Glossario ya Maliji a mu Mbimbiliya
A C D F H I J K L M N P S T U W Y Z
A
A-Epekuria.
Kali tumbaji twa akwa-mana ja A-Ngresia ja Epekuria. (341-270 K.M.J.) Manyonga jo kapwile ni kukatuka ha nyonga lia kwamba ngwo chuma chilemu chili kulivwisa kuwaha ku mwono.—Yi 17:18.
A-Fwariseu.
Jina lino linatale ha chimwe chizavu cha uwayilo wa A-Yunda cha ku sekulu yitangu M.J., atu jacho te hi a ku munyachi wa asasendote ko, chipwe chocho, o kapwile ni kukaula shimbi mu yimako-yimako. Chikwo nawa, o te kakulemesa chinji mianda yo, ngwe chize apwile ni kulemesa shimbi. (Mat 23:23) A-Fwariseu te kakulimika ni mianda ya A-Ngregu. Amu te anyingika kanawa shimbi ni mianda, ayo kapwile ni chiyulo chinene hali atu. (Mat 23:2-6) Amwe a kuli ayo kapwile a mu chizavu cha Chota cha Akwa-Kuyula cha A-Yunda. Ha yisuho yinji, ayo kapwile ni kulihangujola ni Yesu hakutwala ku kufunga Sambata, kukaula mianda ya atu, kulikata ni yivulumunyi ni akwa-kufwetesa lijimu. Amwe a kuli ayo kulutwe yapwa Akwa-Kristu ngwe Saulu wa ku Tarsu.—Mat 9:11; 12:14; Mar 7:5; Lu 6:2; Yi 26:5.
A-Kaletea.
Atu waze te atwama mu njiza muze te mwalitakanyina lwiji Hidekele ni Ufrateze. Ku mashimbu a kunyima, mbonge yinene kanda yilemu ya mu njiza ya A-Kaletea yapwile Ure, mbonge yize asemukinyine Apalahama.—Yi 7:4.
Akerupimi.
Akeya.
Mu Yisoneko ya Ngregu ya Akwa-Kristu, liji lino linatale ha mbonge ya Roma ku sule ya Ngresia; limbo linene lia mu mbonge yacho liapwile Korindu. Mbonge ya Akeya te yakuchinga Peloponeso yeswe ni chihanda chinene cha Ngresia.—Yi 18:12.
Akwa-Kristu.
Akwa-kuhengwola tutongonoshi.
Atu waze akulilongesa hakutwala ku chize tangwa, kakweji, ni tutongonoshi yakukalakala hanga asolole yuma ya kulutwe lia matangwa.—Mat 2:1.
Akwa-kulimika ni Kristu.
Liji lino lia Ngregu likwete ulumbunwiso waali. Linatale hali waze keshi kuzanga hanji akulimika ni Kristu. Mulihasa kulumbunuka nawa umwe Kristu wa mahuza, mutu yoze unazange kupwa mu chihela cha Kristu. Mutu mweswawo, ululikiso hanji chizavu chize muchamba ngwo chakumanyinako Kristu hanji kupwa Mesaya, hanji yoze wakulimika ni Kristu ni tumbaji twenyi, mahasa kumutambika pundu ngwo, mukwa-kulimika ni Kristu.—1Yo 2:22.
Akwa-Kuyula.
Akwa-mana A-Stoiku.
Chimwe chizavu cha akwa-mana ja A-Ngregu waze te akufuliela ngwo, kuwahilila ku mwono chinatale ha kutwama kulita ni mana ni yuma ya chisemewa. Kulita ni ayo, mutu yoze ukwete mana keshi kupala yikola chipwe uwahililo.—Yi 17:18.
Alfa ni Omega.
Alma.
Ulumbunwiso wa liji lia Hepreu neʹphesh ni mu Ngregu psy·kheʹ. Muze akuhengwola chize liji lino akulizachisa mu Mbimbiliya, chakusoloka zwalala ngwo, liji liacho liakutala hali (1) atu, (2) tushitu, (3) mwono wa atu hanji wa tushitu. (Upu 1:20; 2:7; Kwa 31:28; 1Pe 3:20; tala nawa maliji a mushi.) Kulisa ni majila anji waze akwa-mayingeleja akuzachishilamo liji “alma,” Mbimbiliya yakusolola ngwo maliji neʹphesh ni psy·kheʹ muze akwazachisa ha yitangiwa ya hashi, kakutala ha chuma chize chikwete mujimba, chize mahasa kukwata, chakumoneka ni kufwa. Mu Mbimbiliya yino, maliji wano kanji-kanji kakwalumbununa kulita ni chikuma chize anahanjikila, ha kuzachisa maliji ngwe wano: “mwono,” “tushitu,” “atu” hanji “chuma chize chikwete mwono,” hanji mutu mwene kuliamba ngwenyi, (“yami” shimbu te ambe ngwenyi, “alma yami.”) Kanji-kanji kuli maliji a mushi waze anasolola “alma” ngwe jila yimwe yakulumbunwinamo. Muze liji “alma” akulizachisa ha chisoneko hanji ha maliji a mushi, ulumbunwiso watamba kulita ni yize alumbununa helu. Muze chisoneko muchamba ngwo, mutu kalinga chuma ni alma yeswe, chino chinalumbunuka ngwo, kachilinga ni mbunge yenyi yeswe, hanji ni mwono wenyi weswe. (Shi 6:5; Mat 22:37) Ha mashimbu amwe, liji lino mu malimi waze asonekene Mbimbiliya, mahasa kulizachisa hanga ahanjike ha zango lize chimwe chitangiwa cha mwono chili nalio ha kulinga chimwe chuma. Chikwo nawa, mulihasa kutala ha umwe mufu.—Kwa 6:6; Yis 23:2; Iza 56:11; Hag 2:13.
A-Media.
Atu a ku munyachi wa Matai mwana wa Yafwe. O te katwama ku milundu ya Irã, kuze kulutwe kwapwile njiza ya A-Media. Ha Pentekoste ya mwaka 33 M.J., amwe waze apwileho, kapwile A-Media.—Yi 2:9.
Amene.
Liji lino linalumbunuka ngwo “ewa” hanji “chochene.” Liji lino linakatuka mu liji lia Hepreu ʼa·manʹ, lize linalumbunuka “kupwa mukwa-kushishika, ni mukwa-shindakenyo.” Atu te kakwamba ngwo Amene hanga atayize chimwe chilakenyo, kulemba hanji yuma yize te akuhanjika. Mu mukanda wa usolwelo liji Amene lili chimwe chisanyiko cha Yesu.—Shi 27:26; 1Sg 16:36; Ro 1:25; Uso 3:14.
Andemoniu.
Yitangiwa ya spiritu yize kuyishi kumoneka, andemoniu kakwete ndundo jinji. Mu mukanda wa Uputukilo 6:2 ni wa Yundase 6, kakwavuluka ngwo “ana a Zambi.” Zambi kakatangile angelo api. Alioze, ene e alipwishile akwa-kole ja Zambi mumu kamwehukile ha matangwa ja Noa ni kulichinga ni Satana mukulimika ni Yehova.—Shi 32:17; Lu 8:30; Yi 16:16; Tia 2:19.
Angelo.
Liji lia Hepreu mal·ʼakhʹ lize mu Ngregu avuluka ngwo agʹge·los, linalumbunuka ngwo “mukeji.” Muze akulizachisa hali mikeji a Zambi, kakulilumbununa ngwo “angelo.” (Upu 16:7; 32:3; Tia 2:25; Uso 22:8) Angelo kali yitangiwa ya ndundo ya ku spiritu. Zambi katangile angelo shimbu te kanda achitanga atu. Mu Mbimbiliya kakwavuluka nawa ngwo, “tununu twa asandu,” “ana a Zambi” ni “tutongonoshi a chimene.” (Shi 33:2; Yom 1:6; 38:7; Yu 14) Angelo kakaatangile ni uhashi wa kuliokesa ene, alioze Zambi katangile umuwika, umuwika. Kwatwama tununu a tununu twa angelo. (Da 7:10) Mbimbiliya yakusolola ngwo hita umwe wa kuli ayo kakwete jina ni utu walisa. Keshi kutayiza hanga aawayile, amwe a kuli ayo keshi kuzanga chipwe lume kusolola majina jo. (Upu 32:29; Lu 1:26; Uso 22:8, 9) O katwama mu yizavu yalisa, chikwo nawa, kakwete yiteli yalisa. Chakutalilaho, amwe kakukalakala kulutwe lia ngunja ya Yehova, kakutwala sango, kakukwasa tuvumbi twa Zambi hano hashi, kakumanununa upatwilo wa Zambi ni kukwasa mulimo wa kwambujola sango jipema. (2Mi 19:35; Sam 34:7; Mat 4:11; Lu 1:30, 31; Uso 5:11; 14:6) Kulutwe lia matangwa, ayo makakwasa Yesu mu jita ya Armagedone.—Uso 19:14, 15.
Arame.
Limi lia Semítica lize lialifwa ni limi lia Hepreu, limi liacho liapwile ni kuzachisa sona jimuwika ja alfabeto. Ku uputukilo kapwile ni kulihanjika kuli A-Arame, alioze kulutwe yaputuka kulihanjika kuli akwa-mingoso mu yifuchi yimwe, yilipwa nawa limi lia miata ja A-Suria ni A-Babilonia. Chikwo nawa, limi liacho kapwile ni kulihanjika ku chifuchi cha Persia. (Ezr 4:7) Yihanda yimwe ya mikanda ya Ezera, Jeremia ni Daniele kayisonekene mu limi lia Arame. Maliji amwe a Arame kaazachishile mu Yisoneko ya Ngregu ya Akwa-Kristu.—Ezr 4:8–6:18; 7:12-26; Jer 10:11; Da 2:4b–7:28; Mar 14:36; Yi 9:36.
Ariopaku.
Mulundu usuku mu Atene, ku chitokelo cha Acrópole. Ariopaku liapwile nawa jina lia ngaji (chota cha akwa-kusopesa) waze apwile ni kulikungulwila ku mulundu wacho. Paulu kamutwalileko kuli A-Epekuria ni A-Stoiku hanga alumbunune yuma yize te akufuliela.—Yi 17:19.
Armagedone.
Liji lino linakatuka mu limi lia Hepreu Har Meghid·dohnʹ, linalumbunuka ngwo, “Mulundu wa Megidu.” Liji lino linatale ha “tangwa linene lia Zambi Mukwa-Ndundo-Jeswe,” lize “mianangana a hashi heswe” makalikungulula hanga akase jita ni kulimika ni Yehova. (Uso 16:14, 16; 19:11-21)—Tala LUYINDA MUNENE.
A-Samaria.
Liji lino chitangu kapwile ni kulizachisa hali A-Izalele a ku minyachi kumi a ku norte. Alioze, muze A-Suria alukukilile Samaria ha mwaka 740 K.M.J., liji lino yilikwata nawa hali yilambala waze A-Suria akwachile. Ha matangwa ja Yesu, jina lino te kulishi kutala nawa ha munyachi hanji ha yikuma ya mafwefwe, alioze liapwile ni kutala ha chimwe chizavu cha uwayilo cha waze te alisulangana ni mbonge yikulu ya Shekeme ni Samaria, waze apwile ni kukalila yuma yimwe te yalisa ni uwayilo wa A-Yunda.—Yo 8:48.
A-Satuseu.
Chizavu cha tachi cha akwa-kuwayila ja A-Yunda, chize chikwete pichi anji ni asasendote waze akwete chiyulo chinene mu milimo ya mu tembele. O te keshi kutayiza mianda yinji ni yuma yize A-Fwariseu te akufuliela. Chikwo nawa, te keshi kufuliela ha uhindukilo ni hali angelo. A-Satuseu kapwile ni kulimika ni Yesu.—Mat 16:1; Yi 23:8.
Atu ja Heronde.
Kapwile atu waze te avuluka nawa ngwo, tumbaji twa Heronde. Chapwile chizavu cha atu waze te akukalila yuma ya mu chifuchi chize te chakukwasa Heronde mu yuma ya mafwefwe ha mashimbu a kuyula chenyi, mushi lia usongwelo wa A-Roma. Amwe a kuli A-Satuseu no kota kapwile ni kukwasa chizavu chacho cha mafwefwe. Atu ja Heronde kalichingile ni A-Fwariseu hanga alimike ni Yesu.—Mar 3:6.
Azia.
C
Chawana.
Chawana kakuchihana hanga chikwase mutu yoze unafupiwa ukwaso. Chawana chacho keshi kuchitongola pundu mu Yisoneko ya Hepreu, alioze shimbi yapwile ni kusolola zwalala kuli A-Izalele chiteli cho cha kukwasa yiswale.—Mat 6:2.
Chawana cha keke.
Liji lia Ngregu lize linalumbunuka chuma chipema. Kanji-kanji liji liacho kakulizachisa ha chimwe chawana chize akuhana ni zango hanji jila yipema yakuhanyinamo. Muze liji lino liakuhanjika ha chawana cha keke ya Zambi, liakulumbunuka chawana chize Zambi akuhana ku zango lienyi mwene chakuhona kushimbwila yimwe fweto. Zango linene ni keke ya Zambi hali atu. Liji lino lia Ngregu kakulilumbununa nawa ngwo, “wana” hanji “chuma chawana.” Chawana cha keke chili chuma chize mutu yoze wika wapwa chihanyi mahasa kuhana.—2Ko 6:1; Efw 1:7.
Chela.
