Kamus ni Bibel
A B D E F G H I J K L M N P R S T U Z
A
Abit goni.
Kain na kasar na ditonun sian imbulu ni hambing. Dipangke do on gabe inganan ni eme jala dipangke jolma do on gabe abitna, tanda na marlungun ni roha ibana.—1Mus 37:34; Luk 10:13.
Akaya.
Di Angka Buku Junani Kristen, on ma sada sian provinsi di bagian selatan ni Rom, jala disi ma ibukota ni Korint. Dohot do luat na di Peloponeus dohot na di bagian tengah ni dataran Junani didok Akaya.—Ul 18:12.
Alaman.
Inganan na so maratap na dipagari di humaliang ni tabernakel manang di humaliang ni bagas joro. Di alaman ni tabernakel dohot di alaman ni bagas joro do langgatan inganan manutung pelean. Adong do muse alaman ni angka jabu dohot istana na disurat di Bibel.—2Mus 8:13; 27:9; 1Raj 7:12; Mat 26:3; Mrk 15:16; Pgk 11:2.
Alpa dohot Omega.
Amen.
Lapatanna, “Masa ma songon i” manang “tutu”. Sian bahasa Heber do hata on, i ma aman, lapatanna “marsihohot, boi dihaporseai”. Didok do “Amen” molo sapandapot tu sada parjanjian, tu tangiang, manang tu sada hata. Di buku Pangungkapon, dipangke do i laho mandok Jesus.—5Mus 27:26; 1Kron 16:36; Rom 1:25; Pgk 3:14.
Anak ni jolma.
Di buku Mateus, Markus, Lukas, dohot Johannes adong do hira-hira 80 hali hata on disurat jala ditujuhon tu Jesus. Hata on patuduhon na gabe jolma do Jesus tingki di tano on. Hata on pe patuduhon na digohi Jesus do surirang di Daniel 7:13, 14. Di Angka Buku Heber, hata on ditujuhon tu si Hesekiel dohot tu si Daniel. Hata on patuduhon jolma do nasida jala boi do mate. Imbar do nasida tu Debata na mangalehon barita sipasahaton ni nasida.—Hes 3:17; Dan 8:17; Mat 19:28; 20:28.
Anak ni si Daud.
Jotjot do Jesus didok “Anak ni si Daud”. Hata on patuduhon Jesus do na didok di parjanjian Harajaon. Mangihuthon surirang, pinompar ni si Daud do na laho manggohi parjanjian i.—Mat 12:23; 21:9.
Angka gulungan na sian kulit.
Kulit ni biru-biru, hambing, dohot lombu na dibahen gabe harotas. Umleleng do martahan gulungan na sian kulit ni binatang martimbangkon harotas na sian papirus. Angka Buku Heber do ra na dipangido si Paulus tingki dipangido ibana asa diboan si Timoteus angka gulungan na sian kulit. Di gulungan na sian kulit do disurat deba Gulungan Laut Mati.—2Tim 4:13.
Antikristus.
Di bahasa Junani adong dua lapatanna. Na parjolo, boi do lapatanna anti manang mangalo tu Kristus. Boi do muse lapatanna Kristus palsu, i ma halak na mandok dirina Kristus. Antikristus, i ma sude halak, organisasi, manang punguan na mangaku dirina suruan ni Kristus manang na mandok dirina Messias manang na mangalo Kristus dohot angka siseanna.—1Joh 2:22.
Apostel.
Lapatan ni hata on, “halak na disuru”. Dipangke do hata on tu Jesus dohot tu angka halak na disuru mangkobasi na asing. Alai umjotjot do hata on dipangke tu angka sisean ni Jesus na 12 i.—Mrk 3:14; Ul 14:14.
Areopagus.
Sada dolok na timbo di Atena, di timur laut Akropolis. Jala goar ni pengadilan do on. Diboan angka na mangihuthon ajaran Stoik dohot Epikurean do si Paulus tu inganan i laho patorangkon haporseaonna.—Ul 17:19.
Ari Pangaradeon.
Goar ni ari andorang so ari Sabbat. Di ari i ma halak Jahudi paradehon angka na ringkot tu ari Sabbat. Ari Jumat botari ma ari pangaradeon marujung. Ala di halak Jahudi, tingki botari do mula manang ujung ni ari.—Mrk 15:42; Luk 23:54.
Ari Panguhuman.
Tingki manang ari ni Debata manguhumi sada bangso manang sude jolma. Di ari paruhuman, dipamate Debata do angka halak na didok rohana ingkon sipamateon. Alai dilehon do hangoluan na saleleng ni lelengna tu angka halak na dipillit Debata. Dipaboa Jesus tu angka siseanna, na laho masa do “Ari Panguhuman” tu angka halak na mangolu dohot na mate, na laho masa di ari na naeng ro.—Mat 12:36.
Ari Pardamean.
Ari na badia jala na rumingkot di halak Israel. Didok do muse ari i Yom Kippur sian bahasa Heber yohm hak kip pu rim, “ari parlinggoman”, na dibahen tanggal sampulu di bulan Etanim. Di Angka Buku Heber, didok ma on Ari Pardamean. Holan di ari i ma sintua ni malim masuk tu Inganan na Mansai Badia di Tabernakel laho mamelehon mudar tu dosana, dosa ni halak Lepi na asing, dohot dosa ni halak Israel. Mudar na dipelehon i, manggombarhon mudar ni Kristus na boi manesa dosa ni jolma sahali tu saleleng ni lelengna, asa boi jolma mardame dohot Jahowa. Di ari i, halak Israel marpungu jala marpuasa. Jala ingkon maradi do halak Israel sian angka ulaonna ala ari Sabbat do i.—3Mus 23:27, 28; Ul 27:9; Kol 1:20; Heb 9:12.
Ari parpudi.
Di Bibel, hata “ari parpudi” manang angka hata na dos tusi patuduhon ujung ni angka na masa. (Hes 38:16; Dan 10:14; Ul 2:17) Mangihuthon na disurirangkon, boi do on masa saleleng piga-piga taon manang lobi. Na umjotjot didok di Bibel i ma “ari parpudi” ni jaman on, na masa saleleng haroro ni Jesus na so boi taida.—2Tim 3:1; Jak 5:3; 2Ptr 3:3.
Armagedon.
Sian bahasa Heber Har Meghid dohn, lapatanna “Dolok Megido”. Dipangke do hata i laho patuduhon “porang di ari na balga, i ma ari ni Debata na Sun Hinagogo i” tingki dipapungu “sude ma angka raja na di tano on” laho marporang mangalo Jahowa. (Pgk 16:14, 16; 19:11-21)—Ida HASUSAAN BOLON.
Aselgeia.
Asia.
Asi ni roha na mansai balga.
Lapatan ni hata on di bahasa Junani i ma na pasonangkon roha manang na palongang roha. Jotjot do hata i dipangke laho patuduhon hadiah na dilehon sian ias ni roha. Molo asi ni roha ni Debata do na ditaringoti, hata i manggombarhon silehon-lehon na sian Debata. On patuduhon silehon-lehon na balga, holongna, dohot haburjuonna tu jolma. Hata “asi ni roha na mansai balga”, boi do diterjemahon gabe “sumbangan”. Ndang alani haburjuon ni na manjalo sumbangan i umbahen dilehon i tu ibana. Alai on patuduhon haburjuon ni na mangalehon sumbangan i.—2Kor 6:1; Eps 1:7.
Auga.
Sada hau na dituhuk sasahalak laho mamboan boban na targantung di ujungna. Manang hau na dibahen di rungkung ni binatang laho manarik bajak di hauma. Ala jotjot do auga dipangke hatoban laho mamboan barang na borat, gabe dipangke ma i manggombarhon parhatobanan, sitaonon, dohot hasusaan. Mamonggol auga lapatanna paluahon halak sian parhatobanan dohot sitaonon.—3Mus 26:13; Mat 11:29, 30.
B
Baal.
Debata ni halak Kanaan na didok nampuna langit, na parohon udan jala na mangalehon pinompar. Hata “Baal” dipangke do muse tu angka debata na asing. Di bahasa Heber lapatanna “Nampuna manang Tuan”.—1Raj 18:21; Rom 11:4.
Badia.
Jotjot do hata badia ditujuhon tu Jahowa. Badia lapatanna, marparange na ias. (2Mus 28:36; 1Sam 2:2; Joh 17:11) Sipata dipangke do hata badia tu jolma (Mrk 6:20; Ul 3:21), tu ugasan (Rom 7:12; 11:16; 2Tim 3:15), tu inganan (Mat 4:5; Ul 7:33; Heb 9:1), dohot tu ulaon (2Mus 36:4). Molo di bahasa Heber, lapatanna na dipapulik manang na diparade laho dipelehon tu Debata na badia, manang na dipapulik laho marhobas tu Jahowa. Molo diterjemahon hata on di Angka Buku Junani Kristen, on patuduhon dipapulik laho tu Debata. Hata on pe patuduhon parniulaon manang pangalaho na denggan.—2Kor 7:1; 1Ptr 1:15, 16.
Bagas joro.
Inganan na dipangke laho manomba Debata. Jotjot do didok inganan on tabernakel manang bagas joro di Jerusalem. Bagas joro ma ganti ni tabernakel na diboan halak Israel tingki di pardalanan sian Mesir. Bagas joro na parjolo dipajongjong si Salomo, alai dirumpakhon halak Babel ma i. Bagas joro na paduahon dipajongjong si Serubabel dung mulak halak Israel sian Babel. Di pudian ni ari, dipadenggan si Herodes Agung ma i muse. (Esr 1:3; 6:14, 15; 1Kron 29:1; 2Kron 2:4; Mat 24:1) Hata on pe dipangke laho patuduhon banua ginjang.—2Mus 25:8, 9; 2Raj 10:25; 1Kron 28:10; Pgk 11:19.
Bahasa Aram.
Sada sian bahasa Semitik na songon bahasa Heber na mamangke huruf na sarupa. Mulana halak Aram do na mamangke bahasa on, alai di pudian ni ari dipangke do on di pamarentaon Assur dohot Babel tingki martiga-tiga nang mangkatai. Dipangke do muse bahasa on di pamarentaon ni Persia. (Esr 4:7) Di bahasa Aram do disurat buku Esra, Jeremia, dohot Daniel. Deba sian hata di bahasa Aram dipangke do di Angka Buku Junani Kristen.—Esr 4:8–6:18; 7:12-26; Jer 10:11; Dan 2:4–7:28; Mrk 14:36; Ul 9:36.
Barani mangkatai.
Sian bahasa Junani parresia, lapatanna ndang mabiar jala tangkas paboahon taringot tu haporseaon ni halak Kristen. Jala hata on pe patuduhon na adong pos ni roha, habaranion jala ndang mabiar marale-ale tu Debata. Jala on pe patuduhon pangkilalaan ni sasahalak taringot tu parale-aleonna tu Debata.
Barita na uli.
