Jeremiya

25 Iri ndiro shoko rakauya kuna Jeremiya pamusoro pevanhu vose vaJudha mugore rechina raJehoyakimu+ mwanakomana waJosiya, mambo waJudha, kureva gore rokutanga raNebhukadrezari mambo weBhabhironi; 2 rakataurwa nomuprofita Jeremiya pamusoro pevanhu vose vaJudha uye pamusoro pevagari vose vomuJerusarema, achiti:

3 “Kubvira mugore rechigumi nematatu raJosiya+ mwanakomana waAmone, mambo waJudha, kusvikira nhasi, makore makumi maviri nematatu aya, shoko raJehovha rakauya kwandiri, uye ndakaramba ndichitaura nemi, ndichifumomuka ndichitaura, asi hamuna kuteerera.+ 4 Jehovha akakutumirai vashumiri vake vose vaprofita, achifumomuka achivatuma, asi hamuna kuteerera,+ uyewo hamuna kurereka nzeve yenyu kuti muteerere,+ 5 vachiti, ‘Tapota, mumwe nomumwe ngaatendeuke abve panzira yake yakaipa uye pakuipa kwezvamakaita,+ rambai muchigara panyika yamakapiwa imi nemadzitateguru enyu naJehovha kubvira kare kare, kusvikira kunguva refu ichauya.+ 6 Musatevera vamwe vanamwari kuti muvashumire nokuvakotamira, kuti murege kunditsamwisa nebasa remaoko enyu, uye kuti ndirege kukuunzirai dambudziko.’+

7 “‘Asi hamuna kunditeerera,’ ndizvo zvinotaura Jehovha, ‘kuti mundigumbure nebasa remaoko enyu, muzviunzire dambudziko.’+

8 “Naizvozvo zvanzi naJehovha wemauto, ‘“Nokuti hamuna kuteerera mashoko angu, 9 tarirai ndichatumira shoko ndotora mhuri dzose dzokuchamhembe,”+ ndizvo zvinotaura Jehovha, “uye ndichatumira shoko kuna Nebhukadrezari mambo weBhabhironi, mushumiri wangu,+ uye ndichavaunza kuti varwise nyika+ ino nevagari vayo nemarudzi aya ose akapoteredza;+ uye ndichavatsaura kuti vaparadzwe uye ndichaita kuti vave chinhu chinokatyamadza nechinhu chokuridzira muridzo+ uye matongo nokusingagumi.+ 10 Ndichaparadza inzwi rokupembera nomufaro nenzwi rokufara mavari,+ inzwi romuroori nenzwi romwenga,+ kurira kweguyo+ nechiedza cherambi.+ 11 Nyika ino yose ichava dongo, chinhu chinokatyamadza, uye marudzi aya achashandira mambo weBhabhironi kwemakore makumi manomwe.”’+

12 “‘Zvino kana makore makumi manomwe apera,+ ndichaita kuti mambo weBhabhironi norudzi irworwo vazvidavirire kukanganisa kwavo,’+ ndizvo zvinotaura Jehovha, ‘kunyange nyika yevaKadheya,+ ndichaiita matongo nokusingagumi.+ 13 Ndichaunza mashoko angu ose andakataura pairi, uyewo zvose zvakanyorwa mubhuku rino zvakaprofitwa naJeremiya kumarudzi ose.+ 14 Nokuti kunyange iwo, marudzi mazhinji nemadzimambo makuru,+ akavashandisa sevashandi;+ uye ini ndichavatsiva maererano nebasa ravo uye maererano nebasa remaoko avo.’”+

15 Nokuti Jehovha Mwari waIsraeri ati kwandiri: “Tora kapu iyi yewaini yehasha muruoko rwangu, unwise marudzi ose andiri kukutuma kwaari.+ 16 Ngaanwe adzedzerekere mberi neshure uye aite sevanhu vanopenga nokuda kwebakatwa randiri kutuma pakati pawo.”+

