නෙහෙමියා

9 එම මාසයේ+ විසිහතරවන දිනයේදී ඊශ්‍රායෙල්වරු එක් රැස් වී ගෝණි රෙදි ඇඳගෙන+ තම සිරුරේ දූවිලි+ තවරාගෙන නිරාහාරව+ සිටියෝය. 2 ඊශ්‍රායෙල්වරු සියලුම විදේශිකයන්ගෙන්+ වෙන් වී+ තමන් කළ වැරදි+ හා තම පියවරුන් කළ වැරදි+ ප්‍රසිද්ධියේ පිළිගැනීමට+ සිටගත්හ. 3 ඉන්පසු ඔවුහු සිටගෙන සිටි ස්ථානයේදීම+ පැය තුනක්*+ පුරා තම දෙවි වන යෙහෝවා දුන් නීතිය සඳහන් ලියවිල්ල ශබ්ද නඟා කියෙව්වෝය.+ ඔවුහු තවත් පැය තුනක් පුරා තම වැරදි පිළිගනිමින්+ යෙහෝවා දෙවි ඉදිරියේ නමස්කාර කළෝය.+

4 යේෂුවාද බානිද කද්මියෙල්ද ෂෙබනියාද බුන්නීද ෂෙරෙබියාද+ බානිද කෙනානිද ලෙවීවරුන් සඳහා තනා තිබුණු වේදිකාවට නැඟ+ මහත් හඬකින්+ යෙහෝවා දෙවිට කන්නලව් කළෝය. 5 ලෙවීවරුන් වූ යේෂුවා, කද්මියෙල්, බානි, හෂබ්නෙයා, ෂෙරෙබියා, හෝදියා, ෂෙබනියා හා පෙතහියා මෙසේ පැවසූහ. “සියලුදෙනා නැඟිට ඔබේ දෙවි වන යෙහෝවාට ප්‍රශංසා කරන්න.+ සදාකාලයටම+ ඔහුට ප්‍රශංසා කරන්න.” “දෙවියනි, සෑම ප්‍රශංසාවක්ම හා ගෞරවයක්ම ලැබිය යුතු ඔබගේ ශ්‍රේෂ්ඨ නාමයට+ ප්‍රශංසාව ලැබේවා!

6 “යෙහෝවා දෙවියනි, ඔබ පමණක් දෙවිය.+ ඔබ ස්වර්ගය+ සහ එහි සියලු සේනාද+ මුළු මහත් විශ්වයත් එහි සියලු වස්තුද පොළොව+ සහ එහි තිබෙන සියල්ලද+ මහ මුහුද+ සහ එහි ඇති සියල්ලද+ සාදා තිබෙනවා. ඒ සියල්ල පවතින්නේ ඔබ නිසයි. ස්වර්ගයේ සේනා+ සැමදා දණ නමන්නේ ඔබටයි. 7 යෙහෝවා දෙවියනි, සැබෑ දෙවි ඔබයි. ඔබ ආබ්‍රම්ව+ තෝරාගෙන කල්දිවරුන්ගේ+ දේශයේ පිහිටි ඌර් නුවරින් කැඳවා ඔහුට ආබ්‍රහම් යන නම දුන්නා.+ 8 ඔහු කීකරු හදවතක් ඇති විශ්වාසවන්ත කෙනෙක්+ නිසා ඔබ ඔහු සමඟ ගිවිසුමක්+ ඇති කරගත්තා. කානානිවරුන්, හිත්තීවරුන්, අමෝරිවරුන්, පෙරිස්සිවරුන්, යෙබූසිවරුන් සහ ගිර්ගාෂිවරුන් විසූ දේශය ඔහුටත් ඔහුගෙන් පැවතෙන අයටත්+ දෙන්න ඔබ පොරොන්දු වුණා. ඔබ ධර්මිෂ්ඨ+ දෙවි කෙනෙක් නිසා ඔබ ඒ පොරොන්දුව ඒ ආකාරයෙන්ම ඉටු කළා.