Di Angka Buku Junani Kristen, hata “barita na uli” dipangke laho patuduhon barita na uli taringot tu Harajaon ni Debata dohot taringot tu haluaon molo porsea tu Jesus Kristus.—Luk 4:18, 43; Ul 5:42; Pgk 14:6.
Batu gilingan.
Batu na bulat na dibahen di ginjang ni batu na asing na dipangke laho manggiling gandum manang boras. Di tonga-tonga ni batu na asing i adong sada pasak na dibahen gabe hira sumbu tu batu gilingan i. Adong do muse batu gilingan na balga na diputar binatang. Didok di Bibel, jotjot do batu gilingan on dipangke angka ina laho mambahen roti sipanganon ni sude keluarga ni nasida. Alani i, di Patik ni si Musa diorai do mambuat batu gilingan laho gabe jaminan.—5Mus 24:6; Mrk 9:42.
Batu parsuhi-suhi.
Batu na dibahen di suhi-suhi ni bangunan laho pasadahon dua dinding. Somalna, batu na mansai pir do na dipangke laho mambahen tembok ni kota. Laho manompa tano on, hira na dipangke Debata ma batu parsuhi-suhi na rumingkot. Jala digoari do Jesus “batu parsuhi-suhi na gabe fondasi” tu huria Kristen, na dipatudos songon jabu na dipajongjong marhite-hite tondi parbadia.—Eps 2:20; Job 38:6.
Beelsebul.
Bintang manogot-nogot.
Bintang na parpudi sahali tarida di Timur andorang so binsar mata ni ari.—Pgk 22:16; 2Ptr 1:19.
Borngin Parningotan ni Tuan.
Sada ulaon laho marningot hamamate ni Kristus. Di ulaon i, diparade do roti na so marragi dohot anggur na manggombarhon daging dohot mudar ni Kristus. Di Bibel, dipangido do tu halak Kristen asa mangulahon ulaon on. Alani i ma ulaon on didok “Parningotan”.—1Kor 11:20, 23-26.
Boru-boru na so hasea.
Halak na mangulahon seks tu na so dongan saripena asa dapotan hepeng. (Bahasa Junani boru-boru na so hasea porne, lapatanna “manggadis”.) Nang pe borua na jotjot mangulahon on, alai adong do disurat di Bibel angka baoa na mangulahon sisongon i. Di Patik ni si Musa, diorai do halak mangulahon seks tu na so dongan saripena jala hepeng na sian ulaon sisongon i ndang boi dipelehon tu Jahowa. Di halak na so manomba Debata, gabe pansarian ni nasida do boru-boru na so hasea na adong di kuil ni nasida. (5Mus 23:18, 19; 1Raj 14:24) Di Bibel, hata “boru-boru na so hasea” dipangke do laho manggombarhon halak, bangso, manang organisasi na manomba gana-ganaan nang pe mangakku manomba Debata. Umpamana, di buku Pangungkapon dipatudos do organisasi agama “Babel na Balga” songon boru-boru na so hasea, ala marale-ale do nasida tu angka pamarenta laho mangalului hamoraon dohot huaso.—Pgk 17:1-5; 18:3; 1Kron 5:25.
Botol pualam.
Goar ni inganan ni parfum na gelleng na dibahen sian batu na dibuat sian jonok ni Alabastron, Mesir. Jala sarupa do goar ni batu i tu goar ni inganan ni parfum i. Dibahen do rungkung ni botol pualam on asa boi denggan ditutup jala asa ndang kaluar uap ni parfum i.—Mrk 14:3.
Bulan baru.
Ari na parjolo di ganup bulan ni halak Jahudi. Marpungu ma nasida di ari i, rap mangan jala mamelehon pelean. Di pudian ni ari, gabe sada perayaan ma i dibahen di sude luat i jala ndang karejo sude halak di ari i.—4Mus 10:10; 2Kron 8:13; Kol 2:16.
Bura.
Mandok hata na jahat asa masa tu sasahalak. Ndang sarupa hata bura tu hata na posi. Hata bura somalna didok asa masa na jorbut tu sasahalak. Molo sian Debata haroro ni hata bura i, boi do i dohonon surirang jala ingkon masa do i.—1Mus 12:3; 4Mus 22:12; Mrk 11:21; Rom 12:14; Gal 3:10.
D
Dalan ni Tuan.
Di Bibel, hata on manggombarhon parniulaon manang pambahenan na dihalomohon Jahowa. Angka halak na mangihuthon Jesus didok do na mangihuthon “Dalan ni Tuan”, ala porsea nasida tu Jesus Kristus jala diihuthon nasida do sitiruon sian ibana.—Ul 19:9.
Datu.
Halak na mamangke gogo manang huaso ni suru-suruan na jahat.—Ul 13:6.
Daupa.
Gota ni hau na angur na ditutung rap dohot balsam. Adong daupa na istimewa na dipangke di tabernakel dohot di bagas joro na dibahen sian opat macam. Ganup manogot dohot ganup borngin, ditutung do daupa on di langgatan na adong di Inganan na Badia. Tingki di Ari Pardamean, ditutung ma daupa on di Inganan na Mansai Badia. Daupa manggombarhon tangiang ni halak na porsea tu Debata na dipasahat sian ias ni rohana. Ndang ingkon manutung daupa halak Kristen saonari on.—2Mus 30:34, 35; 3Mus 16:13; Pgk 5:8.
Dekapolis.
Punguan ni angka kota di Junani (sian hata Junani deka, lapatanna “sampulu” dohot polis, “kota”). Godangan angka kota i di Timur ni Laut Galilea dohot Sunge Jordan. Di angka kota i ma somalna halak martiga-tiga jala disi ma inganan ni kebudayaan Helenistik. Hea do Jesus mamolus sian angka kota on, alai ndang hea ibana so disi.—Mat 4:25; Mrk 5:20.
Depa.
Hata na dipangke laho patuduhon bagas ni aek. Sada depa dos ma tu 1,8 m (6 kaki).—Ul 27:28, surat na di toru.
Dinar.
Hepeng logam ni halak Rom na dibahen sian perak, boratna hira-hira 3,85 g. Dibahen do disi gombar ni Kesar. Sadinar ma upa ni parkarejo sadari jala dipangido halak Rom do sadinar pajak ni halak Jahudi.—Mat 22:17; Luk 20:24.
Dipillit.
Di bahasa Heber lapatanna “dimiahi”. Diusehon do miak tu sasahalak laho patuduhon na dipillit ibana mangulahon ulaon na sumurung. Di Angka Buku Junani Kristen, dipangke do muse hata on laho patuduhon angka halak na manjalo tondi parbadia jala marpangkirimon mangolu salelengna di banua ginjang.—2Mus 28:41; 1Sam 16:13; Luk 4:18; Ul 10:38; 2Kor 1:21.
Drakhma.
Di angka Buku Junani Kristen, drakhma do hepeng logam ni halak Junani na dibahen sian perak, boratna hira-hira 3,4 g (0,109 ons).—Mat 17:24.
Durame.
E
Emper ni si Salomo.
On ma dalan na di timur ni alaman luar bagas joro. Adong do atap ni dalan on jala jotjot do on didok sisa ni bagas joro. Tingki di tano on Jesus, mardalan do ibana di emper ni si Salomo di tingki musim dingin. Jala marpungu do halak Kristen disi laho manomba Debata.—Joh 10:22, 23; Ul 5:12.
Epikurus.
Epikurus i ma sahalak Filsuf na sian Junani na mangolu taon 341-270 SM. Diajarhon ibana do tu angka jolma, holan marsonang-sonang do tujuan ni ngolu ni jolma na sasintongna.—Ul 17:18.
Etiopia.
Sada bangso najolo na adong di selatan ni Mesir. Molo saonari, mulai sian selatan ni Mesir sahat tu satonga ni bagian utara ni negara Sudan ma bolak ni Etiopia.—Ul 8:27.
F
Firaun.
Gelar ni angka raja di Mesir. Adong lima firaun na disurat goarna di Bibel (Sisak, So, Tirhaka, Neko, dohot Hopra). Alai ndang adong dipaboa ise goar ni firaun na mangkatai tu si Abraham, si Musa, dohot si Josep.—2Mus 15:4; Rom 9:17.
G
Gana-ganaan.
Patung manang gombar na dipangke gabe sisombaon. Manomba gana-ganaan lapatanna mangkaholongi jala pasangaphon gana-ganaan.—Ps 115:4; Ul 17:16; 1Kor 10:14.
Gehena.
Di bahasa Junani, on goar ni rura Hinom na adong di barat daya ni Jerusalem najolo. (Jer 7:31) Di angka buku ni panurirang, didok do inganan on gok angka bangke ni jolma. (Jer 7:32; 19:6) Alai ndang adong bukti na patuduhon disampathon do jolma manang binatang na mangolu tusi asa ditutung. Alani i, inganan i ndang manggombarhon inganan ni jolma na ditutung saleleng ni lelengna. Alai didok Jesus dohot angka siseanna do Gehena laho manggombarhon hamatean na saleleng ni lelengna, i ma “hamatean na paduahon”.—Pgk 20:14; Mat 5:22; 10:28.
Gubernur.
Sasahalak na mamarenta di sada provinsi. Adong do dewan perwakilan rakyat na umtimbo na didok Senat Romawi jala ingkon unduk do gubernur i tu ibana. Alai boi do gubernur gabe hakim manang komandan. Nang pe adong na manjaga manang mamparrohahon gubernur, marhak do ibana mamarenta di sada provinsi.—Ul 13:7; 18:12.
Gulungan.
Harotas na ganjang na dibahen sian kulit binatang manang sian papirus. Holan sambariba do harotas i disurat jala adong tungkotna na dipangke manggulung. Di angka gulungan do disurat hata ni Debata jala on ma na gabe buku di nasida.—Luk 4:17-20; 2Tim 4:13.
H
Hadatuon.
Ulaon na patuduhon porsea do halak na mangulahon i na mangolu dope halak naung mate. Didok roha ni nasida, boi dope halak na mate i mangkatai tu halak na mangolu tarlumobi molo diurupi sahalak datu. Bahasa Junani hadatuon i ma pharmakia lapatanna “dibius”. Hombar do hata on tu ulaon hadatuon. Najolo, dipangke nasida do narkoba tingki mangido asa diurupi suru-suruan na jahat nasida mambahen tanda halongangan.—Gal 5:20; Pgk 21:8.
Hades.
Sian bahasa Junani na sarupa tu “Syeol” di bahasa Heber. Hata on diterjemahon gabe “Kuburan” (huruf na balga) laho patuduhon kuburan umum ni jolma. Holan gombaran do inganan i.—Ida KUBURAN.
Haheheon.
Na nidokna dison i ma hehe sian na mate. Hata Junanina anastasis lapatanna “hehe, jongjong”. Adong sia halak na dipahehe disurat di Bibel, dohot ma i haheheon ni Jesus. Nang pe deba angka na mate i dipahehe si Elia, si Elisa, Jesus, si Petrus, dohot si Paulus, alai alani huaso ni Debata do umbahen na boi dipahehe nasida angka na mate. Ingkon dipahehe do “halak na burju dohot halak na jahat” di tano on, asa saut sangkap ni Debata. (Ul 24:15) Adong do muse dipaboa taringot tu “haheheon na parjolo” i ma haheheon ni angka halak na dimiahi na laho tu surgo.—Plp 3:11; Pgk 20:5, 6; Joh 5:28, 29; 11:25.
