ගීතාවලිය

119 යෙහෝවා දෙවිගේ නීතිය පිළිපදින,+

නිර්දෝෂ අය සන්තෝෂවත්ය.+

 2 ඔහුගේ සිහිගැන්වීම්වලට කීකරු වන අය සන්තෝෂවත්ය.+

ඔවුහු මුළු හදවතින්ම දෙවිගේ මඟ පෙන්වීම් පතන්නෝය.+

 3 කිසි අධර්මිෂ්ඨ ක්‍රියාවකට ඔවුහු හවුල් නොවුණෝය.+

දෙවිගේ මඟෙහි ඔවුහු ගමන් කළෝය.+

 4 ඔබේ අණපනත්වලට කීකරු වන ලෙස+

ඔබ අපට අණ කළෙහිය.+

 5 ඔබේ නියෝග පිළිපැදීමට+ මම අදිටන් කරගතිමි.+

මාගේ ඒ අදිටන කිසි දිනක නොවෙනස් වේ නම් මොන තරම් යහපත්ද!

 6 ඔබේ සියලු ආඥා සැලකිල්ලට ගෙන මා ක්‍රියා කළොත්+

කිසිවිටක මම ලැජ්ජාවට පත් නොවනු ඇත.+

 7 ඔබේ ධර්මිෂ්ඨ තීන්දු ගැන මම ඉගෙනගන්නෙමි.+

එවිට අවංක සිතින් ඔබට ප්‍රශංසා කිරීමට මට හැකි වන්නේය.+

 8 දෙවියනි, මාගෙන් සම්පූර්ණයෙන්ම ඈත් නොවන්න.+

ඔබේ නියෝග මම දිගටම පිළිපදින්නෙමි.+

 9 තරුණයෙකුට පිරිසිදු ජීවිතයක් ගත කළ හැක්කේ කෙසේද?+

තමන්ගේ සෑම ක්‍රියාවක්ම ඔබේ ආඥාවන්ට එකඟද කියා සෝදිසි කර බැලීමෙනි.+

 10 මාගේ මුළු හදවතින්ම මම ඔබේ මඟ පෙන්වීම් පැතුවෙමි.+

ඔබේ ආඥාවලට පිටු පා ක්‍රියා කිරීමට මට ඉඩ නොදෙන්න.+

 11 මා අතින් පාපයක් සිදු නොවන පිණිස+

ඔබේ වදන් මාගේ සිතේ නිදන් කරගත්තෙමි.+

 12 යෙහෝවා දෙවියනි, ඔබට ප්‍රශංසා වේවා!

ඔබේ නියෝග මට උගන්වන්න.+

 13 ඔබ දුන් සියලු තීන්දු+

මම ප්‍රකාශ කළෙමි.+

 14 සෑම වටිනා දෙයකින්ම ලබන සතුටට වඩා සතුටක්+

ඔබේ සිහිගැන්වීම්වලට කීකරු වීමෙන් මම අද්දකින්නෙමි.+

 15 ඔබේ අණපනත් නිරතුරුවම සිහි කරන්නෙමි.+

ඔබේ මඟ පෙන්වීම්වලට අනුව ක්‍රියා කරන්නෙමි.+

 16 ඔබේ පනත්වලට ඇලුම් වන්නෙමි.+

ඔබේ වදන් කිසිදා අමතක නොකරන්නෙමි.+

 17 මාගේ ජීවිතය රැකෙන පිණිස මා වෙනුවෙන් යහපත කරන්න.+

එවිට ඔබේ සේවකයා වන මට ඔබේ වදන්වලට කීකරු වීමට හැකි වන්නේය.+

 18 ඔබේ නීතියේ ඇතුළත් වටිනා කාරණා දෙස බැලීමට හැකි වන පිණිස+

මාගේ දෙනෙත් විවර කරන්න.+

 19 මා දේශයේ තාවකාලිකව පදිංචි වී සිටින විදේශිකයෙකු මෙනි.+

ඔබේ ආඥා මාගෙන් සඟවා නොගන්න.+

20 ඔබේ තීන්දු දැනගැනීමට+

මම නොඉවසිල්ලෙන් බලා සිටින්නෙමි.+

 21 ඔබේ ආඥාවලට කීකරු නොවන+

ශාප ලත්, උඩඟු තැනැත්තන්ට ඔබ තරවටු කළෙහිය.+

 22 මා ඔබේ සිහිගැන්වීම්වලට අවනත වූ නිසා+

මා අද්දකින නින්දා අපහාස මාගෙන් ඉවත් කරන්න.+

 23 මට විරුද්ධව කුමන්ත්‍රණය කිරීමට අධිපතීහුද රැස් වූහ.+

නමුත් ඔබේ සේවකයා වන මා කල්පනා කළේ ඔබේ නියෝග ගැන පමණය.+

 24 ඔබේ සිහිගැන්වීම්වලට මම ඇලුම් කරන්නෙමි.+

ඒවා මාගේ උපදේශකයන් මෙන් මට මඟ පෙන්වන්නේය.+

 25 මාගේ හුස්ම නවතින තරමටම මම මහත් වේදනාවකින් පසු වූවෙමි.+

ඔබ පොරොන්දු වූ ලෙස මාගේ දිවි රැක දෙන්න.+

 26 මාව නිවැරදි මාර්ගයේ ගෙන යෑමට හැකි වන පිණිස මම මාගේ සෑම ක්‍රියාවක් ගැනම ඔබ ඉදිරියේ ප්‍රකාශ කළෙමි.+

