Levitike

1 Eaba Jehova o bitsa Moshe ’me o bua le eena tenteng ea pokano,+ o re: 2 “Bua le bara ba Iseraele,+ u re ho bona, ‘Haeba motho e mong ho lōna a ka hlahisetsa Jehova nyehelo e tsoang liphoofolong tse ruuoang, le lokela ho hlahisa nyehelo ea lōna e tsoang mohlapeng oa liphoofolo tse khōlō le mohlapeng oa likhutšoane.

3 “‘Haeba nyehelo ea hae e le nyehelo ea secheso+ e tsoang mohlapeng oa liphoofolo tse khōlō, o lokela ho hlahisa e tona, e phetseng hantle.+ O lokela ho e hlahisa monyako oa tente ea pokano ka boithatelo ka pel’a Jehova.+ 4 O tla beha letsoho la hae holim ’a hlooho ea nyehelo ea secheso, ’me e tla amoheloa+ ka mosa bakeng sa hore a koahele libe tsa hae.+

5 “‘Joale pohoana e tla hlajoa ka pel’a Jehova; bara ba Arone, baprista,+ ba tla hlahisa mali ’me ba fafatse mali ho potoloha aletare,+ e monyako oa tente ea pokano. 6 Nyehelo ea secheso e tla buuoa ’me e khabeloe likotoana.+ 7 Bara ba Arone, baprista, ba tla beha mollo aletareng+ ’me ba behe patsi ka tlhophiso holim ’a mollo.+ 8 Bara ba Arone, baprista, ba behe likotoana+ ka tlhophiso ’me hlooho le mohlehlo li be holim ’a patsi e mollong o aletareng. 9 Mala+ a eona le litlhakoana tsa eona li tla hlatsuoa ka metsi; ’me moprista a etse hore kaofela ha eona e kubelle aletareng e le nyehelo ea secheso, nyehelo e entsoeng ka mollo e monko o khathollang ho Jehova.+

10 “‘Haeba nyehelo ea hae bakeng sa nyehelo ea secheso e tsoa mohlapeng oa likhutšoane,+ lipheleung tse nyenyane kapa lipōling, o tla hlahisa+ e tona,+ e phetseng hantle. 11 E tla hlabeloa lehlakoreng la aletare ka leboea ka pel’a Jehova, ’me bara ba Arone, baprista, ba fafatse mali a eona ho potoloha aletare.+ 12 O tla e khabela likotoana le hlooho ea eona le mohlehlo oa eona, ’me moprista a li behe ka tlhophiso holim ’a patsi e mollong o aletareng.+ 13 O tla hlatsoa mala+ le litlhakoana+ ka metsi; moprista a e hlahise kaofela ’me a etse hore e kubelle+ aletareng. Ke nyehelo ea secheso, nyehelo e entsoeng ka mollo e monko o khathollang ho Jehova.+

14 “‘Leha ho le joalo, haeba nyehelo ea hae eo e leng nyehelo ea secheso ea Jehova e le ea linonyana, joale o tla hlahisa nyehelo ea hae ea maebana-khoroana+ kapa maebana.+ 15 Moprista a e hlahise aletareng ’me a e soenetse+ molala a etse hore e kubelle aletareng, empa mali a eona a fophisoe lehlakoreng la aletare. 16 O tla ntša kiila ea eona hammoho le masiba a eona ’me a li lahlele ka thōko ho aletare, ka bochabela, sebakeng sa molora o mafura.+ 17 A e ngamole mapheong. A se ke a e arola.+ Joale moprista a etse hore e kubelle aletareng holim ’a patsi e mollong. Ke nyehelo ea secheso,+ nyehelo e entsoeng ka mollo e monko o khathollang ho Jehova.+

2 “‘Joale haeba moea o itseng o ka hlahisa nyehelo ea lijo-thollo+ e le nyehelo ea Jehova, nyehelo ea oona e lokela ho ba phofo e thumisehileng;+ o tšele oli holim ’a eona ’me o behe libano tse tšoeu holim ’a eona. 2 O e tlise ho bara ba Arone, baprista, ’me ho eona moprista a qotse lefupu la phofo ea eona e thumisehileng le oli ea eona hammoho le libano tsa eona tse tšoeu; ’me a etse hore e kubelle e le khopotso+ ea eona aletareng, e le nyehelo e entsoeng ka mollo e monko o khathollang ho Jehova. 3 Se setseng nyehelong ea lijo-thollo ke sa Arone le bara ba hae,+ e le ntho e halalelang+ ka ho fetisisa linyehelong tsa Jehova tse entsoeng ka mollo.

4 “‘Haeba u hlahisa nyehelo ea lijo-thollo e le nyehelo ea ntho e apehiloeng ontong, e lokela hore e be ea phofo e thumisehileng, mahobe a sa lomosoang a lesoba hare+ a kolobisitsoeng ka oli kapa liphaphatha tse sa lomosoang+ tse tlotsitsoeng ka oli.+

5 “‘Haeba nyehelo ea hao e le nyehelo ea lijo-thollo tse tsoang paneng,+ e lokela hore e be ea phofo e thumisehileng e kolobisitsoeng ka oli, e sa lomosoang. 6 E lokela ho siloa, ’me u tšele oli holim ’a eona.+ Ke nyehelo ea lijo-thollo.

7 “‘Haeba nyehelo ea hao e le nyehelo ea lijo-thollo tse tsoang pitseng e tšelang mafura a mangata, e lokela ho etsoa ka phofo e thumisehileng le oli. 8 U tlise ho Jehova nyehelo ea lijo-thollo e entsoeng ka tsena; e hlahisoe ho moprista ’me a e atametse aletareng. 9 Moprista a nke e ’ngoe ea nyehelo ea lijo-thollo e le khopotso+ ea eona ’me a etse hore e kubelle aletareng, e le nyehelo e entsoeng ka mollo e monko o khathollang ho Jehova.+ 10 Se setseng nyehelong ea lijo-thollo ke sa Arone le bara ba hae, ke ntho e halalelang ka ho fetisisa linyehelong tsa Jehova tse entsoeng ka mollo.+

11 “‘Ho se ke ha e-ba le nyehelo ea lijo-thollo e hlahisoang ho Jehova e etsoang ka ntho e lomositsoeng,+ hobane le ke ke la etsa hore hlama e bolila le mahe a linotši li kubelle e le nyehelo e entsoeng ka mollo ea Jehova.

12 “‘Le tla li hlahisa ho Jehova e le nyehelo ea litholoana tsa pele,+ ’me li se ke tsa nyolohela aletareng hore e be monko o khathollang.

13 “‘Nyehelo e ’ngoe le e ’ngoe ea nyehelo ea hao ea lijo-thollo u tla e nōka ka letsoai;+ ’me u se ke ua lumella hore letsoai la selekane+ sa Molimo oa hao le be sieo nyehelong ea hao ea lijo-thollo. U tla hlahisa letsoai hammoho le nyehelo e ’ngoe le e ’ngoe ea hao.

14 “‘Haeba u hlahisetsa Jehova nyehelo ea lijo-thollo tsa litholoana tsa pele tse butsoitseng, u hlahise liqoapi tse tala tse besitsoeng ka mollo, litlhaku tsa lijo-thollo tse sa tsoa khuoa, e le nyehelo ea lijo-thollo ea litholoana tsa hao tsa pele tse butsoitseng.+ 15 U tšele oli holim ’a eona ’me u behe libano tse tšoeu holim ’a eona. Ke nyehelo ea lijo-thollo.+ 16 Moprista a etse hore khopotso+ ea eona e kubelle, ke hore, e ’ngoe ea litlhaku tsa eona le oli, hammoho le libano tsohle tsa eona tse tšoeu, e le nyehelo e entsoeng ka mollo ea Jehova.

3 “‘Haeba nyehelo ea hae e le sehlabelo se kopanetsoeng,+ haeba a se hlahisa se tsoa mohlapeng oa liphoofolo tse khōlō, ebang ke e tona kapa ke e tšehali, o tla hlahisa e phetseng hantle+ ka pel’a Jehova. 2 A behe letsoho hloohong+ ea nyehelo ea hae, ’me e hlajoe monyako oa tente ea pokano; bara ba Arone, baprista, ba fafatse mali ho potoloha aletare. 3 A hlahise se seng sa sehlabelo se kopanetsoeng e le nyehelo e entsoeng ka mollo ea Jehova, e leng, mafura+ a koahelang mala, esita le mafura ’ohle a holim ’a mala,+ 4 le liphio+ tse peli le mafura a holim ’a tsona, a tšoanang le a holim ’a sehlana. Ha e le karolo e leketlileng sebeteng, o tla e tlosa hammoho le liphio. 5 Bara+ ba Arone ba etse hore e kubelle+ aletareng, holim ’a nyehelo ea secheso e holim ’a patsi+ e mollong, e le nyehelo e entsoeng ka mollo e monko+ o khathollang ho Jehova.

6 “‘Haeba nyehelo ea hae e tsoa mohlapeng oa likhutšoane bakeng sa sehlabelo se kopanetsoeng sa Jehova, o tla hlahisa e tona kapa e tšehali, e phetseng hantle.+ 7 Haeba a hlahisa pheleu e nyenyane e le nyehelo ea hae, joale a e hlahise ka pel’a Jehova.+ 8 A behe letsoho hloohong+ ea nyehelo ea hae, ’me e hlajoe+ ka pel’a tente ea pokano; ’me bara ba Arone ba fafatse mali a eona ho potoloha aletare. 9 Ho tsoa sehlabelong se kopanetsoeng a hlahise mafura a eona e le nyehelo e entsoeng ka mollo ea Jehova.+ O tla tlosa mohatla+ oohle o mafura haufi le lesapo la mokokotlo, le mafura a koahelang mala, esita le mafura ’ohle a holim ’a mala,+ 10 le liphio tse peli le mafura a holim ’a tsona, a tšoanang le a holim ’a sehlana. Ha e le karolo e leketlileng+ sebeteng, o tla e tlosa hammoho le liphio. 11 Moprista a etse hore e kubelle+ aletareng e le lijo,+ nyehelo e entsoeng ka mollo ea Jehova.

12 “‘Haeba nyehelo ea hae e le pōli,+ joale a e hlahise ka pel’a Jehova. 13 A behe letsoho hloohong ea eona,+ ’me e hlajoe+ ka pel’a tente ea pokano; bara ba Arone ba fafatse mali a eona ho potoloha aletare. 14 Ka eona a hlahise nyehelo ea hae, e le nyehelo e entsoeng ka mollo ea Jehova, mafura a koahelang mala, esita le mafura ’ohle a holim ’a mala,+ 15 le liphio tse peli le mafura a holim ’a tsona, a tšoanang le a holim ’a sehlana. Ha e le karolo e leketlileng sebeteng, o tla e tlosa hammoho le liphio. 16 Moprista a etse hore li kubelle aletareng e le lijo, nyehelo e entsoeng ka mollo bakeng sa monko o khathollang. Mafura ’ohle ke a Jehova.+

17 “‘Ke taelo e hlomamisitsoeng ho isa nakong e sa lekanyetsoang bakeng sa meloko ea lōna, libakeng tsohle tsa lōna tsa bolulo: Ho hang le se ke la ja mafura leha e le afe kapa mali+ leha e le afe.’”

4 Jehova a tsoela pele ho bua le Moshe, a re: 2 “Bua le bara ba Iseraele, u re, ‘Haeba moea+ o etsa sebe ka phoso+ linthong leha e le life tseo Jehova a laelang hore li se ke tsa etsoa, ’me o hlile o etsa e ’ngoe ea tsona:

3 “‘Haeba moprista, ea tlotsitsoeng,+ a etsa sebe+ hoo a tlisetsang sechaba molato, joale bakeng sa sebe+ sa hae seo a se entseng a hlahisetse Jehova pohoana e phetseng hantle e le nyehelo ea sebe. 4 A tlise poho monyako oa tente ea pokano+ ka pel’a Jehova ’me a behe letsoho holim ’a hlooho ea poho,+ ebe o hlaba poho ka pel’a Jehova. 5 Moprista, ea tlotsitsoeng,+ a nke mali a poho ’me a a tlise ka tenteng ea pokano; 6 moprista a qopetse mali ka monoana+ ’me a fafatse mali a mang ka makhetlo a supileng+ ka pel’a Jehova ka pel’a lesira la sebaka se halalelang. 7 Moprista a tlotse mali a mang holim ’a manaka+ a aletare ea libano tse nkhang hamonate ka pel’a Jehova, e ka har’a tente ea pokano, ’me mali a mang kaofela a poho a a tšele karolong e ka tlaase+ ea aletare ea nyehelo ea secheso, e monyako oa tente ea pokano.

8 “‘Ha e le mafura ’ohle a poho ea nyehelo ea sebe, o tla nka ho ’ona mafura a koahelang mala, esita le mafura ’ohle a holim ’a mala,+ 9 le liphio tse peli le mafura a holim ’a tsona, a tšoanang le a holim ’a sehlana. Ha e le karolo e leketlileng sebeteng, o tla e tlosa hammoho le liphio.+ 10 Ho tla tšoana le ka se nkiloeng pohong ea sehlabelo se kopanetsoeng.+ Moprista a etse hore li kubelle aletareng ea nyehelo ea secheso.+

11 “‘Empa ha e le letlalo la poho le nama eohle ea eona hammoho le hlooho ea eona le litlhakoana tsa eona le mala a eona le bolokoe ba eona,+ 12 a ntšetse poho eohle mathōkong a liahelo+ sebakeng se hloekileng moo ho qhalloang molora+ o mafura teng, ’me a e chese holim ’a patsi mollong.+ E lokela ho chesetsoa moo ho qhalloang molora o mafura teng.

13 “‘Joale haeba phutheho eohle ea Iseraele e etsa phoso+ ’me taba eo e patoa mahlong a phutheho ka hore ebe e entse e ’ngoe ea lintho tseo Jehova a laelang hore li se ke tsa etsoa ’me kahoo e le molato,+ 14 ’me sebe seo e se entseng khahlanong le tsona se tsebahala,+ joale phutheho e hlahise pohoana bakeng sa nyehelo ea sebe ’me e e tlise ka pel’a tente ea pokano. 15 Banna ba baholo ba phutheho ba behe matsoho holim ’a hlooho+ ea poho ka pel’a Jehova, ’me poho e hlajoe ka pel’a Jehova.

16 “‘Joale moprista, ea tlotsitsoeng,+ a tlise mali a poho ka tenteng ea pokano.+ 17 Moprista a qopetse mali a mang ka monoana ’me a a fafatse ka makhetlo a supileng ka pel’a Jehova ka pel’a lesira.+ 18 Ka mali a mang o tla tlotsa manaka a aletare+ e ka pel’a Jehova, e tenteng ea pokano; ’me mali a mang kaofela o tla a tšollela karolong e ka tlaase ea aletare ea nyehelo ea secheso,+ e monyako oa tente ea pokano. 19 O tla nka mafura ’ohle a eona a a tlose ho eona, ’me a etse hore a kubelle aletareng.+ 20 A etse poho eo feela joalokaha a entse poho e ’ngoe ea nyehelo ea sebe. Ke tsela eo a tla e etsa ka eona; ’me moprista a koahele libe+ tsa bona, kahoo ba tla li tšoareloa. 21 A ntšetse poho mathōkong a liahelo ’me a e chese, feela joalokaha a chesitse poho+ ea pele. Ke nyehelo ea sebe bakeng sa phutheho.+

22 “‘Ha morenana+ a etsa sebe ’me e se ka morero, a etsa e ’ngoe ea lintho tseo Jehova Molimo oa hae a laelang hore li se ke tsa etsoa,+ kahoo a le molato, 23 kapa a tsebisitsoe+ sebe seo a se entseng khahlanong le taelo, joale a tlise potsanyane e tona,+ e phetseng hantle e le nyehelo ea hae. 24 A behe letsoho holim ’a hlooho+ ea potsanyane ’me a e hlabele sebakeng seo nyehelo ea secheso e hlabeloang ho sona kamehla ka pel’a Jehova.+ Ke nyehelo ea sebe.+ 25 Moprista a qopetse mali a mang a nyehelo ea sebe ka monoana ’me a a tlotse manakeng+ a aletare ea nyehelo ea secheso, ’me o tla tšela mali a mang a eona kaofela karolong e ka tlaase ea aletare ea nyehelo ea secheso. 26 O tla etsa hore mafura ’ohle a eona a kubelle aletareng joaloka mafura a sehlabelo se kopanetsoeng;+ ’me moprista a koahele libe tsa hae bakeng sa sebe+ sa hae, kahoo o tla se tšoareloa.

27 “‘Haeba moea leha e le ofe bathong ba naha o etsa sebe e se ka morero ka ho etsa e ’ngoe ea lintho tseo Jehova a laelang hore li se ke tsa etsoa ’me o e-ba molato,+ 28 kapa o tsebisoa sebe seo o se entseng, joale o tlise potsanyane e tšehali+ e le nyehelo ea oona, e phetseng hantle, bakeng sa sebe sa oona seo o se entseng. 29 O behe letsoho holim ’a hlooho+ ea nyehelo ea sebe ’me o hlabele nyehelo ea sebe sebakeng se tšoanang le sa nyehelo ea secheso.+ 30 Moprista a qopetse mali a mang a eona ka monoana ’me a a tlotse manakeng+ a aletare ea nyehelo ea secheso, ’me o tla tšela mali a mang a eona kaofela karolong e ka tlaase ea aletare.+ 31 O tla tlosa mafura+ ’ohle a eona, feela joalokaha mafura a ile a tlosoa sehlabelong se kopanetsoeng;+ ’me moprista a etse hore a kubelle aletareng e le monko o khathollang ho Jehova;+ moprista a koahele libe tsa oona, ’me kahoo o tla li tšoareloa.+

32 “‘Empa haeba o ka tlisa konyana+ e le nyehelo ea oona bakeng sa nyehelo ea sebe, o lokela ho tlisa konyana e phetseng hantle+ e tšehali. 33 O behe letsoho holim ’a hlooho ea nyehelo ea sebe ’me o e hlabe e le nyehelo ea sebe sebakeng seo nyehelo ea secheso e hlabeloang+ ho sona kamehla. 34 Moprista a qopetse mali a mang a nyehelo ea sebe ka monoana ’me a a tlotse manakeng a aletare ea nyehelo ea secheso,+ ’me o tla tšela mali a mang a eona kaofela karolong e ka tlaase ea aletare. 35 O tla tlosa mafura ’ohle a eona ka mokhoa o tšoanang le oo mafura a pheleu e nyenyane ea sehlabelo se kopanetsoeng a tlosoang ka oona, ’me moprista a etse hore li kubelle aletareng holim ’a linyehelo tsa Jehova tse entsoeng ka mollo;+ moprista a koahele libe+ tsa oona ka lebaka la sebe seo o se entseng, ’me kahoo o tla se tšoareloa.+

5 “‘Joale haeba moea+ o etsa sebe ka hore ebe o utloile thohako+ ea phatlalatsa ’me e le paki kapa o e bone kapa o tsebile ka eona, haeba o sa e tlalehe,+ joale o arabelle phoso ea oona.

2 “‘Kapa haeba moea o ama ntho e sa hloekang, ebang ke setopo sa sebata kapa setopo sa phoofolo e ruuoang e sa hloekang kapa setopo sa sebōpuoa se nyekenyehang se sa hloekang,+ le hoja o patetsoe seo,+ ho ntse ho le joalo ha oa hloeka ’me o molato.+ 3 Kapa haeba o ama ho se hloeke ha motho mabapi le ho se hloeke+ leha e le hofe ha hae ho ka mo silafatsang, le hoja o ne o patetsoe seo, empa leha ho le joalo o tsebile ka seo, joale o molato.

4 “‘Kapa haeba moea o hlapanya ho isa bohōleng ba ho bua o sa nahane+ ka molomo oa oona ho etsa bobe+ kapa ho etsa se molemo mabapi le ntho leha e le efe eo motho a ka e buang a sa nahane polelong e hlapanyelitsoeng,+ le hoja o patetsoe seo, empa leha ho le joalo o tsebile ka seo, joale o molato mabapi le e ’ngoe ea lintho tsena.

5 “‘Haeba o e-ba molato mabapi le e ’ngoe ea lintho tsena, joale o bolele+ hore na o entse sebe ka tsela efe. 6 O tlise nyehelo ea oona ea molato+ ho Jehova bakeng sa sebe seo o se entseng, e leng, e tšehali ho tsoa mohlapeng oa likhutšoane, konyana e tšehali kapa potsanyane e tšehali,+ bakeng sa nyehelo ea sebe; ’me moprista a koahele libe tsa oona bakeng sa sebe sa oona.+

7 “‘Leha ho le joalo, haeba o sa khone ho fana ka nku,+ joale o tlise ho Jehova maebana-khoroana+ a mabeli kapa maebana a mabeli e le nyehelo ea molato bakeng sa sebe seo o se entseng, le leng bakeng sa nyehelo ea sebe+ ’me le leng bakeng sa nyehelo ea secheso. 8 O a tlise ho moprista, eo pele a lokelang ho hlahisa la nyehelo ea sebe ’me a le soenetse+ molala karolong e ka pele ea molala oa lona, empa ha aa lokela ho o khaola. 9 A fafatse mali a mang a nyehelo ea sebe lehlakoreng la aletare, empa mali a setseng a tla fophisoa karolong e ka tlaase ea aletare.+ Ke nyehelo ea sebe. 10 Le leng o tla le etsa nyehelo ea secheso ho ea ka mokhoa o tloaelehileng;+ moprista a koahele libe+ tsa oona bakeng sa sebe sa oona seo o se entseng, kahoo o tla se tšoareloa.+

11 “‘Joale haeba o se na matla+ a ho fumana maebana-khoroana a mabeli kapa maebana a mabeli, joale bakeng sa nyehelo ea oona ea sebe seo o se entseng o tlise karolo ea leshome ea efa+ ea phofo e thumisehileng bakeng sa nyehelo ea sebe. O se ke oa tšela oli+ holim ’a eona ’me o se ke oa beha libano tse tšoeu holim ’a eona, etsoe ke nyehelo ea sebe.+ 12 O e tlise ho moprista, ’me moprista a qotse lefupu ho eona e le khopotso+ ea eona ’me a etse hore e kubelle aletareng holim ’a linyehelo tsa Jehova tse entsoeng ka mollo.+ Ke nyehelo ea sebe.+ 13 Moprista a koahele libe+ tsa oona bakeng sa sebe sa oona seo o se entseng, leha e le sefe libeng tsena, ’me kahoo o tla se tšoareloa; ’me e tla ba ea moprista+ ho tšoana le nyehelo ea lijo-thollo.’”

14 Jehova a tsoela pele ho bua le Moshe, a re: 15 “Haeba moea o itšoara ka ho se tšepahale ka hore o etse sebe ka phoso khahlanong le lintho tse halalelang tsa Jehova,+ joale o tlise ho Jehova pheleu e phetseng hantle e tsoang mohlapeng oa likhutšoane e le nyehelo ea oona ea molato,+ ho ea ka tefello e lekantsoeng ea lishekele tsa silevera,+ ka shekele ea sebaka se halalelang, e le nyehelo ea molato. 16 O tla etsa puseletso bakeng sa sebe seo o se entseng khahlanong le sebaka se halalelang ’me o tla e eketsa ka karolo ea eona ea bohlano,+ ’me o e fe moprista, hore moprista a koahele libe+ tsa oona ka pheleu ea nyehelo ea molato, ’me kahoo o tla se tšoareloa.+

17 “Haeba moea o etsa sebe ka hore o etse e ’ngoe ea lintho tseo Jehova a laelang hore li se ke tsa etsoa, le hoja o sa tseba seo,+ leha ho le joalo o molato ’me o tla arabella phoso ea oona.+ 18 O tlise pheleu e phetseng hantle e tsoang mohlapeng oa likhutšoane ho ea ka tefello e lekantsoeng, bakeng sa nyehelo ea molato,+ ho moprista; ’me moprista a koahele libe+ tsa oona bakeng sa phoso ea oona eo o e entseng e se ka morero, le hoja o sa tseba seo, ’me kahoo o tla e tšoareloa.+ 19 Ke nyehelo ea molato. Ruri o molato+ ho Jehova.”