Halak Jahudi.
Dung talu sampulu marga ni halak Israel, holan marga Juda do didok halak Jahudi. (2Raj 16:6) Dung ditawan halak Israel di Babel, dipangke ma goar on tu sude halak Israel na mulak tu hutana. (Esr 4:12) Di pudian ni ari, sude ma halak Israel na di tano on mamangke goar i laho paimbarhon nasida sian angka bangso na so manomba Debata. (Est 3:6) Dipangke apostel Paulus do muse goar on tingki mandok ndang marimbar halak na di huria Kristen.—Rom 2:28, 29; Gal 3:28.
Halak Junani.
Halak Kasdim.
Angka halak na tading di dataran na jonok tu muara ni Sunge Tigris dohot Euprat. Najolo, kota Ur ma huta na rumingkot di Kaldea, i ma huta ni si Abraham.—Ul 7:4.
Halak Kristen.
Halak na merdeka; Halak na dimerdekahon.
Di tingki pamarentaon ni Rom, halak na merdeka mulai sian tubu didok do “halak na merdeka” na dos songon warga negara Rom. Alai, “halak na dimerdekahon” i ma halak na dipalua sian parhatobanon. Angka halak na dimerdekahon boi gabe warga negara Rom, alai ndang boi nasida gabe pejabat manang pamarenta. Alai molo sipsip do halak i dimerdekahon, malua do ibana sian parhatobanon alai ndang boi gabe warga negara Rom.—1Kor 7:22.
Halak Nasaret.
Didok do Jesus halak Nasaret, ala sian Nasaret ibana. Di bahasa Heber, hombar do on tu hata “tunas” na disurat di Jesaya 11:1. Di pudian ni ari, didok do angka siihuthon Jesus halak Nasaret.—Mat 2:23; Ul 24:5.
Halak Samaria.
Mulana, on patuduhon halak Israel na sampulu marga. Alai dung ditaluhon halak Asiria nasida di taon 740 SM, dohot do halak na asing na diboan halak Asiria tu huta i didok halak Samaria. Tingki di tano on Jesus, hata “halak Samaria” patuduhon halak na maragama songon halak na di Sikem dohot na di Samaria najolo. Asing do na dihaporseai nasida tu halak na maragama Jahudi.—Joh 8:48.
Haminjon.
Gota ni hau haminjon (jenis Boswellia), angur ma i molo ditutung. Dipangke do haminjon mambahen daupa na laho ditutung di tabernakel dohot di bagas joro. Dipangke do muse haminjon tingki mamelehon sipanganon jala dibahen do i muse di angka roti na dipelehon di Inganan na Badia.—2Mus 30:34-36; 3Mus 2:1; 24:7; Mat 2:11.
Harajaon ni Debata.
Huaso ni Debata na tumimbo na dipatuduhon marhite harajaon ni Jesus Kristus Anakna.—Mat 12:28; Luk 4:43; 1Kor 15:50.
Haroro.
Di Angka Buku Junani Kristen, hata ‘haroro’ patuduhon haroro ni Kristus dung gabe raja. Ndang holan satongkin haroro ni Kristus. Dimulai ma on sian tingki dipillit ibana di banua ginjang gabe raja ni Harajaon ni Debata sahat tu panutup ni jaman on.—Mat 24:3.
Hasta.
Hata on dipangke laho patuduhon sadia ganjang. Hira-hira saganjang ni jari-jari sahat tu siku ni tangan ma ganjangna. Di halak Israel, somalna sahasta dos tu 44,5 cm (17,5 inci). Alai adong do hasta ni nasida na umganjang, hira-hira 51,8 cm (20,4 inci).—1Mus 6:15; Pgk 21:17, surat na di toru.
Hasusaan Bolon.
Hata Junani tu hata “hasusaan” patuduhon hasusaan manang haporsuhon ala adong na masa. Dipaboa Jesus do taringot tu “hasusaan bolon” na so hea masa, na laho masa tu halak di Jerusalem. Jala na laho masa ma hasusaan bolon tu saluhut halak di ari na naeng ro, ‘tingki ro Anak ni jolma mardongan huaso dohot hasangapon’. (Mat 24:21, 29-31) Dipaboa si Paulus do taringot tu hatigoran ni Debata na dipatuduhon marhite parohon hasusaan tu “angka halak na so mananda Debata dohot na so mangoloi barita na uli taringot tu Tuanta Jesus”. Dipaboa di Pangungkapon bindu 19, Jesus ma na laho manguluhon angka tentara sian banua ginjang laho mangalo “binatang buas i, angka raja na di tano on, dohot angka tentara ni nasida”. (2Tes 1:6-8; Pgk 19:11-21) Jala dipaboa do muse taringot tu “sada punguan bolon” na laho malua sian hasusaan bolon i. (Pgk 7:9, 14)—Ida ARMAGEDON.
Hatigoran.
Di Bibel, hata ‘hatigoran’ patuduhon angka na sintong di Debata na hombar tu patik dohot aturanna.—1Mus 15:6; 5Mus 6:25; Sep 2:3; Mat 6:33.
Hau hangoluan.
Hau na di Porlak Eden. Ndang adong dipaboa di Bibel na boi parbue ni hau i mangalehon hangoluan. Alai hau i manggombarhon na lehonon ni Jahowa do hangoluan na saleleng ni lelengna tu angka halak na diloas mangallang parbue ni hau i. Di buku Pangungkapon, hau i manggombarhon angka na pinarade ni Debata tu jolma asa boi mangolu.—1Mus 2:9; 3:22; Pgk 2:7; 22:19.
Hau-hau.
Na nidokna dison i ma suan-suanan sian marga Arundo donax. Somalna, suan-suanan on tubu di inganan na godang aekna.—Mat 27:29; Pgk 11:1.
Hau partinaonan.
Di bahasa Junani stauros, lapatanna hau na tigor songon hau inganan ni Jesus digantung. Ndang adong bukti na patuduhon di bahasa Junani hata i lapatanna silang na dipangke halak na so manomba Jahowa marratus taon andorang so ro Kristus. Dos do lapatan ni hata “hau partinaonan” tu hata stauros, ala dipangke do muse hata stauros tingki paboahon taringot tu partinaonan, hasusaan dohot insak-insak na laho hilalaon ni angka halak na mangihuthon Jesus. (Mat 16:24; Heb 12:2)—Ida HAU.
Hau.
Sada hau na tigor na dipangke manguhum parjahat asa gabe sipasingot tu halak natorop jala laho pailahon keluargana. Tarbarita do halak Asiria halak na kejam. Dipangke nasida do hau na pinsur ujungna laho mangarunjak butuha ni sasahalak sahat tu aru-aruna. Dung i dipasombu ma halak na mate i di hau i. Alai imbar do di uhum ni halak Jahudi. Molo adong halak na mangulahon hajahaton, songon mangaleai Debata manang manomba gana-ganaan, jolo didangguri do nasida sahat tu na mate. Dung i digantung ma bangkena di hau asa gabe sipasingot tu na asing. (5Mus 21:22, 23; 2Sam 21:6, 9) Di halak Rom, sipata holan ditali do parjahat i di hau. Dung piga-piga ari, mate ma parjahat i ala marsahit, mauas, male manang alani mohop ni ari. Alai olo do dipakkuhon nasida tangan dohot pat ni parjahat i tu hau songon na dibahen nasida tu Jesus. (Luk 24:20; Joh 19:14-16; 20:25; Ul 2:23, 36)—Ida HAU PARTINAONAN.
Heber.
Si Abraham do na parjolo sahali didok halak Heber, na paimbarhon ibana sian angka halak Amori na di humaliangna. Di pudian ni ari, holan pinompar ni si Abraham sian si Jakkob pahompuna do didok halak Heber jala bahasa na dipangke nasida didok bahasa Heber. Di tingki ni Jesus, godang do hata Aram naung dipangke gabe bahasa Heber. Bahasa on do na dipangke Jesus dohot angka siseanna.—1Mus 14:13; 2Mus 5:3; Ul 26:14.
Hermes.
Anak ni dewa Zeus, debata ni halak Junani. Tingki ro si Paulus tu Listra, dirimpu do ibana dewa Hermes. Di halak Listra, suruan ni angka dewa do dewa Hermes jala malo mangkatai.—Ul 14:12.
Herodes.
Gelar ni halak na dipillit Kaisar Rom laho marhuaso tu halak Jahudi. Tarbarita do Herodes Agung ala paturehon bagas joro di Jerusalem. Jala diparentahon ibana do asa dibunu angka dakdanak, ala marsangkap ibana laho mambunu Jesus. (Mat 2:16; Luk 1:5) Dipillit do si Herodes Arkilaus dohot si Herodes Antipas, angka anak ni si Herodes Agung, laho mamarenta di humaliang ni inganan na diparenta bapakna. (Mat 2:22) Gubernur Antipas jotjot do dijou “raja”, ibana mamarenta mulai di tano on Jesus tolu satonga taon sahat tu tingki na dipaboa di Ulaon ni Apostel bindu 12. (Mrk 6:14-17; Luk 3:1, 19, 20; 13:31, 32; 23:6-15; Ul 4:27; 13:1) Dipamate suru-suruan ni Debata do pahompu ni si Herodes Agung, i ma si Herodes Agrippa I, hape holan satongkin dope ibana mamarenta. (Ul 12:1-6, 18-23) Dung i mamarenta ma anakna, i ma si Herodes Agrippa II sahat tu na mangalo halak Jahudi tu Rom.—Ul 23:35; 25:13, 22-27; 26:1, 2, 19-32.
Hisop.
Suan-suanan na adong rantingna dohot bulungna. Denggan do i pangkeon laho mamispishon aek manang mudar tingki ulaon paiashon. Olo do ra on suan-suanan na margoar marjoram jala marragam do suan-suanan on (Origanum maru; Origanum syriacum). Hisop na disurat di Johannes 19:29, surat na di toru, olo do ra hisop na timbo (Sorghum vulgare). Alani i, gabe boi ma i dipangke laho mambahen bunga karang tu pamangan ni Jesus tingki di hau partinaonan.—Heb 9:19, surat na di toru.
Huria.
Punguan ni angka halak na rap mangulahon angka ulaon. Di Angka Buku Heber, on mandok bangso Israel. Di Angka Buku Junani Kristen, boi do on mandok sahalak Kristen, alai umjotjot do mandok punguan ni halak Kristen.—1Raj 8:22; Ul 9:31; Rom 16:5.
I
Ilirikum.
Sada provinsi di Rom, di barat laut ni Junani. Sahat do si Paulus tu provinsi on. Alai ndang dipaboa na marbarita do si Paulus disi manang holan mardalani.—Rom 15:19.
Inganan na Badia.