Mawe hanji yipinji ya mapaya hanji yihanda ya mawe, yize apwile ni kuzachisa hanga akwate yiyulo. Kapwile ni kuyisa ku songo lia hina hanji mu chimwe chikwachilo mba machikucha. Mutu yoze te chakuholokela hanji yoze machanda, mwe te akusakula. Kanji-kanji chino kapwile ni kuchilinga ni yilemba.—Mat 27:35; Yi 1:26.
Chifuko cha mushete.
Chifukilo cha Mushete wa Usendo haze mwata wa asasendote te akuzujila manyinga a milambu ha Tangwa lia Kufuka Shili. Liji lino lia Hepreu linalumbunuka “kufuka” hanji “kujimuna” shili. Chifuko chacho chapwile cha kulinga ni oru, chikwo nawa, hapwile akerupimi sali ni sali. Ha mashimbu amwe Mbimbiliya yakutongola wika “chifukilo.”—Kut 25:17-22; 1Sg 28:11; Hep 9:5.
Chihela chisandu.
Kanji-kanji chili chihela cha kuwayililamo. Ha yisuho yinji, liji lino liakutala ha tabernakulu hanji tembele mu Yerusaleme. Liakulumbunuka nawa malilu, chihela chize atwama Zambi.—Kut 25:8, 9; 2Mi 10:25; 1Sg 28:10; Uso 11:19.
Chijikilo.
Chikwata chize apwile ni kuzachisa hanga ajike nacho chimwe chuma (kanji-kanji ha uma hanji ni sela) ni kusolola ngwo chuma chili ni chetu hanji chambala. Ku mashimbu a kunyima, yijikilo kapwile ni kuyilinga ni yikwata yikolo ngwe (mawe, mazo a njamba ni mapaya), ha yijikilo yacho hapwile sona hanji yizulie. Liji lino kakulizachisa nawa ngwe chilayi chize chakusolola ngwo chuma chili cha mutu umwe, chili chijimbikilo hanji chuma chize chahengama.—Mat 27:66; Yo 6:27; Efw 1:13; Uso 5:1; 9:4.
Chijimbikilo chisandu.
Chikalakala cha hina.
Kwapwile limwe hina lize liapwile ni kuhandununa Muma Musandu ni Muma Musandu Mwahiana mu tabernakulu ni mu tembele. Hina liacho liapwile lipema chinji liakufunjieka ni yizulie ya akerupimi.—Kut 26:31; 2Sg 3:14; Mat 27:51; Hep 9:3.
Chikeleyi.
Mahina waze akuzachisa hanga alinge no njeke, jize apwile ni kusa mbuto. Kanji-kanji chikeleyi kapwile ni kuchilinga ni kupu lia pembe mulaa. Yikeleyi yapwile mazalo waze te akusolola chinyengo.—Upu 37:34; Lu 10:13.
Chikoi.
Pwo yoze uli ku ulo, alioze malisumbakenya ni mutu yoze kalimbachile nenyi, chipi-chipi hamukunda wa mbongo. (Liji lia Ngregu lize linalumbunuka “chikoi” pórne, linakatuka ku limwe liji lize linalumbunuka “kulanjisa.”) Liji lino liakutala hali mapwo, chipwe ngwe Mbimbiliya yakutongola yikoi a malunga. Shimbi ya Mose yapwile ni kukanjisa ukoi, chipwe mbongo jize yikoi apwile ni kuzuka te keshi kujitayiza mu chihela chisandu cha Yehova. Chino te chalisa ni waze te keshi kuwayila Yehova waze apwile ni kuzachisa yikoi a mapwo ni a malunga a mu tembele hanga azuke mbongo. (Shi 23:17, 18; 1Mi 14:24) Mbimbiliya yakuzachisa nawa liji lino ngwe chilayi hanga litale hali atu, mavungu, hanji maululikiso waze akuliamba ngwo kakuwayila Zambi, alioze kakuwayila mahamba. Chakutalilaho, mayingeleja waze avuluka mu mukanda wa Usolwelo ngwo, Babilonia Yinene, kakwatesa ngwe chikoi mumu kakulinjisa mu yuma ya manguvulu a hano hashi hanga apwe ni ndundo ni upite.—Uso 17:1-5; 18:3; 1Sg 5:25.
Chikungulwila.
Chili chizavu cha atu waze akulikungulula hamuwika ni nyonga limuwika hanji hanga alinge umwe mulimo. Mu Yisoneko ya Hepreu, liji lino kanji-kanji linatale ku vungu lia Izalele. Alioze mu Yisoneko ya Ngregu ya Akwa-Kristu, linatale ha yikungulwila yeswe ya Akwa-Kristu, chipwe chocho ha mashimbu akwo liakutala ha chikungulwila chimuwika.—1Mi 8:22; Yi 9:31; Ro 16:5.
Chikwachilo cha insensu.
Chapwile chimwe chikwachilo cha oru, prata hanji cha unengu chize apwile ni kuzachisa mu tabernakulu ni mu tembele hanga ocheleho insensu.—Kut 37:23; 2Sg 26:19; Hep 9:4.
Chilakenyo.
Chilakenyo chize mutu akulakenya kuli Zambi hanga alinge chimwe chuma, kuhana chawana, kunjila mu umwe mulimo, hanji kwecha kulinga chimwe chuma chize hi chipi ko. Chilakenyo chikwete tachi ngwe limwe shingo.—Mat 5:33.
Chilayi.
Chilumbilo.
Lili limwe shita lize apwile ni kutunga ni mavu, mawe, ndopi ja mawe hanji mapaya akujika ni utale. Ha chilumbilo chacho he apwile ni kulambwila yitapo hanji insensu ha mashimbu a uwayilo. Mu chipatulo chitangu cha mu tabernakulu ni mu tembele, mwapwile chimwe “chilumbilo cha oru” chikehe chakutunga ni mapaya akukwita ni oru, haze te akulambwila insensu. Mu yiize mwapwile “chilumbilo cha unengu,” chilumbilo chinene chize te akuzachisa hanga ahanyineho yitapo ya kulumba. Yilumbilo neyo kapwile ni kuyizachisa chinji mu uwayilo wa mahuza.—Kut 39:38, 39; 1Mi 6:20; Mat 5:23, 24; Lu 1:11; Yi 17:23.
Chisapwilo.
Mutondo uli ni mafwo uze apwile ni kuzachisa hanga asapwile manyinga hanji meya ha yiwanyino ya kupemesa. Mutondo wacho kota wapwile wa manjerona (Origanum maru; Origanum syriacum). Chisapwilo chize anatongola ha Yoano 19:29, kota chapwile cha mafwo a manjerona waze akashilile ku umwe mutondo hanji ku chishachi cha sorgo (Sorghum vulgare) mumu mutondo wacho te usuku, kashika te muuhasa kuhetesa shiponja yize yapwile ni vinyu yisasu ku kanwa lia Yesu.—Hep 9:19.
Chishima.
Maliji a mana hanji yishima yikehe-yikehe yize yakulumbununa limwe longeso, hanji kushindakenya ha umwenemwene mu maliji akehe. Mu Mbimbiliya mumuhasa kupwa chishima chize chapwa chijimbikilo. Kuli atu amwe yishima hiyinapu jila yakuhanjikilamo hanga aliase mikuta ni kulilengulula.—Chi 12:9; 2Pe 2:22.
Chisoneko.
Chitakanyishi.
Chitapo.
Chawana chize mutu akuhana kuli Zambi hanga asolole usakwililo wenyi, atayize mulonga wenyi ni kupwa cheka ni usepa upema ni Zambi. Chize kuli Abele, atu ku zango lio ene kapwile ni kuhana yitapo yeka ni yeka, hamwe ni yitapo ya yimuna, ndo muze usendo wa Shimbi ya Mose wasolwele ngwo atu te katamba kuhana yitapo. Muze Yesu ahanyine mwono wenyi ungunu, shimbi ya kulambula yitapo ya tushitu yiyihwa. Alioze Akwa-Kristu machinunga ni kulambula yitapo ya ku spiritu kuli Zambi.—Upu 4:4; Hep 13:15, 16; 1Yo 4:10.
Chitavwi.
Chikwata cha utale chize apwile ni kuzachisa hanga atoweze atu hanji kwimba miaso. Zungo lia chitavwi liapwa ngwe chilayi cha kwambujola upatwilo wa Yehova ni ha yiwanyino yikwo yilemu yinatale ha upale wa Zambi.—1Ko 15:52; Uso 8:7–11:15.
Chitende cha kahia.
Chili chihela chize “chinalekwoka ni kahia ni fundanga,” chize avuluka nawa ngwo “kufwa chamuchiali.” Akwa-shili waze keshi kulikonyeka, ngwe Ndiapu, chipwe lume kufwa ni Fuka (hanji Heteze) yeswe makayinyasa mu chitende chacho. Amu chitangiwa cha ku spiritu, chipwe kufwa ni Heteze kuyishi kuwema ni kahia, kashika chitende chacho kuchalumbunukine chihela chize akumwesenamo atu lamba lia mutulo, alioze chili chilayi cha unongeso wa mutolo.—Uso 19:20; 20:14, 15; 21:8.
Chitwamo cha upatwilo.
Mu Yisoneko ya Ngregu, kanji-kanji liji lino liakutala ha chimwe chihela chisuku, chize chakupwa haze. Chapwile ni kufupiwa ndalo mba ahase kunyinaho. Akwa-kuyula he apwile ni kutwama hanga ahanjike ni mbunga hanji kwalweza yiyulo yo. Maliji “chitwamo cha upatwilo wa Zambi” ni “chitwamo cha upatwilo wa Kristu” kanalumbunuka majila waze Yehova akuzachisa hanga asopese atu.—Ro 14:10; 2Ko 5:10; Yo 19:13.
Chivungo.
Lifwo lisuku lize apwile ni kulinga ni yikonda hanji ni manenga lize apwile ni kusoneka sali limuwika ni kulivunga ku mukombo. Yisoneko kayisonekene ni kuyisonejeka ha yivungo, yize te akuzachisa chinji ha mashimbu waze asonekene Mbimbiliya.—Lu 4:17-20; 2Ti 4:13.
Chiwanyino cha Kulitumbikila.
Tangwa lia ha mwaka lize apwile ni kwiwuluka kupema cha tembele hanyima lia kuyipwisa ya luchisa kuli Antíoco Epifânio. Chiwanyino chino cha matangwa nake chapwile ni kuputuka ha tangwa 25 ya Chisleve.—Yo 10:22.
Chiwanyino cha Mbolo Kuyishi Futunwiso.
Chapwile chiwanyino chitangu ha yiwanyino yinene yitatu yize A-Izalele apwile ni kulinga ha miaka yeswe. Chapwile ni kuputuka ha tangwa 15 ya Nisane hanyima lia tangwa limuwika muze Chizomboka te hichapalika, chiwanyino chacho chapwile ni kulinga matangwa shimbiali. Ha matangwa jacho A-Izalele kapwile ni kulia wika mbolo kuyishi futunwiso hanga ewuluke kutuhuka cho mu Engitu.—Kut 23:15; Mar 14:1.
Chiwanyino cha Mwene cha Ufuku.
Chili chiwanyino chize akulinga ni mbolo kuyishi futunwiso ni vinyu ngwe yilayi ya mujimba ni manyinga a Kristu; chiwanyino chize chakwiwulula kufwa cha Yesu. Kulita ni Mbimbiliya, chiwanyino chacho chapwa shimbi kuli Akwa-Kristu; chinalite nawa kuvuluka chiwanyino chacho ngwo, “Chiwanyino cha Kwiwuluka Kufwa cha Yesu.”—1Ko 11:20, 23-26.
Chiwanyino cha Yisakila.
Chize akuvuluka nawa ngwo, Chiwanyino cha Mambalaka hanji cha Kukungila Mbuto. Chiwanyino chacho chapwile ni kulingiwa chize ha tangwa 15 ndo 21 ha kakweji wa Etanime. Chiwanyino chino chapwile ni kulingiwa ku songo lia mwaka wa kucha, chapwile ni kukwasa A-Izalele hanga awahilile ni kusakwilila Yehova ha yiwape yeswe apwile ni kutambula ha mashimbu a kucha. Ha mashimbu a chiwanyino chacho, A-Izalele kapwile ni kutwama mu yisakila hanji mikanda hanga ewuluke kutuhuka cho mu chifuchi cha Engitu. Chapwile chimwe cha ku yiwanyino yitatu yize malunga eswe a Izalele te atamba kwiza mu Yerusaleme.—Lev 23:34; Ezr 3:4; Yo 7:2.
Chizavu.
Chizavu cha atu waze akukwasa amwe malongeso hanji umwe kasongo ni kukaula yuma yize akufuliela. Liji lino kalizachishile ha yizavu yaali yilemu chinji ya A-Yunda, A-Fwariseu ni A-Satuseu. Atu waze te hi Akwa-Kristu ko, kapwile ni kusanyika Akwa-Kristu ngwo, “chizavu” hanji “mbunga ya Nazare,” ni kumona ngwe chizavu chacho chakatukile mu uwayilo wa A-Yunda. Ha kupalika cha mashimbu, mu chikungulwila cha Akwa-Kristu yimupwa yizavu-yizavu. Ha mukanda wa Usolwelo kanatongolaho chizavu chize te avuluka ngwo A-Nikoleta.—Yi 5:17; 15:5; 24:5; 28:22; Uso 2:6; 2Pe 2:1.
Chizomboka.
Chiwanyino cha ha mwaka chize chapwile ni kulingiwa ha tangwa 14 ya Ambimbi (yoze kulutwe avulukile ngwo, Nisane.) Chizomboka chapwile chiwanyino cha kwiwuluka utuswilo wa A-Izalele mu Engitu. Ha chiwanyino chacho, atu kapwile ni kushihaho ni kwocha mwana-panga hanji pembe yoze te akulia ni mafwo asasu ni mbolo kuyishi futunwiso.—Kut 12:27; Yo 6:4; 1Ko 5:7.
