ku nyima ni mfumu wa yena. — 1 Tihosi 12:1-17.
Loko u lava ku teka xiboho kombela ku pfuniwa ka vanhu lava va nga ni xiperiyensiya, va nga ni wutivi la le Bibeleni naswona lava va hloniphaka matshinya ya minawu ya Yehovha. (Swivuriso 1:5; 11:14; 13:20) Loko swi koteka, tinyiki nkama wa ku pimisa hi matshinya ya minawu lawa ma fambisanaka ni xiyimu xa wena ni swin;wani leswi u nga ha va u swi kumile loko u li karhi u kambisisa. Leswi u nga ta va na u pfumelela Rito la Xikwembu li ku kongomisa, u ta swi kota ku teka xiboho xa kahle. — Vafilipiya 4:6, 7.
Perspicaz vol. 2 paj. 863 par. 3
Robuwamu
Vanhu vanyingi va tiko la Israyele a va tsakanga hi xiboho lexi Robuwamu a nga xi teka. A game a seketeliwa hi tinxaka timbirhi ta yindlo ya Davhida ku nga Yuda ni Benjamini, vaprista, Valevhi ni vanhu van’wani lava a va lumba 10 wa tinxaka. — 1Th 12:16, 17; 2Tk 10:16, 17; 11:13, 14, 16.
Lavetela Xuma Ka Rito La Xikwembu
Perspicaz vol. 1 paj. 668 mapar. 1-2
Madimoni Lama Fanaka Ni Timbuti
Marito lawa ma nga ka Yoxuwa 24:14 ma kombisa swaku Vayisrayele a va nghene hi nhloko ka wugandzeli la swifaniso leswi a swi gandzeliwa aGibita hi mhaka nkama hinkwawu lowu va nga hanya kohala naswona Ezekiyele a vule leswaku va tame va lwisana ni xikarhatu lexi ku fikela nkama wa ku leha. (Ezk 23:8, 21) Hi mhaka leyo, vadjondzi van’wani va pimisa leswaku ku za Yehovha a nyikele nawu amananga swaku a tsimbisa Vayisrayele kuva va gandzela madimoni lawa a ma fana ni timbuti (Lv 17:1-7) ni ku va Yerobuwamu a veke vaprista swaku va tirha ka tindhawu ta ku tlakuka va tlhela va gandzela madimoni lawa ma fanaka ni timbuti, (2Tk 11:15) swi kombisa swaku a ku ni ndlela ya ku karhi ya ku gandzela timbuti leyi Vayisrayele a va yi tirhisa ya ku fana ni leyi a yi tirhisiwa aGibita. Heródoto a vule swaku a Vagriki va tiseketele ka wugandzeli la Vagibita swaku va sungula ku kholwa ka Pã ni ka va sátiros ku nga swikwembu swa ntumbuluku leswi a swi hanya ka makhwati, leswi ndzhaku ka nkamanyana ku nga vuliwa swaku swi ni timhondzo, ntxila ni minenge ya mbuti. Van’wani va vula swaku a ku ve swikwembu swoleswo swi tlhamuseliwa hi ndlela leyi ya ku kala yi nga tolovelekanga hi swona swi nga yendla swaku vanhu va sungula ku pimisa swaku Sathana a ni ntxila, timhondzo ni minenge ya ku fana ni ya mbuti, ku nga tidjondzo leti a ti tale swinene Nkama Lowu Ntiyiso A Wu Lahlekile.
A swi tiviwi swaku kahle kahle xiharhi lexi a ku li yini. Van’wani va vula swaku a ku vuliwa mbuti ya hikakunene, kasi van’wani va vula swaku a ku li xifaniso xa ku fana ni mbuti, naswona a ku na tindzimana leti tlhamuselaka mhaka yoleyo. Se rito leli va nga li tirhisa li kombisa swaku a vanhu lava a va xi gandzela a va pimisa swaku xi fana ni mbuti kumbe na xi ni mavoya yamanyingi. Kumbexana ku va ku tirhisiwe rito leli la ku “mbuti” swi nga ha va swi kombisa swaku a hi xa nchumu ni swaku swifaniso hinkwaswu a hi swa nchumu. Tindzimana tin’wani loko ti vulavula hi swifaniso ti li swa nyenyentsa, leswi kombisaka swaku a hi swa nchumu. — Lv 26:30; Dt 29:17.
24 KU YA KA 30 KA ABRIL
XUMA XI NGA KA RITO LA XIKWEMBU | 2 TIKRONIKA 13-16
“Hi Nga Tshemba Yehovha Loko Swi Ku Yini?”
Majovhem, Mi Nga Yentxa Yini Leswaku Mi Tshembiwa Hi Van’wana?