6 Jehova a tsoela pele ho bua le Moshe, a re: 2 “Haeba moea o etsa sebe ka hore o itšoare ka ho se tšepahale ho Jehova+ ’me o thetsa+ oa habo oona ka ntho e taolong ea oona kapa peheletso e seatleng+ sa oona kapa ka tlatlapo kapa o etsetsa oa habo oona bolotsana,+ 3 kapa o fumana ntho e lahlehileng+ ’me o bua leshano ka eona ’me o hlapanya ka bohata+ ka ntho leha e le efe ea tsohle tseo motho a ka li etsang ho etsa sebe ka tsona; 4 joale etlare haeba o etsa sebe ’me o le molato,+ o tla khutlisa ntho e tlatlapuoeng eo o e tlatlapileng kapa ntho e nkiloeng ka ho hanyapetsa eo o e nkileng ka bolotsana kapa ntho e taolong ea oona e behiloeng taolong ea oona kapa ntho e lahlehileng eo o e fumaneng, 5 kapa ntho leha e le efe eo o ka hlapanyang ka bohata ka eona, ’me o tla etsa puseletso+ e feletseng bakeng sa eona, ’me o tla e eketsa ka karolo ea eona ea bohlano. O tla e fa mong’a eona ka letsatsi leo ho pakoang hore o molato ka lona. 6 E le nyehelo ea oona ea molato o tla tlisa ho Jehova pheleu+ e phetseng hantle e tsoang mohlapeng oa likhutšoane ho ea ka tefello e lekantsoeng, bakeng sa nyehelo ea molato,+ ho moprista. 7 Moprista a koahele libe+ tsa oona ka pel’a Jehova, kahoo o li tšoareloe mabapi le ntho leha e le efe ea tsohle tseo o ka li etsang e fellang ka hore o be molato.”

8 Jehova a tsoela pele ho bua le Moshe, a re: 9 “Laela Arone le bara ba hae, o re, ‘Ona ke molao oa nyehelo ea secheso:+ Nyehelo ea secheso e tla ba holim ’a leifo holim ’a aletare bosiu bohle ho fihlela hoseng, ’me mollo oa aletare o tla hoteletsoa ho eona. 10 Moprista a apare seaparo sa hae sa mosebetsi sa line,+ ’me o tla apara leqapa+ la line ’meleng oa hae. Joale a ntše molora+ o mafura oa nyehelo ea secheso eo mollo o e chesang kamehla holim ’a aletare, ’me a o behe ka thōko ho aletare. 11 A hlobole liaparo+ tsa hae ’me a apare liaparo tse ling, ’me a ntšetse molora o mafura sebakeng se hloekileng ka ntle ho liahelo.+ 12 Mollo o aletareng o tla lula o tuka holim ’a eona. O se ke oa tima. Moprista a bese patsi+ holim ’a oona hoseng ho hong le ho hong ’me a behe nyehelo ea secheso holim ’a oona ka tlhophiso, ’me a etse hore likarolo tse mafura tsa mahlabelo a kopanetsoeng li kubelle holim ’a oona.+ 13 Mollo+ o tla lula o tuka aletareng. O se ke oa tima.

14 “‘Joale ona ke molao oa nyehelo ea lijo-thollo:+ Lōna bara ba Arone, le e hlahise ka pel’a Jehova ka pel’a aletare. 15 E mong oa bona a qotse lefupu la phofo e thumisehileng ea nyehelo ea lijo-thollo le oli e ’ngoe ea eona le libano tsohle tse tšoeu tse holim ’a nyehelo ea lijo-thollo, ’me a etse hore e kubelle holim ’a aletare e le monko o khathollang bakeng sa khopotso+ ea eona ho Jehova. 16 E setseng ho eona e tla jeoa+ ke Arone le bara ba hae. E tla jeoa e le mahobe a sa lomosoang+ sebakeng se halalelang. Ba tla e jella ka lebaleng la tente ea pokano. 17 Ha ea lokela ho apehoa le ntho leha e le efe e lomositsoeng.+ Ke nehelane ka eona e le karolo ea bona linyehelong tsa ka tse entsoeng ka mollo.+ Ke ntho e halalelang ka ho fetisisa,+ joaloka nyehelo ea sebe le joaloka nyehelo ea molato. 18 E mong le e mong e motona+ har’a bara ba Arone o tla e ja. Ke kabelo ho isa nakong e sa lekanyetsoang+ melokong eohle ea lōna linyehelong tsa Jehova tse entsoeng ka mollo. Ntho e ’ngoe le e ’ngoe e ka li amang e tla halalela.’”

19 Jehova a tsoela pele ho bua le Moshe, a re: 20 “Ena ke nyehelo+ ea Arone le bara ba hae eo ba tla e hlahisa ho Jehova letsatsing leo a tlotsoang+ ka lona: karolo ea leshome ea efa+ ea phofo e thumisehileng e le nyehelo ea lijo-thollo+ kamehla, halofo ea eona hoseng le halofo ea eona mantsiboea. 21 E tla etsoa ka oli holim ’a pane.+ U tla e tlisa e tsoakiloe hantle. U tla hlahisa bohobe bo bakiloeng ba nyehelo ea lijo-thollo ka lingoathoana e le monko o khathollang ho Jehova. 22 Moprista, ea tlotsitsoeng sebakeng sa hae har’a bara ba hae,+ o tla e etsa. Ke molao oa tsamaiso ho isa nakong e sa lekanyetsoang: E le nyehelo e feletseng e tla etsoa+ hore e kubelle ho Jehova. 23 Nyehelo e ’ngoe le e ’ngoe ea lijo-thollo ea moprista+ e lokela ho ba nyehelo e feletseng. E se ke ea jeoa.”

24 Jehova a bua ka ho eketsehileng le Moshe, a re: 25 “Bua le Arone le bara ba hae, o re, ‘Ona ke molao oa nyehelo ea sebe:+ Nyehelo ea sebe e tla hlabeloa sebakeng+ seo nyehelo ea secheso e hlabeloang ho sona kamehla ka pel’a Jehova. Ke ntho e halalelang ka ho fetisisa.+ 26 Moprista ea e nyehelang bakeng sa sebe o tla e ja.+ E tla jelloa ka lebaleng+ la tente ea pokano sebakeng+ se halalelang.

27 “‘Ntho e ’ngoe le e ’ngoe e ka amang nama ea eona e tla halalela,+ ’me ha mang kapa mang a fafatsa mali a eona holim ’a seaparo,+ u tla hlatsoetsa seo a fafalitseng mali holim ’a sona sebakeng se halalelang.+ 28 Sejana sa letsopa+ seo e ka pheheloang ka ho sona se lokela ho pshatloa. Empa haeba e phehetsoe ka sejaneng sa koporo, joale se faloe ’me se hlatsuoe ka metsi.

29 “‘E mong le e mong e motona har’a baprista o tla e ja.+ Ke ntho e halalelang ka ho fetisisa.+ 30 Leha ho le joalo, ho se ke ha jeoa nyehelo ea sebe eo mali+ a mang a eona a tlisitsoeng ka tenteng ea pokano ho koahela libe sebakeng se halalelang. E lokela ho chesoa ka mollo.

7 “‘Ona ke molao oa nyehelo ea molato:+ Ke ntho e halalelang ka ho fetisisa.+ 2 Sebakeng+ seo kamehla ba hlabelang nyehelo ea secheso ho sona ba tla hlabela nyehelo ea molato teng, ’me e mong o tla fafatsa+ mali+ a eona ho potoloha aletare. 3 Ha e le mafura+ ’ohle a eona, o tla hlahisa ho tsoa ho ’ona mohatla o mafura le mafura a koahelang mala, 4 le liphio tse peli le mafura a holim ’a tsona a tšoanang le a holim ’a sehlana. Ha e le karolo e leketlileng sebeteng, o tla e tlosa hammoho le liphio.+ 5 Moprista a etse hore li kubelle aletareng e le nyehelo e entsoeng ka mollo ea Jehova.+ Ke nyehelo ea molato. 6 E mong le e mong e motona har’a baprista o tla e ja.+ E tla jelloa sebakeng se halalelang. Ke ntho e halalelang ka ho fetisisa.+ 7 Joaloka nyehelo ea sebe, le nyehelo ea molato e joalo. Ho na le molao o le mong bakeng sa tsona.+ Moprista ea koahelang libe ka eona, e tla ba ea hae.

8 “‘Ha e le moprista ea hlahisang nyehelo ea secheso ea motho leha e le ofe, letlalo+ la nyehelo ea secheso eo a e hlahisitseng e tla ba la hae.

9 “‘Nyehelo e ’ngoe le e ’ngoe ea lijo-thollo e ka apehoang ka ontong+ le e ’ngoe le e ’ngoe e etsetsoang ka har’a pitsa+ e tšelang mafura a mangata le holim ’a pane+ ke ea moprista ea e hlahisang. E tla ba ea hae.+ 10 Empa nyehelo e ’ngoe le e ’ngoe e kolobisitsoeng ka oli+ kapa e omileng+ e tla ba ea bara bohle ba Arone, e mong ka ho lekana le e mong.

11 “‘Joale ona ke molao oa sehlabelo se kopanetsoeng+ seo mang kapa mang a tla se hlahisa ho Jehova: 12 Haeba a se hlahisa e le pontšo ea liteboho,+ joale a hlahise hammoho le sehlabelo sa liteboho mahobe a sa lomosoang a lesoba hare a kolobisitsoeng ka oli le liphaphatha tse sa lomosoang tse tlotsitsoeng ka oli+ le phofo e thumisehileng e tsoakiloeng hantle e le mahobe a lesoba hare a kolobisitsoeng ka oli. 13 Hammoho le mahobe a lesoba hare a lomositsoeng+ o tla hlahisa nyehelo ea hae le sehlabelo sa liteboho sa mahlabelo a hae a kopanetsoeng. 14 Ho eona a hlahise e le ’ngoe nyehelong ka ’ngoe e le karolo e halalelang ho Jehova;+ ha e le moprista ea fafatsang mali a mahlabelo a kopanetsoeng, e tla ba ea hae.+ 15 Nama ea sehlabelo sa liteboho sa mahlabelo a hae a kopanetsoeng e lokela ho jeoa letsatsing leo a etsang nyehelo ka lona. A se ke a boloka leha e le efe ea eona ho fihlela hoseng.+

16 “‘Haeba sehlabelo sa nyehelo ea hae e le nyehelo ea boitlamo+ kapa ea boithaopo,+ se lokela ho jeoa letsatsing leo a hlahisang sehlabelo sa hae ka lona, ’me letsatsing le hlahlamang se salang ho sona le sona se ka jeoa. 17 Empa nama e setseng ea sehlabelo e lokela ho chesoa ka mollo+ ka letsatsi la boraro. 18 Leha ho le joalo, haeba nama leha e le efe ea sehlabelo sa hae se kopanetsoeng e ka jeoa letsatsing la boraro, ea e hlahisang a ke ke a amoheleha.+ E ke ke ea kenngoa tlalehong ea hae.+ E tla ba ntho e silafetseng, ’me moea o jang e ’ngoe ea eona o tla arabella phoso+ ea oona. 19 Nama e ka amang ntho leha e le efe e sa hloekang+ e se ke ea jeoa. E lokela ho chesoa ka mollo. Ha e le nama, e mong le e mong ea hloekileng a ka ja nama eo.

20 “‘Moea o jang nama ea sehlabelo se kopanetsoeng, sa Jehova, ha o ntse o sa hloeka, moea oo o felisoe sechabeng+ sa habo oona. 21 Haeba moea o ama ntho leha e le efe e sa hloekang, ho se hloeke ha motho+ kapa phoofolo+ e sa hloekang kapa ntho leha e le efe e nyonyehang e sa hloekang,+ ’me ha e le hantle o ja e ’ngoe ea nama ea sehlabelo se kopanetsoeng, sa Jehova, moea oo o felisoe sechabeng sa habo oona.’”

22 Jehova a tsoela pele ho bua le Moshe, a re: 23 “Bua le bara ba Iseraele, u re, ‘Le se ke la ja mafura+ leha e le afe a poho kapa a pheleu e nyenyane kapa a pōli. 24 Joale mafura a ntho e seng e shoele le mafura a phoofolo e rusolotsoeng+ a ka sebelisetsoa ntho leha e le efe e ka nahanoang, empa ho hang le se ke la a ja. 25 Etsoe mang kapa mang ea jang mafura a phoofolo eo a e hlahisang e le nyehelo e entsoeng ka mollo ea Jehova, moea o jang o felisoe+ sechabeng sa habo oona.

26 “‘Le se ke la ja mali+ leha e le afe libakeng leha e le life tseo le lulang ho tsona, ebang ke a nonyana kapa a phoofolo. 27 Moea leha e le ofe o jang mali leha e le afe, moea oo o felisoe+ sechabeng sa habo oona.’”

28 Jehova a tsoela pele ho bua le Moshe, a re: 29 “Bua le bara ba Iseraele, u re, ‘Ea hlahisang sehlabelo sa hae se kopanetsoeng ho Jehova o tla tlisa nyehelo ea hae ho Jehova e tsoa sehlabelong sa hae se kopanetsoeng.+ 30 Matsoho a hae a tla tlisa mafura+ a holim ’a sefuba e le linyehelo tsa Jehova tse entsoeng ka mollo. O tla a tlisa hammoho le sefuba hore a li tsokele koana le koana e le nyehelo+ e tsokoang ka pel’a Jehova. 31 Moprista a etse hore mafura a kubelle+ holim ’a aletare, empa sefuba e tla ba sa Arone le sa bara ba hae.+

32 “‘Le tla fa moprista leoto le letona e le karolo+ e halalelang e tsoang mahlabelong a lōna a kopanetsoeng. 33 E mong oa bara ba Arone ea hlahisang mali a mahlabelo a kopanetsoeng le mafura, leoto le letona e tla ba kabelo ea hae.+ 34 Etsoe mahlabelong a kopanetsoeng a bara ba Iseraele ke nka sefuba sa nyehelo+ e tsokoang le leoto la karolo e halalelang, ’me ke tla li fa moprista Arone le bara ba hae, e le molao oa tsamaiso ho isa nakong e sa lekanyetsoang, ho bara ba Iseraele.

35 “‘Ena e ne e le karolo ea boprista ea Arone le karolo ea boprista ea bara ba hae linyehelong tsa Jehova tse entsoeng ka mollo, letsatsing leo a ba hlahisitseng+ ka lona ho sebetsa e le baprista ho Jehova, 36 feela joalokaha Jehova a laetse hore ba e fuoe letsatsing leo a ba tlotsang+ ka lona har’a bara ba Iseraele. Ke taelo e hlomamisitsoeng ho isa nakong e sa lekanyetsoang bakeng sa meloko ea bona.’”+

37 Ona ke molao mabapi le nyehelo ea secheso,+ nyehelo ea lijo-thollo+ le nyehelo ea sebe+ le nyehelo ea molato+ le sehlabelo sa tlhomamiso+ le sehlabelo se kopanetsoeng,+ 38 feela joalokaha Jehova a ne a laetse Moshe Thabeng ea Sinai+ letsatsing leo a laetseng bara ba Iseraele ka lona hore ba hlahise linyehelo tsa bona ho Jehova lefeelleng la Sinai.+

8 Jehova a bua le Moshe, a re: 2 “Nka Arone hammoho le bara ba hae+ le liaparo+ le oli+ e tlotsang le poho ea nyehelo ea sebe+ le lipheleu tse peli le baskete ea mahobe a sa lomosoang,+ 3 ’me u etse hore phutheho eohle e phuthehele+ monyako oa tente ea pokano.”+

4 Joale Moshe a etsa feela joalokaha Jehova a ne a mo laetse, ’me phutheho ea phuthehela monyako+ oa tente ea pokano. 5 Joale Moshe a re ho phutheho: “Ena ke ntho eo Jehova a laetseng hore e etsoe.”+ 6 Kahoo Moshe a atametsa Arone le bara ba hae ’me a ba hlatsoa+ ka metsi.+ 7 Ka mor’a moo a mo apesa seaparo se selelele sa ka holimo+ ’me a mo tlama ka leqhama+ eaba o mo apesa seaparo+ se se nang matsoho ’me o mo apesa efoda+ eaba o mo tlama ka senyepa+ sa efoda ’me o e tlamella ho eena ka thata. 8 Ka mor’a moo a mo apesa kotla ea sefuba+ ’me a kenya Urime le Thumime+ ka har’a kotla ea sefuba. 9 Joale a mo roesa tuku+ hloohong ’me karolong e ka pele ea tuku a beha lekapa le benyang la khauta, pontšo e halalelang ea boinehelo,+ feela joalokaha Jehova a ne a laetse Moshe.

10 Joale Moshe a nka oli e tlotsang ’me a tlotsa tabernakele+ le sohle se ho eona ’me a li halaletsa. 11 Ka mor’a moo a e fafatsa ka makhetlo a supileng aletareng+ eaba o tlotsa aletare le lisebelisoa tsohle tsa eona le beisine le seluloana sa eona e le hore a li halaletse. 12 Qetellong a tšela Arone hloohong ka oli e tlotsang eaba oa mo tlotsa e le hore a mo halaletse.+

13 Joale Moshe a atametsa+ bara ba Arone eaba o ba apesa liaparo tse telele tsa ka holimo ’me o ba tlama ka maqhama+ eaba o ba thatela ka se roaloang hloohong,+ feela joalokaha Jehova a ne a laetse Moshe.

14 Joale a khanna poho+ ea nyehelo ea sebe ’me Arone le bara ba hae ba beha matsoho holim ’a hlooho+ ea poho ea nyehelo ea sebe. 15 Moshe a e hlaba+ ’me a nka mali+ eaba o a tlotsa ka monoana manakeng a aletare ho e potoloha ’me o hloekisa aletare sebeng, empa mali a mang kaofela a a tšela karolong e ka tlaase ea aletare, hore a e halaletse e le hore a tle a koahele libe+ holim ’a eona. 16 Ka mor’a moo a nka mafura ’ohle a holim ’a mala, le karolo e leketlileng sebeteng le liphio tse peli le mafura a tsona eaba Moshe o etsa hore li kubelle aletareng.+ 17 A chesa ka mollo poho le letlalo la eona le nama ea eona le bolokoe ba eona ka ntle ho liahelo,+ feela joalokaha Jehova a ne a laetse Moshe.

18 Joale a atametsa pheleu ea nyehelo ea secheso, ’me Arone le bara ba hae ba beha matsoho holim ’a hlooho ea pheleu.+ 19 Ka mor’a moo Moshe a e hlaba eaba o fafatsa mali ho potoloha aletare.+ 20 A khabela pheleu likotoana,+ ’me Moshe a etsa hore hlooho le likotoana le mohlehlo li kubelle. 21 A hlatsoa mala le litlhakoana ka metsi, joale Moshe a etsa hore pheleu kaofela e kubelle aletareng.+ E ne e le nyehelo ea secheso bakeng sa monko o khathollang.+ E ne e le nyehelo e entsoeng ka mollo ea Jehova, feela joalokaha Jehova a ne a laetse Moshe.

22 Joale a atametsa pheleu ea bobeli, pheleu ea tlhomamiso,+ ’me Arone le bara ba hae ba beha matsoho holim ’a hlooho ea pheleu. 23 Ka mor’a moo Moshe a e hlaba eaba o nka mali a eona ’me o a tlotsa ntlheng ea tsebe e tona ea Arone le monoaneng o motona oa letsoho la hae le letona le monoaneng o motona oa leoto la hae le letona.+ 24 Ka mor’a moo Moshe a atametsa bara ba Arone eaba o tlotsa lintlha tsa litsebe tsa bona tse tona le menoana e metona ea matsoho a bona a matona le menoana e metona ea maoto a bona a matona ka mali; empa Moshe a fafatsa mali a mang kaofela ho potoloha aletare.+

25 Joale a nka mafura le mohatla o mafura le mafura ’ohle a holim ’a mala,+ le karolo e leketlileng sebeteng le liphio tse peli le mafura a tsona le leoto le letona.+ 26 Ka har’a baskete ea mahobe a sa lomosoang e ka pel’a Jehova a nka bohobe bo le bong bo sa lomosoang bo lesoba hare+ le bohobe bo le bong bo lesoba hare ba bohobe+ bo nang le oli le sephaphatha se le seng.+ Joale a li beha holim ’a likarolo tse mafura le leoto le letona. 27 Ka mor’a moo kaofela ha tsona a li beha holim ’a liatla tsa Arone le liatla tsa bara ba hae eaba o qala ho li tsokela koana le koana e le nyehelo e tsokoang ka pel’a Jehova.+ 28 Joale Moshe a li nka liatleng tsa bona eaba o etsa hore li kubelle aletareng holim ’a nyehelo ea secheso.+ E ne e le sehlabelo sa tlhomamiso+ bakeng sa monko o khathollang.+ E ne e le nyehelo e entsoeng ka mollo ea Jehova.+

29 Moshe a nka sefuba+ ’me a se tsokela koana le koana e le nyehelo e tsokoang ka pel’a Jehova.+ E bile kabelo+ ea Moshe e tsoang pheleung ea tlhomamiso, feela joalokaha Jehova a ne a laetse Moshe.

30 Ka mor’a moo Moshe a nka oli+ e ’ngoe e tlotsang le mali a mang a holim ’a aletare eaba o li fafatsa holim ’a Arone le liaparong tsa hae le holim ’a bara ba hae le liaparong tsa bara ba hae. Kahoo a halaletsa+ Arone le liaparo tsa hae le bara ba hae le liaparo tsa bara+ ba hae ba nang le eena.

31 Joale Moshe a re ho Arone le bara ba hae: “Phehang+ nama monyako oa tente ea pokano, ’me le tla e jella+ teng le bohobe bo ka basketeng ea tlhomamiso, feela joalokaha ke filoe taelo, e reng, ‘Arone le bara ba hae ba tla e ja.’ 32 Nama le bohobe bo setseng le tla li chesa ka mollo.+ 33 Le se ke la tloha monyako oa tente ea pokano ka matsatsi a supileng,+ ho fihlela letsatsing la ho phethahala ha matsatsi a tlhomamiso ea lōna, hobane ho tla nka matsatsi a supileng ho tlatsa matsoho a lōna matla.+ 34 Feela joalokaha ho entsoe letsatsing lena, Jehova o laetse hore ho etsoe e le hore ho koaheloe libe tsa lōna.+ 35 Le tla lula monyako oa tente ea pokano bosiu le motšehare ka matsatsi a supileng,+ ’me le boloke tebelo e tlamang ea Jehova,+ hore le se ke la shoa; etsoe ke laetsoe joalo.”

