Ho Ea ka Matheu

17 Joale, meloko eohle, ho tloha ho Abrahama ho fihlela ho Davida e ne e le meloko e leshome le metso e mene, ’me ho tloha ho Davida ho fihlela nakong ea ho lelekeloa Babylona e ne e le meloko e leshome le metso e mene, ’me ho tloha nakong ea ho lelekeloa Babylona ho fihlela ho Kreste e ne e le meloko e leshome le metso e mene.

18 Empa tsoalo ea Jesu Kreste e ne e le ka tsela ena. Nakong eo ho neng ho tšepisitsoe+ hore Maria ’m ’ae o tla nyalana le Josefa, o ile a fumanoa a imme ka moea o halalelang+ pele ba kopana. 19 Leha ho le joalo, monna oa hae Josefa, kahobane o ne a lokile ’me a sa batle ho mo etsa sebonoang,+ a rera ho mo hlala+ ka sephiri. 20 Empa ka mor’a hore a nahanisise ka lintho tsena, bonang! lengeloi la Jehova la bonahala ho eena torong, le re: “Josefa, mora oa Davida, u se ke ua tšaba ho isa Maria mosali oa hao lapeng, etsoe se emotsoeng ka ho eena se teng ka moea o halalelang.+ 21 O tla tsoala mora, ’me u tla mo reha lebitso la Jesu,+ etsoe o tla pholosa+ batho ba habo+ libeng tsa bona.”+ 22 Sena sohle se ile sa etsahala hore ho phethahale se ileng sa buuoa ke Jehova+ ka moprofeta+ oa hae, ha a re: 23 “Bonang! Moroetsana+ o tla ima ’me o tla tsoala mora, ba tla mo reha lebitso la Emanuele,”+ leo ha le fetoleloa, le bolelang, “Molimo O Na Le Rōna.”+

24 Joale Josefa a tsoha borokong ba hae ’me a etsa kamoo lengeloi la Jehova le neng le mo laetse kateng, ’me a isa mosali oa hae lapeng. 25 Empa ha aa ka a kopanela liphate+ le eena ho fihlela a tsoetse mora;+ eaba o mo reha lebitso la Jesu.+

2 Ka mor’a hore Jesu a tsoalloe Bethlehema+ ea Judea matsatsing a Morena Heroda,+ bonang! linohe tsa linaleli+ tse tsoang likarolong tse ka bochabela tsa tla Jerusalema, 2 li re: “O kae ea tsoetsoeng e le morena+ oa Bajuda? Etsoe re ile ra bona naleli+ ea hae ha re ne re le ka bochabela, ’me re tlil’o mo inamela.” 3 Ha Morena Heroda a utloa sena a ferekana, hammoho le Jerusalema eohle; 4 ’me ha a bokella baprista bohle ba ka sehloohong le bangoli ba sechaba a qala ho ba botsisisa hore na Kreste o ne a lokela ho tsoalloa hokae. 5 Ba re ho eena: “Bethlehema+ ea Judea; etsoe ke ka mokhoa oo ho ngoliloeng ka oona ka moprofeta, 6 ‘’Me uena, Bethlehema+ oa naha ea Juda, ho hang ha u motse o nyatsehang haholo har’a babusisi ba Juda; kaha ho uena ho tla tsoa ea busang,+ ea tla lisa+ sechaba sa ka, sa Iseraele.’”

7 Joale Heroda ka sephiri a bitsa linohe tsa linaleli ’me ka hloko a netefatsa ho tsona nako ea ho bonahala ha naleli eo; 8 ’me, ha a li romela Bethlehema, a re: “E-eang le batle ka hloko ngoana eo e monyenyane, ’me ha le mo fumane le khutle le ntlalehele, e le hore le ’na nka ea ’me ka mo inamela.”+ 9 Ha li utloile morena, tsa tsamaea; ’me, bonang! naleli eo li neng li e bone ha li ne li le ka bochabela+ ea li etella pele, ho fihlela e ema holim ’a moo ngoana eo e monyenyane a neng a le teng. 10 Ha li bona naleli tsa thaba haholo ka sebele. 11 ’Me ha li kena ka tlung tsa bona ngoana e monyenyane le ’m ’ae Maria, ’me, ha li itihela fatše, tsa mo inamela. Hape tsa bula matlotlo a tsona ’me tsa mo neha limpho, khauta le libano tse tšoeu le myra. 12 Leha ho le joalo, kahobane li ile tsa fuoa temoso+ ea bomolimo torong hore li se ke tsa khutlela ho Heroda, tsa tloha tsa ea naheng ea habo tsona ka tsela e ’ngoe.

13 Ka mor’a hore li tlohe, bonang! lengeloi+ la Jehova la bonahala ho Josefa torong, le re: “Tsoha, u nke ngoana e monyenyane le ’m ’ae u balehele Egepeta, ’me u lule moo ho fihlela ke u laela; etsoe Heroda o haufi le ho batla ngoana eo e monyenyane hore a mo timetse.” 14 Kahoo a tsoha ’me a nka ngoana e monyenyane le ’m ’ae bosiu ’me a tloha ho ea Egepeta, 15 ’me a lula moo ho fihlela Heroda a shoa, hore ho phethahale+ se ileng sa buuoa ke Jehova ka moprofeta oa hae, ha a re: “Ke bitsitse mora oa ka Egepeta.”+

16 Joale Heroda, ha a bona hore linohe tsa linaleli li mo sebelitse ka mano, a halefa haholo, eaba oa romeletsa ’me o etsa hore bashanyana bohle ba Bethlehema le literekeng tsohle tsa eona ba bolaoe, ho tloha ho ba lilemo tse peli le ka tlaase, ho ea ka nako eo a neng a e netefalitse ka hloko ho linohe tsa linaleli.+ 17 Joale ha phethahala se ileng sa buuoa ka moprofeta Jeremia, ha a re: 18 “Lentsoe le utloahetse Rama,+ ho lla le ho bokolla haholo; e ne e le Ragele+ a llela bana ba hae, ’me a sa rate ho tšeliseha, kahobane ha ba sa le eo.”

19 Ha Heroda a se a shoele, bonang! lengeloi la Jehova la bonahala ho Josefa torong+ Egepeta 20 ’me la re: “Tsoha, u nke ngoana e monyenyane le ’m ’ae ’me u tsamaee u kene naheng ea Iseraele, kaha ba neng ba batla moea oa ngoana e monyenyane ba shoele.” 21 Kahoo a ema a nka ngoana e monyenyane le ’m ’ae ’me a kena naheng ea Iseraele. 22 Empa ha a utloa hore Arkelause o ne a busa e le morena oa Judea sebakeng sa ntat’ae Heroda, a tšaba ho tloha ho ea moo. Ho feta moo, kaha o ne a filoe temoso ea bomolimo torong,+ a tloha ho ea kena sebakeng sa Galilea,+ 23 eaba oa tla ’me o lula motseng o bitsoang Nazaretha,+ e le hore ho ka phethahala se ileng sa buuoa ka baprofeta: “O tla bitsoa Monazaretha.”+

3 Matsatsing ao Johanne Mokolobetsi+ a tla a bolela lefeelleng+ la Judea, 2 a re: “Bakang,+ kaha ’muso oa maholimo o atametse.”+ 3 Enoa, ha e le hantle, ke eo ho builoeng ka eena ka moprofeta+ Esaia ka mantsoe ana: “Mamelang! E mong oa hoeletsa lefeelleng, ‘Lokisang+ tsela ea Jehova! Otlollang mebila ea hae.’” 4 Empa Johanne o ne a apere liaparo tsa boea+ ba kamele ’me a itlamme lethekeng ka senyepa+ sa letlalo; lijo tsa hae le tsona e ne e le litsie+ le mahe a linotši+ a naheng. 5 Joale Jerusalema le Judea eohle le naha eohle e potolohileng Jordane ea leba ho eena, 6 ’me batho ba kolobetsoa ke eena Nōkeng ea Jordane,+ ba bolela libe tsa bona pepenene.

7 Ha a re heli! ’me a bona Bafarisi le Basaduse+ ba bangata ba tla kolobetsong, a re ho bona: “Lōna malinyane a bo-marabe,+ ke mang ea le tsebisitseng hore le balehele khalefo+ e tlang? 8 Kahoo joale hlahisang litholoana tse tšoanelang pako;+ 9 ’me le se ke la ithetsa ka ho ipolella ho re, ‘Ntat’a rōna ke Abrahama.’+ Etsoe ke re ho lōna Molimo o khona ho hlahisetsa Abrahama+ bana ka majoe ana. 10 Selepe+ se se se le metsong ea lifate; joale, sefate se seng le se seng se sa hlahiseng litholoana tse ntle se tla rengoa+ ’me se lahleloe mollong.+ 11 ’Na, ke le kolobetsa ka metsi+ ka lebaka la pako+ ea lōna; empa ea tlang+ ka mor’a ka o matla ho mpheta, eo ke sa tšoaneleheng ho mo rōlisa+ meqathatso. Eo o tla le kolobetsa ka moea o halalelang+ le ka mollo.+ 12 Kharafu ea hae ea ho olōsa e letsohong la hae, ’me o tla hloekisa seotlo sa hae ka ho feletseng, ’me o tla bokellela koro ea hae ka tlung ea polokelo,+ empa ’mōkō o tla o chesa+ ka mollo o ke keng oa tima.”

13 Joale Jesu a tsoa Galilea+ a tla Jordane ho Johanne, e le hore a kolobetsoe+ ke eena. 14 Empa Johanne a leka ho mo thibela, a re: “Ke ’na ea hlokang ho kolobetsoa ke uena, ’me uena u tla ho ’na?” 15 Ha Jesu a araba a re ho eena: “Tlohela ho be joalo, lekhetlong lena, etsoe ka tsela eo ho re loketse ho phetha sohle se lokileng.”+ Joale a khaotsa ho mo thibela. 16 Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha,+ ’me a bona moea oa Molimo o theoha joaloka leeba+ o tla holim ’a hae.+ 17 Bonang! Hape, ha e-ba le lentsoe+ le tsoang maholimong le reng: “Enoa ke Mora+ oa ka, ea ratoang,+ eo ke mo amohetseng.”+

4 Joale Jesu a isoa ke moea lefeelleng+ ho ea lekoa+ ke Diabolose. 2 Ka mor’a hore a itime lijo ka matsatsi a mashome a mane le masiu+ a mashome a mane, joale a ikutloa a lapile. 3 Hape, Moleki+ a tla ’me a re ho eena: “Haeba u mora oa Molimo,+ bolella majoe ana hore a fetohe mahobe.” 4 Empa ha a araba a re: “Ho ngoliloe, ‘Motho a ke ke a phela ka bohobe feela, empa o tla phela ka polelo e ’ngoe le e ’ngoe e tsoang molomong oa Jehova.’”+

5 Joale Diabolose a tsamaea le eena ho kena motseng+ o halalelang, ’me a mo emisa holim ’a tora ea tempele 6 eaba o re ho eena: “Haeba u mora oa Molimo, itihele fatše;+ etsoe ho ngoliloe, ‘O tla laela mangeloi a hae malebana le uena, ’me a tla u kakasa ka matsoho, e le hore ho se ke ha e-ba le nako eo ka eona leoto la hao le ka khoptjoang ke lejoe.’”+ 7 Jesu a re ho eena: “Ho boetse ho ngoliloe, ‘U se ke ua leka Jehova Molimo oa hao.’”+

8 Diabolose a boela a tsamaea le eena ho ea thabeng e phahameng ka ho sa tloaelehang, a mo bontša mebuso eohle ea lefatše+ le khanya ea eona, 9 ’me a re ho eena: “Lintho tsena tsohle ke tla u+ fa tsona haeba u ka itihela fatše ’me ua nketsetsa ketso ea borapeli.”+ 10 Joale Jesu a re ho eena: “Tloha, Satane! Etsoe ho ngoliloe, ‘Ke Jehova Molimo oa hao eo u tla mo rapela,+ ’me ke eena feela+ eo u tla mo etsetsa tšebeletso e halalelang.’”+ 11 Joale Diabolose a mo tlohela,+ ’me, bonang! mangeloi a tla ’me a qala ho mo sebeletsa.+

12 Joale ha a utloa hore Johanne o tšoeroe,+ a tloha a kena Galilea.+ 13 Ho ekelletsa moo, ka mor’a hore a tlohe Nazaretha, a tla ’me a lula Kapernauma+ ka thōko ho leoatle literekeng tsa Zabulone le Nefthali,+ 14 e le hore ho ka phethahala se ileng sa buuoa ka moprofeta Esaia, ha a re: 15 “Lōna naha ea Zabulone le naha ea Nefthali, pel’a tsela ea leoatle, ka lehlakoreng le leng la Jordane, Galilea+ ea lichaba! 16 batho ba lutseng lefifing+ ba ile ba bona leseli le leholo,+ ha e le ba lutseng sebakeng sa moriti oa lefu, leseli+ le ile la ba chabela.”+ 17 Ho tloha ka nako eo ho ea pele Jesu a qala ho bolela ’me a re: “Bakang,+ kaha ’muso+ oa maholimo o atametse.”

18 Ha a tsamaea haufi le leoatle la Galilea a bona bara ba motho ba babeli, Simone+ ea bitsoang Petrose+ le Andrease mor’abo, ba theolela letlooa la ho tšoasa litlhapi ka leoatleng, kaha e ne e le batšoasi ba litlhapi. 19 A re ho bona: “Ntšaleng morao, ’me ke tla le etsa batšoasi ba batho.”+ 20 Hang-hang ha ba tlohela matlooa,+ ba mo latela. 21 Hape ha a fetela pele ho tloha moo a bona ba bang+ ba babeli bao e neng e le bara ba motho, Jakobo mora oa Zebedea+ le Johanne mor’abo, ka sekepeng ba e-na le ntat’a bona Zebedea, ba lokisa matlooa a bona, eaba oa ba bitsa. 22 Hang-hang ha ba siea sekepe ’me ba siea ntat’a bona, ba mo latela.

23 Joale a potoloha+ ho pholletsa le Galilea+ eohle, a ruta ka lisynagogeng+ tsa bona le ho bolela litaba tse molemo tsa ’muso le ho phekola lefu+ la mofuta o mong le o mong le mefokolo ea mofuta o mong le o mong har’a batho. 24 Tlaleho e mabapi le eena ea kena Syria+ eohle; ’me ba mo tlisetsa bohle ba eang hampe,+ ba leng mahlomoleng ke mafu a sa tšoaneng le litlhokofatso, ba nang le bademona le ba tšoeroeng ke sethoathoa+ le batho ba shoeleng litho, ’me a ba phekola. 25 Ka lebaka leo bongata bo boholo ba mo latela ho tsoa Galilea+ le Dekapolise le Jerusalema+ le Judea le ho tsoa ka lehlakoreng le leng la Jordane.

5 Ha a bona bongata a nyolohela thabeng; ’me ka mor’a hore a lule fatše barutuoa ba hae ba tla ho eena; 2 eaba o ahlamisa molomo ’me o qala ho ba ruta, o re:

3 “Ho thaba ba elang hloko tlhoko+ ea bona ea moea, kaha ’muso oa maholimo ke oa bona.+

4 “Ho thaba ba siameng, kaha ba tla tšelisoa.+

5 “Ho thaba ba maikutlo a bonolo,+ kaha ba tla rua lefatše.+

6 “Ho thaba ba lapelang le ho nyoreloa+ ho loka, kaha ba tla khorisoa.+

7 “Ho thaba ba mohau,+ kaha ba tla bontšoa mohau.

8 “Ho thaba ba lipelo li hloekileng,+ kaha ba tla bona Molimo.+

9 “Ho thaba ba nang le khotso,+ kaha ba tla bitsoa ‘bara+ ba Molimo.’

10 “Ho thaba ba hlorisitsoeng+ ka lebaka la ho loka, kaha ’muso oa maholimo ke oa bona.

11 “Ho thaba lōna ha batho ba le nyelisa+ ’me ba le hlorisa+ ’me ka leshano ba bua ntho ea mofuta o mong le o mong e khopo ka lōna ka lebaka la ka. 12 Thabang ’me le tlōle ke thabo,+ kaha moputso+ oa lōna o moholo maholimong; etsoe ba ile ba hlorisa baprofeta+ ka tsela eo pele ho lōna.

13 “Le letsoai+ la lefatše; empa haeba letsoai le tapa, botsoai ba lona bo tla khutlisoa joang? Le ke ke la hlola le sebelisetsoa letho haese ho lahleloa ka ntle+ hore le hatakeloe ke batho.

14 “Le leseli la lefatše.+ Motse o ke ke oa pateha ha o lutse holim ’a thaba. 15 Batho ba bonesa lebone ’me ha ba le behe ka tlas’a baskete e lekanyang,+ empa ba le beha holim ’a seluloana sa lebone, ’me le khanyetsa bohle ba ka tlung. 16 Ka ho tšoanang leseli+ la lōna le ke le khanye ka pel’a batho, e le hore ba ka bona mesebetsi ea lōna e metle+ ’me ba tlotlisa+ Ntat’a lōna ea maholimong.

17 “Le se ke la nahana hore ke tlil’o felisa Molao+ kapa Baprofeta. Ha kea tlela ho felisa, empa ho phethahatsa;+ 18 etsoe kannete ke re ho lōna leholimo le lefatše li ne li tla feta+ kapele ho e-na le hore ho hang tlhaku e le ’ngoe e nyenyane ka ho fetisisa kapa phatsa e le ’ngoe ea tlhaku e tlohe Molaong ’me lintho tsohle li sa etsahale.+ 19 Ka hona, mang kapa mang ea tlōlang+ e ’ngoe ea litaelo tsena tse nyenyane ’me a ruta moloko oa batho ho etsa seo, o tla bitsoa ‘e monyenyane’ kamanong le ’muso oa maholimo.+ Ha e le mang kapa mang ea li etsang le ho li ruta,+ enoa o tla bitsoa ‘e moholo’+ kamanong le ’muso oa maholimo. 20 Etsoe ke re ho lōna haeba ho loka ha lōna ho sa ate ho feta ha bangoli le Bafarisi,+ ho hang le ke ke la kena+ ’musong oa maholimo.

21 “Le utloile hore ho itsoe ho ba linakong tsa boholo-holo, ‘U se ke ua bolaea;+ empa mang kapa mang ea bolaeang+ o tla ikarabella lekhotleng la toka.’+ 22 Leha ho le joalo, ke re ho lōna e mong le e mong ea tsoelang pele a halefetse+ mor’abo o tla ikarabella+ lekhotleng la toka; empa mang kapa mang ea bitsang mor’abo ka lentsoe le ke keng la boleloa la keiso o tla ikarabella Lekhotleng le Phahameng ka ho Fetisisa; athe mang kapa mang ea reng, ‘Uena leoatla le eisehang!’ o tla lokeloa ke Gehena ea mollo.+

23 “Joale, haeba u tlisa mpho ea hao aletareng+ ’me u hopola hore mor’eno o na le ho hong khahlanong le uena,+ 24 u siee mpho ea hao moo ka pel’a aletare, ’me u tlohe; etsa khotso le mor’eno pele,+ ’me joale, ha u khutlile, u nyehele mpho+ ea hao.

25 “Lokisa litaba kapele le ea belaelang ka uena molaong, ha u sa ntse u e-na le eena tseleng e eang moo, e le hore ka tsela e itseng ’melaeli+ a se ke a nehelana ka uena ho moahloli, ’me moahloli a nehelana ka uena ho mohlanka oa lekhotla, eaba u lahleloa chankaneng. 26 Kannete ke re ho uena, Ka sebele u ke ke ua tsoa moo ho fihlela u lefile chelete ea ho qetela ea tšepe ea bohlokoa bo bonyenyane haholo.+

27 “Le utloile hore ho itsoe, ‘U se ke ua feba.’+ 28 Empa ke re ho lōna e mong le e mong ea ntseng a tsoela pele ho sheba mosali+ e le hore a be le takatso e matla bakeng sa hae o se a febile+ le eena ka pelong+ ea hae. 29 Joale, haeba leihlo leo la hao le letona le etsa hore u khoptjoe, u le honye ’me u le lahlele hōle le uena.+ Etsoe ho molemo haholo ho uena hore u lahleheloe ke se seng sa litho tsa hao ho e-na le hore ’mele oohle oa hao o lahleloe+ Gehena. 30 Hape, haeba letsoho la hao le letona le etsa hore u khoptjoe, u le khaole ’me u le lahlele hōle le uena.+ Etsoe ho molemo haholo ho uena hore u lahleheloe ke se seng sa litho tsa hao ho e-na le hore ’mele oohle oa hao o qetelle o le Gehena.

31 “Ho feta moo ho itsoe, ‘Mang kapa mang ea hlalang+ mosali oa hae, a mo fe lengolo la tlhalo.’+ 32 Leha ho le joalo, ke re ho lōna e mong le e mong ea hlalang mosali oa hae, haese ka lebaka la bohlola,+ o mo pepesetsa bofebe,+ ’me mang kapa mang ea nyalang mosali ea hlaliloeng oa feba.+

33 “Hape le utloile hore ho itsoe ho ba linakong tsa boholo-holo, ‘U se ke ua hlapanya+ u sa phethe, empa u phethe boitlamo ba hao ho Jehova.’+ 34 Leha ho le joalo, ke re ho lōna: Ho hang u se ke ua hlapanya,+ leha e le ka leholimo, hobane ke terone+ ea Molimo; 35 kapa ka lefatše, hobane ke setuloana sa maoto+ a hae; kapa ka Jerusalema, hobane ke motse+ oa Morena e moholo. 36 Hape u se ke ua hlapanya ka hlooho ea hao, hobane u ke ke ua fetola moriri o le mong hore o be mosoeu kapa o be motšo. 37 Lentsoe la lōna E le mpe le bolele E, Che ea lōna, Che;+ hobane se fetang tsena se tsoa ho ea khopo.+

38 “Le utloile hore ho itsoe, ‘Leihlo bakeng sa leihlo le leino bakeng sa leino.’+ 39 Leha ho le joalo, ke re ho lōna: U se ke ua hanyetsa ea khopo; empa mang kapa mang ea u jabelang lerameng+ la hao le letona, u mo reteletse le le leng. 40 Haeba motho a batla ho ea khotla le uena ’me a batla ho inkela seaparo sa hao sa ka hare, u tlohele le seaparo sa hao sa ka ntle se ee ho eena;+ 41 ’me haeba e mong ea nang le bolaoli a u qobella hore u tsamaee le eena maele e le ’ngoe, u ee le eena limaele tse peli.+ 42 U fe ea u kōpang, ’me u se ke ua furalla ea batlang ho alima ho uena ntle ho phaello.+

43 “Le utloile hore ho itsoe, ‘U rate moahelani+ oa hao ’me u hloee sera+ sa hao.’ 44 Leha ho le joalo, ke re ho lōna: Tsoelang pele ho rata lira+ tsa lōna le ho rapella ba le hlorisang;+ 45 e le hore le ka ba bara ba Ntat’a lōna ea leng maholimong,+ kaha o chabisetsa batho ba khopo le ba molemo letsatsi la hae ’me o nesetsa batho ba lokileng le ba sa lokang+ pula. 46 Etsoe haeba le rata ba le ratang, le na le moputso ofe?+ Na le babokelli ba lekhetho ha ba etse ntho e tšoanang? 47 Hape haeba le lumelisa barab’abo lōna feela, le etsa ntho efe e fetang e tloaelehileng? Na le batho ba lichaba ha ba etse ntho e tšoanang? 48 Tumellanong le hoo, le phethahale, joalokaha Ntat’a lōna oa leholimo a phethahetse.+

6 “Hlokomelang hore le se ke la bontša ho loka+ ha lōna ka pel’a batho e le hore le hlokomeloe ke bona; ho seng joalo le ke ke la ba le moputso ho Ntat’a lōna ea maholimong. 2 Kahoo ha u il’o etsa limpho tsa mohau,+ u se ke ua letsa terompeta+ ka pele ho uena, feela joalokaha baikaketsi ba etsa ka lisynagogeng le literateng, e le hore ba ka tlotlisoa ke batho. Kannete ke re ho lōna, Ba se ba e-na le moputso oa bona ka botlalo. 3 Empa uena, ha u etsa limpho tsa mohau, u se ke ua lumella letsoho la hao le letšehali hore le tsebe seo le letona le se etsang, 4 e le hore limpho tsa hao tsa mohau li ka ba sephiring; joale Ntat’ao ea talimang sephiring o tla u buseletsa.+

5 “Hape, ha le rapela, le se ke la ba joaloka baikaketsi; hobane ba rata ho rapela ba eme+ ka lisynagogeng le likhutlong tsa litsela tse sephara hore ba bonahale ho batho.+ Kannete ke re ho lōna, Ba se ba e-na le moputso oa bona ka botlalo. 6 Leha ho le joalo, uena, ha u rapela, u kene ka kamoreng+ ea hao ’me, ka mor’a hore u koale monyako oa hao, u rapele Ntat’ao ea sephiring;+ joale Ntat’ao ea talimang sephiring o tla u buseletsa. 7 Empa ha u rapela, u se ke ua pheta-pheta lintho tse tšoanang,+ feela joalokaha batho ba lichaba ba etsa, kaha ba nahana hore ba tla utluoa ka lebaka la ho sebelisa mantsoe a mangata. 8 Kahoo, le se ke la tšoana le bona, etsoe Molimo Ntat’a lōna oa tseba hore na ke lintho life tseo le li hlokang+ le pele le mo kōpa.

