ലൂക്കോസ്‌ എഴുതിയത്‌
8 അധികം വൈകാതെ യേശു ഒരു പ്രസംഗപര്യടനം ആരംഭിച്ചു. ദൈവരാജ്യത്തെക്കുറിച്ചുള്ള സന്തോഷവാർത്ത അറിയിച്ചുകൊണ്ട്‌ പന്ത്രണ്ടു പേരോടൊപ്പം* യേശു നഗരംതോറും ഗ്രാമംതോറും സഞ്ചരിച്ചു.+ 2 ദുഷ്ടാത്മാക്കളിൽനിന്നും* രോഗങ്ങളിൽനിന്നും മുക്തരായ ചില സ്‌ത്രീകളും യേശുവിനോടൊപ്പമുണ്ടായിരുന്നു. ഏഴു ഭൂതങ്ങൾ വിട്ട്‌ പോയ, മഗ്‌ദലക്കാരി എന്നു വിളിച്ചിരുന്ന മറിയയും+ 3 സൂസന്നയും ഹെരോദിന്റെ കാര്യസ്ഥനായ കൂസയുടെ ഭാര്യ യോഹന്നയും+ ഇക്കൂട്ടത്തിൽപ്പെടുന്നു. മറ്റ്‌ അനേകം സ്‌ത്രീകളും യേശുവിനോടൊപ്പമുണ്ടായിരുന്നു. അവരെല്ലാം അവരുടെ സ്വത്തുക്കൾകൊണ്ട്‌ അവരെ ശുശ്രൂഷിച്ചുപോന്നു.+
4 യേശുവിനോടൊപ്പം ഓരോ നഗരത്തിലേക്കും യാത്ര ചെയ്‌തിരുന്നവരെക്കൂടാതെ വലിയൊരു ജനക്കൂട്ടം അവിടെ വന്നുകൂടി. അപ്പോൾ ഒരു ദൃഷ്ടാന്തം ഉപയോഗിച്ച്‌ യേശു സംസാരിച്ചു:+ 5 “ഒരു വിതക്കാരൻ വിത്തു വിതയ്‌ക്കാൻ പോയി. വിതയ്‌ക്കുമ്പോൾ വിത്തുകളിൽ കുറെ വഴിയരികെ വീണു. ആളുകൾ അവയിൽ ചവിട്ടിനടന്നു, ആകാശത്തിലെ പക്ഷികൾ അവ തിന്നുകളഞ്ഞു.+ 6 ചിലതു പാറപ്പുറത്ത്‌ വീണു. അവ മുളച്ചെങ്കിലും നനവില്ലാത്തതുകൊണ്ട്‌ ഉണങ്ങിപ്പോയി.+ 7 മറ്റു ചിലതു മുൾച്ചെടികൾക്കിടയിൽ വീണ്‌ വളർന്നു. എന്നാൽ മുൾച്ചെടികളും ഒപ്പം വളർന്ന്‌ അവയെ ഞെരുക്കിക്കളഞ്ഞു.+ 8 വേറെ ചിലതു നല്ല മണ്ണിൽ വീണു. അവ മുളച്ച്‌ വളർന്ന്‌ 100 മേനി വിളവ്‌ നൽകി.”+ ഇതു പറഞ്ഞശേഷം യേശു, “കേൾക്കാൻ ചെവിയുള്ളവൻ കേൾക്കട്ടെ”+ എന്നു പറഞ്ഞു.