දෙවියනි, ඔබේ නියෝග ගැන මට උගන්වන්න.+

 27 ඔබේ අණපනත්වලින් දෙන මඟ පෙන්වීම් තේරුම්ගැනීමට මට උපකාර කරන්න.+

එවිට ඔබ කළ පුදුමසහගත ක්‍රියා ගැන ගැඹුරින් කල්පනා කිරීමට මට හැකි වන්නේය.+

 28 නින්ද නොයන තරමටම මම දැඩි වේදනාවකින් සිටිමි.+

ඔබ පැවසූ ලෙස මාව ශක්තිමත් කරන්න.+

 29 වැරදි මාර්ගයේ යෑමට මට ඉඩ නොදෙන්න.+

කරුණාව පෙන්වා ඔබේ නීතිය මට උගන්වන්න.+

 30 මම විශ්වාසවන්තව ක්‍රියා කිරීමට අදිටන් කරගත්තෙමි.+

ඔබ දුන් තීන්දු සාධාරණ බව මම දුටුවෙමි.+

 31 ඔබ දුන් සිහිගැන්වීම්වලට එකඟව මම ක්‍රියා කළෙමි.+

යෙහෝවා දෙවියනි, මාව ලැජ්ජාවට පත් වීමට ඉඩ නොදෙන්න.+

 32 මම ඔබේ ආඥා ඉතා උනන්දුවෙන් පිළිපදින්නෙමි.+

මන්ද ඒවා තේරුම්ගැනීමට හැකි හදවතක් ඔබ මට ලබා දුන්නෙහිය.+

 33 යෙහෝවා දෙවියනි, ඔබේ නියෝග මට උගන්වන්න.+

එවිට දිවි ඇති තුරා ඒවා පිළිපැදීමට මට හැකි වන්නේය.+

 34 ඔබේ නීතිය පිළිපදින පිණිස මට එය තේරුම්ගැනීමට උපකාර කරන්න.+

එවිට මාගේ මුළු හදවතින්ම මම ඒවාට කීකරු වෙමි.+

 35 ඔබේ ආඥාවලට අනුව ජීවිතය ගත කිරීමට මට උපකාර කරන්න.+

මන්ද ඔබේ ආඥා පිළිපැදීමෙන් මම මහත් සතුටක් ලබන්නෙමි.+

 36 මාගේ සිත ලාභ ලබාගැනීමේ අරමුණ වෙතට යොමු නොකර+

ඔබේ සිහිගැන්වීම් වෙතට යොමු කරන්න මට උදව් කරන්න.+

 37 කිසි වැදගැම්මකට නැති දේවල් වෙතින් මාගේ දෙනෙත් හරවාගැනීමට මට උදව් කරන්න.+

මාගේ දිවි රැකෙන පිණිස ඔබේ මාවතේ මාව ගෙන යන්න.+

 38 ඔබේ සේවකයා තුළ ඔබ කෙරෙහි ගරුබියක් ඇති වන පිණිස+

ඔබ දුන් පොරොන්දුව ඉටු කරන්න.+

 39 මා විඳින නින්දා අපහාසයන් මා වෙතින් පහ කර දමන්න. ඒවා නිසා මම මහත් වේදනාවෙන් සිටිමි.+