36 Arone le bara ba hae ba etsa lintho tsohle tseo Jehova a neng a li laetse ka Moshe.

9 Ka letsatsi la borobeli+ Moshe a bitsa Arone le bara ba hae le banna ba baholo ba Iseraele. 2 Joale a re ho Arone: “Inkele namane e nyenyane bakeng sa nyehelo ea sebe+ le pheleu bakeng sa nyehelo ea secheso,+ tse phetseng hantle, ’me u li hlahise ka pel’a Jehova.+ 3 Empa u tla bua le bara ba Iseraele, u re, ‘Nkang phooko+ bakeng sa nyehelo ea sebe le namane le pheleu e nyenyane,+ e ’ngoe le e ’ngoe e be e nang le selemo, e be tse phetseng hantle, bakeng sa nyehelo ea secheso, 4 le poho le pheleu bakeng sa mahlabelo a kopanetsoeng+ hore ho etsoe sehlabelo ka tsona ka pel’a Jehova, le nyehelo ea lijo-thollo+ e kolobisitsoeng ka oli, hobane ka sebele Jehova o tla bonahala ho lōna kajeno.’”+

5 Tumellanong le hoo ba nka seo Moshe a laetseng hore se nkuoe ka pel’a tente ea pokano. Joale phutheho eohle ea atamela ’me ea ema ka pel’a Jehova.+ 6 Moshe a tsoela pele ho re: “Ena ke ntho eo Jehova a laetseng hore le lokela ho e etsa, hore khanya ea Jehova e bonahale ho lōna.”+ 7 Joale Moshe a re ho Arone: “Atamela aletareng ’me u fane ka nyehelo ea hao ea sebe+ le nyehelo ea hao ea secheso, ’me u koahele libe+ molemong oa hao le molemong oa ntlo ea hao; u fane ka nyehelo ea sechaba+ ’me u koahele libe+ molemong oa sona, feela joalokaha Jehova a laetse.”

8 Kapele-pele Arone a atamela aletareng eaba o hlaba namane ea nyehelo ea sebe bakeng sa hae.+ 9 Joale bara ba Arone ba hlahisa mali+ ho eena eaba o qopetsa mali+ ka monoana ’me o a tlotsa manakeng a aletare,+ ’me mali a mang kaofela a a tšela karolong e ka tlaase ea aletare. 10 A etsa hore mafura+ le liphio le karolo e leketlileng sebeteng tsa nyehelo ea sebe li kubelle holim ’a aletare,+ feela joalokaha Jehova a ne a laetse Moshe. 11 A chesa nama le letlalo ka mollo ka ntle ho liahelo.+

12 Joale a hlaba nyehelo ea secheso ’me bara ba Arone ba mo neha mali eaba o a fafatsa ho potoloha aletare.+ 13 Ba mo neha nyehelo ea secheso le likotoana tsa eona le hlooho, ’me a etsa hore li kubelle holim ’a aletare.+ 14 Ho ekelletsa moo, a hlatsoa mala le litlhakoana ’me a etsa hore li kubelle holim ’a nyehelo ea secheso aletareng.+

15 Joale a qala ho hlahisa nyehelo ea sechaba+ eaba o nka pōli ea nyehelo ea sebe bakeng sa sechaba oa e hlaba ’me o etsa nyehelo ea sebe ka eona e joaloka ea pele. 16 Joale a hlahisa nyehelo ea secheso ’me a e etsa ho ea ka mokhoa o tloaelehileng.+

17 Ka mor’a moo a hlahisa nyehelo ea lijo-thollo+ eaba o tlatsa e ’ngoe ea eona letsohong ’me o etsa hore e kubelle aletareng, kantle le nyehelo ea secheso ea hoseng.+

18 Ka mor’a moo a hlaba poho le pheleu ea sehlabelo se kopanetsoeng+ seo e neng e le sa sechaba. Joale bara ba Arone ba mo neha mali eaba o a fafatsa ho potoloha aletare.+ 19 Ha e le likarolo+ tse mafura tsa poho le mohatla+ o mafura oa pheleu le mohlehlo le liphio le karolo e leketlileng sebeteng, 20 joale ba beha likarolo tse mafura holim ’a lifuba,+ ka mor’a moo a etsa hore likarolo tse mafura li kubelle holim ’a aletare. 21 Empa lifuba le leoto le letona Arone o ne a li tsokela koana le koana e le nyehelo+ e tsokoang ka pel’a Jehova, feela joalokaha Moshe a ne a laetse.

22 Joale Arone a phahamisetsa matsoho ho sechaba ’me a se hlohonolofatsa+ eaba oa theoha+ ’me o tlohela ho etsa nyehelo ea sebe le nyehelo ea secheso le mahlabelo a kopanetsoeng. 23 Qetellong Moshe le Arone ba kena ka tenteng ea pokano eaba baa tsoa ’me ba hlohonolofatsa sechaba.+

Joale khanya+ ea Jehova ea bonahala ho sechaba sohle, 24 ’me mollo oa tsoa ka pel’a Jehova+ eaba o qala ho chesa nyehelo ea secheso le likarolo tse mafura holim ’a aletare. Ha sechaba sohle se o bona, sa tlerola mohoo+ ’me sa qala ho itihela fatše ka lifahleho.

10 Hamorao bara ba Arone Nadabe le Abihu+ ba nka ’me ba tlisa e mong le e mong pane+ ea hae ea mollo eaba ba beha mollo ka har’a eona ’me ba beha libano+ holim ’a oona, eaba ba qala ho nyehela ka pel’a Jehova mollo oo e seng oa molao,+ oo a neng a sa ba laela hore ba o etse. 2 Mollo oa tsoa ka pel’a Jehova oa ba chesa,+ hoo ba ileng ba shoela ka pel’a Jehova.+ 3 Joale Moshe a re ho Arone: “Sena ke seo Jehova a se buileng, a re, ‘E-re ke halaletsoe+ har’a ba haufi le ’na,+ ’me ke tlotlisoe+ ka pel’a lifahleho tsa sechaba sohle.’” Arone a khutsa.

4 Kahoo Moshe a bitsa Mishaele le Elzafane, bara ba Uziele,+ mor’abo ntat’a Arone, ’me a re ho bona: “Atamelang, tlosang barab’abo lōna ka pel’a sebaka se halalelang le ba ise ka ntle ho liahelo.”+ 5 Tumellanong le hoo ba atamela eaba ba ba nka ka liaparo tsa bona ho ba isa ka ntle ho liahelo, feela joalokaha Moshe a ne a buile.

6 Ka mor’a moo Moshe a re ho Arone le ho bara ba bang ba hae Eleazare le Ithamare: “Le se ke la tlohela lihlooho tsa lōna li le mahlantholla,+ ’me le se ke la tabola liaparo tsa lōna, hore le se ke la shoa ’me a se ke a halefela phutheho eohle;+ empa barab’abo lōna ba ntlo eohle ea Iseraele ba tla lla ka lebaka la ho chesoa, hoo Jehova a ho chesitseng. 7 Le se ke la tloha monyako oa tente ea pokano esere la shoa,+ hobane oli e tlotsang ea Jehova e holim ’a lōna.”+ Kahoo ba etsa ho ea ka taelo ea Moshe.

8 Jehova a bua le Arone, a re: 9 “U se ke ua noa veine kapa joala bo tahang,+ uena hammoho le bara ba hao, ha le kena ka tenteng ea pokano, hore le se ke la shoa. Ke taelo e hlomamisitsoeng ho isa nakong e sa lekanyetsoang bakeng sa meloko ea lōna, 10 e le hore ho khetholloe pakeng tsa ntho e halalelang le e silafetseng le pakeng tsa ntho e sa hloekang le e hloekileng,+ 11 le hore ho rutoe bara ba Iseraele+ melao eohle ea tsamaiso eo Jehova a ba boleletseng eona ka Moshe.”

12 Joale Moshe a bua le Arone le Eleazare le Ithamare, bara ba hae ba neng ba setse: “Nkang nyehelo ea lijo-thollo+ e setseng linyehelong tsa Jehova tse entsoeng ka mollo ’me le e jelle haufi le aletare e sa lomosoa, hobane ke ntho e halalelang ka ho fetisisa.+ 13 Le e jelle sebakeng se halalelang,+ hobane ke kabelo ea lōna le kabelo ea bara ba lōna linyehelong tsa Jehova tse entsoeng ka mollo; etsoe ke kamoo ke laetsoeng kateng. 14 Le tla jella sefuba sa nyehelo+ e tsokoang le leoto la karolo+ e halalelang sebakeng se hloekileng, lōna le bara ba lōna le barali ba lōna,+ hobane li fanoe e le kabelo ea lōna le kabelo ea bara ba lōna mahlabelong a kopanetsoeng a bara ba Iseraele. 15 Ba tla tlisa leoto la karolo e halalelang le sefuba sa nyehelo+ e tsokoang hammoho le linyehelo tse entsoeng ka mollo, tsa likarolo tse mafura, e le hore ba tsokele koana le koana nyehelo e tsokoang ka pel’a Jehova; ’me e tla ba kabelo+ ho isa nakong e sa lekanyetsoang bakeng sa lōna le bara ba lōna, feela joalokaha Jehova a laetse.”

16 Moshe a batlisisa pōli ea nyehelo ea sebe,+ ’me, bonang! e ne e chesitsoe. Kahoo a halefela Eleazare le Ithamare, bara ba Arone ba neng ba setse, a re: 17 “Ke hobane’ng ha le sa jella nyehelo ea sebe sebakeng se halalelang,+ kaha ke ntho e halalelang ka ho fetisisa ’me o le file eona e le hore le arabe bakeng sa phoso ea phutheho e le hore a koahele libe tsa eona ka pel’a Jehova?+ 18 Bonang! Mali a eona ha aa tlisoa sebakeng se halalelang se ka hare.+ Ruri le ka be le e jelletse sebakeng se halalelang, feela joalokaha ke ne ke laetsoe.”+ 19 Arone a bua le Moshe: “Bona! Kajeno ba hlahisitse nyehelo ea bona ea sebe le nyehelo ea bona ea secheso ka pel’a Jehova,+ ha lintho tse kang tsena li qala ho ntlhahela; ’me haeba ke ne ke jele nyehelo ea sebe kajeno, na ho ka be ho ile ha khotsofatsa mahlong a Jehova?”+ 20 Ha Moshe a utloa seo, joale ea e-ba se khotsofatsang mahlong a hae.

11 Jehova a bua le Moshe le Arone, a re ho bona: 2 “Buang le bara ba Iseraele, le re, ‘Sena ke sebōpuoa se phelang seo le ka se jang+ har’a liphoofolo tsohle tse holim ’a lefatše: 3 Sebōpuoa se seng le se seng se nang le khōla e arohaneng ’me se e-na le khōla e nang le lepetso ’me se busolosa har’a liphoofolo, ke sona seo le ka se jang.+

4 “‘Ke sena feela seo le ke keng la se ja har’a tse busolosang le tse nang le khōla e arohaneng: kamele, hobane ea busolosa empa ha e na khōla e arohaneng. Ha ea hloeka bakeng sa lōna.+ 5 Le pela,+ hobane ea busolosa empa ha e na khōla e arohaneng. Ha ea hloeka bakeng sa lōna. 6 Le ’mutla,+ hobane oa busolosa empa ha o na khōla e arohaneng. Ha oa hloeka bakeng sa lōna. 7 Le kolobe,+ hobane e na le khōla e arohaneng le khōla e nang le lepetso, empa ha e busolose. Ha ea hloeka bakeng sa lōna. 8 Le se ke la ja nama leha e le efe ea tsona, ’me le se ke la ama litopo tsa tsona.+ Ha lia hloeka bakeng sa lōna.+

9 “‘Sena ke seo le ka se jang nthong e ’ngoe le e ’ngoe e metsing:+ Ntho e ’ngoe le e ’ngoe e nang le mapheoana a ho sesa le makhakhapha+ e metsing, maoatleng le melapong e phoroselang, le ka e ja. 10 Ntho e ’ngoe le e ’ngoe e maoatleng le melapong e phoroselang e se nang mapheoana a ho sesa le makhakhapha, ho sebōpuoa se seng le se seng se nyekenyehang sa metsi le ho moea o mong le o mong o phelang o metsing, ke ntho e nyonyehang ho lōna. 11 E, e tla ba ntho e nyonyehang ho lōna. Le se ke la ja nama leha e le efe ea eona,+ ’me le nyonye setopo sa eona. 12 Ntho e ’ngoe le e ’ngoe e metsing e se nang mapheoana a ho sesa le makhakhapha ke ntho e nyonyehang ho lōna.

13 “‘Tsena ke tseo le tla li nyonya har’a libōpuoa tse fofang.+ Ha lia lokela ho jeoa. Ke ntho e nyonyehang: ntsu+ le phakoe e jang litlhapi le lenong le letšo, 14 le ’mankholi e mofubelu le ’mankholi+ e motšo ho ea ka mofuta oa eona, 15 le lekhoaba+ le leng le le leng ho ea ka mofuta oa lona, 16 le mpshe+ le sephooko le letata le jang nama le phakoe ho ea ka mofuta oa eona, 17 le sephooko se senyenyane le seinoli le makhohlo,+ 18 le khantši le letata le jang litlhapi le lenong,+ 19 le mokotatsie, le kokolofitoe ho ea ka mofuta oa eona, le popopo le ’mankhane.+ 20 Sebōpuoa se seng le se seng se nang le mapheo se nyekenyehang se tsamaeang ka maoto ’ohle a mane ke ntho e nyonyehang ho lōna.+

21 “‘Ke sena feela seo le tla se ja har’a libōpuoa tsohle tse nang le mapheo tse nyekenyehang tse tsamaeang ka maoto ’ohle a mane, tse nang le menoto eo li qothomang ka eona holim ’a maoto a tsona eo li qothomang ka eona lefatšeng. 22 Tsena ke tse ling tsa tsona tseo le ka li jang: tsie+ e sa luleng sebakeng se le seng ho ea ka mofuta oa eona, le tsie+ e jeoang ho ea ka mofuta oa eona, le letjeketjane ho ea ka mofuta oa lona, le lerutle+ ho ea ka mofuta oa lona. 23 Sebōpuoa se seng le se seng se nang le mapheo se nyekenyehang se nang le maoto a mane ke ntho e nyonyehang+ ho lōna. 24 Kahoo tsena li tla le silafatsa. E mong le e mong ea amang litopo tsa tsona e tla ba ea sa hloekang ho fihlela mantsiboea.+ 25 E mong le e mong ea nkang litopo leha e le life tsa tsona o tla hlatsoa+ liaparo tsa hae, ’me e be ea sa hloekang ho fihlela mantsiboea.

26 “‘Ha e le phoofolo leha e le efe e nang le khōla e arohaneng empa e se na lepetso ’me e sa busolose, ha ea hloeka bakeng sa lōna. E mong le e mong ea e amang e tla ba ea sa hloekang.+ 27 Ha e le sebōpuoa se seng le se seng se tsamaeang ka marō har’a libōpuoa tsohle tse phelang tse tsamaeang ka maoto ’ohle a mane, ha sea hloeka bakeng sa lōna. E mong le e mong ea amang litopo tsa sona e tla ba ea sa hloekang ho fihlela mantsiboea. 28 Ea nkang setopo+ sa sona o tla hlatsoa liaparo+ tsa hae, ’me e be ea sa hloekang ho fihlela mantsiboea. Ha sea hloeka bakeng sa lōna.

29 “‘Sena ke se sa hloekang ho lōna har’a libōpuoa tse nyekenyehang holim ’a lefatše:+ khoiti le tali+ le mokholutsoane ho ea ka mofuta oa oona, 30 le checheiki le pōlō le pōlōmetsi le sefelekoane le lempetje. 31 Tsena ha lia hloeka bakeng sa lōna har’a libōpuoa tsohle tse nyekenyehang.+ E mong le e mong ea li amang ha li shoele e tla ba ea sa hloekang ho fihlela mantsiboea.+

32 “‘Joale ntho efe kapa efe eo leha e le efe ea tsona e ka oelang holim ’a eona ha e shoele e tla ba e sa hloekang, ebang ke sejana+ sa lehong kapa seaparo kapa letlalo+ kapa lesela la mokotla.+ Sejana leha e le sefe se sebelisoang ka tsela e itseng se tla kenngoa metsing, ’me e tla ba se sa hloekang ho fihlela mantsiboea ’me se ntan’o hloeka. 33 Ha e le sejana+ leha e le sefe sa letsopa seo leha e le efe ea tsona e ka oelang ka har’a sona, ntho leha e le efe e ka har’a sona e tla ba e sa hloekang, ’me le tla se thuhakanya.+ 34 Lijo tse jeoang tsa mofuta leha e le ofe o tšetsoeng ke metsi a tsoang ho sona e tla ba tse sa hloekang, ’me seno sefe kapa sefe se ka noeloang sejaneng leha e le sefe e tla ba se sa hloekang. 35 Ntho e ’ngoe le e ’ngoe eo litopo leha e le life tsa tsona li ka oelang holim ’a eona e tla ba e sa hloekang. Ebang ke onto kapa seluloana sa nkho, e lokela ho senngoa. Ha lia hloeka, ’me e tla ba tse sa hloekang bakeng sa lōna. 36 Ke feela seliba le sekoti sa metsi a bokeletsoeng tse tlang ho tsoela pele li hloekile, empa mang kapa mang ea amang litopo tsa tsona e tla ba ea sa hloekang. 37 Haeba litopo leha e le life tsa tsona li oela holim ’a peō leha e le efe ea semela e lokelang ho jaloa, e hloekile. 38 Empa haeba peō e tšetsoe ka metsi ’me ho hong litopong tsa tsona ho oetse holim ’a eona, ha ea hloeka bakeng sa lōna.

39 “‘Joale haeba phoofolo leha e le efe ea lōna e jeoang e shoa, ea amang setopo sa eona e tla ba ea sa hloekang ho fihlela mantsiboea.+ 40 Ea jang+ setopo leha e le sefe sa eona o tla hlatsoa liaparo tsa hae, ’me e tla ba ea sa hloekang ho fihlela mantsiboea; ea nkang setopo sa eona o tla hlatsoa liaparo tsa hae, ’me e be ea sa hloekang ho fihlela mantsiboea. 41 Sebōpuoa se seng le se seng se nyekenyehang holim ’a lefatše ke ntho e nyonyehang.+ Se se ke sa jeoa. 42 Ha e le sebōpuoa leha e le sefe se tsamaeang ka mpa+ le sebōpuoa leha e le sefe se tsamaeang ka maoto ’ohle a mane kapa ka maoto a mangata ho libōpuoa tsohle tse nyekenyehang holim ’a lefatše, le se ke la li ja, hobane ke ntho e nyonyehang.+ 43 Le se ke la etsa hore meea ea lōna e be e nyonyehang ka sebōpuoa leha e le sefe se nyekenyehang, ’me le se ke la iketsa ba sa hloekang ka tsona ’me la ba ba sa hloekang ka lebaka la tsona.+ 44 Etsoe ke ’na Jehova Molimo oa lōna;+ le ikhalaletse ’me le halalele,+ hobane kea halalela.+ Kahoo le se ke la etsa meea ea lōna hore e be e sa hloekang ka sebōpuoa leha e le sefe se nyekenyehang se tsamaeang holim ’a lefatše. 45 Etsoe ke ’na Jehova ea le etellang pele ho tsoa Egepeta hore ke be Molimo ho lōna;+ le halalele,+ hobane kea halalela.+

46 “‘Ona ke molao oa phoofolo le sebōpuoa se fofang le moea o mong le o mong o phelang o tsamaeang metsing+ le mabapi le moea o mong le o mong o nyekenyehang lefatšeng, 47 bakeng sa ho khetholla+ pakeng tsa se sa hloekang le se hloekileng le pakeng tsa sebōpuoa se phelang se jeoang le sebōpuoa se phelang se sa jeoeng.’”

12 Jehova a tsoela pele ho bua le Moshe, a re: 2 “Bua le bara ba Iseraele, u re, ‘Haeba mosali a emola peō+ ’me a tsoala ngoana e motona, e tla ba ea sa hloekang ka matsatsi a supileng; e tla ba ea sa hloekang+ joaloka matsatsing a ho se hloeke nakong ea ha a ilela khoeli. 3 Ka letsatsi la borobeli nama ea ntlha ea letlalo la setho sa hae sa botona e tla bolotsoa.+ 4 O tla lula maling a tlhoekiso ka matsatsi a eketsehileng a mashome a mararo a metso e meraro. Ha aa lokela ho ama ntho leha e le efe e halalelang, ’me ha aa lokela ho kena sebakeng se halalelang ho fihlela a phetha matsatsi a tlhoekiso ea hae.+

5 “‘Joale haeba a tsoala ngoana e motšehali, joale e tla ba ea sa hloekang ka matsatsi a leshome le metso e mene, joaloka nakong ea ha a ilela khoeli. O tla lula maling a tlhoekiso ka matsatsi a eketsehileng a mashome a tšeletseng a metso e tšeletseng. 6 Joale ha matsatsi a tlhoekiso ea hae a phethahala bakeng sa mora kapa bakeng sa morali o tla tlisa pheleu e nyenyane e selemong sa eona sa pele bakeng sa nyehelo ea secheso+ le leebana kapa leebana-khoroana+ bakeng sa nyehelo ea sebe monyako oa tente ea pokano ho moprista. 7 Moprista a e hlahise ka pel’a Jehova ’me a koahele libe tsa hae, ’me o tla hloeka mohloling oa mali+ a hae. Ona ke molao mabapi le ea tsoalang ngoana e motona kapa e motšehali. 8 Empa haeba a ke ke a khona ho fana ka nku, joale a nke maebana-khoroana a mabeli kapa maebana a mabeli,+ le leng bakeng sa nyehelo ea secheso le leng bakeng sa nyehelo ea sebe, ’me moprista a koahele libe+ tsa hae, ’me e tla ba ea hloekileng.’”

13 Jehova a bua le Moshe le Arone, a re: 2 “Haeba letlalong la ’mele oa motho ho hlaha lekhopho kapa khoo+ kapa sebato ’me le fetoha lefu la lepera+ letlalong la ’mele oa hae, joale a tlisoe ho moprista Arone kapa ho e mong oa bara ba hae ba baprista.+ 3 Moprista a talime lefu le letlalong la ’mele.+ Ha mohoete oa moo lefu le leng teng o le mosoeu ’me lefu le bonahala le phobetse letlalong la ’mele oa hae, ke lefu la lepera. Moprista a le talime, ’me a bolele hore ha aa hloeka. 4 Empa haeba sebato se le sesoeu letlalong la ’mele oa hae ’me se bonahala se phobetse letlalong ’me mohoete oo se leng ho oona o se mosoeu, joale moprista a behelle ea nang le lefu leo ka thōko+ ka matsatsi a supileng. 5 Moprista a mo talime letsatsing la bosupa, ’me haeba kamoo ho shebahalang kateng lefu le khaolitse, lefu ha lea namela letlalong, hape moprista a mo behelle ka thōko+ ka matsatsi a mang a supileng.

6 “Moprista a mo talime ka lekhetlo la bobeli letsatsing la bosupa, ’me haeba lefu le le lerootho ’me lefu le sa namela letlalong, moprista a boele a phatlalatse hore o hloekile. E ne e le khoo. A hlatsoe liaparo tsa hae ’me a hloeke. 7 Empa haeba ntle ho pelaelo khoo e nametse letlalong ka mor’a hore a hlahe ka pel’a moprista bakeng sa ho tiisa ho hloeka ha hae, joale a hlahe ka lekhetlo la bobeli ka pel’a moprista,+ 8 ’me moprista a shebe; haeba khoo e nametse letlalong, joale moprista a phatlalatse hore ha aa hloeka. Ke lepera.+

9 “Haeba lefu la lepera le hlaha ho motho, joale a tlisoe ho moprista. 10 Moprista a shebe;+ haeba ho e-na le lekhopho le lesoeu letlalong ’me le soeufalitse mohoete ’me karolo e sa folang ea nama+ e phelang e le lekhophong, 11 ke lepera+ le sa foleng letlalong la ’mele oa hae; moprista a bolele hore ha aa hloeka. Ha aa lokela ho mo behella ka thōko,+ etsoe ha aa hloeka. 12 Joale haeba ntle ho pelaelo lepera le siphoha letlalong, ’me lepera le koahela letlalo la ea nang le lefu ho tloha hloohong ho ea maotong moo mahlo a moprista a bonang ka ho feletseng; 13 moprista a talimile ’me lepera le koahetse ’mele oohle oa hae, joale o tla phatlalatsa hore lefu le hloekile. Kaofela ha lona le fetohile le lesoeu. O hloekile. 14 Empa letsatsing leo ka lona nama e phelang e hlahang holim ’a lona, e tla ba ea sa hloekang. 15 Moprista+ a shebe nama e phelang, ’me a bolele hore ha aa hloeka. Nama e phelang ha ea hloeka. Ke lepera.+ 16 Kapa haeba nama e phelang e khutla ’me e soeufala, joale a tle ho moprista. 17 Moprista a mo talime,+ ’me haeba lefu le soeufetse, joale moprista a phatlalatse hore lefu le hloekile. O hloekile.

