Epai ya Baroma
12 Bandeko, lokola Nzambe amoniseli bino motema mawa na ye, nabondeli bino bókaba nzoto na bino+ lokola mbeka ya bomoi, ya bosantu,+ oyo Nzambe akoki kondima. Mpe bósalela makoki na bino ya kokanisa wana bozali kosalela ye mosala mosantu.+ 2 Bótika kolanda makambo ya mokili oyo,* kasi bóbongwana mpe bóbongola lolenge na bino ya kokanisa,+ mpo bómindimisa bino moko mokano ya Nzambe oyo ezali malamu,+ ekoki kondimama mpe ezali ya kokoka.
3 Mpo na boboto monene oyo bamoniselaki ngai, nazali koyebisa moto nyonso na kati na bino ete akanisa te mpo na ye moko koleka ndenge oyo ye azali mpenza;+ kasi akanisa nde na ndenge oyo ezali komonisa ete azali na makanisi malamu, moto na moto na kolanda bonene ya kondima oyo Nzambe apesi ye.*+ 4 Mpo nzoto ezali na biteni ebele,+ kasi biteni yango nyonso esalaka mosala kaka moko te, 5 ndenge moko mpe, atako tozali ebele, tozali nzoto kaka moko na bomoko na Kristo. Kasi tozali biteni ya nzoto, oyo mokomoko na yango ezali ndeko ya mosusu.+ 6 Biso nyonso tozali na makabo ekeseni na kolanda boboto monene oyo Nzambe amoniseli biso.+ Soki tozali na likabo ya kosakola, tósakola na kolanda kondima oyo tozali na yango; 7 soki bapesi biso mosala, tómipesa na yango; soki likabo na biso ezali ya koteya, tósala nyonso mpo na koteya;+ 8 soki likabo na biso ezali ya kolendisa basusu, tólendisa;+ soki likabo na biso ezali ya kokabela basusu, tósala yango na lobɔkɔ pɛtɛɛ;+ moto oyo akambaka,* asala yango na lisɛki te;+ moto oyo ayokelaka bato mawa, asala yango na esengo.+
9 Bolingo na bino ezala na bokosi te.+ Bóyina oyo ezali mabe;+ bókangama na oyo ezali malamu. 10 Bólinganaka na motema lokola bato ya libota moko.* Mpo na kopesana lokumu, bózala bato ya liboso.+ 11 Bósalaka mosala makasi, bózala bagɔigɔi te.*+ Bózala na molende mingi na lisalisi ya elimo santu.+ Bósalela Yehova* lokola baombo.+ 12 Bósepelaka na elikya. Bóyika mpiko ntango bozali kokutana na minyoko.+ Bótika te kobondela.+ 13 Bókabelaka basantu na kolanda bamposa na bango.+ Bózalaka na ezaleli ya koyamba bapaya.+ 14 Bópambolaka baoyo bazali konyokola bino;+ bópambolaka kasi bólakelaka mabe te.+ 15 Bósepelaka elongo na bato oyo bazali kosepela; bólelaka elongo na bato oyo bazali kolela. 16 Bótalelaka basusu ndenge bomitalelaka; bózala na makanisi ya komitombola te, kasi bózala na makanisi ya komikitisa.+ Bókanisa te ete bozali na bwanya koleka bato mosusu nyonso.+
17 Bózongisela moto mabe na mabe te.+ Bósalaka nde makambo oyo ezali malamu na miso ya bato nyonso. 18 Soki likoki ezali, soki etaleli kaka bino, bózala na kimya na bato nyonso.+ 19 Bandeko ya bolingo, moto oyo asali bino mabe, bózongisela ye mabe te kasi bótikela nde nkanda* esika;+ mpo ekomamá ete: “‘Kozongisa mabe ezali likambo na ngai; ngai nde nakozongisa mabe,’ Yehova* alobi bongo.”+ 20 Kasi, “soki monguna na yo azali na nzala, pesá ye eloko alya; soki azali na mposa ya mai, pesá ye mai amɛla; mpo ntango ozali kosala bongo okotya makala ya mɔtɔ na motó na ye.”*+ 21 Kotika te mabe elonga yo, kasi saláká malamu mpo na kolonga mabe.+