D
Drakma.
Mu Yisoneko ya Ngregu ya Akwa-Kristu, liji lino linatale ha lumbongo wa prata wa A-Ngresia, yoze wapwile ni kupezala 3.4 g.—Mat 17:24.
F
Falau.
Chisanyiko cha mianangana a mu Engitu. Mbimbiliya yakutongola Falau atano, (Shishake, So, Tihaka, Falau-Neko ni Falau-Hofara,) alioze majina ja a Falau akwo a ha mashimbu ja Apalahama, Mose ni Yosefwe keshi kwatongola mu Mbimbiliya.—Kut 15:4; Ro 9:17.
Fuka.
Chihela chize akufunda mutu nyi hafwa. Liji lino linakatuka mu limi lia Ngregu mnemeíon lize linalumbunuka “kwiwuluka,” chekwamba ngwo atu waze hanafu kechi kaavulama. (Yo 5:28, 29) Muze liji lino akulisoneka ni sona jikehe-jikehe, liakulumbunuka muma muze akufunda mutu. Alioze muze akulisoneka ni sona jinene-jinene, liakulumbunuka muma mwa afu eswe. Liji lino mu Hepreu kakulivuluka ngwo “Seol,” alioze mu Ngregu ngwo “Hades.” Liji liacho kakulizachisa mu Mbimbiliya ngwe chilayi hanga lisolole chihela hanji kupwa cha chimwe chuma hanji mutu yoze kechi kuhasa kulinga nichimwe hanji kunyonga.—Upu 47:30; Chi 9:10; Mat 27:61; Yi 2:31.
Futunwiso.
Yitumbo yize akusa mu mwaha, meya hanji chuma cheswacho hanga chifutunuke. Liji liacho linatale chinji ha mwaha uze hiwafutunuka kulu. Mu Mbimbiliya, liji futunwiso kakulizachisa ngwe chilayi cha shili ni uhenge. Chikwo nawa, kakulizachisa hanga asolole kutanda cha chuma chize kuchishi kusoloka.—Kut 12:20; Mat 13:33; Nga 5:9.
H
Hepreu.
Liji lino chitangu kalizachishile hali Apalama (Apalahama) hanga hapwe kalisa hakachi ka iye ni A-Amore. Kulutwe, liji liacho yalizachisa hali munyachi wa Apalahama kupalikila muli mujikulu wenyi Yakomba.—Upu 14:13; Kut 5:3; Yi 26:14.
Herme.
Kazambi wa Ngregu, mwana wa Zeuse. Muze Paulu apwile mu Lisetra kamulukile ngwo Herme, mumu zambi wacho kapwile ni kumumona ngwe kanganda wa tuzambi kanda zambi wa kuhanjika kanawa.—Yi 14:12.
Heronde.
Jina lia usoko wa mianangana waze apwile ni kuyula A-Yunda ni utumino wa Roma. Heronde, Munene, kayile lufuma ha kutunga tembele ni kutuma kushiha twanuke mumu lia kuzanga kushiha Yesu. (Mat 2:16; Lu 1:5) Ana jenyi, Heronde Arkelau ni Heronde Andipa kaatongwele hanga ayule chihanda cha wanangana wa tato. (Mat 2:22) Andipa kapwile nguvulu, alioze te kakumuvuluka ngwo “mwanangana,” yoze wayulile ha miaka yitatu ni chipinji ha mashimbu a kwambujola cha Kristu. Chocho yanunga ndo ha shimbu lize anasoneka mu mukanda wa Yilinga, kapitulu 12. (Mar 6:14-17; Lu 3:1, 19, 20; 13:31, 32; 23:6-15; Yi 4:27; 13:1) Kulutwe lienyi, Heronde Akripa I, mujikulu wa Heronde, Munene, yamushiha kuli mungelo wa Zambi muze te hayula ha shimbu likehe. (Yi 12:1-6, 18-23) Mwanenyi, Heronde Akripa II, yamusalakana ha wata. Chocho yayula ndo ha mashimbu waze A-Yunda alimikine ni A-Roma.—Yi 23:35; 25:13, 22-27; 26:1, 2, 19-32.
Heteze.
Liji lia Ngregu lize mu limi lia Hepreu linalumbunuka ngwo “Seol.” Kakulilumbununa ngwo, “Fuka” (ni sona jinene-jinene) muze linatale muma mwa afu eswe.—Tala chikuma FUKA.
I
Insensu.
Yapwile kuchinga cha usososhi ni maji eka ni eka a vumba lipema yize apwile ni kwocha mba mukutuhuka vumba lipema. Insensu yalipwila yize apwile ni kuzachisa mu tabernakulu ni mu tembele, kapwile ni kuyilinga ni milungo yiwana. Insensu yacho kapwile ni kuyocha chimene ni chingoloshi ku chilumbilo cha Insensu chize chapwile Muma Musandu. Ha Tangwa lia kufuka shili, kapwile ni kuyochela Muma Musandu Mwahiana. Insensu te yakulumbunuka utayizo wa yilemba ya tuvumbi ashishika a Zambi. Musono, Akwa-Kristu keshi kwashinjila kuzachisa Insensu.—Kut 30:34, 35; Lev 16:13; Uso 5:8.
Izalele.
Jina lize Zambi ahanyine kuli Yakomba. Kulutwe, jina liacho yaputuka kulisanyika ku munyachi weswe. Munyachi wa ana 12 a Yakomba, kanji-kanji, te kakwavuluka ngwo Izalele, zuwo lia Izalele, atu ja Izalele, malunga a Izalele hanji A-Izalele. Jina Izalele nelio kakulizachisa muze anahanjika hakutwala ku wanangana wa minyachi kumi, wa ku sango uze te wakulihandununa ni wanangana wa Yunda ku uto. Kulutwe, jina liacho yaputuka kulizachisa hali Akwa-Kristu akuwayisa, “A-Izalele a Zambi.”—Nga 6:16; Upu 32:28; Yi 4:10; Ro 9:6.
J
Jila.
Mu Yisoneko, liji lino kakulizachisa ngwe chilayi, muze anahanjika hakutwala ku yitanga hanji ndako yize Yehova akutayiza ni yize iye keshi kutayiza. Waze apwile tumbaji twa Yesu te kakwavuluka ngwo, “jila,” mumu lia kutwama kulita ni ufulielo wo muli Yesu Kristu ni kukaula chilweza chenyi.—Yi 19:9.
Jondo.
Liji lino linakatuka mu limi lia Ngregu ábyssos lize linalumbunuka ngwo, “wina usuku chinji,” “wina uze kuushi musulo.” Liji lino kakulizachisa mu Yisoneko ya Ngregu ya Akwa-Kristu hanga ahanjike hakutwala ku chimwe chihela hanji muma mwa kufungila mutu hanga ahone kutuhuka. Liji lino mulihasa kulumbunuka nawa fuka hanji yuma yikwo.—Lu 8:31; Ro 10:7; Uso 20:3.
K
Ka-Etiopia.
Kali umwe mutu wa ku Etiopia, vungu likulu lia ku sule ya Engitu. Njiza yacho kwenako musono kwatwama sule ya Engitu ni chihanda cha ku norte ya Sudão.—Yi 8:27.
Kafunga.
Kali mutu yoze wakununga ni kulaula chipi-chipi ha ufuku hanga afunge atu ni mazuwo ha mashimbu akuhana utowezo muze kwakusoloka yimwe ponde. Tufunga kanji-kanji te kakwasa ha yipanga ni ha tuposhi a mambonge hanga atale atu waze aneza, shimbu kanda achiheta mukamwihi. Tufunga kanji-kanji kakwavuluka ngwo tulayi hanji tuposhi.—Mat 27:65; 28:4.
Kakweji mwaha.
Tangwa litangu lia hita kakweji mu calendario wa A-Yunda. Tangwa liacho lie te akulikungulula hanga alinge yiteleka ni kulambula yitapo yalipwila. Kulutwe, tangwa liacho yilipwa tangwa lilemu chinji mu chifuchi cheswe. Ha tangwa liacho atu te keshi kukalakala.—Kwa 10:10; 2Sg 8:13; Kol 2:16.
Kalayi.
Mutu yoze ukwete chiteli cha kufunga ni kukwasa chikungulwila. Liji lia Ngregu epískopos linatale ha kufunga kanawa chimwe chuma. Liji “kalayi” ni “mukulwana” (presbýteros) linatale ha mulimo umuwika uze wakupwa kulinga mu chikungulwila cha Akwa-Kristu. Alioze liji “mukulwana” liakushindakenya ha yitanga yipema ya mutu yoze akutongola. Mba liji “kalayi” liakushindakenya ha chiteli hanji ngwetu milimo yize mutu yoze akutongola atamba kulinga.—Yi 20:28; 1Ti 3:2-7; 1Pe 5:2.
Ka-Nazare.
Kanga.
Mutondo uze mutu akusa ha chipaya ni kuzezeleka yuma ku masongo, hanji mutondo uze akukasa mu kota ja yimuna aali waze akwete tachi (kanji-kanji yimuna jacho ngombe) hanga akoke chikwata cha kulima nacho hanji limwe temba. Kanji-kanji ndungo kapwile ni kuzachisa kanga hanga ambate yuma yilemu. Kashika, kanga kapwile ni kuyizachisa ngwe chilayi cha upinji hanji kuzeyela umwe mutu. Kapwile ni kuyizachisa nawa ngwe chilayi cha yihungumiona ni lamba. Kuchiza hanji kumakuna kanga chapwile ni kulumbunuka songo lia undungo, yihungumiona ni lamba.—Lev 26:13; Mat 11:29, 30.
Kasongo.
Katongonoshi wa ha mandemba.
Liji lino linalite ni liji “katongonoshi yoze wakutemuka chimenemene.” Kali katongonoshi wa kasula yoze wakuvumbuka ku chivumbuko, shimbu tangwa kanda lichivumbuka. Katongonoshi wacho kakusolola ngwo kwilu himukucha.—Uso 22:16; 2Pe 1:19.
Katongonoshi yoze wakutemuka chimenemene.—
Tala chikuma KATONGONOSHI WA HA MANDEMBA.
Kavumbi.
Liji lia Ngregu diákonos ha mashimbu amwe kakulilumbununa ngwo, “kavumbi” hanji “ngamba.” Liji “kavumbi” linatale hali mutu yoze wakukalakala ngwe chikwashi wa makulwana a mu chikungulwila. Mutu yoze akutongola ngwe kavumbi katamba kukaula shimbi ja mu Mbimbiliya hakutwala ku mulimo wacho.—1Ti 3:8-10, 12.
Ka-Yunda.
Liji lize akuzachisa hali mutu yoze wa ku munyachi wa A-Yunda, chize haze anongeselele wanangana kumi wa minyachi ya A-Izalele. (2Mi 16:6) Muze te undungo mu Babilonia hiwahwa, jina lino yalihana kuli A-Izalele a ku minyachi yeka ni yeka waze ahilukile ku Izalele. (Ezr 4:12) Kulutwe, jina lino yalizachisa hanga lisolole kalisa hakachi ka A-Izalele ni mavungu a yilambala. (Es 3:6) Postolo Paulu kazachishile liji lino ngwe chilayi muze ahanjikile ha chikungulwila ngwenyi, chifuchi kuze mutu asemukinyine hi chilemu ko.—Ro 2:28, 29; Nga 3:28.
Kristu.
Kulakenya.
Chapwile shingo lize liapwile ni kusolola ngwo chuma chimwe chili chamwenemwene; chilakenyo te chakuhana shindakenyo ngwo, mutu malinga chimwe chuma hanji ka. Liji lino kanji-kanji linatale ha chilakenyo chize akulinga kuli mutu yoze uli mulemu chinji, alioze liakutala chinji hali Zambi. Yehova kalingile chilakenyo hanga akolese usendo wenyi ni Apalahama.—Upu 14:22; Hep 6:16, 17.
Kulamba.
Kulamba ni kome hanji kuzachisa shikote yize yili ni mahunda hanji mbimbo ku masongo.—Yo 19:1.
Kulikonyeka.
Kulinanga.
Mu Mbimbiliya, liji lino kuliatalile wika ha kulinanga ku mujimba, alioze linatale nawa ha kupwa chakuhona chipeka ni kwehuka yuma yeswe yize yapwa ya majilo, upangala hanji kulikisa ku manyonga ni ku spiritu. Alioze mu Shimbi ya Mose, liji lino te liakutala ha kulipemesa.—Lev 10:10; Sam 51:7; Mat 8:2; 1Ko 6:11.
Kulitwamina kulia.
Chinalumbunuka kulitwamina kulia ha amwe mashimbu. A-Izalele kapwile ni kulitwamina kulia ha Tangwa lia Kufuka Shili, ni ha mashimbu akalu waze te akufupiwa usongwelo wa Zambi. A-Yunda kasele matangwa awana ha mwaka hanga ewuluke mashimbu akalu ku mwono wo. Musono kukushi shimbi yize yinasolola ngwo, Akwa-Kristu katamba kulitwamina kulia.—Ezr 8:21; Iza 58:6; Mat 4:2; 9:14; Lu 18:12; Yi 13:2, 3; 27:9.
Kumanunuka cha miaka.