Nkama na a li jovhem, Hosi Asa a a tiveka hansi naswona a a nga chavi. Hi xikombiso, nkama ku nga fa papayi wa yena Abiya, Asa a ve hosi naswona a helise wukhongeli la mavunhwa atikweni. Naswona “a byele Vayuda swaku va lava Yehovha Xikwembu xa vavhovho va vona va tlhela va yingisa minawu”. (2 Tikro. 14:1-7) Naswona nkama lowu Zera wa Etiyopiya a nga dumela Vayuda na a ni 1 milhão wa masonchwa, Asa a kombele ku pfuniwa hi Yehovha a ku: “Oh Yehovha, ka wena a swi na mhaka swaku hi vanyingi kumbe a hi na ntamu. Hi pfuni Yehovha, hikusa hi tshembe wena Xikwembu xa hina”. Marito lawa ma kombisa swaku Asa a a mu tshemba hintamu Yehovha naswona a a tiyiseka swaku a ta va ponisa vanhu va yena. Hi mhaka leyo, Yehovha ‘a hlule Vayetiyopiya’. — 2 Tikro. 14:8-12.
Murindzi 03/21 mapaj. 5 par. 13
Majovhem, Mi Nga Yentxa Yini Leswaku Mi Tshembiwa Hi Van’wana?
Hinkwerhu ha pfumela swaku ku lwa ni 1 milhão wa masonchwa a ku li xikarhatu xa xikulu. Hambileswo Asa a swi kotile ku ma hlula. Hi ku famba ka nkama Asa a kumane ni xikarhatu xin’wana xa xitsongo kambe a nga zanga a kombela Yehovha swaku a mu pfuna. Loko a chavisiwa hi Baxa hosi ya Israyele, Asa a kombele ku pfuniwa hi hosi ya Siriya ku nga li Yehovha. Phela kuva a yentxe leswo a tikokele ndzilo. Hi ku tirhisa muprofeta Hanani Yehovha a byele Asa a ku: “Leswi u nga tshemba hosi ya Siriya, u nga tshembi Yehovha Xikwembu xa wena, masonchwa ya hosi ya Siriya ma ku balekile”. Vhela swi yentxekile, hikusa ku sukela kolanu, Asa a a hanya hi tinyimpi na Hosi Baxa. (2 Tikro. 16:7, 9; 1 Tiho. 15:32) Hi djondza yini ka mhaka leyi?
Majovhem, Mi Nga Yentxa Yini Leswaku Mi Tshembiwa Hi Van’wana?
Minkama hinkwayu tiveki hansi naswona tama u tshemba Yehovha. Phela nkama u nga tsakamisiwa u kombise swaku u ni lipfumelo naswona wa mu tshemba Yehovha. Leswo swi yentxe swaku Yehovha a ku yamukela ka ndjangu wa yena. Leswaku Yehovha a tama a ku tsakela na wena u fanele u tama u mu tshemba. Phela swi nga vevuka ku tshemba Yehovha loko u yentxa swiboho swa swikulu leswi nga txintxaka wutomi la wena. Kambe swi li yini loko u yentxa swiboho swa switsongo? I swa lisima ku tshemba Yehovha loko u yentxa swiboho swa switsongo, swa ku fana ni ku langa leswi u nga ta tihungata hi swona, kumbe loko u yentxa swiboho swa swikulu swa ku fana ni ku langa ntirho kumbe mintirho leyi u nga ta yi yentxa ka nhlengeletanu ya Yehovha. Handle ka ku titshemba, zama ku tirhisa Bibele swaku li ku pfuna ku yentxa swiboho swa swinene. (Swi. 3:5, 6) Loko u yentxa leswo u ta tsakisa Yehovha naswona vamakwerhu bandleni va ta ku hlonipha. — Lerha 1 Timotiyu 4:12.
Lavetela Xuma Ka Rito La Xikwembu
Murindzi 03/17 mapaj. 19-20 par. 7
Tirhela Yehovha Hi Mbilu Ya Wena Hinkwayu!
Ndlela yin’wani ya ku tekelela hosi Asa i ku tirhela Yehovha hi mbilu hinkwayu hambiloko xiyimu xi hi karhatela. Se, hi nga mu tekelelisa ku yini Asa? Hi nga mu tekelela hi ku tshama hi tshembekile ka Yehovha ni ku yendla swaku bandla li tshama na li basile. Swi lave xivindzi swaku Asa a susa vhovho wa yena ka xitulu xa ku va mamani wa hosi. Minkama yin’wani swi nga ha lava swaku na wena u fana na Asa. Hi xikombiso loko xirhu xa ndjangu wa wena kumbe munghanu wa wena a susiwa bandleni hileswi a nga djoha a gama a nga tisoli, u nga tama u titlhanganisa ni munhu yelweyo? U nga tinyimisela ku yendla yini ka xiyimu xolexo?