Noviembre

Mbáa cristiano nditháan ragíʼmaa majmuu ajngáa dí xkawi̱ʼ. Mú mbáa migamíi muʼthá dí maʼni gawúúnʼ eʼwíinʼ dí asndu na̱nguá kumulúʼ xóo eʼthá, ikha jngóo gíʼmaa muñewa̱a̱n dí muʼthá. Mbá xkri̱da, ragíʼmaa muʼthá dí raʼkhí ga̱jma̱a̱ numún xa̱bu̱ bi̱ naguwáʼ náa i̱ʼwáʼ xuajin, bi̱ nuthi i̱mba̱ ajngáa o bi̱ mixtiʼkhu rí xóo naguʼwún nuni̱. Ni má ragíʼmaa muʼthá dí maʼni gawúúnʼ eʼwíinʼ. Arathá ajngáa dí naxná tsiakii ga̱jma̱a̱ dí naʼni̱i̱ a̱jkiu̱ún eʼwíinʼ. Xataxiéʼká ni má xárata numún eʼwíinʼ, ataniminaʼ marathu̱u̱n dí májánʼ eni̱. Tsíyulú manindxu̱lú xóo israelita. Maski ajndu nirígá mbaʼa rí ikhiin ma̱ndoo muxna̱a̱ núma̱aʼ, mú ikhiin nixieʼkhá má xúʼko̱, índo̱ narígá xúʼko̱, eʼwíinʼ mangiin nduyaridáá. Ga̱jma̱a̱ numuu dí raʼkhí dí nithi bi̱ mbá gu̱wi̱i̱nʼ bi̱ nigún guyama, “xúgínʼ israelita nixieʼkhá náa inuu Moisés” (Núm. 13:​31–14:4). Mú, índo̱ nuʼthá dí májánʼ eni̱ eʼwíinʼ, narígá dí májánʼ. Ikhaa jngóo gu’thún má xúʼko̱ dí májánʼ eni̱ eʼwíinʼ. w22.04 8 kutriga̱ 16, 17

Asndu nákha wajyúuʼ, Jeobá nimbáñún jiámá ga̱jma̱a̱ wa̱ʼxa̱ʼ mu mambaxúu gajmíi̱n. Ikha jngóo ma̱ndoo mambáñún ejña̱a̱nʼ mú mambaxúún gajmiún á mu ikhiin nandún (1 Cor. 3:​6, 7). Maski ajndu ejña̱a̱nʼ nagájnuti̱ñu̱u̱n náa rí gajkhun, mú Jeobá maxtáa má xúʼko̱ xawii mú mambáñún (Sal. 11:4). Á mu na̱jkha̱nú mbiʼi rí ikhiin nusngajma dí nandún muni̱ rí májánʼ, ikhaa maxtáa xawii mu mambáñún (Hech. 13:48; 2 Crón. 16:9). Jeobá ma̱ndoo mambáyáaʼ mu mataxkamaa ajngáa rí májánʼ marathu̱u̱n ejña̱a̱nʼ índo̱ ikhiin gáʼndún mudxawíín (Prov. 15:23). Ma̱ngaa ma̱ndoo maxkajxi̱i̱ a̱jkiu̱u̱n mbáa ndxájulú bi̱ xtáa náa congregación mu masngájmún rí nandoo kaʼñúún. Tséʼniuu á mu guanii Jeobá ma̱ndoo maʼni rí marmáʼáan a̱jkiu̱ún mbá rí ikháánʼ nirasngúún nákha ginii (Juan 14:26). Á mu narasngúún má xúʼko̱ ejña̱a̱nʼ ga̱jma̱a̱ dí naratá ma̱ngaa rí natani̱ xtaa raraxnáá Jeobá mbá rí maʼni tsajkurámuuʼ. w22.04 21 kutriga̱ 18

Numuu rí Gixa̱a̱ nánguá xóo matsima̱a̱ mekhuíí, ikha jngóo nakiʼnáa wéñuʼ kaʼñún cristianos bi̱ kaxtaʼwíin bi̱ xóó kúwá xóo xtiʼkhuu Reino ndrígóo Dios náa Tsu̱du̱u̱ Ku̱ba̱ʼ ga̱jma̱a̱ “guáʼdáá ñajunʼ rí mutaraʼa ga̱jma̱a̱ numuu Jesús” (2 Cor. 5:20; Efes. 6:​19, 20). Nákha tsiguʼ 1918, mbá migiñiʼ a̱ngiu̱lú bi̱ ndiya edxu̱u̱ náa miʼtáraʼa, niguma tsu̱di̱i̱n ga̱jma̱a̱ numuu mbá dí ragájkhun ga̱jma̱a̱ nixudi̱i̱nʼ náa guʼwá e̱jua̱nʼ. Nikujmaa rí asndu xóo niguámbá mbá kayuuʼ ñajunʼ dí nini̱ (Apoc. 11:​3, 7-11). Mú nákha marzo tsiguʼ 1919, cristianos bi̱ kaxtaʼwíin bugi̱ nigájnaán náa guʼwá e̱jua̱nʼ, nda̱wa̱á nándáa dí nithi ga̱jma̱a̱ numún. A̱ngiu̱lú bugi̱ mbá nacha̱ nitangiín nini ñajunʼ ga̱jma̱a̱ numuu Reino. Mú Gixa̱a̱ na̱nguá ndiyáa xu̱u̱ʼ. Asndu má nákha ikhú, niʼni dí maguma gíníi xúgíinʼ xa̱bi̱i̱ Dios dí ninindxu̱u̱ asndu “xóo mañu” (Apoc. 12:15). Ikha jngóo dí xúgiáánʼ ikháanʼ ndayúlú “maʼngulú ga̱jma̱a̱ muguaʼdáá fe” (Apoc. 13:10). w22.05 5, 6 kutriga̱ 14-16

Náa mbá visión rí ndiʼyoo apóstol Juan ndaʼñún a̱jma̱ grupo xa̱bu̱ bi̱ numbayíí Xa̱bu̱ Ñajunʼ ndrígóo Jeobá ma̱ngaa rí nundrigú rí makuwíi̱n kámuu mbiʼi ga̱jma̱a̱ ra̱ʼkhá tháán mba̱a̱ dí eguma tsajkurámiinʼ. Náa timbá grupo kúwá mbá 144,000 xa̱bu̱. Ikhiin nindxu̱ún bi̱ kúwíin náa tsu̱du̱u̱ Ku̱ba̱ʼ nagúu̱n mekhuíí mu manindxu̱ún Xa̱bu̱ Ñajunʼ gajmiún Jesús. Xúgíinʼ ikhiin nutañajunʼ náa tsu̱du̱u̱ Ku̱ba̱ʼ (Apoc. 5:​9, 10; 14:​3, 4). Juan ndiʼyoo rí guájun gajmiún Jesús náa inuu kúbá Sion dí rígá mekhuíí (Apoc. 14:1). Asndu nákha nikúwá apóstoles asndu mbiʼi xúgi̱, nixtaʼwíin mbaʼin xa̱bu̱ bi̱ makuwá náa bi̱ 144,000 (Luc. 12:32; Rom. 8:17). Mú Juan najuiʼtháán rí índo̱ gáʼni iwáá mbiʼi, káaʼ nguéjmi̱i̱n bi̱ kúwá náa grupo rúʼko̱ makuwá xóó nduya náa tsu̱du̱u̱ Ku̱ba̱ʼ. Awúu̱n má dí gárígá majphú mba̱a̱ ga̱ʼkhu̱, bi̱ kaxtaʼwíin bi̱ naguanún xóó náa tsu̱du̱u̱ Ku̱ba̱ʼ maʼga̱a̱ kiʼdiin mekhuíí mu mbuwi̱ín gajmiún a̱ngiu̱ún bi̱ 144,000 bi̱ niguájun jmbu asndu índo̱ nikháñún, bi̱ kúwá má ikhí. Mutañajunʼ gajmiún Jesús náa Xa̱bu̱ Ñajunʼ ndrígóo Dios (Mat. 24:31; Apoc. 5:​9, 10). w22.05 16 kutriga̱ 4, 5