18 “Ha e le ’mele, haeba lethopa+ le hlaha letlalong la oona ’me o fola, 19 ’me sebakeng sa lethopa ho hlaha lekhopho le lesoeu kapa sebato se bosoeu bo bofubelu, joale a iponahatse ho moprista. 20 Moprista a talime,+ ’me haeba le bonahala le phobetse letlalong ’me mohoete oa lona o soeufetse, joale moprista a bolele hore ha aa hloeka. Ke lefu la lepera. Le siphohile lethopeng. 21 Empa haeba moprista a le talima, ’me joale ho se mohoete o mosoeu ho lona ’me le sa phobela letlalong ’me le le lerootho, joale moprista a mo behelle ka thōko+ ka matsatsi a supileng. 22 Haeba ntle ho pelaelo le namela letlalong, joale moprista a bolele hore ha aa hloeka. Ke lefu. 23 Empa haeba sebakeng sa lona ho hlaha sebato, ha lea nama, ke ho ruruha+ ho bohloko ha lethopa; ’me moprista a phatlalatse hore o hloekile.+

24 “Kapa haeba ho hlaha lebali letlalong la ’mele ka lebaka la mollo, ’me nama e ka hare ea lebali e e-ba sebato se bosoeu bo bofubelu kapa se sesoeu, 25 joale moprista a le talime; haeba mohoete o soeufetse sebatong ’me se bonahala se phobetse letlalong, ke lepera. Le siphohile lebaling, ’me moprista a bolele hore ha aa hloeka. Ke lefu la lepera. 26 Empa haeba moprista a le talima, ’me, joale ho se mohoete o mosoeu sebatong ’me le sa phobela ’me le le lerootho, joale moprista a mo behelle ka thōko ka matsatsi a supileng. 27 Moprista a mo talime ka letsatsi la bosupa. Haeba ntle ho pelaelo le nametse letlalong, joale moprista a bolele hore ha aa hloeka. Ke lefu la lepera. 28 Empa haeba ho e-ba le sebato sebakeng sa lona, ha le sa namela letlalong ’me le le lerootho, ke lekhopho la lebali; moprista a phatlalatse hore o hloekile, hobane ke ho ruruha ho bohloko ha lebali.

29 “Ha e le monna kapa mosali, haeba lefu le hlaha ho ea joalo hloohong kapa selelung, 30 joale moprista+ a shebe lefu leo; haeba le bonahala le phobetse letlalong, ’me moriri o le mosehla ’me o fokola ho lona, joale moprista a bolele hore ea joalo ha aa hloeka. Ke ho hlotheha ho sa tloaelehang ha moriri.+ Ke lepera la hlooho kapa la selelu. 31 Empa haeba moprista a bona lefu la ho hlotheha ho sa tloaelehang ha moriri, ’me, bonang! le bonahala le sa phobela letlalong ’me ho se moriri o motšo ho lona, joale moprista a behelle ea nang le lefu la ho hlotheha ho sa tloaelehang ha moriri ka thōko+ ka matsatsi a supileng.+ 32 Moprista a talime lefu ka letsatsi la bosupa; haeba ho hlotheha ho sa tloaelehang ha moriri ho sa nama, ’me ho sa hlaha moriri o mosehla ho lona ’me ho hlotheha ho sa tloaelehang ha moriri+ ho bonahala ho sa phobela letlalong, 33 joale a beole, empa a se ke a beola ho hlotheha ho sa tloaelehang ha moriri;+ moprista a behelle ea nang le ho hlotheha ho sa tloaelehang ha moriri ka thōko ka matsatsi a supileng hape.

34 “Moprista a talime ho hlotheha ho sa tloaelehang ha moriri ka letsatsi la bosupa; ’me haeba ho hlotheha ho sa tloaelehang ha moriri ho sa namela letlalong, ’me ho bonahala ho sa phobela letlalong, joale moprista a phatlalatse hore o hloekile,+ ’me a hlatsoe liaparo tsa hae ’me a hloeke. 35 Empa haeba ntle ho pelaelo ho hlotheha ho sa tloaelehang ha moriri ho namela letlalong ka mor’a ho tiisa ho hloeka ha hae, 36 joale moprista+ a mo shebe; haeba ho hlotheha ho sa tloaelehang ha moriri ho nametse letlalong, ha ho hlokahale hore moprista a hlahlobe moriri o mosehla; ha aa hloeka. 37 Empa haeba chebahalong ea hona ho hlotheha ho sa tloaelehang ha moriri ho ntse ho eme ’me moriri o motšo o metse har’a hona, ho hlotheha ho sa tloaelehang ha moriri ho folile. O hloekile, ’me moprista a phatlalatse hore o hloekile.+

38 “Ha e le monna kapa mosali, haeba libato+ li hlaha letlalong la ’mele oa hae, libato tse tšoeu, 39 joale moprista+ a shebe; haeba libato tsa letlalo la ’mele oa hae li le bosoeu bo lerootho, ke lekhopho le se nang kotsi. Le siphohile letlalong. O hloekile.

40 “Ha e le monna, haeba hlooho ea hae e tsoa lefatla,+ ke lefatla. O hloekile. 41 Haeba hlooho ea hae e tsoa lefatla ka pele, ke lefatla le phatleng. O hloekile. 42 Empa haeba lefu le bosoeu bo bofubelu le hlaha lefatleng le har’a hlooho kapa phatleng, ke lepera le siphohang lefatleng le har’a hlooho kapa phatleng ea hae. 43 Moprista+ a mo talime; haeba ho e-na le lekhopho la lefu le bosoeu bo bofubelu lefatleng le har’a hlooho ea hae kapa phatleng ea hae le bonahalang joaloka lepera letlalong la ’mele, 44 ke molepera. Ha aa hloeka. Moprista o lokela ho bolela hore ha aa hloeka. Lefu la hae le hloohong. 45 Ha e le ea nang le lepera eo lefu le leng ho eena, liaparo tsa hae li lokela ho taboloa,+ le hlooho ea hae e lokela ho ba mahlantholla,+ ’me a koahele litelu tse holim ’a molomo+ ’me a hoeletse, ‘Ha kea hloeka, ha kea hloeka!’+ 46 E tla ba ea sa hloekang ka matsatsi ’ohle ao ka ’ona lefu le leng ho eena. Ha aa hloeka. O lokela ho lula a ikarotse. Sebaka sa hae sa bolulo se ka ntle ho liahelo.+

47 “Ha e le seaparo, haeba lefu la lepera le hlaha ho sona, ebang ke seaparong sa boea kapa seaparong sa line, 48 kapa litšoeleng tse theosang+ kapa litšoeleng tse tšekaletseng tsa line le tsa boea, kapa letlalong kapa nthong leha e le efe e entsoeng ka letlalo,+ 49 ’me ho hlaha lefu le botala bo bosehla kapa le lefubelunyana seaparong kapa letlalong kapa litšoeleng tse theosang kapa litšoeleng tse tšekaletseng kapa nthong leha e le efe ea letlalo, ke lefu la lepera, ’me se bontšoe moprista. 50 Moprista+ o tla bona lefu, ’me a behelle ea nang le lefu ka thōko+ ka matsatsi a supileng. 51 Ha a se a bone lefu letsatsing la bosupa, hore lefu le nametse seaparong kapa litšoeleng tse theosang kapa litšoeleng tse tšekaletseng+ kapa letlalong le sebelisetsoang mosebetsi leha e le ofe oo letlalo le o etselitsoeng, lefu leo ke lepera+ le bolaeang. Ha lea hloeka. 52 A chese seaparo kapa litšoele tse theosang kapa litšoele tse tšekaletseng tsa boea kapa line,+ kapa ntho leha e le efe ea letlalo eo lefu le ka hlahang ho eona, hobane ke lepera le bolaeang.+ Se lokela ho chesoa ka mollo.

53 “Empa haeba moprista a sheba, ’me, joale lefu le sa namela seaparong kapa litšoeleng tse theosang kapa litšoeleng tse tšekaletseng kapa nthong leha e le efe ea letlalo,+ 54 hape moprista a laele hore ba hlatsoe seo lefu le leng ho sona, ’me a se behelle ka thōko ka matsatsi a mang a supileng. 55 Moprista a talime lefu ka mor’a hore se hlatsuoe, ’me haeba lefu le sa fetola ponahalo ea sona ’me leha ho le joalo lefu le sa nama, ha sea hloeka. U lokela ho se chesa mollong. Ke letheba le tebileng holim ’a setsiba se thochehileng ebang ke tlas’a sona kapa ka ntle ho sona.

56 “Empa haeba moprista a shebile, ’me joale lefu le le lerootho ka mor’a hore se hlatsuoe, joale a le tabole seaparong kapa letlalong kapa litšoeleng tse theosang kapa litšoeleng tse tšekaletseng. 57 Leha ho le joalo, haeba le ntse le bonahala seaparong kapa litšoeleng tse theosang kapa litšoeleng tse tšekaletseng+ kapa nthong leha e le efe ea letlalo, lea siphoha. U lokela ho chesa+ mollong eng kapa eng eo lefu le leng ho eona. 58 Ha e le seaparo kapa litšoele tse theosang kapa litšoele tse tšekaletseng kapa ntho leha e le efe ea letlalo eo u ka e hlatsoang, ha lefu le nyametse ho tsona, joale e hlatsuoe la bobeli; e tla hloeka.

59 “Ona ke molao oa lefu la lepera seaparong sa boea kapa sa line,+ kapa litšoeleng tse theosang kapa litšoeleng tse tšekaletseng, kapa nthong leha e le efe ea letlalo, bakeng sa ho phatlalatsa hore e hloekile kapa ho bolela hore ha ea hloeka.”

14 Jehova a tsoela pele ho bua le Moshe, a re: 2 “Ona e tla ba molao oa molepera+ letsatsing la ho tiisa ho hloeka ha hae, ha a tlisoa ho moprista.+ 3 Moprista a ee ka ntle ho liahelo, ’me moprista a talime; haeba lefu la lepera le phekotsoe+ ho ea nang le lepera, 4 joale moprista a fane ka taelo; bakeng sa ho itlhoekisa a nke linonyana+ tse peli tse hloekileng tse phelang le lehong la kedare+ le khoele+ e ’mala o sekareleta oa kokase le hysopa.+ 5 Moprista a fane ka taelo, ’me nonyana e ’ngoe e bolaeloe ka har’a sejana sa letsopa se tšetseng metsi a macha.+ 6 Ha e le nonyana e phelang, o lokela ho e nka le lehong la kedare le khoele e ’mala o sekareleta oa kokase le hysopa, ’me a li inele hammoho le nonyana e phelang ka har’a mali a nonyana e ileng ea bolaeloa ka har’a metsi a macha. 7 Joale a a fafatse+ ka makhetlo a supileng+ holim ’a ea itlhoekisang lepera ’me a phatlalatse hore o hloekile,+ ’me a tlohele nonyana e phelang hore e ee naheng.+

8 “Ea itlhoekisang a hlatsoe liaparo+ tsa hae ’me a beole moriri oohle oa hae a itlhatsoe+ metsing a hloeke, ’me ka mor’a moo a ka kena liahelong. A lule ka ntle ho tente ea hae ka matsatsi a supileng.+ 9 Letsatsing la bosupa o tla beola moriri oohle oa hlooho+ ea hae le selelu sa hae le lintši tsa hae. E, o lokela ho beola moriri oohle oa hae, ’me a hlatsoe liaparo tsa hae le ho hlatsoa ’mele oa hae metsing; a hloeke.

10 “Letsatsing la borobeli+ o tla nka lipheleu tse peli tse nyenyane tse phetseng hantle le konyana+ e le ’ngoe e phetseng hantle e tšehali, e selemong sa eona sa pele, le likarolo tse tharo tsa leshome tsa efa ea phofo e thumisehileng e le nyehelo ea lijo-thollo+ e kolobisitsoeng ka oli le tekanyo ea loge e le ’ngoe ea oli;+ 11 ’me moprista ea phatlalatsang hore o hloekile a hlahise motho ea itlhoekisang, le lintho tseo, ka pel’a Jehova monyako oa tente ea pokano. 12 Moprista a nke pheleu e le ’ngoe e nyenyane ’me a e nyehele bakeng sa nyehelo ea molato+ hammoho le tekanyo ea loge+ ea oli ’me a li tsokele koana le koana e le nyehelo+ e tsokoang ka pel’a Jehova. 13 A hlabe pheleu e nyenyane sebakeng+ seo nyehelo ea sebe le nyehelo ea secheso li hlabeloang ho sona kamehla, sebakeng se halalelang,+ hobane, joaloka nyehelo ea sebe, nyehelo ea molato ke ea moprista.+ Ke ntho e halalelang ka ho fetisisa.

14 “Moprista a nke mali a mang a nyehelo ea molato, ’me moprista a a tlotse ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto la hae le letona.+ 15 Moprista a nke tekanyo ea loge+ ea oli ’me a e tšele seatleng sa moprista se setšehali. 16 Moprista a qopetse oli e seatleng sa hae se setšehali ka monoana o motona ’me a fafatse oli e ’ngoe ka monoana ka makhetlo a supileng+ ka pel’a Jehova. 17 Ha e le oli e ’ngoe kaofela e seatleng sa hae moprista o tla tlotsa e ’ngoe ea eona ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto le letona holim ’a mali a nyehelo ea molato.+ 18 Oli e setseng seatleng sa moprista o tla e tlotsa hloohong ea ea itlhoekisang, ’me moprista a koahele libe+ tsa hae ka pel’a Jehova.

19 “Moprista a fane ka nyehelo ea sebe+ ’me a koahele libe tsa ea itlhoekisang ho se hloeke ha hae, ’me ka mor’a moo o tla hlaba nyehelo ea secheso. 20 Moprista a fane ka nyehelo ea secheso le nyehelo ea lijo-thollo+ aletareng, ’me moprista+ a koahele libe tsa hae;+ o tla hloeka.+

21 “Leha ho le joalo, haeba e le motho ea tlaase+ ’me a se na matla a lekaneng,+ joale a nke pheleu e le ’ngoe e nyenyane e le nyehelo ea molato bakeng sa nyehelo e tsokoang e le hore a koahele libe tsa hae le karolo ea leshome ea efa ea phofo e thumisehileng e kolobisitsoeng ka oli e le nyehelo ea lijo-thollo le tekanyo ea loge ea oli, 22 le maebana-khoroana+ a mabeli kapa maebana a mabeli, ho ea ka matla a hae, ’me le leng e tla ba nyehelo ea sebe ’me le leng e be nyehelo ea secheso. 23 Ka letsatsi la borobeli+ a a tlise bakeng sa ho tiisa ho hloeka+ ha hae ho moprista monyako oa tente ea pokano+ ka pel’a Jehova.

24 “Moprista a nke pheleu e nyenyane ea nyehelo ea molato+ le tekanyo ea loge ea oli, ’me moprista a li tsokele koana le koana e le nyehelo e tsokoang ka pel’a Jehova.+ 25 A hlabe pheleu e nyenyane ea nyehelo ea molato, ’me moprista a nke mali a mang a nyehelo ea molato ’me a a tlotse ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng oa hae o motona oa leoto le letona.+ 26 Moprista o tla tšela oli e ’ngoe seatleng se setšehali sa moprista.+ 27 Moprista a fafatse+ oli e ’ngoe e seatleng sa hae se setšehali ka monoana o motona ka makhetlo a supileng ka pel’a Jehova. 28 Moprista a tlotse oli e ’ngoe seatleng sa hae ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto le letona sebakeng sa mali a nyehelo ea molato.+ 29 Oli e setseng seatleng sa moprista o tla e tlotsa hloohong+ ea ea itlhoekisang e le ho koahela libe tsa hae ka pel’a Jehova.

30 “A fane ka le leng la maebana-khoroana kapa la maebana leo a ka bang le matla a ho fana ka lona,+ 31 le leng la ’ona leo a ka bang le matla a ho fana ka lona e le nyehelo ea sebe+ ’me le leng e le nyehelo ea secheso+ hammoho le nyehelo ea lijo-thollo; moprista a koahele libe+ tsa ea itlhoekisang ka pel’a Jehova.

32 “Ona ke molao bakeng sa ea nang le lefu la lepera ea ka ’nang a hloka matla ha a tiisa ho hloeka ha hae.”

33 Jehova a bua le Moshe le Arone, a re: 34 “Ha le kena naheng ea Kanana,+ eo ke le fang eona ho e rua,+ ’me ke beha lefu la lepera ntlong ea naha eo le e ruang,+ 35 joale mong’a ntlo a tle ’me a bolelle moprista, a re, ‘Ke hlahetsoe ke ntho e kang lefu ka tlung.’ 36 Moprista a fane ka litaelo, ’me ba phahle ntlo pele moprista a kena ho tla bona lefu leo, e le hore a se ke a bolela hore ntho e ’ngoe le e ’ngoe e ka tlung ha ea hloeka; ’me ka mor’a moo moprista o tla kena ho tla bona ntlo. 37 Ha a bone lefu leo, joale haeba lefu le le maboteng a ntlo, ka likoti tse botala bo bosehla kapa tse khubelunyana, ’me le bonahala le phobetse leboteng, 38 joale moprista a tsoe ka tlung a ee monyako oa ntlo ’me a behelle ntlo ka thōko+ ka matsatsi a supileng.

39 “Moprista a khutle ka letsatsi la bosupa ’me a shebe;+ haeba lefu le nametse maboteng a ntlo, 40 joale moprista a fane ka litaelo, ’me ba ntše+ majoe ao lefu le leng ho ’ona, ’me ba a lahlele ka ntle ho motse sebakeng se sa hloekang. 41 O tla etsa hore ntlo e theboloe ka hare ho pota-pota ka hohle, ’me ba tšele seretse sa letsopa seo ba se qhebolotseng ka ntle ho motse sebakeng se sa hloekang. 42 Ba nke majoe a mang ’me ba a kenye sebakeng sa majoe a pele; o tla re ho nkoe seretse sa letsopa se fapaneng, ’me ho liloe ntlo.

43 “Leha ho le joalo, haeba lefu le khutla ’me le siphoha ka tlung ka mor’a hore majoe a ntšoe le ka mor’a hore ntlo e qhebolloe ’me e liloe, 44 joale moprista+ a kene ’me a shebe; haeba lefu le namme ka tlung, ke lepera+ le bolaeang ka tlung. Ha ea hloeka. 45 A heletse ntlo hammoho le majoe a eona le lifate tsa eona le seretse sohle sa letsopa sa ntlo ’me a li ntšetse ka ntle ho motse sebakeng se sa hloekang.+ 46 Empa mang kapa mang ea kenang ka tlung ka matsatsi leha e le afe ao e beheletsoeng ka thōko+ ka ’ona e tla ba ea sa hloekang ho fihlela mantsiboea;+ 47 ’me mang kapa mang ea robalang ka tlung eo o lokela ho hlatsoa liaparo+ tsa hae, ’me mang kapa mang ea jellang ka tlung eo o lokela ho hlatsoa liaparo tsa hae.

48 “Leha ho le joalo, haeba moprista a kena ’me a sheba, ’me joale lefu le sa nama ka tlung ka mor’a hore ntlo e liloe, joale moprista a phatlalatse hore ntlo e hloekile, hobane lefu le folile.+ 49 Hore a hloekise ntlo sebeng a nke linonyana tse peli+ le lehong la kedare+ le khoele+ e ’mala o sekareleta oa kokase le hysopa. 50 A bolaele nonyana e ’ngoe ka har’a pitsa ea letsopa e tšetseng metsi a macha.+ 51 A nke lehong la kedare le hysopa+ le khoele e ’mala o sekareleta oa kokase le nonyana e phelang ’me a li ine maling a nonyana e ileng ea bolaeloa ka har’a metsi a macha, ’me a a fafatse+ ntlong ka makhetlo a supileng.+ 52 A hloekise ntlo sebeng ka mali a nonyana le metsi a macha le nonyana e phelang le lehong la kedare le hysopa le khoele e ’mala o sekareleta oa kokase. 53 A tlohele nonyana e phelang hore e tsamaee e ee ka ntle ho motse naheng ’me a koahele libe+ tsa ntlo eo; e tla hloeka.

54 “Ona ke molao mabapi le lefu leha e le lefe la lepera+ le mabapi le ho hlotheha ho sa tloaelehang ha moriri+ 55 le mabapi le lepera la seaparo+ le le ka har’a ntlo, 56 le mabapi le lekhopho le khoo le sebato,+ 57 e le ho fana ka litaelo+ ha ntho e sa hloeka le ha ntho e hloekile. Ona ke molao mabapi le lepera.”+

15 Jehova a tsoela pele ho bua le Moshe le Arone, a re: 2 “Buang le bara ba Iseraele, ’me le re ho bona, ‘Haeba monna leha e le ofe a e-na le mohlapo o lutlang+ sethong sa hae sa botona, mohlapo oa hae ha oa hloeka. 3 E tla ba ho se hloeke ha hae ka lebaka la mohlapo oa hae: Ebang setho sa hae sa botona se qhitsitse mohlapo o lutlang kapa setho sa hae sa botona se thibane ka lebaka la mohlapo oa hae o lutlang, ke ho se hloeke ha hae.

4 “‘Bethe leha e le efe eo ea nang le mohlapo o lutlang a ka robalang holim ’a eona e tla ba e sa hloekang, ’me ntho leha e le efe eo a ka lulang holim ’a eona e tla ba e sa hloekang. 5 Motho ea ka amang bethe ea hae o lokela ho hlatsoa liaparo tsa hae, ’me a itlhatsoe metsing ’me e be ea sa hloekang ho fihlela mantsiboea.+ 6 Mang kapa mang ea lulang holim ’a ntho eo ea nang le mohlapo o lutlang a neng a lutse holim ’a eona o lokela ho hlatsoa+ liaparo tsa hae, ’me a itlhatsoe metsing ’me e be ea sa hloekang ho fihlela mantsiboea. 7 Mang kapa mang ea amang ’mele oa ea nang le mohlapo o lutlang+ o lokela ho hlatsoa liaparo tsa hae, ’me a itlhatsoe metsing ’me e be ea sa hloekang ho fihlela mantsiboea.+ 8 Haeba ea nang le mohlapo o lutlang a tšoela ea hloekileng ka mathe, tabeng eo a hlatsoe liaparo tsa hae ’me a itlhatsoe metsing ’me e be ea sa hloekang ho fihlela mantsiboea. 9 Sale+ leha e le efe eo ea nang le mohlapo o lutlang a neng a palame holim ’a eona e tla ba e sa hloekang. 10 Mang kapa mang ea amang ntho leha e le efe e ka bang ka tlas’a hae e tla ba ea sa hloekang ho fihlela mantsiboea; ’me ea li nkang o tla hlatsoa liaparo tsa hae, ’me a itlhatsoe metsing ’me e be ea sa hloekang ho fihlela mantsiboea. 11 Mang kapa mang ea ka angoang ke ea nang le mohlapo o lutlang+ empa a sa hlapa matsoho metsing joale a hlatsoe liaparo tsa hae ’me a itlhatsoe metsing ’me e be ea sa hloekang ho fihlela mantsiboea. 12 Sejana leha e le sefe sa letsopa se ka angoang ke ea nang le mohlapo o lutlang se lokela ho thuhakanngoa;+ ’me sejana leha e le sefe sa lehong+ se lokela ho hlatsuoa ka metsi.