ඔබේ තීන්දු සාධාරණය.+

 40 ඔබේ අණපනත්වලට මම බොහෝ සෙයින් ආශා වෙමි.+

ඔබ ධර්මිෂ්ඨ කෙනෙක් නිසා මාගේ ජීවිතය රැක දෙන්න.+

 41 යෙහෝවා දෙවියනි, ඔබේ අතිමහත් ප්‍රේමය* මට පෙන්වන්න.+

ඔබ පොරොන්දු වූ පරිදි මාව ගලවාගන්න.+

 42 එවිට මට නින්දා කරන්නාට පිළිතුරු දීමට මට හැකි වනු ඇත.+

ඔබේ වදන් කෙරෙහි මම විශ්වාසය තබා සිටිමි.+

 43 සත්‍ය වදන් පැවසීමෙන් වැළකී සිටීමට මට ඉඩ නොදෙන්න.+

ඔබේ තීන්දුව ලැබෙන තෙක් මම බලා සිටින්නෙමි.+

 44 ඔබේ නීතිය මම සැමදා පිළිපදින්නෙමි.+

සදාකාලයෙන් සදාකාලයටම මම ඊට එකඟව ක්‍රියා කරන්නෙමි.+

 45 ඔබේ අණපනත්වලට කීකරු වීමට මම උත්සාහ කරන නිසා+

මම දැන් සුරක්ෂිතව, නිදහසේ දිවි ගෙවන්නෙමි.+

 46 ඔබ දුන් සිහිගැන්වීම් ගැන රජවරුන් ඉදිරියේ පවා මම කතා කරන්නෙමි.+

එසේ කිරීමට මම කිසිවිටක ලැජ්ජා නොවෙමි.+

 47 මම ඔබේ ආඥාවලට ඇලුම් කරමි.+

ඒවාට බොහෝ සෙයින් ප්‍රිය වෙමි.+

 48 ඔබේ ආඥා කෙරෙහි මට තිබෙන ගෞරවය කොතරම්ද කියා මාගේ දෑත් ඔසවා මම ඔබට පවසන්නෙමි. මම ඒවාට සැබවින්ම ඇලුම් කරමි.+

ඔබේ නියෝග ගැන මම ගැඹුරින් කල්පනා කරන්නෙමි.+

 49 ඔබේ සේවකයාට ඔබ දුන් පොරොන්දුව අමතක නොකරන්න.+

මන්ද එය ඉටු වන තෙක් මම බලා සිටින්නෙමි.+

 50 දුකේදී මාගේ එකම සැනසීම එයයි.+

මන්ද ඔබේ වදන් මාගේ ජීවිතය ආරක්ෂා කර දුන්නේය.+

 51 අහංකාර අය මට සමච්චල් කරමින් මාව හෙළාදුටුවත්+

මම ඔබේ නීතියෙන් කිසිවිටක ඈත් නොවුණෙමි.+

 52 යෙහෝවා දෙවියනි, ඈත අතීතයේ සිට පැවතෙන ඔබේ තීන්දු මම සිහි කරන්නෙමි.+

එයින් මට මහත් සහනයක් ලැබෙන්නේය.+

53 දුෂ්ටයන් ඔබේ නීතිය කඩ කරන විට+

මා තුළ අධික කෝපයක් ඇති වන්නේය.+

 54 නුහුරු දේශයක මා ජීවත් වන විට,+

ඔබේ නියෝග මට මිහිරි සංගීතයක් මෙන් විය.+

 55 යෙහෝවා දෙවියනි, රාත්‍රි කාලයේදී පවා මම ඔබේ නාමය ගැන සිහි කළෙමි.+

එවිට ඔබේ නීතිය පිළිපැදීමට මට හැකි වන්නේය.+

 56 මා ඔබේ අණපනත්වලට කීකරු වූ නිසා

ඒ සියල්ල මම අද්දැක්කෙමි.+

 57 යෙහෝවා දෙවිට මා කරන සේවය මාගේ උරුමයයි.+

දෙවියනි, ඔබේ වදන් පිළිපැදීමට මම පොරොන්දු වුණෙමි.+

 58 ඔබේ අනුමැතිය දිනාගැනීමට මම උත්සාහ කළෙමි. මම මුළු හදවතින්ම එසේ කළෙමි.+

ඔබ පොරොන්දු වූ ලෙස මට කරුණාව පෙන්වන්න.+

 59 ඔබේ සිහිගැන්වීම්වලට කීකරු වීමට නැවතත් මට හැකි වන පිණිස+

මාගේ ජීවිත රටාව ගැන මම බැරෑරුම්ව කල්පනා කළෙමි.+

 60 ඔබේ ආඥා පිළිපැදීමට+ මම

කල් දැමුවේ නැත.+

 61 දුෂ්ටයන්ගේ රැහැන් මා වෙළාගත්තේය.+

නමුත් මම ඔබේ නීතිය අමතක නොකළෙමි.+

 62 ඔබ දුන් ධර්මිෂ්ඨ තීන්දුවලට+ ඔබට ස්තුති කිරීම සඳහා

මැදියම් රැයේ පවා මම අවදි වුණෙමි.+

 63 ඔබ කෙරෙහි ගරුබියක් ඇති අයද+

ඔබේ අණපනත් පිළිපදින අයද+ මාගේ මිතුරෝය.