Jesús niʼsngúún xa̱bi̱i̱ dí gíʼmaa mbuyáá awa̱án ga̱jma̱a̱ numún. Mbá miʼtsú niʼthún: “Asndu kíxnuu xúgíʼ xtátsúun edxa̱la” (Mat. 10:30). Ra̱ʼkhá tháán eʼni̱i̱ a̱jkiu̱lú ajngáa rígi̱, itháán á mu nindxu̱u̱ bi̱ nakumulú dí na̱nguá guaʼdáá wéñuuʼ numulú. Rígi̱ naʼni marmáʼáan a̱jkiu̱lú rí Anu̱lú bi̱ xtáa mekhuíí naxmiéjuunʼ kaʼyulú ma̱ngaa ndaʼyoo dí guaʼdáá wéñuuʼ numulú. Á mu Jeobá naniñulú dí mbuʼyamajkuíí ga̱jma̱a̱ nandxa̱ʼwáminaʼ dí ma̱ndoo makuwáánʼ náa ku̱ba̱ʼ nuxi̱ʼ, ikháanʼ ragíʼmaa mundxaʼwamíjna̱lú dí nijngawa̱a̱n. Rí xúgi̱ naʼni má 15 tsiguʼ dí mbá i̱yi̱ʼ Bi̱ Nayejngoo niʼthí dí: “Gíʼmaa mbuʼyáá awa̱án ga̱jma̱a̱ numulú. Xúʼyáá dí guaʼdáá wéñuuʼ numulú dí asndu muʼni mbaʼwumíjnalú ma̱ngaa dí asndu makumulú dí na̱nguá ejmáánʼ kayuuʼ. Rí phú nandulú dí mbuʼyáá awa̱án ga̱jma̱a̱ numulú. Mbuʼyáá náá rí maʼngulú muʼni ga̱jma̱a̱ dí xáʼngulú” w22.05 24, 25 kutriga̱ 14, 16

Ndiéjunʼ gándoo maʼni mambáa rí ikháanʼ mu makuwáanʼ mbá kambáxulú rá. Rí muʼni tsiakimijna mu marigá rí tsímáá (Mat. 5:9; Rom. 12:18). Mambá índo̱ nuʼnimíjna rí makuwáánʼ mbá kambáxulú gajmiúlú a̱ngiu̱lú náa congregación, nuʼni rí tsímáá rí na̱ʼkha̱ náa Dios maʼni itháán mitsaanʼ. Nduʼyáá kaʼwu rí Jeobá ni̱ʼkha̱ kagui̱i̱n a̱ngiu̱lú mu xúʼko̱ mbuyamajkuíí ikhaa xóo má kaʼyoo (Juan 6:44). Ikhaa naxtáa gagi índo̱ ndaʼyoo rí nuʼni tsiakimijna rí makuwáánʼ tsímáá ga̱jma̱a̱ makuwáanʼ mbá kambáxulú gajmiúlú a̱ngiu̱lú, numuu rí ikhaa ndaʼyoo rí guaʼdáá wéñuʼ numún (Isa. 26:3; Ageo 2:7). Ndiéjunʼ gándoo muʼni mu mambáyulú asndu xóo má eʼngo̱o̱ rí xóo Jeobá naʼni tsajkurámiin xa̱bi̱i̱ rá. Rí mundxaʼwámi̱jna̱ dí nuraxnuu náa Biblia. Á mu nuʼnigajma̱a̱ ma̱ngaa nundxaʼwamíjná dí nuraxnuu rúʼko̱ gámbáyulú mu maguaʼdáá cualidad rí maxkajxán rí musngájma rí nandulú kuʼyamíjna̱ kanikáanʼ náa congregación (Rom. 12:10). w22.11 12, 13 kutriga̱ 16-18

Índo̱ nduʼyáá dí Jeobá naʼni mba̱a̱ a̱jkiu̱u̱n kaʼyulú, naʼni makuwaanʼ tsímáá, ‹naʼni̱i̱ a̱jkiu̱lú› ga̱jma̱a̱ naguaʼdáá mbá ku̱ma̱ kaʼwu. Xúgíʼ rígi̱ i̱ndó maʼndoo ‹ma̱ʼkha̱ náa Jeobá› (Hech. 3:19). Índo̱ naʼni mba̱a̱ a̱jkiu̱u̱n kaʼyulú naniñuuʼ dí matanga̱ánʼ mambájxu gajmiúlú mbujúuʼ, nindxu̱u̱ asndu xóo nditháan túʼni aʼkhá. Índo̱ Jeobá naʼni mba̱a̱ a̱jkiu̱u̱n kaʼyoo mbáa xa̱bu̱, ikhaa na̱nguá tanga̱a̱ maʼthúu̱n o maxnúu castigo ga̱jma̱a̱ numuu rí niʼni (Isa. 43:25). Jeobá naniñuuʼ ‹xóo mitsinguánʼ egájnuu a̱jkha̱ʼ asndu náa narámáaʼ a̱jkha̱ʼ, aʼkhá ndrígu̱ún› (Sal. 103:12). Índo̱ nduʼyáá xóo ikhaa naʼni mba̱a̱ a̱jkiu̱u̱n, rúʼko̱ naʼni muxnáa núma̱aʼ ga̱jma̱a̱ mbuʼyamajkuíí (Sal. 130:4). Jeobá naʼni mba̱a̱ a̱jkiu̱u̱n, ikhaa tséyejxuu á mu aʼkhá dí niʼni mbáa xa̱bu̱ nindxu̱u̱ mba̱a̱ wéñuʼ. Ikhaa najmuu ku̱ma̱ ndrígóo, numuu dí ikhaa nindxu̱u̱ bi̱ Niʼniwáanʼlú, bi̱ Naʼni Xtángoo ga̱jma̱a̱ Juez, najmuu xúgíʼ rígi̱ índo̱ naraʼwíí á mu maʼni mba̱a̱ a̱jkiu̱u̱n kaʼyoo mbáa xa̱bu̱ o na̱nguá. Ndiéjunʼ eʼyoo Jeobá índo̱ naraʼwíí mbá rí maʼni rá. w22.06 5 kutriga̱ 12-14