Inganan na parjolo jala na umbalga di tabernakel manang di bagas joro. Inganan on do na parjolo dapot, dung i pe asa dapot Inganan na Mansai Badia. Di bagasan Inganan na Badia di tabernakel adong inganan ni lampu na sian mas, langgatan mas inganan manutung daupa, meja inganan ni roti pelean, dohot angka barang na sian mas. Alai molo di Inganan na Badia di bagas joro adong langgatan na sian mas, sampulu inganan ni lampu na sian mas, dohot sampulu meja inganan ni roti pelean.—2Mus 26:33; Heb 9:2.
Inganan na Mansai Badia.
Inganan na adong di tabernakel dohot di bagas joro. Disi ma disimpan poti parpadanan. Mangihuthon Patik ni si Musa, holan sintua ni malim do na boi masuk tu Inganan na Mansai Badia jala holan tingki Ari Pardamean do ibana boi masuk tusi.—2Mus 26:33; 3Mus 16:2, 17; 1Raj 6:16; Heb 9:3.
Inganan ni anggur.
Tas na sian kulit ni binatang, songon kulit ni hambing manang kulit ni biru-biru. Dipangke do on laho manimpan anggur. Dibahen do anggur na baru tu inganan ni anggur na baru. Alana tingki berfermentasi anggur i, gabe kambang do inganan ni anggur i bahenon ni karbon dioksida na kaluar sian anggur i. Alai molo dipangke inganan ni anggur na leleng, boi do gabe maribak i bahenon ni anggur i.—Jos 9:4; Mat 9:17.
Inganan ni daupa.
Parkakas na sian mas, perak, manang tombaga. Dipangke do on di tabernakel dohot di bagas joro laho gabe inganan manutung daupa. Dipangke do muse on laho gabe inganan ni bara na dibuat sian langgatan laho pagalakkon sumbu ni lampu na di inganan na sian mas.—2Mus 37:23; 2Kron 26:19; Heb 9:4.
Inganan pamoroan ni anggur.
Dua bak na balga na dibahen di batu kapur. Umtimbo do bak na parjolo sian bak na paduahon jala boi do aek sian bak na parjolo masuk tu bak na paduahon. Didege ma anggur i di bak na parjolo, dung i masuk ma aek ni anggur i tu bak na paduahon. Dipangke do hata “pamoroan ni anggur” laho manggombarhon panguhuman ni Debata.—Pgk 19:15.
Israel.
Goar na dilehon Debata tu si Jakkob. Di pudian ni ari dibahen ma on gabe goar ni saluhut pinomparna. Pinompar ni 12 ianakhon ni si Jakkob didok do halak Israel manang bangso Israel. Dohot do sampulu marga na di utara na pulik sian dua marga nai didok Israel. Di pudian ni ari, halak Kristen na dimiahi didok do Israel ni Debata.—Gal 6:16; 1Mus 32:28; Ul 4:10; Rom 9:6.
J
Jahowa.
Di Bibel on, adong 237 hali disurat goar “Jahowa” di angka Buku Junani Kristen. Dibahen pe goar ni Debata di Bibel on alani:
1. Dipangke Jesus dohot angka siseanna do angka Buku Heber na manurat Tetragramaton (goar ni Debata na opat huruf יהוה).
2. Di tingki ni Jesus dohot angka apostel, adong do Tetragramaton di angka Buku Heber na diterjemahon tu bahasa Junani.
3. Disurat do di Angka Buku Junani Kristen, jotjot do didok jala dipaboa Jesus goar ni Debata tu angka halak.—Joh 17:6, 11, 12, 26.
4. Angka Buku Junani Kristen pe sian Debata do, songon Angka Buku Heber. Molo adong goar “Jahowa” di Angka Buku Heber, tontu ingkon adong do goar i di Angka Buku Junani Kristen.
6. Di surat ni halak Jahudi na parjolo, dipaboa do na dipangke halak Kristen Jahudi goar ni Debata di angka surat ni nasida.
7. Piga-piga sarjana Alkitab mangangkui na tutu do adong goar ni Debata di Angka Buku Junani Kristen na dibuat (dikutip) sian Angka Buku Heber.
8. Dibahen do goar ni Debata di lobi sian 100 bahasa na menerjemahon Angka Buku Junani Kristen.
Alani on ma ingkon dibahen goar “Jahowa” di Angka Buku Junani Kristen. Jala on ma na diulahon Bibel on. Dipasangap nasida do goar ni Debata jala mabiar do nasida tu Debata. Alani i ma ndang olo nasida manesa goar ni Debata na adong di bahasa aslina.—Pgk 22:18, 19.
Jakkob.
Anak ni si Isak dohot si Rebekka. Di pudian ni ari, dibahen Debata ma goarna gabe Israel. Jala ibana ma na gabe ompu ni bangso Israel (didok do halak Israel jala di pudian ni ari didok halak Jahudi). Adong 12 anak ni si Jakkob. Angka pinompar ni nasida ma na gabe 12 marga ni bangso Israel. Alai tongtong do dipangke goar ni si Jakkob laho patuduhon bangso Israel.—1Mus 32:28; Mat 22:32.
Jaman.
Bahasa Junanina aion. Lapatanna, na masa di sada-sada tingki na mambahen marimbar jaman i tu jaman na asing. Di Bibel, dipangke do hata “jaman” laho patuduhon na masa di portibi on dohot angka halak na mangkaholongi portibi on. (2Tim 4:10, ida surat na di toru.) Dung adong parjanjian Patik, dibahen Debata do jaman na baru na digoari jaman ni halak Israel manang jaman ni halak Jahudi. Alani tobusan ni Jesus Kristus, dibahen Debata ma jaman na baru, dohot do angka halak na tarpillit di jaman i. Jala mulai sian i ma dipungka jaman na imbaru. Di jaman i, tarida ma na digombarhon di parjanjian Patik. Hata “jaman on” patuduhon situasi naung masa manang na laho masa.—Mat 24:3; Mrk 4:19; Rom 12:2; 1Kor 10:11.
Janji.
Marjanji tu Debata laho mangulahon sada ulaon, mangalehon pelean, marhobas tu Ibana, manang padaohon diri sian piga-piga ulaon nang pe ndang diorai Debata. Dos do ringkot ni janji tu sumpa.—Mat 5:33.
Juda.
Anak ni si Jakkob na paopathon sian si Lea. Andorang so mate si Jakkob, dipaboa ibana do taringot sasahalak na sian pinompar ni si Juda na laho gabe raja saleleng ni lelengna. Tingki di tano on Jesus, tubu sian marga Juda do ibana. Dipangke do goar ni Juda gabe marga jala di pudian ni ari gabe goar ni bangso. Bangso Juda do goar ni dua marga na di selatan. Disi ma maringanan angka halak na sian marga Juda dohot marga Benjamin, angka malim dohot halak Lepi. Dohot do Jerusalem gabe inganan ni nasida jala disi do bagas joro.—1Mus 29:35; 49:10; Heb 7:14.
K
Kareta Hoda.
Dua do rodana jala somalna dipangke do on gabe alat transportasi manang laho marporang.—2Mus 14:23; Pangh 4:13; Ul 8:28; Pgk 9:9.
Kerubim.
Suru-suruan na mangulahon ulaon na sumurung manang istimewa. Ndang sarupa kerubim dohot serapim.—1Mus 3:24; 2Mus 25:20; Jes 37:16; Heb 9:5.
Kesar.
Marga ni halak Rom na gabe gelar ni angka pamimpin di Rom, umpamana si Agustus, si Tiberius, dohot si Klaudius na disurat di Bibel. Jala dipangke do muse gelar on tu si Nero nang pe ndang disurat di Bibel. Dipangke do nang hata “Kesar” di Angka Buku Junani Kristen laho patuduhon sada harajaon manang negara.—Mrk 12:17; Ul 25:12.
Kristus.
Gelar ni Jesus, sian bahasa Junani Khristos, na sarupa lapatanna tu hata “Messias” manang “Na dipillit” di bahasa Heber.—Mat 1:16; Joh 1:41.
Kuburan.
Molo disurathon mamangke huruf na gelleng, on patuduhon kuburan ni sasahalak. Alai molo disurathon mamangke huruf na balga, on patuduhon kuburan umum, di bahasa Heber “Syeol” jala di bahasa Junani “Hades”. Inganan i manggombarhon halak na mate na so boi mangulahon manang aha pe.—1Mus 47:30; Pjm 9:10; Mat 27:61; Ul 2:31.
Kursi panguhuman.
Somalna sada panggung na boi diida jolma natorop. Hundul ma disi angka pejabat laho paboahon keputusan ni nasida. Hata “Kursi Panguhuman ni Debata” dohot “Kursi Panguhuman ni Kristus” manggombarhon panguhuman ni Jahowa tu sude jolma di ari na naeng ro.—Rom 14:10; 2Kor 5:10; Joh 19:13.
Kusta.
Sahit na posi di kulit. Ndang sarupa sahit kusta na dipaboa di Bibel tu sahit kusta na saonari. Di Bibel, adong do dipaboa taringot tu pangkean dohot jabu na hona sahit kusta.—3Mus 14:54; Luk 5:12.
L
Langgatan.
Sada bangunan na dipajongjong sian tano, angka batu, dohot hau na marlampis logam. Dipajongjong pe on laho mamelehon pelean dohot daupa. Di ruangan na parjolo di tabernakel dohot di bagas joro adong do langgatan na gelleng na sian mas laho manutung daupa. Langgatan i dibahen sian hau na marlampis mas. Di alaman ni bagas joro adong do muse langgatan na umbalga na sian tombaga, laho mamelehon pelean situtungon. Halak na so manomba Debata pe jotjot do mamangke langgatan.—2Mus 39:38, 39; 1Raj 6:20; Mat 5:23, 24; Luk 1:11; Ul 17:23.
Laut api.
“Laut api barerang na marnala-nala” manggombarhon “hamatean na paduahon”. Disampathon ma tusi Sibolis, angka halak na so olo muba, hamatean dohot Kuburan (Hades). Laut api on manggombarhon hamatean na saleleng ni lelengna, ndang patuduhon na adong api naroko. Ai ndang boi matutung angka suru-suruan na jahat, hamatean dohot Kuburan umum.—Pgk 19:20; 20:14, 15; 21:8.
Legion.
Lepi.
Anak ni si Jakkob na patoluhon sian si Lea. Di pudian ni ari dibahen ma i gabe marga ni halak Israel. Tolu anak ni si Lepi ma na gabe tolu punguan ni halak Lepi. Hata “halak Lepi” patuduhon sude halak Israel na marga Lepi, alai ndang dohot malim na sian pinompar ni si Aron. Ndang mandapot parbagianan halak Lepi di tano na dijanjihon i. Alai diloas do nasida maringanan di 48 kota na di inganan ni marga na asing.—5Mus 10:8; 1Kron 6:1; Heb 7:11.
Lepton.
Di tingki ni Angka Buku Junani Kristen, hepeng logam lepton ma hepeng na umotik argana. Di piga-piga ayat ni Bibel, didok do on hepeng logam na otik argana.—Mrk 12:42; Luk 21:2, surat na di toru.