 64 යෙහෝවා දෙවියනි, ඔබේ අතිමහත් ප්‍රේමයෙන්* පොළොව පිරී ඇත.+

දෙවියනි, ඔබේ නියෝග මට උගන්වන්න.+

 65 යෙහෝවා දෙවියනි, ඔබ පැවසූ ලෙස+

ඔබේ සේවකයාට ඔබ හොඳින් සැලකුවෙහිය.+

 66 යහපත්කම් කිරීමට මට උගන්වන්න.+ සිහිබුද්ධිය+ හා දැනුම මට ලබා දෙන්න.+

මන්ද ඔබේ ආඥා කෙරෙහි මම විශ්වාසය තබා ඇත.+

 67 පීඩා අද්දැකීමට පෙර මම නොදැනුවත්කමින් පව් කළෙමි.+

නමුත් මම දැන් ඔබේ වදන්වලට කීකරුව සිටිමි.+

 68 ඔබ යහපත්ය. ඔබ සැමවිටම යහපත්කම් කරන්නෙහිය.+

දෙවියනි, ඔබේ නියෝග මට උගන්වන්න.+

 69 අහංකාර අය මා ගැන බොරු පතුරුවා ඇත.+

නමුත් මම මුළු හදවතින්ම ඔබේ අණපනත්වලට කීකරු වන්නෙමි.+

 70 මිදුණු තෙල් මෙන් ඔවුන්ගේ සිත්වලට කිසිවක් නොදැනෙයි.+

නමුත් මම නම් ඔබේ නීතියට ප්‍රිය කරමි.+

 71 පීඩා අද්දැකීමට සිදු වීම ගැන මම සතුටු වෙමි.+

මන්ද එමගින් ඔබේ නියෝග හොඳින් තේරුම්ගැනීමට මට හැකි විය.+

 72 ඔබේ මුඛයෙන් නික්මුණු නීතිය+ මාගේම ප්‍රයෝජනය සඳහාය.+

රන් හා රිදී ෂෙකෙල් දහසකටත් වඩා මට එය වටින්නේය.+

 73 ඔබ ඔබේම දෑතින් මාව සාදා මාව ශක්තිමත් කළෙහිය.+

ඔබේ ආඥා ඉගෙනගැනීමට හැකි වන පිණිස මට තේරුම්ගැනීමේ හැකියාව ලබා දෙන්න.+

 74 මම ඔබේ වදන් ඉටු වන තෙක් බලාපොරොත්තුවෙන් සිටිමි.+

ඔබ කෙරෙහි ගරුබියක් දක්වන අය එය දැක ප්‍රීති වෙති.+

 75 යෙහෝවා දෙවියනි, ඔබ දෙන තීන්දු ධර්මිෂ්ඨ බව මම හොඳින් දනිමි.+

ඔබ මට දුන් තරවටුවෙන් ඔබේ විශ්වාසවන්තකම මට තව තවත් තහවුරු විය.+

 76 අනේ, ඔබේ ප්‍රේමයෙන්* මාව සනසන්න.+

ඔබේ සේවකයාට ඔබ පොරොන්දු වූ ලෙස එසේ කරන්න.+

 77 මාගේ ජීවිතය රැකෙන පිණිස ඔබේ දයාව මට පෙන්වන්න.+

මන්ද ඔබේ නීතියට මම ඇලුම් කරමි.+

 78 අහංකාර අයව ලැජ්ජාවට පත් කරන්න. මන්ද කිසි හේතුවක් නැතුව ඔවුහු මාව නොමඟ යැව්වෝය.+

නමුත් මම ඔබේ අණපනත් ගැන නිරතුරුවම කල්පනා කළෙමි.+

 79 ඔබේ සිහිගැන්වීම් ගැන දන්නා,+

ඔබ කෙරෙහි ගරුබියක් ඇති අය මා වෙතට පැමිණෙත්වා!+

 80 ඔබේ නියෝග කඩ නොකර මාගේ මුළු හදවතින්ම ඒවා පිළිපැදීමට මට හැකි වේවා!+

එවිට මම කිසිවිටක ලැජ්ජාවට පත් නොවනු ඇත.+

 81 ගැලවීම සලසා දෙන තෙක් ඔබ දෙස බලා සිටීමෙන් මම වෙහෙසට පත්ව සිටිමි.+

ඔබේ වදන් ඉටු වන තෙක් මම බලාපොරොත්තුවෙන් සිටිමි.+

 82 ඔබේ වදන් ඉටු වන තෙක් බලා සිටීමෙන් මාගේ දෙනෙත් විඩාබර වී ඇත.+

මම ඔබෙන් මෙසේ අසන්නෙමි. “ඔබ මාව සනසන්නේ කවදාද?”+

 83 මම, දුම් වැදී ඇකුළුණු සම් භාජනයක්+ මෙනි.

නමුත් ඔබේ නියෝග මට අමතක වී නැත.+

 84 ඔබේ සේවකයා තව කොපමණ කාලයක් බලා සිටින්නද?+

මට පීඩා කරන අයට ඔබ දඬුවම් කරන්නේ කවදාද?+

 85 ඔබේ නීතියට අනුව ක්‍රියා නොකරන උඩඟු අය,+

මාව හසු කරගැනීමට උගුල් අටවා ඇත.+

 86 ඔවුහු කිසි හේතුවක් නැතුව මට පීඩා කළෝය. අනේ දෙවියනි, මට උපකාර කරන්න.+

ඔබේ සියලු ආඥා විශ්වාසවන්තය.+

 87 තව කෙටි කලක් ගත වූවා නම් මේ වන විටත් ඔවුන් මාව මිහිපිටින් තුරන් කර හමාරය.+

නමුත් මම ඔබේ අණපනත්වලින් ඈත් නොවුණෙමි.+

 88 ඔබ ඉතා ප්‍රේමණීය* කෙනෙක් නිසා මාගේ දිවි රැක දෙන්න.+

එවිට ඔබේ මුවින් නික්මුණු සිහිගැන්වීම්වලට+ අවනත වීමට මට හැකි වනු ඇත.