9 “දෙවියනි, ඊජිප්තුවේ සිටි අපේ මුතුන්මිත්තන්ට විඳින්න සිදු වූ හිංසා පීඩා ඔබ දුටුවා.+ රතු මුහුද අසලදී ඔවුන් ඔබට මහත් හඬින් කන්නලව් කළ විට ඔබ ඔවුන්ට සවන් දුන්නා.+ 10 පාරාවෝ හා ඔහුගේ සියලු සේවකයනුත් ඔහුගේ දේශයේ+ විසූ මුළු ජනතාවත් ඔබේ සෙනඟට විරුද්ධව ඉතා උද්දච්ච ලෙස ක්‍රියා කළ නිසා,+ ඔබ ඔවුන්ට විරුද්ධව බොහෝ විපත් ඇති කරමින් බලවත් ක්‍රියා හා ආශ්චර්යයන් සිදු කළා. ඔබ එසේ කර ඔබටම ශ්‍රේෂ්ඨ නාමයක්+ ඇති කරගත්තා. අද වන තුරුත් ඔබ කළ ඒ ශ්‍රේෂ්ඨ ක්‍රියා කිසිවෙකුට අමතක වී නැහැ. 11 දෙවියනි, ඔබේ සෙනඟ ඉදිරියේම ඔබ මුහුදේ ජලය දෙපසට කර+ ඒ මැද වියළි බිමක්+ සෑදුවා. ඔවුන් එම වියළි බිම මැදින් ගමන් කළා. නමුත් ඔවුන් පසුපස ලුහුබැඳ ගිය ඔවුන්ගේ සතුරන්ව ඔබ විනාශ කළා. ජල පහරකට+ විසි කළ ගල් කැටයක්+ මෙන් ඔවුන් මුහුදු පතුලටම+ ගිලී ගියා. 12 දිවා කාලයේදී+ ඔබේ සෙනඟට මඟ පෙන්වූයේ ඔබ එවූ වලා ටැඹයි. රාත්‍රියේදී+ යා යුතු මාර්ගය පෙන්වා දෙන්න+ ඔවුන්ට ගිනි ජාලාවක්ද ඔබ ලබා දුන්නා. 13 ඉන්පසුව සීනයි කන්ද අසලදී+ ඔබ ස්වර්ගයේ සිට ඔවුන්ට කතා කර+ ධර්මිෂ්ඨ වූ තීන්දු,+ නිවැරදි නීතිරීති+ සහ යහපත් මඟ පෙන්වීම්+ ලබා දුන්නා. 14 ඔබට ගෞරවය දෙන පිණිස පැවැත්විය යුතු ශුද්ධ සබත+ ගැන ඔබ ඔවුන්ට දැන්වූවා. ඔබේ සේවකයා වන මෝසෙස්+ මාර්ගයෙන් ඔබේ නීතිය ගැනත් වෙනත් අණපනත් ගැනත් ඔබ ඔවුන්ව දැනුවත් කළා. 15 කුසගින්න නිවන්න අහසින් ආහාරද+ පිපාසය සන්සිඳුවන්න පර්වතවලින් ජලයද+ ඔබ ඔවුන්ට ලබා දුන්නා. කල් යත්ම, ඔබ දෙන බවට දිවුරා පොරොන්දු වූ+ දේශයට ගිහින් එය හිමි කරගන්න කියා ඔබ ඔවුන්ට පැවසුවා.+