Linsing-linsing.
Pinsur do ujung ni linsing-linsing na disurat di Angka Buku Junani Kristen.—Joh 19:1.
Lombang na mansai bagas.
Sian bahasa Junani abysos, lapatanna “mansai bagas” manang “ndang boi diukur”. Dipangke do hata on di Angka Buku Junani Kristen laho patuduhon na tarhurung manang na di bagasan kuburan.—Luk 8:31; Rom 10:7; Pgk 20:3.
M
Makedonia.
Sada luat di utara ni Junani, na gabe tarbarita dung mamarenta si Aleksander Agung sahat tu na marhuaso halak Rom disi. Nunga gabe provinsi ni Rom kota Makedonia tingki ro si Paulus parjolo sahali tusi. Tolu hali ma si Paulus ro tu kota i.—Ul 16:9.
Malim.
Halak na disuru Debata laho mangajari angka halak taringot tu Ibana dohot angka parentana. Marhite malim do bangso ni Debata mangkatai tu Ibana. Marhite malim do naposo ni Debata mamelehon pelean, mangkatai, jala martangiang. Andorang so adong Patik ni si Musa, angka Ama do na gabe malim ni keluarga. Dung adong patik ni si Musa, angka halak Lepi pinompar ni si Aron ma na gabe malim jala dohot do angka halak Lepi na asing mangurupi nasida. Alai dung adong parjanjian baru, Israel ni Debata ma na gabe angka malim jala Jesus Kristus ma na gabe sintua ni malim.—2Mus 28:41; Heb 9:24; Pgk 5:10.
Malim Kepala.
Istilah na asing tu “sintua ni malim” di Angka Buku Heber. Di Angka Buku Junani Kristen lapatanna, halak na ringkot di hamalimon. Olo do ra dohot disi sintua ni malim naung diganti dohot angka pamimpin ni malim na 24 punguan.—2Kron 26:20; Esr 7:5; Mat 2:4; Mrk 8:31.
Mangalangkup.
Sahalak baoa manang sahalak borua naung marhasohotan alai mangulahon seks dohot na asing na so dongan saripena.—2Mus 20:14; Mat 5:27; 19:9.
Mangampehon tangan.
Diampehon do tangan tu sasahalak tingki dipillit laho mangulahon sada ulaon, tingki dipasu-pasu, tingki dipamalum manang asa songgop tondi parbadia tu ibana.—4Mus 27:18; Ul 19:6; 1Tim 5:22.
Mangandungi.
Lungun ni roha ala mate sasahalak manang ala adong na masa. Dipaboa di Bibel, olo do halak mangandungi manang na piga leleng. Halak na mangandungi olo do mangangguhi, mambahen orbuk di ulu ni nasida, marabit goni jala manompuhi andora ni nasida. Adong do halak na karejona mangandungi jala jotjot do halak sisongon i dijou tu ulaon adat tu na mate.—Est 4:3; Mat 11:17; Mrk 5:38; Joh 11:33; Pgk 21:4.
Manimbil.
Di bahasa Junani apostasia lapatanna “mandao sian”. Boi do muse lapatanna “lari, manadingkon manang mangalo”. Di Angka Buku Junani Kristen, hata “manimbil”, jotjot do dipangke tu angka halak na mandao jala mangalo Debata.—Poda 11:9; Ul 21:21, surat na di toru; 2Tes 2:3, surat na di toru.
Manna.
Sipanganon na diparade Jahowa tu halak Israel saleleng 40 taon nasida di padang pasir. Ganup manogot asing ni ari Sabbat, turun ma manna sian banua ginjang. Tingki parjolo sahali halak Israel mangida i, didok nasida ma, “Aha do i?” Manang di bahasa Heber, “manhu?” (2Mus 16:13-15, 35) Hea do muse Jesus dipatudos tu manna.—Joh 6:49, 50.
Mardosa.
Marhobas tu Debata.
Media.
Pinompar ni si Japet sian si Madai do halak Media. Nasida maringanan di angka dolok di dataran tinggi Iran, na di pudian ni ari gabe negara Media. Adong do halak Media na ro tu Jerusalem tingki Perayaan Pentakosta taon 33 M.—Ul 2:9.
Messias.
Sian bahasa Heber na lapatanna “dimiahi” manang “na dimiahi”. Sarupa do lapatan ni hata Messias tu hata “Kristus” di bahasa Junani.—Dan 9:25; Joh 1:41.
Meterai; segel.
Dibahen do meterai manang segel (somalna tu tano liat manang tu lilin) laho patuduhon na tutu sada hatorangan manang parjanjian. Meterai najolo dibahen sian batu, gading manang sian hau jala tarsurat do disi huruf manang gambar na tarbalik. Molo dibahen meterai tu sada surat, on patuduhon na tutu manang na dirahasiahon do hatorangan na di surat i.—Joh 6:27; Eps 1:13; Pgk 5:1; 9:4.
Mil.
Hata na jotjot dipangke laho paboahon sadia dao pardalanan. Holan sahali do disurat di Buku Junani Kristen, i ma di Mateus 5:41, surat na di toru. Na nidokna disi i ma mil ni halak Rom na daona dos tu 1.479,5 m.
Mina.
Hata na jotjot dipangke laho paboahon sadia borat jala dipangke do on gabe goar ni hepeng. Di Angka Buku Junani Kristen, sada mina dos do tu 100 drakhma. Jala sada mina boratna dos tu 340 gr.—Luk 19:13.
Mir.
Gota ni ramba na marsuga sian hau Commiphora. Dipamasuk do Mir tu miak na diusehon tu sasahalak na dipillit. Ala angur, dibahen do Mir tu pangkean manang tu podoman. Dibahen do muse Mir tu miak na dipangke laho mandampol jala dipangke do on tingki paradehon bangke na laho ditanom.—2Mus 30:23; Poda 7:17; Mrk 15:23; Joh 19:39.
Molok.
Debata ni halak Ammon. Dos do ra tu Malkam dohot Milkom.—Ul 7:43.
Muba.
N
Na parjolo.
Somalna, on patuduhon anak baoa siangkangan. Di Bibel, sangap do dibahen tu anak siangkangan jala ibana do na gabe ulu ni keluarga molo mate bapakna. Jesus ndang holan na parjolo, alai ibana pe tompaan ni Jahowa na parjolo jala na parjolo hehe sian angka na mate.—1Mus 25:33; 2Mus 11:5; Kol 1:15; Pgk 1:5.
Nardus.
Miak na angur jala na mansai arga. Sian suan-suanan nardus (Nardostachys jatamansi) do on dibuat jala marwarna na rara. Ala arga, jotjot do Nardus dicampur dohot miak na asing na ummura. Alai si Markus dohot si Johannes mandok, “Miak nardus na angur na mansai arga” do na diusehon tu Jesus.—Mrk 14:3; Joh 12:3.
Nisan.
Dung kaluar sian Babel, on ma goar na baru tu bulan Abib. Di kalender ni agama Jahudi, on ma bulan na parjolo jala dos ma on tu bulan Maret manang bulan April di kalender ni godangan halak saonari. (Neh 2:1) Tanggal 14 Nisan do halak Jahudi mangarayahon Paska jala di ari i ma disuru Jesus asa diulahon parningotan ari hamamatena. (Luk 22:15, 19, 20) Laos di ari i ma muse Jesus dipakkuhon tu sada hau.—Luk 23:44-46.
P
Paiashon diri.
Di Bibel, hata paiashon diri ndang holan paiashon pamatang, alai on patuduhon na ingkon marsitutu do halak asa unang mangulahon na ramun, mangalangkup manang mangulahon ulaon na mambahen sogo roha ni Debata. Di Patik ni si Musa, on patuduhon ulaon paiashon diri.—3Mus 10:10; Ps 51:9; Mat 8:2; 1Kor 6:11.
Pamimpin.
Dipangke do on laho patuduhon ulaon ni Jesus na ringkot, i ma paluahon jolma sian hamatean jala manogu-nogu nasida tu hangoluan na saleleng ni lelengna.—Ul 3:15; 5:31; Heb 2:10; 12:2.
Pamimpin ni suru-suruan.
Pangaradoti.
Sahalak baoa na mangaradoti jala na mamparrohahon angka ruas di huria. Di hata Junani episkopos lapatanna mangaradoti laho manjaga. Sarupa do hata “pangaradoti” tu hata “sintua”. Hata “sintua” patuduhon na togu do haporseaonna. Jala hata “pangaradoti” patuduhon na ingkon sibahenonna laho mangaradoti huria.—Ul 20:28; 1Tim 3:2-7; 1Ptr 5:2.
Panjaga.
Na manjaga angka halak manang inganan tingki adong bahaya. Somalna tingki borngin do nasida marjaga. Dibahen ibana ma tanda molo adong ro musu. Somalna di ginjang tembok do jongjong panjaga asa boi diida ibana sian na dao angka halak na ro tu inganan i. Angka tentara pe jotjot do didok panjaga.—Mat 27:65; 28:4.
Panutup ni jaman on.
Jaman andorang so diripashon portibi na dirajai Sibolis. Sarupa do on dohot haroro ni Kristus. Sirangon ni angka suru-suruan na diuluhon Kristus ma “parjahat sian halak na mangulahon na sintong” jala diripashon ma parjahat i. (Mat 13:40-42, 49) Lomo do roha ni angka sisean ni Jesus mamboto “panutup” ni jaman on. (Mat 24:3) Andorang so mulak tu banua ginjang, marjanji do Jesus laho mandongani angka siihuthon ibana sahat tu panutup ni jaman on.—Mat 28:20.
Paradeiso.
Taman manang inganan na bagak. Porlak Eden ma inganan na bagak na parjolo sahali dibahen Jahowa laho inganan ni jolma na parjolo. Tingki mangkatai Jesus tu parjahat na dipakkuhon di siamunna, dipaboa Jesus do taringot Paradeiso na di tano on. Di 2 Korint 12:4 hata “paradeiso” patuduhon paradeiso di ari na naeng ro. Di Pangungkapon 2:7, hata “paradeiso ni Debata” patuduhon banua ginjang.—Ende 4:13; Luk 23:43.
Parbue na parjolo.
Parbue na parjolo dipanen di tingki musimna. Ingkon dipelehon bangso Israel do tu Jahowa angka parbue na parjolo. Umpamana jolma, binatang, dohot angka parbue ni suan-suanan ni nasida. Ganup taon, halak Israel ingkon mangalehon parbue na parjolo tingki Perayaan roti na so marragi dohot tingki Perayaan Pentakosta. Hata “na parjolo” dipangke do muse laho manggombarhon Kristus dohot angka siihuthon ibana na dimiahi.—1Kor 15:23; 4Mus 15:21; Poda 3:9; Pgk 14:4.
Pardegean.
Di pardegean najolo, mardege do halak laho manirang durame sian eme. Molo godang emena, dipangke ma alat na ditarik binatang. Digiling alat i ma eme na adong di inganan pardegean i. Somalna, di inganan na datar jala na timbo do pardegean i, ala godang alogo disi.—3Mus 26:5; Jes 41:15; Mat 3:12.
