Mokanda ya liboso epai ya Bakorinti

13 Soki nazali koloba na minɔkɔ ya bato mpe ya baanzelu kasi nazali na bolingo te, nazali lokola ebende ya bronzɛ oyo ezali kolela to sɛmbalɛ oyo ezali kobɛta. 2 Soki nazali na likabo ya bisakweli mpe nazali kokanga ntina ya basekele mosantu nyonso mpe nazali na boyebi nyonso,+ mpe soki nazali na kondima monene oyo ekoki ata kolongola bangomba mpe kotya yango epai mosusu, kasi nazali na bolingo te, nazali mpamba.*+ 3 Soki napesi biloko na ngai nyonso mpo na koleisa bamosusu,+ mpe soki nakabi nzoto na ngai, mpo namikumisa, kasi nazali na bolingo te,+ nazali kozwa litomba ata moke te.

4 Bolingo+ ezali na motema molai+ mpe na boboto.+ Bolingo ezali na zuwa te,+ emikumisaka te, emivimbisaka na lolendo te,+ 5 esalaka makambo ya nsɔni te,+ elukaka matomba na yango moko te,+ esilikaka te.+ Ebombaka mabe na motema te.+ 6 Esepelaka na makambo ya kozanga bosembo* te,+ kasi esepelaka nde na solo. 7 Ekangaka motema na makambo nyonso,+ endimaka makambo nyonso,+ elikyaka makambo nyonso+ mpe eyikaka mpiko na makambo nyonso.+

8 Bolingo esilaka soki moke te. Kasi ezala makabo ya bisakweli, ekolongolama; ezala likabo ya koloba na minɔkɔ mosusu, ekosuka; ezala boyebi, ekolongolama. 9 Mpo sikoyo tozali na boyebi ya ndambo+ mpe bisakweli na biso ezalaka mobimba te, 10 kasi ntango eloko ya mobimba ekoya, oyo ya ndambo ekolongolama. 11 Ntango nazalaki mwana moke, nazalaki koloba lokola mwana moke, kokanisa lokola mwana moke, kotalela makambo lokola mwana moke; kasi sikoyo lokola nakómi mobali, nalongoli bizaleli ya mwana moke. 12 Mpo sikoyo tozali komona bandelo molilimolili* na talatala ya ebende, kasi na ntango yango, ekozala boye mpenza na miso. Sikoyo nayebi kaka ndambo, kasi na ntango yango nakoyeba malamumalamu lokola ngai mpe nayebani malamumalamu. 13 Nzokande, sikoyo biloko oyo misato ezali: kondima, elikya mpe bolingo, kasi oyo eleki na kati na yango ezali bolingo.+