Kali mashimbu waze makatwala ku kuhwa cha miaka yino hanji cha yuma yeswe yize yatwama mu chiyulo cha Satana. Kumanunuka chacho muchikalingiwa hamuwika ni kwiza cha Kristu. Angelo makahandununa “atu api hakachi ka akwa-ululi,” ni kwanongesa kupalikila mu usongwelo wa Kristu. (Mat 13:40-42, 49) Tumbaji twa Yesu kazangile kunyingika shimbu lize songo te muliza. (Mat 24:3) Yesu shimbu te kanda azezuka mu malilu, yalakenya kuli tumbaji twenyi ngwenyi, te mapwa hamwe no ndo ha mashimbu jacho.—Mat 28:20.
Kumanunuka cha miaka yino.
Ulumbunwiso wa liji lia Ngregu ai·onʹ muze anahanjika ha chimwe chikuma hanji yuma yize yakusolola shimbu limwe. Mbimbiliya yakuhanjika hakutwala ku “kumanunuka cha miaka yino” hanga yihanjike ha kupwa cha yuma ya hano hashi ni ha yitanga ya atu musono. (2Ti 4:10) Kupalikila mu usendo wa Shimbi, Zambi yatesa miaka yize amwe akuvuluka ngwo, mashimbu ja A-Izalele hanji mashimbu ja A-Yunda. Yesu Kristu kupalikila mu chitapo cha ukuule, kamuzachishile kuli Zambi hanga ahane uputukilo wa kumanunuka cha miaka yino. Chino chitangu chinatale ha chikungulwila cha Akwa-Kristu akuwayisa ni spiritu. Chikwo nawa, chasolwele uputukilo wa miaka yaha, uze akusolola kupalikila mu umwenemwene wa usendo wa shimbi. Muze liji lino liakupwa mu plural, liakutala ha kumanunuka cha yuma yinji, hanji cha yuma yize yinalingiwa, yize yapwileko hanji yize muyipwako. Ha mashimbu amwe, liji liacho liakutala ha yuma yeswe yize atangile ngwe, tangwa, kakweji, tutongonoshi ni hashi.—Mat 24:3; Mar 4:19; Ro 12:2; 1Ko 10:11.
Kunenganyana.
Yili yikola yize twakwivwa muze twakufwisa hanji muze tunapalika mu yimwe yipikalo. Ku mashimbu a kunyima, atu kapwile ni kunenganyana ha mashimbu anji. Ha mashimbu jacho atu te kakutetwoka chikolo, chikwo nawa, ayo te kakuzala mazalo waze akusolola ngwo kali ni ufwe, kusa uto ku mutwe, kusuwa mazalo ni kulilamba ha pambo. Ha mashimbu amwe kapwile ni kusanyika waze te ananyingika kulila lungungu hanga aye ni kufunda.—Es 4:3; Mat 11:17; Mar 5:38; Yo 11:33; Uso 21:4.
Kusayika moko.
Kushingana.
Kusosomba hanji kuhanjika yuma yipi hali umwe mutu hanji chimwe chuma. Shingo kanji-kanji linatale ha upatwilo hanji kwamba yuma yipi yize muyihasa kulingiwa ku mwono wa mutu. Nyi Zambi hanji mutu yoze uli ni ulite mashingana, shingo liacho liakupwa ni ulemu, chikwo nawa likwete tachi ngwe uprofeto.—Upu 12:3; Kwa 22:12; Mar 11:21; Yi 23:12; Ro 12:14; Nga 3:10.
Kuuli.
Chikwata cha kumwesena mutu lamba. Atu amwe kapwile ni kusa wika molu jo mu kuuli, alioze akwo kapwile ni kwasa moko ni kota. Chino chapwile ni kukwika mutu kulisunga hanji kuhwima kanawa.—Jer 20:2; Yi 16:24.
Kuwayila Zambi.
Kuwayisa.
Liji lia Hepreu lize linalumbunuka “kuzujila maji.” Kapwile ni kuzujila maji ha mutwe hanji ha chimwe chuma, ngwe chilayi cha kulihana mu umwe mulimo walipwila. Mu Yisoneko ya Ngregu ya Akwa-Kristu, liji lino kakulizachisa hanga lilumbunuke kumwanga cha spiritu yisandu kuli waze akusakula hanga akatwame mu malilu.—Kut 28:41; 1Sa 16:13; Lu 4:18; Yi 10:38; 2Ko 1:21.
Kuzungula.
Mashimbu waze apwile ni kufuza tiliku hanga yilitepe ni yizungu. Kuzungula kakuchizachisa nawa ngwe chilayi cha chuma chipi hanji chize kuchishi ni ulemu. (Sam 1:4) Mulimo wa kuhandununa mbuto ku yula. Kuzungula kapwile ni kuchilinga hita mwaka ni umwe mutondo, hanji nyi ngwe mbuto muyoka chinji, kapwile ni kuzachisa yikwata yalita yakulinga nayo mulimo wacho yize te akukoka kuli tushitu. Yikwata yacho te yakupalika helu lia mbuto yakusanda mu chizungwilo.—Lev 26:5; Iza 41:15; Mat 3:12.
Kwiza.
Mu Yisoneko yimwe ya Ngregu ya Akwa-Kristu, liji lino linatale ha kwiza cha Yesu Kristu mu Wanangana wa Mesaya, uze waputukile muze aputukile kuyula mu malilu, mba unachinungu ni kuyula ha matangwa wano a kusula cha yuma ya mwakono. Kwiza cha Kristu, kuchalumbunukine ngwo iye kumeza susumuku, alioze chinalumbunuka amwe mashimbu akutesa kanawa.—Mat 24:3.
L
Lambu.
Kupu lia panga, lia pembe hanji lia chimbembe cha ngombe lize akuzachisa hanga asonekeho. Makupu jacho kapwile ni kukola chinji kuhiana manenga hanji mbungu jize apwile ni kuzachisa ngwe yikwata ya kusonekaho yivungo ya Mbimbiliya. Yivungo ya malambu yize Paulu echile kuli Timoteu hanga amuneheneyo, kota yapwile chihanda cha Yisoneko ya Hepreu. Yivungo yimwe ya mu Mar Morto kayisonekene ha malambu.—2Ti 4:13
Lépton.
Ha mashimbu a Yisoneko ya Ngregu ya Akwa-Kristu, kano kapwile kalumbongo ka A-Yunda ka ndando yikehe, kaze apwile ni kulinga ni unengu hanji ni bronze.—Mar 12:42; Lu 21:2; tala maliji a mushi.
Levi; Ka-Levi.
Mwana wamuchitatu wa Yakomba ni mukwo-pwo Liya. Chikwo nawa, lino lili jina lia munyachi. Ana atatu ja Levi e aputukile yizavu yitatu yize twanyingika ngwetu, Usasendote wa Levi. Ha mashimbu amwe jina “A-Levi,” liakutala ha munyachi weswe, kuchizako usoko wa asasendote wa Arone. Ha kuteta cha njiza mu Chifuchi cha Chilakenyo, munyachi wa Levi kuwakatambwile chihanda nichimwe cha chifuchi, alioze watambwile mambonge 48 mukachi ka njiza ya minyachi yikwo.—Shi 10:8; 1Sg 6:1; Hep 7:11.
Libanu.
Usososhi umu uze wakututumuka ku mitondo hanji yiputa avuluka ngwo Boswellia. Muze usososhi wacho apwile ni kuwocha, wapwile ni kutuhwisa vumba lipema. Wapwile umwe wa ku milungo ya insensu yisandu yize te akuzachisa mu tabernakulu. Kapwile ni kuyihana hamuwika ni mulambu wa wunga uze te akusa helu lia mikala ya mbolo ja kutumbieka, Muma Musandu.—Kut 30:34-36; Lev 2:1; 24:7; Mat 2:11.
Liriku.
Mbonge ya Roma yize yili ku noroeste ya Ngresia. Kutwanyingikine nyi Paulu kambujolwele mu Liriku, alioze mu mulimo wenyi wa kwambujola iye kahetele ndo mu njiza yacho.—Ro 15:19.
Liwe lia ha mbango.
Lili liwe lize akusa ha mbango ya limwe zuwo haze akunungina yikalakala, liwe liacho liapwa lilemu mumu liakununga ni kukolesa yikalakala. Liwe lia ha mbango liapwile liwe lize apwile ni kusa ha fundamentu, kanji-kanji kapwile ni kusakula liwe likolo hanga atunge nalio mazuwo anene-anene ni yipanga ya mbonge. Liji liacho kakulizachisa nawa muze anahanjika hakutwala ku fundamentu ya hashi. Yesu kanamutongola ngwe “Liwe lia ha mbango” lia chikungulwila cha Akwa-Kristu, chize akutesa ni zuwo lia uwayilo.—Efw 2:20; Yom 38:6.
Liwe lia kutwa nalio.
Liapwa limwe liwe liamuwundu lize akusa helu lia likwo lialifwa nalio, mba kakulizachisa hanga atwe nalio yuma hanga alinge wunga. Ku liwe likehe kapwile ni kusako chimwe chuma chize te chakukwasa hanga liwe liacho lihase kujinga helu lia liwe linene. Ku mashimbu a kunyima, ku yihela yinji mapwo kapwile ni kuzachisa mawe akehe-akehe a kutwa no. Amu atu apwile ni kujikijila ha mawe a kutwa no mba alie, kashika Shimbi ya Mose yapwile ni kukanjisa atu kutambula liwe lia mutu mukwo yoze umuli ni kongo. Mawe anene-anene a kutwa no kapwile ni kwajingisa kuli tushitu.—Shi 24:6; Mar 9:42.
Longeshi wa Shimbi.
Mutu yoze te wakusonejeka Yisoneko ya Hepreu. Ha mashimbu ja Yesu, liji lino liapwile ni kutala ha chimwe chizavu cha atu waze te alongoloka mu Shimbi. Atu jacho te kakulimika ni Yesu.—Ezr 7:6; tala maliji a mushi; Mar 12:38, 39; 14:1.
Luchisa.
Lukanda.
Liji lize akuzachisa hanga ahanjike ha milali yinji ya mitondo yize yakusoka mu yana. Kanji-kanji liji lino liakutala chinji ha mutondo avuluka ngwo, Arundo donax. (Mat 27:29; Uso 11:1) Ha mashimbu amwe liji lino liakulumbunuka mutondo uze mukwa-kuyula kauzachisa ngwe chilayi cha chiyulo chenyi—Upu 49:10; Hep 1:8.
Luyinda munene.
Liji lia Ngregu “luyinda” linalumbunuka kapinda hanji lamba lize twakupalika mumu lia yuma yipi yize yakulingiwa ku mwono. Yesu kahanjikile hakutwala ku “luyinda munene” yoze kanda alingiwa kama, yoze te malingiwa mu Yerusaleme, chipi-chipi yoze te malingiwa hashi heswe kulutwe lia matangwa unatale ha kwiza chenyi mu “uhenya.” (Mat 24:21, 29-31) Paulu katongwele luyinda wacho ngwe upatwilo wa ululi uze Yehova makaneha hali “waze kanyingikine Zambi ni waze keshi kwononokena sango jipema” hakutwala kuli Yesu Kristu. Yesu kanamusolola mu kapitulu 19 wa Usolwelo, kanasongwela chizavu cha tujita a mwilu waze analimiki ni “ngongo ni mianangana a hashi ni tujita two.” (2Te 1:6-8; Uso 19:11-21) “Mbunga yinene” muyikalilamwina ha luyinda wacho. (Uso 7:9, 14)—Tala chikuma ARMAGEDONE.
M
Mahamba; Kukombelela mahamba.
Maji a vumba lipema.
Maji a vumba lipema a ndando yinji, achiwuluka waze te akuchiza ku mutondo wa nardo. (Nardostachys jatamansi) Amu maji wano te akufwika ndando yinji, kashika kapwile ni kulinga amwe alifwa no hanji kwachinga ni maji waze hi apema ko. Alioze mukanda wa Marku ni wa Yoano yinasolola ngwo, Yesu kamusele “maji a vumba lipema waze te akufwika ndando yinji.”—Mar 14:3; Yo 12:3.
Manaa.
Kulia chize A-Izalele alile ha miaka 40 muze apwile mu puya. Chapwile kulia chize Yehova te akwaha. Manaa yapwile ni kusoloka hashi kupalikila mu chikomokeso ha chimene cheswe, kuchizako wika matangwa a Sambata. Muze A-Izalele ayimwene ha chisuho chitangu yamba ngwo, “Ayi yuma yika?” hanji mu limi lia Hepreu “man huʼ?” (Kut 16:13-15, 35) Yesu neye katongwele manaa ngwe chilayi.—Yo 6:49, 50.
Mapasu.
O kakwenda mu yizavu. Mu Shimbi ya Mose kapwile ni kwatenga kulia mumu kalinanga. Yizavu yinene-yinene ya mapasu waze apwile ni kulia yuma yeswe yize mawana mu jila ni kupihisa yuma yinji, kapwile ni kwamona ngwe yilungo.—Kut 10:14; Mat 3:4.
Masendoniya.
Chihela cha ku norte ya Ngresia chize chapwile ni lufuma munene ha mashimbu a kuyula cha Alexandre, Munene, chikwo nawa, te kuchatwamine mushi lia chiyulo nichimwe ndo muze achikumbile kuli A-Roma. Muze postolo Paulu ayile ku Europa ha chisuho chitangu, Masendoniya te hiyapwa kulu mbonge ya A-Roma. Paulu kayile ku chihela chacho ha yisuho yitatu.—Yi 16:9.
Mashimbu a kulitwamina kulia.