Parhapistaran.
Halak na mamareso parhusor ni mata ni ari, bulan, dohot angka bintang laho mamboto na masa di tingki na naeng ro.—Mat 2:1.
Parhitean.
Sasahalak na padomuhon dua halak na marmusu. Di Bibel, si Musa do na didok gabe parhitean parjanjian Patik jala Jesus ma na gabe parhitean parjanjian baru.—Gal 3:19; 1Tim 2:5; Heb 12:24.
Parhobas.
Sian hata Junani diakonos. Hata “parhobas” lapatanna halak na mangurupi angka sintua na di huria. Di Bibel adong do disurat tudu-tudu na ingkon diihuthon sasahalak andorang so gabe parhobas ibana.—1Tim 3:8-10, 12.
Parise.
Sekte ni agama Jahudi na godang ditanda halak tingki di abad na parjolo. Ndang pinompar ni angka malim nasida. Alai diulahon nasida do sude patik ni si Musa dohot angka hasomalan na so adong disurat di patik i. (Mat 23:23) Ndang olo nasida mangihuthon adat ni halak Junani. Ala siboto Patik do nasida, gabe mabiar do angka halak tu nasida. (Mat 23:2-6) Adong do halak Parise na gabe anggota ni Sanhedrin. Jotjot do nasida marsoal dohot Jesus alani Sabbat, alani adat dohot ala na olo Jesus mardongan tu angka pardosa dohot sijalo pajak. Adong do halak Parise na gabe porsea tu Jesus, songon si Saulus na sian Tarsus.—Mat 9:11; 12:14; Mrk 7:5; Luk 6:2; Ul 26:5.
Parjanjian.
Janji ni Debata tu jolma manang janji ni jolma tu jolma na asing. Sipata holan sada pihak do na ingkon mangulahon parjanjian i. Digoari ma i parjanjian sada pihak (unilateral). Adong do muse parjanjian na ingkon diulahon dua pihak, digoari ma on parjanjian dua pihak (bilateral). Di Bibel, dipaboa do taringot tu parjanjian ni Debata tu jolma, parjanjian ni angka jolma, angka marga, dohot angka bangso. Parjanjian na binahen ni Debata na balga pangkorhonna, i ma parjanjian ni Debata tu si Abraham, tu si Daud, tu bangso Israel (parjanjian marhite si Musa), dohot parjanjian ni Debata tu Israel ni Debata (padan na imbaru).—1Mus 9:11; 15:18; 21:27; 2Mus 24:7; 2Kron 21:7; Luk 22:29; Ul 3:25; 2Kor 3:6; Heb 8:6.
Partai ni Herodes.
Didok do on tu angka halak na mangihuthon si Herodes. Di tingki pamarentaon ni Rom, partai on ma na gumodang mangurupi si Herodes. Dohot do deba sian halak Saduse gabe anggota ni partai on. Jala angka halak na sian partai on do na mangurupi halak Parise laho mambunu Jesus.—Mrk 3:6.
Paska.
Perayaan na diulahon di bulan Abib (di pudian ni ari didok do bulan Nisan) di ganup taon. Perayaan on dibahen laho paingothon halak Israel tingki kaluar sian tano Mesir. Di perayaan i, dipanggang do anak ni biru-biru manang hambing jala dipangan ma i rap dohot sayur na paet dohot roti na so marragi.—2Mus 12:27; Joh 6:4; 1Kor 5:7.
Pasung.
Patik ni si Musa.
Patik.
On patuduhon Patik na dilehon Jahowa tu halak Israel marhite si Musa tingki di padang pasir Sinai taon 1513 SM. Sipata, lima buku na parjolo na disurat di Bibel didok do Patik ni si Musa.—4Mus 15:16; 5Mus 4:8; Mat 7:12; Gal 3:24.
Pejabat pengadilan.
Di angka huta na dirajai halak Rom, pejabat pengadilan ma na gabe wakil ni pamarenta. Nasida ma na mangatur parhepengon, manguhum angka parjahat, jala na mangatur asa dame luat i.—Ul 16:20.
Pelean hasesaan ni dosa.
Pelean na dipelehon ala mangulahon dosa na so disengaja. Marragam do na boi dipelehon laho manesa dosa sisongon i. Umpamana boi do mangalehon lombu jantan manang darapati, sian na tolap pelehonon ni halak na mardosa i.—3Mus 4:27, 29; Heb 10:8.
Pelean.
Pelean na dilehon tu Debata laho patuduhon hamauliateon, mangakkui hasalaan jala laho mardenggan tu Debata. Mulai sian tingki ni si Abel, ndang adong dope aturan na mandok ingkon mangalehon pelean tu Debata. Di Patik ni si Musa pe adong aturan taringot tu mangalehon pelean. Dung dipelehon Jesus ngoluna, ndang porlu be halak Kristen mamelehon binatang. Alai ingkon dilehon halak Kristen dope pelean ni nasida tu Debata.—1Mus 4:4; Heb 13:15, 16; 1Joh 4:10.
Pelean siinumon.
Anggur na gabe pelean siinumon diusehon tu langgatan raphon angka pelean na asing. Didok si Paulus do ibana gabe pelean siinumon. On patuduhon na rade do ibana mangalehon ngoluna humongkop angka dongan sahaporseaonna.—4Mus 15:5, 7; Plp 2:17.
Pelean Situtungon.
Binatang na ditutung di langgatan laho dipelehon tu Debata. Ingkon himpal do binatang i (lombu jantan, biru-biru jantan, hambing jantan, anduhur, manang darapati) dipelehon tu Debata.—2Mus 29:18; 3Mus 6:2; Mrk 12:33; Heb 10:6.
Pengawal ni istana.
Sada punguan ni tentara Rom na gabe pengawal ni kesar Rom. Marhuaso do pengawal on ala boi do nasida mangurupi manang mangalo sahalak Kesar.—Plp 1:13.
Pentakosta.
On ma perayaan na paduahon na ingkon diulahon sude baoa halak Jahudi di Jerusalem. Hata “Pentakosta” lapatanna “Ari Palimapuluhon”. Di Angka Buku Junani Kristen, didok ma on “Pentakosta”. Di Angka Buku Heber, didok ma on Perayaan Panen manang Perayaan Angka Minggu. Ari palimapuluhon on dietong sian tanggal 16 Nisan.—2Mus 23:16; 34:22; Ul 2:1.
Perayaan Pabadiahon bagas joro.
Parningotan na diulahon ganup taon laho paiashon bagas joro ala naung ramun binahen ni si Antiokhus Epifanes. Dimulai ma perayaan i tanggal 25 Khislew jala diulahon ma i saleleng ualu ari.—Joh 10:22.
Perayaan Roti na So Marragi.
On ma perayaan na parjolo sian tolu perayaan na ingkon diulahon halak Israel. Dimulai ma on tanggal 15 Nisan sadari dung sae Paska, jala saleleng pitu ari ma on diulahon. Holan roti na so marragi do na boi diallang nasida tingki i, laho paingothon nasida tingki kaluar sian tano Mesir.—2Mus 23:15; Mrk 14:1.
Perayaan Tabernakel.
Didok do muse perayaan on perayaan parlape-lapean, jala diulahon ma on mulai sian 15-21 Etanim laho patuduhon las ni roha ni halak Israel ala panen di ujung taon. Saleleng mangulahon perayaan i, halak Israel tading di sopo na sian bulung-bulung laho marningot pardalanan ni nasida kaluar sian tano Mesir. On ma sada sian tolu perayaan na diulahon halak Israel. Di tingki i, ingkon laho do sude baoa tu Jerusalem laho mangulahon perayaan i.—3Mus 23:34; Esr 3:4; Joh 7:2.
Perlengkapan porang.
Angka perlengkapan porang na dipangke angka tentara, i ma tangkuluk bosi, baju partahanan, ikat pinggang, sipatu, dohot perisai.—1Sam 31:9; Eps 6:13-17.
Pneuma.
Sian bahasa Heber ruach jala di bahasa Junani pneuma, lapatanna “hosa”. Boi do marragam lapatan ni dua hata on, jala sude patuduhon angka na so boi diida jolma alai boi marhusor jala margogo. Dua hata i boi mangartihon, (1) alogo, (2) hosa, (3) roha manang pingkiran na manjujui hita mandok hata manang mangulahon sada ulaon, (4) surirang, (5) Jahowa, Jesus, suru-suruan dohot suru-suruan na jahat, (6) tondi parbadia.—2Mus 35:21; Ps 104:29; Mat 12:43; Luk 11:13, surat na di toru.
Porneia.
—Ida SEKS NA SO PATUT.
Poti parpadanan.
Poti na dibahen sian hau akasia jala dilampis dohot mas. Di Inganan na Badia na di tabernakel do dibahen poti on, jala di pudian ni ari dibahen ma on di Inganan na Mansai Badia na di bagas joro na dipajongjong si Salomo. Sian mas do panutup ni poti on jala adong do dua patung ni kerubim na paadop-adop bohi di ginjangna. Di bagasan poti i do dibahen dua batu lei na marsurat sampulu patik.—5Mus 31:26; 1Raj 6:19; Heb 9:4.
Proselit.
Halak na marganti agama. Di Bibel, on patuduhon halak na mangihuthon agama Jahudi. Ingkon disunat do baoa na gabe proselit.—Mat 23:15; Ul 13:43, surat na di toru.
Psalmen.
Ende puji-pujian tu Debata. Marhite alat musik, diendehon ma psalmen on tingki manomba Debata. Jala diendehon do on tingki mamuji Jahowa di bagas joro di Jerusalem.—Luk 20:42; Ul 13:33; Jak 5:13.
Puasa.
Ndang mangallang manang aha saleleng tingki naung ditontuhon. Halak Israel marpuasa di tingki Ari Pardamean, tingki adong hasusaan jala tingki naeng mangido tudu-tudu sian Debata. Di bagasan sataon opat hali ma halak Jahudi marpuasa, laho marningot hasusaan na hea dihilala nasida. Alai ndang disuru halak Kristen marpuasa.—Esr 8:21; Jes 58:6; Mat 4:2; 9:14; Luk 18:12; Ul 13:2, 3; 27:9.
R
Ragi.
Molo dipamasuk ragi tu topung, kombang ma i. Manang molo dibahen tu siinumon, gabe maralkohol ma siinumon i. Di Bibel, jotjot do on manggombarhon dosa. Sipata on manggombarhon siihuthon Kristus na lam martamba na so pamotoanta.—2Mus 12:20; Mat 13:33; Gal 5:9.
Rahasia na badia.
Sangkap ni Debata na ditabunihon sahat tu tingki na ditontuhon jala holan tu angka halak na pinillitna do on dipaboahon.—Mrk 4:11; Kol 1:26.
Ramun.
Boi do hata on patuduhon pamatang na so ias manang parange na so denggan. Di Bibel, hata on jotjot dipangke laho patuduhon angka na so ias manang na so boi ulahonon hombar tu Patik ni si Musa. (3Mus 5:2; 13:45; Ul 10:14; Eps 5:5)—Ida PAIASHON DIRI.