16 “නමුත් සිත් දැඩි කරගෙන+ සිටි අපේ මුතුන්මිත්තන් ක්‍රියා කළේ හිතුවක්කාර+ ලෙසයි. ඔවුන් ඔබේ අණපනත්වලට සවන් නොදී මුරණ්ඩු ලෙස ක්‍රියා කළා. 17 ඔවුන් ඔබට කිසි ලෙසකින්වත් සවන් දුන්නේ නැහැ.+ ඔබ ඔවුන් වෙනුවෙන් කළ පුදුම ක්‍රියා සිහි කළේවත් නැහැ.+ ඔවුන් නායකයෙකුව+ පත් කරගෙන නැවතත් ඊජිප්තුවේ මෙහෙකාරකම් කරන්න යන්න සූදානම් වුණා. දෙවියනි, ඔවුන් මෙතරම් සිත් දැඩි කරගෙන+ සිටියත් ඔබ ඔවුන්ව අත්හැරියේ නැහැ.+ මන්ද ඔබ සමාව දීමට කැමති+ කරුණාවන්ත+ හා දයාන්විත+ දෙවි කෙනෙක්. ඉමහත්+ ප්‍රේමයක්* පෙන්වන ඔබ කෝප වීමට ඉක්මන් වන්නෙත් නැහැ.+ 18 වස්සෙකුගේ රූපයක් සාදාගෙන,+ ‘මේ ඉන්නේ අපව ඊජිප්තුවෙන් නිදහස් කළ අපේ දෙවියන්’+ කියා පැවසූ ඔවුන් දිගින් දිගටම ඔබව අගෞරවයට පත් කරන දේවල් කළා. 19 එහෙත් ඔබ ඔවුන්ව පාළුකරයේදී අතරමං කර අත්හැර දමා ගියේ නැහැ.+ ඒ ඔබේ අතිමහත් දයාව නිසයි. දිවා කාලයේදී ඔවුන්ට මඟ පෙන්වන්න තිබූ වලා ටැඹවත්+ රාත්‍රියේදී ඔවුන්ගේ මඟට එළිය දුන් ගිනි ජාලාවවත්+ ඔබ ඉවත් කළේ නැහැ. 20 ඔබේ මහත් බලය*+ ඔවුන්ට ලබා දී ඔබ ඔවුන්ව නැණවත් කළා. ඔවුන්ගේ කුසගින්නට මන්නාද+ පිපාසයට වතුරද නොඅඩුව ඔබ ලබා දුන්නා.+ 21 පාළුකරයේදී අවුරුදු හතළිහක්+ පුරා ඔබ ඔවුන්ව පෝෂණය කළා. ඔවුන්ගේ වස්ත්‍ර දිරා ගියේවත්+ ඔවුන්ගේ පාද ඉදිමුණේවත් නැහැ.+ ඇත්තටම ඔවුන්ට කිසි දෙයකින් අඩුවක් තිබුණේ නැහැ.+

22 “ඔබ ඔවුන්ට බොහෝ රාජ්‍යවල්+ හා ජාතීන්ව යටත් කර දී, දේශයේ ඉඩම්ද ඔවුන්ට බෙදා දුන්නා.+ හෙෂ්බොන්හි+ රජු වූ සීහොන්ගේ දේශයත්+ බාෂාන්හි+ රජු වූ ඕග්ගේ+ දේශයත් අයිති කරගන්න ඔවුන්ට හැකි වුණා. 23 ඔවුන්ගේ පුත්‍රයන්ද අහසේ තරු මෙන්+ වැඩි වුණේ ඔබේ ආශීර්වාදය නිසයි. ඔබ ඔවුන්ගේ මුතුන්මිත්තන්ට+ පොරොන්දු වූ දේශයට+ ඔවුන්ව ගෙනැවිත් එය හිමි කර දුන්නා. 24 ඔවුන්ගේ දරුවන්+ දේශය හිමි කරගන්න+ යන විට ඔබ දේශයේ වාසය කළ කානානිවරුන්ව ඔවුන්ට යටත්+ කර දුන්නා. ඔබ කානානිවරුන්වත්+ ඔවුන්ගේ රජවරුන්වත්+ ඔබේ සෙනඟ අතට පත් කර ඔවුන්ට+ කැමති දෙයක් කරන්න ඉඩ දුන්නා.+ 25 ඔවුන් බලකොටු සහිත නුවරවල්ද+ සරුසාර බිම්ද+ සැප සම්පත්වලින් පිරුණු නිවෙස්ද+ තනන ලද පොකුණුද+ මිදිවතුද ඔලීවවතුද+ පලතුරු උයන්ද අයිති කරගෙන කා බී තෘප්තිමත්+ ජීවිතයක් ගත කළා. දෙවියනි, ඔබේ ඒ අතිමහත් යහපත්කම+ නිසා ඔවුන් බොහෝ සෙයින් සතුටු වුණා.+