Tangwa lilemu kuli A-Izalele lize avuluka nawa ngwo, Yom Kippur (linakatuka mu limi lia Hepreu yohm hak·kip·pu·rimʹ, linalumbunuka ngwo “tangwa lia kufuka,”) lize apwile ni kwiwuluka ha tangwa 10 lia kakweji wa Etamine. Lino liapwile tangwa limuwika ha mwaka lize mwata wa asasendote apwile ni kunjila Muma Musandu Mwahiana mu tabernakulu. Iye kapwile ni kulambula manyinga a yitapo mumu lia shili yenyi, shili ya A-Levi ni akwo ni shili ya atu eswe. Yitapo yacho te yakutala ha chitapo cha Yesu, chize muchikahwisa liakulu shili ya akwa-hashi eswe, ni kuhana uhashi kuli atu wa kulivwashana ni Yehova. Wano kapwile mashimbu a kukunguluka chinene chisandu ni mashimbu a kulitwamina kulia. Liapwile nawa tangwa lia sambata, hanji ngwetu, mashimbu a kwecha kulinga milimo yize atu te akulinga tangwa ha tangwa.—Lev 23:27, 28; Yi 27:9; Kol 1:20; Hep 9:12.
Matangwa a kusula.
Maliji wano kakwazachisa mu Mbimbiliya hanga ahanjike hakutwala ku mashimbu waze yuma yimwe yize atesele yakumanunuka. (Eze 38:16; Da 10:14; Yi 2:17) Kulita ni mutapu wa uprofeto wacho, chino muchihasa kulingiwa ha mashimbu akehe, hanji ha kupalika cha miaka yinji. Mbimbiliya yakuzachisa maliji wano muze yakuhanjika hakutwala ku “matangwa a kusula” cha mwakono, ha mashimbu a kwiza cha Yesu.—2Ti 3:1; Tia 5:3; 2Pe 3:3.
Mazalo a utale.
Mazalo waze maswalale apwile ni kuzala hanga alifunge ku jita. Mazalo jacho kapwile, tepa, chikuto cha utale, muya, yikwata yakufuka nayo ha mikono, ni lukepwe.—1Sa 31:9; Efw 6:13-17.
Mbalanda ya Solomone.
Ha mashimbu ja Yesu, liapwile limwe senge lia kupupika lize liapwile ku chivumbuko cha tembele. Chakusoloka ngwe mbalanda yacho yaliangile kupwa ku tembele ya Solomone. Yesu kendele mu mbalanda yacho ha “mashimbu a chishika,” ni Akwa-Kristu atangu no kapwile ni kulikungulwilamo hanga awayile Zambi.—Yo 10:22, 23; Yi 5:12.
Mbale.
Kapwile umwe kazambi yoze A-Kanana apwile ni kumona ngwe mwenya-malilu, yoze wapwile ni kwaha vula ni kulia. Liji Mbale kapwile ni kulizachisa nawa hali tuzambi akehe-akehe a ha mukala. Liji liacho mu limi lia Hepreu linalumbunuka ngwo, “Mwene hanji Mwata.”—1Mi 18:21; Ro 11:4.
Mbandu.
Yino yapwile jila yize te akweseka nayo, yize te yikwete utohwe wa kwoko lia kwazulula chize ku munwe wa shina ndo ku munwe wa songo. Kulita ni yitenda ya 44.5 cm, mbandu yimuwika te muyihasa kupwa ni usuhwe wa 22.2 cm.—Kut 28:16; 1Sa 17:4.
Mbelezepu.
Lino lili jina likwo lia Satana, mukwa-kuyula wa andemoniu. Kota linakatuka nawa ha jina lia Mbale-Zepupe, mbale yoze A-Filistea apwile ni kuwayila mu Ekrone.—2Mi 1:3; Mat 12:24.
Mbinga.
Liji lino linatale ha mbinga ja tushitu, jize akuzachisa ngwe misenge, ni yikwachilo ya maji, ulombo ni yuma yikwo ya kulikwita-kwita ku mujimba. (1Sa 16:1, 13; 1Mi 1:39; Eze 9:2) “Mbinga” kanji-kanji kakujizachisa ngwe chilayi cha tachi ni kukumba.—Shi 33:17; Mik 4:13; Lu 1:69.
Mbinga ja chilumbilo.
Yuma yamanangana yize te yatala haze lia mambango awana a yilumbilo yimwe.—Lev 8:15; 1Mi 2:28; Uso 9:13.
Mbolo ja kutumbieka.
Mbolo kumi ni jiali jize apwile ni kusa ha mikala yaali. Hita mukala te kakusaho mbolo jisambano jize te akusa ha mesa ya Muma Musandu mu tabernakulu ni mu tembele. Kapwile ni kujivuluka nawa ngwo, “mbolo ja kusa ha mikala.” Ha Sambata jeswe, mulambu uze apwile ni kuhana kuli Zambi, kapwile ni kuusalakanyisa ni mbolo jaha. Kanji-kanji asasendote e apwile ni kulia mbolo jize te akuchiza.—2Sg 2:4; Kut 25:30; Lev 24:5-9; Mat 12:4; Hep 9:2.
Mbolo kuyishi futunwiso.
Yinatale ha mbolo yize akulinga chakuhona kuyisa futunwiso.—Shi 16:3; Mar 14:12; 1Ko 5:8.
Mbongo, Mina.
Mu Yisoneko ya Ngregu ya Akwa-Kristu, mina yimuwika yapwile ni kufwika 100 drakma. Kulema chayo chapwile cha 340 g.—Lu 19:13.
Mbumba; Mukwa-mbumba.
Yikola yipi yize yakukwata ha chikonda. Mu Yisoneko, yikola ya mbumba kuyalisele ni yikola yize atu ananyingika musono ni jina liacho, mumu kuyishi kukwata wika hali atu, alioze yakukwata nawa ku mazalo ni mazuwo. Mutu yoze ukwete yikola ya mbumba kakumuvuluka ngwo, mukwa-mbumba.—Lev 14:54; Lu 5:12.
Mesaya.
Liji lize linakatuka mu limi lia Hepreu, linalumbunuka ngwo, “wakuwayisa ni spiritu.” Mu limi lia Ngregu liji lino kakulivuluka ngwo, “Kristu.”—Da 9:25; Yo 1:41.
Metru.
Chikwata chize akuzachisa hanga eseke unji wa meya. Chikwata chacho chapwile cha usuhwe wa 1.8 m.—Yi 27:28.
Mihuko yitangu.
Yili mihuko yitangu ya mashimbu a kucha mbuto yitangu hanji chuma cheswacho. Yehova kapwile ni kwita ku vungu lia Izalele hanga amwehe mihuko yo yitangu ngwe, atu, tushitu hanji yilima-yilima. Vungu lia Izalele, liapwile ni kuhana mihuko yitangu kuli Zambi ha Chiwanyino cha Mbolo Kuyishi Futunwiso ni ha Pentekoste. Liji “mihuko yitangu” nelio kakulizachisa ngwe chilayi muze anahanjika hakutwala kuli Yesu ni tumbaji twenyi akuwayisa.—1Ko 15:23; Kwa 15:21; Yis 3:9; Uso 14:4.
Milambu.
Milambu ha shili.
Yitapo yize apwile ni kuhana ha shili yize mutu te akulinga mumu lia uhenge uze twahingile. Yitapo yacho yapwile ya tushitu eka ni eka ngwe, ngombe ni membe, kulita ni yize mutu yoze walinga shili apwile nayo.—Lev 4:27, 29; Hep 10:8.
Mira.
Usososhi wa vumba lipema uze te akuchiza ku mitondo yeka ni yeka ya mbimbo-mbimbo ni ku mitondo yikehe-yikehe yize avuluka ngwo Commiphora. Mira yapwile yimwe ya ku milungo yize apwile ni kulinga nayo maji asandu waze te akuwayisa no. Kapwile ni kuyisa ku mazalo ni mihela hanga yipwe ni vumba lipema, chikwo nawa, kapwile ni kuyichinga ni maji waze apwile ni kuzachisa hanga olole no mujimba ni mu maji akulikwita ku mujimba. Mira neyo kapwile ni kuyizachisa hanga alulieke nayo mujimba wa mufu shimbu kanda achimufunda.—Kut 30:23; Yis 7:17; Mar 15:23; Yo 19:39.
Moloko.
Zambi ya A-Amone, kota zambi yomwene mwe akuvuluka nawa ngwo Moleke, Milikome ni Moloko.—Yi 7:43.
Mukulwana; mukulwana wa lunga.
Mutu yoze hajama. Mu Yisoneko, liji lino kanji-kanji linatale hali mutu yoze uli ni wata ni chiteli mu chihunda hanji mu vungu. Mu mukanda wa Usolwelo, liji lino liakutala nawa ha yitangiwa ya mu malilu. Liji lia Ngregu pre·sbyʹte·ros, kakulilumbununa ngwe “mukulwana” nyi malizachisa hali waze apwile ni kusongwela chikungulwila.—Kut 4:29; Yis 31:23; 1Ti 5:17; Uso 4:4.
Mukwa-kupanda wanga.
Kali mutu yoze wakuzachisa ndundo jize anyingika ngwo, jakukatuka kuli maspiritu api.—Yi 13:6.
Mulambu wa kulumba.
Yitapo ya tushitu waze apwile ni kwocha ha chilumbilo ni kwahana a muwundu ngwe yawana kuli Zambi. Mukwa-kuhana chawana chacho te keshi kusala ni chihanda nichimwe cha kashitu (ngombe, panga, chimbembe, tujila hanji membe) yoze apwile ni kulambula.—Kut 29:18; Lev 6:9; Mar 12:33; Hep 10:6
Mulambu wa vinyu.
Mulambu uze apwile ni kumwangina ha chilumbilo hamuwika ni milambu yikwo. Paulu kazachishile liji lino ngwe chilayi hanga ahanjike hakutwala ku zango lienyi lia kulihana ni kulingila mandumbu jenyi Akwa-Kristu.—Kwa 15:5, 7; Fwp 2:17.
Mulangi wa maji a vumba lipema.
Jina lia tumilangi tukehe-tukehe tuze apwile ni kutulikila maji a vumba lipema. Tumilangi twacho kapwile ni kutulinga ni liwe lize liatwama hakamwihi ni Alabastron, ku Engitu. Kanji-kanji kwapwile kamwe kachifuko kaze apwile ni kufuka ku tumilangi twacho hanga maji achine kumwangana. Liwe liacho nelio te kakulivuluka ha jina linoliene.—Mar 14:3.
Mulimo usandu.
Muma Musandu Mwahiana.
Chipatulo chize chapwile mukachi ka tabernakulu ni tembele, muze te akusa mushete wa usendo. Chikwo nawa, te kakuvulukamo ngwo, Musandu wa Musandu. Kulita ni Shimbi ya Mose, mwata wa asasendote wika mwe te watamba kunjila Muma Musandu Mwahiana ha Tangwa lia Kufuka Shili.—Kut 26:33; Lev 16:2, 17; 1Mi 6:16; Hep 9:3.
Mungelo wa lutwe.
Musandu.
Chipatulo chitangu chinene cha mu tabernakulu hanji cha mu tembele, chize chalisa ni chipatulo cha mukachi cha Muma Musandu Mwahiana. Mu chipatulo chisandu cha mu tabernakulu mwe te mwakupwa chikwachilo cha oru, chilumbilo cha oru cha insensu, mesa ya mbolo ja kutumbieka ni yikwachilo yimwe ya oru. Chipatulo chisandu cha mu tembele mwe mwapwile chilumbilo cha oru, yikwachilo kumi ya ndeya ja oru ni mesa kumi ja mbolo ja kutumbieka.—Kut 26:33; Hep 9:2.
Musandu; Usandu.
Chili chitanga chize chinatale hali Yehova; chinatale nawa ha chuma chize chapwa chisandu, chalinanga mu yuma yeswe. (Kut 28:36; 1Sa 2:2; Yo 17:11) Alioze muze liji liacho liakutala hali atu, (Mar 6:20; Yi 3:21), yuma (Ro 7:12; 11:16; 2Ti 3:15), chihela (Mat 4:5; Yi 7:33; Hep 9:1) ni ha milimo (Kut 36:4), liji liene lia Hepreu ni lia Ngregu liakulumbunuka kuhandununa hanji kuhalisa Zambi musandu; hanji kusa yimwe kutenga hanga tuyizachise mu mulimo wa Yehova. Mu Yisoneko ya Ngregu ya Akwa-Kristu, liji lize akulumbununa ngwo “musandu” ni “usandu,” kakulizachisa nawa hanga litale ha kulinanga cha mutu ku yitanga.—2Ko 7:1; 1Pe 1:15, 16.
Musase.
Umwe mutondo usasu chinji uze ukwete vumba linji. Mbimbiliya yakuzachisa liji musase ngwe chilayi cha usasu hanji lamba lize liakwiza mumu lia utanji, undungo, uhenge ni utanganyanyi. Mu mukanda wa Usolwelo 8:11, liji “musase” linalumbunuka chimwe chuma chisasu chinji, chize muchihasa kushiha mutu, chize chikwete ulembe upi.
Mushete wa usendo.
Mushete wa kutunga ni mapaya a mutondo wa mukesha, wa kukwita oru, uze te akusa Muma Musandu Mwahiana mu tabernakulu. Ha kupalika cha matangwa, yausa Muma Musandu Mwahiana mu tembele yize Solomone atungile. Mushete wacho wapwile ni chifuko cha oru ni akerupimi aali helu waze apwile ni kulitala. Muchima lia mushete wacho yuma yilemu yize yapwilemo, yapwile mawe aali a Kumi lia Shimbi.—Shi 31:26; 1Mi 6:19; Hep 9:4.
Musongo; Yilungo.