13 “‘Joale haeba ea nang le mohlapo o lutlang a ka hloeka mohlapong oa hae o lutlang, joale a ipalle matsatsi a supileng bakeng sa tlhoekiso+ ea hae, ’me a hlatsoe liaparo tsa hae le ho hlatsoa ’mele oa hae metsing a phallang;+ ’me o tla hloeka. 14 Letsatsing la borobeli o lokela ho inkela maebana-khoroana+ a mabeli kapa maebana a mabeli, ’me a tle ka pel’a Jehova monyako oa tente ea pokano ’me a a fe moprista. 15 Moprista a a nyehele, le leng e le nyehelo ea sebe ’me le leng e le nyehelo ea secheso;+ ’me moprista a koahele libe tsa hae ka pel’a Jehova malebana le mohlapo oa hae o lutlang.

16 “‘Joale haeba monna a tsoa peō,+ joale a itlhatsoe ’mele oohle ka metsi ’me e be ea sa hloekang ho fihlela mantsiboea. 17 Seaparo leha e le sefe le letlalo leha e le lefe leo peō e bang ho lona le hlatsuoe ka metsi ’me e be le sa hloekang ho fihlela mantsiboea.+

18 “‘Ha e le mosali eo monna a ka robalang le eena ’me ha tsoa peō, ba itlhatsoe ka metsi ’me e be ba sa hloekang+ ho fihlela mantsiboea.

19 “‘Haeba mosali a e-na le mohlapo o lutlang, ’me mohlapo oa hae o lutlang o ’meleng oa hae e le mali,+ o lokela ho tsoela pele ka matsatsi a supileng ho se hloekeng+ ha hae ha ho ilela khoeli,+ ’me mang kapa mang ea mo amang e tla ba ea sa hloekang ho fihlela mantsiboea. 20 Ntho leha e le efe eo a ka robalang holim ’a eona ho se hloekeng ha hae ha ho ilela khoeli e tla ba e sa hloekang,+ ’me ntho e ’ngoe le e ’ngoe eo a ka lulang holim ’a eona e tla ba e sa hloekang. 21 Mang kapa mang ea amang bethe ea hae o lokela ho hlatsoa liaparo tsa hae, ’me a itlhatsoe metsing ’me e be ea sa hloekang ho fihlela mantsiboea.+ 22 Mang kapa mang ea amang ntho leha e le efe eo a neng a lutse holim ’a eona o lokela ho hlatsoa liaparo tsa hae, ’me a itlhatsoe metsing ’me e be ea sa hloekang ho fihlela mantsiboea.+ 23 Haeba a ne a lutse holim ’a bethe kapa holim ’a ntho e ’ngoe, ka ho e ama+ e tla ba e sa hloekang ho fihlela mantsiboea. 24 Haeba monna a robala le eena ’me ho se hloeke ha hae ha ho ilela khoeli ho e-ba holim ’a hae,+ joale monna eo e tla ba ea sa hloekang ka matsatsi a supileng, ’me bethe leha e le efe eo a ka robalang holim ’a eona e tla ba e sa hloekang.

25 “‘Ha e le mosali, haeba mohlapo o lutlang oa mali a hae o phalla ka matsatsi a mangata+ ha e se nako e tloaelehileng ea ho se hloeke ha hae ha ho ilela khoeli,+ kapa haeba a e-ba le phallo e telele ho feta ea ho se hloeke ha hae ha ho ilela khoeli, matsatsi ’ohle a mohlapo oa hae o lutlang o sa hloekang a tla ba joaloka matsatsi a ho se hloeke ha hae ha ho ilela khoeli. Ha aa hloeka. 26 Bethe leha e le efe eo a ka robalang holim ’a eona ka matsatsi leha e le afe a mohlapo oa hae o lutlang ho eena e tla ba joaloka bethe ea ho se hloeke ha hae ha ho ilela khoeli,+ ’me ntho leha e le efe eo a ka lulang holim ’a eona e tla ba e sa hloekang joaloka litšila tsa ho se hloeke ha hae ha ho ilela khoeli. 27 Mang kapa mang ea li amang+ e tla ba ea sa hloekang, ’me a hlatsoe liaparo tsa hae le ho itlhatsoa metsing ’me e be ea sa hloekang ho fihlela mantsiboea.

28 “‘Leha ho le joalo, haeba a hloekile mohlapong oa hae o lutlang, a boele a ipalle matsatsi a supileng, ’me ka mor’a moo o tla hloeka.+ 29 Letsatsing la borobeli o lokela ho inkela maebana-khoroana+ a mabeli kapa maebana a mabeli, ’me a a tlise ho moprista monyako oa tente ea pokano.+ 30 Moprista a etse le leng nyehelo ea sebe ’me le leng e be nyehelo ea secheso;+ moprista a koahele libe+ tsa hae ka pel’a Jehova malebana le mohlapo oa hae o lutlang o sa hloekang.

31 “‘Le boloke bara ba Iseraele ba arohile ho se hloekeng ha bona, e le hore ba se ke ba shoela ho se hloekeng ha bona ka lebaka la ho silafatsa tabernakele ea ka, e har’a bona.+

32 “‘Ona ke molao mabapi le monna ea nang le mohlapo o lutlang+ le monna ea tsoang peō+ hoo e bang ea sa hloekang ka lebaka la eona; 33 le mosali ea ilelang khoeli+ ho se hloekeng ha hae, le mang kapa mang ea nang le phallo ea mohlapo o lutlang,+ ebang ke e motona kapa e motšehali, hape ebang ke monna ea robalang le mosali ea sa hloekang.’”

16 Jehova a bua le Moshe ka mor’a lefu la bara ba babeli ba Arone ka lebaka la ho atamela ha bona ka pel’a Jehova hoo ba ileng ba shoa.+ 2 Jehova a re ho Moshe: “Bua le moholoane oa hao Arone, hore ha aa lokela ho tla ka linako tsohle sebakeng se halalelang+ ka har’a lesira,+ ka pel’a sekoahelo se holim ’a Areka, hore a se ke a shoa;+ hobane ke tla hlaha holim ’a sekoahelo+ ka leru.+

3 “Arone a kene sebakeng se halalelang+ le tse latelang: pohoana bakeng sa nyehelo ea sebe+ le pheleu bakeng sa nyehelo ea secheso.+ 4 A apare seaparo se selelele sa ka holimo se halalelang sa line,+ ’me leqapa+ la line le lokela ho ba ’meleng oa hae, a itlame ka leqhama+ la line ’me a ithatele ka tuku ea line.+ Ke liaparo tse halalelang.+ A itlhatsoe ’mele metsing+ ebe oa li apara.

5 “O lokela ho nka lipotsanyane tse peli tse tona phuthehong ea bara ba Iseraele+ bakeng sa nyehelo ea sebe+ le pheleu e le ’ngoe bakeng sa nyehelo ea secheso.+

6 “Arone a hlahise poho ea nyehelo ea sebe, bakeng sa hae,+ ’me a koahele libe+ molemong oa hae+ le oa ntlo ea hae.+

7 “A nke lipōli tse peli ’me a li emise ka pel’a Jehova monyako oa tente ea pokano. 8 Arone a lahle lotho+ bakeng sa lipōli tse peli, lotho e ’ngoe bakeng sa Jehova le lotho e ’ngoe bakeng sa Azazele.+ 9 Arone a hlahise pōli eo lotho+ e oetseng ho eona bakeng sa Jehova, ’me a e etse nyehelo ea sebe.+ 10 Empa pōli eo lotho e oetseng ho eona bakeng sa Azazele e lokela ho emisoa e phela ka pel’a Jehova ho koahela libe tsa eona, e le hore e romeloe+ lefeelleng bakeng sa Azazele.+

11 “Arone a hlahise poho ea nyehelo ea sebe, bakeng sa hae, ’me a koahele libe molemong oa hae le oa ntlo ea hae; ’me a hlabe poho ea nyehelo ea sebe, bakeng sa hae.+

12 “A nke pane+ ea mollo e tletseng mashala a tukang a mollo a tsoang aletareng+ ka pel’a Jehova, ’me liatla+ tsa hae ka bobeli li tlale libano tse tšesaane tse nkhang hamonate,+ ’me a li tlise ka har’a lesira.+ 13 A boele a tšele libano holim ’a mollo ka pel’a Jehova,+ ’me leru la libano le koahele sekoahelo+ sa Areka, se holim ’a Bopaki,+ hore a se ke a shoa.

14 “A nke mali+ a mang a poho ’me a a fafatse ka monoana ka pel’a sekoahelo se lehlakoreng le ka bochabela, ’me o tla fafatsa+ mali a mang ka monoana ka makhetlo a supileng ka pel’a sekoahelo.+

15 “A hlabe pōli ea nyehelo ea sebe, bakeng sa sechaba,+ ’me a tlise mali a eona ka har’a lesira+ ’me a etse ka mali+ a eona ka tsela e tšoanang le kamoo a entseng kateng ka mali a poho; a a fafatse nģ’a sekoahelo le ka pel’a sekoahelo.

16 “A koahele libe tsa sebaka se halalelang malebana le ho se hloeke+ ha bara ba Iseraele le malebana le bofetoheli ba bona libeng+ tsohle tsa bona; ke tsela eo a tla etsa ka eona bakeng sa tente ea pokano, e lutseng le bona ka har’a ho se hloeke ha bona.

17 “Ha ho motho e mong ea lokelang ho ba ka har’a tente ea pokano ha a kena ho ea koahela libe sebakeng se halalelang ho fihlela a tsoa; ’me a koahele libe molemong oa hae+ le molemong oa ntlo ea hae le molemong oa phutheho eohle ea Iseraele.+

18 “A tsoele aletareng,+ e ka pel’a Jehova, ’me a koahele libe tsa eona, ’me a nke mali a poho le mali a pōli ’me a a tlotse manakeng a aletare ho potoloha.+ 19 Hape a fafatse+ mali holim ’a eona ka monoana ka makhetlo a supileng ’me a e hloekise ’me a e halaletse ho se hloekeng ha bara ba Iseraele.

20 “Ha a qetile ho koahela libe+ tsa sebaka se halalelang le tente ea pokano le aletare, a boele a hlahise pōli e phelang.+ 21 Arone a behe matsoho+ a hae a mabeli hloohong ea pōli e phelang ’me a bolele+ holim ’a eona liphoso+ tsohle tsa bara ba Iseraele le bofetoheli ba bona libeng+ tsohle tsa bona, ’me a li behe hloohong ea pōli+ ’me a e lokolle hore e tsamaee ho ea lefeelleng+ ka letsoho la motho+ ea itokisitseng. 22 Pōli eo e tla jara liphoso+ tsohle tsa bona ho li isa naheng ea lehoatata,+ ’me a lokolle pōli hore e ee lefelleng.+

23 “Arone a kene ka tenteng ea pokano ’me a hlobole liaparo tsa line tseo a li apereng ha a kena sebakeng se halalelang, ’me a li behe fatše moo.+ 24 A itlhatsoe ’mele ka metsi+ sebakeng se halalelang+ ’me a apare liaparo+ tsa hae ’me a tsoe ’me a fane ka nyehelo ea hae ea secheso+ le nyehelo ea secheso+ ea sechaba ’me a koahele libe molemong oa hae le molemong oa sechaba.+ 25 O tla etsa hore mafura a nyehelo ea sebe a kubelle aletareng.+

26 “Ha e le ea+ lokolotseng pōli hore e tsamaee bakeng sa Azazele,+ o lokela ho hlatsoa liaparo tsa hae, ’me a itlhatsoe ’mele ka metsi,+ ’me ka mor’a moo a ka kena liahelong.

27 “Leha ho le joalo, o tla re ho isoe poho ea nyehelo ea sebe le pōli ea nyehelo ea sebe ka ntle ho liahelo, tseo mali a tsona a tlisitsoeng bakeng sa ho koahela libe sebakeng se halalelang; ’me ba chese matlalo a tsona le linama tsa tsona le bolokoe ba tsona mollong.+ 28 Ea li chesitseng o lokela ho hlatsoa liaparo tsa hae, ’me a itlhatsoe ’mele metsing, ’me ka mor’a moo a ka kena liahelong.

29 “E tla ba taelo e hlomamisitsoeng ho isa nakong e sa lekanyetsoang bakeng sa lōna:+ Ka khoeli ea bosupa ka la leshome la khoeli+ le lokela ho hlorisa meea+ ea lōna, ’me le se ke la etsa mosebetsi+ leha e le ofe, ebang ke letsoalloa kapa mojaki ea lutseng e le mojaki har’a lōna. 30 Etsoe ka letsatsi lena ho tla koaheloa libe+ bakeng sa lōna ho phatlalatsa hore le hloekile. Le tla hloeka libeng tsohle tsa lōna ka pel’a Jehova.+ 31 Ke sabatha+ ea phomolo e feletseng ho lōna, ’me le lokela ho hlorisa meea ea lōna. Ke taelo e hlomamisitsoeng ho isa nakong e sa lekanyetsoang.

32 “Moprista ea tla tlotsoa+ le eo letsoho la hae le tla tlatsoa matla hore a sebetse e le moprista+ e le mohlahlami+ oa ntat’ae a koahele libe ’me a apare liaparo tsa line.+ Ke liaparo tse halalelang.+ 33 A koahele libe tsa sehalalelo,+ le tsa tente+ ea pokano ’me a koahele libe tsa aletare;+ o tla koahela libe+ tsa baprista le tsa sechaba sohle sa phutheho. 34 Sena e tla ba taelo e hlomamisitsoeng ho isa nakong e sa lekanyetsoang bakeng sa lōna,+ e le ho koahela libe tsa bara ba Iseraele malebana le libe tsohle tsa bona hang ka selemo.”+

Tumellanong le hoo a etsa feela joalokaha Jehova a ne a laetse Moshe.

17 Jehova a tsoela pele ho bua le Moshe, a re: 2 “Bua le Arone le bara ba hae le bara bohle ba Iseraele, o re ho bona, ‘Ena ke ntho eo Jehova a e laetseng, a re:

3 “‘“Motho leha e le ofe oa ntlo ea Iseraele ea hlabelang poho kapa pheleu e nyenyane kapa pōli liahelong kapa ea e hlabelang ka ntle ho liahelo 4 ’me a sa e tlise monyako oa tente ea pokano+ ho e hlahisa e le nyehelo ho Jehova ka pel’a tabernakele ea Jehova, motho eo o tla balloa molato oa mali. O tšolotse mali, ’me motho eo a felisoe har’a batho+ ba habo, 5 e le hore bara ba Iseraele ba ka tlisa mahlabelo a bona, ao ba a etsetsang naheng,+ ’me ba a tlise ho Jehova monyako oa tente ea pokano ho moprista,+ ’me ba a hlabele Jehova+ e le mahlabelo a kopanetsoeng. 6 Moprista a fafatse mali holim ’a aletare+ ea Jehova monyako oa tente ea pokano, ’me a etse hore mafura+ a kubelle e le monko o khathollang ho Jehova.+ 7 Kahoo ha ba sa tla hlola ba etsa mahlabelo a bona bakeng sa bademona+ ba nang le sebōpeho sa pōli bao ba bang le likamano tse litšila le bona.+ Ena e tla ba taelo e hlomamisitsoeng ho isa nakong e sa lekanyetsoang bakeng sa lōna, melokong eohle ea lōna.”’

8 “U lokela ho re ho bona, ‘Motho leha e le ofe oa ntlo ea Iseraele kapa mojaki ea itseng ea ka lulang e le mojaki har’a lōna ea nyehelang nyehelo ea secheso+ kapa sehlabelo 9 ’me a sa e tlise monyako oa tente ea pokano ho e hlahisa ho Jehova,+ motho eo a felisoe ho batho ba habo.+

10 “‘Motho leha e le ofe oa ntlo ea Iseraele kapa mojaki ea itseng ea lulang e le mojaki har’a lōna ea jang mali+ a mofuta leha e le ofe, ka sebele ke tla tjamela moea+ o jang mali, ’me ruri ke tla mo felisa har’a batho ba habo. 11 Etsoe moea oa nama o maling,+ ’me ke a behile aletareng hore le koahele libe+ tsa meea ea lōna, hobane mali+ a koahela libe+ ka lebaka la moea o ho ’ona. 12 Ke ka lebaka leo ke itseng ho bara ba Iseraele: “Ho lōna ho se ke ha e-ba le moea o jang mali ’me ho se ke ha e-ba le mojaki ea lulang e le mojaki har’a+ lōna ea tla ja mali.”+

13 “‘Motho leha e le ofe oa bara ba Iseraele kapa mojaki ea itseng ea lulang e le mojaki har’a lōna eo ha a tsoma a tšoasang sebata kapa nonyana e ka jeoang, tabeng eo a tšolle+ mali a eona ’me a a koahele ka mobu.+ 14 Etsoe moea oa nama ea mofuta o mong le o mong ke mali a eona ka moea o leng ho ’ona. Ka lebaka leo ke itse ho bara ba Iseraele: “Le se ke la ja mali a nama ea mofuta leha e le ofe, hobane moea oa nama ea mofuta leha e le ofe ke mali a eona.+ Mang kapa mang ea a jang o tla felisoa.”+ 15 Moea leha e le ofe o jang ntho e seng e shoele kapa ntho e rusolotsoeng ke sebata,+ ebang ke letsoalloa kapa mojaki, tabeng eo a hlatsoe liaparo tsa hae ’me a itlhatsoe ka metsi ’me e be ea sa hloekang ho fihlela mantsiboea;+ o tla hloeka. 16 Empa haeba a ke ke a li hlatsoa ’me a ke ke a hlatsoa ’mele oa hae, joale a arabelle phoso+ ea hae.’”

18 Jehova a tsoela pele ho bua le Moshe, a re: 2 “Bua le bara ba Iseraele, u re ho bona, ‘Ke ’na Jehova Molimo+ oa lōna. 3 Le se ke la etsa ka tsela eo naha ea Egepeta, eo le ileng la lula ho eona, e etsang ka eona;+ le se ke la etsa ka tsela eo naha ea Kanana, eo ke le isang ho eona, e etsang ka eona;+ ’me le se ke la tsamaea ka litaelo tsa bona tse hlomamisitsoeng. 4 Le lokela ho phetha liqeto tsa ka tsa boahloli,+ ’me le lokela ho boloka litaelo tsa ka tse hlomamisitsoeng+ e le hore le tsamaee ka tsona.+ Ke ’na Jehova Molimo oa lōna. 5 Le boloke litaelo tsa ka tse hlomamisitsoeng le liqeto tsa ka tsa boahloli, tseo haeba motho a li phetha, a tla boela a phele ka tsona.+ Ke ’na Jehova.+

6 “‘Motho leha e le ofe ho lōna, a se ke a atamela ho mong ka eena leha e le ofe ea haufi ho apola bofeela ba hae.+ Ke ’na Jehova. 7 U se ke ua apola bofeela ba ntat’ao+ le bofeela ba ’m ’ao. Ke ’m ’ao. U se ke ua apola bofeela ba hae.

8 “‘U se ke ua apola bofeela ba mosali oa ntat’ao.+ Ke bofeela ba ntat’ao.

9 “‘Ha e le bofeela ba khaitseli ea hao, morali oa ntat’ao kapa morali oa ’m ’ao, ebang o tsoaletsoe ntlong e tšoanang kapa o tsoaletsoe ka ntle ho eona, u se ke ua apola bofeela ba bona.+

10 “‘Ha e le bofeela ba morali oa mora oa hao kapa morali oa morali oa hao, u se ke ua apola bofeela ba bona, hobane ke bofeela ba hao.

11 “‘Ha e le bofeela ba morali oa mosali oa ntat’ao, ngoana oa ntat’ao, kaha ke khaitseli ea hao, u se ke ua apola bofeela ba hae.

12 “‘U se ke ua apola bofeela ba rakhali’ao. O amana ka mali le ntat’ao.+

13 “‘U se ke ua apola bofeela ba morali’abo ’m ’ao, hobane o amana ka mali le ’m ’ao.

14 “‘U se ke ua apola bofeela ba mor’abo ntat’ao. U se ke ua atamela mosali oa hae. Ke mosali oa mor’abo ntat’ao.+

15 “‘U se ke ua apola bofeela ba ngoetsi+ ea hao. Ke mosali oa mora oa hao. U se ke ua apola bofeela ba hae.

16 “‘U se ke ua apola bofeela ba mosali oa mor’eno.+ Ke bofeela ba mor’eno.

17 “‘U se ke ua apola bofeela ba mosali le morali oa hae.+ U se ke ua nka morali oa mora oa hae le morali oa morali oa hae hore u apole bofeela ba hae. Ke maemo a kamano ea mali. Ke boitšoaro bo hlephileng.+

18 “‘U se ke ua nka mosali ho phaella ho morali’abo e le ea hlōlisanang+ le eena hore u apole bofeela ba hae, ke hore, ho phaella ho eena ha a sa ntse a phela.

19 “‘U se ke ua atamela mosali ha a sa hloeka nakong ea ho ilela khoeli+ ha hae hore u apole bofeela ba hae.+

20 “‘U se ke ua fana ka peō ea hao ho mosali oa oa heno hore a silafatsoe ke eona.+

21 “‘U se ke ua lumella hore ngoana leha e le ofe oa hao a neheloe+ ho Moloke.+ U se ke ua hlompholla+ lebitso la Molimo oa hao ka tsela eo. Ke ’na Jehova.+

22 “‘U se ke ua robala le e motona+ ho tšoana le ha u robala le mosali.+ Ke ntho e manyala.

23 “‘U se ke ua fana ka peō ea hao ho phoofolo+ leha e le efe hore e silafatsoe ke eona, ’me mosali ha aa lokela ho ema ka pel’a phoofolo hore a tlōleloe ke eona.+ Ke ho tlōla seo e leng tlhaho.

24 “‘Le se ke la itšilafatsa ka e ’ngoe ea lintho tsena, hobane lichaba tseo ke li tlosang ka pel’a lōna li itšilafalitse ka lintho tsena tsohle.+ 25 Ka lebaka leo naha ha ea hloeka, ’me ke tla e tlisetsa kotlo bakeng sa phoso ea eona, ’me naha e tla hlatsa baahi ba eona.+ 26 Le boloke litaelo tsa ka tse hlomamisitsoeng le liqeto tsa ka tsa boahloli,+ ’me le se ke la etsa leha e le efe ea lintho tsena tsohle tse manyala, ebang ke letsoalloa kapa mojaki ea lulang e le mojaki har’a lōna.+ 27 Etsoe batho ba naha ena ba bileng teng pele ho lōna ba entse lintho tsena tsohle tse manyala,+ hoo naha e sa hloekang. 28 Joale naha e ke ke ea le hlatsa ka tsela e tšoanang le eo ka eona ka sebele e tla hlatsa lichaba tse bileng teng pele ho lōna ka lebaka la ho e silafatsa.+ 29 Haeba mang kapa mang a etsa leha e le efe ea lintho tsena tsohle tse manyala, joale meea e li etsang e felisoe har’a sechaba+ sa habo eona. 30 Le boloke tlamo ea lōna ho ’na ka ho se etse leha e le efe ea litloaelo tse manyala tse entsoeng pele ho lōna,+ hore le se ke la itšilafatsa ka tsona. Ke ’na Jehova Molimo oa lōna.’”