9 “Joale, le rapele ka tsela ena:+

“‘Ntat’a rōna ea maholimong, lebitso+ la hao le ke le halaletsoe.+ 10 ’Muso+ oa hao o ke o tle. Thato+ ea hao e ke e etsahale lefatšeng,+ joalokaha e etsahala leholimong. 11 Re fe kajeno bohobe ba rōna ba letsatsi lena;+ 12 ’me u re tšoarele melato ea rōna, joalokaha le rōna re tšoaretse ba nang le melato ho rōna.+ 13 U se ke ua re kenya molekong,+ empa u re lopolle ho ea khopo.’+

14 “Etsoe haeba le tšoarela batho litšito tsa bona, Ntat’a lōna oa leholimo le eena o tla le tšoarela;+ 15 athe haeba le sa tšoarele batho litšito tsa bona, le Ntat’a lōna a ke ke a le tšoarela litšito+ tsa lōna.

16 “Ha le itima lijo,+ le khaotse ho ba le lifahleho tse hlomohileng joaloka baikaketsi, etsoe ba itšenya lifahleho e le hore ba ka bonahala ho batho hore ba itima lijo.+ Kannete ke re ho lōna, Ba se ba e-na le moputso oa bona ka botlalo. 17 Empa uena, ha u itima lijo, u tlotse hlooho ea hao ’me u hlatsoe sefahleho+ sa hao, 18 e le hore u ka bonahala u itima lijo, eseng ho batho, empa ho Ntat’ao ea sephiring;+ joale Ntat’ao ea talimang sephiring o tla u buseletsa.

19 “Khaotsang ho ipolokela matlotlo+ lefatšeng, moo tšoèlè le mafome li jang, le moo masholu a thuhang ’me a utsoe. 20 Ho e-na le hoo, le ipolokele matlotlo leholimong,+ moo tšoèlè kapa mafome li sa jeng,+ le moo masholu a sa thuheng ’me a utsoe. 21 Etsoe moo letlotlo la hao le leng teng, le pelo ea hao e tla ba hona teng.

22 “Lebone la ’mele ke leihlo.+ Joale, haeba leihlo la hao le talima nģa e le ’ngoe, ’mele oohle oa hao o tla khanya; 23 empa haeba leihlo la hao le le khopo,+ ’mele oohle oa hao o tla ba lefifi. Ha e le hantle haeba leseli le ka ho uena ke lefifi, lefifi leo ke le leholo hakaakang!+

24 “Ha ho eo e ka bang lekhoba la benghali ba babeli; kaha o tla hloea e mong ’me a rate e mong,+ kapa o tla khomarela e mong ’me a nyelise e mong. Le ke ke la ba makhoba a Molimo le a Maruo.+

25 “Ka lebaka lena ke re ho lōna: Khaotsang ho tšoenyeha+ ka meea ea lōna hore na le tla ja’ng kapa le tla noa’ng, kapa ka ’mele ea lōna hore na le tla apara’ng.+ Na moea ha o bohlokoa ho feta lijo le ’mele ho feta liaparo?+ 26 Talimang linonyana+ tsa leholimo ka hloko, hobane ha li jale peō leha e le ho kotula kapa ho bokellela matlong a polokelo; ho ntse ho le joalo Ntat’a lōna oa leholimo oa li fepa. Na ha le ba bohlokoa ho li feta?+ 27 Ke mang ho lōna eo ka ho tšoenyeha a ka eketsang nako ea bophelo ba hae ka setsoe se le seng?+ 28 Hape, tabeng ea liaparo, ke hobane’ng ha le tšoenyeha? Ithuteng ka likhahla+ tsa naha, kamoo li hōlang kateng; ha li sehle, leha e le hore lia ohla; 29 empa ke re ho lōna esita le Solomone+ khanyeng eohle ea hae ha aa ka a apara joaloka e ’ngoe ea tsena. 30 Joale, haeba Molimo a apesa limela tsa naha joalo, tse leng teng kajeno ’me hosasane li lahleloa ka ontong, na ho e-na le hoo a ke ke a le apesa haholo, lōna ba nang le tumelo e nyenyane?+ 31 Kahoo le ka mohla le se ke la tšoenyeha+ ’me la re, ‘Re tla ja’ng?’ kapa, ‘Re tla noa’ng?’ kapa, ‘Re tla apara’ng?’ 32 Kaha tsena tsohle ke lintho tseo lichaba li li phehellang ka tabatabelo. Etsoe Ntat’a lōna oa leholimo oa tseba hore le hloka lintho tsena tsohle.+

33 “Joale, le ’ne le batle ’muso pele le ho loka+ ha hae, ’me lintho tsena tse ling tsohle le tla li ekeletsoa.+ 34 Kahoo, le ka mohla le se ke la tšoenyeha ka letsatsi+ le hlahlamang, etsoe letsatsi le hlahlamang le tla ba le matšoenyeho a lona. Letsatsi ka leng le lekanoa ke bobe ba lona.

7 “Khaotsang ho ahlola+ e le hore le se ke la ahloloa; 2 kaha kahlolo eo le ahlolang ka eona, le tla ahloloa ka eona;+ ’me tekanyo eo le lekanyang ka eona, ba tla le lekanyetsa ka eona.+ 3 Joale, ke hobane’ng ha u sheba lehlokoa le ka leihlong la mor’eno, empa u sa nahane ka leballo le ka leihlong la hao?+ 4 Kapa ke joang u ka reng ho mor’eno, ‘Ntumelle ke ntše lehlokoa ka leihlong la hao’; athe, bona! leballo le ka leihlong la hao?+ 5 Moikaketsi! Ntša leballo le ka leihlong la hao pele, joale u tla bona ka ho hlaka kamoo u ka ntšang lehlokoa ka leihlong la mor’eno.

6 “Le se ke la fa lintja+ se halalelang, kapa la lahlela liperela tsa lōna ka pel’a likolobe, e le hore le ka mohla li se ke tsa li hatakela+ ka maoto eaba lia reteleha ’me lia le rusolla.

7 “Le ’ne le kōpe,+ ’me le tla fuoa; le ’ne le batle, ’me le tla fumana; le ’ne le kokote,+ ’me le tla buleloa. 8 Etsoe e mong le e mong ea kōpang oa amohela,+ e mong le e mong ea batlang oa fumana, ’me e mong le e mong ea kokotang o tla buleloa. 9 Ka sebele, ke motho ofe har’a lōna eo mora+ oa hae a kōpang bohobe—a ke ke a mo neha lejoe, na ha ho joalo? 10 Kapa, mohlomong, o tla kōpa tlhapi—a ke ke a mo neha noha, na ha ho joalo? 11 Ka hona, haeba lōna, le hoja le le khopo,+ le tseba ho fa bana ba lōna limpho tse molemo, Ntat’a lōna ea maholimong o tla fana ka lintho tse molemo+ joalo hakaakang ho ba mo kōpang!

12 “Ka hona, lintho tsohle tseo le batlang hore batho ba le etse tsona,+ le lōna ka ho tšoanang le ba etse tsona; ha e le hantle, sena ke se boleloang+ ke Molao le Baprofeta.

13 “Kenang ka heke e moqotetsane;+ hobane tsela e isang timetsong e pharaletse ebile e khōlō, ’me ba kenang ka eona ba bangata; 14 athe heke e isang bophelong e moqotetsane le tsela e isang teng e patisane, ’me ke ba seng bakae ba e fumanang.+

15 “Itebeleng ho baprofeta+ ba bohata ba tlang ho lōna ba apere seaparo+ sa nku, empa ka hare e le liphiri+ tse harolang. 16 Le tla ba tseba+ ka litholoana tsa bona. Le ka mohla batho ha ba bokelle morara meutloeng kapa lifeiga hlabahlabaneng, na ha ho joalo?+ 17 Ka ho tšoanang sefate se seng le se seng se setle se hlahisa litholoana tse ntle, empa sefate se seng le se seng se bolileng se hlahisa litholoana tse se nang thuso;+ 18 sefate se setle se ke ke sa beha litholoana tse se nang thuso, kapa sefate se bolileng sa hlahisa litholoana tse ntle. 19 Sefate se seng le se seng se sa hlahiseng litholoana tse ntle sea rengoa ’me se lahleloa mollong.+ 20 Joale, ka sebele, le tla tseba batho bao ka litholoana tsa bona.+

21 “Hase e mong le e mong ea reng ho ’na, ‘Morena, Morena,’ ea tla kena ’musong oa maholimo, empa ho tla kena ea etsang+ thato ea Ntate ea maholimong.+ 22 Letsatsing leo, ba bangata ba tla re ho ’na ‘Morena, Morena,+ na ha rea ka ra profeta ka lebitso la hao, le ho leleka bademona ka lebitso la hao, le ho etsa mesebetsi e matla e mengata ka lebitso la hao?’+ 23 Leha ho le joalo ka nako eo ke tla ba bolella: Ha kea ka ka le+ tseba le ka mohla! Tlohang ho ’na, lōna ba etsang tlōlo ea molao.+

24 “Ka hona e mong le e mong ea utloang lipolelo tsena tsa ka ’me a li phetha o tla tšoantšoa le monna ea masene, ea ileng a haha ntlo ea hae holim ’a lefika.+ 25 Pula ea tšoloha le meroallo ea tla ’me meea ea foka eaba e otla ntlo eo, empa ha ea ka ea heleha, kaha e ne e thehiloe holim ’a lefika. 26 Ho feta moo, e mong le e mong ea utloang lipolelo tsena tsa ka ’me a sa li phethe+ o tla tšoantšoa le monna oa leoatla,+ ea ileng a haha ntlo ea hae holim ’a lehlabathe. 27 Pula ea tšoloha le meroallo ea tla ’me meea ea foka eaba e otla ntlo+ eo ’me ea heleha, ’me ho oa ha eona ea e-ba ho hoholo.”+

28 Joale ha Jesu a qeta lipolelo tsena, phello ea e-ba hore bongata bo ile ba hlolloa+ ke tsela ea hae ea ho ruta; 29 kaha o ne a ba ruta joaloka motho ea nang le matla,+ eseng joaloka bangoli ba bona.

8 Ka mor’a hore a theohe thabeng bongata bo boholo ba mo latela. 2 ’Me, bonang! monna+ ea nang le lepera a tla ’me a qala ho mo inamela, a re: “Morena, haeba feela u batla, u ka ntlhoekisa.” 3 Kahoo, ha a otlolla letsoho, a mo ama, a re: “Kea batla. Hloeka.”+ Kapele-pele lepera la hae la hlatsoeha.+ 4 Joale Jesu a re ho eena: “Tiisa hore u se ke ua bolella motho,+ empa u ee, u iponahatse ho moprista,+ ’me u nyehele mpho+ e behiloeng ke Moshe, hore e be bopaki ho bona.”

5 Ha a kena Kapernauma,+ molaoli oa lebotho a tla ho eena, a mo kōpa ka tieo 6 a re: “Mohlomphehi, mohlanka oa ka o robalitsoe ka tlung o shoele litho, o ntse a hlokofatsoa habohloko.” 7 A re ho eena: “Ha ke fihla moo ke tla mo phekola.” 8 Ha molaoli oa lebotho a araba a re: “Mohlomphehi, ha ke motho ea tšoanelehang hore u kene tlas’a marulelo a ka, empa bua lentsoe feela ’me mohlanka oa ka o tla fola. 9 Etsoe le ’na ke motho ea behiloeng tlas’a bolaoli, ea nang le masole a ka tlas’a ka, ’me ke re ho lena, ‘Tsamaea!’+ ’me lea tsamaea, ’me ke re ho le leng, ‘Tloo!’ ’me lea tla, le ho lekhoba la ka ke re, ‘Etsa hona!’ ’me lea ho etsa.” 10 Ha Jesu a utloa seo, a makala ’me a re ho ba mo latelang: “Ke le bolella ’nete, ha ho eo ke fumaneng tumelo+ e khōlō hakaalo ho eena Iseraele. 11 Empa kea le bolella hore ba bangata ba tsoang likarolong tse ka bochabela le likarolong tse ka bophirimela+ ba tla tla ’me ba otle ka lehlakore tafoleng le Abrahama le Isaka le Jakobo ’musong+ oa maholimo;+ 12 athe bara ba ’muso+ ba tla lahleloa lefifing ka ntle. Ke moo ho lla ha bona le ho tsikitlanya meno ho tla ba teng.”+ 13 Joale Jesu a re ho molaoli oa lebotho: “Tsamaea. Feela joalokaha u bile le tumelo, ho ke ho etsahale joalo ho uena.”+ ’Me mohlanka eo a fola ka hora eo.

14 Ha Jesu a kena ka tlung ea Petrose, a bona mohoehali+ oa hae a robetse ’me a kula a tšoeroe ke feberu.+ 15 Kahoo a ama letsoho+ la hae, ’me feberu ea mo tlohela, ’me a ema eaba o qala ho mo sebeletsa.+ 16 Empa ka mor’a hore e be shoalane, batho ba mo tlisetsa batho ba bangata ba nang le bademona; a leleka meea ka lentsoe, ’me a phekola bohle ba neng ba ea hampe; 17 e le hore ho ka phethahala se ileng sa buuoa ka moprofeta Esaia, ha a re: “O ile a nka maloetse a rōna ’me a jara mafu a rōna.”+

18 Ha Jesu a bona bongata bo mo potolohile, a fana ka taelo ea ho tloha ho ea ka lehlakoreng le leng.+ 19 Mongoli ea itseng a tla ’me a re ho eena: “Mosuoe, ke tla u latela kae kapa kae moo u tla ea teng.”+ 20 Empa Jesu a re ho eena: “Liphokojoe li na le maphao le linonyana tsa leholimo li na le lihlaha, empa Mor’a motho ha a na moo a ka behang hlooho ea hae teng.”+ 21 Joale e mong oa barutuoa a re ho eena: “Morena, ntumelle pele hore ke e’o pata Ntate.” 22 Jesu a re ho eena: “U ’ne u ntatele, ’me u tlohele bafu ba pate bafu ba bona.”+

23 Ha a palama sekepe,+ barutuoa ba hae ba mo latela. 24 Joale, bonang! ho tsukutleha ho hoholo ha tsoha leoatleng, hoo sekepe se neng se koaheloa ke maqhubu; leha ho le joalo, eena o ne a robetse.+ 25 Eaba baa tla ’me baa mo tsosa,+ ba re: “Morena, re pholose, re makhatheng a ho timela!” 26 Empa a re ho bona: “Ke hobane’ng ha le le boi, lōna ba nang le tumelo e nyenyane?”+ Joale, ha a ema, a khalemela meea le leoatle ka matla, ’me khutso e khōlō ea e-ba teng.+ 27 Kahoo banna bao ba makala ’me ba re: “Motho eo ke oa mofuta ofe,+ hoo esita le meea le leoatle li mo mamelang?”

28 Ha a fihla ka lehlakoreng le leng, naheng ea Bagadara,+ banna+ ba babeli ba nang le bademona ba mo khahlanyetsa ba tsoa har’a mabitla a khopotso, ba le bohale bo tšosang ka ho sa tloaelehang, hoo ho neng ho se ea nang le sebete sa ho feta ka tsela eo. 29 ’Me, bonang! ba tleroha, ba re: “Taba ea rōna le uena ke efe, Mora oa Molimo?+ Na u tlile mona ho tla re hlokofatsa+ pele ho nako e behiloeng?”+ 30 Empa hōjana le bona mohlape oa likolobe tse ngata o ne o le lekhulong. 31 Kahoo bademona ba qala ho mo kōpa ka tieo, ba re: “Haeba u re leleka, re romele mohlapeng oa likolobe.”+ 32 Tumellanong le hoo a re ho bona: “Tsamaeang!” Ba tsoa eaba baa tloha ba kena likolobeng; ’me, bonang! mohlape oo oohle oa tsubella selomong oa oela ka leoatleng ’me oa shoella ka metsing.+ 33 Empa balisa ba baleha ’me, ha ba kena motseng, ba tlaleha ntho e ’ngoe le e ’ngoe, ho akarelletsa le taba ea banna ba nang le bademona. 34 ’Me, bonang! motse oohle oa tsoa ho tla kopana le Jesu; ’me ka mor’a ho mo bona, ba mo phehella ka tieo hore a tsoe literekeng tsa bona.+

9 Kahoo, ha a palama sekepe, a tšela ’me a kena motseng+ oa habo. 2 ’Me, bonang! ba ne ba mo tlisetsa monna ea shoeleng litho a robetse holim ’a bethe.+ Ha Jesu a bona tumelo ea bona a re ho motho ea shoeleng litho: “Ngoana, e-ba sebete; u tšoaretsoe libe.”+ 3 ’Me, bonang! ba bang ba bangoli ba ipolella ba re: “Motho enoa oa nyefola.”+ 4 Ka ho tseba menahano+ ea bona, Jesu a re: “Ke hobane’ng ha le nahana lintho tse khopo ka lipelong+ tsa lōna? 5 Ka mohlala, ke hofe ho bonolo, ho re, U tšoaretsoe libe tsa hao, kapa ho re, Ema ’me u tsamaee?+ 6 Leha ho le joalo, e le hore le tsebe hore Mor’a motho o na le matla a ho tšoarela libe lefatšeng+—” joale a re ho motho ea shoeleng litho: “Ema, u nke bethe ea hao, ’me u ee lapeng la hao.”+ 7 Eaba oa ema ’me o ea lapeng la hae. 8 Ha bongata bo bona sena ba tšoaroa ke tšabo, ’me ba tlotlisa Molimo,+ ea fileng batho matla+ a joalo.

9 Ka mor’a moo, ha a fetela pele ho tloha moo, Jesu a re heli! ’me a bona monna ea bitsoang Matheu a lutse ofising ea lekhetho, ’me a re ho eena: “E-ba molateli oa ka.”+ Kapele ka mor’a moo a fela a ema ’me a mo latela.+ 10 Hamorao, ha a ntse a otlile ka lehlakore tafoleng ka tlung,+ bonang! babokelli ba lekhetho le baetsalibe ba bangata ba tla ’me ba qala ho otla ka lehlakore le Jesu le barutuoa ba hae. 11 Empa ha Bafarisi ba bona sena ba qala ho re ho barutuoa ba hae: “Ke hobane’ng ha mosuoe oa lōna a ja le babokelli ba lekhetho le baetsalibe?”+ 12 Ha a ba utloa, a re: “Batho ba phelang hantle ha ba hloke ngaka,+ empa ba kulang baa e hloka. 13 Joale, e-eang, ’me le ithute hore na sena se bolela eng, ‘Ke batla mohau, eseng sehlabelo.’+ Etsoe ke tlil’o bitsa baetsalibe, eseng batho ba lokileng.”

14 Joale barutuoa ba Johanne ba tla ho eena ’me ba botsa: “Ke hobane’ng ha rōna le Bafarisi re tloaetse ho itima lijo empa barutuoa ba hao ba sa itime lijo?”+ 15 Eaba Jesu o re ho bona: “Metsoalle ea monyali ha e na lebaka la ho siama hafeela monyali+ a e-na le eona, na ha ho joalo? Empa matsatsi a tla tla ha monyali a tla tlosoa+ ho eona, ’me joale e tla itima lijo.+ 16 Ha ho ea rōkellang setsiba sa lesela le sa honyelang seaparong sa ka ntle sa khale; etsoe matla a sona a feletseng a ne a tla rutla seaparong sa ka ntle ’me ho taboha hoo ho ne ho tla ba hobe haholo.+ 17 Leha e le hore batho ba tšela veine e ncha ka makukeng a veine a khale; empa haeba ba etsa joalo, joale makuka a veine aa phatloha ’me veine ea tšoloha ’me makuka a veine aa senyeha.+ Empa batho ba tšela veine e ncha ka makukeng a veine a macha, ’me lintho tseo ka bobeli lia bolokeha.”+

18 Ha a ntse a ba bolella lintho tsena, bonang! ’musi+ ea itseng ea neng a atametse a qala ho mo inamela,+ a re: “Hajoale e lokela ebe morali oa ka o shoele;+ empa tloo ’me u behe letsoho la hao holim ’a hae ’me o tla phela.”+

19 Joale Jesu, ha a ema, a qala ho mo latela; le barutuoa ba hae ba etsa joalo. 20 ’Me, bonang! mosali e mong ea ’nileng a utloa bohloko ka lilemo tse leshome le metso e ’meli ka lebaka la phallo ea mali+ a tla ka morao ’me a ama mophetho o litjellane oa seaparo sa hae sa ka ntle;+ 21 kaha o ne a ntse a ipolella: “Haeba feela nka ama seaparo sa hae sa ka ntle ke tla fola.”+ 22 Jesu a reteleha ’me, ha a mo hlokomela, a re: “Morali, e-ba sebete; tumelo ea hao e u folisitse.”+ ’Me ho tloha ka hora eo mosali eo a fola.+

23 Joale, ha a kena ka tlung ea ’musi+ eo ’me a re heli! a bona ba letsang lekolilo le bongata bo le moferefereng+ o lerata, 24 Jesu a qala ho re: “Tlohang sebakeng sena, kaha ngoananyana ha aa shoa, empa o robetse.”+ Eaba ba qala ho mo tšeha ka ho nyefola.+ 25 Hang ha bongata bo ntšelitsoe ka ntle, a kena ’me a mo tšoara ka letsoho,+ ’me ngoananyana a ema.+ 26 Ka ho hlakileng, puo e mabapi le sena ea hasana sebakeng seo sohle.