9 എന്നാൽ ഈ ദൃഷ്ടാന്തത്തിന്റെ അർഥം എന്താണെന്നു യേശുവിന്റെ ശിഷ്യന്മാർ ചോദിച്ചു.+ 10 അപ്പോൾ യേശു പറഞ്ഞു: “ദൈവരാജ്യത്തിന്റെ പാവനരഹസ്യങ്ങൾ മനസ്സിലാക്കാൻ നിങ്ങളെ അനുവദിച്ചിരിക്കുന്നു. പക്ഷേ മറ്റുള്ളവർക്ക്‌ അതെല്ലാം ദൃഷ്ടാന്തങ്ങളായിത്തന്നെ ഇരിക്കുന്നു.+ അവർ നോക്കുന്നുണ്ട്‌, പക്ഷേ അതുകൊണ്ട്‌ ഒരു കാര്യവുമില്ല. അവർ കേൾക്കുന്നുണ്ട്‌, പക്ഷേ അതുകൊണ്ട്‌ ഒരു ഗുണവുമില്ല. പറയുന്നതിന്റെ സാരം അവർ മനസ്സിലാക്കുന്നുമില്ല.+ 11 ദൃഷ്ടാന്തത്തിന്റെ അർഥം ഇതാണ്‌: വിത്ത്‌ ദൈവവചനം.+ 12 വഴിയരികെ വീണ വിത്തിന്റെ കാര്യമോ: ചിലർ ആ വചനം കേൾക്കുന്നെങ്കിലും അവർ വിശ്വസിച്ച്‌ രക്ഷ നേടാതിരിക്കാൻ പിശാച്‌ വന്ന്‌ അവരുടെ ഹൃദയങ്ങളിൽനിന്ന്‌ വചനം എടുത്തുകളയുന്നു.+ 13 പാറപ്പുറത്ത്‌ വീണ വിത്തിന്റെ കാര്യം: ചിലർ വചനം കേൾക്കുമ്പോൾ അതു സന്തോഷത്തോടെ സ്വീകരിക്കുന്നു. എന്നാൽ അവർക്കു വേരില്ല. അവർ അൽപ്പസമയത്തേക്കു വിശ്വസിക്കുന്നു. എന്നാൽ പരീക്ഷണങ്ങളുടെ സമയത്ത്‌ വീണുപോകുന്നു.+ 14 മുൾച്ചെടികൾക്കിടയിൽ വീണതോ: ചിലർ വചനം കേൾക്കുന്നെങ്കിലും ഈ ജീവിതത്തിലെ രസങ്ങളും+ ഉത്‌കണ്‌ഠകളും സമ്പത്തും+ അവരുടെ ശ്രദ്ധ പതറിക്കുന്നു. അവർ പാടേ ഞെരുങ്ങിപ്പോകുന്നതുകൊണ്ട്‌ പാകമായ ഫലം നൽകുന്നില്ല.+ 15 നല്ല മണ്ണിൽ വീണ വിത്തിന്റെ കാര്യമോ: ആത്മാർഥതയുള്ള നല്ലൊരു ഹൃദയത്തോടെ+ ദൈവവചനം കേട്ടിട്ട്‌ ഉള്ളിൽ സംഗ്രഹിക്കുകയും സഹിച്ചുനിന്ന്‌ ഫലം പുറപ്പെടുവിക്കുകയും ചെയ്യുന്നവരാണ്‌ അവർ.+
16 “ആരും വിളക്കു കത്തിച്ച്‌ അതു പാത്രംകൊണ്ട്‌ മൂടിവെക്കുകയോ കട്ടിലിനു കീഴെ വെക്കുകയോ ചെയ്യാറില്ലല്ലോ. അകത്ത്‌ വരുന്നവർക്കു വെളിച്ചം കിട്ടാൻ വിളക്കുതണ്ടിലല്ലേ വെക്കുക?+ 17 മറച്ചുവെച്ചിരിക്കുന്നതൊന്നും എന്നെന്നും മറഞ്ഞിരിക്കില്ല. ഒളിപ്പിച്ചുവെച്ചിരിക്കുന്നതൊന്നും പരസ്യമാകാതെയും വെളിച്ചത്തുവരാതെയും ഇരിക്കില്ല.+ 18 അതുകൊണ്ട്‌ നിങ്ങൾ എങ്ങനെ കേൾക്കുന്നു എന്നതിനു ശ്രദ്ധ കൊടുക്കുക. ഉള്ളവനു കൂടുതൽ കൊടുക്കും.+ എന്നാൽ ഇല്ലാത്തവന്റെ കൈയിൽനിന്ന്‌ തനിക്കുണ്ടെന്ന്‌ അയാൾ വിചാരിക്കുന്നതുംകൂടെ എടുത്തുകളയും.”+
19 യേശുവിനെ കാണാൻ അമ്മയും സഹോദരന്മാരും+ വന്നു. എന്നാൽ ജനക്കൂട്ടം കാരണം അവർക്ക്‌ യേശുവിന്റെ അടുത്ത്‌ ചെല്ലാൻ കഴിഞ്ഞില്ല.+ 20 അപ്പോൾ ചിലർ യേശുവിനോട്‌, “അങ്ങയെ കാണാൻ അമ്മയും സഹോദരന്മാരും പുറത്ത്‌ കാത്തുനിൽക്കുന്നു” എന്ന്‌ അറിയിച്ചു. 21 യേശുവോ അവരോട്‌, “ദൈവത്തിന്റെ വചനം കേട്ട്‌ അത്‌ അനുസരിക്കുന്ന ഇവരാണ്‌ എന്റെ അമ്മയും സഹോദരന്മാരും”+ എന്നു പറഞ്ഞു.