26 “නමුත් ඔවුන් ඔබට අකීකරු වී+ ඔබට විරුද්ධව කැරලිගැසුවා.+ ඔවුන් ඔබේ නීතියට පිටු පෑවා.+ ඔබ බොහෝ අනාගතවක්තෘවරුන්ව ඔවුන් වෙත යවා ඔබ වෙතට නැවත හැරී එන්න+ කියා ඔවුන් මාර්ගයෙන් පැවසුවත් ඔවුන් ඒ අනාගතවක්තෘවරුන්වත් මරා දැමුවා.+ ඔවුන් ඔබට අගෞරවය ගෙන දිය හැකි සෑම දෙයක්ම කළා.+ 27 ඒ නිසා, ඔවුන්ගේ සතුරන් අතට ඔබ ඔවුන්ව හසු කර දුන්නා.+ ඒ සතුරන් නිසා ඔවුන් බොහෝ දුක් පීඩා වින්දා.+ එවිට ඔවුන් හඬමින් ඔබට කන්නලව් කළා.+ ඔවුන්ට ඔබව සිහි වුණේ එවිටයි. නමුත් ස්වර්ගයේ සිටින ඔබ ඔවුන්ට ඇහුම්කන් නොදී සිටියේ නැහැ.+ ඔබ ඔවුන් වෙත ගැලවුම්කරුවන්ව+ යවා සතුරන්ගේ අතින් ඔවුන්ව ගලවාගත්තා.+ ඒ ඔබේ අතිමහත් දයාව+ නිසයි.

28 “නමුත් ඔවුන්ට සාමකාමී කාලයක් උදා වූ සැණින් ඒ හැම දෙයක්ම ඔවුන්ට අමතක වී ගියා. ඔවුන් නැවතත් ඔබ නපුරුයයි සලකන දේවල් කරන්න පටන්ගත්තා.+ ඒ නිසා ඔබ නැවතත් ඔවුන්ගේ සතුරන් අතින් පීඩා විඳින්න ඔවුන්ට ඉඩහැරියා.+ එවිට ඔවුන් නැවතත් ඔබ වෙතට හැරී ඔබේ උපකාර ඉල්ලා කන්නලව් කළා.+ ඔබත් ස්වර්ගයේ සිට ඔවුන්ට සවන් දී+ ඔබේ අතිමහත් දයාවෙන් ඔවුන්ට ගැලවීම ලබා දුන්නා. දෙවියනි, ඔබ කොතෙකුත් වාර ගණනක් එසේ කර තිබෙනවාද!+ 29 නැවත ඔබ වෙතට හැරී ඔබේ නීතියට+ කීකරු වෙන්න කියා ඔබ ඔවුන්ට බොහෝ වරක් අවවාද+ කළත් එයින් පලක් වුණේ නැහැ. ඔවුන් හිතුවක්කාර+ ලෙස, ජීවනය හිමි කර දෙන+ ඔබේ තීන්දු හා අණපනත්+ කඩ කරමින් පව් කළා.+ ඔවුන් සිත් දැඩි කරගෙන+ ඔබ කී කිසි දෙයක් ගණනකට ගත්තේ නැහැ.+ ඔවුන් මුරණ්ඩු, කැරලිකාර සෙනඟක්.+ 30 නමුත් ඔබ අවුරුදු ගණනාවක් තිස්සේ ඔවුන් ගැන ඉවසමින්+ ඔබේ බලය යොදා ඔවුන්ට විරුද්ධව සාක්ෂි දුන්නා.+ ඔබේ අනාගතවක්තෘවරුන් මාර්ගයෙන් ඔබ ඔවුන්ට බොහෝ අවවාද ලබා දුන්නා. එහෙත් ඔවුන් ඔබට සවන් දුන්නේ නැහැ.+ අන්තිමේදී ඔබ අවට දේශවල ජනයා අතට ඔවුන්ව පත් කළා.+ 31 නමුත් ඔබේ අතිමහත් දයාව නිසා ඔවුන්ව සහමුලින්ම විනාශ වී යන්න ඔබ ඉඩ දුන්නේ නැහැ.+ ඔබ ඔවුන්ව අමතක කර දැමුවෙත් නැහැ.+ ඔබ මොන තරම් කරුණාවන්ත,+ දයාන්විත+ දෙවි කෙනෙක්ද!

