2 Makoronike

34 Josiya+ akanga aine makore masere+ paakatanga kutonga, uye akatonga kwemakore makumi matatu nerimwe chete ari muJerusarema.+ 2 Akaita zvakarurama pamberi paJehovha,+ akafamba nenzira dzatateguru vake Dhavhidhi;+ uye haana kutsaukira kurudyi kana kuruboshwe.+

3 Zvino mugore rechisere rokutonga kwake, paakanga achiri mukomana,+ akatanga kutsvaka+ Mwari watateguru vake Dhavhidhi; uye mugore rechigumi nemaviri akatanga kuchenesa+ Judha neJerusarema achibvisa nzvimbo dzakakwirira+ nematanda matsvene+ nemifananidzo yakavezwa+ nemifananidzo yakaumbwa nesimbi yakanyungudutswa. 4 Vakaputsawo atari+ dzavanaBhaari+ iye aripo; uye akagura zvigadziko zvokupisira rusenzi+ zvakanga zviri pamusoro padzo; uye akagura-gura matanda matsvene+ nemifananidzo yakavezwa+ nemifananidzo yakaumbwa nesimbi yakanyungudutswa, akazvikuya-kuya kuita upfu,+ akabva ahumwaya pamusoro penzvimbo dzemakuva evaya vaiwanzobayira kwazviri.+ 5 Akapisa mapfupa+ evapristi paatari dzavo.+ Nokudaro akachenesa Judha neJerusarema.

6 Uyewo, mumaguta aManase+ naEfremu+ naSimiyoni kusvikira kwaNaftari, munzvimbo dzavo dzakaparadzwa kumativi ose, 7 akaputsawo atari+ nematanda matsvene,+ akapwanya mifananidzo yakavezwa,+ akaikuya-kuya kuita upfu;+ uye akagura zvigadziko zvose zvokupisira rusenzi+ munyika yose yaIsraeri, achibva azodzokera kuJerusarema.

8 Mugore rechigumi nemasere+ rokutonga kwake, paakanga achenesa nyika uye imba yacho, akatuma Shafani+ mwanakomana waAzaria naMaaseya mukuru weguta naJoa mwanakomana waJoahazi aiva munyori wezvaiitika kuti vagadzire+ imba yaJehovha Mwari wake. 9 Zvino vakaenda kumupristi mukuru Hirikiya,+ vakamupa mari yaiunzwa kuimba yaMwari, yakanga yaunganidzwa nevaRevhi vaiva vachengeti vemasuo+ ichibva muruoko rwaManase+ naEfremu+ neyaibva kune vamwe vaIsraeri+ vose nevaJudha vose nevaBhenjamini nevagari vomuJerusarema. 10 Vakabva vaiisa mumaoko evanhu vaiita basa vakanga vagadzwa kuti vatarisire imba yaJehovha.+ Vanhu vaiita basa vaishanda muimba yaJehovha vakaishandisawo kugadziridza nokugadzira imba yacho. 11 Naizvozvo vakaipa mhizha nevavaki+ kuti vatenge matombo akavezwa+ nematanda okusungisa uye kuti vavake nematanda dzimba dzakanga dzaparadzwa nemadzimambo+ aJudha.

12 Varume vacho vakanga vachiita basa racho nokutendeka;+ uye vaRevhi vaiti Jahati naObhadhiya, vokuvanakomana vaMerari,+ naZekariya naMeshuramu, vokuvanakomana vevaKohati,+ ndivo vakanga vagadzwa kuti vave vatariri vavo. Uye mumwe nomumwe wevaRevhi vaiva nyanzvi dzokuridza zviridzwa,+ 13 vaitarisira vatakuri vemitoro,+ nevatariri+ vevanhu vaiita mabasa akasiyana-siyana; uye kuvaRevhi+ kwaiva nevanyori+ nevakuru nevachengeti vemagedhi.+

14 Zvino pavakanga vachibudisa mari+ yaiunzwa kuimba yaJehovha, mupristi Hirikiya+ akawana bhuku+ romutemo+ waJehovha wakapiwa pachishandiswa Mosesi.+ 15 Naizvozvo Hirikiya akapindura munyori Shafani,+ akati: “Ndawana bhuku romutemo muimba yaJehovha.” Naizvozvo Hirikiya akapa Shafani bhuku racho. 16 Shafani akabva aenda nebhuku racho kuna mambo, akapindurazve mambo achiti: “Vashandi venyu vari kuita zvose zvakaiswa mumaoko avo. 17 Vari kudurura mari iri mumba maJehovha, vachiiisa mumaoko evarume vakagadzwa nomumaoko evanhu vari kuita basa.”+ 18 Munyori Shafani akaudza mambo kuti: “Pane bhuku+ randapiwa nomupristi Hirikiya.”+ Shafani akatanga kuriverenga pamberi pamambo.+