22 ഒരു ദിവസം യേശുവും ശിഷ്യന്മാരും ഒരു വള്ളത്തിൽ കയറി. യേശു അവരോട്‌, “നമുക്കു തടാകത്തിന്റെ അക്കരയ്‌ക്കു പോകാം” എന്നു പറഞ്ഞു. അവർ പുറപ്പെട്ടു.+ 23 യാത്രയ്‌ക്കിടെ യേശു ഉറങ്ങിപ്പോയി. അപ്പോൾ ഒരു വലിയ കൊടുങ്കാറ്റ്‌ ഉണ്ടായി. വള്ളത്തിൽ വെള്ളം കയറിത്തുടങ്ങി. വള്ളം മുങ്ങുമെന്നായി.+ 24 അതുകൊണ്ട്‌ അവർ ചെന്ന്‌, “ഗുരുവേ, ഗുരുവേ, നമ്മൾ ഇപ്പോൾ മരിക്കും” എന്നു പറഞ്ഞ്‌ യേശുവിനെ ഉണർത്തി. യേശു എഴുന്നേറ്റ്‌ കാറ്റിനെയും ശക്തമായ തിരകളെയും ശാസിച്ചു. അവ അടങ്ങി. എല്ലാം ശാന്തമായി.+ 25 പിന്നെ യേശു അവരോട്‌, “നിങ്ങളുടെ വിശ്വാസമൊക്കെ എവിടെപ്പോയി” എന്നു ചോദിച്ചു. എന്നാൽ അവർ ആകെ പേടിച്ചുപോയിരുന്നു. അതിശയത്തോടെ അവർ തമ്മിൽത്തമ്മിൽ ചോദിച്ചു: “ശരിക്കും ഇത്‌ ആരാണ്‌? ഇദ്ദേഹം കാറ്റിനോടും വെള്ളത്തോടും പോലും കല്‌പിക്കുകയും അവ അനുസരിക്കുകയും ചെയ്യുന്നല്ലോ?”+
26 പിന്നീട്‌ അവർ ഗലീലയ്‌ക്കു മറുകരെയുള്ള ഗരസേന്യരുടെ+ നാട്ടിൽ വള്ളം അടുപ്പിച്ചു. 27 യേശു കരയ്‌ക്ക്‌ ഇറങ്ങിയപ്പോൾ നഗരത്തിൽനിന്നുള്ള ഭൂതബാധിതനായ ഒരു മനുഷ്യൻ യേശുവിന്‌ എതിരെ വന്നു. ഏറെക്കാലമായി അയാൾ വസ്‌ത്രം ധരിച്ചിരുന്നില്ല. വീട്ടിൽ താമസിക്കാതെ ശവക്കല്ലറകൾക്കിടയിലായിരുന്നു അയാളുടെ വാസം.