32 “දෙවියනි, සියලුදෙනාගේ ගරුබිය+ ලබන්න වටින අපගේ ශ්‍රේෂ්ඨ,+ බලවත්+ දෙවි ඔබයි. ඔබ කිසිවිටෙක ගිවිසුම් කඩ නොකරන+ අතිශයින් ප්‍රේමය*+ පෙන්වන දෙවි කෙනෙක්. ඇසිරියාවේ රජු පාලනය කළ කාලයේ පටන් මේ දක්වා+ අපේ රජවරුන්ටත්+ අධිපතීන්ටත්+ පූජකයන්ටත්+ අනාගතවක්තෘවරුන්ටත්+ අපේ මුතුන්මිත්තන්ටත්+ සියලු සෙනඟටත් මුහුණ දෙන්න සිදු වූ දුෂ්කරතා+ අමතක කරන්න එපා දෙවියනි.+ 33 ඔබ ධර්මිෂ්ඨයි.+ ඔබ අපි සමඟ විශ්වාසවන්තව+ කටයුතු කළා. දුෂ්ට ලෙස ක්‍රියා කළේ අපියි.+ මේ සියල්ල අපිට විඳින්න සිදු වුණේ අපේම දුෂ්ටකම් නිසයි. 34 අපේ රජවරුන්, අධිපතීන්, පූජකයන් හා මුතුන්මිත්තන්+ ඔබේ නීතියට කීකරු වුණේ නැහැ.+ ඔබේ අණපනත්වලටවත් ඔබ ඔවුන්ට විරුද්ධව සාක්ෂි+ දෙමින් දුන් සිහිගැන්වීම්වලටවත් ඔවුන් සවන් දුන්නේ නැහැ.+ 35 ඔවුන් තමන්ගේ රජවරුන් පාලනය කළ කාලයේදී,+ ඔබ ලබා දුන් යහපත් දේවල්+ බොහොමයක් භුක්ති විඳිමින් ඔබ හිමි කර දුන් සරුසාර දේශයේ ජීවත් වුණා.+ එහෙත් ඔවුන් ඔබට සේවය කළේ නැහැ.+ ඔවුන් තම නපුරු ක්‍රියාවලින් ඉවත් වුණෙත් නැහැ.+ 36 දෙවියනි, අද මෙහි රැස්ව සිටින අප දෙස බලන්න. ඔබ අපේ මුතුන්මිත්තන්ට ලබා දුන් බොහෝ සැප සම්පත්වලින් පිරුණු මේ සරුසාර දේශයේ අප ජීවත් වන්නේ දාසයන් ලෙසයි.+ 37 ඔබ අපේ පව්කාර+ ක්‍රියා නිසා අපව පාලනය කිරීමට විදේශීය රජවරුන්ට+ අවසර දී තිබෙනවා. මෙහි සැප සම්පත් හිමි වී තිබෙන්නේ ඔවුන්ටයි.+ අපත් අපේ සතුනුත් සිටින්නේ ඔවුන්ගේ අණසක යටතේයි. මෙතරම් දුක් ගැහැටවලට මුහුණ දෙන්න අපට සිදු වී තිබෙන්නේ ඒ නිසයි.+

38 “අපගේ දෙවියනි, මේ සෑම දෙයක් නිසා අපි කැමතියි ඔබ ඉදිරියේ පොරොන්දුවක් වෙන්න.+ ඒ පොරොන්දුව කඩ නොකරන්න අප සිතින් අදිටන් කරගෙන සිටිනවා. එය ලියවිල්ලක සටහන් කරන්නත් අපගේ අධිපතීන්ගෙත් පූජකයන්ගෙත් ලෙවීවරුන්ගෙත්+ මුද්‍රාවෙන් එය සහතික කරන්නත් අපි සතුටුයි.”+