මතෙව්
21 ඔවුහු යෙරුසලමට ළඟා වී, ඔලීව කන්දේ පිහිටි බෙත්පාගයට පැමිණියහ. යේසුස් ගෝලයන් දෙදෙනෙකුව යවමින්,+ 2 ඔවුන්ට මෙසේ කීවේය. “ඔබට පෙනෙන අර ගමට යන්න. ඔබ ඒ ගමට ඇතුල් වූ විට එහි බැඳ සිටින බූරුදෙනක හා ඌ සමඟ සිටින බූරු නාම්බෙකු ඔබට හමු වෙයි. උන්ව ලිහා මා වෙතට ගෙනෙන්න.+ 3 යමෙකු ඔබට කුමක් හෝ පැවසුවොත් ‘ස්වාමීන්ට උන්ව අවශ්‍ය වී තිබෙනවා’ කියා කියන්න. එවිට ඔහු වහාම උන්ව ගෙන යෑමට ඉඩහරියි.”
4 එය සිදු වූයේ අනාගතවක්තෘ මාර්ගයෙන් කියන ලද මේ දේ ඉටු වීම සඳහාය. එනම්, 5 “සියොන් දියණියට මෙසේ කියන්න, ‘බලන්න! ඔබේ රජ බූරුවෙකු පිට නැඟී, ඔබ වෙතට+ මෘදුකමින්+ යුතුව එන්නේය. එසේය, ඔහු බර අදින සතෙකුගේ පැටවෙකු එනම්, බූරු නාම්බෙකු පිට නැඟී එන්නේය.’”+
6 එහෙයින් ගෝලයෝ ගොස් යේසුස් ඔවුන්ට අණ කළ පරිදි කළෝය. 7 ඔවුහු බූරුදෙනද බූරු නාම්බාද ගෙනැවිත් උන් පිට තම පිටත වස්ත්‍ර දැමුවෝය. පසුව යේසුස් බූරු නාම්බා මත ඉඳගත්තේය.+ 8 සමූහයාගෙන් වැඩිදෙනෙකු තම පිටත වස්ත්‍ර මඟ දිගේ එළූ අතර+ අන් අය ගස්වල අතු කපා, ඒවා මඟ දිගේ තැබුවෝය.+ 9 ඔහුට ඉදිරියෙන් හා පසුපසින් ගමන් කළ සමූහයෝ, “දාවිත්ගේ පුත්‍රයාව+ ආරක්ෂා කරන්න!+ යෙහෝවා දෙවිගේ නාමයෙන් එන තැනැත්තාට ආශීර්වාද ලැබේවා!+ ඉතා උස් තැන්හි සිටින ඔබ ඔහුව ආරක්ෂා කරන්න”+ කියා මහත් හඬින් කීවෝය.
10 ඔහු යෙරුසලමට පැමිණි විට+ මුළු නුවරම කැලඹී, “මේ කවුද” කියා ඇසූහ. 11 “මේ ගලීලයේ නාසරෙත් නුවරෙහි අනාගතවක්තෘ+ වන යේසුස්” කියා සමූහයෝ පැවසූහ.
12 යේසුස් දේවමාලිගාවට ඇතුල් වී, එහි විකුණමින්ද මිල දී ගනිමින්ද සිටි සියල්ලන්ව එතැනින් පිටතට එළවා දමා මුදල් මාරු කරන්නන්ගේ මේසද පරෙවියන් විකුණමින් සිටි අයගේ බංකුද පෙරළා දමා,+ 13 “‘මාගේ ගෘහය යාච්ඤා ගෘහයක් ලෙස හඳුන්වනු ලබන්නේය’+ කියා ලියා තිබුණත් ඔබ එය කොල්ලකාරයන්ගේ ගුහාවක් කරනවා”+ කියා ඔවුන්ට කීවේය. 14 ඔහු දේවමාලිගාවේ සිටියදී අන්ධ හා කොර මිනිස්සු ඔහු වෙතට ආවෝය. ඔහු ඔවුන්ව සුව කළේය.