Jeobá naʼthí dí maxnúún mbá rí májánʼ xúgíinʼ bi̱ nandún kuyáá, xó dí maʼni gámbáa nandii, tsingíná ga̱jma̱a̱ dí nakháñulú (Apoc. 21:​3, 4). Ga̱jma̱a̱ mambáñún xa̱bu̱ bi̱ míjíinʼ bi̱ nuguaʼthi̱i̱n náa ikhaa, mu maʼni̱i̱ mbá Ku̱ba̱ʼ mitsaanʼ (Sal. 37:​9-11). Ma̱ngaa maʼni asndu xó má eʼngo̱o̱ mu xúʼko̱ mambájxulú itháán májánʼ gajmiúlú ikhaa. ¡Ra̱ʼkhá tháán mitsaanʼ dí kuaʼti̱i̱nlú! Náá numuu nduʼyáá gajkhun dí mambanúu rí nakudaminaʼ maʼni Dios rá. Numuu dí ikhaa naʼnimbanuu má xúʼko̱ ajngóo. Ma̱ngaa guaʼdáá mbaʼa numuu dí makumulúʼ kuʼyáá Jeobá (Sal. 27:14). Xú kaʼnii esngajmá dí nuguáʼthíi̱nʼlú Jeobá rá. Índo̱ nadxulú kuwáánʼ ruguaʼthi̱i̱n mambanúu dí ikhaa nikudaminaʼ maʼni (Isa. 55:​10, 11). Xó má Job, xúniʼñáánʼ Jeobá numuu dí ikhaa naʼninumií bi̱ ‹nduyáaʼ ga̱jma̱a̱ xúgíʼ a̱jkiu̱ún›. w22.06 20 kutriga̱ 1; 25 kutriga̱ 18

Guʼyáá gajkhun dí maʼni ikháá kayuuʼ xó má endu̱ʼu̱u̱n muni̱ bi̱ kuya̱ edxu̱u̱ náa mbá guʼwíin xó má eʼthí náa 1 Timoteo 5:8. Á mu nduʼyáá gajkhun dí Jeobá nandoo kaʼyulú ga̱jma̱a̱ nandoo kaʼñúún bi̱ kúwi̱i̱n náa guʼwúlú, rúʼko̱ gámbáyulú dí xáʼni a̱jma̱ a̱jkiu̱lú dí ikhaa má gáxnulú dí ndaʼyóoʼ (Mat. 6:​31-33). Jeobá nandoo maxnúlú dí ndayúlú, naʼni rígi̱ numuu rí nandoo kaʼyulú. Índo̱ niʼni ku̱ba̱ʼ, ikhaa na̱nguá niʼni i̱ndó dí mbaʼyóoʼ dí makuwáanʼ ga̱jma̱a̱. Rí phú niʼni ni̱ndxu̱u̱ dí maʼni majtíí xúgíʼ rí mitsaanʼ mú xúʼko̱ ikháánʼ manigulúʼ makuwáánʼ (Gén. 2:9). Maski ajndu nguáná i̱ndó kuáʼdáá mú manújngulú ga̱jma̱a̱ mámbá mbiʼi, mú guxnáa núma̱aʼ numuu rí kuaʼdáálú. Jeobá xtáa má xúʼko̱ ga̱jma̱a̱ ni̱ndxu̱lú mu maxnúlú rí ‹muʼphu mbiʼi rígi̱› (Mat. 6:11). Garmáʼáan a̱jkiu̱lú dí tséʼngo̱o̱ gaguaʼdáá mbiʼi xúgi̱, Jeobá maxnúlú índo̱ gáʼnimbánuu rí nikudaminaʼ nda̱wa̱á. (Isa. 65:​21, 22). w22.06 15 kutriga̱ 7, 8

Raʼkháa i̱ndó bi̱ nunigajmaa Biblia nda̱ñúunʼ ganitsu dí májánʼ. Rí phú gajkhun, xúgiáanʼ nda̱yúlúʼ. Apóstol Pablo niʼthí dí á mu nuʼgíʼ nuʼnimbánii dí najmañulúʼ mambáyulúʼ “muraʼwíí rí májánʼ ga̱jma̱a̱ dí ra̱májánʼ”. Rí mbiʼi xúgi̱ ga̱jma̱a̱ numuu dí nánguá ti̱ñu̱u̱n muni dí raʼkhí xa̱bu̱, mbáa maʼni gakhii muʼnimbánii ikha ndrígóo Jeobá. Mú Jesús ndaʼyoo xóo eʼni mu makhánulúʼ ganitsu májánʼ dí nambáyulúʼ maʼni gújkiáánʼ ga̱jma̱a̱ dí na̱ʼkha̱ náa Ajngá rawuunʼ Dios dí nindxu̱u̱ Biblia. Ikháanʼ ma̱ngaa nuxnáá gamajkhu mbiʼyuu Dios xó má niʼni Jesús (Juan 17:​6, 26). Mbá xkri̱da, nákha 1931 nigu mbiʼyulú testigos de Jeobá. Xúʼko̱ nisngajmá dí nandulúʼ muyéʼgua mbiʼyuu Anu̱lú bi̱ xtáa mekhuíí, numuu rí nduʼyáá dí gíʼdoo wéñuʼ numuu (Isa. 43:​10-12). Ma̱ngaa, Biblia dí Traducción del Nuevo Mundo nitima̱a̱ mbiʼyuu Dios náa gíʼmaa maʼga. w22.07 11 kutriga̱ 11, 12

Ajngáa rí májánʼ numuu Xa̱bu̱ Ñajunʼ ndrígóo Dios nindxu̱u̱ gajkhun rí naʼthí náa Biblia. Jesús niʼnimbríguíi rígi̱ xóo mbá rí gíʼdoo numuu dí rígá ngu̱ʼwa̱. Niʼthí: “Xa̱bu̱ Ñajunʼ ndrígóo Dios bi̱ xtáa mekhuíí, nindxu̱u̱ xóo mbá rí gíʼdoo wéñuuʼ numuu rí gíwanʼ ngu̱ʼwa̱ náa mbá mbaaʼ rí nixkamaa mbáa xa̱bu̱. Ikhú xa̱bu̱ buʼko̱ nirkaʼwu, numuu rí nidxuu wéñuuʼ ikha jngóo ni̱jkha̱a̱ gágujua̱a̱ mbá xúgíʼ rí gíʼdoo, ikhú ni̱ʼtsi̱ mbaaʼ rúʼko̱” (Mat. 13:44). Xó má eʼyáá dí xa̱bu̱ bugi̱ na̱nguá xtáa rayáʼ dí gíʼdoo numuu. Mú, índo̱ nixkamaa ikhaa niʼni mbá tsiakii mu ma̱ndoo magiʼdoo, nigujua̱a̱ xúgíʼ dí gíʼdoo. Náá numuu niʼni rígi̱ xá. Numuu dí nikro̱ʼo̱o̱ rí gíʼdoo wéñuʼ numuu dí nixkamaa. Nduʼyáá rí nimbá dí naxnáraʼa numbaaʼ nambríguii ga̱jma̱a̱ gagi dí mu̱ʼni̱ ñajuunʼ Jeobá dí mbiʼi xúgi̱ ga̱jma̱a̱ dí maguáʼthi̱i̱n makuwáánʼlú kámuu mbiʼi índo̱ gáʼtañajunʼ Xa̱bu̱ Ñajunʼ ndrígóo Dios. Xúgíʼ tsiakii dí gúʼni̱ mu mambaxúlúʼ má xúʼko̱ gajmiúlú Jeobá gíʼdoo wéñuʼ numuu. Nadxulú wéñuʼ dí nambájxu gajmiúlú. Nda̱a̱ imbo̱o̱ʼ dí naʼni makuwáánʼlú gagi dí mu̱ʼni̱ xúgíʼ dí naniguuʼ Jeobá. w22.08 15 kutriga̱ 8, 9; 17 kutriga̱ 12