19 Jehova a bua ka ho eketsehileng le Moshe, a re: 2 “Bua le phutheho eohle ea bara ba Iseraele, u re ho bona, ‘Le lokela ho halalela,+ hobane ’na Jehova Molimo oa lōna kea halalela.+

3 “‘E mong le e mong o lokela ho tšaba ’m ’ae le ntat’ae,+ ’me le lokela ho boloka lisabatha tsa ka.+ Ke ’na Jehova Molimo oa lōna. 4 Le se ke la retelehela ho melimo ea lefeela,+ ’me le se ke la iketsetsa melimo e qhibilihisitsoeng.+ Ke ’na Jehova Molimo oa lōna.

5 “‘Joale haeba le hlabela Jehova+ sehlabelo se kopanetsoeng, le lokela ho se hlabela hore le iphumanele kamohelo.+ 6 Le lokela ho se ja letsatsing la sehlabelo sa lōna le letsatsing le hlahlamang, empa se setseng ho fihlela letsatsing la boraro se lokela ho chesoa mollong.+ 7 Leha ho le joalo, haeba se jeoa letsatsing la boraro, ke ntho e silafetseng.+ Se ke ke sa amoheleha.+ 8 Ea se jang o tla arabella phoso+ ea hae, hobane o silafalitse ntho e halalelang ea Jehova; moea oo o tla felisoa har’a sechaba sa habo oona.

9 “‘Ha le kotula lijalo tšimong ea lōna, le se ke la kotula moeli oa tšimo ea lōna ka ho feletseng, ’me le se ke la thonaka se khoahlapisoang lijalong tsa lōna.+ 10 Hape, le se ke la bokella masalla+ a lirapeng tsa lōna tsa morara, ’me le se ke la thonaka morara o hasaneng lirapeng tsa lōna tsa morara. Le o siele ea hlorileng le mojaki.+ Ke ’na Jehova Molimo oa lōna.

11 “‘Le se ke la utsoa,+ ’me le se ke la thetsa,+ ’me leha e le mang a se ke a etsetsa oa habo bolotsana.+ 12 Le se ke la hlapanya ka lebitso la ka ka leshano,+ hoo le hlomphollang lebitso la Molimo oa lōna. Ke ’na Jehova. 13 U se ke ua etsetsa oa heno+ bolotsana, ’me u se ke ua tlatlapa.+ Moputso oa mosebetsi ea hiriloeng ha oa lokela ho lula bosiu bohle ho uena ho fihlela hoseng.+

14 “‘U se ke ua rohaka motho ea sa utloeng litsebeng, ’me u se ke ua beha tšitiso ka pel’a sefofu;+ u tšabe Molimo+ oa hao. Ke ’na Jehova.

15 “‘Le se ke la etsa ka ho hloka toka kahlolong. Le se ke la tšoara ea tlaase ka leeme,+ ’me le se ke la emela e moholo.+ Le ahlole oa habo lōna ka toka.

16 “‘U se ke ua chalaka har’a batho ba heno ka morero oa ho etselletsa.+ U se ke ua ema khahlanong le mali+ a oa heno. Ke ’na Jehova.

17 “‘U se ke ua hloea mor’eno ka pelong ea hao.+ U khalemele oa heno,+ hore u se ke ua jara sebe hammoho le eena.

18 “‘U se ke ua iphetetsa+ kapa ua jara bara ba batho+ ba heno ka pelo; ’me u rate oa heno joalokaha u ithata.+ Ke ’na Jehova.

19 “‘Le boloke litaelo tsa ka tse hlomamisitsoeng: Le se ke la nehela liphoofolo tsa lōna tse ruuoang tsa mefuta e ’meli hore li tlōlelane. Le se ke la jala masimo a lōna ka peō ea mefuta e ’meli,+ ’me le se ke la apara liaparo tsa litšoele tsa mefuta e ’meli, tse loheletsoeng hammoho.+

20 “‘Joale haeba monna a robala le mosali ’me a ntša peō, e le lekhabunyane le khethetsoeng monna e mong, ’me a sa lopolloa ka tsela leha e le efe kapa hona hore a fuoe tokoloho, kotlo e lokela ho ba teng. Ha baa lokela ho bolaoa, hobane o ne a sa lokolloa. 21 A tlise nyehelo ea hae ea molato ho Jehova monyako oa tente ea pokano, pheleu ea nyehelo ea molato.+ 22 Moprista a koahele libe tsa hae ka pheleu ea nyehelo ea molato ka pel’a Jehova bakeng sa sebe seo a se entseng; ’me o tla tšoareloa+ sebe seo a se entseng.

23 “‘Haeba le fihla naheng, ’me le lema sefate leha e le sefe bakeng sa lijo, le boele le nke litholoana tsa sona e le tse litšila joaloka “ntlha ea letlalo la setho sa botona” ea sona. Li tla tsoela pele li sa bolla ka lilemo tse tharo bakeng sa lōna. Ha lia lokela ho jeoa. 24 Empa selemong sa bone litholoana+ tsohle tsa sona e tla ba ntho e halalelang ea thabo e khaphatsehang ea mokete ho Jehova.+ 25 Selemong sa bohlano le ka ja litholoana tsa sona hore le ikekelletse lihlahisoa tsa sona.+ Ke ’na Jehova Molimo oa lōna.

26 “‘Le se ke la jelella letho le mali.+

“‘Le se ke la batla lipontšo tsa se tlang,+ ’me le se ke la sebelisa boselamose.+

27 “‘Le se ke la kuta moriri oa lōna o lehlakoreng, ’me le se ke la senya mathōko a litelu tsa lōna.+

28 “‘Le se ke la iphatsa ’meleng ka lebaka la moea o shoeleng,+ ’me le se ke la iketsa mokhora. Ke ’na Jehova.

29 “‘U se ke ua silafatsa morali oa hao ka ho mo etsa letekatse,+ e le hore naha e se ke ea etsa botekatse ’me naha ea tlala boitšoaro bo hlephileng.+

30 “‘Le boloke lisabatha tsa ka,+ ’me le be le tšabo e nang le tlhompho bakeng sa sehalalelo+ sa ka. Ke ’na Jehova.

31 “‘Le se ke la retelehela ho ba buisanang le meea,+ ’me le se ke la batla keletso ho litsebi tse bolelang liketsahalo esale pele,+ hore le silafatsoe ke tsona. Ke ’na Jehova Molimo oa lōna.

32 “‘U eme pel’a moriri o moputsoa,+ ’me u nahanele motho ea tsofetseng,+ ’me u tšabe Molimo oa hao.+ Ke ’na Jehova.

33 “‘Haeba mojaki a lula le lōna e le mojaki naheng ea lōna, le se ke la mo sotla.+ 34 Mojaki ea lulang e le mojaki hammoho le lōna o lokela ho ba ho lōna joaloka letsoalloa la habo lōna; le mo rate joalokaha le ithata,+ etsoe le bile bajaki naheng ea Egepeta.+ Ke ’na Jehova Molimo oa lōna.

35 “‘Le se ke la etsa ka ho hloka toka ha le ahlola,+ ha le lekanya, ha le bekha+ kapa le lekanya lintho tse metsi. 36 Le lokela ho ba le sekala se nepahetseng,+ boima bo nepahetseng, efa e nepahetseng le hine e nepahetseng. Ke ’na Jehova Molimo oa lōna, ea le ntšitseng naheng ea Egepeta. 37 Kahoo le boloke litaelo tsohle tsa ka tse hlomamisitsoeng le liqeto tsohle tsa ka tsa boahloli, ’me le li phethe.+ Ke ’na Jehova.’”

20 Jehova a tsoela pele ho bua le Moshe, a re: 2 “U tla re ho bara ba Iseraele, ‘Motho leha e le ofe oa bara ba Iseraele, le mojaki leha e le ofe ea lulang e le mojaki Iseraele, ea fanang ka leha e le ofe oa bana ba hae ho Moloke,+ ruri o lokela ho bolaoa. Batho ba naha ba lokela ho mo tlepetsa ka majoe ho fihlela a shoa. 3 Ha e le ’na, ke tla tjamela motho eo, ’me ke tla mo felisa har’a sechaba sa habo,+ hobane o fane ka ba bang ba bana ba hae ho Moloke ka morero oa ho silafatsa sebaka sa ka se halalelang+ le ho hlompholla lebitso+ la ka le halalelang. 4 Haeba batho ba naha ka boomo ba patela motho eo mahlo ha a fana ka leha e le ofe oa bana ba hae ho Moloke ka hore ba se ke ba mo bolaea,+ 5 joale, ka sebele ke tla tjamela motho eo le lelapa+ la hae, ’me ruri eena le bohle ba bang le likamano tse litšila hammoho le eena ka ho ba le likamano tse litšila+ le Moloke ke tla ba felisa har’a sechaba sa habo bona.

6 “‘Ha e le moea o retelehelang ho ba buisanang le meea+ le litsebi tse bolelang liketsahalo esale pele+ hoo o bang le likamano tse litšila le bona, ka sebele ke tla tjamela moea oo ’me ke o felise har’a batho ba habo oona.+

7 “‘Le ikhalaletse ’me le halalele,+ hobane ke ’na Jehova Molimo oa lōna. 8 Le boloke litaelo tsa ka tse hlomamisitsoeng ’me le li phethe.+ Ke ’na Jehova ea le halaletsang.+

9 “‘Haeba ho e-na le motho leha e le ofe ea rohakang ntat’ae le ’m ’ae,+ ruri o lokela ho bolaoa.+ O rohakile ntat’ae le ’m ’ae. Mali a hae a holim ’a hae.+

10 “‘Joale monna ea febang le mosali oa monna e mong o feba le mosali oa oa habo.+ Ruri o lokela ho bolaoa, mofebi hammoho le mofebi oa mosali.+ 11 Monna ea robalang le mosali oa ntat’ae o apotse bofeela ba ntat’ae.+ Ruri ka bobeli ba lokela ho bolaoa. Mali a bona a holim ’a bona. 12 Haeba monna a robala le ngoetsi ea hae, ruri ka bobeli ba lokela ho bolaoa.+ Ba tlōtse seo e leng sa tlhaho. Mali a bona a holim ’a bona.+

13 “‘Ha monna a robala le monna joalokaha motho a robala le mosali, ka bobeli ba entse ntho e manyala.+ Ruri ba lokela ho bolaoa. Mali a bona a holim ’a bona.

14 “‘Haeba monna a nka mosali le ’m ’ae, ke boitšoaro bo hlephileng.+ Ba mo cheselletse hammoho le bona mollong,+ e le hore boitšoaro bo hlephileng+ bo se ke ba tsoela pele har’a lōna.

15 “‘Haeba monna a fana ka mohlapo oa hae oa peō ho phoofolo,+ ruri o lokela ho bolaoa, ’me le lokela ho bolaea phoofolo eo. 16 Haeba mosali a atamela phoofolo leha e le efe hore a tlōleloe ke eona,+ u bolaee mosali eo le phoofolo. Ruri ba lokela ho bolaoa. Mali a bona a holim ’a bona.

17 “‘Haeba monna a nka khaitseli ea hae, morali oa ntat’ae kapa morali oa ’m ’ae, ’me a bona bofeela ba hae, le eena a bona bofeela ba hae, ke lihlong.+ Kahoo ba felisoe ka pel’a mahlo a bara ba sechaba sa habo bona. O apotse bofeela ba khaitseli ea hae. O lokela ho arabella phoso ea hae.

18 “‘Ha monna a robala le mosali ea ilelang khoeli ’me a apola bofeela ba hae, o pepesitse mohloli oa hae, le eena o apotse mohloli oa mali a hae.+ Kahoo ka bobeli ba felisoe har’a sechaba sa habo bona.

19 “‘U se ke ua apola bofeela ba morali’abo+ ’m ’ao le ba rakhali’ao,+ hobane eo o pepesitse ba amanang le eena ka mali.+ Ba lokela ho arabella phoso ea bona. 20 Monna ea robalang le mosali oa mor’abo ntat’ae o apotse bofeela ba mor’abo ntat’ae.+ Ba lokela ho arabella sebe sa bona. Ba lokela ho shoa ba se na ngoana.+ 21 Haeba monna a nka mosali oa mor’abo, ke ntho e nyonyehang.+ O apotse bofeela ba mor’abo. Ha baa lokela ho ba le bana.

22 “‘Le boloke litaelo tsohle tsa ka tse hlomamisitsoeng+ le liqeto tsohle tsa ka tsa boahloli+ ’me le li phethe, hore naha eo ke le tlisang hore le lule ho eona e se ke ea le hlatsa.+ 23 Le se ke la tsamaea litaelong tse hlomamisitsoeng tsa lichaba tseo ke li tlosang ka pel’a lōna,+ hobane li entse lintho tsena tsohle ’me kea li nyonya.+ 24 Kahoo ke itse ho lōna:+ “Le tla rua naha ea tsona, ’me ke tla le fa eona hore le e rue, naha e phallang lebese le mahe a linotši.+ Ke ’na Jehova Molimo oa lōna, ea le arotseng ho lichaba.”+ 25 Le khetholle pakeng tsa phoofolo e hloekileng le e sa hloekang le pakeng tsa nonyana e sa hloekang le e hloekileng;+ ’me le se ke la etsa hore meea ea lōna e be e nyonyehang+ ka lebaka la phoofolo le nonyana le ntho leha e le efe e tsamaeang lefatšeng eo ke e arotseng ho lōna ka ho bolela hore ha ea hloeka. 26 Le halalele ho ’na,+ hobane ’na Jehova kea halalela;+ ’me ke le arola ho lichaba hore le be ba ka.+

27 “‘Ha e le monna kapa mosali ea nang le moea oo a buisanang le oona kapa moea oa ho bolela lintho esale pele,+ ruri ba lokela ho bolaoa.+ Ba lokela ho ba tlepetsa ka majoe ho fihlela ba shoa. Mali a bona a holim ’a bona.’”+

21 Jehova a tsoela pele ho re ho Moshe: “Bua le baprista, bara ba Arone, u re ho bona, ‘Ho se ke ha e-ba le ea ka itšilafatsang ka lebaka la moea o shoeleng sechabeng sa habo.+ 2 Empa bakeng sa ea haufi le eena eo a amanang le eena ka mali, bakeng sa ’m ’ae le bakeng sa ntat’ae le bakeng sa mora oa hae le bakeng sa morali oa hae le bakeng sa mor’abo 3 le bakeng sa khaitseli ea hae, moroetsana ea haufi le eena, eo e e-s’o ka e e-ba oa monna, bakeng sa hae a ka itšilafatsa. 4 A se ke a itšilafatsa [bakeng sa mosali ea nang le monghali] sechabeng sa habo hoo a tlang ho itšilafatsa. 5 Ha baa lokela ho ipeola lihlooho,+ ’me ha baa lokela ho ipeola mathōko a litelu tsa bona,+ ’me ha baa lokela ho iphatsa ’meleng.+ 6 Ba lokela ho halalela ho Molimo oa bona,+ ’me ha baa lokela ho hlompholla lebitso la Molimo+ oa bona, hobane ke bona ba hlahisang linyehelo tsa Jehova tse entsoeng ka mollo, bohobe ba Molimo+ oa bona; ’me ba halalele.+ 7 Ha baa lokela ho nka letekatse+ kapa mosali ea betiloeng; ’me ha baa lokela ho nka+ mosali ea hlaliloeng+ ke monna, hobane moprista oa halalela ho Molimo oa hae. 8 Kahoo u mo halaletse,+ hobane ke eena ea hlahisang bohobe ba Molimo oa hao. O lokela hore e be ea halalelang ho uena,+ hobane ’na Jehova, ea u halaletsang, kea halalela.+

9 “‘Joale haeba morali oa moprista a itšilafatsa ka ho etsa botekatse, o silafatsa ntat’ae. O lokela ho chesoa ka mollo.+

10 “‘Ha e le moprista ea phahameng oa barab’abo ea neng a tla tšeloa+ ka oli e tlotsang hloohong le eo letsoho la hae le tlatsitsoeng ka matla bakeng sa ho apara liaparo,+ ha aa lokela ho lumella hore hlooho ea hae e be mahlantholla,+ ’me ha aa lokela ho tabola liaparo tsa hae.+ 11 Ha aa lokela ho tla ho moea+ leha e le ofe o shoeleng. A se ke a itšilafatsa ka lebaka la ntat’ae le ’m ’ae. 12 Hape ha aa lokela ho tsoa sehalalelong ’me a se ke a silafatsa sehalalelo sa Molimo oa hae,+ hobane pontšo ea nehelo, oli e tlotsang ea Molimo oa hae,+ e holim ’a hae. Ke ’na Jehova.

13 “‘O lokela ho nka mosali ea boroetsaneng ba hae.+ 14 Ha e le mohlolohali kapa mosali ea hlaliloeng le ea betiloeng, letekatse, a se ke a nka le ea mong ho bana, empa o lokela hore a nke moroetsana sechabeng sa habo hore e be mosali oa hae. 15 Ha aa lokela ho silafatsa peō ea hae sechabeng sa habo,+ hobane ke ’na Jehova ea mo halaletsang.’”+

16 Jehova a tsoela pele ho bua le Moshe, a re: 17 “Bua le Arone, u re, ‘Ha ho monna peōng ea hao melokong eohle ea bona ea nang le sekoli+ ea tla atamela ho hlahisa bohobe ba Molimo oa hae.+ 18 Haeba ho e-na le monna leha e le ofe ea nang le sekoli, a se ke a atamela: monna ea foufetseng kapa ea holofetseng kapa ea nko e tabohileng kapa eo setho se seng sa hae se leng selelele haholo,+ 19 kapa monna ea robehileng leoto kapa ea robehileng letsoho, 20 kapa ea lekhutla kapa ea otileng kapa ea nang le lefu mahlong kapa ea nang le likhoo kapa ea nang le litlapeli kapa ea pshatlehileng makoalata.+ 21 Monna leha e le ofe oa peō ea moprista Arone ea nang le sekoli a se ke a atamela ho hlahisa linyehelo tsa Jehova tse entsoeng ka mollo.+ O na le sekoli. A se ke a atamela ho hlahisa bohobe ba Molimo oa hae.+ 22 A ka ja bohobe ba Molimo oa hae linthong tse halalelang+ ka ho fetisisa le linthong tse halalelang.+ 23 Leha ho le joalo, a se ke a kena haufi le lesira,+ ’me a se ke a atamela aletare,+ hobane o na le sekoli;+ ha aa lokela ho silafatsa sehalalelo+ sa ka, etsoe ke ’na Jehova ea ba halaletsang.’”+

24 Tumellanong le hoo Moshe a bua le Arone le bara ba hae le bara bohle ba Iseraele.

22 Jehova a bua ka ho eketsehileng le Moshe, a re: 2 “Bua le Arone le bara ba hae, e le hore ba ipoloke ba arohile linthong tse halalelang tsa bara ba Iseraele ’me ba se ke ba hlompholla lebitso+ la ka le halalelang ka lintho tseo ba li halaletsang bakeng sa ka.+ Ke ’na Jehova. 3 E-re ho bona, ‘Melokong eohle ea lōna monna leha e le ofe oa bana bohle ba lōna ea atamelang lintho tse halalelang, tseo bara ba Iseraele ba tla li halaletsa bakeng sa Jehova, a sa hloeka,+ moea oo o felisoe ka pel’a ka. Ke ’na Jehova. 4 Ha ho monna oa bana ba Arone eo ha a e-na le lepera+ kapa a e-na le mohlapo o lutlang+ a ka jang lintho tse halalelang ho fihlela a hloeka,+ leha e le ea amang mang kapa mang ea sa hloekang ka lebaka la moea+ o shoeleng kapa monna ea tsoang peō,+ 5 kapa motho ea amang ntho leha e le efe e nyekenyehang e sa hloekang bakeng sa hae+ kapa ea amang motho ea sa hloekang bakeng sa hae mabapi le ho se hloeke leha e le hofe ha hae.+ 6 Moea o amang leha e le efe e joalo e tla ba o sa hloekang ho fihlela mantsiboea ’me o ke ke oa ja leha e le life tsa lintho tse halalelang, empa o itlhatsoe ’mele metsing.+ 7 Ha letsatsi le liketse, o tla hloeka, ’me ka mor’a moo o ka ja tse ling tsa lintho tse halalelang, hobane ke bohobe ba oona.+ 8 Hape o se ke oa ja ntho leha e le efe e seng e shoele kapa ntho leha e le efe e rusolotsoeng ke sebata hoo e tlang ho ba o sa hloekang ka lebaka la eona.+ Ke ’na Jehova.

9 “‘Ba boloke tlamo ea bona ho ’na, hore ba se ke ba jara sebe ka lebaka la eona eaba ba lokela ho shoa+ ka lebaka la eona hobane ba ne ba e silafatsa. Ke ’na Jehova ea ba halaletsang.

10 “‘Ho hang ha ho na osele ea ka jang ntho e halalelang.+ Ha ho na ea jakileng le moprista kapa mosebetsi ea hiriloeng ea ka jang ntho e halalelang. 11 Empa haeba moprista a reka moea, e le se rekoang ka chelete ea hae, oona o ka kopanela ho e ja ka lebaka leo. Ha e le makhoba a tsoaletsoeng ka tlung ea hae, ’ona a ka kopanela ho ja bohobe ba hae ka lebaka leo.+ 12 Haeba morali oa moprista e e-ba oa monna osele, eena a ke ke a ja tsa monehelo oa lintho tse halalelang ka lebaka leo. 13 Empa haeba morali oa moprista a fetoha mohlolohali kapa a hlaloa ha a se na bana, ’me a khutlela ka tlung ea ntat’ae joaloka bocheng ba hae,+ a ka ja bo bong ba bohobe ba ntat’ae;+ empa ho hang ha ho na osele ea ka bo jang.

14 “‘Joale haeba ka phoso+ motho a ja ntho e halalelang, joale a e eketse ka karolo ea eona ea bohlano+ ’me a fe moprista ntho e halalelang. 15 Kahoo ha baa lokela ho silafatsa lintho tse halalelang tsa bara ba Iseraele, tseo ba ka li nehelang ho Jehova,+ 16 ’me ba etsa hore ba jare kotlo ea molato ka lebaka la ho ja lintho tse halalelang; etsoe ke ’na Jehova ea ba halaletsang.’”

17 Jehova a tsoela pele ho bua le Moshe, a re: 18 “Bua le Arone le bara ba hae le bara bohle ba Iseraele, u re ho bona, ‘Monna leha e le ofe oa ntlo ea Iseraele kapa mojaki ea itseng oa Iseraele ea hlahisang nyehelo ea hae,+ bakeng sa boitlamo+ leha e le bofe ba bona kapa bakeng sa linyehelo leha e le life tsa bona tsa boithatelo,+ tseo ba ka li hlahisang ho Jehova bakeng sa nyehelo ea secheso, 19 hore e le fumanele kamohelo,+ e be e phetseng hantle,+ e tona har’a mohlape, har’a lipheleu kapa har’a lipōli. 20 Le se ke la hlahisa+ ntho leha e le efe e nang le sekoli, hobane e ke ke ea le fumanela kamohelo.