 89 යෙහෝවා දෙවියනි, ඔබේ වචනය අහස මෙන් ස්ථිරය.+

එය සදහටම පවතින්නේය.+

 90 ඔබේ විශ්වාසවන්තකම පරම්පරාවෙන් පරම්පරාවට පවතින්නේය.+

ඔබ පොළොව කිසිදා නොසෙල්වන ලෙස ස්ථිරව පිහිටෙව්වෙහිය.+

 91 ඔබ පැනවූ නීතිවලට අනුව ඒවා අද දක්වාම පවතින්නේය.+

මන්ද ඒ සියල්ල ඔබ යටතේ සිටින සේවකයෝය.+

 92 මා ඔබේ නීතියට ඇලුම් නොකළේ නම්,+

මා අද්දුටු විපත්ති නිසා මම විනාශ වී යනු ඇත.+

 93 කිසිදා මම ඔබේ අණපනත් අමතක නොකරමි.+

මන්ද මාගේ දිවි රැකුණේ ඒවා නිසාය.+

 94 මා අයිති ඔබටය. අනේ, මාව බේරාගන්න.+

මන්ද ඔබේ අණපනත් පිළිපැදීමට මම මහත් වෙහෙසක් දැරුවෙමි.+

 95 මාව විනාශ කර දැමීමට දුෂ්ටයෝ මාන බලමින් සිටියෝය.+

නමුත් මම ඔබේ සිහිගැන්වීම් වෙතට මාගේ මනස යොමු කළෙමි.+

 96 අංග සම්පූර්ණ සෑම දෙයකටම සීමාවක් ඇත.+

නමුත් ඔබේ ආඥාවලට නම් සීමාවක් නැත.

 97 ඔබේ නීතියට මම බොහෝ සෙයින් ඇලුම් කරමි.+

දවස මුළුල්ලේ ඒ ගැන මම කල්පනා කරමි.+

 98 ඔබේ ආඥා නිසා මාගේ සතුරන්ට වඩා මම ප්‍රඥාවන්ත ලෙස ක්‍රියා කරමි.+

මන්ද ඒවා සැමදා මට මඟ පෙන්වන්නේය.+

 99 මාගේ ගුරුවරුන් සියලුදෙනාට වඩා හොඳ වටහාගැනීමේ හැකියාවක් මා සතුය.+

මන්ද ඔබ දුන් සිහිගැන්වීම් ගැන නිතරම මම ගැඹුරින් කල්පනා කරමි.+

100 වයසින් මුහුකුරා ගිය අයට වඩා නිසි අවබෝධයකින් මම කටයුතු කරමි.+

මන්ද මම ඔබේ අණපනත්වලට කීකරු වෙමි.+

101 ඔබේ වදන්වලට කීකරු වන පිණිස+

කිසි වැරදි මාර්ගයක ගමන් කිරීමට මාගේ පාදවලට මම ඉඩ නොදුන්නෙමි.+

102 ඔබ දුන් තීන්දු මම නොසලකා නොහැරියෙමි.+

මන්ද ඒවා මට ඉගැන්වූවේ ඔබය.+

103 ඔබේ වදන් මාගේ දිවට කොතරම් මිහිරිද!

එසේය, ඒවා මීපැණිවලටත් වඩා මිහිරිය.+

104 ඔබේ අණපනත් නිසා මම හොඳ අවබෝධයකින් කටයුතු කරමි.+

සියලු වැරදි මාර්ගවලට මම ද්වේෂ කරන්නේ ඒ නිසාය.+

105 ඔබේ වදන් මාගේ පාදවලට පහනක්ය.+

මා යන මාවතට එළියක්ය.+

106 ඔබේ ධර්මිෂ්ඨ තීන්දුවලට එකඟව ක්‍රියා කිරීමට

මම පොරොන්දු වුණෙමි.+ එය මම ඉටු කරන්නෙමි.+

107 මම බොහෝ දුක් ගැහැටවලට මුහුණ දුන්නෙමි.+

අනේ යෙහෝවා දෙවියනි, ඔබ පැවසූ ලෙස මාගේ දිවි රැක දෙන්න.+

108 යෙහෝවා දෙවියනි, මාගේ මුවින් කරන ප්‍රශංසාව පූජාවක් ලෙස පිළිගන්න.+ මම ඒවා කැමැත්තෙන්ම ඔබට ඔප්පු කරන්නෙමි.