Ndíjkha dí José ndiʼyoo dí Dios ndaʼyoo dí nindxu̱u̱ ra̱májánʼ kayuuʼ dí mata̱ba̱a̱ʼ ga̱jma̱a̱ʼ mbáa rá. Tígo̱o̱ xóó imbá 200 tsiguʼ dí majuiʼnirámáʼ Xtángoo dí nikánáa Moisés, náa naʼthí: “Ragíʼmaa mata̱ba̱a̱ʼ ga̱jma̱a̱ʼ bi̱ tíyáa” (Éx. 20:14). Mú dí nijmañuu José ga̱jma̱a̱ numuu Jeobá nimbáyúu mu mbaʼyoo xú káʼnii endxa̱ʼwáminaʼ Dios ga̱jma̱a̱ numuu dí mata̱ba̱a̱ʼ ga̱jma̱a̱ʼ bi̱ tíyáa. Mbá xkri̱da, ikhaa ndiʼyoo dí Dios niʼnii mbáa xa̱biya̱ ga̱jma̱a̱ a̱ʼgu̱ mu mudamijná. Ma̱ngaa niʼdxawun xú káʼnii Jeobá nirikhúún a̱jmi̱i̱n reyes bi̱ nindúún mubúúnʼ gajmiún Sara bi̱ nindxu̱u̱ xíñii egee. (Gén. 2:24; 12:​14-20; 20:​2-7). Xúgíʼ rígi̱ niʼni dí José mbaʼyoo ndiéjunʼ nindxu̱u̱ dí májánʼ ga̱jma̱a̱ dí ra̱májánʼ eʼyoo Dios. Numuu dí ra̱ʼkhá tháán eyoo kaʼyoo Jeobá ma̱ngaa nindoo kaʼyoo ikha ndrígóo ikha jngóo nixtáa xawii mu maʼnimbo̱o̱. w22.08 26 kutriga̱ 1, 2

Náa kiʼtáriyaʼ rígi̱ naʼthí rí muguaxúu̱n xa̱bu̱. Nákha ginii nakru̱ʼu̱lú rí índo̱ gaʼni iwáá mbiʼi muguaxúu̱n magúun mekhuíí xa̱bi̱i̱ Dios. Mú nandoo gáʼthúu̱n rí muguaxúu̱n mukuwá náa numbaaʼ nuxi̱ʼ. Náa numuu dí xúʼko̱ kaʼnii eʼyáá rá. Náa Job 17:16 naʼthí ga̱jma̱a̱ numuu “yujndaʼ” ikhí ma̱ngaa najmuu ajngáa rí naʼni mbríguii ga̱jma̱a̱ “iña wa̱jinʼ”. Rígi̱ ma̱ngaa naʼthí náa Daniel 12:2 rí muguaxúu̱n índo̱ gaʼni iwáá mbiʼi ga̱jma̱a̱ nda̱wa̱á rí gámbá Armagedón. Ndiéjunʼ eyoo gáʼthúu̱n ajngáa rí “makuwá kámuu mbiʼi” dí na̱ʼkha̱ náa Daniel 12:2 rá. Nandoo gáʼthúu̱n rí índo̱ gágabi̱ín ga̱jma̱a̱ muniʼniiʼ o majmañún má xúʼko̱ ga̱jma̱a̱ numuu rí munimbu̱ún kuyáá Jeobá ga̱jma̱a̱ Jesús náa mbá 1,000 tsiguʼ makuwá kámuu mbiʼi (Juan 17:3). w22.09 21 kutriga̱ 6, 7

Raʼkháa rúʼko̱ eyoo gáʼthúu̱n dí Jeobá na̱ndu̱ʼu̱lú rí asndu tsáá má bi̱ ma̱ndoo makumulúʼ kuʼyáá, gíʼmaa má mbuʼyáá tsáa bi̱ nisngájma rí ma̱ndoo makumulúʼ kuʼyáá. Rí makumulúʼ kuʼyáá mbáa ndayóoʼ mbayuuʼ mbiʼi matatsiʼníiʼ mu marigá xúʼko̱. Ndiéjunʼ gáʼyoo matani mu makumaaʼ itháan xtañúún eʼwíinʼ rá. Dí matatsiʼniúnʼ májánʼ. Aratamijná gajmiáanʼ ikhiin náa reunión. Gakuwáanʼ mbóó náa nutaráʼa. Gaʼngo̱o̱ a̱jkia̱la ga̱jma̱a̱ guniʼñúnʼ musngajma dí kaʼnii makumala kuñu̱u̱n. Á mu na̱nguá tatsiniʼ májánʼ mbáa, mbáa nákha ginii ikháán tseratamíjná wéñuʼ ga̱jma̱a̱ xóo phú xtaa, mú índo̱ na̱dxu̱ʼ ratatsiniʼ itháan xa̱bu̱ buʼko̱, mbáa ikhú naratháán xóo phú ku̱ma̱ʼ (Luc. 16:10). Ndiéjunʼ gándoo matani á mu mbáa ndxájulú niʼthí mbóo dí niratháán dí xáʼthi rá. Xáʼyóoʼ makiʼnááʼ xtayáá mbá nacha̱, atatsiñaaʼ manújngoo mbiʼi. Ga̱jma̱a̱ xátatsiʼñáʼ rí nuni tikhun maʼni rí xákumaaʼ xtañún xúgínʼ. w22.09 4 kutriga̱ 7, 8

Mbáa ndxájulú bi̱ kayá edxu̱u̱ bi̱ mbiʼyuu Miqueas nikumu̱u̱ rí tikhuun bi̱ kuya̱ edxu̱u̱ nitháán mbájmbu ga̱jma̱a̱ ajngáa gakhii. Mu maski ajndu xúʼko̱, nindxa̱ʼwáminaʼ náa dí májánʼ ga̱jma̱a̱ ndiʼyoo awa̱án mu xandxaʼwáminaʼ dí raʼkhí. Mbaʼa nuthu niʼtákáñuu Jeobá rí maxnúu espíritu santo ndrígóo, tsiakii mu maʼngo̱o̱. Ma̱ngaa ndiyáʼ itháán mbaʼyoo náa iyulú. Ndiéjunʼ ejmañulú rá. Á mu naku̱ma̱a̱ʼ rí mbáa ndxájulú niʼniaaʼ dí raʼkhí, xakiʼnáán ga̱jma̱a̱ atie̱wa̱a̱n mu xatatsaʼwamínáʼ dí raʼkhí. Mbáa ndxájulú rígá mbá dí nigíʼnuu mbiʼi rúʼko̱, ikha jngóo niʼthí o niʼniaaʼ xúʼko̱ kaʼnii mbá rí ikháán tsétayáá. Aratháán xúgíʼ rúʼko̱ Jeobá ga̱jma̱a̱ atanda̱ʼa̱a̱ ma̱ta̱ya̱a̱ xóo má eʼyoo ndxájulú buʼko̱. Rúʼko̱ gáʼni rí matatsaʼwáminaʼ rí májánʼ ga̱jma̱a̱ numuu, ma̱ngaa rí xakiʼnán xtayáá (Prov. 19:11). Garmáʼáan a̱jkia̱a̱nʼ rí Jeobá ndaʼyoo rí nagíʼnulu ga̱jma̱a̱ ikhaa maxnáaʼ tsiakii mu maʼnga̱a̱ʼ matraʼníí asndu ndiéjunʼ má (Ecl. 5:8). w22.11 21 kutriga̱ 5