27 Eare ha Jesu a fetela pele ho tloha moo, banna+ ba babeli ba foufetseng ba mo latela, ba hoeletsa ’me ba re: “Re hauhele,+ Mora oa Davida.” 28 Ka mor’a hore a kene ka tlung, banna bao ba foufetseng ba tla ho eena, ’me Jesu a ba botsa: “Na le na le tumelo+ ea hore nka etsa see?” Ba mo araba: “E, Morena.” 29 Joale a ama mahlo+ a bona, a re: “Ho ke ho le etsahalle ho ea ka tumelo ea lōna.” 30 Mahlo a bona a tutubuloha. Ho feta moo, Jesu a ba laela ka thata-thata, a re: “Tiisang hore ho se ke ha e-ba le ea mong ea tsebang ka hona.”+ 31 Empa bona, ka mor’a hore ba tsoele ka ntle, ba mo phatlalatsa sebakeng seo sohle.+

32 Joale ha ba tloha, bonang! batho ba mo tlisetsa monna oa semumu ea nang le modemona;+ 33 ’me ka mor’a hore modemona eo a lelekoe monna eo oa semumu a bua.+ Joale, bongata ba makala+ ’me ba re: “Le ka mohla ha ho e-s’o bonoe ntho leha e le efe e joaloka ena Iseraele.” 34 Empa Bafarisi ba qala ho re: “O leleka bademona ka ’musi oa bademona.”+

35 Jesu a qala ho etela metse le metsana eohle, a ruta ka lisynagogeng tsa eona le ho bolela litaba tse molemo tsa ’muso ’me a phekola lefu la mofuta o mong le o mong le mefokolo ea mofuta o mong le o mong.+ 36 Ha a bona bongata a bo hauhela,+ hobane bo ne bo sohlokehile ’me bo qhalakane joaloka linku tse se nang molisa.+ 37 Joale a re ho barutuoa ba hae: “E, kotulo e khōlō, empa basebetsi ha ba bakae.+ 38 Ka hona, le kōpe Mong’a kotulo hore a romele basebetsi kotulong ea hae.”+

10 Kahoo a bitsa barutuoa ba hae ba leshome le metso e ’meli ’me a ba fa matla holim ’a meea+ e sa hloekang, e le hore ba e leleke le ho phekola lefu la mofuta o mong le o mong le mefokolo ea mofuta o mong le o mong.

2 Mabitso a baapostola+ ba leshome le metso e ’meli ke ana:+ Oa pele, Simone, ea bitsoang Petrose,+ le Andrease+ mor’abo; le Jakobo mora oa Zebedea+ le Johanne mor’abo; 3 Filipi le Bartholome;+ Thomase+ le Matheu+ ’mokelli oa lekhetho; Jakobo mora oa Alfiase,+ le Thadiase; 4 Simone Mokanana,+ le Judase Iskariota, eo hamorao a ileng a mo eka.+

5 Jesu o ile a roma bana ba leshome le metso e ’meli, a ba fa litaelo tsena:+ “Le se ke la tloha ho ea kena tseleng ea lichaba, hape le se ke la kena motseng+ oa Basamaria; 6 empa, ho e-na le hoo, le tsoele pele le ea linkung tse lahlehileng tsa ntlo ea Iseraele.+ 7 Ha le ntse le e-ea, le bolele, le re, ‘’Muso oa maholimo o atametse.’+ 8 Phekolang batho ba kulang,+ le tsose batho ba shoeleng, le hloekise balepera, le leleke bademona. Le amohetse ntle ho tefo, le fane ntle ho tefo.+ 9 Le se ke la iphumanela khauta kapa silevera kapa koporo bakeng sa lipache+ tsa lōna tsa senyepa, 10 kapa mokotla oa lijo bakeng sa leeto, kapa liaparo tsa ka tlaase tse peli, kapa meqathatso kapa lere; kaha mosebetsi o tšoaneloa ke lijo tsa hae.+

11 “Ha le kena motseng kapa motsaneng ofe kapa ofe, le batle hore na ke mang ho oona ea tšoanelehang, ’me le lule moo ho fihlela le tloha.+ 12 Ha le kena ka tlung, le lumelise ba ntlo eo; 13 ’me haeba ntlo eo e tšoaneleha, khotso ea lōna eo le e lakaletsang eona e ke e be ho eona;+ empa haeba e sa tšoanelehe, khotso e tsoang ho lōna e ke e khutlele ho lōna. 14 Kae kapa kae moo mang kapa mang a sa le amoheleng kapa a sa mameleng mantsoe a lōna, ha le tsoa ntlong eo kapa motseng oo le hlohlore lerōle maotong+ a lōna. 15 Kannete ke re ho lōna, ho tla mamelleha haholo bakeng sa naha ea Sodoma+ le Gomora ka Letsatsi la Kahlolo ho feta bakeng sa motse oo.+

16 “Bonang! Ke le romela le le joaloka linku har’a liphiri;+ ka hona le be seli joaloka linoha+ ’me leha ho le joalo le hloke molato joaloka maeba.+ 17 Itebeleng khahlanong le batho;+ etsoe ba tla nehelana ka lōna makhotleng+ a libaka, ’me ba tla le shapa+ ka lisynagogeng+ tsa bona. 18 Le tla hulanyetsoa ka pel’a babusisi le marena+ ka lebaka la ka, hore e be bopaki+ ho bona le ho lichaba. 19 Leha ho le joalo, ha ba nehelana ka lōna, le se ke la tšoenyeha ka hore na le tla bua joang kapa eng; kaha seo le tla se bua le tla se fuoa ka hora+ eo; 20 etsoe hase lōna ba buang, empa ke moea oa Ntat’a lōna o buang ka lōna.+ 21 Ho ekelletsa moo, mor’abo motho+ o tla nehelana ka mor’abo lefung, le ntate a nehelane ka ngoana oa hae lefung, ’me bana ba tla tsohela batsoali matla ’me ba tla etsa hore ba bolaoe.+ 22 Le tla hlouoa ke batho bohle ka lebaka la lebitso la ka;+ empa ea mameletseng ho fihlela bofelong ke eena ea tla pholoha.+ 23 Ha ba le hlorisa motseng o mong, le balehele ho o mong;+ etsoe kannete ke re ho lōna, Ho hang le ke ke la phetha ho potoloha+ le metse ea Iseraele ho fihlela Mor’a motho a fihla.+

24 “Morutuoa ha a ka holimo ho mosuoe oa hae, leha e le hore lekhoba le ka holimo ho morena+ oa lona. 25 Ho lekane ho morutuoa hore a be joaloka mosuoe oa hae, le lekhoba le be joaloka morena+ oa lona. Haeba batho ba bitsitse mong’a ntlo Beelzebube,+ ba tla bitsa ba ntlo ea hae joalo hakaakang? 26 Ka hona le se ke la ba tšaba; kaha ha ho letho le koahetsoeng le ke keng la koaholloa, le leo e leng sephiri le ke keng la tsejoa.+ 27 Seo ke le bolellang sona lefifing, le se bue leseling; ’me seo le se utloang se hoeshetsoa, le se bolele le le holim ’a matlo.+ 28 Le se ke la tšaba+ ba bolaeang ’mele empa ba ke ke ba bolaea moea; empa ho e-na le hoo le tšabe+ ea ka timetsang moea le ’mele Gehena.+ 29 Na lirobele tse peli ha li rekisoe ka chelete ea tšepe ea bohlokoa bo bonyenyane?+ Empa leha ho le joalo ha ho le se seng sa tsona se tla oela fatše kantle le hore Ntat’a lōna a tsebe.+ 30 Empa moriri oa lihlooho tsa lōna o baliloe kaofela.+ 31 Ka hona le se ke la tšaba: le ba bohlokoa ho feta lirobele+ tse ngata.

32 “Joale, e mong le e mong ea bolelang hore o na le kopano le ’na ka pel’a batho, le ’na ke tla bolela hore ke na le kopano+ le eena ka pel’a Ntate ea maholimong; 33 empa mang kapa mang ea ntatolang ka pel’a batho, le ’na ke tla mo latola+ ka pel’a Ntate ea maholimong. 34 Le se ke la nahana hore ke tletse ho tlisa khotso lefatšeng; ke tletse ho tlisa sabole, eseng khotso.+ 35 Kaha ke tletse ho baka karohano, ho motho khahlanong le ntat’ae, le morali khahlanong le ’m ’ae, le mosali e mocha khahlanong le ’m ’ae matsale.+ 36 Ka sebele, lira tsa motho e tla ba batho ba ntlo ea hae. 37 Ea ratang ntate kapa ’mè ho mpheta ha a ntšoanele; le ea ratang mora kapa morali ho mpheta ha a ntšoanele.+ 38 Mang kapa mang ea sa amoheleng thupa ea hae ea tlhokofatso ’me a ntšala morao ha a ntšoanele.+ 39 Ea fumanang moea oa hae o tla lahleheloa ke oona, ’me ea lahleheloang ke moea oa hae ka lebaka la ka o tla o fumana.+

40 “Ea le amohelang oa nkamohela le ’na, ’me ea nkamohelang o amohela le ea nthomileng.+ 41 Ea amohelang moprofeta kahobane e le moprofeta o tla fumana moputso+ oa moprofeta, le ea amohelang monna ea lokileng kahobane e le monna ea lokileng o tla fumana moputso+ oa monna ea lokileng. 42 Mang kapa mang ea fang e mong oa ba banyenyane bana senoelo feela sa metsi a batang hore a noe kahobane e le morutuoa, kannete kea le bolella, ho hang a ke ke a lahleheloa ke moputso+ oa hae.”

11 Joale ha Jesu a qetile ho fana ka litaelo ho barutuoa ba hae ba leshome le metso e ’meli, a tloha moo ho ea ruta le ho bolela metseng+ ea bona.

2 Empa Johanne, kaha o ne a utloile a le teronkong+ ka mesebetsi ea Kreste, a romeletsa ka barutuoa ba hae 3 ’me a re ho eena: “Na u Ea Tlang, kapa re lokela ho lebella ea fapaneng?”+ 4 Ha Jesu a araba a re ho bona: “Tsamaeang ’me le tlalehele Johanne seo le se utloang le seo le se bonang: 5 Ba foufetseng ba boetse+ baa bona, le ba holofetseng+ baa tsamaea, balepera+ ba ntse ba hloekisoa ’me ba sa utloeng+ litsebeng baa utloa, le bafu+ ba ntse ba tsosoa, ’me mafutsana a bolelloa litaba tse molemo;+ 6 ho thaba ea sa fumaneng sesosa sa ho khoptjoa ho ’na.”+

7 Ha bana ba ntse ba le tseleng, Jesu a qala ho re ho bongata mabapi le Johanne: “Le ile la tsoela lefeelleng ho ea bona’ng?+ Lehlaka le ntseng le akhotsoa ke moea?+ 8 Joale, le ile la tsoa ho ea bona’ng? Monna ea apereng liaparo tse bonolo? Ka sebele, ba apereng liaparo tse bonolo ba matlong a marena.+ 9 Joale, ha e le hantle, ke hobane’ng ha le ile la tsoa? Ho ea bona moprofeta? E, kea le bolella, le ho fetang moprofeta+ hōle. 10 Enoa ke eena eo ho ngoliloeng malebana le eena, ‘Bona! Ke romela lenģosa la ka ka pel’a sefahleho sa hao, le tla lokisa tsela ea hao ka pel’a hao!’+ 11 Kannete ke re ho lōna, Har’a ba tsoetsoeng ke basali+ ha ho e-s’o hlahisoe e moholo ho Johanne Mokolobetsi; empa motho e monyenyane ’musong+ oa maholimo o moholo ho eena. 12 Empa ho tloha matsatsing a Johanne Mokolobetsi ho fihlela joale ’muso oa maholimo ke pakane eo batho ba e hahamallang, ’me ba hahamallang pele baa o nka.+ 13 Etsoe bohle, Baprofeta le Molao, ba ile ba profeta ho fihlela ho Johanne;+ 14 ’me haeba le batla ho ho amohela, ke Eena ‘Elia ea reretsoeng ho tla.’+ 15 Ea nang le litsebe a ke a mamele.+

16 “Moloko+ oo ke tla o bapisa le mang? O joaloka bana ba banyenyane ba lutseng limmarakeng ba hoeletsang balekane+ ba bona ba bapalang le bona, 17 ba re, ‘Re ile ra le letsetsa lekolilo, empa ha lea ka la tjeka; re ile ra bokolla, empa ha lea ka la ikotla ka ho sareloa.’+ 18 Ka ho tšoanang, Johanne o tlile a sa je a sa noe,+ empa leha ho le joalo batho ba re, ‘O na le modemona’; 19 Mor’a motho o ile a fela a tla a ja a noa,+ ho ntse ho le joalo batho ba re, ‘Bonang! Motho oa monyollo le ea ineheletseng ho noa veine, motsoalle oa babokelli ba lekhetho le baetsalibe.’+ Leha ho le joalo, bohlale bo pakoa ke mesebetsi ea bona hore bo lokile.”+

20 Joale a qala ho nyatsa metse eo boholo ba mesebetsi ea hae e matla e neng e etsahetse ho eona, hobane ha ea ka ea baka:+ 21 “Ho malimabe uena, Korazine! Ho malimabe uena, Bethsaida!+ hobane haeba mesebetsi e matla e ileng ea etsahala ho lōna e ne e etsahetse Tyre le Sidone, e ka be e le khale li bakile li apere lesela la mokotla ’me li le moloreng.+ 22 Ka lebaka leo ke re ho lōna, Ho tla mamelleha haholo bakeng sa Tyre le Sidone ka Letsatsi la Kahlolo+ ho feta bakeng sa lōna.+ 23 Le uena, Kapernauma,+ na mohlomong u tla phahamisetsoa leholimong? U tla theohela+ Hadese;+ hobane haeba mesebetsi e matla e etsahetseng ho uena e ne e etsahetse Sodoma, e ka be e ntse e le teng ho fihlela letsatsing lona lena. 24 Ka lebaka leo ke re ho lōna, Ho tla mamelleha haholo bakeng sa naha ea Sodoma ka Letsatsi la Kahlolo ho feta bakeng sa lōna.”+

25 Ka nako eo ha Jesu a arabela a re: “Ke u rorisa phatlalatsa, Ntate, Morena oa leholimo le lefatše, hobane u patetse ba bohlale le ba nang le kelello lintho tsena ’me u li senoletse bana.+ 26 E, Ntate, hobane ho etsa joalo e bile tsela e amohelehang ho uena. 27 Ke nehiloe lintho tsohle ke Ntate,+ ’me ha ho ea tsebang Mora ka botlalo haese Ntate,+ leha e le hore mang kapa mang o tseba Ntate ka botlalo haese Mora le mang kapa mang eo Mora a ratang ho mo senolela eena.+ 28 Tloong ho ’na, lōna bohle ba sehlang le ba imetsoeng,+ ’me ke tla le khatholla. 29 Jarang joko+ ea ka ’me le ithute ho ’na,+ kaha ke na le maikutlo a bonolo+ ’me ke ikokobelitse pelong, ’me le tla fumanela meea ea lōna khatholoho.+ 30 Etsoe joko ea ka e mosa le mojaro oa ka o bobebe.”+

12 Nakong eo Jesu a tsamaea har’a masimo a lijo-thollo ka sabatha.+ Barutuoa ba hae ba lapa ’me ba qala ho kha lihloohoana tsa lijo-thollo le ho ja.+ 2 Ha Bafarisi ba bona sena ba re ho eena:+ “Bona! Barutuoa ba hao ba etsa seo ho sa lumelloeng ke molao hore se etsoe ka sabatha.”+ 3 A re ho bona: “Na ha lea bala seo Davida a ileng a se etsa ha eena le banna ba neng ba e-na le eena ba lapile?+ 4 Kamoo a ileng a kena ka tlung ea Molimo ’me ba ja mahobe a nyehelo,+ e leng ho neng ho sa lumelloe ke molao+ hore a ho je, leha e le ba nang le eena, haese baprista feela?+ 5 Kapa, ha lea bala Molaong+ hore ka lisabatha baprista tempeleng ba tšoara sabatha joaloka e sa halaleleng ’me ba tsoela pele ba se na molato?+ 6 Empa kea le bolella hore ho fetang tempele+ ho teng mona. 7 Leha ho le joalo, haeba le ne le utloisisitse seo sena se se bolelang, ‘Ke batla mohau,+ eseng sehlabelo,’+ le ka be le sa nyatsa ba se nang molato. 8 Etsoe Mor’a motho+ ke Morena oa sabatha.”+

9 Ka mor’a hore a tlohe sebakeng seo a kena ka synagogeng ea bona; 10 ’me, bonang! monna ea omeletseng letsoho!+ Kahoo ba mo botsa, “Na ho lumelloa ke molao ho phekola ka sabatha?” e le hore ba ka fumana seo ba ka mo qosang ka sona.+ 11 A re ho bona: “Motho e tla ba ofe har’a lōna ea nang le nku e le ’ngoe eo, haeba e oela ka sekoting+ ka sabatha, a ke keng a e tšoara ’me a e nyollela ka ntle?+ 12 Joale, motho ke oa bohlokoa hakaakang ho feta nku!+ Kahoo ho lumelloa ke molao ho etsa ntho e ntle ka sabatha.” 13 Joale a re ho monna eo: “Otlolla letsoho la hao.” Eaba oa le otlolla, ’me la tsosolosoa hore le phele hantle joaloka letsoho le leng.+ 14 Empa Bafarisi ba tsoa ’me ba rerisana khahlanong le eena e le hore ba ka mo timetsa.+ 15 Ha Jesu a tsebile sena, a tloha moo. Ba bangata le bona ba mo latela, ’me a ba phekola kaofela,+ 16 empa a ba laela ka thata hore ba se ke ba etsa hore a bonahale;+ 17 e le hore ho ka phethahala se ileng sa buuoa ka moprofeta Esaia, ea ileng a re:

18 “Bonang! Mohlanka+ oa ka eo ke mo khethileng, moratuoa+ oa ka, eo moea oa ka o mo amohetseng! Ke tla beha moea oa ka holim ’a hae,+ ’me o tla hlakisetsa lichaba toka. 19 A ke ke a pheha khang ka lerata,+ kapa a hoeletsa haholo, leha e le hore mang kapa mang o tla utloa lentsoe la hae litseleng tse sephara. 20 Ha ho lehlaka le tletleraneng leo a tla le silakanya, ’me ha ho khoele ea lebone ea folakse e kunkelang eo a tla e tima,+ ho fihlela a tlisa toka+ ka katleho. 21 Ka sebele, lichaba li tla tšepela lebitsong la hae.”+

22 Joale ba mo tlisetsa monna ea nang le modemona, a foufetse ebile e le semumu; ’me a mo phekola, hoo monna eo oa semumu a ileng a bua a ba a bona. 23 Joale, bongata kaofela ba hla ba hlolloa ’me ba qala ho re:+ “Na ebe mohlomong enoa hase eena Mora oa Davida?”+ 24 Ha Bafarisi ba utloa sena, ba re: “Motho enoa ha a leleke bademona haese ka Beelzebube, ’musi oa bademona.”+ 25 Ka ho tseba menahano ea bona,+ a re ho bona: “’Muso o mong le o mong o arohaneng o fetoha lesupi,+ le motse o mong le o mong kapa ntlo e arohaneng e ke ke ea ema. 26 Ka tsela e tšoanang, haeba Satane a leleka Satane, o arohane; joale, ’muso oa hae o tla ema joang? 27 Ho feta moo, haeba ke leleka bademona ka Beelzebube,+ bara ba lōna ba ba leleka ka mang? Ke ka lebaka lena e tlang ho ba baahloli ba lōna. 28 Empa haeba ke leleka bademona ka moea oa Molimo, ka sebele ’muso oa Molimo o le fihletse.+ 29 Kapa ke joang leha e le mang a ka futuhelang ntlo ea monna ea matla ’me a nka thepa ea hae e nkehang, ntle le hore pele a tlame monna eo ea matla? ’Me joale o tla phahla ntlo ea hae.+ 30 Ea seng ka lehlakoreng la ka o khahlanong le ’na, ’me ea sa bokelleng le ’na oa hasanya.+

31 “Ka lebaka lena ke re ho lōna, Batho ba tla tšoareloa sebe sa mofuta o mong le o mong le nyefolo, empa nyefolo khahlanong le moea e ke ke ea tšoareloa.+ 32 Ka mohlala, mang kapa mang ea buang lentsoe khahlanong le Mor’a motho, o tla tšoareloa;+ empa mang kapa mang ea buang khahlanong le moea o halalelang, a ke ke a tšoareloa, che, eseng tsamaisong ena ea lintho kapa e tlang ho tla.+

33 “Le etsa hore sefate se be setle le litholoana tsa sona e be tse ntle kapa le etsa hore sefate e be se bolileng le litholoana tsa sona e be tse bolileng; etsoe sefate se tsejoa+ ka litholoana tsa sona. 34 Malinyane a bo-marabe,+ le ka bua lintho tse molemo joang, athe le khopo?+ Etsoe molomo o bua ho tsoa ho se tletseng pelong.+ 35 Motho ea molemo o ntša lintho tse molemo letlotlong la hae le molemo,+ athe motho ea khopo o ntša lintho tse khopo letlotlong la hae le khopo.+ 36 Ke le bolella hore polelo e ’ngoe le e ’ngoe e sa ruiseng molemo eo batho ba e buang, ba tla ikarabella+ malebana le eona ka Letsatsi la Kahlolo; 37 kaha ka mantsoe a hao ho tla boleloa hore u lokile, ’me ka mantsoe a hao u tla nyatsuoa.”+

38 Joale ha ba mo araba ba bang ba bangoli le Bafarisi ba re: “Mosuoe, re batla ho bona pontšo e tsoang ho uena.”+ 39 Ha a araba a re ho bona: “Moloko o khopo le o febang+ o ntse o tsoela pele ho batla pontšo, empa ha ho pontšo eo o tla e fuoa haese pontšo ea moprofeta Jonase.+ 40 Etsoe feela joalokaha Jonase+ a ile a ba ka mpeng ea tlhapi ea tonanahali ka matsatsi a mararo le masiu a mararo, kahoo Mor’a motho+ o tla ba pelong ea lefatše+ ka matsatsi a mararo le masiu a mararo.+ 41 Batho ba Ninive ba tla tsoha kahlolong le moloko+ ona ’me ba tla o ahlola;+ hobane ba ile ba baka ka lebaka la seo Jonase+ a ileng a se bolela, empa, bonang! ho hong ho fetang Jonase ho teng mona. 42 Mofumahali oa boroa+ o tla tsosoa kahlolong le moloko ona ’me o tla o ahlola; hobane o ile a tla a tsoa lipheletsong tsa lefatše ho tla utloa bohlale ba Solomone, empa, bonang! ho hong ho fetang Solomone ho teng mona.+

43 “Ha moea o sa hloekang o tsoa ho motho, o feta libakeng tse omeletseng o ntse o batla sebaka sa phomolo, ’me ha ho seo o se fumanang.+ 44 Joale o re, ‘Ke tla khutlela ntlong ea ka eo ke ileng ka tsoa ho eona’; ’me ha o fihla o e fumana e sa luloe empa e fietsoe hore e hloeke ’me e khabisitsoe. 45 Joale oa tsamaea o nka meea e fapaneng e supileng e khopo ho o feta o tsamaea le eona,+ ’me, ka mor’a hore e kene ka hare, e lula moo; ’me maemo a ho qetela a motho eo a ba mabe ho feta a pele.+ Ho tla ba joalo le ka moloko ona o khopo.”+

46 Ha a sa ntse a bua le bongata, bonang! ’m ’ae le barab’abo+ ba ema ka ntle ba batla ho bua le eena. 47 Kahoo e mong a re ho eena: “Bona! ’M’ao le barab’eno ba eme ka ntle, ba batla ho bua le uena.” 48 Ha a araba a re ho ea mo bolellang: “’Mè ke mang, ’me barab’eso ke bo-mang?”+ 49 Ha a otlollela letsoho la hae ho barutuoa ba hae, a re: “Bonang! ’Mè le barab’eso!+ 50 Kaha mang kapa mang ea etsang thato ea Ntate ea leholimong, eo ke mor’eso, le morali’eso, le ’Mè.”