Musongo weswawo uze wakusambuluka ni kulitanda ni kawashi. Musongo wacho muuhasa kulitanda hashi heswe ni kushiha atu anji. Kanji-kanji liji lino liakutala nawa ha usopeso wa Zambi.—Lu 21:11.
Musongwolwela.
Umwe mutondo usuku ukwete songo lia utale wasongoloka, mutondo wacho njimi kapwile ni kuuzachisa hanga achoke nawo yimuna. Maliji a mukwa-mana waze akukwasa atu kukaula yiyulo yenyi kakwatesa ni misongwolwela. Liji “kulimika ni yami” hanji ngwetu, kulimika ni misongwolwela, liakukatuka ku yitanga ya uhulia yize ngombe amwe akusolola muze anaachoko ni musongwolwela, ni kulamba chisanya ku musongwolwela mba malilemeka ene mwene.—Yi 26:14; Kuy 3:31.
Mutondo.
Haze apwile ni kuhachila atu. Ku mavungu amwe, kapwile ni kuzachisa mutondo hanga ahachileho umwe mutu ni kumusolola ngwe utowezo kuli atu akwo, yapwile nawa jila yakukoleselamo sonyi mutu ha mbunga. A-Suria waze te afumana mumu lia kwasa jita, kapwile ni kusa atu ku mitondo yasongoloka ha kwanjisayo mu jimo ni kufwambukila ha pambo. Kulita ni shimbi ya A-Yunda, mutu yoze te wakulinga chuma chipi chinji, ngwe kushililika hanji kukombelela mahamba, chitangu te kakumushiha ni mawe hanji mu jila yeka mba mujimba wenyi mausa ha mutondo ngwe utowezo kuli atu akwo. (Shi 21:22, 23; 2Sa 21:6, 9) A-Roma te kakukashila atu ha mutondo, alioze atu jacho te mahasa kutwama matangwa anji ni mwono shimbu kanda achifwa ni yikola, pwila ni mumu lia mwalwa unji. Ha mashimbu amwe, ngwe chize chalingiwile kuli Yesu, ayo te kakuhata moko ni molu a mutu yoze asuma mulonga ha mutondo. (Lu 24:20; Yo 19:14-16; 20:25; Yi 2:23, 36)—Tala chikuma MUTONDO WA LAMBA.
Mutondo wa lamba.
Ulumbunwiso wa liji lia Ngregu stau·ros lize linalumbunuka mutondo, ngwe mutondo haze ahachilile Yesu. Kukushi niyimwe yize yinasolola ngwo liji lino lia Ngregu linalumbunuka kulusu, ngwe chize akulizachisa mu uwayilo wa mahuza ngwe chilayi cha ulembelo ha sekulu jinji muze Kristu te kanda achisemuka. Liji “mutondo wa lamba,” linahana ulumbunwiso walita, uze unalite ni ulumbunwiso utangu, mumu liji stau·ros nelio mulihasa kulumbunuka lamba ni sonyi jize tumbaji twa Yesu te mapalika. (Mat 16:24; Hep 12:2)—Tala Chikuma MUTONDO.
Mutondo wa mwono.
Mutu yoze uli ni utuswilo; Mutu yoze hanatusuka.
Ha mashimbu a kuyula cha A-Roma, mutu yoze “watusuka” te kakusemuka ni utuswilo wacho, kashika kapwile ni ulite wa kupwa Ka-Roma wamwenemwene. Chikwo nawa, mutu yoze “akutusula” kapwile yoze wapwile ndungo mba kulutwe mamutusula. Muze apwile ni kutusula umwe ndungo kulita ni shimbi, iye kapwile ni kutambula ulite wa kupwa Ka-Roma wamwenemwene. Alioze te keshi kumutayiza hanga apwe ni chiteli mu yuma ya mafwefwe. Nyi ngwe utuswilo wacho kuwalitele ni shimbi, mutu yoze wapwile ndungo te keshi kutambula ulite weswe wa kupwa Ka-Roma wamwenemwene.—1Ko 7:22.
Mwana mutangu.
Kapula-jimo kuli yisemi jenyi. Ku mashimbu a kunyima, mwana mutangu kapwile ni chihela chilemu mukachi ka usoko, iye mwe te wakusala ni chiyulo muze tato te akufwa. Yesu keshi wika mwana mutangu wa Yehova, alioze kali nawa mutangu wa yitangiwa yeswe ni mutangu kuhinduka hakachi ka afu.—Upu 25:33; Kut 11:5; Kol 1:15; Uso 1:5.
Mwana-mutu.
Liji lino liakusoloka mu Evanjelu ha yisuho 80. Liji liacho linatale hali Yesu Kristu, chikwo nawa, liakusolola ngwo, muze iye asemukine ku musunya, yapwa mutu. Kakapwile wika mutu wa spiritu yoze wapwile ni mujimba wa musunya. Liji lino liakusolola nawa ngwo, Yesu te mamanununa uprofeto uli ha mukanda wa Daniele 7:13, 14. Mu Yisoneko ya Hepreu, liji lino kalizachishile nawa hali Ezekiele ni Daniele hanga asolole kalisa watwama hakachi ka mikeji ja atu ni Zambi yoze wahele sango jacho.—Eze 3:17; Da 8:17; Mat 19:28; 20:28.
Mwana wa Ndawichi.
Lili liji lize kanji-kanji akuzachisa hali Yesu, hanga lishindakenye ngwo, iye kali Swana wa usendo wa Wanangana, yoze te mapwa wa ku munyachi wa Ndawichi.—Mat 12:23; 21:9.
Mwata wa asasendote.
Kulita ni Shimbi ya Mose, mwata wa asasendote kapwile ni kumanyinako mbunga kumeso ja Zambi. Iye mwe wapwile ni kusongwela asasendote akwo. Kakumuvuluka nawa ngwo, Sasendote wa Lutwe. Iye wika mwe wapwile ni ulite wa kunjila Muma Musandu Mwahiana, chipatulo cha mu tabernakulu muze te kumushi kunjila mutu mweswawo, chize kulutwe chapwile ni mu tembele. Iye te kakunjilamo wika ha Tangwa lia Kufuka Shili. Liji mwata wa asasendote, kakulizachisa nawa hali Yesu.—Lev 16:2, 17; 21:10; Mat 26:3; Hep 4:14.
Mwe mupi.
N
Ndekapole.
Unji wa mambonge a mu Ngresia. Ku uputukilo, mambonge jacho kapwile kumi, (mu limi lia Ngregu liji deʹka linalumbunuka “kumi,” liji poʹlis linalumbunuka “mbonge”). Ndekapole liapwile nawa jina lia njiza ya ku chivumbuko cha Kalunga-Lwiji wa Ngalileya ni Lwiji Yordau kuze kwapwile mbonge jinji. Kwapwile ku chihela kuze te akulingila mingoso yinji ni mianda ya A-Ngresia. Yesu kapalikile mu njiza yacho, alioze kukwatwamine nichimwe chinasolola ngwo, kanjilile mu mambonge jacho.—Mat 4:25; Mar 5:20.
Ndenariu.
Mbongo ja prata ja A-Roma jize te jakupezala 3.85 g. Sali limwe lia mbongo jacho liapwile ni chizulie cha Sesare. Ndenariu yapwile fweto ya mutu yoze te wakukalakala tangwa limuwika. Chikwo nawa, lumbongo wacho mwe te atu “akufweta” ngwe lijimu lize A-Roma apwile ni kwita kuli A-Yunda.—Mat 22:17; Lu 20:24.
Ndiapu.
Ngehena.
Jina lia Ngregu lia Chikulo cha Hinome, chize chapwile ku sule ya Yerusaleme ya ku Shakulu. (Jer 7:31) Chikulo chacho kachiprofetezele mu umwe uprofeto ngwe chihela muze te mapwa ni kumbila afu. (Jer 7:32; 19:6) Kukushi nichimwe chize chinasolola ngwo tushitu hanji atu kapwile ni kwambila mu Ngehena hanga aamwese lamba hanji kwocha ni mwono wo. Kashika chihela chacho, kuchalumbunukine chihela chize kuchishi kumoneka kuze akumwesena lamba alma ja atu mu kahia ku miaka yeswe. Alioze Yesu ni tumbaji twenyi kazachishile liji Ngehena ngwe chilayi cha “kufwa chamuchiali,” hanji ngwetu, kwonwona cha mutolo.—Uso 20:14; Mat 5:22; 10:28.
Ngregu.
Limi lize akuhanjika A-Ngresia. Liji liacho liakutala nawa hali mutu yoze wasemukinyine mu Ngresia, hanji mu usoko wa A-Ngresia. Mu Yisoneko ya Ngregu ya Akwa-Kristu, liji lino likwete ulumbunwiso unene, linatale hali atu eswe waze hi A-Yunda ko hanji waze atayijile mianda ni limi lia A-Ngresia.—Joe 3:6; Yo 12:20.
Nguji.
Lili chuma chamanangana chize chakukwata chimwe chuma, muchihasa kupwa nguji hanji chuma chize chalifwa ni nguji. Manguji amwe kapwile ni kwasa ngwe chilayi cha yiwanyino hanji cha yuma yilemu yize yalingiwileko. Manguji kazachishile muze atungile tembele ni mazuwo a mwanangana Solomone. Atu waze te keshi kulingila Zambi, kajikile manguji hanga awayile tuzambi a mahuza. Chipwe A-Izalele no ye alingile ha mashimbu amwe.—Kuy 16:29; 1Mi 7:21.
Nguvulu.
Tuminyi wa lutwe wa yimwe mbonge ni ukwaso wa chizavu chize te chakutala ha yuma ya mafwefwe ya mu Roma. Iye kapwile ni ndundo mu yuma ya mu chifuchi ni uswalale. Utumino wenyi wapwile ulemu chinji mu mbonge muze te akuyula, alioze yuma yize te akulinga kapwile ni kuyitala kuli chizavu chize te chakutala ha yuma ya mafwefwe ya mu Roma.—Yi 13:7; 18:12.
Nisane.
Muze te hatuhuka mu undungo mu Babilonia, lino yilipwa jina liaha lia kakweji yoze chitangu te avuluka ngwo, Ambimbi, yoze wapwile kakweji mutangu wa mu calendario musandu wa A-Yunda ni kakweji wamuchishimbiali wa milimo. Kakweji wacho te kakuputuka mukachi ka kakweji wa Março ni kuya ndo mukachi ka kakweji wa Abril. (Neh 2:1) A-Yunda kapwile ni kulia Chizomboka ha tangwa 14 ya Nisane. Tangwa liacho lie Yesu alingile Chiwanyino cha Mwene cha Ufuku. (Lu 22:15, 19, 20) Tangwa liacho lie ashihilile Yesu ha mutondo wa lamba.—Lu 23:44-46.
Njongo.
Mwe te akwesekela hanji kuzongela yuma yumu hanji yuma yikwo. Njongo yacho yapwile ya 220 L kulita ni bato yacho.—1Mi 5:11; Lu 16:7.
P
Paraisu.
Chili chimwe chihela chipema chinji hanji umwe munda. Munda wa Endene we wapwile paraisu yitangu, yize Yehova alingilile lunga ni pwo mutangu. Muze apwile ha mutondo wa lamba, Yesu kambile yimwe kuli chingalwe yoze wapwile sali lienyi, yize yasolwele ngwo hashi muhakapwa paraisu. Liji lino ha 2 A-Korindu 12:4, kota linatale ha paraisu yize muyiza kulutwe lia matangwa, alioze ha Usolwelo 2:7, liji liacho linatale ha paraisu ya mu malilu.—Mwa 4:13; Lu 23:43.
Pentekoste.
Chiwanyino chamuchiali ha yiwanyino yitatu yize A-Yunda eswe mu Yerusaleme te atamba kufunga. Pentekoste yinalumbunuka (Tangwa) lia Makumi Atano. Mu Yisoneko ya Ngregu ya Akwa-Kristu, jina lino kakulizachisa hanga lilumbunuke yize akuvuluka mu Yisoneko ya Hepreu ngwo, Chiwanyino cha Kuhela Mbuto ni Chiwanyino cha Masemana. Chiwanyino chacho kapwile ni kuchilinga ha tangwa 50, lize akwalula kukatuka ha tangwa 16 ya Nisane.—Kut 23:16; 34:22; Yi 2:1.
Porneia.—
Tala ha chikuma UTANJI.
Postolo.
S
Samaria.
Mbonge yinene ya wanangana wa minyachi kumi ha miaka 200. Lili nawa jina lia njiza yo. Mbonge yacho yapwile kutunga ha mulundu uze ukwete jina lia Samaria. Ha matangwa ja Yesu, Samaria yapwile mambonge waze te atwama mukachi ka norte ya Ngalileya ni sule ya Yundeya. Wenyi uze Yesu apwile ni kulinga, kapwile ni kwehuka kwambujola mu njiza yacho, alioze kapalikilemo ha yisuho yimwe ni kuhanjika ni atu jamo. Petulu kazachishile sapi yamuchiali ya chilayi muze A-Samaria atambwile spiritu yisandu.—1Mi 16:24; Yo 4:7; Yi 8:14.
Sambata.