Roti pelean.
Roti na dibahen di meja na di Inganan na Badia, na adong di tabernakel dohot di bagas joro. Adong 12 roti na disusun gabe dua baris, onom roti sabaris. Dipelehon do roti on tu Debata jala sai diganti do on ganup ari Sabbat. Alai holan malim do na boi mangallang roti naung diganti i.—2Kron 2:3; 2Mus 25:30; 3Mus 24:5-9; Mat 12:4; Heb 9:2.
S
Sabbat.
Di bahasa heber lapatanna “maradi, so”. On ma ari papituhon di halak Jahudi, i ma mulai sian ari Jumat botari sahat tu ari Sabtu botari. Angka perayaan di taon papituhon dohot di taon palimapuluhon pe didok do sabbat. Di Ari Sabbat ndang adong halak na boi mangulahon ulaonna asing ni angka malim na martugas di bagas joro. Ndang boi tano diula di tingki taon Sabbat jala ndang boi halak Heber dipaksa manggarar utang di tingki i. Sasintongna, denggan do aturan ari Sabbat na dibahen di Patik ni si Musa. Alai sai ditambai angka siboto surat do aturan na baru na mambahen susa halak mangihuthon aturan i.—2Mus 20:8; 3Mus 25:4; Luk 13:14-16; Kol 2:16.
Saduse.
Sekte ni agama Jahudi na ditanda godangan halak. Angka halak na mora dohot angka malim do anggota ni sekte Saduse. Ndang olo nasida mangihuthon hasomalan dohot na dihaporseai halak Parise. Ndang porsea nasida na adong haheheon, ndang porsea nasida adong suru-suruan jala dialo nasida do na nidok ni Jesus.—Mat 16:1; Ul 23:8.
Sahit di godang inganan.
Sahit na boi bali tu sude jolma jala boi mambahen mate.—Luk 21:11.
Samaria.
Di Dolok Samaria do dipajongjong kota Samaria. Saleleng 200 taon, kota Samaria ma na gabe ibukota ni Israel na sampulu marga. Alani i gabe sude ma luat i didok Samaria. Tingki di tano on Jesus, luat ni halak Rom na adong di Galilea Utara dohot di Judea Selatan didok do Samaria. Ndang marbarita Jesus tu luat i, alai sipata mamolus do ibana sian luat i jala mangkatai tu halak na disi. Dipangke si Petrus do kunci Harajaon na paduahon tingki dijalo halak Samaria tondi parbadia sian Debata.—1Raj 16:24; Joh 4:7; Ul 8:14.
Sanhedrin.
Mahkamah Agung ni halak Jahudi na di Jerusalem. Tingki di tano on Jesus, adong 71 halak anggota ni Sanhedrin. Dohot ma disi sintua ni malim, sintua ni malim hian, keluarga ni sintua ni malim, angka pangituai, pangituai ni sada-sada marga, angka siboto surat manang angka panurat.—Mrk 15:1; Ul 5:34; 23:1, 6.
Saparsampulu.
Sampulu porsen na ingkon silehonon tarlumobi alani aturan ni agama. (Mal 3:10; 5Mus 26:12; Mat 23:23; Heb 7:5) Di Patik ni si Musa, ingkon dilehon halak Israel do ganup taon saparsampulu sian panen ni nasida manang sian pahan-pahanan ni nasida tu halak Lepi. Dung i dilehon halak Lepi ma saparsampulu sian i tu angka malim pinompar ni si Aron. Adong do muse aturan na asing taringot mangalehon saparsampulu. Ndang dohot halak Kristen mangalehon saparsampulu.
Seks na so patut.
Sian hata Junani porneia na patuduhon sude ulaon seks na so patut. Umpamana mangalangkup, halak na so marhasohotan hape mangulahon seks, baoa na mangulahon seks dohot baoa, borua na mangulahon seks dohot borua, manang mangulahon seks tu binatang. Di buku Pangungkapon didok do agama na so sintong songon boru-boru na so hasea. Ai marale-ale do agama na so sintong tu pamarenta na di portibi on laho mangalului untung dohot hamoraon. (Pgk 14:8; 17:2; 18:3; Mat 5:32; Ul 15:29; Gal 5:19)—Ida BORU-BORU NA SO HASEA.
Sekte.
Sada punguan na porsea tu ajaran ni sasahalak manang ajaran ni agama. Adong dua sekte di agama Jahudi, i ma sekte Parise dohot sekte Saduse. Halak na so Kristen pe mandok sekte ni halak Nasaret do halak Kristen, ala didok roha ni nasida manimbil do halak Kristen sian agama Jahudi. Di pudian ni ari, adong do angka sekte na baru sian tonga-tonga ni halak Kristen. Di buku Pangungkapon, didok ma i “sekte Nikolaus”.—Ul 5:17; 15:5; 24:5; 28:22; Pgk 2:6.
Setan.
Sibolis.
Di Angka Buku Junani Kristen, hata Sibolis mandok tu Setan na lapatanna “Pargabus”. Didok do ibana Sibolis ala sian ibana ma haroro ni gabus taringot tu Jahowa, taringot tu hata ni Debata dohot taringot tu goarna.—Mat 4:1; Joh 8:44; Pgk 12:9.
Siboto surat.
Na manurat muse Angka Buku Heber. Tingki di tano on Jesus, dialo siboto surat do na nidok ni Jesus.—Esr 7:6; Mrk 12:38, 39; 14:1.
Sihapor.
Hama na jotjot marpungu-pungu jala marpinda-pinda. Mangihuthon Patik ni si Musa, boi do sihapor dipangan. Didok do ro bala molo ro sapunguan sihapor mangallang manang manegai suan-suanan di sada inganan.—2Mus 10:14; Mat 3:4.
Sijujur nasib.
Sasahalak na mangangku boi mamboto na laho masa di ari na naeng ro. Di Bibel, adong do piga-piga na sarupa tu sijujur nasib. Umpamana datu, halak na manjaha gurat-gurat ni tangan, dohot na asing.—3Mus 19:31; 5Mus 18:11; Ul 16:16.
Silehon-lehon.
Nang pe ndang tangkas parenta on dibahen di Angka Buku Heber, alai adong do patik na dilehon tu halak Israel asa olo nasida mangurupi angka na pogos.—Mat 6:2.
Sinagoga.
Hata on lapatanna “papunguhon; parpunguan”. Alai di godangan ayat, on patuduhon inganan parpunguan ni halak Jahudi. Disi ma nasida manjaha hata ni Debata, manangihon tudu-tudu, marbarita na uli, jala martangiang. Tingki di tano on Jesus, adong do sinagoga di angka kota na balga di Israel. Jala di angka kota na umbalga, olo do adong piga-piga sinagoga.—Luk 4:16; Ul 13:14, 15.
Sintua.
Sahalak baoa na martanggung jawab di sada huta manang sada bangso. Dipaboa di buku Pangungkapon, adong do angka sintua di banua ginjang. Hata Junani presbyteros diterjemahon gabe hata “sintua”, na patuduhon sasahalak na mangurupi manang na martanggung jawab di huria.—2Mus 4:29; Poda 31:23; 1Tim 5:17; Pgk 4:4.
Sintua ni malim.
Hombar tu patik ni si Musa, sintua ni malim do na pasahathon pangidoan ni halak Israel tu Debata jala na mangaradoti angka malim na asing. Holan ibana do na boi masuk tu Inganan na Mansai Badia, i ma inganan na sumurung di tabernakel nang di bagas joro. Holan sahali do sintua ni malim masuk tu inganan i, i ma di Ari Pardamean. Hata ‘sintua ni malim’ pe marlangku do tu Jesus Kristus.—3Mus 16:2, 17; 21:10; Mat 26:3; Heb 4:14.
Sion; Dolok Sion.
Goar ni kota ni halak Jebus na marbenteng, di dolok na adong di tenggara ni Jerusalem. Dung ditaluhon si Daud kota i, dipajongjong ibana ma disi istana. Gabe digoari ma i ‘kota ni si Daud’. (2Sam 5:7, 9) Gabe dolok na dipabadia ma dolok Sion dung dipapinda si Daud Poti Parpadanan tusi. Di pudian ni ari, dohot do inganan ni bagas joro na di Dolok Moria didok Sion. Di Angka Buku Junani Kristen, jotjot do hata “Sion” dibahen gabe gombaran.—Ps 2:6; 1Ptr 2:6; Pgk 14:1.
Siria.
Sirtis.
Dua pantai na bidang jala na jempek di pesisir Libia, Afrika Utara. Di toru ni aek i, godang do pasir na pungu ala diboan galumbang ni laut. Alani i, mabiar do angka parlaut mamolus sian i ala boi do sega kapal dibahen i.—Ul 27:17.
Sitopa hudon.
Stoa.
Ahli filsafat Junani na mandok ingkon mangihuthon pingkiran dohot angka tompaan do jolma mangolu. Didok nasida, halak na marbisuk ndang parduli tu hasusaan manang hasonangan.—Ul 17:18.
Suan-suanan na Paet.
Suan-suanan na mansai paet jala mansai bau. Hata “Suan-suanan na Paet” di Pangungkapon 8:11 patuduhon suan-suanan na paet jala na marasun na didok absintos.
Suhi-suhi ni langgatan.
Di opat suhi ni langgatan na dos songon tanduk jala ujungna dompak luar ni langgatan.—3Mus 8:15; 1Raj 2:28; Pgk 9:13.
Sumpa.
Olo do halak marsumpa laho patuduhon na tutu janji manang hatana. Somalna marhite na umtimbo do halak marsumpa. Umpamana, marsumpa marhite Debata. Marsumpa do nang Debata laho patuduhon na tutu do parjanjianna tu si Abraham.—1Mus 14:22; Heb 6:16, 17.
Sunat.
Manggusting kulit luar ni alat kelamin ni baoa. Ulaon on diparentahon tu si Abraham dohot tu angka pinomparna, alai ndang ingkon ulahonon ni halak Kristen on. Jala adong do muse lapatan ni sunat na asing.—1Mus 17:10; 1Kor 7:19; Plp 3:3.
Sunge Euprat.
Sunge na umganjang jala na rumingkot di Asia barat daya, on ma sada sian dua sunge na rumingkot di Mesopotamia. Parjolo sahali disurat goar ni sunge on di 1 Musa 2:14 tingki paboahon opat sunge na adong di porlak Eden. Sunge on ma parbatasan ni Israel di utara.—1Mus 15:18; Pgk 9:14; 16:12.
Surat na Badia.
Hata ni Debata na disurat. Holan di Angka Buku Junani Kristen do disurat hata “Surat na Badia”.—Luk 24:27; 2Tim 3:16.
Surirang.
Barita na sian Debata na paboahon taringot tu sangkap manang lomo ni rohana. Surirang boi do paboahon angka ajaran na denggan, paboahon parenta, manang panguhuman ni Debata manang paboahon angka na laho masa.—Mat 13:14; 2Ptr 1:20, 21.
Suru-suruan na jahat.