13 Letsatsing leo ha Jesu a tsoile ka tlung, o ne a lutse pel’a leoatle; 2 ’me bongata bo boholo ba bokana ho eena, hoo a ileng a palama sekepe a lula fatše,+ ’me bongata kaofela bo ne bo eme lebōpong. 3 Joale a ba bolella lintho tse ngata ka lipapiso, a re: “Bonang! Mojali o ile a tsoa ho ea jala;+ 4 ha a ntse a jala, lipeō tse ling tsa oela haufi le tsela, ’me linonyana tsa tla tsa li ja.+ 5 Tse ling tsa oela libakeng tse majoe moo li sa kang tsa e-ba le mobu o mongata, ’me hang-hang tsa mela ka lebaka la ho se be le botebo mobung.+ 6 Empa ha letsatsi le chaba tsa tlaboha, ’me tsa omella ka lebaka la ho se be le metso.+ 7 Tse ling, le tsona, tsa oela har’a meutloa, ’me meutloa ea nyoloha ea li bipetsa.+ 8 Tse ling hape tsa oela mobung o motle ’me tsa qala ho beha litholoana,+ ena tse lekholo, eane tse mashome a tšeletseng, e ’ngoe tse mashome a mararo.+ 9 Ea nang le litsebe a ke a mamele.”+

10 Kahoo barutuoa ba tla ’me ba re ho eena: “Ke hobane’ng ha u bua le bona u sebelisa lipapiso?”+ 11 Ha a araba a re: “Le nehiloe ho utloisisa liphiri+ tse halalelang tsa ’muso oa maholimo, empa batho bao ha baa ho nehoa.+ 12 Etsoe mang kapa mang ea nang le letho, o tla fuoa ho eketsehileng ’me o tla atisetsoa;+ empa mang kapa mang ea se nang letho, o tla amohuoa le seo a nang le sona.+ 13 Ke ka lebaka lena ke buang le bona ke sebelisa lipapiso, hobane, ho talimeng, ba talimela lefeela, ’me ho utloeng, ba utloela lefeela, hape ha ba utloisise;+ 14 ’me boprofeta ba Esaia bo phethahala ho bona, bo reng, ‘Ho utloeng, le tla utloa empa ho hang le ke ke la utloisisa; ’me, ho talimeng, le tla talima empa ho hang le ke ke la bona.+ 15 Etsoe lipelo tsa batho bana li fetohile tse sa amoheleng letho, ’me ka litsebe ba utloile ha se ke ha e-ba le karabelo, ba koetse mahlo; e le hore le ka mohla ba se ke ba bona ka mahlo le ho utloa ka litsebe le ho utloisisa ka lipelo ’me ba khutle, ke ba folise.’+

16 “Leha ho le joalo, ho thaba mahlo+ a lōna hobane aa bona, le litsebe tsa lōna hobane lia utloa. 17 Etsoe kannete ke re ho lōna, Baprofeta+ le banna ba lokileng ba bangata ba ile ba lakatsa ho bona lintho tseo le li bonang ’me ha baa ka ba li bona,+ le ho utloa lintho tseo le li utloang ’me ha baa ka ba li utloa.+

18 “Joale, lōna, le mamele papiso ea monna ea ileng a jala.+ 19 Moo leha e le mang a utloang lentsoe la ’muso empa a sa le utloisise, ea khopo+ oa tla ’me o hloibila se jetsoeng pelong ea hae; ena ke e jetsoeng haufi le tsela. 20 Ha e le e jetsoeng libakeng tse majoe, enoa ke ea utloang lentsoe ’me hang-hang a le amohela ka thabo.+ 21 Empa leha ho le joalo ha a na motso ka ho eena empa o tsoela pele ka nakoana, ’me ka mor’a hore ho tsohe matšoenyeho kapa mahloriso ka lebaka la lentsoe hang-hang oa khoptjoa.+ 22 Ha e le e jetsoeng har’a meutloa, enoa ke ea utloang lentsoe, empa matšoenyeho a tsamaiso ena ea lintho+ le matla a thetsang a maruo a bipetsa lentsoe, ’me o fetoha ea sa beheng.+ 23 Ha e le e jetsoeng mobung o motle, enoa ke ea utloang lentsoe ’me a le utloisisa, eo ka sebele a hlileng a behang litholoana ’me a hlahisa, enoa tse lekholo, eane tse mashome a tšeletseng, e mong tse mashome a mararo.”+

24 A beha papiso e ’ngoe ka pel’a bona, a re: “’Muso oa maholimo o joaloka motho ea ileng a jala peō e ntle tšimong ea hae.+ 25 Ha batho ba ntse ba robetse, sera sa hae sa tla ’me sa jalella mofoka har’a koro, ’me sa tloha. 26 Ha lekhasi le hlaha ’me le hlahisa litholoana, joale le mofoka oa bonahala. 27 Kahoo makhoba a mong’a ntlo a tla ’me a re ho eena, ‘Monghali, na ha ua ka ua jala peō e ntle tšimong ea hao?+ Joale, ho tla joang hore ebe e na le mofoka?’+ 28 A re ho ’ona, ‘Sera, motho, se ile sa etsa sena.’+ A re ho eena, ‘Joale, na u batla hore re ee ’me re o bokelle?’ 29 A re, ‘Che; esere ha le ntse le bokella mofoka, la tšoha le o fotholella le koro. 30 Li tloheleng li hōle hammoho ho fihlela ha ho kotuloa; ’me ka nako ea kotulo ke tla bolella bakotuli, Pele bokellang mofoka ’me le o tlame mangata hore o chesoe,+ joale le e’o bokellela koro ka tlung ea ka ea polokelo.’”+

31 A beha papiso e ’ngoe ka pel’a bona,+ a re: “’Muso oa maholimo o joaloka thollo ea mosetareta,+ eo motho e mong a ileng a e nka ’me a e lema tšimong ea hae; 32 eo ha e le hantle, e leng e nyenyane ka ho fetisisa ho lipeō tsohle, empa ha e hōlile ke oona o moholo ka ho fetisisa merohong ’me e fetoha sefate, hoo linonyana tsa leholimo+ li tlang ’me li fumana bolulo har’a makala a sona.”+

33 A bua le bona ka papiso e ’ngoe: “’Muso oa maholimo o joaloka tomoso,+ eo mosali a ileng a e nka ’me a e pata litekanyong tse tharo tse khōlō tsa phofo, ho fihlela hlama eo kaofela e betse.”

34 Lintho tsena tsohle Jesu o ile a li bua le bongata ka lipapiso. Ka sebele, o ne a sa bue le bona kantle ho papiso;+ 35 e le hore ho ka phethahala se ileng sa buuoa ka moprofeta ea ileng a re: “Ke tla ahlamisa molomo oa ka ka lipapiso, ke tla phatlalatsa lintho tse patiloeng ho tloha ho thehoeng ha lefatše.”+

36 Joale ka mor’a ho bolella bongata hore bo tsamaee a ea ka tlung. Barutuoa ba hae ba tla ho eena ’me ba re: “Re hlalosetse papiso ea mofoka tšimong.” 37 Ha a arabela a re: “Mojali oa peō e ntle ke Mor’a motho; 38 tšimo ke lefatše;+ ha e le peō e ntle, bana ke bara ba ’muso; empa mofoka ke bara ba ea khopo,+ 39 ’me sera se ileng sa o jala ke Diabolose.+ Kotulo+ ke qetello ea tsamaiso ea lintho,+ ’me bakotuli ke mangeloi. 40 Ka hona, feela joalokaha mofoka o bokelloa ’me o chesoa ka mollo, ho tla ba joalo qetellong ea tsamaiso ea lintho.+ 41 Mor’a motho o tla romela mangeloi a hae, ’me a tla bokellela ka ntle ho ’muso oa hae lintho tsohle tse bakang ho khoptjoa+ le batho ba etsang tlōlo ea molao, 42 ’me a tla ba lahlela sebōping+ sa mollo. Ke moo ho lla ha bona le ho tsikitlanya meno ho tla ba teng.+ 43 Ka nako eo ba lokileng ba tla khanya+ ka ho phatsimang joaloka letsatsi+ ’musong oa Ntat’a bona. Ea nang le litsebe a ke a mamele.+

44 “’Muso oa maholimo o joaloka letlotlo le patiloeng tšimong, leo motho a ileng a le fumana ’me a le pata; ka lebaka la thabo eo a nang le eona oa ea ’me a rekise+ lintho tseo a nang le tsona ’me a reke tšimo eo.+

45 “Hape ’muso oa maholimo o joaloka mohoebi ea tsamaeang ea batlang liperela tse ntle. 46 Ha a fumana perela e le ’ngoe e theko e phahameng,+ a tloha ’me ka potlako a rekisa lintho tsohle tseo a neng a e-na le tsona ’me a e reka.+

47 “Hape ’muso oa maholimo o joaloka letlooa le huloang le theoleloang leoatleng ’me le bokella litlhapi tsa mofuta o mong le o mong.+ 48 Ha le tletse ba le hulela lebōpong ’me, ha ba lula fatše, ba bokellela tse ntle+ lijaneng, empa ba lahla tse sa lokang.+ 49 Ke kamoo ho tla ba kateng qetellong ea tsamaiso ea lintho: mangeloi a tla tsoa ’me a arole ba khopo+ har’a ba lokileng+ 50 ’me a tla ba lahlela sebōping sa mollo. Ke moo ho lla ha bona le ho tsikitlanya meno ho tla ba teng.+

51 “Na le utloisisitse lintho tsee tsohle?” Ba re ho eena: “E.” 52 Joale a re ho bona: “Ha ho le joalo, morupeli e mong le e mong oa sechaba, ha a rutiloe mabapi le ’muso oa maholimo,+ o joaloka motho, mong’a ntlo, ea ntšang pokellong ea hae ea letlotlo lintho tse ncha le tsa khale.”+

53 Joale ha Jesu a qetile lipapiso tsena a haola naha ho tloha moo. 54 Ka mor’a hore a kene sebakeng sa habo+ a qala ho ba ruta ka synagogeng+ ea bona, hoo ba ileng ba hlolloa ’me ba re: “Monna eo o fumane bohlale boo le mesebetsi ee e matla hokae? 55 Na eo hase mora oa ’metli oa mapolanka?+ Na ’m ’ae ha a bitsoe Maria, ’me na barab’abo ha ba bitsoe Jakobo le Josefa le Simone le Judase? 56 Le baralib’abo, na kaofela ha ba ’moho le rōna?+ Joale, monna eo o fumane lintho tsee tsohle hokae?”+ 57 Kahoo ba qala ho khoptjoa ka lebaka la hae.+ Empa Jesu a re ho bona: “Moprofeta ha a hlompholloe haese sebakeng sa habo le ka tlung ea hae.”+ 58 Ha aa ka a etsa mesebetsi e matla e mengata moo ka lebaka la ho hloka tumelo ha bona.+

14 Ka nako eo Heroda, ’musi oa setereke, a utloa tlaleho mabapi le Jesu+ 2 ’me a re ho bahlanka ba hae: “Enoa ke Johanne Mokolobetsi. O tsositsoe bafung, ke ka lebaka lena mesebetsi e matla e sebetsang ka ho eena.”+ 3 Etsoe Heroda o ne a ile a tšoara Johanne ’me a mo tlama le ho mo koalla chankaneng ka lebaka la Herodiase mosali oa Filipi mor’abo.+ 4 Kaha Johanne o ne a ntse a re ho eena: “Ha ho lumelloe ke molao hore ebe u na le eena.”+ 5 Leha ho le joalo, le hoja a ne a batla ho mo bolaea, o ne a tšaba bongata, hobane bo ne bo mo nka e le moprofeta.+ 6 Empa ha ho ntse ho ketekoa letsatsi la tsoalo+ ea Heroda morali oa Herodiase a tjeka ’me a khahlisa Heroda haholo 7 hoo a ileng a tšepisa ka kano ho mo fa eng kapa eng eo a e kōpang.+ 8 Joale eena, a laeloa ke ’m ’ae, a re: “Mphe mona ka mokeke hlooho ea Johanne Mokolobetsi.”+ 9 Le hoja morena a ile a sareloa, ka lebaka la ho hlompha likano tsa hae le ba otlileng ka lehlakore le eena a laela hore e fanoe;+ 10 eaba oa romeletsa ’me o etsa hore Johanne a khaoloe hlooho chankaneng. 11 Hlooho ea hae ea tlisoa ka mokeke ’me ea fuoa moroetsana, a e tlisa ho ’m ’ae.+ 12 Qetellong barutuoa ba hae ba tla ’me ba tlosa setopo ba mo pata+ eaba baa tla ba tlalehela Jesu. 13 Ha Jesu a utloa sena a tloha moo ka sekepe ho ea sebakeng se thōko bakeng sa ho ea ba mong;+ empa, ha bongata bo utloa ka hona, ba mo latela ka maoto bo tloha metseng.

14 Joale ha a tsoa a bona bongata bo boholo; a bo hauhela,+ ’me a phekola ba kulang ba bona.+ 15 Empa ha shoalane e tšoara barutuoa ba hae ba tla ho eena ’me ba re: “Sebaka sena se thōko ’me nako e se e ile haholo; e-re bongata bo tsamaee, e le hore bo ka kena metsaneng ’me bo ithekele lintho tse jeoang.”+ 16 Leha ho le joalo, Jesu a re ho bona: “Ha boa lokela ho tloha: lōna bo feng se jeoang.”+ 17 Ba re ho eena: “Ha re na letho mona haese mahobe a mahlano le litlhapi tse peli.”+ 18 A re: “Li tliseng mona ho ’na.” 19 Ka mor’a moo a laela bongata hore bo otle ka lehlakore holim ’a joang ’me a nka mahobe ao a mahlano le litlhapi tseo tse peli, ha a lelalla leholimong, a kōpa tlhohonolofatso+ ’me, ka mor’a ho qhetsola mahobe, a a abela barutuoa, barutuoa bona ba a abela bongata.+ 20 Kahoo bohle ba ja ba khora, ’me ba nka lingoathoana tse setseng, libaskete tse leshome le metso e ’meli tse tletseng.+ 21 Empa leha ho le joalo ba neng ba ja e ne e ka ba banna ba likete tse hlano, ntle ho basali le bana ba banyenyane.+ 22 Joale, ntle ho tieho, a susumelletsa barutuoa ba hae hore ba palame sekepe ’me ba mo etelle pele ho ea ka lehlakoreng le leng, ha a sa ntse a re bongata bo tsamaee.+

23 Qetellong, ha a itse bongata bo tsamaee, a nyolohela thabeng a le mong ho ea rapela.+ Le hoja nako e ne e se e ile, o ne a le moo a le mong. 24 Ka nako ena sekepe se ne se le hōle ka limithara tse makholo-kholo ho tloha moo ho omileng, ba thatafalelitsoe ke maqhubu,+ hobane moea o ne o le khahlanong le bona. 25 Empa ka nako ea tebelo ea bone ea bosiu a tla ho bona, a tsamaea holim ’a leoatle.+ 26 Ha ba re heli! ’me ba mo bona a tsamaea holim ’a leoatle, barutuoa ba khathatseha, ba re: “Ke pono ea mohlolo!”+ ’Me ba hoeletsa ke tšabo. 27 Empa hang-hang Jesu a bua le bona ka mantsoe ana: “E-bang sebete, ke ’na;+ le se ke la tšaba.” 28 Ha Petrose a araba a re ho eena: “Morena, haeba ke uena, ntaele hore ke tle ho uena holim ’a metsi.” 29 A re: “Tloo!” Kapele ka mor’a moo Petrose, a theoha sekepeng,+ a tsamaea holim ’a metsi ’me a leba ho Jesu. 30 Empa ha a sheba moea oa sefefo, a ba le tšabo ’me, ka mor’a ho qala ho teba, a hoeletsa: “Morena, mpholose!” 31 Kapele-pele ha Jesu a otlolla letsoho a mo tšoara ’me a re ho eena: “Uena ea nang le tumelo e nyenyane, ke hobane’ng ha u ile ua itesella ho belaela?”+ 32 Ka mor’a hore ba hloelle ka sekepeng, moea oa sefefo oa kokobela. 33 Joale ba ka sekepeng ba mo inamela, ba re: “Ka sebele u Mor’a Molimo.”+ 34 Ba tšelela mose oane ’me ba tla naheng ea Genesarete.+

35 Ha banna ba sebaka seo ba mo hlokomela ba romeletsa hohle naheng eo e potolohileng, ’me batho ba mo tlisetsa bohle ba neng ba kula.+ 36 Ba qala ho mo kōpa ka tieo hore ba mpe ba ame mophetho o litjellane oa seaparo sa hae sa ka ntle;+ ’me bohle ba ileng ba o ama ba folisoa ka ho feletseng.

15 Joale Bafarisi le bangoli ba tsoang Jerusalema ba tla ho Jesu,+ ba re: 2 “Ke hobane’ng ha barutuoa ba hao ba tlōla neano ea banna ba linakong tsa pele? Ka mohlala, ha ba hlatsoe matsoho a bona ha ba le mothating oa ho ja lijo.”+

3 Ha a araba a re ho bona: “Ke hobane’ng ha le lōna le tlōla taelo ea Molimo ka lebaka la neano+ ea lōna? 4 Ka mohlala, Molimo o ile a re, ‘Hlompha ntat’ao le ’m ’ao’;+ ’me, ‘Ea hlapaolang ntat’ae kapa ’m ’ae phello ea hae e be lefu.’+ 5 Empa le re, ‘Mang kapa mang ea reng ho ntat’ae kapa ’m ’ae: “Eng kapa eng eo ke nang le eona eo u ka fumanang molemo ka eona ho ’na ke mpho e nehetsoeng ho Molimo,” 6 a se ke a hlompha ntat’ae ho hang.’+ Kahoo le entse lentsoe la Molimo lefeela ka lebaka la neano+ ea lōna. 7 Lōna baikaketsi,+ Esaia+ o ile a profeta ka ho loketseng ka lōna, ha a re, 8 ‘Sechaba sena se ntlhompha ka melomo, empa leha ho le joalo lipelo tsa sona li suthetse hōle le ’na.+ 9 Ke ha lefeela hore ebe se ntse se nthapela, hobane se ruta litaelo tsa batho e le lithuto.’”+ 10 Eaba o bitsetsa bongata haufi ’me o re ho bona: “Mamelang ’me le utloisise:+ 11 Se kenang molomong oa motho hase sona se mo silafatsang; empa motho o silafatsoa ke se tsoang molomong oa hae.”+

12 Joale barutuoa ba tla ’me ba re ho eena: “Na ua tseba hore Bafarisi ba ile ba khoptjoa ha ba utloa seo u se buileng?”+ 13 Ha a araba a re: “Semela se seng le se seng seo Ntate oa ka oa leholimo a sa kang a se lema se tla fotholoa.+ 14 Ba tloheleng. Ke batataisi ba foufetseng. Joale, haeba sefofu se tataisa sefofu, ka bobeli li tla oela ka sekoting.”+ 15 Ha Petrose a arabela a re ho eena: “Re hlakisetse papiso ena.”+ 16 Eaba o re: “Na le lōna le ntse le hloka kutloisiso?+ 17 Na ha le hlokomele hore ntho e ’ngoe le e ’ngoe e kenang molomong e fetela ka maleng ’me e ntšetsoa ka sekoting se koahetsoeng sa likhoere-khoere? 18 Leha ho le joalo, lintho tse tsoang molomong li tsoa pelong, ’me lintho tseo li silafatsa motho.+ 19 Ka mohlala, pelong ho tsoa menahano e khopo,+ lipolao, bofebe, bohlola, bosholu, bopaki ba bohata, linyefolo.+ 20 Tsena ke lintho tse silafatsang motho; empa ho ja lijo ka matsoho a sa hlatsuoang ha ho silafatse motho.”+

21 Ha Jesu a tloha moo, joale a ea kena likarolong tsa Tyre le Sidone.+ 22 ’Me, bonang! mosali e mong oa Mofoenisia+ oa libakeng tseo a tsoa ’me a hoeletsa haholo, a re: “Nkhauhele,+ Morena, Mora oa Davida. Morali oa ka o kenoe ke modemona hampe.” 23 Empa ha aa ka a bua lentsoe ho mo araba. Kahoo barutuoa ba hae ba tla ’me ba qala ho mo kōpa: “E-re a tsamaee; hobane o ntse a hoeletsa ka mor’a rōna.” 24 Ha a araba a re: “Ha kea romeloa ho bafe kapa bafe haese ho linku tse lahlehileng tsa ntlo ea Iseraele.”+ 25 Ha mosali eo a tla a qala ho mo inamela, a re: “Morena, nthuse!”+ 26 Ha a araba a re: “Ha hoa nepahala ho nka bohobe ba bana le ho bo akhella lintjanyana.” 27 A re: “E, Morena; empa ha e le hantle lintjanyana li ja makumane a oang litafoleng tsa beng ba tsona.”+ 28 Joale Jesu a re ha a mo araba: “Mosali, tumelo ea hao e khōlō; ho ke ho etsahale ho uena joalokaha u lakatsa.” Morali oa hae a fola ho tloha ka hora eo ho ea pele.+

29 Ha a haola naha ho tloha moo, ka mor’a moo Jesu a tla haufi le leoatle la Galilea,+ ’me, ka mor’a ho nyolohela thabeng,+ a lula moo. 30 Joale bongata bo boholo ba mo atamela, bo e-na le batho ba holofetseng, ba qhoalileng, lifofu, limumu, le ba bangata ba leng ka litsela tse ling, ’me ba ba akhela maotong a hae, ’me a ba phekola;+ 31 hoo bongata bo ileng ba makala ha bo bona limumu li bua le ba holofetseng ba tsamaea le lifofu li bona, ’me ba tlotlisa Molimo oa Iseraele.+

32 Empa Jesu a bitsetsa barutuoa ba hae ho eena ’me a re:+ “Ke hauhela+ bongata bona, hobane e se e le matsatsi a mararo bo lutse le ’na ’me ha bo na letho leo bo le jang; ’me ha ke batle hore bo tsamaee bo lapile. Ho ka etsahala hore bo felloe ke matla tseleng.” 33 Leha ho le joalo, barutuoa ba re ho eena: “Ke hokae sebakeng see se thōko moo re tlang ho fumana mahobe a lekaneng ho khotsofatsa bongata bo boholo hakaale?”+ 34 Eaba Jesu o re ho bona: “Le na le mahobe a makae?” Ba re: “A supileng, le litlhapi tse nyenyane tse seng kae.” 35 Kahoo, ka mor’a ho laela bongata hore bo otle ka lehlakore fatše, 36 a nka mahobe ao a supileng le litlhapi ’me, ka mor’a ho leboha, a li qhetsola ’me a qala ho abela barutuoa, barutuoa bona ba li abela bongata.+ 37 Bohle ba ja ’me ba khora, eaba ba nka libaskete tsa mofaho tse supileng tse tletseng tsa lingoathoana tse setseng.+ 38 Empa leha ho le joalo ba jang e ne e le banna ba likete tse ’nè, ntle ho basali le bana ba banyenyane. 39 Qetellong, ka mor’a hore a re bongata bo tsamaee, a kena ka sekepeng ’me a kena libakeng tsa Magadane.+

16 Bafarisi+ le Basaduse ba mo atamela ’me, e le ho mo leka, ba mo kōpa hore a ba bontše pontšo e tsoang leholimong.+ 2 Ha a araba a re ho bona: “[[Ha shoalane e tšoara le tloaetse ho re, ‘Boemo ba leholimo bo tla ba botle, kaha leholimo le bofubelu ba mollo’; 3 ’me hoseng le re, ‘Kajeno boemo ba leholimo e tla ba ba mariha, ba pula, kaha leholimo le bofubelu ba mollo, empa le shebahala le le letšo.’ Le tseba ho hlalosa ponahalo ea leholimo, empa lipontšo tsa linako le sitoa ho li hlalosa.]]+ 4 Moloko o khopo le o febang o ntse o tsoela pele ho batla pontšo, empa ha ho pontšo eo o tla e+ fuoa haese pontšo ea Jonase.”+ Eaba oa tloha, oa ba siea.+

5 Joale barutuoa ba tšelela ka lehlakoreng le leng ’me ba lebala ho nka mahobe.+ 6 Jesu a re ho bona: “Lulang le butse mahlo ’me le itebele tomosong ea Bafarisi le Basaduse.”+ 7 Kahoo ba qala ho buisana har’a bona, ba re: “Ha rea ka ra nka mahobe leha e le afe.” 8 Ka ho tseba sena, Jesu a re: “Ke hobane’ng ha le buisana tjee har’a lōna, hobane ha le na mahobe, lōna ba nang le tumelo e nyenyane?+ 9 Na le ntse le e-s’o hlakeloe, kapa ha le hopole mahobe a mahlano tabeng ea ba likete tse hlano le hore na le ile la nka libaskete tse kae?+ 10 Kapa mahobe a supileng tabeng ea ba likete tse ’nè le hore na le ile la nka libaskete tse kae tsa mofaho?+ 11 Ho tla joang hore ebe ha le lemohe hore ke ne ke sa bue le lōna ka mahobe? Empa itebeleng tomosong ea Bafarisi le Basaduse.”+ 12 Joale ba utloisisa hore o ne a sa re ba itebele tomosong ea mahobe, empa thutong+ ea Bafarisi le Basaduse.