+ 28 യേശുവിനെ കണ്ടപ്പോൾ അയാൾ അലറിവിളിച്ചുകൊണ്ട്‌ യേശുവിന്റെ മുന്നിൽ വീണു. അയാൾ ഇങ്ങനെ വിളിച്ചുപറഞ്ഞു: “അത്യുന്നതദൈവത്തിന്റെ പുത്രനായ യേശുവേ, അങ്ങ്‌ എന്തിനാണ്‌ എന്റെ കാര്യത്തിൽ ഇടപെടുന്നത്‌? ദയവുചെയ്‌ത്‌ എന്നെ ഉപദ്രവിക്കരുതേ.”+ 29 (ആ മനുഷ്യനിൽനിന്ന്‌ പുറത്ത്‌ വരാൻ യേശു അശുദ്ധാത്മാവിനോടു* കല്‌പിച്ചതായിരുന്നു കാരണം. പല പ്രാവശ്യം ആ അശുദ്ധാത്മാവ്‌ അയാളെ ബാധിച്ചിരുന്നു.*+ എത്ര വട്ടം വിലങ്ങും ചങ്ങലകളും ഇട്ട്‌ ബന്ധിച്ച്‌ കാവലിൽ സൂക്ഷിച്ചിട്ടും അതെല്ലാം തകർത്ത അയാളെ ഭൂതം ഒറ്റപ്പെട്ട സ്ഥലങ്ങളിലേക്കു കൊണ്ടുപോകാറുണ്ടായിരുന്നു.) 30 യേശു അയാളോട്‌, “നിന്റെ പേര്‌ എന്താണ്‌” എന്നു ചോദിച്ചപ്പോൾ, “ലഗ്യോൻ” എന്ന്‌ അയാൾ പറഞ്ഞു. കാരണം അനേകം ഭൂതങ്ങൾ അയാളിൽ കടന്നിരുന്നു. 31 അഗാധത്തിലേക്കു പോകാൻ തങ്ങളോടു കല്‌പിക്കരുതെന്ന്‌ അവ യേശുവിനോട്‌ അപേക്ഷിച്ചുകൊണ്ടിരുന്നു.+ 32 അവിടെ മലയിൽ വലിയൊരു പന്നിക്കൂട്ടം+ മേയുന്നുണ്ടായിരുന്നു. അവയിൽ കടക്കാൻ തങ്ങളെ അനുവദിക്കണമെന്ന്‌ അവ യേശുവിനോടു കേണപേക്ഷിച്ചു. യേശു അനുവാദം കൊടുത്തു.+ 33 ആ മനുഷ്യനിൽനിന്ന്‌ പുറത്ത്‌ വന്ന ഭൂതങ്ങൾ പന്നിക്കൂട്ടത്തിൽ കടന്നു. പന്നികൾ വിരണ്ടോടി ചെങ്കുത്തായ സ്ഥലത്തുനിന്ന്‌ തടാകത്തിലേക്കു ചാടി. അവയെല്ലാം മുങ്ങിച്ചത്തു. 34 അവയെ മേയ്‌ച്ചിരുന്നവർ ഇതു കണ്ടിട്ട്‌ ഓടിച്ചെന്ന്‌ നഗരത്തിലും നാട്ടിൻപുറത്തും വിവരം അറിയിച്ചു.