දෙවියනි, ඔබේ තීන්දු ගැන මට උගන්වන්න.+

109 මාගේ ජීවිතය තිබෙන්නේ අනතුරේය.+

නමුත් ඔබේ නීතිය මම කිසිවිටක අමතක නොකළෙමි.+

110 දුෂ්ටයෝ මට උගුලක් ඇටෙව්වෝය.+

නමුත් ඔබේ අණපනත්වලින් මම ඉවත්ව නොගියෙමි.+

111 ඔබේ සිහිගැන්වීම් මාගේ උරුමය ලෙස මම සදහටම තබාගන්නෙමි.+

මන්ද ඒවා මාගේ සිතට සතුටක් ගෙන දෙන්නේය.+

112 මාගේ ජීවිතයේ අවසානය දක්වාම ඔබේ නියෝගවලට කීකරු වීමට මම අදිටන් කරගත්තෙමි.+

එසේය, හැමදාටම මම ඔබේ නියෝගවලට කීකරු වෙමි.+

113 දෙගිඩියාවෙන් සිටින අයට මම ද්වේෂ කරමි.+

නමුත් මම ඔබේ නීතියට ඇලුම් කරමි.+

114 ආරක්ෂාව පතා මා සැඟවෙන්නේ ඔබ ළඟය. ඔබ මාගේ පලිහය.+

ඔබේ වදන් ඉටු වන තෙක් මම බලාපොරොත්තුවෙන් සිටිමි.+

115 දුෂ්ටයෙනි, මාගෙන් ඉවත්ව යන්න.+

එවිට මාගේ දෙවිගේ ආඥාවලට කීකරු වීමට මට හැකි වන්නේය.+

116 මාගේ දිවි රැකෙන පිණිස ඔබ පොරොන්දු වූ ලෙස මට උපකාර කරන්න.+

මාගේ බලාපොරොත්තු කඩ වී මා ලැජ්ජාවට පත් වීමට ඉඩ නොදෙන්න.+

117 මාව ශක්තිමත් කර මට ගැලවීම ලබා දෙන්න.+

එවිට මට සැමදා ඔබේ නියෝගවලට කීකරු වීමට හැකි වන්නේය.+

118 ඔබේ නියෝගවලට පිටු පා කටයුතු කරන සියල්ලන්ව ඔබ ප්‍රතික්ෂේප කරන්නෙහිය.+

ඔවුහු කපටි බොරුකාරයෝය.+

119 බොර ඉවත් කර දමන්නාක් මෙන් පොළොවේ සිටින සියලු දුෂ්ටයන්ව ඔබ තුරන් කර දමන්නෙහිය.+

එබැවින් ඔබ දෙන සිහිගැන්වීම්වලට මම ඇලුම් කරමි.+

120 ඔබ කෙරෙහි ඇති ගරුබිය නිසා මාගේ ඇඟ කිලිපොළා යන්නේය.+

ඔබේ තීන්දු නිසා මම තැතිගත්තෙමි.+

121 මම සාධාරණ ලෙස විනිශ්චය කළෙමි. මම ධර්මිෂ්ඨ දේ කළෙමි.+

අනේ, මට අසාධාරණකම් කරන අයගේ අතට මාගේ ජීවිතය භාර නොදෙන්න.+

122 ඔබේ සේවකයා වෙනුවෙන් ඔබ යහපත කරන බවට සහතිකයක් දෙන්න.+

මට අසාධාරණකම් කිරීමට අහංකාර අයට ඉඩ නොදෙන්න.+

123 ඔබේ ධර්මිෂ්ඨ වදන් ඉටු වන තෙක් බලා සිටීමෙන්+

එසේය, ඔබ ගැලවීම සලසා දෙන තෙක් බලා සිටීමෙන් මාගේ දෙනෙත් විඩාබර වී ඇත.+

124 ඔබේ අතිමහත් ප්‍රේමය* පෙන්වා ඔබේ සේවකයාට යහපත කරන්න.+

දෙවියනි, ඔබේ නියෝග මට උගන්වන්න.+

125 මම ඔබේ සේවකයාය.+ ඔබේ සිහිගැන්වීම්+ තේරුම්ගැනීමට

මට උපකාර කරන්න.+

126 යෙහෝවා දෙවියනි, කාලය පැමිණ තිබෙන බැවින් නැඟී සිටින්න.+

මන්ද ඔවුහු ඔබේ නීතිය කඩ කළෝය.+

127 ඔබේ ආඥා රන්වලටත් වඩා එසේය, පවිත්‍ර රන්වලටත් වඩා වටින නිසා+

මම ඒවාට බොහෝ සෙයින් ඇලුම් කරමි.+

128 සෑම දෙයක් ගැනම ඔබ දී තිබෙන අණපනත් යහපත් බව මම පිළිගනිමි.+

මම සියලු වැරදි මාර්ගවලට ද්වේෂ කරන්නෙමි.+

129 ඔබ දෙන සිහිගැන්වීම් කොතරම් ශ්‍රේෂ්ඨද!+

එබැවින් මම ඒවා පිළිපදිමි.+

130 ඔබේ වදන්වල අර්ථය එළිදරව් වන විට ආලෝකය ලැබෙයි.+

අද්දැකීම් අඩු අයට එයින් අවබෝධය ලැබෙයි.+

131 ඔබේ ආඥාවන් ලැබෙන තෙක්+

මම මහත් ආශාවකින් බලා සිටිමි.+

132 මා වෙත හැරී මට කරුණාව පෙන්වන්න.+

ඔබේ නාමයට ඇලුම් කරන්නන්ට ඔබ යුක්තිය ඉටු කර දෙන අයුරින්ම මටද යුක්තිය ඉටු කර දෙන්න.+