13 Joale ha a tlile likarolong tsa Cesarea Filipi, Jesu a qala ho botsa barutuoa ba hae: “Batho ba re Mor’a motho ke mang?”+ 14 Ba re: “Ba bang ba re ke Johanne Mokolobetsi,+ ba bang ba re ke Elia,+ ho ntse ho le joalo ba bang ba re ke Jeremia kapa e mong oa baprofeta.” 15 A re ho bona: “Leha ho le joalo, lōna le re ke mang?”+ 16 Ha Simone Petrose a araba a re: “U Kreste,+ Mora oa Molimo ea phelang.”+ 17 Ha Jesu a arabela a re ho eena: “Ho thaba uena, Simone mora oa Jona, hobane nama le mali ha lia ka tsa u senolela hona, empa o ho senoletsoe ke Ntate ea maholimong.+ 18 Hape, ke re ho uena, U Petrose,+ ’me holim ’a lefika+ lena ke tla haha phutheho ea ka, ’me liheke tsa Hadese+ li ke ke tsa e hlōla ka matla.+ 19 Ke tla u fa linotlolo tsa ’muso oa maholimo, ’me eng kapa eng eo u ka e tlamang lefatšeng e tla ba ntho e tlamiloeng maholimong, ’me eng kapa eng eo u ka e lokollang lefatšeng e tla ba ntho e lokolotsoeng maholimong.”+ 20 Joale a laela barutuoa ka thata-thata hore ba se ke ba bolella mang kapa mang hore ke eena Kreste.+

21 Ho tloha ka nako eo ho ea pele Jesu Kreste a qala ho bontša barutuoa ba hae hore o tla ea Jerusalema le ho utloisoa bohloko linthong tse ngata ke banna ba baholo le baprista ba ka sehloohong le bangoli, le ho bolaoa, ’me a tsosoe ka letsatsi la boraro.+ 22 Eaba Petrose o mo nkela ka thōko ’me o qala ho mo khalemela ka matla, o re: “Ikhauhele, Morena; ho hang u ke ke ua ba le qetello ena.”+ 23 Empa, ha a furalla, a re ho Petrose: “Suthela ka mor’a ka, Satane!+ U khopiso ho ’na, hobane u nahana menahano ea batho, eseng ea Molimo.”+

24 Joale Jesu a re ho barutuoa ba hae: “Haeba mang kapa mang a batla ho ntšala morao, a ke a itatole ’me a nke thupa ea hae ea tlhokofatso a ntatele a sa khaotse.+ 25 Etsoe mang kapa mang ea batlang ho pholosa moea oa hae o tla lahleheloa ke oona; empa mang kapa mang ea lahleheloang ke moea oa hae ka lebaka la ka o tla o fumana.+ 26 Etsoe ho tla ba le molemo ofe ha motho a rua lefatše lohle empa a lahleheloa ke moea oa hae?+ kapa motho o tla fana ka eng e le phapanyetsano+ bakeng sa moea oa hae? 27 Etsoe Mor’a motho o reretsoe hore a tle ka khanya ea Ntat’ae a e-na le mangeloi a hae, ’me joale o tla buseletsa e mong le e mong ho ea ka boitšoaro+ ba hae. 28 Kannete ke re ho lōna ho na le ba bang ba emeng mona bao ho hang ba ke keng ba latsoa lefu pele ba bona Mor’a motho a tla ka ’muso oa hae.”+

17 Matsatsi a tšeletseng hamorao Jesu a nka Petrose le Jakobo le Johanne mor’abo ’me a nyolohela le bona thabeng e phahameng ba le bang.+ 2 A fetoha sebōpeho ka pel’a bona, ’me sefahleho sa hae sa khanya joaloka letsatsi,+ le liaparo tsa hae tsa ka ntle tsa phatsima joaloka leseli.+ 3 ’Me, bonang! Moshe le Elia ba bonahala ho bona, ba buisana le eena.+ 4 Eaba Petrose o re ho Jesu: “Morena, ho hotle hore re be mona. Haeba u lakatsa, ke tla hloma litente tse tharo mona, e ’ngoe bakeng sa hao e ’ngoe bakeng sa Moshe e ’ngoe bakeng sa Elia.”+ 5 Ha a sa ntse a bua, bonang! leru le khanyang la ba koahela, ’me, bonang! lentsoe le tsoang lerung, le re: “Enoa ke Mora oa ka, ea ratoang, eo ke mo amohetseng;+ mo mameleng.”+ 6 Ha ba utloa sena barutuoa ba itihela fatše ka lifahleho ’me ba tšoha haholo.+ 7 Joale Jesu a atamela ’me, ha a ba ama, a re: “Emang ’me le se ke la tšaba.”+ 8 Ha ba phahamisa mahlo, ha ho eo ba ileng ba mo bona haese Jesu feela.+ 9 ’Me ha ba ntse ba theoha thabeng, Jesu a ba laela, a re: “Ho se ke ha e-ba le eo le mo bolellang pono ena ho fihlela Mor’a motho a tsosoa bafung.”+

10 Leha ho le joalo, barutuoa ba mo botsa potso ena: “Joale, ke hobane’ng ha bangoli ba re Elia o tla tla pele?”+ 11 Ha a araba a re: “Ka sebele, Elia oa tla ’me o tla tsosolosa lintho tsohle.+ 12 Leha ho le joalo, ke re ho lōna Elia o se a tlile ’me ha baa ka ba mo hlokomela empa ba ile ba mo etsa lintho tseo ba neng ba li batla. Ka tsela ena le Mor’a motho o reretsoe hore a utloe bohloko matsohong a bona.”+ 13 Joale barutuoa ba lemoha hore o ne a bua le bona ka Johanne Mokolobetsi.+

14 Ha ba tla ba lebile bongata,+ monna e mong a mo atamela, a mo khumamela ’me a re: 15 “Morena, hauhela mora oa ka, hobane o tšoeroe ke sethoathoa ’me oa kula, kaha o oela hangata mollong le hangata ka metsing;+ 16 ’me ke ile ka mo tlisa ho barutuoa ba hao, empa ba ile ba sitoa ho mo phekola.”+ 17 Ha Jesu a araba a re: “Lōna moloko+ o se nang tumelo le o sothehileng, ke tla lula le lōna halelele hakae? Ke tla le mamella halelele hakae? Mo tlise koano ho ’na.” 18 Joale Jesu a mo khalemela ka matla, ’me modemona a tsoa ho eena;+ ’me moshanyana eo a phekoleha ho tloha ka hora eo.+ 19 Kapele ka mor’a moo barutuoa ba tla ho Jesu boinotšing ’me ba re: “Ke hobane’ng ha re ile ra sitoa ho mo leleka?”+ 20 A re ho bona: “Ka lebaka la tumelo ea lōna e nyenyane. Etsoe kannete ke re ho lōna, Haeba le e-na le tumelo e boholo ba thollo ea mosetareta, le tla re ho thaba ena, ‘Tloha mona u ee mane,’ ’me e tla tloha, ’me ha ho letho leo le ke keng la khona ho le etsa.”+ 21 ——

22 E ne e le ha ba ntse ba bokane Galilea moo Jesu a ileng a re ho bona: “Mor’a motho o reretsoe ho ekeloa matsohong a batho,+ 23 ba tla mo bolaea, ’me ka letsatsi la boraro o tla tsosoa.”+ Ka lebaka leo ba sareloa haholo.+

24 Ka mor’a hore ba fihle Kapernauma banna ba bokellang [lekhetho] la lidrakema tse peli ba atamela Petrose ’me ba re: “Na mosuoe oa lōna ha a lefe [lekhetho] la lidrakema tse peli?”+ 25 A re: “E, oa le lefa.” Leha ho le joalo, ha a kena ka tlung Jesu a mo etella pele ka ho re: “U nahana joang, Simone? Marena a lefatše a amohela lekhetho la thepa kapa lekhetho la hlooho ho bo-mang? Ho bara ba ’ona kapa ho basele?” 26 Ha a re: “Ho basele,” Jesu a re ho eena: “Joale, ka sebele, bara ba lokolohile lekhethong. 27 Empa e le hore re se ke ra etsa hore ba khoptjoe,+ uena e-ea leoatleng, u lahlele selope, ’me u nke tlhapi ea pele e nyolohang ’me, ha u e ahlamisa, u tla fumana chelete ea tšepe ea statera. U e nke ’me u ba fe eona bakeng sa ka le uena.”+

18 Ka hora eo barutuoa ba atamela Jesu ’me ba re: “Ha e le hantle ke mang e moholo ’musong oa maholimo?”+ 2 Kahoo, ha a bitsetsa ngoana e monyenyane ho eena, a mo emisa har’a bona+ 3 ’me a re: “Kannete ke re ho lōna, Ntle le hore le sokolohe ’me le be joaloka bana ba banyenyane,+ ho hang le ke ke la kena ’musong oa maholimo.+ 4 Ka hona, mang kapa mang ea tla ikokobetsa+ joaloka ngoana enoa e monyenyane ke eena e moholo ’musong oa maholimo;+ 5 ’me mang kapa mang ea amohelang ngoana e mong e monyenyane tjena ka lebitso la ka le ’na oa nkamohela.+ 6 Empa mang kapa mang ea khopisang e mong oa ba banyenyane bana ba behang tumelo ho ’na, ho molemo haholo ho eena hore leloala+ le kang le sothoang ke esele le leketlisoe molaleng oa hae ’me a tebisoe leoatleng le pharaletseng, le bulehileng.+

7 “Ho malimabe lefatše ka lebaka la likhopiso! Ka ho hlakileng, ha ho ka tsela e ’ngoe likhopiso li tla tla,+ empa ho malimabe motho eo khopiso+ e tlang ka eena! 8 Joale, haeba letsoho la hao kapa leoto la hao le etsa hore u khoptjoe, u le khaole ’me u le lahlele hōle le uena;+ ho molemo hore u kene bophelong u qhoalile kapa u holofetse ho e-na le ho lahleloa mollong o sa feleng+ u e-na le matsoho a mabeli kapa maoto a mabeli. 9 Hape, haeba leihlo la hao le etsa hore u khoptjoe, u le honye ’me u le lahlele hōle le uena; ho molemo hore u kene bophelong u e-na le leihlo le le leng ho e-na le ho lahleloa Gehena+ ea mollo u e-na le mahlo a mabeli. 10 Iponeleng hore le se ke la nyelisa e mong oa ba banyenyane bana; etsoe kea le bolella hore mangeloi+ a bona leholimong kamehla a bona sefahleho sa Ntate ea leholimong.+ 11 ——

12 “Le nahana joang? Haeba motho ea itseng a e-ba le linku tse lekholo ’me e ’ngoe ea tsona e hlahlathela,+ na a ke ke a tlohela tse mashome a robong a metso e robong lithabeng ’me a tsoe ho ea batla e hlahlathelang?+ 13 Haeba ho etsahala hore a e fumane, ka sebele kea le bolella, o e thabela haholo ho feta tse mashome a robong a metso e robong tse sa hlahlathelang.+ 14 Ka ho tšoanang hase ntho e lakatsehang ho Ntate ea leholimong hore e mong oa ba banyenyane bana a timele.+

15 “Ho feta moo, haeba mor’eno a etsa sebe, e-ea u totobatse phoso ea hae pakeng tsa hao le eena le le bang.+ Haeba a u mamela, u ruile mor’eno.+ 16 Empa haeba a sa mamele, u nke a le mong kapa ba bang ba babeli, e le hore taba e ’ngoe le e ’ngoe e ka tiisoa ka melomo ea lipaki tse peli kapa tse tharo.+ 17 Haeba a sa ba mamele, u bue le phutheho. Haeba a sa mamele le phutheho, ho uena a be feela joaloka motho oa lichaba+ le joaloka ’mokelli oa lekhetho.+

18 “Kannete ke re ho lōna, Lintho life kapa life tseo le ka li tlamang lefatšeng e tla ba lintho tse tlamiloeng leholimong, ’me lintho life kapa life tseo le ka li lokollang lefatšeng e tla ba lintho tse lokolotsoeng leholimong.+ 19 Kannete ke boetse ke re ho lōna, Haeba ba babeli ba lōna lefatšeng ba lumellana ka ntho leha e le efe ea bohlokoa eo ba lokelang ho e kōpa, e tla ba etsahalla ka lebaka la Ntate ea leholimong.+ 20 Etsoe moo ho nang le ba babeli kapa ba bararo ba bokaneng ka lebitso la ka,+ ke teng moo har’a bona.”+

21 Joale Petrose a tla ’me a re ho eena: “Morena, ke ka makhetlo a makae mor’eso a lokelang ho ntšiteloa ’me ke mo tšoarele?+ Ho fihlela makhetlong a supileng?”+ 22 Jesu a re ho eena: “Ke re ho uena, eseng, Ho fihlela makhetlong a supileng, empa, Ho fihlela makhetlong a mashome a supileng a metso e supileng.+

23 “Ke ka lebaka leo ’muso oa maholimo o leng joaloka motho, morena,+ ea neng a batla ho lokisa litlaleho+ le makhoba a hae. 24 Ha a qala ho li lokisa, ha tlisoa motho ea neng a mo kolota litalenta tse likete tse leshome [=lidenari tse ^60 000 000]. 25 Empa kahobane o ne a se na mokhoa oa ho lefa, mong’a hae a laela hore eena le mosali oa hae le bana ba hae le lintho tsohle tseo a neng a e-na le tsona ba rekisoe ’me ho lefshoe.+ 26 Ka hona lekhoba leo la itihela fatše ’me la qala ho mo inamela, la re, ‘U se ke ua mphella pelo ke tla u lefa ntho e ’ngoe le e ’ngoe.’ 27 A hauhile ke sena, mong’a lekhoba leo a le tlohela hore le tsamaee+ ’me a hlakola molato+ oa lona. 28 Empa lekhoba leo la tsoa ’me la fumana le leng la makhoba-’moho le lona le neng le le kolota lidenari+ tse lekholo; ’me, ha le le tšoara, la qala ho le khama, la re, ‘Lefa eng kapa eng eo u e kolotang.’ 29 Ka hona lekhoba-’moho le lona la itihela fatše ’me la qala ho le kōpa ka tieo, la re, ‘U se ke ua mphella pelo+ ke tla u lefa.’ 30 Leha ho le joalo, le ne le sa rate, empa la tloha ’me la etsa hore le lahleloe chankaneng ho fihlela le ka lefa seo le neng le se kolota. 31 Ka hona, ha makhoba-’moho le lona a bona lintho tse neng li etsahetse, a sareloa haholo, ’me a ea eaba a hlakisetsa mong’a ’ona lintho tsohle tse neng li etsahetse.+ 32 Joale mong’a lona a le bitsa ’me a re ho lona, ‘Lekhoba le khopo, ke u hlakoletse molato oo kaofela, ha u ne u nkōpa ka tieo. 33 Na le uena u ne u sa tšoanela hore ebe u hauhetse+ lekhoba-’moho le uena, joalokaha le ’na ke u hauhetse?’+ 34 Mong’a lona, a halefile,+ a nehelana ka lona ho balebeli ba teronko, ho fihlela le ka lefa sohle seo le neng le se kolota. 35 Ntate oa ka oa leholimo le eena o tla sebetsana le lōna ka mokhoa+ o tšoanang haeba le sa tšoarele e mong le e mong mor’abo ho tloha lipelong tsa lōna.”+

19 Joale ha Jesu a qetile mantsoe ana, a tloha Galilea ’me a tla meeling ea Judea ka mose ho Jordane.+ 2 Hape, bongata bo boholo ba mo latela, ’me a bo phekola moo.+

3 Bafarisi ba tla ho eena, ba ikemiselitse ho mo leka ’me ba re: “Na ho lumelloa ke molao hore monna a hlale mosali oa hae ka lebaka leha e le lefe?”+ 4 Ha a araba a re: “Na ha lea ka la bala hore ea ba bōpileng tšimolohong o ba entse e le e motona le e motšehali+ 5 ’me a re, ‘Ka lebaka lena monna o tla siea ntat’ae le ’m ’ae+ ’me o tla khomarela mosali oa hae, ’me bao ba babeli e tla ba nama e le ’ngoe’?+ 6 E leng hore ha ba sa le babeli, empa e se e le nama e le ’ngoe. Ka hona, seo Molimo a se kopantseng hammoho jokong ho se ke ha e-ba le motho ea se arolang.”+ 7 Ba re ho eena: “Joale, ke hobane’ng ha Moshe a ile a laela hore ho fanoe ka lengolo la bopaki la ho mo bolella hore a tsamaee le ho mo hlala?”+ 8 A re ho bona: “Moshe, o ile a le fa tumello ea ho hlala basali ba lōna ka lebaka la bothata+ ba lipelo tsa lōna, empa ha hoa ba joalo ho tloha tšimolohong.+ 9 Ke re ho lōna mang kapa mang ea hlalang mosali oa hae, haese ka lebaka la bohlola, ’me a nyala e mong oa feba.”+

10 Barutuoa ba re ho eena: “Haeba boemo bo le joalo ka monna le mosali oa hae, ha ho bohlale ho nyala.”+ 11 A re ho bona: “Hase batho bohle ba etsetsang polelo eo sebaka, empa ke feela ba nang le mpho eo.+ 12 Etsoe ho na le maqhalaha a ileng a tsoaloa a le joalo ho tsoa lipōpelong+ tsa bo-’m ’a ’ona, ’me ho na le maqhalaha a ileng a etsoa maqhalaha ke batho, hape ho na le maqhalaha a ikentseng maqhalaha ka lebaka la ’muso oa maholimo. Ea ka e etsetsang sebaka a ke a e etsetse sebaka.”+

13 Joale bana ba banyenyane ba tlisoa ho eena, e le hore a ba behe matsoho le ho etsa thapelo; empa barutuoa ba ba nyatsa ka matla.+ 14 Leha ho le joalo, Jesu a re: “Tlohelang bana ba banyenyane, ’me le khaotse ho ba sitisa ho tla ho ’na, etsoe ’muso oa maholimo ke oa ba joaloka bona.”+ 15 A ba beha matsoho eaba o tloha moo.+

16 Joale, bonang! e mong a tla ho eena ’me a re: “Mosuoe, ke etse molemo ofe e le hore ke fumane bophelo bo sa feleng?”+ 17 A re ho eena: “Ke hobane’ng ha u mpotsa ka se molemo? O Mong ea molemo.+ Leha ho le joalo, haeba u batla ho kena bophelong, u boloke litaelo u sa khaotse.”+ 18 A re ho eena: “Life?”+ Jesu a re: “U se ke ua bolaea,+ U se ke ua feba,+ U se ke ua utsoa,+ U se ke ua beha bopaki ba bohata,+ 19 Hlompha ntat’ao le ’m’ao,+ hape, U rate moahelani oa hao joalokaha u ithata.”+ 20 Mohlankana eo a re ho eena: “Ke bolokile tsena tsohle; ke sa ntse ke haelloa ke eng?” 21 Jesu a re ho eena: “Haeba u batla ho phethahala, e-ea u rekise lintho tsa hao u fe mafutsana ’me u tla ba le letlotlo leholimong,+ u tle ’me u be molateli oa ka.”+ 22 Ha mohlankana eo a utloa polelo ena, a tloha a saretsoe, kaha o ne a e-na le matlotlo a mangata.+ 23 Empa Jesu a re ho barutuoa ba hae: “Kannete ke re ho lōna e tla ba ntho e thata hore morui a kene ’musong oa maholimo.+ 24 Hape ke re ho lōna, Ho bonolo hore kamele e tsoe lesobeng la nale ho e-na le hore morui a kene ’musong oa Molimo.”+

25 Ha barutuoa ba utloa hoo, ba makala haholo, ba re: “Ka sebele ke mang ea ka pholohang?”+ 26 A ba shebile mahlong, Jesu a re ho bona: “Ho batho hona ho ke ke ha khoneha, empa lintho tsohle lia khoneha ho Molimo.”+

27 Joale Petrose a re ho eena ha a araba: “Bona! Re siile lintho tsohle ’me ra u latela; re tla fumana eng?”+ 28 Jesu a re ho bona: “Kannete ke re ho lōna, Pōpong e entsoeng bocha, ha Mor’a motho a lula teroneng ea hae e khanyang, lōna ba ntatetseng le lōna le tla lula literoneng tse leshome le metso e ’meli, le ahlola meloko e leshome le metso e ’meli ea Iseraele.+ 29 E mong le e mong ea siileng matlo kapa barab’abo kapa baralib’abo kapa ntate kapa ’mè kapa bana kapa masimo ka lebaka la lebitso la ka o tla amohela ho eketsehileng ka makhetlo a mangata ’me o tla rua bophelo bo sa feleng.+

30 “Empa ba bangata ba pele e tla ba ba ho qetela ’me ba ho qetela e be ba pele.+

20 “Etsoe ’muso oa maholimo o joaloka motho, mong’a ntlo, ea ileng a tsoa hoseng haholo ho ea hira basebetsi bakeng sa serapa sa hae sa morara.+ 2 Ha a lumellane le basebetsi ka denari bakeng sa letsatsi,+ a ba romela serapeng sa hae sa morara. 3 Ha a tsoa hape hoo e ka bang ka hora ea boraro,+ a bona ba bang ba eme ba hloka mosebetsi ’marakeng;+ 4 le ho bao a re, ‘Le lōna, e-eang serapeng sa morara, ’me ke tla le fa eng kapa eng e loketseng.’ 5 Kahoo ba ea. A boela a tsoa hoo e ka bang ka hora ea botšelela+ le ka hora ea borobong+ ’me a etsa ka ho tšoanang. 6 Qetellong, hoo e ka bang ka hora ea leshome le motso o mong a tsoa ’me a fumana ba bang ba eme, ’me a re ho bona, ‘Ke hobane’ng haesale le ema moo letsatsi lohle le hloka mosebetsi?’ 7 Ba re ho eena, ‘Hobane ha ho ea re hirileng.’ A re ho bona, ‘Le lōna e-eang serapeng sa morara.’+

8 “Ha e e-ba shoalane,+ mong’a serapa sa morara a re ho monna oa hae ea ikarabellang, ‘Bitsa basebetsi ’me u ba lefe meputso ea bona,+ ho qala ka oa ho qetela ho isa ho oa pele.’ 9 Ha banna ba hora ea leshome le motso o mong ba tla, e mong le e mong a amohela denari. 10 Kahoo, ha ba pele ba tla, ba nahana hore ba ne ba tla amohela ho eketsehileng; empa le bona ba amohela tefo ka tekanyo ea denari. 11 Ha ba e amohela ba qala ho korotlela mong’a ntlo+ 12 ’me ba re, ‘Bana ba ho qetela ba entse mosebetsi oa hora e le ’ngoe; ho ntse ho le joalo u ba lekantse le rōna ba jereng moroalo oa letsatsi lena le mocheso o bataolang!’ 13 Empa ha a araba e mong oa bona a re, ‘Monn ’a heso, ha ke u fosetse. U ile ua lumellana le ’na ka denari, na ha ho joalo?+ 14 Nka sa hao ’me u tsamaee. Ke batla ho fa enoa oa ho qetela ho tšoanang le hoo ke u fileng hona.+ 15 Na ha ho lumelloe ke molao hore ke etse seo ke se batlang ka lintho tsa ka? Kapa na leihlo la hao le khopo+ hobane ke le molemo?’+ 16 Ka tsela ena ba ho qetela e tla ba ba pele, ’me ba pele e be ba ho qetela.”+

