Jems

Jems Pas Em i Raitim

1 Mi Jems, mi wokboi bilong God na bilong Bikpela Jisas Krais, dispela pas i go long 12-pela lain i bin lusim ples na i go sindaun nabaut long planti hap.

Gude!

 2 Ol brata bilong mi, taim kain kain traim i kamap long yupela, yupela i mas tingim olsem em samting bilong amamas tru long en. 3 Yupela i save, bilip bilong yupela, em ol traim i mekim i kamap strong pinis, dispela kain bilip i save kamapim pasin bilong sanap strong. 4 Tasol yupela i mas larim pasin bilong sanap strong i inapim wok bilong en. Olsem bai yupela inap stap gutpela olgeta na inap tru long olgeta samting, na yupela i no sot long wanpela samting.

 5 Olsem na sapos wanpela bilong yupela i sot long savetingting, orait em i mas wok long askim God, na God bai givim long em. Long wanem, God i save amamas long givim planti samting long ol man na em i no save krosim ol taim em i mekim olsem. 6 Tasol dispela man i mas bilip na wok yet long askim, na em i no ken holim tupela tingting, nogat tru. Long wanem, man i gat tupela tingting em i olsem weiv bilong solwara em win i sakim i go i kam. 7 Tru tumas, dispela man i no ken ting em bai kisim wanpela samting long Jehova. 8 Tingting bilong dispela man i bruk nabaut. Long olgeta samting em i mekim em i save senisim nabaut tingting bilong em.

 9 Brata i no gat nem i ken amamas, long wanem, nau em i kisim bikpela namba, 10 na brata husat i maniman em i ken amamas long em i no gat biknem moa. Long wanem, maniman bai pinis olsem plaua bilong gras i save drai. 11 San i save kam antap na em i hat nogut tru na em i mekim gras i drai, na plaua bilong gras i save pundaun na naispela bilas bilong en i pinis. Olsem tasol gutpela sindaun bilong ol maniman bai pinis.

 12 Man husat i wok long sanap strong long taim bilong traim, em i ken amamas. Long wanem, taim God i orait long em, em bai kisim prais* bilong laip. Em prais Jehova i promis long givim long ol man husat i no lusim pasin bilong laikim em. 13 Taim traim i painim wanpela man, em i no ken tok: “God i traim mi.” Ol samting nogut i no inap traim God, na tu, God i no save traim man. 14 Tasol laik bilong bel bilong olgeta man wan wan i save traim ol, dispela laik i save giamanim ol na pulim ol. 15 Na taim dispela laik i stap long bel i kamap bikpela, em i save kamapim sin, na taim sin i kamap pinis, em i save bringim dai i kam.

 16 Yupela ol brata mi laikim tumas, yupela i no ken larim tingting bilong yupela yet i giamanim yupela. 17 Olgeta gutpela presen na olgeta presen i nambawan tru i kam long ples antap. Em i kam long Papa bilong ol lait bilong skai,* dispela Papa i no save senis senis olsem sedo i save senis senis. 18 Long laik bilong em yet, em i bin bringim yumi i kam long rot bilong tok i tru, bai yumi ken stap olsem namba 1 lain em i bin makim namel long ol manmeri em i bin wokim.

 19 Yupela ol brata mi laikim tumas, yupela i mas save long dispela samting. Olgeta man i mas putim yau kwik long harim tok, na ol i no ken hariap long mekim toktok. Na ol i no ken belhat hariap. 20 Long wanem, belhat bilong man i no save kamapim stretpela pasin God i laikim. 21 Olsem na rausim olgeta samting i no klin na pasin nogut, em dispela pasin i save kamap planti tumas. Na long pasin isi, yupela i mas larim God i planim tok bilong en long bel bilong yupela, em dispela tok inap kisim bek laip* bilong yupela.

 22 Tasol yupela i mas kamap ol man bilong bihainim tok, na no ken kamap man bilong harim nating tasol. Sapos yupela i harim nating tasol, yupela i larim ol tingting giaman i giamanim yupela yet. 23 Sapos wanpela em i man bilong harim nating tok na em i no man bilong bihainim tok, em i olsem wanpela man husat i lukim pes* bilong em yet long mira. 24 Em i lukim em yet na bihain em i go, na kwiktaim em i lusim tingting long em i wanem kain man. 25 Tasol man husat i lukluk gut long dispela lo i gutpela olgeta na i mekim man i kamap fri, na em i save mekim long olgeta taim, em bai amamas long em i mekim olsem. Long wanem, em i no man bilong harim nating tok na bihain lusim tingting long en, nogat. Em i kamap man bilong mekim wok.

 26 Sapos wanpela man i ting em i lotuim God, tasol em i no bosim gut maus bilong en, orait dispela man i giamanim bel bilong em yet na em i lotu nating tasol. 27 Pasin bilong mekim lotu i klin na i no gat doti long en long ai bilong God Papa bilong yumi i olsem: Yumi mas lukautim gut ol pikinini i no gat papamama na ol wido, na helpim ol long karim ol hevi bilong ol. Na yumi mas stap longwe olgeta long pasin doti bilong dispela graun.