133 මා ගන්නා සෑම පියවරක්ම ඔබේ වදන්වලට එකඟව ගැනීමට මට උපකාර කරන්න.+

කිසිම දුෂ්ට දෙයකට මාව පාලනය කිරීමට ඉඩ නොදෙන්න.+

134 වංචනිකයන්ගෙන් මාව බේරාගන්න.+

මම ඔබේ අණපනත් පිළිපදින්නෙමි.+

135 ඔබේ සේවකයාට කරුණාව පෙන්වන්න.+

දෙවියනි, ඔබේ නියෝග මට උගන්වන්න.+

136 ඔවුන් ඔබේ නීතිය කඩ කළ නිසා+

මාගේ ඇස්වලින් කඳුළු ගංගාවක් ගලා ගියේය.+

137 යෙහෝවා දෙවියනි, ඔබ ධර්මිෂ්ඨය.+

ඔබ දෙන තීන්දුද යුක්තිසහගතය.+

138 ඔබේ සිහිගැන්වීම්වලට+ කීකරු වන ලෙස ඔබ අපට අණ කළෙහිය.

මන්ද ඔබ ධර්මිෂ්ඨය. විශ්වාසවන්තය.+

139 මා තුළ තිබෙන උද්‍යෝගය ඇවිළෙන ගින්නක් මෙන් මාව දවා දැමුවේය.+

මන්ද මාගේ සතුරන්ට ඔබේ වදන් අමතක වී ඇත.+

140 ඔබේ වදන් ඉතා පවිත්‍රය.+

ඔබේ සේවකයා ඊට අතිශයින් ප්‍රිය කරන්නේය.+

141 කිසි වැදගැම්මකට නැති, පහත් තැනැත්තෙකු ලෙස ඔවුන් මාව සැලකුවත්+

ඔබේ අණපනත් මම අමතක නොකරන්නෙමි.+

142 ඔබේ ධර්මිෂ්ඨකම සදාකල් පවතින්නේය.+

ඔබේ නීතිය සැමවිටම විශ්වාසවන්තය.+

143 දුක් වේදනා හා දුෂ්කරතා බොහොමයක් මා අද්දැක්කත්+

ඔබේ ආඥාවලට මම ඇලුම් කරමි.+

144 ඔබේ සිහිගැන්වීම් කොතරම් ධර්මිෂ්ඨද! ඒවා සදහටම එලෙසම පවතින්නේය.+

මාගේ දිවි රැකෙන පිණිස මට ඒවා තේරුම්ගැනීමට උපකාර කරන්න.+

145 මාගේ මුළු හදින්ම මම ඔබට කන්නලව් කළෙමි.+ යෙහෝවා දෙවියනි, මට පිළිතුරු දෙන්න.+

ඔබේ නියෝග මම පිළිපදින්නෙමි.+

146 මම ඔබට හඬගැසුවෙමි. අනේ, මාව බේරාගන්න.+

ඔබේ සිහිගැන්වීම්වලට මම කීකරු වන්නෙමි.+

147 ඔබේ උපකාර පැතීමට+ මම හිමිදිරි උදයේ+ අවදි වුණෙමි.

ඔබ මට පිළිතුරු දෙන තෙක් මම බලා සිටියෙමි.+

148 ඔබේ වදන් ගැන ගැඹුරින් කල්පනා කිරීමට+

මම මැදියම් රැයේ අවදි වුණෙමි.+

149 අනේ යෙහෝවා දෙවියනි, ඔබේ ඉමහත් ප්‍රේමය* පෙන්වමින් මාගේ කන්නලව්වට සවන් දෙන්න.+

ඔබ තීන්දු කළ ලෙස මාගේ දිවි රැක දෙන්න.+

150 නින්දිත ක්‍රියාවල නියැලෙන්නෝ+ මා අසලටම පැමිණ සිටිති.

ඔවුහු ඔබේ නීතියෙන් ඈත්ව සිටිති.+

151 යෙහෝවා දෙවියනි, ඔබ මාගේ සමීපයේ සිටින්නෙහිය.+

ඔබේ සියලු ආඥා විශ්වාසවන්තය.+

152 බොහෝ කාලයක සිට ඔබේ සිහිගැන්වීම්+ සමහරක් මම දැන සිටියෙමි.

