Ebandeli

3 Sikoyo nyoka+ ezalaki ekɛngɛ+ koleka banyama nyonso ya zamba ya mokili oyo Yehova Nzambe asalaki.+ Na bongo abandaki koloba na mwasi+ ete: “Ezali mpenza solo ete Nzambe alobaki na bino ete bosengeli te kolya mbuma ya nzete nyonso ya elanga?”+ 2 Bongo mwasi alobaki na nyoka ete: “Tokoki kolya mbuma ya banzete ya elanga.+ 3 Kasi na oyo etali kolya mbuma ya nzete oyo ezali na katikati ya elanga,+ Nzambe alobaki ete: ‘Bosengeli kolya yango te, ɛɛ, bosengeli kosimba yango te mpo bókufa te.’”+ 4 Bongo nyoka alobaki na mwasi ete: “Bokokufa soki moke te.+ 5 Mpo Nzambe ayebi ete mokolo kaka bokolya yango miso na bino ekofungwama mpenza mpe bokokóma mpenza lokola Nzambe, bokoyeba malamu ná mabe.”+

6 Yango wana, mwasi amonaki ete nzete yango ezalaki malamu na kolya mpe ete ezalaki eloko oyo miso ekokaki kolula, ɛɛ, nzete yango ezalaki kitoko na kotala.+ Bongo akamataki mbuma na yango mpe alyaki. Na nsima apesaki mpe mobali na ye ntango azalaki elongo na ye mpe ye alyaki.+ 7 Bongo miso na bango mibale efungwamaki mpe babandaki kososola ete bazali bolumbu.+ Na yango batongaki nkasa ya figi mpe bamisalelaki biloko ya kozipa loketo.+

8 Na nsima bayokaki mongongo ya Yehova Nzambe wana azalaki kotambola na elanga na ntango oyo mwa mopɛpɛ kitoko epɛpaka na mokolo,+ mpe mobali ná mwasi na ye bakendaki komibomba na katikati ya banzete ya elanga mpo bámonana te liboso ya elongi ya Yehova Nzambe.+ 9 Mpe Yehova Nzambe azalaki kobenga moto mpe koloba na ye ete: “Ozali wapi?”+ 10 Nsukansuka alobaki ete: “Nayokaki mongongo na yo na elanga, kasi nabangaki mpamba te nazalaki bolumbu, yango wana namibombaki.”+ 11 Na yango ye alobaki ete: “Nani ayebisaki yo ete ozali bolumbu?+ Olei nde mbuma ya nzete oyo napesaki yo etinda ete olya yango te?”+ 12 Mpe moto alobaki lisusu ete: “Mwasi oyo opesaki ete azala elongo na ngai, apesaki ngai mbuma ya nzete yango, na bongo nalyaki.”+ 13 Bongo Yehova Nzambe alobaki na mwasi ete: “Likambo nini oyo yo osali?” Na yango mwasi azongisaki ete: “Nyoka—akosaki ngai, bongo nalyaki.”+

14 Mpe Yehova Nzambe alobaki na nyoka+ ete: “Lokola osali likambo oyo, olakelami mabe na kati ya banyama nyonso ya mboka mpe na kati ya banyama nyonso ya zamba ya mokili. Okotambola na libumu na yo mpe okolya putulu mikolo nyonso ya bomoi na yo.+ 15 Mpe nakotya+ bonguna+ kati na yo+ ná mwasi+ mpe kati na momboto na yo+ ná momboto na ye.+ Ye+ akopanza motó+ na yo+ mpe yo+ okozokisa ye+ na litindi.”+

16 Alobaki na mwasi ete: “Nakobakisa mpenza mpasi ya zemi na yo;+ okobota bana na mpasi,+ mpe mposa na yo ekozala epai ya mobali na yo, mpe ye akozala na bokonzi likoló na yo.”+

17 Mpe alobaki na Adama ete: “Lokola oyoki mongongo ya mwasi na yo mpe olei mbuma ya nzete oyo napesaki yo etinda oyo+ ete: ‘Osengeli kolya mbuma na yango te,’ mabele elakelami mabe mpo na yo.+ Mikolo nyonso ya bomoi na yo okolya na mpasi biloko oyo yango ekobota.+ 18 Mpe yango ekobimisela yo banzubɛ mpe matiti ya nsendensende,+ mpe osengeli kolya milona ya mokili. 19 Na motoki ya elongi na yo okolya limpa kino okozonga na mabele, mpo outaki na yango.+ Mpamba te ozali putulu mpe okozonga na putulu.”+

20 Nsima na yango Adama apesaki mwasi na ye nkombo Eva,+ mpamba te asengelaki kokóma mama ya moto nyonso oyo azali na bomoi.+ 21 Mpe Yehova Nzambe asalelaki Adama ná mwasi na ye bilamba milai ya mposo ya nyama mpe alatisaki bango yango.+ 22 Mpe Yehova Nzambe alobaki lisusu ete: “Awa moto akómi lokola moko na biso na ndenge ayebi malamu ná mabe,+ mpe sikoyo, mpo asembola lobɔkɔ na ye te mpe azwa lisusu mbuma ya nzete ya bomoi+ mpe alya yango mpe azala na bomoi mpo na ntango oyo etyami ndelo te,—” 23 Na yango, Yehova Nzambe abenganaki ye na elanga ya Edene,+ akende kolona bilanga na mabele epai akamatamaki.+ 24 Na bongo abenganaki moto mpe atyaki bakeruba+ na ɛsti ya elanga ya Edene+ mpe mopanga, oyo mɔtɔ ezalaki kopela na ebende na yango, ezalaki kaka kobalukabaluka mpo na kokɛngɛla nzela ya nzete ya bomoi.