17 Joale ha a le haufi le ho nyolohela Jerusalema, Jesu a nkela barutuoa ba leshome le metso e ’meli+ boinotšing ’me a re ho bona ha ba le tseleng: 18 “Bonang! Re nyolohela Jerusalema, ’me ho tla nehelanoa ka Mor’a motho ho baprista ba ka sehloohong le bangoli, ba tla mo ahlolela lefu,+ 19 ’me ba tla nehelana ka eena ho batho ba lichaba hore ba mo fetole litšeho le ho mo shapa le ho mo khokhothela thupeng,+ ’me o tla tsosoa ka letsatsi la boraro.”+

20 Joale ’mè oa bara ba Zebedea+ a mo atamela a e-na le bara ba hae, a mo inamela le ho kōpa ho hong ho eena.+ 21 Jesu a re ho eena: “U batla’ng?” A re ho eena: “Laela hore bara bana ba ka ba babeli ba lule, e mong ka letsohong la hao le letona ’me e mong ka ho le letšehali, ’musong oa hao.”+ 22 Ha Jesu a araba a re: “Ha le tsebe seo le se kōpang. Na le ka noa senoelo+ seo ke leng haufi le ho se noa?” Ba re ho eena: “Re ka se noa.” 23 A re ho bona: “Ka sebele le tla noa senoelo+ sa ka, empa ha e le ho lula ka letsohong la ka le letona le ka ho le letšehali hase ’na ea ka fanang ka hona, empa ke ha ba ho lokiselitsoeng ke Ntate.”+

24 Ha ba bang ba leshome ba utloa ka sena, ba halefela bara bana ba babeli ba motho.+ 25 Empa Jesu, ha a ba bitsetsa ho eena, a re: “Lea tseba hore babusi ba lichaba ba rena ka thata holim ’a tsona le banna ba baholo ba sebelisa bolaoli holim ’a tsona.+ 26 Ha hoa lokela ho ba ka tsela ena har’a lōna;+ empa mang kapa mang ea batlang ho ba moholo har’a lōna e lokela ho ba mosebeletsi oa lōna,+ 27 ’me mang kapa mang ea batlang ho ba oa pele har’a lōna e tla ba lekhoba la lōna.+ 28 Feela joalokaha Mor’a motho a sa ka a tlela ho sebeletsoa, empa ho sebeletsa+ le ho fana ka moea oa hae hore e be thekollo e le phapanyetsano bakeng sa ba bangata.”+

29 Eare ha ba tsoa Jeriko+ bongata bo boholo ba mo latela. 30 ’Me, bonang! banna ba babeli ba foufetseng ba lutseng ka thōko ho tsela, ha ba utloa hore Jesu o feta moo, ba hoeletsa, ba re: “Morena, re hauhele, Mora oa Davida!”+ 31 Empa bongata ba ba bolella ka thata-thata hore ba khutse; leha ho le joalo ba hoeletsa haholo, ba re: “Morena, re hauhele, Mora oa Davida!”+ 32 Kahoo Jesu a ema, a ba bitsa ’me a re: “Le batla hore ke le etsetse’ng?” 33 Ba re ho eena: “Morena, mahlo a rōna a ke a bulehe.”+ 34 A susumelitsoe ke khauho, Jesu a ama mahlo+ a bona, ’me kapele-pele ba bona, ’me ba mo latela.+

21 Kahoo, ha ba atamela Jerusalema ’me ba fihla Bethefage Thabeng ea Mehloaare, joale Jesu a romela barutuoa ba babeli,+ 2 a re ho bona: “Tsamaeang le kene motsaneng oane oo le o bonang, ’me hang-hang le tla fumana esele e tlamiloeng, hammoho le petsana; li tlamolleng ’me le li tlise ho ’na.+ 3 Haeba e mong a bua ntho leha e le efe ho lōna, le re, ‘Morena oa li hloka.’ ’Me o tla li romela kapele-pele.”

4 Sena se etsahetse e le hore ho ka phethahala se builoeng ka moprofeta, ha a re: 5 “Bolellang morali oa Sione, ‘Bona! Morena oa hao o tla ho uena,+ a le maikutlo a bonolo,+ ’me a palame esele, e, petsana, se tsoetsoeng ke pelesa.’”+

6 Kahoo barutuoa ba tsamaea ’me ba etsa feela joalokaha Jesu a ile a ba laela. 7 Ba tlisa esele le petsana ea eona, ’me ba beha liaparo tsa bona tsa ka ntle holim ’a tsona, eaba oa li palama.+ 8 Boholo ba bongata ba ala liaparo tsa bona tsa ka ntle+ tseleng, ha ba bang ba qala ho poma makala lifateng ’me ba a ala tseleng.+ 9 Ha e le bongata, bo mo eteletseng pele le bo mo latelang ba ’na ba hoeletsa: “Rea rapela,+ pholosa Mora oa Davida!+ Ho hlohonolofetse ea tlang ka lebitso la Jehova!+ Rea rapela, mo pholose bophahamong bo holimo!”+

10 Joale ha a kena Jerusalema,+ motse oohle oa hlōkoleha, oa re: “Enoa ke mang?” 11 Bongata ba ’na ba bolela: “Enoa ke moprofeta+ Jesu, ea tsoang Nazaretha ea Galilea!”

12 Jesu a kena ka tempeleng a phahla bohle ba rekisang le ba rekang ka tempeleng, ’me a phethola litafole tsa ba ananyang chelete le libenche tsa ba rekisang maeba.+ 13 A re ho bona: “Ho ngoliloe, ‘Ntlo ea ka e tla bitsoa ntlo ea thapelo,’+ empa le e etsa lehaha la masholu.”+ 14 Hape, batho ba foufetseng le ba holofetseng ba tla ho eena ka tempeleng, ’me a ba phekola.

15 Ha baprista ba ka sehloohong le bangoli ba bona lintho tse hlollang tseo a li entseng+ le bashanyana ba neng ba hoeletsa ka tempeleng ’me ba re: “Rea rapela,+ pholosa Mora oa Davida!”+ ba halefa 16 ’me ba re ho eena: “Na u utloa seo baa ba se buang?” Jesu a re ho bona: “E. Na ha le e-s’o ka le bala+ see, ‘Ho tsoa melomong ea bana le ba anyang u fane ka thoriso’?”+ 17 Ha a ba siea a tsoela ka ntle ho motse a ea Bethani ’me a hlola bosiu moo.+

18 Ha a khutlela motseng hoseng haholo, a lapa.+ 19 Eaba o re heli! ’me o bona sefate sa feiga haufi le tsela eaba o ea ho sona, empa a se ke a fumana letho+ ho sona haese makhasi feela, eaba o re ho sona: “Ho se ke ha hlola ho e-ba le litholoana tse tsoang ho uena ka ho sa feleng.”+ Eaba sefate seo sa feiga se omella hang-hang. 20 Empa ha barutuoa ba bona sena, ba makala, ba re: “Ho tla joang hore ebe sefate sa feiga se ile sa omella hang-hang?”+ 21 Ha Jesu a araba a re ho bona: “Kannete ke re ho lōna, Haeba feela le e-na le tumelo ’me le sa belaele,+ hase feela hore le tla etsa seo ke ileng ka se etsa ho sefate sa feiga, empa hape haeba le re ho thaba ena, ‘Phahama ’me u lahleloe ka leoatleng,’ ho tla etsahala.+ 22 Lintho tsohle tseo le li kōpang ka thapelo, le e-na le tumelo, le tla li amohela.”+

23 Joale ka mor’a hore a kene ka tempeleng, baprista ba ka sehloohong le banna ba baholo ba sechaba ba tla ho eena ha a ntse a ruta ’me ba re:+ “Lintho tsee u li etsa ka matla afe? ’Me ke mang ea u fileng matla aa?”+ 24 Ha Jesu a araba a re ho bona: “Le ’na, ke tla le botsa ntho e le ’ngoe. Haeba le mpolella eona, le ’na ke tla le bolella hore na ke etsa lintho tsena ka matla afe:+ 25 Kolobetso ea Johanne, e ne e tsoa mohloling ofe? E ne e tsoa leholimong kapa ho batho?”+ Empa ba qala ho buisana, ba re: “Haeba re re, ‘E tsoa leholimong,’ o tla re ho rōna, ‘Joale, ke hobane’ng ha le sa ka la mo lumela?’+ 26 Leha ho le joalo, haeba re re, ‘E tsoa ho batho,’ re tšaba bongata,+ kaha kaofela bo nka Johanne e le moprofeta.”+ 27 Kahoo ha ba araba Jesu ba re: “Ha re tsebe.” Le eena, a re ho bona: “Le ’na ha ke le bolelle hore na ke etsa lintho tsena ka matla afe.+

28 “Le nahana joang? Monna e mong o ne a e-na le bana ba babeli.+ Ha a e-ea ho oa pele, a re, ‘Ngoana, e-ea u e’o sebetsa serapeng sa morara kajeno.’ 29 Enoa ha a araba a re, ‘Ke tla ea, mohlomphehi,’+ empa a se ke a ea. 30 Ha a atamela oa bobeli, a bua se tšoanang. Enoa ha a araba a re, ‘Nke ke.’ Ka mor’a moo a ikutloa a soabile+ ’me a ea. 31 Ke ofe ho ba babeli baa ea ileng a etsa thato ea ntat’ae?”+ Ba re: “Oa bobeli.” Jesu a re ho bona: “Kannete ke re ho lōna babokelli ba lekhetho le liotsoa ba le etella pele ho kena ’musong oa Molimo. 32 Etsoe Johanne o ile a tla ho lōna ka tsela ea ho loka,+ empa ha lea ka la mo lumela.+ Leha ho le joalo, babokelli ba lekhetho le liotsoa ba ile ba mo lumela,+ ’me lōna, le hoja le ile la bona sena, ha lea ka la ikutloa le soabile ka mor’a moo e le hore le mo lumele.

33 “Utloang papiso e ’ngoe: Ho ne ho e-na le motho e mong, mong’a ntlo,+ ea ileng a lema serapa sa morara ’me a etsa motero ho se potoloha eaba o cheka sehatelo sa veine ho sona ’me o emisa tora,+ eaba o se hirisetsa balemi, ’me o etela hōle.+ 34 Ha nako ea litholoana e fihla hape, a roma makhoba a hae ho balemi ho ea lata litholoana tsa hae. 35 Leha ho le joalo, balemi bao ba nka makhoba a hae, ’me le leng ba le khakhatha, le leng ba le bolaea, le leng ba le tlepetsa ka majoe.+ 36 A boela a roma makhoba a mang, a fetang a pele, empa ba etsa se tšoanang ho ana.+ 37 Qetellong a roma mora oa hae ho bona, a re, ‘Ba tla hlompha mora oa ka.’ 38 Ha balemi ba bona mora ba buisana ba re, ‘Enoa ke eena mojalefa;+ tloong, a re mo bolaeeng ’me re fumane lefa la hae!’+ 39 Kahoo ba mo nka ba mo lahlela ka ntle ho serapa sa morara ’me ba mo bolaea.+ 40 Ka hona, ha mong’a serapa sa morara a tla, o tla etsa’ng ka balemi bao?” 41 Ba re ho eena: “Kahobane ba babe, o tla ba timetsa+ hampe ’me o tla hirisetsa balemi ba bang serapa seo sa morara, ba tla mo fa litholoana ha e e-ba nako ea tsona.”+

42 Jesu a re ho bona: “Na ha le e-s’o ka le bala ka Mangolong, ‘Lejoe leo lihahi li ileng tsa le lahla+ ke lona le fetohileng lejoe la sekhutlo la sehlooho.+ Le bile teng le tsoa ho Jehova, ’me ke le hlollang mahlong a rōna’? 43 Ke ka lebaka lena ke reng ho lōna, ’Muso oa Molimo o tla nkuoa ho lōna ’me o fuoe sechaba se hlahisang litholoana tsa oona.+ 44 Hape, motho ea oelang holim ’a lejoe lena o tla tamukana. Ha e le mang kapa mang eo le oelang holim ’a hae, le tla mo silakanya.”+

45 Joale ha baprista ba ka sehloohong le Bafarisi ba utloile lipapiso tsa hae, ba elelloa hore o ne a bua ka bona.+ 46 Empa, le hoja ba ne ba batla ho mo tšoara, ba ile ba tšaba bongata, hobane bona bo ne bo mo nka e le moprofeta.+

22 Ho ekelletsa moo ha Jesu a araba a boela a bua le bona ka lipapiso, a re:+ 2 “’Muso oa maholimo o joaloka motho, morena, ea ileng a etsetsa mora oa hae mokete oa lenyalo.+ 3 ’Me a romela makhoba a hae ho ea bitsa ba memetsoeng moketeng oa lenyalo,+ empa ba ne ba sa rate ho tla.+ 4 A boela a romela makhoba a mang,+ a re, ‘Bolellang ba memiloeng: “Bonang! Ke lokisitse lijo+ tsa ka tsa motšehare, lipoho le liphoofolo tsa ka tse nontšitsoeng li hlabiloe, ’me lintho tsohle li lokile. Tloong moketeng oa lenyalo.”’+ 5 Empa ka ho se tsotelle ba tloha, e mong a ea tšimong ea hae, e mong a ea khoebong ea hae;+ 6 empa ba bang kaofela, ha ba tšoara makhoba a hae, ba a nyelisa ’me ba a bolaea.+

7 “Empa morena a tlala khalefo, ’me a romela mabotho a hae eaba o timetsa babolai bao ’me o chesa motse oa bona.+ 8 Joale a re ho makhoba a hae, ‘Ka sebele mokete oa lenyalo o lokile, empa ba neng ba memiloe ba ne ba sa tšoanelehe.+ 9 Ka hona e-eang litseleng tse tsoelang ka ntle ho motse, ’me leha e le mang eo le mo fumanang le mo memele moketeng oa lenyalo.’+ 10 Ka lebaka leo makhoba ao a tsoela litseleng ’me a bokella bohle bao a ba fumaneng, ba khopo le ba molemo;+ ’me kamore ea litšebeletso tsa lechato ea tlala ba otlileng ka lehlakore tafoleng.+

11 “Ha morena a kena ho tla hlahloba baeti a re heli! ’me a bona mane monna e mong ea sa aparang seaparo+ sa lenyalo. 12 Kahoo a re ho eena, ‘Monn ’a heso, u kene joang ka moo u sa apara seaparo+ sa lenyalo?’ A se ke a khona ho bua. 13 Joale morena a re ho bahlanka ba hae, ‘Mo tlameng maoto le matsoho ’me le mo lahlele lefifing ka ntle. Ke moo ho lla ha hae le ho tsikitlanya meno ho tla ba teng.’+

14 “Etsoe ba memiloeng ba bangata, empa ho khethiloe ba seng bakae.”+

15 Joale Bafarisi ba tsamaea ’me ba rerisana hore ba mo tšoase ka puo ea hae.+ 16 Kahoo ba romela barutuoa ba bona ho eena, hammoho le balateli ba sehlopha sa Heroda,+ ba re: “Mosuoe, rea tseba hore u na le ’nete le hore u ruta tsela ea Molimo ka ’nete, le hore ha u tsotelle motho leha e le mang, etsoe ha u talime ponahalo ea ka ntle ea batho.+ 17 Ka hona, re bolelle, U nahana joang? Na ho lumelloa ke molao ho lefa lekhetho la hlooho ho Cesare kapa che?”+ 18 Empa Jesu, ka ho tseba bokhopo ba bona, a re: “Baikaketsi, le ntekela’ng?+ 19 Mpontšeng chelete ea tšepe ea lekhetho la hlooho.” Ba mo tlisetsa denari. 20 ’Me a re ho bona: “Setšoantšo le mongolo oo ke tsa mang?”+ 21 Ba re: “Ke tsa Cesare.” Joale a re ho bona: “Ka hona, le lefe Cesare lintho tsa Cesare, empa le lefe Molimo lintho tsa Molimo.”+ 22 Joale, ha ba utloa seo, ba tsota, ’me ha ba mo siea ba tloha.+

23 Letsatsing leo Basaduse, ba reng ha ho na tsoho, ba tla ho eena ’me ba mo botsa:+ 24 “Mosuoe, Moshe o ile a re, ‘Haeba monna leha e le ofe a shoa a se na bana, mor’abo o tla nyala mosali oa hae ’me a hlahisetse mor’abo bana.’+ 25 Joale ho ne ho e-na le bara ba motho ba supileng ba e-na le rōna; oa pele a nyala eaba oa shoa, ’me, kahobane a se na bana, a siela mor’abo mosali oa hae.+ 26 Ha e-ba ka tsela e tšoanang le ho oa bobeli le oa boraro, ho fihlela ba supileng ba feletse kaofela.+ 27 Qetellong ho bohle mosali eo a shoa. 28 Ka lebaka leo, tsohong, e tla ba mosali oa ofe ho baa ba supileng? Etsoe kaofela ba ile ba ba le eena.”+

29 Ha Jesu a araba a re ho bona: “Le fositse, hobane ha le tsebe Mangolo kapa matla a Molimo;+ 30 etsoe tsohong banna ha ba nyale kapa hona hore basali baa nyalisoa,+ empa ba joaloka mangeloi leholimong. 31 Ha e le mabapi le tsoho ea bafu, na ha lea ka la bala seo Molimo a ileng a le bolella sona, ha a re,+ 32 ‘Ke ’na Molimo oa Abrahama le Molimo oa Isaka le Molimo oa Jakobo’?+ Eena ke Molimo oa ba phelang, eseng oa bafu.”+ 33 Ha bongata bo utloa seo, ba hlolloa ke thuto ea hae.+

34 Ka mor’a hore Bafarisi ba utloe hore o ne a khutsisitse Basaduse, ba phutheha e le sehlopha se le seng. 35 ’Me e mong oa bona, ea rutehileng Molaong,+ a botsa, a mo leka: 36 “Mosuoe, taelo e khōlō ke efe Molaong?”+ 37 A re ho eena: “‘U rate Jehova Molimo oa hao ka pelo ea hao eohle le ka moea oa hao oohle le ka kelello ea hao eohle.’+ 38 Ena ke eona taelo e khōlō le ea pele. 39 Ea bobeli, e joaloka eona, ke ena, ‘U rate moahelani oa hao joalokaha u ithata.’+ 40 Litaelong tsena tse peli ho itšetlehile Molao oohle, le Baprofeta.”+

41 Joale ha Bafarisi ba ntse ba bokane Jesu a ba botsa:+ 42 “Le nahana joang ka Kreste? Ke mora oa mang?” Ba re ho eena: “Oa Davida.”+ 43 A re ho bona: “Joale, ho tla joang hore Davida ka pululelo+ a mo bitse ‘Morena,’ a re, 44 ‘Jehova o itse ho Moren ’a ka: “Lula ka letsohong la ka le letona ho fihlela ke beha lira tsa hao tlas’a maoto a hao”’?+ 45 Ka hona, haeba Davida a mo bitsa ‘Morena,’ ke mora oa hae joang?”+ 46 ’Me ha ho ea ileng a khona ho bua lentsoe le le leng ho mo araba, kapa hona hore leha e le mang o ile a iteta sefuba ho mo botsa ka ho eketsehileng ho tloha letsatsing leo ho ea pele.+

23 Joale Jesu a bua le bongata le barutuoa ba hae,+ a re: 2 “Bangoli+ le Bafarisi ba lutse setulong sa Moshe.+ 3 Ka hona lintho tsohle tseo ba le bolellang+ tsona, le li etse ’me le li boloke, empa le se ke la etsa ho ea ka liketso+ tsa bona, kaha baa bua empa ha ba etse. 4 Ba tlama mejaro e boima ’me ba e beha mahetleng a batho,+ empa bona ha ba rate ho e sisinya ka monoana.+ 5 Mesebetsi eohle eo ba e etsang ba e etsa hore ba bonoe ke batho;+ kaha ba atolosa mabokosana+ [a tšetseng mangolo] ao ba a roalang e le litšireletso, le ho hōlisa mephetho+ e litjellane ea liaparo tsa bona. 6 Ba rata sebaka se hlaheletseng+ ka ho fetisisa lijong tsa shoalane le litulo tse ka pele ka lisynagogeng,+ 7 le litumeliso+ limmarakeng le ho bitsoa Rabi ke batho.+ 8 Empa lōna, le se ke la bitsoa Rabi, kaha mosuoe oa lōna o mong,+ athe lōna bohle le bara ba motho. 9 Ho feta moo, le se ke la bitsa mang kapa mang ntat’a lōna lefatšeng, kaha Ntat’a lōna o mong,+ Oa leholimo. 10 Leha e le hore le bitsoe ‘baeta-pele,’+ kaha Moeta-pele oa lōna o mong, Kreste. 11 Empa e moholo har’a lōna e lokela ho ba mosebeletsi oa lōna.+ 12 Mang kapa mang ea iphahamisang o tla kokobetsoa,+ ’me mang kapa mang ea ikokobetsang o tla phahamisoa.+

13 “Ho malimabe lōna, bangoli le Bafarisi, baikaketsi! hobane le koalla+ batho ’muso oa maholimo; kaha lōna+ ha le kene, ’me ba tseleng ea hore ba kene ha le ba lumelle ho kena. 14 ——

15 “Ho malimabe lōna, bangoli le Bafarisi, baikaketsi!+ hobane le haola leoatle le naha e omileng ho etsa mosokolohi a le mong, ’me ha e e-ba eena le mo etsa mofo oa Gehena ka makhetlo a mabeli ho feta kamoo le leng kateng.

16 “Ho malimabe lōna, batataisi ba foufetseng,+ ba reng, ‘Haeba mang kapa mang a hlapanya ka tempele, hase letho; empa haeba mang kapa mang a hlapanya ka khauta ea tempele, oa tlameha.’+ 17 Maoatla le lifofu! Ha e le hantle, ke hofe ho hoholo, khauta kapa tempele e halalelitseng khauta?+ 18 Hape le re, ‘Haeba mang kapa mang a hlapanya ka aletare, hase letho; empa haeba mang kapa mang a hlapanya ka mpho e holim ’a eona, oa tlameha.’ 19 Lifofu! Ha e le hantle, ke hofe ho hoholo, mpho kapa aletare+ e halaletsang mpho? 20 Ka hona ea hlapanyang ka aletare o hlapanya ka eona le ka lintho tsohle tse holim ’a eona; 21 le ea hlapanyang ka tempele o hlapanya ka eona le ka ea ahileng ho eona;+ 22 le ea hlapanyang ka leholimo o hlapanya ka terone ea Molimo+ le ka ea lutseng ho eona.

23 “Ho malimabe lōna, bangoli le Bafarisi, baikaketsi! hobane le fana ka karolo ea leshome+ ea koena le dille le kumine, empa le hlokomolohile litaba tse tōma haholo tsa Molao, e leng, toka+ le mohau+ le botšepehi.+ E ne e le tlamo ho etsa lintho tsena, empa leha ho le joalo eseng hore ho hlokomolohuoe lintho tse ling. 24 Batataisi ba foufetseng,+ ba sefang monoang+ empa ba koenya kamele!+

25 “Ho malimabe lōna, bangoli le Bafarisi, baikaketsi! hobane le hloekisa bokantle ba senoelo+ le ba sejana, empa ka hare li tletse tse tlatlapuoeng+ le ho se lekanyetse. 26 Mofarisi ea foufetseng,+ hloekisa bokahare ba senoelo+ le ba sejana pele, e le hore bokantle ba sona le bona bo ka hloeka.