සදහටම පවතින ලෙස ඔබ ඒවා පිහිටුවා ඇත.+

153 දෙවියනි, මා විඳින දුක් ගැහැට දෙස බලා මාව බේරාගන්න.+

මන්ද ඔබේ නීතිය මම අමතක නොකළෙමි.+

154 මා වෙනුවෙන් පෙනී සිට මාව බේරාගන්න.+

ඔබ පොරොන්දු වූ ලෙස මාගේ දිවි රැක දෙන්න.+

155 ගැලවීම දුෂ්ටයන්ගෙන් ඉතා ඈත්ව තිබේ.+

මන්ද ඔවුහු ඔබේ නියෝග පිළිපැදීමට උත්සාහ නොකරති.+

156 යෙහෝවා දෙවියනි, ඔබ පෙන්වන දයාව අතිමහත්ය.+

ඔබ තීන්දු කළ ලෙස මාගේ දිවි රැක දෙන්න.+

157 මට පීඩා කරන්නෝ බොහෝය. මාගේ සතුරෝ ගණනින් අධිකය.+

නමුත් මම ඔබේ සිහිගැන්වීම් අමතක නොකළෙමි.+

158 ද්‍රෝහිකම් කරන්නන්ව මම දුටුවෙමි.+

ඔවුන් ඔබේ වදන්වලට කීකරු නොවන නිසා ඔවුන් මට පිළිකුලකි.+

159 ඔබේ අණපනත්වලට මා අතිශයින් ප්‍රිය කරන බව අමතක නොකරන්න.+

යෙහෝවා දෙවියනි, ඔබ ප්‍රේමණීය* දෙවි කෙනෙක් නිසා මාගේ දිවි රැක දෙන්න.+

160 ඔබේ වදන් සත්‍යය.+

ඔබ දෙන සෑම ධර්මිෂ්ඨ තීන්දුවක්ම සදාකල් පවතින්නේය.+

161 කිසිම හේතුවක් නොමැතිව අධිපතීහු මට පීඩා කළෝය.+

නමුත් මම ඔබේ වදන් කෙරෙහි පමණක් ගරුබියක් පෙන්වූවෙමි.+

162 වටිනා වස්තුවක් ලබාගත් තැනැත්තෙකු මෙන්+

ඔබේ වදන් ගැන මම සතුටු වෙමි.+

163 මම වංචාවට ද්වේෂ කරමි.+ සැමදා එයට පිළිකුල් කරමි.+

නමුත් ඔබේ නීතියට මම අතිශයින් ප්‍රිය කරමි.+

164 ඔබේ තීන්දු ධර්මිෂ්ඨ නිසා+

දවසට සත් වතාවක්ම මම ඔබට ප්‍රශංසා කළෙමි.+

165 ඔබේ නීතියට ප්‍රිය කරන අය මහත් සමාදානයක්* අද්දකිනු ඇත.+

පය පැටලී ඔවුහු කිසිවිටක වැටෙන්නේ නැත.+

166 යෙහෝවා දෙවියනි, ඔබ ගැලවීම දෙන තෙක් මම බලා සිටින්නෙමි.+

ඔබේ ආඥා මම පිළිපදිමි.+

167 ඔබේ සිහිගැන්වීම්වලට මම කීකරු වෙමි.+

ඒවාට අතිශයින් ප්‍රිය කරමි.+

168 ඔබේ අණපනත් හා සිහිගැන්වීම්වලට මම කීකරු වෙමි.+

ඔබ මාගේ සියලු ක්‍රියා දකින්නෙහිය.+

169 යෙහෝවා දෙවියනි, මාගේ කන්නලව්වට සවන් දෙන්න.+

ඔබ පොරොන්දු වූ ලෙස තේරුම්ගැනීමේ හැකියාව මට ලබා දෙන්න.+

170 කරුණාව පතා මා ඔබට කරන ඉල්ලීමට ඇහුම්කන් දෙන්න.+

ඔබ පොරොන්දු වූ ලෙස මාව බේරාගන්න.+

171 මාගේ දෙතොල් නිරතුරුවම ඔබට ප්‍රශංසා කරනු ලැබේවා!+

මන්ද ඔබේ නියෝග ඔබ මට උගන්වන්නෙහිය.+

172 මම ඔබේ වදන් ගැන ගී ගයන්නෙමි.+

මන්ද ඔබේ සියලු ආඥා ධර්මිෂ්ඨය.+

173 ඔබේ හස්තයෙන් මට උපකාර කරන්න.+

මන්ද ඔබේ අණපනත්වලට කීකරු වීමට මම තීරණය කළෙමි.+

174 යෙහෝවා දෙවියනි, ඔබ ගැලවීම ලබා දෙන තෙක් මම මහත් ආශාවෙන් බලා සිටිමි.+

ඔබේ නීතියට මම ඇලුම් කරමි.+

175 ඔබට හැමදාටම ප්‍රශංසා කිරීමට මට හැකි වන පිණිස මාගේ දිවි රැක දෙන්න.+

ඔබේ තීන්දුවලින් මට උපකාර ලැබේවා!+

176 අතරමං වූ බැටළුවෙකු මෙන් මම මංමුළා වුණෙමි.+ ඔබේ සේවකයාව+ සොයා, නැවත රැගෙන යන්න.

මන්ද ඔබේ සේවකයා වන මට ඔබේ ආඥා අමතක වී නැත.+