17 Ndakatora kapu yacho muruoko rwaJehovha, ndikanwisa marudzi ose andakanga ndatumwa kwaari naJehovha:+ 18 anoti, Jerusarema nemaguta aJudha nemadzimambo aro, machinda aro, kuti ndizviite matongo, chinhu chinokatyamadza,+ chinhu chokuridzira muridzo uye chinotukwa, sezvazvakaita nhasi;+ 19 Farao mambo weIjipiti nevashandi vake nemachinda ake nevanhu vake vose;+ 20 neboka rose revamwe vanhu vakavhengana, nemadzimambo ose enyika yeUzi,+ nemadzimambo ose enyika yevaFiristiya+ neAshkeroni+ neGaza+ neEkroni+ nevachasara vokuAshdhodhi;+ 21 Edhomu+ neMoabhi+ nevanakomana vaAmoni;+ 22 nemadzimambo ose eTire+ nemadzimambo ose eSidhoni+ nemadzimambo echitsuwa chiri munzvimbo yegungwa; 23 neDhedhani+ neTema+ neBhuzi navose vaya vane bvudzi rakadimburirwa pazvavovo;+ 24 nemadzimambo ose evaArabhu+ nemadzimambo ose eboka revamwe vanhu vakavhengana ari kugara murenje; 25 nemadzimambo ose eZimri nemadzimambo ose eEramu+ nemadzimambo ose evaMedhiya;+ 26 nemadzimambo ose okuchamhembe ari pedyo neari kure, mumwe pashure pomumwe, nohumwe umambo hwose hwepasi huri panyika; uye mambo weSheshaki+ achanwa kana ivo vapedza.

27 “Uti kwavari, ‘Zvanzi naJehovha wemauto, Mwari waIsraeri: “Inwai, mudhakwe, murutse uye muwe zvokuti hamugoni kumuka+ nokuda kwebakatwa randichatuma pakati penyu.”’+ 28 Kana vakaramba kutora kapu yacho muruoko rwako kuti vanwe, utiwo kwavari, ‘Zvanzi naJehovha wemauto: “Muchatonwa chete.+ 29 Nokuti, tarirai! ndiri kutanga kuunza dambudziko paguta rinoshevedzwa nezita rangu,+ uye imi mungarega kurangwa here?”’+

“‘Hamuzoregi kurangwa, nokuti kune bakatwa randiri kushevedzera vagari vose vepanyika,’ ndizvo zvinotaura Jehovha wemauto.

30 “Asi iwe, uprofite kwavari mashoko ose aya, uti kwavari, ‘Jehovha achadzvova ari kumusoro,+ achaita kuti inzwi rake rinzwike ari kunzvimbo yake tsvene yaanogara.+ Chokwadi achadzvovera nzvimbo yake yaanogara. Achashevedzera kuvagari vose vepanyika sezvinoita vaya vari kutsika-tsika chisviniro chewaini.’+

31 “‘Ruzha ruchasvika kurutivi rwokumugumo wenyika chaiko, nokuti Jehovha ane gakava nemarudzi.+ Iye achatonga vanhu vose.+ Vakaipa achavaisa kubakatwa,’+ ndizvo zvinotaura Jehovha.

32 “Zvanzi naJehovha wemauto, ‘Tarirai! Dambudziko riri kufamba richibva pane rumwe rudzi richienda kune rumwe rudzi,+ uye mhepo huru ine mvura ichamutswa kumativi ari kure kwazvo enyika.+ 33 Vaya vachaurayiwa naJehovha vachavapo pazuva iroro kubvira kumugumo wenyika kusvikira kune mumwe mugumo wenyika.+ Havazochemwi, uyewo havazounganidzwi kana kuvigwa.+ Vachava somupfudze panyika.’+

34 “Ungudzai, imi vafudzi, mushevedzere!+ Umburukai,+ imi vakuru veboka rezvipfuwo,+ nokuti mazuva enyu okuurayiwa neokuparadzirwa akwana,+ muchaputsika somudziyo unodiwa!+ 35 Nzvimbo yokutizira yevafudzi, nenzira yokupukunyuka nayo yevakuru veboka rezvipfuwo hazvisisipo.+ 36 Teererai! Kushevedzera kwevafudzi, nokuungudza kwevakuru veboka rezvipfuwo, nokuti Jehovha ari kupamba mafuro avo. 37 Nzvimbo dzokugara dzine rugare dzaitwa kuti dzisava noupenyu nokuda kwokutsamwa kukuru kwaJehovha.+ 38 Akabva munzvimbo yake yaanovanda somwana weshumba ava nezenze,+ nokuti nyika yavo yava chinhu chinokatyamadza nokuda kwebakatwa rine utsinye uye nokuda kwokutsamwa kwake kukuru.”+