35 സംഭവിച്ചത്‌ എന്താണെന്ന്‌ അറിയാൻ ആളുകൾ വന്നു. അവർ യേശുവിന്റെ അടുത്ത്‌ എത്തിയപ്പോൾ ഭൂതങ്ങൾ വിട്ട്‌ പോയ മനുഷ്യൻ വസ്‌ത്രം ധരിച്ച്‌ സുബോധത്തോടെ യേശുവിന്റെ കാൽക്കൽ ഇരിക്കുന്നതു+ കണ്ടു. അവർക്ക്‌ ആകെ പേടിയായി. 36 സംഭവം നേരിൽ കണ്ടവർ, ഭൂതബാധിതനായ മനുഷ്യൻ സുഖം പ്രാപിച്ചത്‌* എങ്ങനെയെന്ന്‌ അവർക്കു വിവരിച്ചുകൊടുത്തു. 37 ഗരസേന്യദേശത്തെ കുറെ ആളുകൾ ചെന്ന്‌ യേശുവിനോട്‌ അവരുടെ നാട്ടിൽനിന്ന്‌ പോകണമെന്നു പറഞ്ഞു. കാരണം അവർ ആകെ പേടിച്ചുപോയിരുന്നു. അപ്പോൾ യേശു അവിടെനിന്ന്‌ പോകാൻവേണ്ടി വള്ളത്തിൽ കയറി. 38 പക്ഷേ ഭൂതങ്ങൾ വിട്ട്‌ പോയ മനുഷ്യൻ തന്നെയും കൂടെ കൊണ്ടുപോകണമെന്നു യേശുവിനോടു യാചിച്ചുകൊണ്ടിരുന്നു. എന്നാൽ യേശു ഇങ്ങനെ പറഞ്ഞ്‌ അയാളെ തിരിച്ചയച്ചു:+ 39 “നീ വീട്ടിലേക്കു പൊയ്‌ക്കൊള്ളൂ! എന്നിട്ട്‌ ദൈവം നിനക്കു ചെയ്‌തുതന്നതൊക്കെ മറ്റുള്ളവരെ അറിയിക്കുക.” അങ്ങനെ, അയാൾ പോയി യേശു അയാൾക്കു ചെയ്‌തുകൊടുത്ത കാര്യങ്ങൾ നഗരത്തിലെങ്ങും പ്രസിദ്ധമാക്കി.
40 യേശു തിരിച്ചെത്തിയപ്പോൾ ജനക്കൂട്ടം യേശുവിനെ സന്തോഷത്തോടെ സ്വീകരിച്ചു. എല്ലാവരും യേശുവിനെ കാത്തിരിക്കുകയായിരുന്നു.+ 41 അപ്പോൾ യായീറൊസ്‌ എന്നൊരാൾ അവിടെ വന്നു. സിനഗോഗിന്റെ അധ്യക്ഷന്മാരിൽ ഒരാളായിരുന്ന അയാൾ യേശുവിന്റെ കാൽക്കൽ വീണ്‌ അയാളുടെ വീട്ടിൽ ചെല്ലണമെന്ന്‌ അപേക്ഷിച്ചു.+ 42 യായീറൊസിന്റെ ഒരേ ഒരു മകൾ അത്യാസന്നനിലയിലായിരുന്നു. അവൾക്ക്‌ ഏകദേശം 12 വയസ്സുണ്ടായിരുന്നു.
യേശു പോകുമ്പോൾ ജനക്കൂട്ടം യേശുവിനെ തിക്കിക്കൊണ്ടിരുന്നു. 43 രക്തസ്രാവം+ കാരണം 12 വർഷമായി കഷ്ടപ്പെട്ടിരുന്ന ഒരു സ്‌ത്രീ അക്കൂട്ടത്തിലുണ്ടായിരുന്നു. ആർക്കും ആ സ്‌ത്രീയെ സുഖപ്പെടുത്താൻ കഴിഞ്ഞിരുന്നില്ല.+ 44 ആ സ്‌ത്രീ യേശുവിന്റെ പുറകിലൂടെ ചെന്ന്‌ പുറങ്കുപ്പായത്തിന്റെ അറ്റത്ത്‌* തൊട്ടു.+ അപ്പോൾത്തന്നെ അവരുടെ രക്തസ്രാവം നിലച്ചു. 