Liji lize linakatuka mu limi lia Hepreu linalumbunuka ngwo, “uhwimino.” Lili tangwa liamuchishimbiali ku semana ya A-Yunda (liakuputuka ni kutoka cha tangwa liamuchitano ndo ku kutoka cha tangwa lia Sambata.) Matangwa akwo a yiwanyino ya ha miaka ngwe, mwaka wamuchishimbiali ni mwaka wa makumi atano, neyo te kakuyivuluka ngwo, sambata. Ha tangwa lia Sambata atu te keshi kulinga milimo yikwo, alioze asasendote e wika apwile ni kulinga milimo ya usasendote Muma Musandu. Ha miaka ya Sambata, atu te katambile kulima, chipwe kushinjila umwe ndumbwo Ka-Izalele kufweta limwe kongo. Mu Shimbi ya Mose, ukanjiso hakutwala ku Sambata wapwile wa ululi, alioze mangana ja mayingeleja yawezelaho ukanjiso ukwo. Kashika ha mashimbu a Yesu, o kapwile ni kuhana yiteli yinji kuli atu.—Kut 20:8; Lev 25:4; Lu 13:14-16; Kol 2:16.
Samu.
Sango Jipema.
Sasendote.
Mutu yoze wapwile ni kumanyinako Zambi kumeso ja atu, kwalongesa hakutwala kuli Zambi ni shimbi jenyi. Sasendote neye kapwile ni kumanyinako atu kumeso ja Zambi, kulambula yitapo, kwakalila ni kwalembela. Muze te kanda kuchipwa Shimbi ya Mose, miata a mu usoko e apwile ni kukalakala ngwe asasendote a mu usoko wo. Alioze kupalikila mu Shimbi ya Mose, ana a malunga ja Arone a ku munyachi wa Levi, yatunga usasendote. A-Levi akwo te kakwakwasa mu mulimo wacho. Muze akolesele usendo waha, A-Izalele a ku spiritu yapwa vungu lia asasendote ni Yesu Kristu ngwe Sasendote wa Lutwe.—Kut 28:41; Hep 9:24; Uso 5:10.
Sasendote wa lutwe.
Mu Yisoneko ya Hepreu, lili liji lize akuzachisa hanga ahanjike hakutwala kuli mwata wa asasendote. Alioze mu Yisoneko ya Ngregu ya Akwa-Kristu, liji sasendote wa lutwe te liakutala hali malunga alemu mukachi ka asasendote, hamwe ni miata ja asasendote waze te akulihana chinji, ni makulwana 24 waze te akumanyinako mulimo wa usasendote.—2Sg 26:20; Ezr 7:5; Mat 2:4; Mar 8:31.
Satana.
Serete.
Yikonja yaali yinene-yinene yize yatwama ku Libia, ku norte ya Africa. Akwa-kwendesa ulungu kapwile ni kuvwila woma chihela chacho mumu lia masekeseke anji waze te atwamako, waze te akupinjisa mumu lia kuzala cha kalunga-lwiji.—Yi 27:17.
Seria; A-Seria.
Sesare.
Jina lia umwe usoko wa mu Roma lize kulutwe liapwile chisanyiko cha nguvulu wa mu Roma. Augustu, Kelautiu ni Tiperiu kakwatongwola ha majina jo mu Mbimbiliya. Alioze chisanyiko chacho necho kakuchizachisa muze akuhanjika hakutwala kuli Nero, chipwe ngwe mu Mbimbiliya keshi kumuvuluka ha jina lienyi. Mu Yisoneko ya Ngregu ya Akwa-Kristu, jina “Sesare” nelio kakulizachisa hanga ahanjike hakutwala kuli mutu yoze unayulu hanji ha umwe Unguvulu.—Mar 12:17; Yi 25:12.
Shili.
Kwehuka shimbi yize hanatese kulu, yitanga yize yakushiha shimbi. Liji likwo lize akuzachisa hanga ahanjike ha shili, lili utanguke.—Sam 51:3; Ro 5:14.
Shimbi.
Shimbi ya Mose.
Spiritu.
Liji lia Hepreu ruʹach ni liji lia Ngregu pneuʹma kanji-kanji akulumbununa ngwo, spiritu, likwete ulumbunwiso unji. Alioze ulumbunwiso weswe unatale ha chuma chize atu keshi kuhasa kumona, linatale ha jimwe tachi jize jakukalakala. Liji lino lia Hepreu ni lia Ngregu linatale ha (1) fuji, (2) tachi ja mwono jize jatwama kuli tushitu eswe a hano hashi, (3) tachi jize jakwiza mu mbunge ya mutu, jize jakumukwasa kuhanjika ni kulinga yuma, (4) maliji waze akukatuka kuli Zambi, (5) linatale ha yitangiwa ya mwilu, (6) tachi ja Zambi hanji ngwetu spiritu yisandu.—Kut 35:21; Sam 104:29; Mat 12:43; Lu 11:13.
Spiritu yisandu.
Sunangonga.
Liji lino linalumbunuka “kukunga atu hamuwika hanji chizavu cha atu.” Alioze ha yisoneko yinji, liji lino linatale ha mazuwo hanji yihela kuze A-Yunda te akulikungulwila hanga atange Chisoneko, alongese, ambujole ni kulemba. Ha mashimbu ja Yesu, mbonge jize japwile jinene ndambu mu Izalele mwapwile yimwe sunangonga, alioze mu mbonge jinene-jinene chinji mwapwile masunangonga anji.—Lu 4:16; Yi 13:14, 15.
T
Tahi.
Mutu yoze wakuhasa kuhanjika yuma yize muyilingiwa kulutwe lia matangwa. Kapwile nawa asasendote waze apwile ni kulinga yuma ya tufutafuta, yipupu, akwa-kutaha kupalikila mu tutongonoshi ni yuma yikwo yize Mbimbiliya yakwamba.—Lev 19:31; Shi 18:11; Yi 16:16.
Talentu.
Mulali unene wa kweseka yuma uze A-Hepreu apwile ni kuzachisa. Talentu yapwile nawa mbongo. Talentu yapwile ni kupezala 34.2 kilu. Talentu ya Ngregu yapwile yikehe, te yakupezala 20.4 kilu.—1Sg 22:14; Mat 18:24.
Tangwa lia Kululieka Yuma.
Lino liapwile jina lia tangwa lize te liakulianga shimbu tangwa lia Sambata kanda liheta. Ha tangwa liacho A-Yunda te kakululieka yuma yize te mafupiwa ha tangwa lia Sambata. Tangwa liacho te liakuhwa ha kunjila cha tangwa lize musono twakuvuluka ngwetu Liamatano, ha kuputuka cha tangwa lia Sambata. A-Yunda kapwile ni kwalula matangwa ha kunjila cha tangwa ndo ha kunjila chikwo cha tangwa.—Mar 15:42; Lu 23:54.
Tangwa lia Upatwilo.
Tangwa hanji shimbu lize Zambi hanatese hanga asopese chimwe chizavu, vungu hanji atu eswe. Mulihasa kupwa tangwa lize makanongesa waze atela kufwa. Alioze, usopeso muuhasa kuhana uhashi kuli atu hanga akaalamwine ni kuzuka mwono wa mutolo. Yesu ni tumbaji twenyi kahanjikile ha limwe shimbu lia kulutwe lia matangwa “Tangwa lia Upatwilo” lize mulikakwata hali waze ali ni mwono ni waze hanafu.—Mat 12:36.
Tartaru.
Mu Yisoneko ya Ngregu ya Akwa-Kristu, liji lino mulihasa kulumbunuka kupalumwisa, ngwe zuwo lia ususu, muze anyashine angelo yihulia ha mashimbu a Noa. Ha mukanda wa 2 Petulu 2:4, liji tar·ta·roʹo (“kunyasa mu Tartaru”) kulialumbunukine ngwo ‘angelo waze avulumwine’ kaanyashine mu Tartaru kulita ni sango ja kutomba ja akwa-uwayilo wa mahuza (hanji ngwetu limwe zuwo lia ususu lize liatwama kushi lia mavu muze mwalaa pwi, muze mwatela tuzambi amokomoko.) Alioze, linasolola ngwo o katokesele yiteli yo mu malilu, kaapalumwishine kuli Zambi ni kwachiza ha yihela yo mu malilu ni kwasa milima mu mbunge hakutwala ku upale wa Zambi. Milima yakusolola nawa songo lio, lize kulita ni Yisoneko, songo lio mulikapwa lia mutolo hamwe ni nguvulu wo Satana Ndiapu. Kashika, liji Tartaru linalumbunuka upalumwiso unene wa angelo waze yihulia. Liji lino lialisa ni liji “jondo” lize asoneka mu mukanda wa Usolwelo 20:1-3.
Temba.
Tembele.
Limwe zuwo mu Yerusaleme lize liasalakanyine tabernakulu yize apwile ni kwenda nayo A-Izalele ngwe chilayi cha uwayilo. Tembele yitangu kayitungile kuli Solomone, mba kulutwe yayipuzula kuli A-Babilonia. Tembele yamuchiali kayitungile kuli Zorobabele muze afunyine ku undungo mu Babilonia, yize kulutwe atungulwile kuli Heronde, Munene. Mu Yisoneko, tembele kanji-kanji kakuyivuluka ngwo “zuwo” lia Yehova.—Mat 21:13; Lu 11:51; 1Sg 29:1; 2Sg 2:4; Mat 24:1.
Tengi.
Kali mukwa-kulinga ndoho, malonga, yikwachilo ni yuma yikwo ya uma. Liji lia Hepreu lize akuzachisa hali tengi linalumbunuka “mukwa-kulinga yuma.” Chiyulo chize tengi akwete ha uma, kanji-kanji kakuchizachisa hanga alumbunune chiyulo chize Yehova akwete hali mutu ni mutu ni hali mavungu eswe.—Iza 64:8; Ro 9:21.
Tufunga ja Mwanangana.
Chizavu cha maswalale ja A-Roma, waze te akukalakala ngwe tufunga ja mwanangana. Tufunga wano kapwile ni tachi jinji mu yuma ya mafwefwe, kashika o te mahasa kukwasa hanji kushiha umwe wanangana.—Fwp 1:13.
Tuku.
Chikwachilo chize akulinga ni kupu liamuwundu lia umwe kashitu ngwe, pembe hanji panga, chikwata chacho mwe apwile ni kutulikila vinyu. Vinyu yaha kapwile ni kuyisa mu tuku jaha, mumu muze te yakufutunuka te yakupwa ni dióxido de carbono yize te yakujimbisa tuku. Tuku jaha te jakujimba, alioze jikulu te jakupulika mumu lia mwiku.—Yos 9:4; Mat 9:17.
Tupitau.
Mu unguvulu wa Babilonia, tupitau kapwile akwa-kulinga milimo ya kusopa-sopa milonga, waze te anyingika shimbi, kapwile nawa ni ndambu ya wata. Ku yihela kuze kwapwile maswalale ja A-Roma, tupitau kapwile tuselo a nguvulu. Mulimo wo wapwile kululieka yuma, kufunga mbongo, kusopesa waze te akwehuka shimbi, ni kuhana upatwilo.—Yi 16:20.
U
Ufrateze.
Lwiji munene kanda mulemu yoze watwama ku Azia. Kali umwe wa ku lwiji munene mu Mesopotamia. Lwiji yono kanamutongola ha chisuho chitangu mu mukanda wa Uputukilo 2:14, ngwe lwiji wamuchiwana wa mu munda wa Endene. Ha yisuho yinji kakumuvuluka ngwo “mwe Lwiji.” (Upu 31:21) Kapwile ku sango (norte) ya njiza yize ahanyine kuli A-Izalele.—Upu 15:18; Uso 9:14; 16:12.
Uhindukilo.
Kuhinduka mu ufwe, kupwa cheka ni mwono. Liji lia Ngregu a·naʹsta·sis linalumbunuka “kuhinduka; kumana.” Mu Mbimbiliya kakutongolamo uhindukilo livwa, hamwe ni uhindukilo wa Yesu uze Yehova alingile. Eliya, Elisha, Petulu ni Paulu kahindwishile atu, alioze ni ukwaso wa ndundo ja Zambi. (Yi 24:15) Mbimbiliya yakuhanjika hakutwala ku “uhindukilo utangu” hanji ngwetu uhindukilo uze “muukalianga kulingiwa,” uhindukilo wa mandumbu a Yesu akuwayisa ni spiritu yisandu hanga akatwame mu malilu.—Fwp 3:11; Uso 20:5, 6; Yo 5:28, 29; 11:25.
Ukamino.
Mena aali a usuhwe walisa waze te akufula ku mawe. Uva kapwile ni kuufwenwina mu wina unene mba meya a uva masukumukina mu wina ukehe kupalikila mu kapila mukehe yoze te wakukatuka mu wina umwe ni kuya mu wina ukwo. Liji lino kakulizachisa ngwe chilayi hanga ahanjike hakutwala ku upatwilo wa Zambi.—Uso 19:15.
Ukuule.
Ndando akufweta hanga atusule umwe mutu mu undungo, mu lamba, ku shili hanji ku chimwe chuma. Ukuule te keshi kuufweta wika ni mbongo. (Iza 43:3) Ukuule wapwile ni kufupiwa ha yuma yinji. Chakutalilaho, yimuna eswe atangu a kuji hanji malunga ja Izalele, kaapwile ambala a Yehova. Kashika, ukuule hanji ndando ya ukuule, yapwile ni kufupiwa hanga atusule umwe mutu achine kulinga wika mulimo wa Yehova. (Kwa 3:45, 46; 18:15, 16) Nyi umwe ngombe chitenu mapwa wa kukasulula mba mashiha umwe mutu, chapwile ni kufupiwa ndando ya ukuule hanga alamwine mwenya-ngombe ku kufwa. (Kut 21:29, 30) Alioze te keshi kutayiza kufwetela ndando ya ukuule mutu yoze washiha mukwo ku zango lienyi mwene. (Kwa 35:31) Chahiana ulemu, Mbimbiliya yakushindakenya chinji ha ndando ya ukuule yize Yesu afwetele hanga atusule ku shili ni kufwa atu waze akwononoka.—Sam 49:7, 8; Mat 20:28; Efw 1:7.