Suru-suruan na mulana burju alai muba gabe jahat. Ndang boi taida jala balga do huaso dohot gogo ni nasida. Di 1 Musa 6:2, didok do nasida “anak ni Debata”. Jala di Judas 6 didok do nasida “angka suru-suruan”. Burju do nasida tingki ditompa Debata. Alai, di tingki ni si Noak mangalo do nasida tu Jahowa mangihuthon Sibolis. Alani i, gabe musu ni Debata ma nasida.—5Mus 32:17; Luk 8:30; Ul 16:16; Jak 2:19.
Suru-suruan.
Sian bahasa Heber malakh jala di bahasa Junani aggelos, lapatanna “suruan”. Alai diterjemahon do on gabe “suru-suruan” molo mandok angka suruan na adong di surgo. (1Mus 16:7; 32:3; Jak 2:25; Pgk 22:8) Margogo situtu do angka suru-suruan. Andorang so ditompa Debata jolma, nunga ditompa suru-suruan. Di Bibel didok do nasida “angka na badia marribu-ribu”, “anak ni Debata”, dohot “angka bintang”. (5Mus 33:2; Job 1:6; 38:7; Jud 14) Sada-sada do nasida ditompa jala ndang na laho marpinompari nasida ditompa. Lobi sian 100 juta do godang ni nasida. (Dan 7:10) Didok di Bibel, adong do goar ni nasida ganup marsada-sada jala ndang sai sarupa parange ni nasida. Serep do roha ni nasida jala ndang olo disomba. Jala godangan sian nasida, ndang olo paboahon goarna. (1Mus 32:29; Luk 1:26; Pgk 22:8, 9) Marasing-asing do tugas dohot tanggung jawabna, adong do na marhobas di jolo ni habangsa ni Jahowa, pasahathon barita sian Debata, mangurupi angka naposo ni Jahowa na di tano on, mangulahon panguhuman ni Debata, jala mangurupi ulaon marbarita na uli. (2Raj 19:35; Ps 34:8; Mat 4:11; Luk 1:30, 31; Pgk 5:11; 14:6) Di tingki na naeng ro, dohot do nasida marporang rap dohot Jesus di Armagedon.—Pgk 19:14, 15.
T
Talenta.
Hata na jotjot dipangke laho paboahon sadia borat. Di halak Heber, hata on ma na dipangke laho patuduhon sada barang na umborat jala dipangke do hata on gabe goar ni hepeng ni nasida. Sada talenta dos tu 34,2 kg. Sada talenta ni halak Junani dos tu 20,4 kg.—1Kron 22:14; Mat 18:24.
Tanda halongangan.
Ulaon na so tolap diulahon jolma. Ingkon na marhuaso na balga do na boi mangulahon on.—Mat 11:20; Ul 4:22; Heb 2:4.
Tanda.
Ulaon manang situasi na so somal masa, na adong lapatanna. Boi do on manggombarhon manang patuduhon angka naung masa manang angka na laho masa.—Mat 24:3.
Tanduk.
On patuduhon tanduk ni binatang na dipangke gabe inganan panginuman, inganan ni miak, inganan ni tinta, inganan ni badak jala gabe tarompet na dipangke laho marmusik dohot paboahon na masa. (1Sam 16:1, 13; 1Raj 1:39; Hes 9:2) Hata “tanduk” jotjot manggombarhon gogo, manaluhon dohot hamonangan.—5Mus 33:17; Mik 4:13; Luk 1:69, surat na di toru.
Tardidi.
Lapatan ni hata on, i ma “dibonomhon” di aek. Jesus mandok, ingkon tardidi do halak na laho gabe siseanna. Dipaboa Bibel do muse taringot tu pandidion ni si Johannes, pandidion marhite tondi parbadia, pandidion marhite api, dohot na asing.—Mat 3:11, 16; 28:19; Joh 3:23; 1Ptr 3:21.
Tarompet.
Dibahen sian logam, na dipangke laho marmusik dohot laho paboahon tanda. Jotjot do panguhuman ni Jahowa dohot angka na diulahon Jahowa dipaboa mardongan soara ni tarompet.—1Kor 15:52; Pgk 8:7–11:15.
Tartarus.
Di Angka Buku Junani Kristen, hata “Tartarus” lapatanna dibahen gabe lea songon na dihurung di penjara. Hira na disampathon tu inganan i ma angka suru-suruan na jahat di tingki ni si Noak. Di 2 Petrus 2:4, hata ‘disampathon tu Tartarus’ ndang na patuduhon disampathon “angka suru-suruan na mardosa” i tu sada inganan na margoar Tartarus na dihaporseai na so sisomba Jahowa (penjara na golap na di toru ni tano, inganan ni angka dewa na hurang sangap). Alai on patuduhon na diuhum Debata do nasida. Maringanan di banua ginjang hian do nasida alai gabe ndang boi be diida nasida sangkap ni Debata, dos songon di inganan na mansai golap. Dipaboa di Bibel, na laho diripashon ma nasida rap dohot pemimpin ni nasida, i ma Sibolis. Alani i, Tartarus lapatanna ndang diloas be suru-suruan na jahat i mangulahon lomo ni roha ni Debata. Ndang sarupa Tartarus tu lombang na mansai bagas na disurat di Pangungkapon 20:1-3.
Tiang.
Sipata dibahen do tiang laho marningot sada ulaon na ringkot. Dipangke do angka tiang di bagas joro dohot di istana ni si Salomo. Di Angka Buku Junani Kristen jotjot do tiang dipangke laho manggombarhon pangurupion. (1Tim 3:15) Manang boi do on manggombarhon sasahalak na togu haporseaonna. (Pgk 3:12)—Pangh 16:29; 1Raj 7:21.
Tire.
Abit na bagak ditonun jala adong gombar ni angka kerubim disi. Dipangke do on laho papulikkon Inganan na badia dohot Inganan na Mansai Badia na adong di tabernakel nang na di bagas joro.—2Mus 26:31; 2Kron 3:14; Mat 27:51; Heb 9:3.
Tobusan.
Na ingkon sigararon laho paluahon sasahalak sian parhatobanan, panguhuman, sitaonon, dosa, manang sian sada tanggung jawab. Ndang ingkon hepeng gararna. (Jes 43:3) Adong manang na piga situasi na mangkaporluhon tobusan. Umpamana, ingkon tu Jahowa do dilehon sude anak siangkangan ni jolma manang anak ni sude pahan-pahanan na parjolo tubu. Ingkon ditobus do i molo ndang dipelehon be tu Jahowa. (4Mus 3:45, 46; 18:15, 16) Molo adong lombu na sai mananduk hape ndang dihurung nampunasa, jala gabe dipamate lombu i jolma, ingkon dilehon nampuna lombu i do ganti rugi bahen tobusan asa unang dipamate ibana. (2Mus 21:29, 30) Alai ndang boi dijalo tobusan sian halak na mambunu. (4Mus 35:31) Tobusan na rumingkot na disurat di Bibel, i ma tobusan na dilehon Jesus. Dilehon ibana do ngoluna asa boi paluahon angka jolma na mangoloi sian dosa dohot hamatean.—Ps 49:8, 9; Mat 20:28; Eps 1:7.
Tondi parbadia.
Huaso manang gogo na dipangke Debata laho mangulahon lomo ni rohana. Didok do on badia, ala sian Jahowa na badia do haroro ni huaso on jala dipangke Ibana do huasona i laho mangulahon angka ulaon na badia.—Luk 1:35; Ul 1:8.
Tuan;Tuhan.
Hata Tuan dohot Tuhan na adong di buku Mateus sahat tu Pangungkapon diterjemahon sian hata Kyrios. Lapatan ni Kyrios, i ma tuan, nampuna, manang ulu. Molo Jahowa do na tinuju ni hata on, diterjemahon ma i gabe “Tuhan”.—Joh 13:13; Heb 1:10.
Tungkot bosi.
Tungkot na ganjang jala adong bosi na pinsur di ujungna. Somal do dipangke partani tungkot on palaohon binatang. Hata ‘mangalo ahu’ di buku Ulaon dibuat sian hata “molo sai disipaki ho tungkot bosi”. Hata on dibuat sian hasomalan ni lombu na sai mangalo tu parmahan jala sai manipaki tungkot ni parmahan i, nang pe gabe hansit dihilala lombu i. Tungkot manggombarhon poda ni angka halak na marbisuk na manjujui angka halak na manangihon asa mangihuthon poda i.—Ul 26:14, surat na di toru; Pangh 3:31.
Tungkot.
Na jotjot ditiop sahalak raja. Olo do tungkot dibahen sian hau manang sian bosi.—1Mus 49:10; Heb 1:8.
Tutup ni poti.
Panutup ni poti parpadanan. Di jolo ni poti parpadanan i do malim mamispishon mudar tingki Ari Pardamean. Di bahasa Heber, on lapatanna “manutup dosa” manang “manesa dosa”. Sian mas do dibahen panutup on jala adong dua patung kerubim na dibahen di ujung ni poti parpadanan i.—2Mus 25:17-22; 1Kron 28:11; Heb 9:5.
U
Ulaon na ramun.
Sian bahasa Junani akatharsia. Boi do on lapatanna “seks na so patut, ulaon na ramun, ulaon ni halak na so umboto ila”, songon na disurat di Galatia 5:19. Dohot ma i tu sude angka ulaon na so badia di ulaon seks, di pangkataion, di parniulaon, dohot di parale-aleon ni sasahalak tu Debata. Dosa na balga do mangulahon on.—Rom 6:19; Eps 4:19.
Ulaon ni halak na so umboto ila.
Sian hata Junani aselgeia, na patuduhon ulaon na sala na mangalo patik ni Debata manang na garang. Halak na marparange sisongon on patuduhon na so diargai ibana do huaso, patik, manang aturan ni Debata. Dosa na balga do na nidokna dison.—Gal 5:19; 2Ptr 2:7.
Umpama, poda.
Angka hata na denggan manang cerita na jempek na marisi angka parsiajaran manang hasintongan. Olo do poda na adong di Bibel songon teka-teki. Jala jotjot dipangke tudosan laho paboahon hasintongan. Adong do umpama na dibahen laho mangarehei sasahalak.—Pjm 12:9; 2Ptr 2:22.
Undi.
Manontuhon sipilliton marhite angka batu karikil manang angka hau na gelleng. Dipamasuk ma angka i tu sada inganan, dung i dihutur ma. Batu manang hau na kaluar ma na tarpillit. Jotjotan jolo martangiang do andorang so mambahen undi.—Mat 27:35; Ul 1:26.
Z
Zeus.
Dewa na umtimbo di halak Junani. Di Listra, dirimpu do si Barnabas Zeus. Di angka surat najolo na didapot di jonok ni Listra, adong do didok taringot tu “angka malim ni Zeus” dohot taringot tu “Zeus dewa matahari”. Markapal do si Paulus sian Pulo Malta. Di kapal i adong do partanda na marsurat “Angka Anak ni Zeus” na kembar i ma si Kastor dohot si Poluks.—Ul 14:12; 28:11.