45 അപ്പോൾ യേശു, “ആരാണ്‌ എന്നെ തൊട്ടത്‌” എന്നു ചോദിച്ചു. എല്ലാവരും ‘ഞാനല്ല’ എന്നു പറഞ്ഞു. പത്രോസ്‌ യേശുവിനോട്‌, “ഗുരുവേ, എത്രയോ ആളുകളാണ്‌ അങ്ങയെ തിക്കുന്നത്‌”+ എന്നു പറഞ്ഞു. 46 എന്നാൽ യേശു പറഞ്ഞു: “ആരോ എന്നെ തൊട്ടു. കാരണം എന്നിൽനിന്ന്‌ ശക്തി+ പുറപ്പെട്ടതു ഞാൻ അറിഞ്ഞു.” 47 ഇനിയൊന്നും മറച്ചുവെച്ചിട്ടു കാര്യമില്ലെന്നു മനസ്സിലാക്കിയ സ്‌ത്രീ വിറച്ചുകൊണ്ട്‌ ചെന്ന്‌ യേശുവിന്റെ കാൽക്കൽ വീണു. എന്നിട്ട്‌ യേശുവിനെ തൊട്ടത്‌ എന്തിനാണെന്നും ഉടൻതന്നെ രോഗം മാറിയത്‌ എങ്ങനെയെന്നും എല്ലാവരും കേൾക്കെ വെളിപ്പെടുത്തി. 48 എന്നാൽ യേശു ആ സ്‌ത്രീയോടു പറഞ്ഞു: “മകളേ, നിന്റെ വിശ്വാസമാണു നിന്നെ സുഖപ്പെടുത്തിയത്‌.* സമാധാനത്തോടെ പൊയ്‌ക്കൊള്ളൂ.”+
49 യേശു സംസാരിച്ചുകൊണ്ടിരിക്കുമ്പോൾ സിനഗോഗിലെ അധ്യക്ഷന്റെ വീട്ടിൽനിന്ന്‌ ഒരാൾ വന്ന്‌ പറഞ്ഞു: “മോൾ മരിച്ചുപോയി. ഇനി, ഗുരുവിനെ ബുദ്ധിമുട്ടിക്കേണ്ടാ.”+ 50 ഇതു കേട്ട്‌ യേശു യായീറൊസിനോടു പറഞ്ഞു: “പേടിക്കേണ്ടാ, വിശ്വസിച്ചാൽ മാത്രം മതി. അവൾ രക്ഷപ്പെടും.”+ 51 വീട്ടിൽ എത്തിയപ്പോൾ തന്റെകൂടെ അകത്തേക്കു കയറാൻ പത്രോസിനെയും യോഹന്നാനെയും യാക്കോബിനെയും പെൺകുട്ടിയുടെ മാതാപിതാക്കളെയും അല്ലാതെ മറ്റാരെയും യേശു അനുവദിച്ചില്ല. 52 ആളുകളെല്ലാം അവളെച്ചൊല്ലി വിലപിക്കുകയും നെഞ്ചത്തടിച്ച്‌ കരയുകയും ചെയ്യുകയായിരുന്നു. യേശു അവരോടു പറഞ്ഞു: “കരയേണ്ടാ!+ അവൾ മരിച്ചിട്ടില്ല, ഉറങ്ങുകയാണ്‌.”+ 53 ഇതു കേട്ട്‌ അവർ യേശുവിനെ കളിയാക്കിച്ചിരിക്കാൻതുടങ്ങി. കാരണം, അവൾ മരിച്ചുപോയെന്ന്‌ അവർക്ക്‌ അറിയാമായിരുന്നു. 54 യേശു അവളുടെ കൈപിടിച്ച്‌, “കുഞ്ഞേ, എഴുന്നേൽക്കൂ!”*+ എന്നു പറഞ്ഞു. 55 അപ്പോൾ അവൾക്കു ജീവൻ തിരിച്ചുകിട്ടി.+ ഉടനെ അവൾ എഴുന്നേറ്റു.+ അവൾക്ക്‌ എന്തെങ്കിലും കഴിക്കാൻ കൊടുക്കാൻ യേശു പറഞ്ഞു. 56 അവളുടെ മാതാപിതാക്കൾക്കു സന്തോഷം അടക്കാനായില്ല. എന്നാൽ, സംഭവിച്ചത്‌ ആരോടും പറയരുതെന്നു യേശു അവരോടു കല്‌പിച്ചു.+