15 නායක පූජකයෝ සහ නීතිය පිටපත් කරන්නෝ ඔහු සිදු කළ විස්මයජනක ක්‍රියාද,+ “දාවිත්ගේ පුත්‍රයාව+ ආරක්ෂා කරන්න”+ කියා දේවමාලිගාවේ හඬ නඟමින් සිටි පිරිමි දරුවන්ද දැක උදහස් වූහ. 16 ඔවුහු ඔහුගෙන් මෙසේ ඇසූහ. “මොවුන් කියන දේ ඔබට ඇසෙනවාද?” එවිට යේසුස්, “ඔව්, මට ඇසෙනවා. ‘බිලිඳුන්ගේද කිරි බොන දරුවන්ගේද මුවින් ඔබ ප්‍රශංසාව ගෙන දී තිබේ’+ යන කොටස ඔබ කවදාවත් කියවා නැද්ද”+ කියා ඔවුන්ගෙන් ඇසුවේය. 17 ඉන්පසු ඔහු ඔවුන් වෙතින් ගොස් නුවරින් පිටත් වී බෙතානියෙහි රාත්‍රිය ගත කළේය.+
18 හිමිදිරි උදෑසනින්ම නැවත ඒ නුවරට යන අතරේ යේසුස්ට බඩගින්නක් දැනිණ.+ 19 අත්තික්කා ගසක් පාර ළඟ තිබෙනවා දුටු ඔහු ඒ අසලට ගියේය. නමුත් එහි කොළ පමණක් මිස වෙන කිසිවක් නොතිබුණු නිසා,+ “මෙතැන් පටන් කිසිදාක මේ ගසෙන් පල හටගන්නේ නැහැ”+ කියා ඔහු කීවේය. ඒ මොහොතේදීම අත්තික්කා ගස මැලවී ගියේය. 20 ගෝලයෝ එය දුටු විට, “මෙතරම් ඉක්මනින් අත්තික්කා ගස මැලවී ගියේ කොහොමද”+ කියා පුදුමයෙන් ඇසූහ. 21 එවිට යේසුස් ඔවුන්ට මෙසේ පිළිතුරු දුන්නේය. “ඇත්තෙන්ම මා ඔබට කියන්නේ, ඔබ කිසිම සැකයක් ඇති කරගන්නේ නැතුව+ විශ්වාසයකින් සිටියොත් මා අත්තික්කා ගසට කළ දේ ඔබටත් කරන්න හැකි වෙයි. ඒ විතරක් නොවෙයි, ඔබ මේ කන්දට, ‘මෙතැනින් ඉවත් වී මුහුදේ ගිලෙන්න’ කියා කීවොත් එයද සිදු වෙයි.+ 22 මෙයාකාරයට විශ්වාසයක් ඇතුව ඕනෑම දෙයක් ඔබ යාච්ඤාවෙන් ඉල්ලුවොත් ඒ දේ ඔබට ලැබෙයි.”+
23 ඔහු දේවමාලිගාවට ඇතුල් වී උගන්වමින් සිටියදී නායක පූජකයෝද ජනතාවගේ වැඩිමහල්ලෝද ඔහු වෙතට ඇවිත්,+ “ඔබට මේ දේවල් කරන්න අවසර තිබෙනවාද? කවුද ඔබට ඒ සඳහා අවසර දුන්නේ”+ කියා ඇසූහ. 24 එවිට යේසුස් ඔවුන්ට මෙසේ පිළිතුරු දුන්නේය. “මාත් ඔබෙන් යමක් අහන්න කැමතියි. ඔබ එයට පිළිතුරු දුන්නොත් මට මේ දේවල් කරන්න අවසර දුන්නේ කවුද කියා මමත් ඔබට කියන්නම්.+ 25 යොහන් මිනිසුන්ව බව්තීස්ම කළේ කාගේ අවසරයෙන්ද? දෙවිගේ අවසරයෙන්ද නැත්නම් මිනිසුන්ගේ අවසරයෙන්ද?”+ ඔවුහු තම තමන් අතරේ කතා කරගනිමින්, “අප ‘දෙවිගේ අවසරයෙන්’ කියා කිව්වොත්, ‘ඔබ ඔහුව විශ්වාස නොකළේ ඇයි’+ කියා ඔහු අපෙන් අසයි. 26 නමුත් ‘මිනිසුන්ගේ අවසරයෙන්’ කියා කීවොත් අපට සමූහයාගෙන් නම් බේරෙන්න ලැබෙන්නේ නැහැ.+ මන්ද මේ සියලුදෙනාම යොහන්ව සලකන්නේ අනාගතවක්තෘවරයෙකු ලෙසයි”+ කියා කීවෝය. 27 එහෙයින් ඔවුහු, “අපි දන්නේ නැහැ” කියා යේසුස්ට පිළිතුරු දුන්නෝය. එවිට ඔහු ඔවුන්ට මෙසේ කීවේය. “එසේනම් මා මේ දේවල් කරන්නේ කාගේ අවසරයෙන්ද කියා මමත් ඔබට කියන්නේ නැහැ.+
28 “ඔබ මේ ගැන සිතන්නේ කුමක්ද? එක්තරා මිනිසෙකුට දරුවන් දෙදෙනෙක් සිටියා.+ ඔහු පළමුවෙනි පුතා ළඟට ගොස්, ‘පුතාට පුළුවන්ද අද ගිහින් මිදිවත්තේ වැඩ කරන්න’ කියා ඇසුවා. 29 එවිට ඔහු, ‘පියාණෙනි, මම යන්නම්’+ කියා කිව්වත් ඔහු ගියේ නැහැ. 30 ඉන්පසු එම මිනිසා දෙවෙනි පුතා ළඟට ගොස් ඒ දේම ඇසුවා. ඔහු, ‘මට යන්න බැහැ’ කියා පැවසුවත් පසුව ඔහු තමන් කී දේ ගැන කනගාටු වී+ මිදිවත්තේ වැඩට ගියා. 31 ඒ දෙදෙනා අතරින් තම පියාගේ කැමැත්ත කළේ කවුද”+ කියා ඔහු ඔවුන්ගෙන් ඇසුවේය. ඔවුහු, “දෙවෙනි පුතා” කියා කීවෝය. යේසුස් ඔවුන්ට මෙසේ කීවේය. “ඇත්තෙන්ම මා ඔබට කියන්නේ, බදු එකතු කරන්නන් සහ ගණිකාවන් ඔබට පළමුවෙන් දෙවිගේ රාජ්‍යයට ඇතුල් වන බවයි. 32 මන්ද යොහන් ඔබට ධර්මිෂ්ඨ මාර්ගය+ පෙන්වමින් ඔබ වෙතට ආවත් ඔබ ඔහුව විශ්වාස කළේ නැහැ.+ එනමුත් බදු එකතු කරන්නන් සහ ගණිකාවන් ඔහුව විශ්වාස කළා.+ ඒ සියල්ල දුටුවත් ඔබ කළ දේ ගැන පසුතැවිලි වී ඔබ ඔහුව විශ්වාස කළේ නැහැ.