Gambajxáaʼ gajmiánʼ bi̱ nandún kuyáá Jeobá. Bi̱ nambájxáaʼ gajmián mumbayáaʼ mu matani̱ má xúʼko̱ ñajunʼ Dios (Prov. 13:20). Mbáa ndxájulú bi̱ mbiʼyuu Julien ga̱jma̱a̱ rí xúgi̱ nindxu̱u̱ bi̱ kayá edxu̱u̱ naʼthí: “Nákhá nindxu̱ʼ dxámá, nimbájxu̱ʼ májánʼ gajmíʼ a̱ngiu̱lú bi̱ nataráʼa gajmíʼ. Ra̱ʼkhá tháán edxún ga̱jma̱a̱ nimbayúʼ dí mangúún maʼdxuʼ náa nataráʼa. Nijkhánú ndi̱yo̱o̱ rí i̱ndó xtáá raʼñíinʼ mambájxúʼ gajmíʼ bi̱ guáʼdáá tsiguúnʼ xóo ikhúún, rúʼko̱ niʼni dí mandátigo̱ʼ rí mambajxúʼ gajmíʼ bi̱ mumbayúʼ mu ma̱ni̱ itháan ñajunʼ Dios”. Ndiéjunʼ gátani̱ á mu natayáá dí náa congregación xtáa mbáa bi̱ xámbáyáaʼ rá. Apóstol Pablo ndaʼyoo dí cristiano bi̱ nikúwá nákhá siglo timbá, nikúwá tikhun bi̱ tséni̱ xóo phú eni̱gu̱u̱ʼ Dios. Ikha jngóo niʼthúu̱n Timoteo dí xámbájxu̱u̱ gajmíi̱n (2 Tim. 2:​20-22). Dí mambajxáaʼ ga̱jma̱a̱ʼ Anu̱lú bi̱ xtáa mekhuíí gíʼdoo wéñuʼ numuu, ga̱jma̱a̱ mbaʼa má rí edxa̱ʼ ratani̱ mu mambajxáaʼ májánʼ ga̱jma̱a̱ʼ. Ikha jngóo xátatsiʼñáʼ rí nimbáa maʼnigachúu rígi̱ (Sal. 26:4). w22.08 5, 6 kutriga̱ 13-15

Ikháanʼ najmañulúʼ rí maʼndulú kuʼyáá rí nandxaʼwóo edxu̱u̱ Dios ga̱jma̱a̱ xúgíʼ xtángoo ndrígóo, mú mixtiʼkhu eni̱ bi̱ nawiñunʼ kuyáá. Mu maʼndulú kuʼyáá má xúʼko̱ ma̱ndoo muʼni mbríguii ndiéjunʼ dí májánʼ narígá índo̱ nuʼnimbulú ga̱jma̱a̱ índo̱ tséʼnimbulú. Guʼyáá náa xúgíʼ xkujndu dí naguáʼdáá xa̱bu̱ bi̱ tsíñún gúnimbu̱ún consejo ndrígóo Jeobá. Ikha jngóo guʼyáá rí kúwáanʼ itháan májánʼ índo̱ nuʼnimbulúʼ kuʼyáá Dios (Sal. 32:​8, 10). Jeobá nandoo rí xúgiáanʼ mundrígú ku̱ma̱ ndrígóo, mú na̱nguá etsudaa nimbáa dí maʼni rígi̱. Mú naʼthí ndiéjunʼ gúgíʼníí bi̱ tsédxawíín ku̱ma̱ ndrígóo (Prov. 1:​29-32). “Ikhiin má guraʼní ga̱jma̱a̱ xóo rí nuni”. I̱ndó makuwá ga̱jma̱a̱ xkujndu, gamiéjunʼ ma̱ngaa nda̱wa̱á maguma gámbíin. Bi̱ gudxawíín consejo ndrígóo Jeobá ga̱jma̱a̱ nuni xóo eʼthí, ikhiin mundrígú rí nakudaminaʼ náa ajngáa rígi̱: “Mú bi̱ naʼdxawunʼ ikhaa maxtáa májánʼ, ga̱jma̱a̱ índo̱ garigá gaʼkhu ikhaa xaxmiéjuunʼ” (Prov. 1:33). w22.10 21 kutriga̱ 11-13

Dí mamiñulúʼ kuʼyáá Jeobá nandoo gáʼthúu̱n dí mbuʼyamajkuíí, dí asndu tsíyulú muʼni nimbá dí ikhaa tsénigu̱u̱ʼ (Prov. 16:6). Ikha jngóo nuʼnimíjna̱ má xúʼko̱ munimbulú kiʼtáñajunʼ dí nindxu̱u̱ májánʼ ga̱jma̱a̱ dí ra̱májánʼ dí na̱ʼkha̱ náa Biblia (2 Cor. 7:1). Á mu nuʼni dí Jeobá naniguuʼ ga̱jma̱a̱ naguiyulú kuʼyáá dí ikhaa tsénigu̱u̱ʼ, makuwáanʼlu itháán gagi (Sal. 37:27; 97:10; Rom. 12:9). Mbáa xa̱bu̱ ma̱ndoo maʼga̱nú mbaʼyoo dí Jeobá kaʼyoo maʼtáñajunʼ mu maʼthí ndiéjunʼ nindxu̱u̱ dí májánʼ ga̱jma̱a̱ dí ra̱májánʼ, mú ma̱ngaa ndayóoʼ maʼnimbo̱o̱ kiʼtáñajunʼ ndrígóo Dios (Rom. 12:2). Xóo eʼnilú masngajmá á mu gajkhun nduʼyamajkuíí kiʼtáñajunʼ ndrígóo Jeobá dí nindxu̱u̱ itháán májánʼ (Prov. 12:28). David ni̱jkha̱nú ndiʼyoo dí nindxu̱u̱ gajkhun rúʼko̱, numuu dí niʼthún Jeobá: “Natani maniʼnuuʼ kamba̱a̱ rí naʼni maxtáá. Rí xtaa naʼni maʼdxuʼ wéñuʼ; náa ñawún májáanʼ marígá gagi asndu kámuu” (Sal. 16:11). w22.10 8 kutriga̱ 9, 10

Jesús ninindxu̱u̱ xa̱bu̱ wabaaʼ ndiʼyoo awa̱án ga̱jma̱a̱ numuu ikhaa. Nákha xóó tséʼkha̱ náa tsu̱du̱u̱ Ku̱ba̱ʼ niʼni mbaʼa wéñuuʼ rí mitsaanʼ ga̱jma̱a̱ numuu Jeobá. Colosenses 1:16 naʼthí: “Ga̱jma̱a̱ numuu ikhaa nigumawíi xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”. Índo̱ Jesús nijngúun iyááʼ nirmáʼáan xúgíʼ a̱jkiu̱u̱n dí niʼni ga̱jma̱a̱ Anu̱u̱ nákha nixtáa mekhuíí (Mat. 3:16; Juan 17:5). Mú na̱nguá niʼnimbamínáʼ ga̱jma̱a̱ numuu dí nirmáʼáan a̱jkiu̱u̱n, ni má na̱nguá niʼni mbuyáá dí ikhaa gíʼdoo itháán numuu ki xóo eʼwíinʼ. Ikhaa niʼthúún xa̱bi̱i̱ dí táʼkha̱ náa tsu̱du̱u̱ Ku̱ba̱ʼ “mu muni̱ mbáʼwi̱i̱, ni̱ʼkha̱ mu maʼni mbáʼwi̱i̱n eʼwíinʼ ga̱jma̱a̱ maxnájximinaʼ mu maʼnikáwíin mbaʼin xa̱bu̱” (Mat. 20:28). Ikhaa niʼthí dí xándoo maʼni rí ikhaa nandoo. Gajkhun dí Jesús ninindxu̱u̱ xa̱bu̱ wabaaʼ, mangáanʼ nandulú dí mbuʼyaridáá xkri̱da ndrígóo. w22.05 24 kutriga̱ 13