21 “‘Haeba motho a hlahisetsa Jehova sehlabelo se kopanetsoeng+ bakeng sa ho phetha boitlamo+ kapa e le nyehelo ea boithatelo, e lokela ho ba e phetseng hantle har’a mohlape oa liphoofolo tse khōlō kapa mohlape oa likhutšoane, hore a fumane kamohelo. Ho hang ha ea lokela ho ba le sekoli. 22 Ho se ke ha e-ba le e foufetseng kapa e robehileng kapa e sehiloeng kapa e leqhutsu kapa e nang le likhoo kapa setlapeli,+ le se ke la hlahisa le e ’ngoe ea tsena ho Jehova, ’me ho se ke ha e-ba le nyehelo e entsoeng ka mollo+ e tsoang ho tsona eo le tla e beha aletareng bakeng sa Jehova. 23 Ha e le poho kapa nku e nang le setho se selelele haholo kapa se sekhutšoanyane haholo,+ le ka e etsa nyehelo ea boithatelo; empa bakeng sa boitlamo e ke ke ea amoheleha. 24 Empa e makoalata+ a pepetiloeng kapa a pshatlehileng kapa a ntšitsoeng kapa a ponngoeng le se ke la e hlahisa ho Jehova, ’me ha lea lokela ho li hlahisa naheng ea lōna. 25 Le se ke la hlahisa leha e le efe ea tsena tsohle tse tsoang letsohong la osele e le bohobe ba Molimo oa lōna, hobane ho bola ha tsona ho ho tsona. Li na le sekoli.+ Li ke ke tsa amoheleha+ bakeng sa lōna.’”

26 Jehova a bua ka ho eketsehileng le Moshe, a re: 27 “Haeba ho ka tsoaloa poho kapa pheleu e nyenyane kapa pōli, joale e lule le ’m ’a eona ka matsatsi a supileng,+ empa ho tloha ka letsatsi la borobeli ho ea pele e tla amoheleha e le nyehelo, nyehelo e entsoeng ka mollo ea Jehova. 28 Ha e le poho le nku, le se ke la e hlaba hammoho le namane kapa konyana ea eona ka letsatsi le le leng.+

29 “Haeba le lokela ho hlabela Jehova sehlabelo sa liteboho,+ le lokela ho se etsa bakeng sa hore le iphumanele kamohelo. 30 Se lokela ho jeoa letsatsing leo.+ Le se ke la siea letho la sona ho fihlela hoseng.+ Ke ’na Jehova.

31 “Le boloke litaelo tsa ka ’me le li phethe.+ Ke ’na Jehova. 32 Le se ke la hlompholla lebitso+ la ka le halalelang, ’me ke tla halaletsoa har’a bara ba Iseraele.+ Ke ’na Jehova ea le halaletsang,+ 33 Ea le ntšang naheng ea Egepeta hore ke be Molimo oa lōna.+ Ke ’na Jehova.”

23 Jehova a tsoela pele ho bua le Moshe, a re: 2 “Bua le bara ba Iseraele, u re ho bona, ‘Mekete+ e bang ka linako tse itseng ea Jehova eo le tla e phatlalatsa+ ke likopano tse halalelang. Ena ke mekete ea ka e bang ka linako tse itseng:

3 “‘Mosebetsi o ka etsoa ka matsatsi a tšeletseng, empa ka letsatsi la bosupa ke sabatha ea phomolo e feletseng,+ ke kopano e halalelang. Le se ke la etsa mosebetsi oa mofuta leha e le ofe. Ke sabatha ea Jehova libakeng tsohle tseo le lulang ho tsona.+

4 “‘Ena ke mekete+ e bang ka linako tse itseng ea Jehova, likopano tse halalelang,+ tseo le tla li phatlalatsa ka linako tsa tsona tse behiloeng:+ 5 Khoeling ea pele, letsatsing la leshome le metso e mene la khoeli,+ pakeng tsa lishoalane tse peli ke paseka+ ea Jehova.

6 “‘Letsatsing la leshome le metso e mehlano khoeling ena ke mokete oa mahobe a sa lomosoang oa Jehova.+ Le tla ja mahobe a sa lomosoang+ ka matsatsi a supileng. 7 Letsatsing la pele le tla ba le kopano e halalelang.+ Le se ke la etsa mosebetsi o boima oa mofuta leha e le ofe. 8 Empa le hlahise nyehelo e entsoeng ka mollo ea Jehova ka matsatsi a supileng. Letsatsing la bosupa ho tla ba le kopano e halalelang. Le se ke la etsa mosebetsi o boima oa mofuta leha e le ofe.’”

9 Jehova a tsoela pele ho bua le Moshe, a re: 10 “Bua le bara ba Iseraele, u re ho bona, ‘Ha qetellong le kena naheng eo ke le fang eona, ’me le kotutse lijalo ho eona, le boele le tlise ngata ea litholoana tsa pele+ tsa kotulo ea lōna ho moprista. 11 O tla tsokela ngata koana le koana+ ka pel’a Jehova ho le fumanela kamohelo. Letsatsi hantle ka mor’a sabatha moprista o tla e tsokela koana le koana. 12 Letsatsing leo ka lona ngata ea lōna e tsokeloang koana le koana le fane ka pheleu e nyenyane e phetseng hantle, e selemong sa eona sa pele, hore e be nyehelo ea secheso ea Jehova; 13 ’me le fane ka likarolo tse peli tsa leshome tsa efa ea phofo e thumisehileng e kolobisitsoeng ka oli e le nyehelo ea eona ea lijo-thollo, e le nyehelo e entsoeng ka mollo ea Jehova, e monko o khathollang; le karolo ea bone ea hine ea veine e le nyehelo ea eona ea seno. 14 Le se ke la ja bohobe kapa lijo-thollo tse halikiloeng kapa lijo-thollo tse sa tsoa khuoa ho fihlela letsatsing lena,+ ho fihlela le tlisa nyehelo ea Molimo oa lōna. Ke taelo e hlomamisitsoeng ho isa nakong e sa lekanyetsoang bakeng sa meloko ea lōna libakeng tsohle tseo le lulang ho tsona.

15 “‘Le ipalle lisabatha+ tse supileng ho tloha letsatsing la ka mor’a sabatha, ho tloha letsatsing la ha le tlisa ngata ea nyehelo e tsokoang. E be tse feletseng. 16 Le lokela ho bala matsatsi a mashome a mahlano+ ho isa letsatsing la ka mor’a sabatha ea bosupa, ’me le hlahise nyehelo ea lijo-thollo+ tse ncha ea Jehova. 17 Ho tsoa libakeng tsa lōna tsa bolulo le lokela ho tlisa mahobe+ a mabeli e le nyehelo e tsokoang. E be likarolo tse peli tsa leshome tsa efa ea phofo e thumisehileng. A lokela ho apehoa a lomositsoe,+ e le litholoana tsa pele tse butsoitseng tsa Jehova.+ 18 Hammoho le mahobe le hlahise likonyana tse tona tse phetseng hantle tse supileng,+ e ’ngoe le e ’ngoe e e-na le selemo, le pohoana e le ’ngoe le lipheleu tse peli. E lokela ho ba nyehelo ea secheso ea Jehova hammoho le nyehelo ea tsona ea lijo-thollo le linyehelo tsa tsona tsa seno e le nyehelo e entsoeng ka mollo, e monko o khathollang ho Jehova. 19 Le fane ka potsanyane+ e le ’ngoe e le nyehelo ea sebe le likonyana tse peli tse tona, e ’ngoe le e ’ngoe e e-na le selemo, e le sehlabelo se kopanetsoeng.+ 20 Moprista a li tsokele koana le koana+ hammoho le mahobe a litholoana tsa pele tse butsoitseng, e le nyehelo e tsokoang ka pel’a Jehova, hammoho le likonyana tse peli tse tona. E lokela ho ba ntho e halalelang ho Jehova bakeng sa moprista.+ 21 Le etse phatlalatso+ letsatsing lona lena; ho tla ba le kopano e halalelang bakeng sa lōna. Le se ke la etsa mosebetsi o boima oa mofuta leha e le ofe. Ke taelo e hlomamisitsoeng ho isa nakong e sa lekanyetsoang libakeng tsohle tseo le lulang ho tsona bakeng sa meloko ea lōna.

22 “‘Ha le kotula lijalo tsa naha ea lōna, le se ke la kotula moeli oa tšimo ea lōna ka ho feletseng, ’me le se ke la thonaka se khoahlapisoang lijalong tsa lōna.+ Le lokela ho se siela ea hlorileng+ le mojaki.+ Ke ’na Jehova Molimo oa lōna.’”

23 Jehova a tsoela pele ho bua le Moshe, a re: 24 “Bua le bara ba Iseraele, u re, ‘Khoeling ea bosupa,+ ka la pele la khoeli, le lokela ho ba le phomolo e feletseng, sehopotso se etsoang ka molumo oa terompeta,+ kopano e halalelang.+ 25 Le se ke la etsa mosebetsi o boima oa mofuta leha e le ofe, ’me le hlahise nyehelo e entsoeng ka mollo ea Jehova.’”

26 Jehova a bua ka ho eketsehileng le Moshe, a re: 27 “Leha ho le joalo, ka la leshome khoeling ena ke letsatsi la ho koahela libe.+ Le tla ba le kopano e halalelang, ’me le hlorise meea+ ea lōna ’me le hlahise nyehelo+ e entsoeng ka mollo ea Jehova. 28 Le se ke la etsa mosebetsi oa mofuta leha e le ofe letsatsing lona lena, hobane ke letsatsi la ho koahela libe+ tsa lōna ka pel’a Jehova Molimo oa lōna; 29 hobane moea o mong le o mong o ke keng oa hlora letsatsing lona lena o tla felisoa sechabeng sa habo oona.+ 30 Moea leha e le ofe o tla etsa mosebetsi oa mofuta leha e le ofe letsatsing lona lena, ke tla timetsa moea oo har’a sechaba sa habo oona.+ 31 Le se ke la etsa mosebetsi+ oa mofuta leha e le ofe. Ke taelo e hlomamisitsoeng ho isa nakong e sa lekanyetsoang bakeng sa meloko ea lōna libakeng tsohle tseo le lulang ho tsona. 32 Ke sabatha ea phomolo e feletseng bakeng sa lōna,+ ’me le hlorise+ meea ea lōna ka la borobong la khoeli ka shoalane. Le lokela ho boloka sabatha ea lōna ho tloha mantsiboea a mang ho isa ho a mang.”

33 Jehova a tsoela pele ho bua le Moshe, a re: 34 “Bua le bara ba Iseraele, u re, ‘Ka letsatsi la leshome le metso e mehlano la khoeli ena ea bosupa ke mokete oa maphephe oa Jehova ka matsatsi a supileng.+ 35 Letsatsing la pele ke kopano e halalelang. Le se ke la etsa mosebetsi o boima oa mofuta leha e le ofe. 36 Le lokela ho hlahisa nyehelo e entsoeng ka mollo ea Jehova ka matsatsi a supileng. Ka letsatsi la borobeli ho tla ba le kopano e halalelang bakeng sa lōna,+ ’me le hlahise nyehelo e entsoeng ka mollo ea Jehova. Ke seboka se hlomphehang. Le se ke la etsa mosebetsi o boima oa mofuta leha e le ofe.

37 “‘Ena ke mekete+ e bang ka linako tse itseng ea Jehova eo le tla e phatlalatsa e le likopano tse halalelang,+ bakeng sa ho hlahisa nyehelo e entsoeng ka mollo+ ea Jehova: nyehelo ea secheso+ le nyehelo ea lijo-thollo+ ea sehlabelo le linyehelo tsa seno+ ho ea ka kemiso ea letsatsi le letsatsi, 38 ntle ho lisabatha tsa Jehova+ le limpho+ tsa lōna le linyehelo tsohle tsa lōna tsa boitlamo+ le linyehelo tsohle tsa lōna tsa boithaopo,+ tseo le tla li fa Jehova. 39 Leha ho le joalo, letsatsing la leshome le metso e mehlano la khoeli ea bosupa, ha le bokeletse lihlahisoa tsa naha, le lokela ho keteka mokete+ oa Jehova ka matsatsi a supileng.+ Letsatsing la pele ke phomolo e feletseng ’me letsatsing la borobeli ke phomolo e feletseng.+ 40 Ka letsatsi la pele le inkele litholoana tsa lifate tse ntle haholo, makhasi a lifate tsa palema+ le makala a lifate tse nang le makala le lipopoliri tsa liphula tsa melapo e phoroselang, ’me le thabe+ ka pel’a Jehova Molimo oa lōna ka matsatsi a supileng. 41 Le o keteke e le mokete oa Jehova ka matsatsi a supileng selemong.+ E le taelo e hlomamisitsoeng ho isa nakong e sa lekanyetsoang nakong ea meloko ea lōna, le lokela ho o keteka ka khoeli ea bosupa. 42 Le lokela ho lula maphepheng ka matsatsi a supileng.+ Matsoalloa ’ohle a Iseraele a lokela ho lula maphepheng,+ 43 e le hore meloko ea lōna e ka tseba+ hore ke ile ka etsa hore bara ba Iseraele ba lule maphepheng ha ke ba ntša naheng ea Egepeta.+ Ke ’na Jehova Molimo oa lōna.’”

44 Tumellanong le hoo Moshe a bua le bara ba Iseraele ka mekete+ e bang ka linako tse itseng ea Jehova.

24 Jehova a tsoela pele ho bua le Moshe, a re: 2 “Laela bara ba Iseraele hore ba u fumanele oli e hloekileng ea mohloaare o tutsoeng bakeng sa lebone,+ ho hotetsa lebone kamehla.+ 3 Arone o lokela ho le hlophisa ka ntle ho lesira la Bopaki tenteng ea pokano ho tloha mantsiboea ho fihlela hoseng ka pel’a Jehova kamehla. Ke taelo e hlomamisitsoeng ho isa nakong e sa lekanyetsoang melokong ea lōna. 4 O lokela ho hlophisa mabone+ holim ’a seluloana sa lebone+ sa khauta e hloekileng ka pel’a Jehova kamehla.+

5 “U nke phofo e thumisehileng ’me u e apehe hore e be mahobe a lesoba hare a leshome le metso e ’meli. Bohobe bo bong le bo bong bo lesoba hare bo be le likarolo tse peli tsa leshome tsa efa. 6 U a behe ka lihlopha tse peli tse kolohaneng, a tšeletseng sehlopheng se kolohaneng,+ holim ’a tafole ea khauta e hloekileng ka pel’a Jehova.+ 7 U behe libano tse tšoeu tse hloekileng holim ’a sehlopha ka seng se kolohaneng, ’me e be bohobe ba khopotso,+ nyehelo e entsoeng ka mollo ea Jehova. 8 Ka matsatsi a sabatha ka ho latellana o lokela ho bo hlophisa ka pel’a Jehova kamehla.+ Ke selekane ho isa nakong e sa lekanyetsoang le bara ba Iseraele. 9 E tla ba ba Arone le ba bara ba hae,+ ’me ba bo jelle sebakeng se halalelang,+ hobane ke ntho e halalelang ka ho fetisisa bakeng sa hae linyehelong tsa Jehova tse entsoeng ka mollo, e le molao oa tsamaiso ho isa nakong e sa lekanyetsoang.”

10 Joale mora oa mosali oa Moiseraele, eo, leha ho le joalo, e leng mora oa monna oa Moegepeta,+ a tsoela har’a bara ba Iseraele, ’me mora oa mosali oa Moiseraele le monna oa Moiseraele ba qala ho loanela+ liahelong. 11 Mora oa mosali oa Moiseraele a qala ho nyefola Lebitso+ le ho le rohaka.+ Kahoo ba mo tlisa ho Moshe.+ Lebitso la ’m ’ae e ne e le Shelomithe, morali oa Dibri oa leloko la Dane. 12 Joale ba mo beha litlamong+ ho fihlela ba ka etsetsoa phatlalatso e hlakileng ho ea ka polelo ea Jehova.+

13 Jehova a bua le Moshe, a re: 14 “Ntšetsang ea boletseng thohako ka ntle ho liahelo;+ ’me bohle ba mo utloileng ba mo ise matsoho+ hloohong, ’me phutheho eohle e mo tlepetse ka majoe.+ 15 ’Me u lokela ho bua le bara ba Iseraele, u re, ‘Haeba motho leha e le ofe a rohaka Molimo oa hae, joale o tla arabella sebe sa hae. 16 Kahoo ea nyefolang lebitso la Jehova ruri o lokela ho bolaoa.+ Ruri phutheho eohle e lokela ho mo tlepetsa ka majoe. Mojaki le letsoalloa ka ho tšoanang ba lokela ho bolaoa bakeng sa ho nyefola Lebitso leo.+

17 “‘Haeba motho a bolaea moea leha e le ofe oa moloko oa batho, ruri o lokela ho bolaoa.+ 18 Ea bolaeang moea oa phoofolo e ruuoang o lokela ho etsa puseletso bakeng sa eona, moea bakeng sa moea.+ 19 Haeba motho a ka bakela oa habo sekoli, kahoo ho lokela ho etsoa ho eena feela joalokaha a entse.+ 20 Ho robeha bakeng sa ho robeha, leihlo bakeng sa leihlo, leino bakeng sa leino; sekoli sa mofuta o tšoanang seo a se bakelang motho, ke sona se lokelang ho etsoa ho eena.+ 21 Ea bolaeang phoofolo+ o tla etsa puseletso+ bakeng sa eona, empa ea bolaeang motho o lokela ho bolaoa.+

22 “‘Qeto e le ’ngoe ea boahloli e lokela ho tsoela pele bakeng sa lōna. Mojaki o lokela ho tšoana le letsoalloa,+ hobane ke ’na Jehova Molimo oa lōna.’”+

23 Ka mor’a moo Moshe a bua le bara ba Iseraele, eaba ba ntšetsa ea neng a boletse thohako ka ntle ho liahelo, ’me ba mo tlepetsa ka majoe.+ Kahoo bara ba Iseraele ba etsa feela joalokaha Jehova a ne a laetse Moshe.

25 Jehova a bua ka ho eketsehileng le Moshe Thabeng ea Sinai, a re: 2 “Bua le bara ba Iseraele, u re ho bona, ‘Ha qetellong le fihla naheng eo ke le fang eona,+ joale naha e boloke sabatha ea Jehova.+ 3 Ka lilemo tse tšeletseng u lokela ho jala peō tšimong ea hao, ’me ka lilemo tse tšeletseng u lokela ho faola serapa sa hao sa morara, ’me u bokelle se hlahisoang ke naha.+ 4 Empa selemong sa bosupa ho lokela hore ho be le sabatha ea phomolo e feletseng bakeng sa naha,+ sabatha ea Jehova. U se ke ua jala peō tšimong ea hao, ’me u se ke ua faola serapa sa hao sa morara. 5 U se ke ua kotula litlhaku tse qhalaneng tsa lijalo tsa hao, ’me u se ke ua bokella morara oa sefate sa hao sa morara se sa faoloang. Ho tla ba le selemo sa phomolo e feletseng bakeng sa naha. 6 Sabatha ea naha e tla ba lijo bakeng sa lōna, bakeng sa hao le lekhoba la hao le lekhabunyane la hao le mosebetsi oa hao ea hiriloeng le mojaki ea nang le uena, ba lulang le uena e le bajaki, 7 le bakeng sa phoofolo ea hao e ruuoang le bakeng sa sebata se naheng ea heno. Lihlahisoa tsohle tsa tsona e lokela ho ba lijo.

8 “‘U ipalle lisabatha tse supileng tsa lilemo, lilemo tse supileng ka makhetlo a supileng, ’me matsatsi a lisabatha tse supileng tsa lilemo e be lilemo tse mashome a mane a metso e robong bakeng sa hao. 9 U letse+ lenaka le molumo o moholo khoeling ea bosupa ka la leshome la khoeli;+ le lokela ho letsa lenaka naheng eohle ea lōna ka letsatsi la ho koahela libe.+ 10 Le halaletse selemo sa mashome a mahlano ’me le phatlalatse tokoloho naheng ho baahi bohle ba eona.+ E tla ba Jubile+ bakeng sa lōna, ’me e mong le e mong a khutlele setšeng sa hae ’me e mong le e mong o lokela ho khutlela lelapeng la hae.+ 11 Selemo sa mashome a mahlano e tla ba Jubile bakeng sa lōna.+ Le se ke la jala peō kapa la kotula litlhaku tse qhalaneng kapa la bokella merara ea lifate tsa morara tse sa faoloang.+ 12 Etsoe ke Jubile. E lokela ho ba ntho e halalelang ho lōna. Le ka ja seo naha e se hlahisang masimong.+

13 “‘Ka selemo sena sa Jubile e mong le e mong o lokela ho khutlela setšeng sa hae.+ 14 Joale haeba le lokela ho rekisetsa oa habo lōna thepa e rekisoang kapa le e reka letsohong la oa habo lōna, le se ke la fosetsana.+ 15 Le lokela ho reka ho oa habo lōna ho ea ka palo ea lilemo tsa ka mor’a Jubile; o lokela ho le rekisetsa ho ea ka palo ea lilemo tsa se kotutsoeng.+ 16 O lokela ho eketsa chelete ea tefo ka ho lekana le bongata ba lilemo,+ ’me o lokela ho fokotsa chelete ea tefo ka ho lekana le bonyenyane ba lilemo, hobane o le rekisetsa palo ea tse kotutsoeng. 17 Ho se ke ha e-ba le mang kapa mang ea fosetsang oa habo,+ ’me le tšabe Molimo+ oa lōna, hobane ke ’na Jehova Molimo+ oa lōna. 18 Kahoo le phethe litaelo tsa ka tse hlomamisitsoeng ’me le lokela ho boloka liqeto tsa ka tsa boahloli ’me le li phethe. Joale ka sebele le tla lula naheng le sireletsehile.+ 19 Naha e tla fana ka litholoana+ tsa eona, ’me ka sebele le tla ja hore le khore ’me le lule le sireletsehile ho eona.+

20 “‘Empa haeba le ka re: “Re tla ja’ng ka selemo sa bosupa kaha re ke ke ra jala peō kapa ra bokella chai ea rōna?”+ 21 tabeng eo ka sebele ke tla laela tlhohonolofatso ea ka hore e be ho lōna ka selemo sa botšelela, ’me se tla hlahisa chai ea sona ea lilemo tse tharo.+ 22 Le jale peō ka selemo sa borobeli ’me le je chaing ea khale ho fihlela ka selemo sa borobong. Le tla ja ea khale ho fihlela se hlahisa chai.

23 “‘Kahoo naha ha ea lokela ho rekisoa ka ho sa feleng,+ hobane naha ke ea ka.+ Etsoe ponong ea ka le basele hammoho le bajaki.+ 24 Naheng eohle eo le e ruileng le fe naha tokelo ea ho rekolloa.+

25 “‘Haeba mor’eno a futsaneha ’me a lokela ho rekisa setša se seng sa hae, morekolli ea amanang haufi-ufi le eena a tle ’me a rekolle seo mor’abo a se rekisitseng.+ 26 Haeba leha e le mang a se na morekolli ’me letsoho la hae le fumana phaello ’me a fumana ho lekaneng bakeng sa ho le rekolla, 27 a boele a bale lilemo ho tloha ha a ne a se rekisa ’me a khutlisetse chelete e setseng ho monna eo a mo rekiselitseng sona, ’me o tla khutlela setšeng sa hae.+

28 “‘Empa haeba letsoho la hae le sa fumane ho lekaneng bakeng sa ho mo khutlisetsa hona, seo a se rekisitseng le sona se lule letsohong la ea se rekileng ho fihlela selemong sa Jubile;+ se lokolohe ka Jubile, ’me a khutlele setšeng sa hae.+

29 “‘Joale haeba motho a ka rekisa ntlo ea bolulo motseng o pota-potiloeng ke lerako, tokelo ea hae ea thekollo e tla boela e tsoela pele ho fihlela selemo seo a e rekisitseng ka sona se fela; tokelo ea hae ea thekollo+ e lokela ho tsoela pele selemo sohle. 30 Empa haeba e ke ke ea rekolloa pele a qeta selemo se feletseng, ntlo e motseng o nang le lerako e tla boela e ema ka ho sa feleng e le thepa ea morekolli oa eona melokong ea hae. Ha ea lokela ho lokoloha ka Jubile. 31 Leha ho le joalo, matlo a metsana e se nang marako a e potolohileng a lokela ho baloa e le karolo ea tšimo ea naha. Tokelo ea thekollo+ e lokela ho tsoela pele bakeng sa ’ona, ’me a lokela ho lokoloha ka Jubile.+

32 “‘Ha e le metse ea Balevi le matlo a metse eo ba e ruileng,+ tokelo ea thekollo e lokela ho tsoela pele ho isa nakong e sa lekanyetsoang bakeng sa Balevi.+ 33 Moo thepa ea Balevi e sa rekolloang, ntlo e rekisitsoeng motseng oo a o ruileng e tla boela e lokolohe ka Jubile;+ hobane matlo a metse ea Balevi ke letlotlo la bona har’a bara ba Iseraele.+ 34 Ho feta moo, tšimo ea lekhulo+ la metse ea bona e se ke ea rekisoa, hobane ke letlotlo la bona ho isa nakong e sa lekanyetsoang.

