提摩太前書

3 人盡力符合資格做監督，就係嚮往美好嘅工作。呢句說話係真實可信嘅。 2 監督應該無可指責，只係做一個女人嘅丈夫，生活有節制，思想健全*，做事有條理，好客，具備教導嘅能力， 3 唔醉酒，唔粗暴*，通情達理，唔鍾意爭拗，唔貪愛錢財， 4 好好督導*自己嘅家，佢嘅仔女順服而且莊重認真*。 5 （人唔識得點樣督導*自己嘅家，又點照顧到上帝嘅會眾呢？） 6 監督唔應該係新近改信嘅，因為萬一佢驕傲自大，就會受到同魔鬼一樣嘅判決。 7 監督喺會眾以外都應該有好名聲*，以免受人指責*，落入魔鬼嘅圈套。

8 同樣，助理僕人應該莊重認真*，唔應該一口兩舌*，飲酒唔會失分寸*，唔貪圖利益*， 9 本住清白嘅良心，緊守信仰嘅神聖秘密。

10 呢啲人都應該先接受試驗，睇吓係咪合適*，如果無可指責，就可以俾佢哋做僕人。

11 同樣，女人應該莊重認真，唔誹謗人，生活有節制，事事忠信。

12 助理僕人應該只係做一個女人嘅丈夫，好好督導仔女同自己嘅家。 13 人好好執行職務，就贏得好名聲*，可以完全放膽發言*，講論關於基督耶穌嘅信仰。

14 雖然我希望好快可以去你嗰度，但係都寫呢啲說話俾你。 15 噉樣，萬一我遲咗去你嗰度，你都知道喺上帝嘅家應該點樣行事為人。呢個家就係真神*嘅會眾，係真理嘅棟梁同支柱。 16 虔誠*嘅真正意義實在係重大嘅神聖秘密：「佢*以肉身顯現，成為靈體而稱義*，喺天使面前出現，喺列國中受傳揚，喺世界上被人相信，被接去天上得到榮耀。」