Jeobá nayejxu̱u̱ ginii á mu dí xa̱bu̱ bi̱ nakudaminaʼ aʼkhá ndaʼyoo má dí xtáa raʼni nindxu̱u̱ ra̱májánʼ. Jesús niʼthí kaʼwu náa Lucas 12:​47, 48. Á mu xa̱bu̱ naʼni mbá dí ra̱májánʼ kayuuʼ ga̱jma̱a̱ ndaʼyoo má rí Dios tsénigu̱u̱ʼ o nawiyuuʼ, ikhaa xtáa rakudaminaʼ mbá aʼkhá mbiiʼ, mbáa Jeobá xándoo maʼni mba̱a̱ a̱jkiu̱u̱n kaʼyoo (Mar. 3:29; Juan 9:41). Lá rígá xóó dí gíʼthu̱u̱n xáʼ. Xúʼko̱, mú rígá imbo̱o̱ʼ rí ndaʼyoo Jeobá. Á mu xa̱bu̱ bi̱ nakudaminaʼ aʼkhá natanga̱a̱ gajkhun a̱jkiu̱u̱n. Nandoo gáʼthúu̱n rí matriʼkui̱i̱ o matatsiʼñáánʼ rí xtaa ratani̱. Xa̱bu̱ bi̱ natanga̱a̱ a̱jkiu̱u̱n nagawúunʼ ma̱ngaa xtáa ngíná ga̱jma̱a̱ numuu rí niʼni. Numuu rí niniñuuʼ maʼchúu rí nambájxuu ga̱jma̱a̱ Jeobá, rúʼko̱ nijkha kayáa maʼni dí ra̱májánʼ. w22.06 5, 6 kutriga̱ 15-17

Xa̱bu̱ bi̱ nakiʼníin nuthi nduwaʼ ga̱jma̱a̱ numulú o nuxuda̱nʼ mbá rí minduwaʼ ga̱jma̱a̱ numún a̱ngiu̱lú bi̱ guáʼdáá ñajunʼ náa xuajñuu Jeobá (Sal. 31:13). Tikhun a̱ngiu̱lú nixudiinʼ náa guʼwá ejua̱a̱nʼ ga̱jma̱a̱ nuthúún rí nuni̱ gíníi eʼwíinʼ. Xúʼko̱ má kayuuʼ niguáʼníí a̱ngiu̱lú nákha timbá siglo. Índo̱ apóstol Pablo nixuda̱a̱ʼ náa guʼwá ejua̱a̱nʼ náa Roma, tikhuun cristianos niniña̱a̱nʼ (2 Tim. 1:​8, 15). Pablo nixtáa ngíná wéñuuʼ numuu dí niraʼnuu mbaʼa xkujndu rí asndu nigíʼ makhañúu ga̱jma̱a̱ numún ikhiin (Hech. 20:​18-21; 2 Cor. 1:8). Nditháan xúʼni xó má nini̱ cristianos buʼko̱ bi̱ niniñaaʼ Pablo. Xáʼniulu tsiánguá dí a̱ngiu̱lú bi̱ guáʼdáá mbá ñajunʼ náa xuajñuu Dios nindxu̱ún bi̱ phú maʼni gíníi Gixa̱a̱. Numuu dí ikhaa nandoo dí a̱ngiu̱lú buʼko̱ xáguajun jmbu náa Jeobá ga̱jma̱a̱ rí ikháanʼ mamiñúlú (1 Ped. 5:8). Ikha jngóo atambáñúún má xúʼko̱ a̱ngiu̱lú bi̱ guáʼdáá ñajunʼ náa xuajñuu Dios (2 Tim. 1:​16-18). w22.11 16, 17 kutriga̱ 8-11

Mbáa xa̱bu̱ bi̱ ra̱májáanʼ bugi̱ bi̱ nitanga̱a̱ a̱jkiu̱u̱n ninindxu̱u̱ judío. Xa̱bu̱ judío ndiyamajkuíí mbáwíí Dios, mú xa̱bu̱ bi̱ kúwá náa i̱ʼwáʼ xuajin nunimbu̱ún kuñún mbaʼin dioses (Éx. 20:​2, 3; 1 Cor. 8:​5, 6). Á mu xa̱bu̱ ra̱míjíinʼ bugi̱ na̱nguá nindxu̱ún judío manidxu̱u̱ mixtiʼkhu kayuuʼ graxe̱ rí nini̱: “Lá na̱nguá míñaaʼ eni̱ dioses ráʼ”. Jesús kaxúʼmaa “ma̱ʼkha̱ gáñiinʼ xa̱bu̱ Israel bi̱ ni̱ndxu̱ún xóo mugu̱ bi̱ nindáti̱gi̱i̱n” raʼkháa xa̱bu̱ bi̱ naguwáʼ i̱mba̱ xuajin (Mat. 15:24). Ga̱jma̱a̱ Dios niʼthún israelita rí makujxi̱i̱n xa̱bu̱ bi̱ nikháñún. Mbáa xa̱bu̱ ra̱májáanʼ bi̱ nitanga̱a̱ a̱jkiu̱u̱n ndaʼyoo má xúgíʼ rígi̱ ga̱jma̱a̱ numuu rí niʼthí nandoo nduʼyáálú dí ikhaa nakro̱ʼo̱o̱ dí Jeobá maʼnigabi̱i̱ Jesús mu matañájunʼ náa mekhuíí. Xó má ekujmaa dí xa̱bu̱ bugi̱ gíʼthúu̱n dí Dios makujxi̱i̱ mangaa. Numuu rí nindxu̱u̱ judío ndaʼyoo má dí nirígá ku̱ba̱ʼ rí Jeobá nixnúu Adán ga̱jma̱a̱ Eva. Ikha jngóo, ikhaa nindxa̱ʼwáminaʼ ga̱jma̱a̱ numuu ku̱ba̱ʼ mitsaanʼ dí niʼthí Jesús, dí marígá náa tsu̱du̱u̱ ku̱ba̱ʼ (Génesis 2:15). w22.12 8 kutriga 2; 9 kutriga 3

Ndayúlú espíritu santo mu muʼtáraʼa. Náá numuu nuʼthálu rígi̱ rá. Numuu dí Gixa̱a̱ naʼni xóo ma eʼngo̱o̱ mu maguijithu̱u̱n dí nuʼtáraʼa (Apoc. 12:17). Mbáa ikháanʼ ma̱ndoo makumulú dí Gixa̱a̱ nindxu̱u̱ xóo mbáa bi̱ sia̱nʼ gajmiúlú bi̱ ra̱ʼkhá tháán xkujííʼ. Mú índo̱ nuʼtáraʼa ikháanʼ naʼngulú ma̱ngaa, xúʼko̱ nusngajmáá dí tsémiñúlú eʼni xúgíʼ dí Gixa̱a̱ naʼni mu mamiñúlúʼ (Apoc. 12:​9-11). Dí ma̱ndoo muʼtáraʼa maski ajndu nuni̱ gínáanʼlu nasngájma dí espíritu santo naxnúlú tsiakii ma̱ngaa dí Jeobá naniguuʼ dí kuwáanʼ ruʼnilú (Mat. 5:​10-12; 1 Ped. 4:14). Espíritu santo ma̱ndoo mambáyulú náa xkujndu dí guraʼníí índo̱ guʼtáraʼa (2 Cor. 4:​7-9). Ndiéjunʼ gíʼmaa muʼni mu mundrígúlú má xúʼko̱ espíritu santo ndrígóo Dios rá. Munda̱ʼa̱a̱lú má xúʼko̱ índo̱ guʼtákáñíí ga̱jma̱a̱ dí mbuʼyáá gajkhun rí Jeobá naʼdxa̱wunlú. w22.11 5 kutriga̱ 10, 11