35 “‘Haeba mor’eno a futsaneha ’me kahoo a fokolloa ke chelete haufi le uena,+ u mo fe lintho tsa ho phela.+ Joaloka osele le mojaki,+ a tsoele pele a phela le uena. 36 U se ke ua batla phaello le tsoala ho eena,+ empa u tšabe Molimo oa hao;+ ’me mor’eno a tsoele pele a phela le uena. 37 U se ke ua mo fa chelete ea hao ka phaello,+ ’me u se ke ua fana ka lijo tsa hao ka ho batla tsoala. 38 Ke ’na Jehova Molimo oa lōna, ea le ntšitseng naheng ea Egepeta ho le fa naha ea Kanana,+ hore ke be Molimo oa lōna.+

39 “‘Haeba mor’eno a futsaneha haufi le uena ’me a tlameha ho ithekisa ho uena,+ u se ke ua mo sebelisa joaloka ea sebetsang tšebeletsong ea bokhoba.+ 40 Ho uena a be joaloka mosebetsi ea hiriloeng,+ joaloka mojaki. O lokela ho u sebeletsa ho fihlela selemong sa Jubile. 41 A tlohe ho uena, eena hammoho le bara ba hae, ’me a khutlele lelapeng la hae, ’me o lokela ho khutlela setšeng sa baholo-holo ba hae.+ 42 Etsoe ke makhoba a ka ao ke a ntšitseng naheng ea Egepeta.+ Ba se ke ba ithekisa ka tsela eo lekhoba le rekisoang ka eona. 43 U se ke ua mo hatakela ka bompoli,+ ’me u tšabe Molimo oa hao.+ 44 Ha e le lekhoba la lōna le lekhabunyane la lōna leo e bang la lōna ho tsoa lichabeng tse le pota-potileng, le ka reka lekhoba le lekhabunyane ho tsona. 45 Le ho bara ba bajaki ba lulang e le bajaki le lōna,+ le ka reka ho bona, le ho malapa a bona a nang le lōna ao ba a tsoaletsoeng naheng ea lōna; ’me ba fetohe letlotlo la lōna. 46 Le ba fetise e le lefa ho bara ba lōna hore ba ba rue e le letlotlo ho isa nakong e sa lekanyetsoang.+ Le ka ba sebelisa e le basebetsi, empa barab’abo lōna bara ba Iseraele, le se ke la ba hatakela, ka bompoli.+

47 “‘Empa haeba letsoho la osele kapa mojaki ea nang le uena le rua, ’me mor’eno a futsanehile haufi le eena ’me a ithekisitse ho osele kapa ho mojaki ea nang le uena, kapa ho setho sa lelapa la osele, 48 ka mor’a ho ithekisa,+ tokelo ea thekollo e tla tsoela pele tabeng ea hae.+ E mong oa barab’abo a ka mo rekolla.+ 49 Kapa mor’abo ntat’ae kapa mora oa mor’abo ntat’ae a ka mo rekolla, kapa leha e le mang ea amanang le eena ka mali ka nama ea hae,+ e mong oa lelapa la hae, a ka mo rekolla.

“‘Kapa haeba letsoho la hae le ruile, le eena a ithekolle.+ 50 A bale le ea mo rekileng ho tloha selemong seo a ithekisitseng ka sona ho eena ho fihlela selemong sa Jubile,+ ’me chelete eo a rekiloeng ka eona e lekane le palo ea lilemo.+ O lokela ho hlola le eena ho ea ka tsela eo matsatsi a tšebetso a mosebetsi ea hiriloeng a baloang ka eona.+ 51 Haeba ho sa ntse ho e-na le lilemo tse ngata, o lokela ho lefa tefo ea hae ea thekollo cheleteng ea hae ea theko ho ea ka ho lekana le tsona. 52 Empa haeba ho setse lilemo tse seng kae feela ho fihlela selemong sa Jubile,+ joale o tla ipalla. O lokela ho lefa tefo ea hae ea thekollo ho ea ka ho lekana le lilemo tsa hae. 53 O lokela ho hlola le eena joaloka mosebetsi+ ea hiriloeng selemo le selemo. A se ke a mo hatakela ka bompoli+ ka pel’a mahlo a hao. 54 Leha ho le joalo, haeba a ke ke a ithekolla maemong ana, joale a tlohe ka selemo sa Jubile,+ eena le bara ba hae.

55 “‘Etsoe bara ba Iseraele ke makhoba ho ’na. Ke makhoba+ a ka ao ke a ntšitseng naheng ea Egepeta.+ Ke ’na Jehova Molimo oa lōna.+

26 “‘Le se ke la iketsetsa melimo ea lefeela,+ ’me le se ke la ikemisetsa setšoantšo se betliloeng+ kapa tšiea e halalelang, ’me le se ke la emisa lejoe e le setšoantšo+ naheng ea lōna hore le le inamele;+ etsoe ke ’na Jehova Molimo oa lōna. 2 Le boloke lisabatha+ tsa ka ’me le be le tšabo e nang le tlhompho bakeng sa sehalalelo sa ka. Ke ’na Jehova.

3 “‘Haeba le tsoela pele ho tsamaea litaelong tsa ka tse hlomamisitsoeng ’me le boloka litaelo tsa ka ’me le li phetha,+ 4 ka sebele ke tla boela ke le fe lipula ka nako ea tsona e tšoanetseng,+ ’me naha e tla fana ka lihlahisoa tsa eona,+ ’me sefate sa naha se tla fana ka litholoana+ tsa sona. 5 Ka sebele ho pola ha lōna ho tla fihlelana le ho bokella morara ha lōna, ’me ho bokella morara ho tla fihlelana le ho jaloa ha peō; le tla ja bohobe ba lōna hore le khore+ ’me le lule le sireletsehile naheng ea lōna.+ 6 Ke tla tlisa khotso naheng,+ ’me le tla robala, ho se ea etsang hore le thothomele;+ ke tla felisa sebata se kotsi naheng,+ ’me sabole e ke ke ea feta naheng ea lōna.+ 7 Ka sebele le tla lelekisa lira tsa lōna,+ ’me li tla oa ka pel’a lōna ka sabole. 8 Ka sebele ba bahlano ba lōna ba tla lelekisa ba lekholo, ’me ba lekholo ba lōna ba tla lelekisa ba likete tse leshome, ’me lira tsa lōna li tla oa ka pel’a lōna ka sabole.+

9 “‘Ke tla retelehela ho lōna+ ’me ke le atise ke le ngatafatse,+ ’me ke tla phetha selekane sa ka le lōna.+ 10 Ka sebele le tla ja tsa khale tsa selemo se fetileng,+ ’me le tla ntša tsa khale pele ho tse ncha. 11 Ka sebele ke tla beha tabernakele ea ka har’a lōna,+ ’me moea oa ka o ke ke oa le nyonya.+ 12 Ke tla tsamaea har’a lōna ke be Molimo oa lōna,+ ’me le tla ba sechaba sa ka.+ 13 Ke ’na Jehova Molimo oa lōna, ea le ntšitseng naheng ea Egepeta hore le se ke la sebeletsa le le makhoba a bona,+ ’me ka roba lijoko tsa lōna ’me ka le tsamaisa le otlolohile.+

14 “‘Leha ho le joalo, haeba le sa ’mamele kapa le sa phethe litaelo+ tsena tsohle, 15 ’me haeba le tla lahla litaelo tsa ka tse hlomamisitsoeng,+ ’me haeba meea ea lōna e tla nyonya liqeto tsa ka tsa boahloli e le hore le se ke la phetha litaelo tsohle tsa ka, hoo le tlōlang selekane sa ka,+ 16 joale ’na ke tla le etsa se latelang, ’me e le kotlo ka sebele ke tla le tlisetsa pherekano le lefuba+ le feberu e chesang, tse etsang hore mahlo a felloe+ ke matla le tse etsang hore moea o tepelle.+ Le tla jalla peō ea lōna lefeela, etsoe ka sebele lira tsa lōna li tla e ja.+ 17 Ke tla le tjamela, ’me ka sebele le tla hlōloa ka pel’a lira+ tsa lōna; ba le hloileng ba tla le hatakela,+ ’me le tla baleha ho se ea le lelekisang.+

18 “‘Leha ho le joalo, haeba ho sa tsotellehe lintho tsena, le sa ’mamele, joale ke tla lokela ho le shapa ka makhetlo a supileng bakeng sa libe tsa lōna.+ 19 Ke tla lokela ho roba boikakaso ba matla a lōna ’me ke etse maholimo a lōna joaloka tšepe+ le lefatše la lōna joaloka koporo. 20 Matla a lōna a tla sebelisetsoa lefeela, kaha mobu oa lōna o ke ke oa fana ka lihlahisoa+ tsa oona, ’me sefate sa lefatše se ke ke sa fana ka litholoana+ tsa sona.

21 “‘Empa haeba le ntse le nkhanyetsa ’me le sa lakatse ho ’mamela, joale ke tla lokela ho le otla ka likotlo tse eketsehileng ka makhetlo a supileng ho latela libe tsa lōna.+ 22 Ke tla romela libata tsa naha har’a lōna,+ ’me ka sebele li tla le amoha bana+ ’me li felise liphoofolo tsa lōna tse ruuoang ’me li fokotse palo ea lōna, ’me litsela tsa lōna e tla ba lesupi.+

23 “‘Leha ho le joalo, haeba le sa itlohelle hore ke le khalemele+ ka lintho tsena ’me le mpa le nkhanyetsa, 24 ’na, e, ’na, joale ke tla lokela ho le hanyetsa;+ ’me ’na, ke tla lokela ho le otla ka makhetlo a supileng bakeng sa libe tsa lōna.+ 25 Ka sebele ke tla tlisa sabole e tlisang phetetso+ holim ’a lōna bakeng sa selekane;+ ’me le tla bokana metseng ea lōna ’me ka sebele ke tla romela lefu la seoa har’a lōna,+ ’me ho tla nehelanoa ka lōna letsohong la sera.+ 26 Ha ke se ke robile melamu ea lōna eo mahobe a lesoba hare a fanyehoang ho eona,+ joale basali ba leshome ba tla apeha bohobe ba lōna ka ontong e le ’ngoe ’me ba khutlise bohobe ba lōna ka ho bo bekha;+ le tla ja empa le ke ke la khora.+

27 “‘Leha ho le joalo, haeba le sa ’mamele ka sena ’me le mpa le nkhanyetsa,+ 28 joale ke tla lokela ho le hanyetsa ka khalefo,+ ’me ’na, e, ’na, ke tla lokela ho le shapa ka makhetlo a supileng bakeng sa libe+ tsa lōna. 29 Kahoo le tla lokela ho ja nama ea bara ba lōna, ’me le je nama ea barali ba lōna.+ 30 Ka sebele ke tla felisa libaka tsa lōna tse phahameng+ tse halalelang ’me ke heletse liluloana tsa lōna tsa libano ’me ke behe litopo tsa lōna holim ’a litopo tsa litšoantšo tsa lōna tse rapeloang tse nyonyehang;+ ’me moea oa ka o tla le nyonya.+ 31 Ke tla nehela metse ea lōna sabole+ ’me ke etse lihalalelo tsa lōna lesupi,+ ’me nke ke ka fofonela monko o khathollang oa lōna.+ 32 Ke tla etsa naha lesupi,+ ’me lira tsa lōna tse lulang ho eona li tla e sheba ka ho makala.+ 33 Ke tla le hasanya har’a lichaba,+ ’me ke tla ntša sabole selateng ka mor’a lōna;+ naha ea lōna e tla ba lesupi,+ ’me metse ea lōna e tla ba lesupi.

34 “‘Ka nako eo naha e tla lefa lisabatha tsa eona ka matsatsi ’ohle a ho ba lesupi ha eona, ha le ntse le le naheng ea lira tsa lōna. Ka nako eo naha e tla boloka sabatha, kaha e tla boela e lefa lisabatha tsa eona.+ 35 Ka matsatsi ’ohle a ho ba lesupi ha eona e tla boloka sabatha, ka lebaka la hore ha ea ka ea boloka sabatha nakong ea lisabatha tsa lōna ha le ne le lula ho eona.

36 “‘Ha e le ba setseng har’a lōna,+ ka sebele ke tla kenya ho tšoha lipelong tsa bona linaheng tsa lira tsa bona; ’me ba tla balehisoa ke molumo oa lekhasi le fefohang, ’me ba tla baleha joalokaha eka ba baleha sabole ’me ba oe ho se ea ba lelekisang.+ 37 Ka sebele ba tla khopana joalokaha eka ba baleha sabole ho se ea ba lelekisang, ’me le ke ke la khona ho ema hore le hanyetse lira tsa lōna.+ 38 Le tla timela har’a lichaba,+ ’me naha ea lira tsa lōna e tla le ja. 39 Ha e le ba setseng har’a lōna, ba tla bola+ ka lebaka la liphoso tsa bona linaheng tsa lira tsa lōna. E, esita le ka lebaka la liphoso tsa bo-ntat’a bona,+ ba tla bola le bona. 40 Ka sebele ba tla bolela liphoso+ tsa bona le liphoso tsa bo-ntat’a bona ho se tšepahaleng ha bona ha ba itšoere ka ho se tšepahale ho ’na, e, esita le ha ba nkhanyelitse.+ 41 Leha ho le joalo, ke ile ka ba hanyetsa,+ ’me ka lokela ho ba tlisa naheng ea lira tsa bona.+

“‘Mohlomong ka nako eo lipelo+ tsa bona tse sa bollang li tla kokobetsoa,+ ’me ka nako eo ba tla lefa liphoso tsa bona. 42 Ke tla hopola selekane sa ka le Jakobo;+ esita le selekane sa ka le Isaka+ le selekane sa ka le Abrahama+ ke tla se hopola, ’me ke tla hopola naha. 43 Ka nako eo eohle ba ne ba tlohetse naha ’me e ne e lefa lisabatha+ tsa eona ha e ne e le lesupi ba le sieo ’me ba ne ba lefella liphoso tsa bona,+ hobane ba ne ba lahlile liqeto tsa ka tsa boahloli,+ ’me meea ea bona e ile ea nyonya litaelo tsa ka tse hlomamisitsoeng.+ 44 Leha ho le joalo bakeng sa sena sohle, ha ba ntse ba le naheng ea lira tsa bona, ka sebele nke ke ka ba lahla+ kapa ka ba nyonya+ hore ke ba felise, ho tlōla selekane+ sa ka le bona; etsoe ke ’na Jehova Molimo oa bona. 45 Molemong oa bona ke tla hopola selekane sa baholo-holo+ bao ke ba ntšitseng naheng ea Egepeta mahlong a lichaba,+ e le hore ke be Molimo oa bona. Ke ’na Jehova.’”

46 Ena ke melao ea tsamaiso le liqeto tsa boahloli+ le melao eo Jehova a e behileng pakeng tsa hae le bara ba Iseraele Thabeng ea Sinai ka Moshe.+

27 Jehova a tsoela pele ho bua le Moshe, a re: 2 “Bua le bara ba Iseraele, u re ho bona, ‘Haeba motho a etsa boitlamo+ bo khethehileng ha a nehelana ka meea ho Jehova ho ea ka tefello e lekantsoeng, 3 ’me tefello e lekantsoeng e lokela ho ba ea e motona ea lilemo li mashome a mabeli ho isa ho ea lilemo li mashome a tšeletseng, joale tefello e lekantsoeng e tla ba lishekele tse mashome a mahlano tsa silevera ka shekele ea sebaka se halalelang. 4 Empa haeba ke e motšehali, joale tefello e lekantsoeng e be lishekele tse mashome a mararo. 5 Haeba lilemo ke ho tloha ka ea nang le tse hlano ho isa ho ea nang le tse mashome a mabeli, joale tefello e lekantsoeng ea e motona e be lishekele tse mashome a mabeli ’me bakeng sa e motšehali e be lishekele tse leshome. 6 Haeba ke ho tloha ka ea khoeli ho isa ho ea lilemo li hlano, joale tefello e lekantsoeng ea e motona e be lishekele tse hlano+ tsa silevera ’me bakeng sa e motšehali tefello e lekantsoeng e be lishekele tse tharo tsa silevera.

7 “‘Joale haeba lilemo ke ho tloha ka ea lilemo li mashome a tšeletseng ho ea holimo, haeba ke e motona, joale tefello e lekantsoeng e tla ba lishekele tse leshome le metso e mehlano ’me bakeng sa e motšehali e be lishekele tse leshome. 8 Empa haeba a futsanehile haholo bakeng sa tefello e lekantsoeng,+ joale a emise motho eo ka pel’a moprista, ’me moprista a etse tekanyetso bakeng sa hae.+ Ho ea ka seo ea itlamileng a ka se khonang,+ moprista o tla mo behela tekanyetso.

9 “‘Haeba e le phoofolo e kang eo motho a e hlahisang e le nyehelo ho Jehova, ntho e ’ngoe le e ’ngoe ho seo a se fang Jehova e tla ba ntho e halalelang.+ 10 A ke ke a beha ho hong bakeng sa eona, ’me a ke ke a fapanyetsana ka eona ka e ntle bakeng sa e mpe kapa e mpe bakeng sa e ntle. Empa haeba a e fapanyetsana ka phoofolo bakeng sa phoofolo, joale eona le seo e fapanyetsanoeng ka sona e tla ba ntho e halalelang. 11 Haeba e le phoofolo leha e le efe e sa hloekang+ eo a ke keng a e hlahisa e le nyehelo ho Jehova,+ joale a emise phoofolo ka pel’a moprista.+ 12 Moprista a etse tekanyetso holim ’a eona ebang e ntle kapa e mpe. Ho ea ka tefello e lekantsoeng+ ke moprista, kahoo e tla ba joalo. 13 Empa haeba a batla ho e rekolla, joale a fane ka karolo ea eona ea bohlano+ ho phaella cheleteng e lekantsoeng.

14 “‘Joale haeba motho a ka halaletsa ntlo ea hae e le ntho e halalelang ho Jehova, joale moprista a etse tekanyetso holim ’a eona ebang e ntle kapa e mpe.+ Ho ea ka tekanyetso eo moprista a e entseng ho eona, e tla lefelloa bokaalo. 15 Empa haeba ea halaletsang a batla ho rekolla ntlo ea hae, joale a fane ka karolo ea bohlano ea chelete ea tefello e lekantsoeng ho phaella ho eona;+ e tla ba ea hae.

16 “‘Haeba motho a ka halaletsa ho Jehova e ’ngoe ea tšimo eo a e ruileng,+ joale chelete e lekanngoe ho lekana peō ea eona: haeba e le homere+ ea peō ea harese, joale e tla ba lishekele tse mashome a mahlano tsa silevera. 17 Haeba a halaletsa tšimo ea hae ho tloha selemong sa Jubile+ ho ea pele, e lokela ho lefelloa ho ea ka tefello e lekantsoeng. 18 Haeba a halaletsa tšimo ea hae ka mor’a Jubile, joale moprista a lekanyetse tefello bakeng sa hae ka ho lekana le lilemo tse setseng ho fihlela selemong se tlang sa Jubile, ’me ho lokela hore ho fokotsoe tefello e lekantsoeng.+ 19 Empa haeba ea e halaletsang a rekolla tšimo, joale a fane ka karolo ea bohlano ea chelete ea tefello e lekantsoeng ho phaella ho eona, ’me e tla tiisoa hore e be ea hae.+ 20 Joale haeba a sa rekolle tšimo empa haeba tšimo e rekisetsoa motho e mong, e ke ke ea rekolloa hape. 21 Ha tšimo e lokoloha ka Jubile e tla ba ntho e halalelang ho Jehova, joaloka tšimo e nehetsoeng.+ E tla ba letlotlo la moprista.+

22 “‘Haeba a halaletsa ho Jehova tšimo eo a e rekileng eo e seng karolo ea tšimo eo a e rekileng,+ 23 joale moprista a mo lekanyetse palo ea se lekantsoeng ho fihlela selemong sa Jubile, ’me a fane ka tefello e lekantsoeng letsatsing leo.+ Ke ntho e halalelang ho Jehova.+ 24 Ka selemo sa Jubile tšimo e tla khutlela ho eo a e rekileng ho eena, ho ea ruileng tšimo eo.+

25 “‘Joale chelete e ’ngoe le e ’ngoe e lekanngoe ka shekele ea sebaka se halalelang. Shekele e tla ba ligera tse mashome a mabeli.+

26 “‘Ke letsibolo feela har’a liphoofolo, le tsoetsoeng e le letsibolo ho Jehova,+ leo ho seng motho ea lokelang ho le halaletsa. Ebang ke poho kapa nku, ke la Jehova.+ 27 Haeba le le har’a liphoofolo+ tse sa hloekang ’me a le lopolla ho ea ka tefello e lekantsoeng, joale a fane ka karolo ea eona ea bohlano ho phaella ho eona.+ Empa haeba le sa rekolloe, joale le rekisoe ho ea ka tefello e lekantsoeng.

28 “‘Feela ho se ke ha e-ba le ntho ea mofuta leha e le ofe e nehetsoeng eo motho a ka e nehelang ho Jehova bakeng sa timetso+ ho sohle seo e leng sa hae, ebang e tsoa molokong oa batho kapa liphoofolong kapa tšimong eo a e ruileng, e ka rekisoang, ’me ha ho ntho ea mofuta leha e le ofe e nehetsoeng e ka rekolloang.+ Ke ntho e halalelang ka ho fetisisa ho Jehova. 29 Ha ho motho ea nehetsoeng eo mohlomong a nehetsoeng timetso har’a moloko oa batho ea ka lopolloang.+ Ruri o lokela ho bolaoa.+

30 “‘Karolo e ’ngoe le e ’ngoe ea leshome+ ea naha, ho peō ea naha le litholoana tsa sefate, ke ea Jehova. Ke ntho e halalelang ho Jehova. 31 Haeba motho a batla ho rekolla leha e le efe ea karolo ea hae ea leshome, o lokela ho fana ka karolo ea eona ea bohlano ho phaella ho eona.+ 32 Ha e le karolo e ’ngoe le e ’ngoe ea leshome ea mohlape oa likhutšoane le mohlape oa liphoofolo tse khōlō, ntho e ’ngoe le e ’ngoe e fetang tlas’a molamu,+ hlooho ea leshome e lokela ho ba ntho e halalelang ho Jehova. 33 Ha aa lokela ho hlahloba hore na e ntle kapa e mpe, kapa hore a fapanyetsane ka eona. Empa haeba a ka fapanyetsana ka eona, joale eona le seo e fapanyetsanoang ka sona e lokela ho ba ntho e halalelang.+ E se ke ea rekolloa.’”

34 Tsena ke litaelo+ tseo Jehova a li fileng Moshe e le litaelo ho bara ba Iseraele Thabeng ea Sinai.+