27 “Ho malimabe lōna, bangoli le Bafarisi, baikaketsi!+ hobane le tšoana le mabitla a soeufalitsoeng,+ ao ka sebele a bonahalang a le matle ka ntle empa ka hare a tletse masapo a batho ba shoeleng le ho se hloeke ha mofuta o mong le o mong. 28 Ka tsela eo le lōna, ka sebele ka ntle, le bonahala le lokile ho batho,+ empa ka hare le tletse boikaketsi le tlōlo ea molao.

29 “Ho malimabe lōna, bangoli le Bafarisi, baikaketsi!+ hobane le haha mabitla a baprofeta ’me le khabisa mabitla a khopotso a ba lokileng,+ 30 ’me le re, ‘Hoja re ne re le teng matsatsing a baholo-holo ba rōna, re ne re ke ke ra ba le karolo le bona maling a baprofeta.’+ 31 Ka hona lea ipaka hore le bara ba ba ileng ba bolaea baprofeta.+ 32 Joale, he, le tlatse tekanyo+ ea baholo-holo ba lōna.

33 “Linoha, malinyane a bo-marabe,+ le tla balehela kahlolo ea Gehena+ joang? 34 Ka lebaka lena, joale ke le romela+ baprofeta le banna ba bohlale le barupeli ba sechaba.+ Ba bang ba bona le tla ba bolaea+ ’me le ba khokhothele thupeng, ’me ba bang ba bona le tla ba shapa+ ka lisynagogeng tsa lōna ’me le ba hlorise ho tloha motseng o mong ho ea ho o mong; 35 e le hore mali ’ohle a lokileng a tšolotsoeng lefatšeng+ a ka tla holim ’a lōna, ho tloha maling a Abele+ ea lokileng+ ho ea maling a Zakaria mora oa Barakia, eo le ileng la mo bolaela pakeng tsa sehalalelo le aletare.+ 36 Kannete ke re ho lōna, Lintho tsena tsohle li tla tlela moloko+ ona.

37 “Jerusalema, Jerusalema, ’molai oa baprofeta+ le ea tlepetsang+ ka majoe ba rometsoeng ho eena,+—ke hangata hakaakang ke ileng ka batla ho bokella bana ba hao, ka tsela eo khoho e bokellang litsuonyana tsa eona tlas’a mapheo a eona!+ Empa le ne le sa batle.+ 38 Bonang! Ntlo ea lōna+ e tlohetsoe ho lōna.+ 39 Etsoe ke re ho lōna, Ho hang le ke ke la mpona ho tloha joale ho ea pele ho fihlela le re, ‘Ho hlohonolofetse ea tlang ka lebitso la Jehova!’”+

24 Joale ha a tloha, Jesu o ne a le tseleng a tsoa tempeleng, empa barutuoa ba hae ba atamela ho mo bontša mehaho ea tempele.+ 2 Ha a arabela a re ho bona: “Na ha le bone lintho tsena tsohle? Kannete ke re ho lōna, Ho hang ha ho lejoe le tla tloheloa holim ’a lejoe le leng mona ’me le se ke la heletsoa.”+

3 Ha a ntse a lutse Thabeng ea Mehloaare, barutuoa ba mo atamela boinotšing, ba re: “Re bolelle, Lintho tsee li tla etsahala neng, ’me pontšo e tla ba efe ea ho ba teng+ ha hao le ea qetello ea tsamaiso ea lintho?”+

4 Ha Jesu a araba a re ho bona: “Hlokomelang hore ho se ke ha e-ba le ea le khelosang;+ 5 kaha ba bangata ba tla tla ka lebitso la ka, ba re, ‘Ke ’na Kreste,’ ’me ba tla khelosa ba bangata.+ 6 Le tla utloa ka lintoa le litlaleho tsa lintoa; le bone hore le se ke la tšoha. Etsoe lintho tsena li tla etsahala, empa ha e e-s’o be bofelo.+

7 “Etsoe sechaba se tla tsohela sechaba matla+ le ’muso o tla tsohela ’muso matla,+ ’me ho tla ba le likhaello tsa lijo+ le litšisinyeho tsa lefatše+ sebakeng se seng ka mor’a se seng. 8 Lintho tsena tsohle ke tšimoloho ea bohloko ba mahlomola.

9 “Joale batho ba tla nehelana ka lōna matšoenyehong+ ’me ba tla le bolaea,+ ’me le tla hlouoa+ ke lichaba tsohle ka lebaka la lebitso+ la ka. 10 Joale, hape, ba bangata ba tla khoptjoa+ ’me ba tla ekana ’me ba tla hloeana.+ 11 Ho tla hlaha baprofeta+ ba bangata ba bohata ’me ba khelose ba bangata;+ 12 ’me ka lebaka la ho eketseha ha tlōlo ea molao+ lerato la ba bangata le tla fola.+ 13 Empa ea mameletseng+ ho isa bofelong ke eena ea tla pholoha.+ 14 Litaba tsena tse molemo+ tsa ’muso+ li tla boleloa lefatšeng lohle leo ho ahiloeng ho lona hore e be bopaki ho lichaba tsohle;+ joale e ntan’o ba hona bofelo+ bo tla tla.

15 “Ka hona, ha le re heli! ’me le bona ntho e nyonyehang+ e bakang lesupi, joalokaha e boletsoe ka moprofeta Daniele, e eme sebakeng se halalelang,+ (’mali a ke a sebelise temoho,) 16 joale ba leng Judea ba qale ho balehela+ lithabeng. 17 Monna ea ka holim ’a ntlo a se ke a theoha ho ntša thepa ka tlung ea hae; 18 le monna ea tšimong a se ke a khutlela ntlong ho ea nka seaparo sa hae sa ka ntle. 19 Ho malimabe basali ba baimana le ba anyesang masea matsatsing ao!+ 20 Le ’ne le rapele hore paleho ea lōna e se ke ea etsahala mariha, kapa ka letsatsi la sabatha; 21 kaha nakong eo ho tla ba le matšoenyeho a maholo+ ao a kang ’ona a e-s’o ka a e-ba teng ho tloha tšimolohong ea lefatše ho fihlela joale,+ che, leha e le hore a tla ba teng hape. 22 Ha e le hantle, hoja matsatsi ao a se ke a khutsufatsoa, ha ho nama e neng e tla pholoha; empa ka lebaka la bakhethoa+ matsatsi ao a tla khutsufatsoa.+

23 “Joale haeba leha e le mang a re ho lōna, ‘Bonang! Kreste+ ke enoa,’ kapa, ‘Ke eane!’ le se ke la ho lumela.+ 24 Etsoe ho tla hlaha bo-Kreste+ ba bohata le baprofeta+ ba bohata ’me ba tla etsa lipontšo+ le limakatso tse khōlō e le hore ba khelose esita le bakhethoa, haeba ho khoneha.+ 25 Bonang! Ke le lemositse esale pele.+ 26 Ka hona, haeba batho ba re ho lōna, ‘Bonang! O lefeelleng,’ le se ke la tsoa; ‘Bonang! O ka likamoreng tse ka hare,’ le se ke la ho lumela.+ 27 Etsoe feela joalokaha lehalima+ le tsoa likarolong tse ka bochabela ’me le khanyetsa likarolong tse ka bophirimela, ho ba teng ha Mor’a motho ho tla ba joalo.+ 28 Kae kapa kae moo setopo se leng teng, ke moo lintsu+ li tla bokana.+

29 “Kapele-pele ka mor’a matšoenyeho a matsatsi ao letsatsi le tla fifala,+ ’me khoeli+ e ke ke ea fana ka leseli la eona, le linaleli li tla oa leholimong, ’me matla a maholimo a tla sisinyeha.+ 30 Joale pontšo ea Mor’a motho+ e tla bonahala leholimong, joale meloko eohle ea lefatše e tla ikotla ka lebaka la ho lla,+ ’me e tla bona Mor’a motho a tla ka maru a leholimo ka matla le khanya e khōlō.+ 31 O tla romela mangeloi a hae ka molumo+ o moholo oa terompeta, ’me a tla bokella bakhethoa+ ba hae ho tsoa meeeng e mene,+ ho tloha pheletsong e ’ngoe ea maholimo ho isa pheletsong e ’ngoe ea ’ona.

32 “Joale ithuteng ntlha ena sefateng sa feiga e le papiso: Hang feela ha lekala la sona le lenyenyane le nolofala ’me le hlahisa makhasi, lea tseba hore lehlabula le haufi.+ 33 Ka ho tšoanang le lōna, ha le bona lintho tsena tsohle, le tsebe hore o haufi, o menyako.+ 34 Kannete ke re ho lōna ho hang moloko+ ona o ke ke oa feta ho fihlela lintho tsena tsohle li etsahala. 35 Leholimo le lefatše li tla feta,+ empa ho hang mantsoe a ka a ke ke a feta.+

36 “Malebana le letsatsi leo le hora+ eo ha ho ea tsebang, leha e le mangeloi a maholimo kapa Mora, haese Ntate feela.+ 37 Etsoe feela kamoo matsatsi a Noe+ a neng a le kateng, ho ba teng ha Mor’a motho ho tla ba joalo.+ 38 Etsoe joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe+ a ileng a kena ka arekeng ka lona;+ 39 ’me ba se ke ba elelloa ho fihlela moroallo o tla ’me o ba hohola bohle,+ ho ba teng ha Mor’a motho ho tla ba joalo. 40 Joale banna ba babeli ba tla be ba le tšimong: e mong o tla nkuoa ’me e mong a tloheloe; 41 basali ba babeli ba tla be ba sila leloaleng la letsoho:+ e mong o tla nkuoa ’me e mong a tloheloe.+ 42 Ka hona, le lule le lebetse, hobane ha le tsebe hore na Morena oa lōna o tla+ ka letsatsi lefe.

43 “Empa tsebang ntho e le ’ngoe, hore haeba mong’a ntlo a ne a tsebile hore na lesholu le tla+ ka tebelo efe, a ka be a ile a lula a falimehile ’me a se ke a lumella hore ntlo ea hae e thuhuoe. 44 Ka lebaka lena le lōna le itokise,+ hobane Mor’a motho o tla tla ka hora eo le sa e nahaneng.

45 “Ha e le hantle ke mang eo e leng lekhoba+ le tšepahalang le le masene leo mong’a lona a le behileng hore le okamele bahlanka ba hae ba ntlo, ho ba fa lijo tsa bona ka nako e tšoanetseng?+ 46 Ho thaba+ lekhoba leo haeba mong’a lona ha a fihla a le fumana le etsa joalo! 47 Kannete ke re ho lōna, O tla le beha hore le okamele lintho tsohle tsa hae.+

48 “Empa haeba lekhoba leo le lebe le ka re ka pelong+ ea lona, ‘Mong’a ka oa lieha,’+ 49 ’me le ka qala ho otla makhoba-’moho le lona ’me le ka ja la noa le ba tsebahalang e le matahoa, 50 mong’a lekhoba leo o tla tla ka letsatsi leo le sa le lebellang le ka hora+ eo le sa e tsebeng, 51 o tla le fa kotlo e matla+ ka ho fetisisa ’me o tla le abela karolo ea lona le baikaketsi. Ke moo ho lla ha lona le ho tsikitlanya meno ho tla ba teng.+

25 “Joale ’muso oa maholimo o tla ba joaloka baroetsana ba leshome ba ileng ba nka mabone+ a bona ’me ba tsoa ho ea kopana le monyali.+ 2 Ba bahlano ba bona e ne e le maoatla,+ ’me ba bahlano e le ba masene.+ 3 Hobane maoatla a ile a nka mabone a ’ona empa a se ke a nka oli, 4 ha ba masene ba ile ba nka oli ka lipitsaneng tsa bona hammoho le mabone a bona. 5 Ha monyali a lieha, ba thibasela kaofela ’me ba robala.+ 6 Har’a bosiu ha tsoha mohoo,+ ‘Monyali ke enoa! Tsoang le kopane le eena.’ 7 Joale baroetsana bao kaofela ba tsoha ’me ba hlophisa mabone+ a bona. 8 Maoatla a re ho ba masene, ‘Re feng oli+ e ’ngoe ea lōna, hobane mabone a rōna a haufi le ho tima.’ 9 Ba masene+ ba araba ka mantsoe ana, ‘Mohlomong ho ke ke ha e-ba le e lekaneng bakeng sa rōna le lōna. Ho e-na le hoo, e-eang ho ba e rekisang ’me le ithekele.’ 10 Ha ba tloha ba il’o reka, monyali a fihla, ’me baroetsana ba neng ba itokisitse ba kena le eena moketeng+ oa lenyalo; ’me monyako oa koaloa. 11 Ka mor’a moo baroetsana ba bang kaofela le bona ba tla, ba re, ‘Mohlomphehi, mohlomphehi, re bulele!’+ 12 Ha a araba a re, ‘Ke le bolella ’nete, ha ke le tsebe.’+

13 “Ka hona, le lule le lebetse,+ hobane ha le tsebe letsatsi kapa eona hora.+

14 “Etsoe ho joalokaha motho,+ ea mothating oa ho etela hōle,+ a ile a bitsa makhoba a hae ’me a beha lintho tsa hae kalosong ea ’ona.+ 15 Le leng a le fa litalenta tse hlano, le leng tse peli, le leng hape e le ’ngoe, le leng le le leng ho ea ka bokhoni+ ba lona, ’me a ea hōle. 16 Kapele-pele le ileng la amohela litalenta tse hlano la tsamaea ’me la etsa khoebo ka tsona ’me la fumana tse eketsehileng tse hlano.+ 17 Ka tsela e tšoanang le ileng la amohela tse peli la fumana tse eketsehileng tse peli. 18 Empa le ileng la amohela e le ’ngoe feela la tloha, ’me la cheka fatše la pata chelete eo ea silevera ea mong’a lona.

19 “Ka mor’a nako e telele+ mong’a makhoba ao a fihla ’me a lokisa litlaleho le ’ona.+ 20 Kahoo le neng le amohetse litalenta tse hlano la atamela ’me la tlisa litalenta tse eketsehileng tse hlano, le re, ‘Monghali, u ile ua beha litalenta tse hlano kalosong ea ka; bona, ke fumane tse eketsehileng tse hlano.’+ 21 Mong’a lona a re ho lona, ‘U entse hantle, lekhoba le molemo le le tšepahalang!+ U ile ua tšepahala+ linthong tse seng kae. Ke tla u beha hore u okamele lintho tse ngata.+ Kena thabong+ ea mong’a hao.’ 22 Ka mor’a moo le neng le amohetse litalenta tse peli la atamela ’me la re, ‘Monghali, u ile ua beha litalenta tse peli kalosong ea ka; bona, ke fumane litalenta tse eketsehileng+ tse peli.’ 23 Mong’a lona a re ho lona, ‘U entse hantle, lekhoba le molemo le le tšepahalang! U ile ua tšepahala linthong tse seng kae. Ke tla u beha hore u okamele lintho tse ngata.+ Kena thabong+ ea mong’a hao.’

24 “Qetellong le neng le amohetse talenta e le ’ngoe la atamela+ ’me la re, ‘Monghali, ke ile ka tseba hore u motho ea thata, ea kotulang moo u sa kang ua jala le ea bokellang moo u sa kang ua olōsa. 25 Kahoo ke ile ka tšoha+ ’me ka tloha eaba ke pata talenta ea hao fatše. Nka sa hao ke sena.’ 26 Ha mong’a lona a araba a re ho lona, ‘Lekhoba le khopo le le noabolohang, u tsebile hore ke kotula moo ke sa kang ka jala le ho bokella moo ke sa kang ka olōsa, na ha ho joalo? 27 Joale, he, u ne u tšoanela hore ebe u bolokile lichelete tsa ka tsa silevera ho bo-ralibanka, ’me ha ke fihla ke ne ke tla be ke amohela seo e leng sa ka le phaello.+

28 “‘Ka hona le amoheng talenta eo ’me le e fe le nang le litalenta+ tse leshome. 29 Kaha e mong le e mong ea nang le letho, o tla fuoa ho eketsehileng ’me o tla ba le ho hongata haholo; empa ha e le ea se nang letho, o tla amohuoa le seo a nang le sona.+ 30 Lahlelang lekhoba lena le se nang molemo lefifing ka ntle. Ke moo ho lla ha lona le ho tsikitlanya meno ho tla ba teng.’+

31 “Ha Mor’a motho+ a fihla ka khanya ea hae, ’me mangeloi ’ohle a e-na le eena,+ joale o tla lula teroneng ea hae e khanyang.+ 32 Lichaba tsohle li tla bokelloa ka pel’a hae,+ ’me o tla arola+ batho e mong ho e mong,+ feela joalokaha molisa a arola linku ho lipōli. 33 O tla beha linku ka letsohong la hae le letona,+ empa lipōli a li behe ka ho la hae le letšehali.+

34 “Joale morena o tla re ho ba ka ho la hae le letona, ‘Tloong, lōna ba hlohonolofalitsoeng ke Ntate,+ le rue+ ’muso+ oo le o lokiselitsoeng ho tloha ho thehoeng ha lefatše.+ 35 Kaha ke ile ka lapa ’me la mpha se jeoang;+ ke ile ka nyoroa ’me la mpha se nooang. Ke ne ke le osele ’me la mpontša kamohelo ea baeti;+ 36 ke hlobotse,+ ’me la nkapesa. Ke ile ka kula ’me la ntlhokomela. Ke ne ke le chankaneng+ ’me la tla ho ’na.’ 37 Joale ba lokileng ba tla mo araba ka mantsoe ana, ‘Morena, ke neng re ileng ra u bona u lapile ’me ra u fepa, kapa u nyoriloe,+ ’me ra u fa ho nooang?+ 38 Ke neng re ileng ra u bona u le osele ’me ra u bontša kamohelo ea baeti, kapa u hlobotse, ’me ra u apesa? 39 Ke neng re ileng ra u bona u kula kapa u le chankaneng ’me ra ea ho uena?’ 40 Ha morena+ a araba o tla re ho bona, ‘Kannete ke re ho lōna, Ho isa tekanyong eo ho eona le ileng la ho etsa ho e mong oa ba banyenyane+ oa bana barab’eso,+ le ile la ho etsa ho ’na.’+

41 “Joale eena o tla re, ho ba ka ho la hae le letšehali, ‘Tlohang ho ’na,+ lōna ba rohakiloeng, le kene mollong+ o sa feleng o lokiselitsoeng Diabolose le mangeloi+ a hae. 42 Etsoe ke ile ka lapa, empa ha lea ka la mpha letho le jeoang,+ hape ke ile ka nyoroa,+ empa ha lea ka la mpha letho le nooang. 43 Ke ne ke le osele, empa ha lea ka la mpontša kamohelo ea baeti; ke hlobotse, empa ha lea ka la nkapesa;+ ke kula ’me ke le chankaneng,+ empa ha lea ka la ntlhokomela.’ 44 Joale le bona ba tla araba ka mantsoe ana, ‘Morena, ke neng re ileng ra u bona u lapile kapa u nyoriloe kapa u le osele kapa u hlobotse kapa u kula kapa u le chankaneng ’me ra se ke ra u sebeletsa?’ 45 Joale o tla ba araba ka mantsoe ana, ‘Kannete ke re ho lōna, Ho isa tekanyong eo ho eona le sa kang la ho etsa ho e mong oa bana ba banyenyane,+ ha lea ka la ho etsa+ ho ’na.’+ 46 Bana ba tla ea phelisong+ e sa feleng, empa ba lokileng ba ee bophelong bo sa feleng.”+

26 Joale ha Jesu a qetile lipolelo tsena tsohle, a re ho barutuoa ba hae: 2 “Lea tseba hore matsatsi a mabeli ho tloha joale paseka e tla ba teng,+ ’me ho tla nehelanoa ka Mor’a motho hore a khokhotheloe thupeng.”+

3 Joale baprista ba ka sehloohong le banna ba baholo ba sechaba ba bokana lebaleng la moprista ea phahameng ea neng a bitsoa Kaifase,+ 4 ’me ba rerisana+ hore ba tšoare Jesu ka leraba la bolotsana le ho mo bolaea. 5 Leha ho le joalo, ba ’na ba re: “Eseng moketeng, e le hore ho se ke ha tsoha moferefere har’a batho.”+

6 Ha Jesu a le Bethani+ ka tlung ea Simone molepera,+ 7 mosali e mong ea nkileng pitsana ea alabastera ea oli+ e nkhang hamonate e theko e boima a mo atamela, ’me a qala ho e tšela hloohong ea hae ha a ntse a otlile ka lehlakore tafoleng. 8 Ha barutuoa ba bona sena ba halefa ’me ba re: “Ke hobane’ng ha ho etsoa tšenyo e kaale?+ 9 Etsoe e ka be e rekisitsoe ka theko e boima e be e fuoe mafutsana.”+ 10 Ha Jesu a hlokomela sena,+ a re ho bona: “Ke hobane’ng ha le leka ho khathatsa mosali eo? Etsoe o nketselitse ketso e ntle.+ 11 Etsoe kamehla le na le mafutsana,+ empa le ke ke la ba le ’na kamehla.+ 12 Etsoe ha mosali enoa a tšela oli ena e nkhang hamonate ’meleng oa ka, o ho entse ho ntokisetsa lepato.+ 13 Kannete ke re ho lōna, Kae kapa kae moo litaba tsena tse molemo li boleloang teng lefatšeng lohle, seo mosali enoa a se entseng le sona se tla boleloa e le sehopotso sa hae.”+

14 Joale e mong oa ba leshome le metso e ’meli, ea bitsoang Judase Iskariota,+ a ea ho baprista ba ka sehloohong 15 a re: “Le tla mpha eng hore ke le ekele eena?”+ Ba mo balla likotoana tsa silevera+ tse mashome a mararo. 16 Kahoo ho tloha nakong eo ho ea pele a ’na a batla monyetla o motle oa ho mo eka.+

17 Ka letsatsi la pele la mahobe+ a sa lomosoang barutuoa ba tla ho Jesu, ba re: “Ke hokae moo u batlang hore re u lokisetse ho jela paseka+ teng?” 18 A re: “Kenang motseng le ee ho ’Nyeo+ ’me le re ho eena, Mosuoe o re, ‘Nako ea ka e behiloeng e haufi; ke tla ketekela paseka le barutuoa ba ka lapeng+ la hao.’” 19 Eaba barutuoa ba etsa kamoo Jesu a ba laetseng kateng, ’me ba lokisa lintho bakeng sa paseka.+

20 Joale, ha e se e le shoalane,+ o ne a otlile ka lehlakore tafoleng le barutuoa ba leshome le metso e ’meli.+ 21 Ha ba ntse ba ja, a re: “Kannete ke re ho lōna, E mong oa lōna o tla nkeka.”+ 22 Ba saretsoe haholo ke sena, e mong le e mong a qala ho re ho eena: “Morena, hase ’na, na ha ho joalo?”+ 23 Ha a araba a re: “Ea kenyang letsoho la hae le ’na ka sekotlolong ke eena ea tla nkeka.+ 24 Ke ’nete, Mor’a motho oa tloha, feela joalokaha ho ngoliloe+ malebana le eena, empa ho malimabe+ motho eo Mor’a motho a ekoang ka eena!+ Ho ka be ho bile molemo hoja motho eo a ne a sa tsoaloa.” 25 Ha Judase, ea neng a le mothating oa ho mo eka a araba, a re: “Hase ’na, na ke ’na, Rabi?” A re ho eena: “Ke uena ea boletseng joalo.”