Ma̱ndoo musngajmá dí nandulú kuʼñúún a̱ngiu̱lú nindxu̱u̱ dí muʼni mbá tsiaki̱i̱ mambáxulu májánʼ gajmiúlú. Nuʼnimíjna muʼni mba̱a̱ a̱jkiu̱lú kuʼñúún xó má eʼni Jeobá. Gundxaʼwámijnalú rígi̱: Jeobá nixnájxi̱ a̱ʼdióo makhañúu ga̱jma̱a̱ numuu aʼkhúlú. Ikhaa jngóo ikháánʼlú ma̱ngaa ndayóoʼ muʼni mba̱a̱ a̱jkiu̱lú kuʼñúún a̱ngiu̱lú bi̱ nakiéʼkúún náa inulú. Tsíyulú manindxu̱lú xóo ñumbáá bi̱ ra̱ʼkhá tháán mba̱a̱ nigiʼmaa náa inuu patriúun, ga̱jma̱a̱ patriúun niʼni mba̱a̱ a̱jkiu̱u̱n kaʼyoo, mú ikhaa táʼndoo gáʼni mba̱a̱ a̱jkiu̱u̱n kaʼyoo i̱mba̱a̱ ñumbáá bi̱ gíʼmaa itháan chíʼgíiʼ náa inuu ki xóo nigiʼmaa ikhaa (Mat. 18:​23-35). Á mu xtáa mbáa ndxájulú bi̱ nakiʼnáa kaʼyaaʼ o ikháán nakiʼnáá xtayáá, atríya̱ʼ mbiʼi mu maratha̱a̱n dí maʼni mba̱a̱ a̱jkiu̱u̱n kaʼyaaʼ. Gunimbaníla xkujndu nákha xóó tséʼni Conmemoración (Mat. 5:​23, 24). Á mu natani̱ xúʼko̱, matasnga̱jmá dí ra̱ʼkhá tháán nandaaʼ xtayáá Jeobá ga̱jma̱a̱ Jesús. w23.01 29 kutriga̱ 8, 9

Mbá dí xóo ma̱ndoo ma̱ta̱ya̱a̱ xú káʼnii kúwá a̱ngiu̱lú nindxu̱u̱ dí matrajxu̱u̱n ga̱jma̱a̱ tsu̱ma̱á (Prov. 20:5). Lá guáʼdáá xúgíʼ rí ndañúu̱nʼ, xóo rí mu̱phu̱ ga̱jma̱a̱ thana xáʼ. Lá ma̱ndoo munimbatíga̱a̱ ñajúúnʼ o náa kúwá xáʼ. Lá mbaʼyooʼ muruguambañún mu munda̱ʼa̱ apoyo náa Gobierno xáʼ. Jeobá naʼthúlú dí mbá xúgiáanʼ ma̱ndoo muxnamijnálú tsiakii ga̱jma̱a̱ mumbáñún eʼwíinʼ (Gál. 6:10). Maski ajndu chíʼgíiʼ dí kuaʼdáá guxnáá bi̱ nandoo káñuu, rúʼko̱ gásngájma dí nandulú kuʼyáá, ikhaa maʼdxuu wéñuʼ. E̱ji̱n chíjkhíinʼ ma̱ndoo muni̱ mbá tarjeta o mbá dibujo dí ma̱ndoo muxnáá mbá ndxájulú. Jiámá ga̱jma̱a̱ wa̱ʼxa̱ʼ ma̱ndoo munda̱ʼa̱a̱ ndxájulú rí magún gútsi̱ rí gáʼyóoʼ o ma̱ndoo muni̱ májáánʼ ganitsu mu muxnáá mbáa ndxájulú bi̱ nandoo káñuu. Tikhuin a̱ngiu̱lú nuniraʼmáʼ ajngáa náa inún a̱ngiu̱lú bi̱ kuya̱ edxu̱u̱ mu muxniín núma̱aʼ, itháan índo̱ nagadráʼa mbá nandii rí asndu tséwaphiin. Ra̱ʼkhá tháán májánʼ dí mu̱ʼni̱ tsiakimíjna̱ muʼnimbulú ikha rí na̱ʼkha̱ náa Biblia: “Guxnamíjnálá tsiakii, gumbáyumijnála” (1 Tes. 5:11). w22.12 22 kutriga 2; 23 kutriga 5, 6

Maski ajndu saduceos niniʼnuuʼ májánʼ mbá witsu libro dí na̱ʼkha̱ ginii kayuuʼ náa Escrituras Hebreas, mú nimbumún mbá dí gíʼdoo wéñuuʼ numuu dí na̱ʼkha̱ náa libro rúʼko̱. Gundxaʼwamíjna̱ ga̱jma̱a̱ numuu xkri̱da rígi̱ nákha Jesús niʼthún saduceos índo̱ ikhiin nigíʼ mugiʼ tsáʼkhá ga̱jma̱a̱ numuu dí magabiín xa̱bu̱, ikhaa nirajxu̱u̱n: “Lá túraxnuu rí niʼnirámáʼ Moisés náa naʼthí ga̱jma̱a̱ numuu xtáʼdu̱u̱ iná tsuwanʼ ráʼ. Náa Dios niʼthúu̱n: ‹Ikhúún nindxu̱ʼ Dios ndrígóo Abrahán, Dios ndrígóo Isaac ga̱jma̱a̱ Dios ndrígóo Jacob› ráʼ.” (Mar. 12:​18, 26.) Mbáa saduceos niraxnuu mbaʼa nuthu dí na̱ʼkha̱ raʼthí ikhí. Mú graxe̱ dí niʼni Jesús nisngájma dí ikhiin nimbumún mbá kiʼsngáa dí gíʼdoo wéñuuʼ numuu rí na̱ʼkha̱ raʼthí náa Biblia, ikhaa nindxu̱u̱ dí magabiín xa̱bu̱ bi̱ nikháñún (Luc. 20:38). Ndiéjuunʼ ejmañulú dí niʼtámíjná Jesús gajmíi̱n saduceos rá. Dí índo̱ nuraxnulú Biblia ndayóoʼ mbuʼyáá tsumáá xúgííʼ náa rí ma̱ndoo maʼsngulúʼ mbá versículo o mbá historia dí na̱ʼkha̱ ikhí. Ndayóoʼ mbuʼyáʼ ndiéjuunʼ phú eyoo gáʼthí, numuu rí nandulú muxkamaa dí gajkhun ga̱jma̱a̱ tikhu ikha dí gíʼdoo wéñuuʼ numuu dí na̱ʼkha̱ náa Biblia. w23.02 11 kutriga̱ 9, 10