Ululi.
Ungalami.
Kuteta chikonda chize chakufuka ku mujimba wa lunga. Shimbi yino kayihanyine kuli Apalahama ni munyachi wenyi. Alioze hakutwala kuli Akwa-Kristu musono, mutu ni mutu katamba kusakula nyi mapwa ngalami, nyi ka. Liji lino kakulizachisa nawa ngwe chilayi hanga alumbunune yimwe yikuma.—Upu 17:10; 1Ko 7:19; Fwp 3:3.
Unuku.
Kulita ni chize alisonekene, liji lino linatale hali malunga waze akuheula. Kanji-kanji malunga jacho kapwile ni kwasakula hanga akalakale ku mazuwo ja mianangana ngwe yikwashi hanji akwa-kufunga mwazovu ni makonkubina. Liji liacho linatale nawa hali umwe chilolo yoze akutongola hanga alinge milimo yimwe ku zuwo lia mwanangana, alioze keshi wakuheula. Liji unuku “mumu lia Wanangana” kakulizachisa hali mutu yoze wakulihumikiza hanga alihulikile mu milimo ya Zambi.—Mat 19:12; Es 2:15; Yi 8:27.
Upangala.
Upapachiso; Kupapachisa.
Liji kupapachisa mu limi lia Ngregu linalumbunuka kunjisa hanji kuchupika mutu mu meya. Yesu katowezele tumbaji twenyi hanga aapapachise. Yisoneko yakuhanjika nawa hakutwala ku upapachiso wa Yoano, upapachiso wa spiritu yisandu, upapachiso wa kahia, ni upapachiso weka ni weka.—Mat 3:11, 16; 28:19; Yo 3:23; 1Pe 3:21.
Uprofeto.
Sango ja kuhwima, muuhasa kupwa usolwelo wa Zambi hanji kuwambulula. Uprofeto muhasa kupwa malongeso akuhwima, shimbi, upatwilo wa Zambi hanji kwambujola chuma chize muchilingiwa.—Mat 13:14; 2Pe 1:20, 21.
Usendo.
Kulitesa hakachi ka atu aali hanga alinge chimwe chuma hanji kwecha kuchilinga. Kulitesa chacho te muchihasa kulingiwa hakachi ka Zambi ni atu hanji hakachi ka atu wika. Ha mashimbu amwe, mutu umuwika mwe te wakupwa ni chiteli cha kumanununa yize atesele (hanji ngwetu chilakenyo.) Ha yisuho yikwo, eswe waze alitesele kapwile ni chiteli cha kumanununa yize atesele, (usendo wa atu aali.) Kuchizako usendo uze Zambi alingile ni atu, Mbimbiliya yakuhanjika nawa hakutwala ku usendo wa atu wika, minyachi, mavungu ni chizavu cha atu. Ha usendo weswe, usendo uze wapwa ulemu chinji uli uze Zambi alingile ni Apalahama, ni Ndawichi, vungu lia Izalele (usendo wa Shimbi) ni A-Izalele a Zambi (usendo waha).—Upu 9:11; 15:18; 21:27; Kut 24:7; 2Sg 21:7; Lu 22:29; Yi 3:25; 2Ko 3:6; Hep 8:6.
Utanganyanyi.
Utanji.
Liji lia Ngregu porneía, lize akuzachisa mu Yisoneko hanga ahanjike hakutwala ku kulisumbakenya chize Zambi keshi kutayiza. Utanji muuhasa kupwa upangala, ukoi, kulisumbakenya cha atu waze kalimbachile, utumwa ni kulisumbakenya ni tushitu. Ha mukanda wa Usolwelo liji lino kanalizachisa ngwe chilayi hanga asolole yitanga ya “Babilonia Yinene,” ha kumutesa ngwe chikoi wa mu uwayilo wa mahuza, chikoi wacho kakulinga utanji ni manguvulu a hano hashi hanga apwe ni ndundo ni upite. (Uso 14:8; 17:2; 18:3; Mat 5:32; Yi 15:29; Nga 5:19)—Tala chikuma CHIKOI.
W
Wanangana wa Zambi.
Liji lino chitangu linatale ha wata wa Zambi uze anamanyinako ku unguvulu wa Mwanenyi, Yesu Kristu.—Mat 12:28; Lu 4:43; 1Ko 15:50.
Waze alipwishile A-Yunda.
Kulita ni Yisoneko, liji lino linatale hali mutu yoze wakutayiza malongeso ja A-Yunda. Hakutwala kuli malunga, chino te chakufupiwa kwapwisa ngalami.—Mat 23:15; Yi 13:43.
Y
Yakomba.
Mwana wa Izake ni Rebeka. Yoze kulutwe Zambi alukile jina ngwenyi Izalele. Iye mwe wapwile kalamba ka atu a Izalele (waze te akuvuluka nawa ngwo A-Izalele, mba kulutwe ngwo A-Yunda). Yakomba kapwile ni ana 12, minyachi yo ye yasemene minyachi 12 ya Izalele. Jina Yakomba kanungine ni kulizachisa muze te akuhanjika hakutwala ku vungu hanji atu ja Izalele.—Upu 32:28; Mat 22:32.
Yehova.
Mu Mbimbiliya ya Yisoneko Yisandu ya Chifuchi Chaha, kanazachisamo jina “Yehova” ha yisuho 237 mu Yisoneko ya Ngregu ya Akwa-Kristu. Chiyulo cha kusamo jina lia Zambi chinakatuka ha yikuma yino:
1. Yisoneko ya Hepreu yize te akuzachisa ha matangwa ja Yesu ni ja apostolo, ha yisoneko yeswe te hakusoloka Tetragrama. (sona jiwana ja Hepreu jize jinalumbunuka jina lia Zambi akuvuluka ngwo, Tetragrama יהוה)
2. Ha matangwa ja Yesu ni ja apostolo jenyi, Tetragrama yapwile ni kusoloka nawa mu mikanda ya Ngregu yize apwile ni kulumbununa kukatuka mu Yisoneko ya Hepreu.
3. Yisoneko ya Ngregu ya Akwa-Kristu, yakusolola ngwo Yesu kazachishile jina lia Zambi ha yisuho yinji, ni kulinyingikisa kuli akwo.—Yoano 17:6, 11, 12, 26.
4. Amu Yisoneko ya Ngregu ya Akwa-Kristu ayichingile ni Yisoneko ya Hepreu ha kukaula usongwelo wa Zambi, kashika kutoka cha jina Yehova mu yisoneko yacho te kuchichi kulita.
5. Yisoneko ya Ngregu ya Akwa-Kristu, yakusolola jina lia Zambi.—Usolwelo 19:1, 3, 4, 6.
6. Mikanda yikulu ya A-Yunda yinasolola ngwo A-Yunda Akwa-Kristu te kakuzachisa jina lia Zambi mu mikanda yo.
7. Amwe akwa-kuhengwola Mbimbiliya, kakwamba ngwo jina lia Zambi kota liapwile ni kusoloka mu Yisoneko ya Hepreu yize akutongola mu Yisoneko ya Ngregu ya Akwa-Kristu.
8. Mbimbiliya yili yakulumbununa mu malimi kuhiana kulakaji, mu Mbimbiliya jacho mu Yisoneko ya Ngregu ya Akwa-Kristu muli jina lia Zambi.
Yino yeswe yinasolola ngwo chili chilemu chinji kufunyisa jina lia Zambi, Yehova, mu Yisoneko ya Ngregu ya Akwa-Kristu. Yino ye alingile akwa-kulumbununa Mbimbiliya ya Chifuchi Chaha. Atu wano kakuvumbika chinji jina lia Zambi, chikwo nawa, kakumuvwila woma, kashika keshi kuchiza chuma nichimwe chize chapwile mu yisoneko yikulu.—Usolwelo 22:18, 19.
Yihanda yeswe ya kumi.
Chihanda cha kumi hanji ngwetu 10%, chize akuhana hanji kufweta ngwe lijimu, chipi-chipi ha yikuma yinatale ha uwayilo. (Mal 3:10; Shi 26:12; Mat 23:23; Hep 7:5) Kulita ni Shimbi ya Mose, chihanda cha kumi cha yilima-lima ni chihanda cha kumi cha kwoka cha ngombe ni mapanga, kapwile ni kuchihana kuli A-Levi hanga alikwase nacho. A-Levi no kapwile ni kwanda chihanda cha kumi ku yuma yize apwile ni kutambula hanga ayihane kuli asasendote a ku munyachi wa Arone, hanga no alikwase nayo. Kwapwile nawa yawana yikwo yize apwile ni kuwezela. Shimbi ya kuhana chihanda cha kumi kuyishi kukwata hali Akwa-Kristu musono.
Yiize.
Chipanga chawashi chize te chakujingilika tabernakulu. Kulutwe, kwapwile nawa chipanga chize chapwile ni kujingilika tembele. Chilumbilo cha mulambu wa kulumba chapwile mu yiize ya tabernakulu ni mu yiize ya muchima lia tembele. Mbimbiliya yakuhanjika nawa ha yiize ya mazuwo ni mapalasiu.—Kut 8:13; 27:9; 1Mi 7:12; Mat 26:3; Mar 15:16; Uso 11:2.
Yikomokeso; Yitanga ya Ndundo.
Yitanga hanji yikomokeso ya ndundo yize yakuhiana ndundo jeswe jize atu ananyingika, yuma yacho kakuyilinga kuli yitangiwa yize kuyishi kumoneka. Liji “chilayi,” ha mashimbu amwe kakulizachisa mu Mbimbiliya muze akuhanjika hakutwala ku “chikomokeso.”—Mat 11:20; Yi 4:22; Hep 2:4.
Yipanda-panda.
Chili kufuliela chize atu akwete ngwo, nyi mutu mafwa, spiritu yenyi yakununga ni mwono, chikwo nawa ngwo mahasa kuhanjika ni atu waze ali ni mwono, kupalikila muli (umwe chimbanda) yoze wakutayiza kumupiangula ku yuma yacho. Liji kupanda linakatuka mu liji lia Ngregu phar·ma·kiʹa, lize linalumbunuka “drogaria.” Liji lino liaputukile kutala ha yipanda-panda, mumu ku mashimbu a kunyima atu kapwile ni kuzachisa droga muze apwile ni kwita ndundo ja andemoniu hanga alinge yuma ya yipanda-panda.—Nga 5:20; Uso 21:8.
Yitanga ya sonyi.
Liji lino linakatuka mu limi lia Ngregu a·selʹgei·a, linatale ha ndako jize jakulimika ni shimbi ja Zambi. Yitanga yacho yakusoloka kupalikila mu ndako jipi hanji ja sonyi; ndako jize kujishi kusolola vumbi, chikwo nawa jakulelesa akwa-kuyula, ni shimbi. Liji lino kuliatalile ha yuma yikehe-yikehe yipi yize twakulinga ku mwono.—Nga 5:19; 2Pe 2:7.
Yitenda; Mbandu.
Chili kweseka chize muchihasa kupwa ni usuhwe chize ha munguza ndo ku songo lia munwe wa mukachi. Kanji-kanji A-Izalele kapwile ni kuzachisa mbandu ya 44.5 cm. Alioze, kapwile nawa ni kuzachisa mbandu yinene, yize yapwile ni utohwe kuhiana mbanda-kwoko, kweseka chacho chapwile cha 51.8 cm.—Upu 6:15; Mat 6:27; Lu 12:25; Uso 21:17.
Yunda.
Mwana wamuchiwana wa Yakomba ni mukwo-pwo Liya. Muze te kwasala hakehe hanga afwe, Yakomba kaprofetezele ngwenyi, ku munyachi wa Yunda te mukwiza umwe mukwa-kuyula mulemu chinji yoze te mayula ku miaka yeswe. Yesu muze apwile hano hashi, kapwile wa ku munyachi wa Yunda. Jina lino linatale nawa ku munyachi uze kulutwe avulukile ngwo, Wanangana wa A-Yunda.—Upu 29:35; 49:10; Hep 7:14.
Z
Zaione; Mulundu wa Zaione.
Jina lia mbonge yakukolesa ya Yepushe, yize yatwama ku Yerusaleme. Muze Ndawichi alukukilile mbonge yacho ni kuyitambula, yatungamo zuwo lia wanangana. Chocho, Zaione yaputuka kuyivuluka ngwo, “Chihunda cha Ndawichi.” (2Sa 5:7, 9) Muze Ndawichi atwalileko mushete, Zaione yiupwa mulundu usandu wa Yehova. Ha kupalika cha mashimbu, jina Zaione yiliputuka kukwata ku tembele ya ku Mulundu wa Moria. Ha mashimbu amwe jina lino te liakutala nawa ha mbonge yeswe ya Yerusaleme. Mu Yisoneko ya Ngregu ya Akwa-Kristu, liji lino kakulizachisa ngwe chilayi.—Sam 2:6; 1Pe 2:6; Uso 14:1.
Zeuse.
Zambi chitunda wa A-Ngresia politeístas. Mu Lisetra, kamuvulukile jina lino ngwo, Zeuse. Yisoneko ya ku shakulu yize awanyine hakamwihi ni Lisetra, yakutongola “asasendote ja Zeuse” ni “Zeuse, zambi ya tangwa.” Ulungu uze Paulu anyinyine ni kuya ku Melita, wapwile ni chilayi ngwo, “Ana ja Zeuse,” hanji ngwe, ana mapasa, Castor ni Pólux.—Yi 14:12; 28:11.