26 Ha ba ntse ba tsoela pele ho ja, Jesu a nka bohobe+ ’me, ka mor’a ho kōpa tlhohonolofatso, a bo qhetsola+ ’me, ha a bo fa barutuoa, a re: “Nkang, le je. Sena se bolela ’mele oa ka.”+ 27 Hape, a nka senoelo+ ’me, ha a lebohile, a ba fa sona, a re: “Noang ho sona, kaofela ha lōna;+ 28 kaha sena se bolela+ ‘mali+ a selekane’+ a ka, a tlang ho tšolloa molemong oa ba bangata+ bakeng sa tšoarelo ea libe.+ 29 Empa kea le bolella, ho tloha joale ho ea pele ho hang nke ke ka noa leha e le eng ea sehlahisoa sena sa sefate sa morara ho fihlela letsatsing leo ka lona ke se noang le lōna se le secha ’musong oa Ntate.”+ 30 Qetellong, ka mor’a ho bina lithoriso,+ ba tsoa ba ea Thabeng ea Mehloaare.+

31 Joale Jesu a re ho bona: “Kaofela ha lōna le tla khoptjoa mabapi le ’na bosiung bona, etsoe ho ngoliloe, ‘Ke tla otla molisa, ’me linku tsa mohlape li tla hasa-hasana.’+ 32 Empa ka mor’a hore ke tsosoe, ke tla le etella pele ho kena Galilea.”+ 33 Empa Petrose, ha a araba, a re ho eena: “Le haeba ba bang kaofela ba khoptjoa mabapi le uena, le ka mohla nke ke ka khoptjoa!”+ 34 Jesu a re ho eena: “Kannete ke re ho uena, Bosiung bona, pele mokōkō o lla, u tla ntatola ka makhetlo a mararo.”+ 35 Petrose a re ho eena: “Esita le haeba nka lokela ho shoa le uena, ho hang nke ke ka u latola.” Barutuoa ba bang kaofela le bona ba bua ntho e tšoanang.+

36 Joale Jesu a tla le bona nģalong+ e bitsoang Gethesemane, ’me a re ho barutuoa: “Lulang mona ha ke e-ea mane ’me ke rapela.”+ 37 Ha a nka Petrose le bara+ ba babeli ba Zebedea, a qala ho sareloa le ho khathatseha habohloko.+ 38 Joale a re ho bona: “Moea oa ka o saretsoe haholo, esita le ho isa lefung.+ Salang mona ’me le lule le lebetse le ’na.”+ 39 Ha a e-ea pejana, a itihela fatše ka sefahleho, a rapela+ ’me a re: “Ntate, haeba ho khoneha, senoelo+ sena se ke se mphete. Empa leha ho le joalo, eseng kamoo ho ratang+ ’na, empa kamoo ho ratang+ uena.”

40 Eaba o tla ho barutuoa ’me o ba fumana ba robetse, eaba o re ho Petrose: “Na le ne le sa khone leha e se e le ho lebela le ’na hora e le ’ngoe?+ 41 Lulang le lebetse+ ’me le rapele+ le sa khaotse, e le hore le se ke la kena molekong.+ Ka ho hlakileng, moea o na le tabatabelo, empa nama ea fokola.”+ 42 Ka lekhetlo+ la bobeli, a boela a tloha ’me a rapela, a re: “Ntate, haeba ho ke ke ha khoneha hore sena se fete haese hore ke se noe, ho ke ho etsahale thato ea hao.”+ 43 A boela a tla eaba o ba fumana ba robetse, kaha mahlo a bona a ne a le boima.+ 44 Kahoo ha a ba siea, a boela a tloha ’me a rapela ka lekhetlo+ la boraro, a boela a bua lentsoe le tšoanang. 45 Joale a tla ho barutuoa ’me a re ho bona: “Ka nako e kang ee le robetse ’me le iphomoletse! Bonang! Hora e atametse ea hore Mor’a motho a ekeloe matsohong a baetsalibe.+ 46 Emang, a re eeng. Bonang! Moeki oa ka o atametse.”+ 47 Ha a sa ntse a bua, bonang! Judase,+ e mong oa ba leshome le metso e ’meli, a fihla hammoho le bongata bo boholo bo nkileng lisabole+ le melangoana bo tsoa ho baprista ba ka sehloohong le banna ba baholo ba sechaba.+

48 Joale moeki oa hae o ne a ba file pontšo, e reng: “Mang kapa mang eo ke mo akang, ke eena; mo iseng litlamong.”+ 49 Ha a e-ea ka ho toba ho Jesu a re: “Lumela, Rabi!”+ ’me a mo aka+ ka lerato. 50 Empa Jesu+ a re ho eena: “Monn ’a heso, u teng ka morero ofe?” Joale ba atamela eaba ba tšoara Jesu ’me ba mo isa litlamong.+ 51 Empa, bonang! e mong oa ba nang le Jesu a otlolla letsoho la hae ’me a tsomula sabole ea hae a hlatha lekhoba la moprista ea phahameng a le tlosa tsebe.+ 52 Joale Jesu a re ho eena: “Khutlisetsa sabole ea hao sebakeng+ sa eona, kaha bohle ba nkang sabole ba tla timela ka sabole.+ 53 Kapa u nahana hore nke ke ka ipiletsa ho Ntate hore a mphe ka oona motsotso oo lilegione tse fetang leshome le metso e ’meli tsa mangeloi?+ 54 Tabeng eo, Mangolo a ne a tla phethahala joang a hore ho tla etsahala ka tsela ee?” 55 Ka hora eo Jesu a re ho bongata: “Na le tsoile le nkile lisabole le melangoana ho tla ntšoara joalokaha eka le tlil’o tšoara lesholu?+ Letsatsi le letsatsi ke ne ke ee ke lule ka tempeleng+ ke ruta, ’me leha ho le joalo ha lea ka la nkisa litlamong. 56 Empa sena sohle se etsahetse hore mangolo a baprofeta a phethahale.”+ Joale barutuoa kaofela ba mo tlohela ’me ba baleha.+

57 Ba ileng ba isa Jesu litlamong ba mo isa ho moprista ea phahameng Kaifase,+ moo bangoli le banna ba baholo ba neng ba bokane.+ 58 Empa Petrose a ’na a mo latela a le hōle, ho ea fihla lebaleng+ la moprista ea phahameng, ’me, ka mor’a hore a kene ka hare, o ne a lutse le bahlanka ba ntlo hore a bone hore phello e tla ba efe.+

59 Khabareng baprista ba ka sehloohong le Sanhedrine eohle ba ne ba batla bopaki ba bohata khahlanong le Jesu e le hore ba mo bolaee,+ 60 empa ba se ke ba bo fumana, le hoja lipaki tse ngata tsa bohata li ile tsa atamela.+ Hamorao tse peli tsa atamela 61 ’me tsa re: “Monna enoa o ile a re, ‘Ke khona ho heletsa tempele ea Molimo le ho e haha ka matsatsi a mararo.’”+ 62 Eaba moprista ea phahameng oa ema ’me o re ho eena: “Na ha u na karabo? Ke eng seo baa ba se pakang khahlanong le uena?”+ 63 Empa Jesu a khutsa.+ Kahoo moprista ea phahameng a re ho eena: “Ke u hlapantša+ ka Molimo ea phelang hore u re bolelle hore na u Kreste+ Mor’a Molimo!” 64 Jesu a re+ ho eena: “Ke uena ea boletseng joalo.+ Empa leha ho le joalo ke re ho lōna, Ho tloha joale ho ea pele+ le tla bona Mor’a motho+ a lutse ka letsohong+ le letona la matla ’me a tla ka maru a leholimo.”+ 65 Joale moprista ea phahameng a hahola liaparo tsa hae tsa ka ntle, a re: “O nyefotse!+ Na re sa hloka lipaki tse eketsehileng?+ Bonang! Joale le utloile nyefolo eo.+ 66 Maikutlo a lōna ke afe?” Ba araba: “O lokeloa ke lefu.”+ 67 Joale ba mo tšoela ka mathe sefahlehong+ ’me ba mo otla+ ka litebele. Ba bang ba mo jabela sefahlehong,+ 68 ba re: “Re profetele, uena Kreste.+ Ke mang ea u otlileng?”+

69 Joale Petrose o ne a lutse ka ntle lebaleng; ’me lekhabunyane la tla ho eena, la re: “Le uena u ne u e-na le Jesu Mogalilea!”+ 70 Empa a latola ka pel’a bona kaofela, a re: “Ha ke tsebe hore na u bua ka eng.” 71 Ka mor’a hore a tsoe ho ea ntlong e hekeng, ngoanana e mong a mo hlokomela ’me a re ho ba teng moo: “Monna enoa o ne a e-na le Jesu Monazaretha.”+ 72 A boela a ho latola, ka kano: “Monna eo ha ke mo tsebe!”+ 73 Ka mor’a nakoana ba emeng haufi ba tla ’me ba re ho Petrose: “Ka sebele le uena u e mong oa bona, etsoe, ha e le hantle, puo ea hao ea u hlahatsa.”+ 74 Joale a qala ho bitsa bomalimabe le ho hlapanya: “Monna eo ha ke mo tsebe!” Kapele-pele mokōkō oa lla.+ 75 Petrose a hopola polelo eo Jesu a ileng a e bua, e reng: “Pele mokōkō o lla, u tla ntatola ka makhetlo a mararo.”+ Eaba o tsoela ka ntle ’me o lla habohloko.+

27 Ha e se e le hoseng, baprista bohle ba ka sehloohong le banna ba baholo ba sechaba ba rerisana ka Jesu e le hore ba mo bolaee.+ 2 ’Me, ka mor’a hore ba mo tlame, ba mo etella pele ’me ba nehelana ka eena ho ’musisi Pilato.+

3 Joale ha Judase, ea mo ekileng, a bona hore o ne a ahlotsoe, a itšoabela ’me a khutlisetsa likotoana tsa silevera tse mashome+ a mararo ho baprista ba ka sehloohong le banna ba baholo, 4 a re: “Ke entse sebe ha ke ekile mali+ a lokileng.” Ba re: “Hoo ke eng ho rōna? U tla iponela!”+ 5 Kahoo a akhela likotoana tsa silevera ka tempeleng a tloha, eaba o il’o iphanyeha.+ 6 Empa baprista ba ka sehloohong ba nka likotoana tseo tsa silevera ’me ba re: “Ha ho lumelloe ke molao hore li akheloe ka polokelong ea matlotlo e halalelang, hobane ke theko ea mali.” 7 Ka mor’a ho rerisana hammoho, ba reka ka tsona tšimo ea sebōpi bakeng sa ho pata basele. 8 Ka hona tšimo eo e ’nile ea bitsoa “Tšimo ea Mali”+ ho fihlela letsatsing lona lena. 9 Joale ha phethahala se ileng sa buuoa ka moprofeta Jeremia, ha a re: “’Me ba nka likotoana+ tsa silevera tse mashome a mararo, theko ea motho ea ileng a beheloa theko, eo ba bang ba bara ba Iseraele ba ileng ba mo behela theko, 10 ’me ba fana ka tsona bakeng sa tšimo ea sebōpi,+ ho ea ka seo Jehova a neng a ntaetse sona.”

11 Joale Jesu a ema ka pel’a ’musisi; ’me ’musisi a mo botsa potso: “Na u morena oa Bajuda?”+ Jesu a araba: “Ke uena ea bolelang joalo.”+ 12 Empa, ha a ntse a qosoa+ ke baprista ba ka sehloohong le banna ba baholo, ha aa ka a araba.+ 13 Joale Pilato a re ho eena: “Na ha u utloe hore ke lintho tse ngata hakae tseo ba li pakang khahlanong le uena?”+ 14 Empa leha ho le joalo ha aa ka a mo araba, che, leha e le ka lentsoe le le leng, hoo ’musisi a ileng a makala haholo.+

15 Joale ho tloha moketeng o mong ho ea ho o mong e ne e le tloaelo ea ’musisi hore a lokollele bongata motšoaruoa, eo ba mo batlileng.+ 16 Ka eona nako eo ba ne ba tšoere motšoaruoa e mong ea tummeng hampe ea bitsoang Barabase.+ 17 Kahoo ha ba bokane Pilato a re ho bona: “Ke ofe eo le batlang hore ke le lokollele eena, Barabase kapa Jesu eo ho thoeng ke Kreste?”+ 18 Etsoe o ne a hlokomela hore ba nehelane ka eena+ ka lebaka la mohono.+ 19 Ho feta moo, ha a ntse a lutse setulong sa kahlolo, mosali oa hae o ile a romeletsa ho eena, a re: “U se ke ua ikamahanya ka letho le monna eo ea lokileng,+ kaha ke utloile bohloko haholo kajeno torong+ ka lebaka la hae.” 20 Empa baprista ba ka sehloohong le banna ba baholo ba susumelletsa bongata hore bo kōpe Barabase,+ empa bo etse hore Jesu a timetsoe. 21 Joale ha ’musisi a arabela a re ho bona: “Ke ofe ho ba babeli baa eo le batlang hore ke le lokollele eena?” Ba re: “Barabase.”+ 22 Pilato a re ho bona: “Joale, ke tla etsa’ng ka Jesu eo ho thoeng ke Kreste?” Kaofela ba re: “A ke a khokhotheloe thupeng!”+ 23 A re: “Hobane’ng, ke ntho efe e mpe eo a e entseng?” Ho ntse ho le joalo ba ’na ba hoeletsa ka ho eketsehileng: “A ke a khokhotheloe thupeng!”+

24 Ha a bona hore ha hoa etsa molemo oa letho empa, ho e-na le hoo, ho ne ho tsoha moferefere, Pilato a nka metsi+ ’me a hlatsoa matsoho a hae ka pel’a bongata, a re: “Ke hloka molato maling a motho enoa. Le tla iponela.” 25 Eaba batho kaofela ha ba araba ba re: “Mali a hae a be holim ’a rōna le holim ’a bana+ ba rōna.” 26 Joale a ba lokollela Barabase, empa a etsa hore Jesu a shapuoe ka sephali+ ’me a nehelana ka eena hore a khokhotheloe thupeng.+

27 Joale masole a ’musisi a nkela Jesu ka tlung ea ’muso ea ’musisi ’me a bokellela sehlopha sohle sa masole ho eena.+ 28 Ha a mo hlobolisa seaparo sa ka holimo se selelele, a mo apesa seaparo sa ka holimo+ se sekareleta, 29 ’me a loha moqhaka ka meutloa a mo roesa oona ’me a mo fa lehlaka ka letsohong la hae le letona. Ha a khumama ka pel’a hae, a mo fetola litšeho,+ a re: “Lumela, uena Morena oa Bajuda!”+ 30 Eaba a mo tšoela+ ka mathe a nka lehlaka ’me a qala ho mo otla hloohong. 31 Qetellong, ha a mo fetotse litšeho,+ a mo hlobolisa seaparo sa ka holimo ’me a mo apesa liaparo tsa hae tsa ka ntle ’me a mo etella pele ho ea khokhotheloa thupeng.+

32 Eare ha a tsoa a fumana letsoalloa la Cyrene le bitsoang Simone.+ A qobella monna enoa hore a jare thupa ea hae ea tlhokofatso. 33 Ha a fihla sebakeng se bitsoang Golgotha,+ hoo ke ho re, Sebaka sa Lehata, 34 a mo fa veine e tsoakiloeng le nyooko+ hore a noe; empa, ka mor’a ho e latsoa, a hana ho noa.+ 35 Ha a mo khokhothetse thupeng+ a aba liaparo+ tsa hae tsa ka ntle ka ho lahla lotho,+ 36 ’me, ha a ntse a lutse, a mo lebela moo. 37 Hape, a beha ka holim ’a hlooho ea hae qoso e khahlanong le eena, e ngotsoeng: “Enoa ke Jesu Morena oa Bajuda.”+

38 Joale masholu a mabeli a ile a khokhotheloa thupeng le eena, le leng ka ho la hae le letona ’me le leng ka ho le letšehali.+ 39 Kahoo bafeta-ka-tsela ba qala ho mo nyefola,+ ba sisinya+ lihlooho 40 ba re: “Uena ea neng a re u tla heletsa tempele+ ’me u e hahe ka matsatsi a mararo, ipholose! Haeba u mora oa Molimo, theoha thupeng ea tlhokofatso!”+ 41 Ka mokhoa o tšoanang le baprista ba ka sehloohong hammoho le bangoli le banna ba baholo ba qala ho mo fetola litšeho ba re:+ 42 “O pholositse ba bang; eena o sitoa ho ipholosa! Ke Morena+ oa Iseraele; joale a ke a theohe thupeng ea tlhokofatso ’me re tla lumela ho eena.+ 43 O tšepile Molimo; joale a ke A mo pholose+ haeba A mo batla, kaha o ile a re, ‘Ke Mor’a Molimo.’”+ 44 Ka tsela e tšoanang esita le masholu a neng a khokhothetsoe thupeng hammoho le eena a qala ho mo nyelisa.+

45 Ho tloha ka hora ea botšelela ho ea pele lefifi la aparela+ naha eohle, ho fihlela ka hora ea borobong.+ 46 Hoo e ka bang ka hora ea borobong Jesu a hoeletsa ka lentsoe le phahameng, a re: “Eli, Eli, lama sabakthani?” ke hore, “Molimo oa ka, Molimo oa ka, u ntloheletse’ng?”+ 47 Ha ba utloa sena, ba bang ho ba emeng moo ba qala ho re: “Monna enoa o bitsa Elia.”+ 48 Kapele-pele e mong oa bona a matha eaba o nka seponche ’me o se kolobisa ka veine e bolila+ le ho se beha holim ’a lehlaka eaba o qala ho mo fa ho nooang.+ 49 Empa ba bang kaofela ho bona ba re: “Mo tlohele! A re boneng hore na Elia o tla tla a mo pholosa.”+ [[Monna e mong a nka lerumo ’me a mo hlaba lehlakoreng, ’me ha tsoa mali le metsi.]]+ 50 Jesu a boela a hoeletsa ka lentsoe le phahameng, ’me a nehela moea.+

51 Bonang! Lesira+ la sehalalelo la hahoha likoto tse peli, ho tloha holimo ho ea tlaase,+ lefatše la sisinyeha, mafika a petsoha.+ 52 Mabitla a khopotso a buleha ’me litopo tse ngata tsa bahalaleli ba neng ba robetse tsa nyoloha, 53 (’me batho, ha ba tsoa har’a mabitla a khopotso ka mor’a ho tsosoa ha hae, ba kena motseng o halalelang,)+ tsa bonahala ho batho ba bangata. 54 Empa molaoli oa lebotho le ba nang le eena ba lebetseng Jesu, ha ba bona tšisinyeho ea lefatše le lintho tse etsahalang, ba tšoha haholo, ba re: “Ka sebele enoa e ne e le Mor’a Molimo.”+

55 Ho feta moo, basali ba bangata ba ne ba le teng ba shebile ba le hōjana,+ ba neng ba tsamaile le Jesu ho tloha Galilea ho mo sebeletsa;+ 56 bao har’a bona ho neng ho le teng Maria Magdalena, le Maria ’mè oa Jakobo le Jose, le ’mè oa bara ba Zebedea.+

57 Kaha joale e ne e le motšehare oa mantsiboea, ha tla monna e mong ea ruileng oa Arimathea, ea bitsoang Josefa, ea neng a fetohile morutuoa oa Jesu.+ 58 Monna enoa a ea ho Pilato ’me a kōpa setopo sa Jesu.+ Joale Pilato a laela hore ho fanoe ka sona.+ 59 Josefa a nka setopo, a se phuthela ka line+ e hloekileng ea boleng bo botle, 60 eaba o se beha ka lebitleng+ la hae le lecha la khopotso, leo a neng a le fatile lefikeng. Ka mor’a ho phikolosetsa lejoe le leholo monyakong oa lebitla la khopotso, a tloha.+ 61 Empa Maria Magdalena le Maria e mong ba hlola moo, ba lutse ka pel’a lebitla.+

62 Letsatsing le hlahlamang, le neng le le ka mor’a Tokisetso,+ baprista ba ka sehloohong le Bafarisi ba bokana ka pel’a Pilato, 63 ba re: “Mohlomphehi, re hopotse hore moikhakanyi eane ha a sa ntse a phela o ile a re, ‘Ke tla tsosoa ka mor’a matsatsi a mararo.’+ 64 Ka hona laela hore lebitla le sireletsoe ho fihlela letsatsing la boraro, e le hore le ka mohla barutuoa ba hae ba se ke ba tla ’me ba mo utsoa+ eaba ba re ho batho, ‘O tsositsoe bafung!’ ’me boikhakanyo bona ba ho qetela bo tla ba bobe ho feta ba pele.” 65 Pilato a re ho bona: “Le na le balebeli.+ E-eang le le sireletse kamoo le tsebang kateng.” 66 Kahoo ba ea ’me ba sireletsa lebitla ka ho tiisa lejoe+ le ho ba le balebeli.

28 Ka mor’a sabatha, ka meso letsatsing la pele la beke, Maria Magdalena le Maria e mong ba tla ho tla bona lebitla.+

2 Hlokomelang! tšisinyeho e khōlō ea lefatše e ne e ile ea e-ba teng; kaha lengeloi la Jehova le ne le theohile leholimong ’me la atamela la phikolosetsa lejoe thōko, ’me le ne le lutse holim ’a lona.+ 3 Ponahalo ea lona ea ka ntle e ne e le joaloka lehalima,+ ’me liaparo tsa lona li le tšoeu joaloka lehloa.+ 4 E, ka lebaka la ho le tšaba balebeli ba thothomela ’me ba e-ba joaloka batho ba shoeleng.

5 Empa ha lengeloi+ le araba la re ho basali bao: “Le se ke la tšoha, kaha kea tseba hore le batla Jesu+ ea ileng a khokhotheloa thupeng. 6 Ha a eo mona, kaha o tsositsoe,+ joalokaha a boletse. Tloong, le bone sebaka seo a neng a robetse ho sona. 7 E-eang kapele ’me le bolelle barutuoa ba hae hore o tsositsoe+ bafung, ’me, bonang! o le etella pele ho kena Galilea;+ le tla mo bona moo. Bonang! Ke le boleletse.”+

8 Kahoo, ha ba tloha kapele lebitleng la khopotso, ka tšabo le thabo e khōlō, ba matha ho ea tlalehela barutuoa ba hae.+ 9 Bonang! Jesu a ba khahlanyetsa ’me a re: “Lumelang!” Ba atamela ’me ba mo tšoara maoto ’me ba mo inamela. 10 Joale Jesu a re ho bona: “Le se ke la tšaba! E-eang, le tlalehele barab’eso,+ e le hore ba ka tloha ho ea kena Galilea; ’me ba tla mpona moo.”

11 Ha ba ntse ba le tseleng, bonang! ba bang ba balebeli+ ba ea motseng ’me ba tlalehela baprista ba ka sehloohong lintho tsohle tse neng li etsahetse. 12 Ka mor’a hore bana ba bokane hammoho le banna ba baholo ’me ba rerisane, ba fa masole+ palo e lekaneng ea likotoana tsa silevera 13 ’me ba re: “E-reng, ‘Barutuoa+ ba hae ba ile ba tla bosiu ’me ba mo utsoa ha re ntse re robetse.’ 14 Haeba sena se fihla litsebeng tsa ’musisi, re tla mo susumetsa ’me re tla le lokolla matšoenyehong.” 15 Kahoo a nka likotoana tsa silevera ’me a etsa joalokaha a ile a lauoa; polelo ena e hasitsoe hohle har’a Bajuda ho fihlela letsatsing lona lena.

16 Leha ho le joalo, barutuoa ba leshome le motso o mong ba ea Galilea+ thabeng moo Jesu a neng a ba lokiselitse teng, 17 ’me ha ba mo bona ba inama, empa ba bang ba belaela.+ 18 Eaba Jesu oa atamela ’me o bua le bona, o re: “Ke filoe matla+ ’ohle leholimong le lefatšeng. 19 Ka hona e-eang ’me le etse batho ba lichaba+ tsohle barutuoa,+ le ba kolobetse+ ka lebitso la Ntate+ le la Mora+ le la moea o halalelang,+ 20 le ba rute+ ho boloka+ lintho tsohle tseo ke le laetseng tsona.+ ’Me, bonang! ke na le lōna+ ka matsatsi ’ohle ho fihlela qetellong ea tsamaiso ea lintho.”+