Xúgíinʼ testigos bi̱ naʼthí mbiʼñún náa texto rí mbiʼi xúgi̱, raʼkháa i̱ndó Job nindxu̱u̱ xa̱bi̱i̱ Jeobá bi̱ niʼngo̱o̱ ga̱jma̱a̱ niwi̱ji̱ gujkhuʼ náa mbaʼa gamiéjunʼ dí niraʼnuu. Náa carta dí nikuʼma apóstol Pablo náa inún a̱ngiu̱lú hebreos niʼthí rí kuwáanʼlu náa majñúnʼ ‹mbaʼin wéñuuʼ xa̱bi̱i̱› Dios (Heb. 12:1). Maski ajndu mbaʼa gaʼkhu gakhii dí ikhiin niraʼníí, mú náa xúgíʼ mbiʼi dí ikhiin nikúwi̱i̱n nditháan túniña̱a̱ʼ Jeobá (Heb. 11:​36-40). Lá niyambáá dí ikhiin niʼngu̱u̱n xáʼ. Aan, xúʼko̱. Gajkhun má dí na̱nguá niʼngu̱u̱n guyáá xú káʼnii nimbánuu rí nikudaminaʼ maʼni Dios, mú niguaʼti̱i̱n má xúʼko̱ náa ikhaa. Ga̱jma̱a̱ numuu rí ndiyáá dí Jeobá nigruiguíin, ikha jngóo nikumu̱ún gajkhun rí mambanúu xúgíʼ dí nakudaminaʼ maʼni Dios (Heb. 11:​4, 5). Dí mundxaʼwamíjna̱ ga̱jma̱a̱ numún ikhiin naxnúlú tsiakii muguaʼthi̱i̱n má xúʼko̱ Jeobá. Náa numbaaʼ dí kuwáánʼlú mambá mbiʼi na̱jkha̱ raʼni itháán mixkawiʼ (2 Tim. 3:13). Ma̱ngaa Gixa̱a̱ nagrui̱ga̱ má xúʼko̱ tsáʼkhá náa inún xa̱bi̱i̱ Dios. Ikha jngóo, tséʼñuu asndu ndiéjúúnʼ má dí gugíʼníílú nda̱wa̱á guʼni má xúʼko̱ ñajuunʼ Jeobá ga̱jma̱a̱ xúgíʼ a̱jkiu̱lú, numuu rí nakumulú kuʼyáá ikhaa (1 Tim. 4:10). w22.06 25 kutriga̱ 17, 18

Mbá numuu dí gíʼma muñewumíjna̱lú nindxu̱u̱ dí muʼni itháán májánʼ ñájunʼ ndrígóo Jeobá (Mar. 12:30). Numuu dí nandulú ‹muxnajxí xuyulú xóo mbá tsigijñaʼ rí kaʼwu, mbá rí ndaʼya rí manigu̱u̱ʼ Dios; mu xúʼko̱ mundxa̱ʼwa̱a̱ májánʼ edxu̱lúʼ índo̱ gúʼni ñajuunʼ Dios› (Rom. 12:1). Gajkhun má, tséʼñuu á mu nuñewumíjna̱lú wéñuuʼ, rúʼko̱ na̱nguá eyoo gáʼthúu̱n dí xáʼñulú nandii. Mú, nuñewamíjna̱ numuu dí nandulú musngajmáá Anu̱lú bi̱ xtáa mekhuíí dí nuxnáa númaaʼ dí niʼni dí makuwáánʼlú. Á mu guaniáanʼlú o nandoo káñulú mbáa nánguá eʼngo̱o̱ guʼni xóo eʼnilú nákhá ginii, mbáa rúʼko̱ naʼni dí maxmiéjunlú ga̱jma̱a̱ makuwáanʼlu gíná, mú rúʼko̱ na̱nguá eyoo gáʼthúu̱n dí xáʼyóoʼ muʼni mbáa tsiaki̱i̱ mu muñewamíjna̱ mu xándoo káñulú. Náá numuu rá. Maski asndu guaniáanʼlú o nandoo káñulú ma̱ndoo muʼni mba̱a̱ Jeobá xó má niʼni rey David. Naʼni̱i̱ a̱jkiu̱lú dí Dios nandoo kaʼyulú ga̱jma̱a̱ ndaʼyoo dí gíʼdoo numulú maski ajndu nindxu̱lú xa̱bu̱ aʼkhá (Mat. 10:​29-31). ¡Ra̱ʼkhá tháán nandoo kaʼyulú! Ikhaa jngóo naʼthúlú dí ikhaa maʼni matujxi̱i̱ʼlú á mu nakháñulú (Job 14:​14, 15). Xúgi̱ dí kuwáanʼlu nduʼya xóó, ndaʼyóoʼ muʼni mbá tsiaki̱i̱ mu muñeʼwa̱a̱n vida ndrígulú ga̱jma̱a̱ dí xáʼniulú nandii. w23.02 20, 21 kutriga̱ 3-5

Bi̱ ragajma grupo nindxu̱ún bi̱ mbaʼin xa̱bu̱ bi̱ nindxu̱ún eʼwíinʼ mugu̱. Lá mati̱ma̱ má xúʼko̱ mbiʼñún náa libro rí ndaʼya nda̱wa̱á dí gájngoo Armagedón xáʼ. Xúʼko̱ (Apoc. 7:14). Jesús niʼthí dí xa̱bu̱ bigi̱, bi̱ nindxu̱ún xóo mugu̱, “makuwá kámuu” (Mat. 25:46). Bi̱ gakáwíin náa Armagedón xundrígú mbá nacha̱ rí makuwá kámuu mbiʼi. Índo̱ Jesús gáxtáa Raʼtáñajunʼ mbá Míí tsiguʼ, “mañewu̱u̱n ga̱jma̱a̱ maʼga kagui̱i̱n náa iduu iyaʼ rí ndaʼya”. Bi̱ gunimbu̱ún ikha ndrígóo Cristo ga̱jma̱a̱ bi̱ guguajún jmbu náa Jeobá marigá kámuu mbiʼñún náa libro rí ndaʼya (Apoc. 7:​16, 17). Mú bi̱ nindxu̱ún tsujthu̱nʼ maguma gámbíin náa Armagedón. Jesús niʼthí dí “magún náa mambíin kámuu mbiʼi” (Mat. 25:46). Ga̱jma̱a̱ apóstol Pablo niʼthí dí xa̱bu̱ bugi̱ “mumíníiʼ rí asndu mambíin kámuu mbiʼi” (2 Tes. 1:9; 2 Ped. 2:9). w22.09 16 kutriga̱ 7, 8

Xúgíʼ dí niʼniwíi Jeobá naʼni dí bi̱ kúwá náa mbá guʼwíin muni̱ gagimijná ga̱jma̱a̱, rúʼko̱ eʼni dí makuwá itháán kambájxu̱u̱n. Jeobá niʼniwíi mbaʼa dí mitsaanʼ mu ma̱ndoo muʼni dí nanigulúʼ. Mbaʼin bi̱ kúwá náa mbá guʼwíin nanigu̱nʼ muríyaʼ mbiʼi mu magún gúni gagimijná náa xanáá náa kúbá o náa playa. Náa numbaaʼ nuxi̱ʼ, xabuanii gajmiún e̱jñu̱ún ra̱ʼkhá tháán gánigu̱u̱n xúgíʼ dí Jeobá gaʼniwíi. Ní xámiñúlú gúni̱ xujkhúʼ ní má ikhiin xámiñún kuyulú (Isa. 11:​6-9). Maguaʼdáá mbiʼi mu mbuʼyáá xúgíʼ dí Jeobá niʼniwíi (Sal. 22:26). Mú, ikháanʼla xabuanii xúguaʼthi̱i̱nla asndu ikhú mu muthu̱u̱n e̱jña̱la mbuyáá dí nigumawíi ga̱jma̱a̱ ndiéjunʼ dí gajmañún numuu Jeobá ikhí. Á mu numbáñúlá asndu nákha xúgi̱, rígi̱ gáʼni dí ikhiin maku̱mu̱ún xó má rey David, ikhaa niʼthí: ‹Nda̱wa̱a̱ i̱mba̱ ki xóo ikháán Jeobá, ní má nda̱a̱ i̱ʼwáʼ dí niguma xóo dí nitaniwíi ikháán› (Sal. 86:8). w23.03 25 kutriga̱ 16, 17