19 Zvino mambo paakangonzwa mashoko omutemo, akabva abvarura nguo dzake.+ 20 Mambo akabva arayira Hirikiya+ naAhikamu+ mwanakomana waShafani naAbdhoni mwanakomana waMika nomunyori+ Shafani+ naAsaya+ mushandi wamambo, achiti: 21 “Endai munondibvunzira+ Jehovha, ini nevakasara muIsraeri nomuJudha pamusoro pemashoko ebhuku+ iri rawanikwa, nokuti kutsamwa kwaJehovha kukuru+ kunofanira kudururirwa patiri nokuti madzitateguru edu haana kuchengeta shoko raJehovha nokuita maererano nezvose zvakanyorwa mubhuku iri.”+

22 Naizvozvo Hirikiya pamwe chete nevakanga vataurwa namambo vakaenda kumuprofitakadzi+ Huridha,+ mudzimai waSharumu mwanakomana waTikvha mwanakomana waHahasi, muchengeti wenguo,+ zvaakanga achigara muJerusarema muchikamu chechipiri pazvikamu zvina; uye vakataura naye saizvozvi. 23 Iye akati kwavari:

“Zvanzi naJehovha Mwari waIsraeri, ‘Itii kumurume akutumai kwandiri: 24 “Zvanzi naJehovha, ‘Tarira ndichaunza dambudziko+ panzvimbo ino nevagari vayo,+ iko kutukwa kwose+ kwakanyorwa mubhuku ravakaverenga pamberi pamambo waJudha,+ 25 nokuti vakandisiya,+ vakakwidzira vamwe vanamwari utsi hwezvibayiro,+ kuti vandigumbure+ nezvose zvinoitwa nemaoko avo+ uye kuti kutsamwa+ kwangu kudururwe panzvimbo ino uye kurege kuzodzimwa.’”+ 26 Asi muti kuna mambo waJudha akutumai kuzobvunza Jehovha: “Zvanzi naJehovha Mwari waIsraeri,+ ‘Kana ari mashoko+ awanzwa, 27 mwoyo wako+ zvawanga uri munyoro zvokuti wazvininipisa+ nokuda kwaMwari pawanzwa mashoko ake pamusoro penzvimbo ino nevagari vayo, ukazvininipisa pamberi pangu,+ ukabvarura+ nguo dzako, ukasvimha misodzi pamberi pangu, ini, iyeni, ndanzwa,+ ndizvo zvinotaura Jehovha. 28 Tarira ndichakuisa kwakaiswa madzitateguru ako, uchaiswa muguva rako norugare,+ maziso ako haazooni dambudziko+ rose randichaunza panzvimbo ino nevagari vayo.’”’”+

Ivo vakabva vauya nemhinduro kuna mambo. 29 Mambo akatumira shoko, akaunganidza varume vakuru vose vaJudha nevomuJerusarema.+ 30 Zvino mambo akaenda kuimba yaJehovha+ aine varume vose vaJudha nevagari vomuJerusarema nevapristi+ nevaRevhi nevanhu vose, vakuru nevaduku; uye akatanga kuverenga+ ivo vachinzwa mashoko ose ebhuku resungano, rakanga rawanikwa muimba yaJehovha.+ 31 Mambo akaramba akamira panzvimbo yake,+ akaita sungano+ pamberi paJehovha yokuti atevere Jehovha uye yokuti achengete mirayiro yake+ nezvipupuriro zvake+ nemirau+ yake nomwoyo wake wose+ uye nomweya wake wose,+ kuti aite+ mashoko esungano akanga akanyorwa mubhuku iri.+ 32 Akaitawo kuti vose vakanga vari muJerusarema nevokwaBhenjamini vabvumiranewo nawo. Vagari vomuJerusarema vakaita maererano nesungano yaMwari, iye Mwari wemadzitateguru avo.+ 33 Pashure paizvozvo Josiya akabvisa zvinhu zvose zvaisemesa+ munyika dzose dzevanakomana vaIsraeri,+ uye akaita kuti vose vakanga vari muIsraeri vaite basa racho, kuti vashumire Jehovha Mwari wavo. Pamazuva ake ose havana kutsauka pakutevera Jehovha Mwari wemadzitateguru avo.+