33 “තවත් උපමාවකට සවන් දෙන්න. මිදිවත්තක් වැවූ වතුහිමියෙක්+ සිටියා. ඔහු එය වටා වැටක් බැඳ, මිදි පෑගීම සඳහා එහි වළක් හාරා ටැඹක්ද ඉදි කර,+ එය වැවිලිකරුවන්ට බද්දට දී පිටරට ගියා.+ 34 පලදාව නෙළන කාලය පැමිණි විට බදු ලෙස තමාට අයිති පල ලබාගැනීමේ අදහසින් ඔහු වැවිලිකරුවන් වෙතට තමාගේ දාසයන්ව යැව්වා. 35 නමුත් වැවිලිකරුවන් ඔහුගේ දාසයන්ව අල්ලාගෙන එක් කෙනෙකුට තැළුවා. එක් කෙනෙකුව මරා දැමුවා. තවත් කෙනෙකුට ගල් ගැසුවා.+ 36 නැවතත් ඔහු පළමුවෙන් යැවූ ගණනට වඩා වැඩියෙන් වෙනත් දාසයන් පිරිසක්ව යැව්වා. නමුත් ඔවුන් ඒ පිරිසටත් කළේ ඒ දේමයි.+ 37 අන්තිමට ඔහු, ‘ඔවුන් මගේ පුත්‍රයාට ගරු කරයි’ කියා පවසමින් තම පුත්‍රයාව ඔවුන් වෙතට යැව්වා. 38 වැවිලිකරුවන් පුත්‍රයාව දැක තම තමන් අතරේ කතා කරගනිමින්, ‘මේ ඉන්නේ උරුමක්කාරයා.+ එන්න, අපි මොහුව මරා දමා මොහුගේ උරුමය ලබාගනිමු’+ කියා පැවසුවා. 39 එමනිසා ඔවුන් ඔහුව අල්ලාගෙන මිදිවත්තෙන් පිටතට ගෙන ගොස් මරා දැමුවා.+ 40 මිදිවත්තේ හිමිකරු පැමිණි විට ඔහු ඒ වැවිලිකරුවන්ට කුමක් කරයිද?” 41 ඔවුහු මෙසේ පිළිතුරු දුන්නෝය. “ඔවුන් නපුරු නිසා ඔහු ඔවුන් පිට දරුණු විනාශයක්+ ගෙනැවිත් නියම කාලයේදී තමන්ට පලදාව ලබා දෙන වෙනත් වැවිලිකරුවන්ට ඒ මිදිවත්ත බද්දට දෙයි.”+
42 යේසුස් ඔවුන්ට මෙසේ කීවේය. “‘ඉදි කරන්නන් ඉවත දැමූ ඒ ගල+ ප්‍රධාන ගල වී ඇත.+ එය යෙහෝවා දෙවි විසින්ම කළ මහත් ක්‍රියාවක්ය. අපේ ඇස්වලට එය අදහාගත නොහැකි තරම්ය’ යන දේ ඔබ ශුද්ධ ලියවිල්ලෙහි කවදාවත් කියවා නැද්ද? 43 එහෙයින් මා ඔබට කියන්නේ, දෙවිගේ රාජ්‍යය ඔබෙන් ගෙන රාජ්‍යය වෙනුවෙන් පල උපදවන වෙනත් ජාතියකට එය දෙනු ලබන බවයි.+ 44 මා සඳහන් කළ එම ගල පිට යම් කෙනෙක් වැටුණොත් ඔහු සුනුවිසුනු වී යයි. එය යමෙකු පිට වැටුණු විටද එය ඔහුව සුනුවිසුනු කර දමයි.”+
45 නායක පූජකයෝද පරිසිවරුද ඔහුගේ උපමා ඇසූ විට ඔහු තමන් ගැන කතා කරමින් සිටි බව තේරුම්ගත්තෝය.+ 46 ඔවුන් ඔහුව අල්ලාගන්න අවස්ථාවක් සොයමින් සිටියත් සමූහයන් ඔහුව අනාගතවක්තෘවරයෙකු ලෙස සැලකූ නිසා+ ඔවුහු ඒ සඳහා පියවර ගැනීමට බිය වූහ.